رواية البر التاني الفصل الحادي والستون 61 بقلم لولو محمد
رواية البر التاني الجزء الحادي والستون
رواية البر التاني البارت الحادي والستون
رواية البر التاني الحلقة الحادية والستون
بنت ٢ / لا يا ست هند انا هشرحلك اصل البت توحه دى حكايه تانيه خالص
توحه / بس يا بت
بنت ٢ / لا هحكيلها … اصل سعيد ابن ام سعيد الوليه صاحبه المشغل كان معجب بالبت توحه و عاوز يتجوزها
توحه / كانت سيره و اتفضت بتفتحى فى القديم ليه بقي ان شاء الله
هند / هو سعيد ده وحش
توحه / يغور من بوز امه بقي دى تبقي حماتى اصوم اصوم و افطر على دى
بنت ٢ / الوليه اصلا مش موافقه عليها
توحه / هى تطول اساسا
هند تضحك
هند / اكيد ما تطولش
بنت ٢ / الست بين نارين بين انها مش طيقاها عشان الواد عينه منها و بين انها ما تقدرش تستغنى عنها عشان هى اشطر بنت فى المشغل
هند / و انتى هنا ليه
بنت ٢ / لا انا خارجه خارجه مستنين بس سعاده الباشا اللى جوه يخلص الاجراءات بتاعتى
ام مبروك / اخرجوا ياختى اياكش ما ترجعوش تانى اصلها هى و سلفتها
ام مبروك تشاور على بنت تانيه قاعده ساكته فى جنب
ام مبروك / كل يومين يمسكوا بعض من شعورهم و اجوازتهم غلبوا فيهم اخر ما زهقوا منهم سابوهم ياكلوا فى بعض
بنت ٢ / ضربنى و بكى و سبقنى و اشتكى يرضيكي يا ست هند تضربنى و تيجي تعمل فيا محضر فى القسم
بنت ٣ / انا اللى ضربتك برده و لا انتى اللى بداتى
بنت ٢ / دا انا حياله زقيتك
بنت ٣ تقوم تشد توحه و تقعد مكانها
بنت ٣ / طب انا هشهدك يا ست هند احنا بيت عيله و انتى عارفه الارياف بنصحى من النجمه نجرى على اكل عيشنا من البيت للزريبه انا يطلع عيني و البرطه دى كل يوم مرقعه و سنكحه و لا فيش حاجه بتخلص و كلو بيتكوم فوق راسي انا
بنت ٢ / انتى اللى طبعك حامى … طب اشهدى يا ست هند تروح الزريبه و ترجع بدل ما ترتاح بتقعد تلف البيت تدورلى على غلطه ما عملتيش ده ليه ما خلصتيش ده ليه
بنت ٣ / دا انتى اليوم اللى بتروحى فيه الزريبه البهايم بتدعى عليكي من تلصيقك فى الشغل … و بعدين انا حماتى ست كبيره لما بتلاقي حاجه ناقصه بتقوم تعملها و دى ست كبيره قد امى و البلوه دى تنحه ما عندهاش دم
بنت ٢ / انا سكتالك احتراما لست هند قسما بالله اقوملك لمى لسانك
هند / خلاص خلاص حقك عليا انا
بنت ٣ / تعرفى يا ست هند والله انا لو عليا ما كنت اتكلمت بس هى لما ما تعملش الحاجه صح انا تانى يوم بعمل الطاق طاقين يعني يرضيكي كدا
بنت ٢ / يعني
ام مبروك تقوم تشدهم من جنبها
ام مبروك / ما تتلموا بقى ليهم حق اجوازتكوا ما يسالوش فيكوا ما صدقوا خلصوا من قرفكوا
هند / و انتى هنا ليه يا ام مبروك لو تسمحيلى اسال يعني
ام مبروك / لا انا خارجه النهرده ان شاء الله خلاص خلصت مدتى
هند / الحمد لله كنتى هنا ليه بقي
ام مبروك / قتلت طليق بنتى … انا ما كنتش عاوزه اموته والله انا كنت بحوش عن البت كانت بتفيص فى ايده ما لقيتش قدامى غير مفرش الترابيزه حطيته على رقبته و شديته عشان يسيب البت ما سابهاش غير و هو بيطلع فى الروح
هند / بس مش كدا دفاع عن النفس
ام مبروك / احنا كنا فى بيته يا ست هند اصل كان فى مشاكل على العيال بسبب ان البت هتتجوز فخد العيال عفينه روحنا نجيبهم ما رضيش كلمه منه كلمه مننا نزل فوق البت ضرب
هند / طب ليه ما طلبتيش من الكبير يرجعلك العيال
ام مبروك / ساعه القدر بقي لما عرفنا انه خطف العيال برج من نافوخنا طار احنا حتى ما استنيناش اخوها يرجع من الغيط و نحكيله … يلا بقي النصيب اجله كدا و نصيبي كدا
هند تهو راسها باب الزنزانه يتفتح هند تقف
العسكرى / اتفضلي معايا يا ست هند
هند / عن اذنكوا
هند تطلع بره و العسكرى يقفل الباب
………………
فى مكتب فارس
مغاورى / يا باشا انا اللى قتلته و الطلق كله خارج من مسدسي و سعادتك حرزته و انا معترف عاوز ايه تانى
فارس / ايوه يا مغاورى فاهمك والله بس المعلومات الجديده اللى لقيناها بتقول ان لولا تدخلك كان فى جريمه تانيه هتحصل هند شريكه فيها
مغاورى / طب مش كان اولى سعادتك تقول الكلمتين دول لمختار الزيني جوزها و اللى على كلام سعادتك كان المستهدف بالقتل بتقولى انا الكلام ده ليه
فارس يبتسم
مغاورى / اعفن خبير خطوط هيطلعها منها اقولك انا الكبيره يا فارس باشا احنا البلد عندنا مردومه كاميرات قدام كل محل و كل عماره و حتى كل كشك
عباس / و كلها شغاله و بالالوان كمان
فرج / و فيها ميزه حلوه اوى انها كلها لاسلكيه من احدث الانواع الكبير كان دافع فيها الشئ الفلانى
مغاورى / لا لا الميزه الاحلى النت يا باشا الصين ما خلتش حاجه دا احنا ممكن ندخل عليها بالموبايل و نشوف كل حاجه
عباس / طبعا مش اى حد يدخل على السيستم مهى مش سبهلله
فرج / احنا صعايده و فلاحين اه بس زى ما سعادتك شايف البلد كلها متعلمين اقلهم اعداديه و الكبير الله يستره ما بيستخسرش فيهم حاجه
عباس / و على العموم يا باشا احنا رجالتنا شغالين على الموضوع ده من ساعه اللى حصل اصل عقبال عيالك الواد فتوح ابن خالتى مهندس شبكات بس انما ايه يعجبك هو اللى مصمم الليله دى كلها عبقرينه عصره و اوانه
امين / ما احنا ما كانش ينفع نسكت بعد اللى حصل الفتره اللى فاتت
عباس / اصل انا فى جدع ابن حرام ضرب عليا نار و فلق فكان لازم نضمن ان اللى جرالى ما يجراش لغيرى و لا ايه ؟
مغاورى/ ايه يا فارس باشا ساكت يعني ؟
فارس باصصلهم و ساكت و هم مبتسمين
امين / هو حضرتك مش هتطلب نسخه من تسجيلات الكاميرات للاطلاع عليها
فارس يسيب المكتب و يطلع بره
فرج / ما كانش المفروض تقوله لحد ما فتوح يخلص و نخلى جلاجل يزفه على النت بالفيديو
امين / حقه كانت تبقي القاضيه و كنا خلصنا
مغاورى / و تفضل بنت الزنايته فى الحجز يا رجاله الزنايته الا فين مختار صحيح دا انا قولت اقلها يهد القسم بالكراكات
فرج و امين يبصوا لبعض و يبصوا للراجل اللى بيكتب المحضر
امين / عامل ايه يا بيومى ازيك و ازى ابنك بقي احسن دلوقت
بيومى / الحمد لله يا سى امين الدكتور بتاع مصر جاب من الاخر ربنا يباركله و يبارك للكبير و يخلصنا من الهم ده على خير
مغاورى / ان عزت اى حاجه
بيومى / خيرك سابق يا سيد الناس
مغاورى / عشت
……………..
فى سرايا الزنايته
مختار خارج من السرايا و هو بيحاول يتكلم فى الموبايل صوت الست / الهاتف اللذى طلبته غير متاح
مختار / يووووه … خليفه فين مفتاح العربيه دى
عبد الله يوقفه
عبد الله / ايه يا عم واخد فى وشك و خارج كدا
مختار / هند فين ؟
عبد الله / خرجت
مختار / طب وسع
عبد الله / كنت عاوزك فى موضوع
مختار / لما ارجع يا عبد الله معلش … يا خليفه
عبد الله / يا مختار هو انا عارف اتلم عليك دا هم خمس دقايق بس
خليفه يناول مختار مفتاح العربيه مختار يبص لعبد الله عبد الله ساكت
مختار / ما تتكلم يا ابني خير
عبد الله / هنا ؟
مختار يهز راسه و يشاور ناحيه المضيفه عبد الله يمشي و مختار وراه و عبد الله مرتبك يدخل المضيفه و يقيد النور و يقعد
عبد الله / تعال اقعد
مختار يقعد
مختار / خير فى ايه انجز انا …
عبد الله / بخصوص الشغل بتاعى
مختار / حد ضايقك و لا ايه
عبد الله / لا بس مش هقدر اوفق
مختار / مفيش مشكله
عبد الله/ و بالليل اكيد هبقي بذاكر
مختار / انت ناقصك حاجه يا عبد الله محتاج حاجه فلوس يعني
عبد الله / الكبير قال هيكتب الكتاب و انا
مختار / انا هجوزهالك مش بس هكتب الكتاب و ما تشغلش بالك بالمصاريف
مختار يقوم عبد الله يمسكه
عبد الله / انت بتقول ايه و مين قالك انى هوافق
مختار / ما سالتكش عن رايك مريم هتتجوز يا تتجوزها انت يا هجوزها لغيرك
مختار يمشي و هو عصبي عبد الله يجرى وراه يشده من ايده مختار يلف و يمسك ايد عبد الله و يتنيهاله ورا ضهره و يزنقه فى العربيه
عبد الله / ايه يا عم الغباوه دى
مختار / اختك فين يا عبد الله
عبد الله / طب سيب و انا اقولك
مختار / انا عفاريت الدنيا بتتنطت قدامى دلوقت اختك فين انطق
عبد الله / سيب يا مختار هتكسرلى دراعى
مختار يزعق فيه
مختار / هند فين
عبد الله / فى القسم فى القسم
مختار يسيبه و هو مصدوم عبد الله يلفله و هو ماسك دراعه
عبد الله / لقوا ادله جديده باين و بيحققوا معاها و الرجاله كلهم راحوا معاها … ايه الغباوه دى
مختار يبص لعبد الله و هو مصدوم
……………
قدام القسم
عباده بيتكلم فى التليفون
عباده / لا انا جاى …. لا اوعى ما يخرجش من السرايا الا اما اجى … اتصرفى يا خديجه ان شالله تبطحيه باى حاجه انا بركب العربيه و جاى اهو … يلا سلام
عباده يفتح العربيه ناصر يفتح الباب الناحيه التانيه
عباده / فى ايه
ناصر / اركب اركب
عباده و ناصر يركبوا و عباده يسوق
عباده / مختار صحى و سال على هند خديجه قالتله انها راحت مشوار مع ام فاتن و امى بس هو مش مقتنع كلمهم فى التليفون و ما ردوش قلق و خارج
ناصر / عرفت مريم كلمتنى زنق عبد الله فى الجنينه و عبد الله مش هيقدر عليه كنا سبنا اتنين تلاته كمان … عرفت المهموز اللى ابن الكلب مجهزهولها
عباده / فاكر انه هيوقع بينا فاكر ان مختار هيصدق
ناصر /لا و انت الصادق هو فاكرنا احنا اللى هنصدق و ساعتها مختار هيقف قصادنا لما الكلام يكتر على مراته
عباده / دا يبقي اتجنن رسمي
ناصر / بس لعبها صح برده ما ننكرش جابها فى الجون
عباده / الظروف خدمته هو كان يعرف انها خارجه
ناصر / بس اللى مش فاهمه الجدع ده كان بيضرب عليهم نار ليه هى مش الحربايه بنت الجزمه دى قالت انها عاوزه الاتنين عايشين
عباده / فكرت انه مثلا يخطفها بس رجعت قولت بطوله كدا ازاى و هو مختار هيسيبها تتخطف كدا و هو عايش شكلها كانت كرت ارهاب
ناصر / مفيش اخبار عن زفت الطين اللى اسمه رشيد
عباده / اهو عمال يبرم فى القلعه الجديده بتاعتها
ناصر / قلعه !!
عباده / واضح انها ما كانتش بتلعب الكام شهر اللى فاتوا دا فى عمال اربعه و عشرين ساعه هناك
ناصر / الحاج شاهين كلمنى امبارح بعتوا ناس حبايبهم من بره البلد يلفوا حوالين المكان من بعيد من بره فيلا زى اى فيلا
عباده / هى فيلا واحده دول التلاته و عامله بينهم شبكه انفاق
ناصر / البت دى شكلها كان نفسها تطلع ابو عمايه بس تنسيقها ما جابهاش ( حيوان الخلد )
عباده / هههههههههههه اقولك ايه بس … المشكله دلوقت ان رشيد مش قادر يتحرك بحريه فى التلت فيلل هو بيحاول بس مش عاوز يافور عشان ما يتكشفش
ناصر / انا بقول قلته احسن من الاول ما بطيقش الجدع ده
عباده / دا بينكش على العلاج بمنكاش
ناصر / شكلها هيطلع بجد ما فيش علاج … و هيطلع مغاورى معاه حق لما قال اللى احنا فيه ده زى الغرغرينا علاجها القطع قبل ما تنتشر و تسمم الجسم كله
عباده / صعبه اوى يا كبير على العموم خلينا فى اللى احنا فيه و بعدين نشوف هنعمل معاها ايه
………………….
فى اوضه رشيد
رشيد ماسك حبايه فى ايده و سمر حاطه ايدها على الحبايه
سمر / والله لو عملتها لاموت نفسي
رشيد / يمكن انا اقدر اتحمل اللى ما تتحمليهوش انتى يمكن اقدر اراقب اللى باكله و اشربه اكتر منك
سمر / و يمكن ما تقدرش و يمكن بدل ما تنجيني تدبس نفسك انا مش هقدر اشوفك بتتعذب مش هقدر اعملك اللى انت بتعمله عشانى
رشيد / مفيش قدامى حل تانى انا مش هقدر امشي من هنا من غير علاج
سمر / مفيش علاج قلتلك مليون مره مفيش علاج مفيش علاج
رشيد / انتى امتى بقيتي كدا دا بقي بعد كل ده
سمر / مهو عشان كل ده لازم ابقي كدا عشان انا تعبت
رشيد/ تمام يبقي اجرب و نشوف
سمر / دى زى طلقه فى دماغك ما فيهاش تجربه نهايتها موته
رشيد / انتى عارفه فى كام واحده غيرك كام واحد كل الناس دى اخرتها موت يعني مفيش امل
سمر / عشان خاطرى يا رشيد لو ليا خاطر عندك لو ليا ذره خاطر واحده بس ما تعمليش فيا و فيك كدا ما تاخدش من السم ده ابوس ايدك ابوس رجلك ما تفكر فى الحكايه دى تانى
رشيد يفتح ايده و تاخد الحبايه منه و تحطها فى الدرج و تقفله و تتنهد
سمر / قوم خد دوش واهدى و تعال نام شويه انت ما بترتحش خالص و دا ماثر على تفكيرك
رشيد يبصلها و يهز راسه و يقوم يدخل الحمام
…………………
على طريق زراعى
مختار سايق العربيه زى المجنون و عبد الله جنبه خايف
عبد الله / يعني اهلك كلهم معاها و انت اللى هتعمل اللى ما اتعملش
مختار / انت بارد ياله اختك اللى هناك دى
عبد الله / اه اختى و مش لوحدها البلد كلها معاها
فجاه عربيه عباده و ناصر تفرمل قدام مختار مختار يفرمل و ينزل زى المجنون و عبد الله ينزل بسرعه
مختار / انتوا بتعملوا ايه هنا و هند فين
ناصر / هند خارجه خارجه و الدنيا كلها هناك
عباده/ بيستفزوك تغلط ما تنولهالوش
مختار / تمام وسع العربيه دى خلينى اروح اشوفها
ناصر / مختار
مختار / ما كانش المفروض تسيبونى نايم
ناصر / انت السبب فى كل ده ما تحاولش تقلب الترابيزه احنا عملنا كدا لمصلحتك
مختار / والله !!! و ماله يا كبير اللى تشوفه .. ممكن نمشي بقي
مختار يتعصب و يخبط على كبوت العربيه عباده يبص لناصر
ناصر / ممكن بس قسما بالله ان اتجننت هناك لتشوف منى اللى عمرك ما شوفته فاهم و لا لا
مختار / فاهم … فاهم يا اخويا
مختار يبص لناصر ناصر يبص لعباده و يروحوا يركبوا مختار يركب عبد الله يركب مع عباده
عبد الله / اعوذ بالله دا قلبته طلعت وحشه اوى
عباده / ضربك و لا ايه
عبد الله / لا يا راجل مش للدرجادى … دا نفخنى … بعد كدا انا اللى هروح مع هند و انت اصطفى معاه
عباده / انا قولت لما يلاقيك انت و الحجه هنا هيطمن
عبد الله / دا اتجنن رسمي
عبد الله يوطى على عباده و يوطى صوته
عبد الله / بيقولى مريم هتتجوز لو مش انت يبقي غيرك
ناصر/ دا على اساس ايه يعني
عبد الله يبص لعباده عباده يطبطب على كتف عبد الله
عبد الله / انا لو عليا مستعجل والله بس هعمل ايه فى مهرها ؟
عباده / خلى اى كلام بعدين خلينا فى اللى احنافيه ده الاول
عبد الله/ حاضر
…………..
فى مكتب فارس
فارس قاعد على المكتب و شاهين قاعد قدامه
فارس / انت بتهددنى
شاهين / استغفر الله تهديد ايه بس … انت اقل من كدا بكتير
فارس يرفع حاجبه
شاهين / انا عارف انك مجرد اراجوز سته بتحركه بكيفها
فارس / انا ممكن احاسبك على كلامك ده و ادفعك تمنه غالى
شاهين / هههههههههههههههههههه طب ما تحاسبني لا بالله عليك تحاسبني … دكر حاسبني … و ساعتها بدل ما كنت هتقدم استقالتك بكيفك هتتسرح بفضيحه و ياريتها تيجي على قد كدا دا شروع فى قتل و سوء استخدام سلطات و كفه شئ و انت ادرى منى بالقانون يا فارس باشا
فارس / و انا اضمن منين انى لو عملت اللى انت عاوزه مش هتنشر الفيديو ده فعلا
شاهين / ما فيش ضمانات لو شوفت وشك تانى هنشره فمن مصلحتك تخفى من قدامى خالص و تخليني انساك احسنلك
الباب يتفتح و يدخل المحافظ الكل يقوم يقف
المحافظ / فى ايه يا فارس هو انا موراييش غيرك و لا ايه ؟ ايه كميه الشكاوى اللى جيالى منك من يوم ما استلمت دى ؟
شاهين / اهلا يا معالي الباشا
المحافظ / اهلا يا حج شاهين ايه يا راجل الغيبه دى كلها انت زعلان مننا و لا ايه
شاهين / و احنا نقدر يا باشا
المحافظ / ممكن افهم بقي يا فارس باشا ايه المهزله اللى بره دى
فارس / ابدا سعادتك انا بس استدعيت مدام هند الجمل عشان اخد اقوالها لقيت البلد كلها جايه معاها
شاهين / معلش سعادتك حضرتك عارف الناس بتحب تتفرج و دى اول مره واحده من حريمنا يدخلوا الحجز
المحافظ / حجز !!! الله مش كنت بتاخد اقوالها و لا ايه
فارس / هتخرج حالا حضرتك
المحافظ/ تمام … و بالنسبه لمغاورى
شاهين / يا باشا مغاورى قتل و معترف و الباشا حرز السلاح و الواقعه زى ما اتكتبت فى المحضر انه كان بيدافع عن مختار الزينى و مراته
فارس / هيخرج سعادتك بس بعد استكمال الاجراءات
المحافظ / طب ما الموضوع محلول اهو امال انا تليفونى ما سكتش من الصبح ليه
شاهين / مستكتر علينا شوفتك و لا ايه يا معالى الباشا طب يمين بالله لا انت متغدى معايا النهرده
المحافظ / هههههههههههه و انت تعرف عنى انى اقدر ارفض عزومتك يا حج
شاهين / يكرم اصلك طب يا فارس باشا هنستاذنك ناخد هند نروحها فى طريقنا لو مش هتحتاج تاخد اقوالها فى حاجه تانيه
فارس / تقدر تمشي و تروح طبعا ثوانى هبعت اجيبها
فارس يبص لشاهين شاهين يبتسم و يبص للمحافظ و يبتسم و يطبطب على كتفه
……………
قدام القسم
المحافظ خارج جنب شاهين و هند ورهم ووراها باقي الرجاله ناصر و مختار يروحوا ناحيتهم ناصر يسلم على المحافظ و مختار يشد هند فى جنب
ناصر / جميلك على راسي من فوق
المحافظ / جميل ايه يا راجل ما تقولش كدا
ناصر / الباشا لازم يتغدى معانا النهرده
شاهين / احلم على قدك اللى سبق اكل النبق
ناصر / هى بقت كدا و لا ايه
المحافظ / ههههههههههههههههههههه الجايات اكتر يا كبير
ناصر / اللى تشوفه يا باشا … اتفضل اتفضل
الكل يركب العربيات و فارس متابع اللى بيحصل من شباك القسم و عينه تيجي فى عين مختار هند تمسك ايده يبصلها و يبتسم و يروحوا يركبوا
…………………….
فى اوضه مختار
هند تدخل و مختار وراها تبصله بيقلع جزمته هند تبتسم
مختار/ ايه اللى حصل ؟ و ليه ما صحتنيش
هند / لقوا عربيه على اول البلد بتاعه الجدع ده فكانوا بياخدوا اقوالى
مختار / و اشمعن انتى ؟ انتى مالك بكل ده ؟
هند / والله يا مختار ما قادره للكلام ده بص انا هدخل اخد دوش و …
مختار يقرب فجاه و يحضنها اوى هند تبتسم
مختار / انا اسف
هند / على ايه طب والله كانت تجربه حلوه و اتعرفت فيها على شويه بنات زى العسل
مختار يبصلها
مختار / اتعرفتى عليهم فين ؟
هند / فى الحجز هيكون فين يعني … هدخل اخد دش فى السريع و اللبس حاجه نضيفه و اجى احكيلك كل حاجه بالتفصيل … تمام يا قلبي ؟
مختار يهز راسه هند تفتح الدولاب و تطلع غيار و تروح تبوس مختار من خده و تدخل الحمام و هو متابعها بحزن الباب يخبط مختار يروح يفتح يلاقي انتصار
انتصار / عاملين ايه
مختار يهز راسه انتصار تبص فى الارض و تتنهد و تبصله
انتصار / الاكل جاهز و ناصر بيسال عليك
مختار / مش وقته يا ام فاتن مش هينفع اعتزريله باى حاجه بالله عليكي
انتصار / و لا يهمك خلاص انا هتصرف
انتصار تبص جوه
مختار / هند فى الحمام
انتصار/ ابعتلكوا الاكل هنا
مختار / انا مش جعان ابعتى مناب هند بس اكيد هى جعانه
انتصار / ما تحطش فى قلبك ياما دقت على الراس طبول و ياما شوفنا و بعدين دى بلدنا و احنا عارفين اهلها و هند كانت معززه مكرمه و اللى حصل ده
مختار / خلاص يا ام فاتن بالله عليكي مش قادر
انتصار / خلاص يا كبدى حاضر انا هنزل و اخليهم يبعتولك الاكل و لو عوزت حاجه كلمنى على المحمول هو فى ايدي
مختار يهز راسه انتصار تمشي مختار يقفل الباب و يروح يشيش الشباك و يبص على الناس الكتير فى الجنينه و عربيات و رجاله هند تطلع من الحمام مختار يبصلها و يقفل الشباك هند تدخل فى السرير
مختار / ما اتاخرتيش
هند / يادوب شويه مايه وخلاص بجد ما نمتش من إمبارح و هموت و انام
مختار ينام جنبها و يحضنها هند تبتسم
مختار / هى حدوته امبارح خلصت على ايه
هند / الجبل كان عالى و اهل القريه ما عرفوش يطلعوه
مختار / يعني ما حدش قدر ياخد من النسر عصفورته
هند / ما حدش يقدر اصلا
مختار / لا ما حدش يقدر
هند تتقلب و تبصله
هند / فارس هيقدم استقالته و يسيب البلد كلها لقوله تسجيلات ليه و هو بيدخل ابن الكلب ده و بيديله سلاح كمان ههههههههههههه دا بينه عبيط باين شوف شكله و انا ماشيه كان شبه الكتكوت المبلول و المحافظ كان موجود بس اسكت انا بقي و انا داخله العساكر و كل البلد تقولش سيده مصر الاولى و لا البنات فى الحجز جم قعدوا جنبى و حكولى مشاكلهم و بجد ما كنتش حاسه انى فى الحجز خالص دا كاننا قاعدين قعده بنات فى الصالون و لا حاجه … انت بتبصلى كدا ليه
مختار / ما كنتيش تستاهلى العيشه دى
هند / ايه شايفلك شوفه تانيه تستاهل عنى و لا ايه ؟
مختار / يا شيخه اتلهى انا قصدى حاجه تانيه خالص
هند / ايوه هتلبسلى الاسود و تشتغلى فى الدراما بقولك ايه يا مختار انا سلاح و شيلت قتل و قتلت ما كانش فاضلى غير حاجتي الادمان و الحبس
مختار يبتسم بحزن و يقوم يقعد
مختار / اسيبك ترتاحى شويه و انزل اشوف ناصر كان عاوزنى فى ايه … هيبعتولك الغدى
هند / لا لا لا هناااااام لما اصحى بقي
مختار / تمام يلا تصبحى على خير
مختار يسيب الاوضه و يمشي و يقفل الباب وراه هند تشد المخده و تحضنها و تنام
…………..
فى اوضه رشيد
رشيد فى الحمام بيستحمى توصله رساله على موبايله سمر تروح تمسك الموبايل و تبص على الحمام و تبص فى الموبايل تانى و تفتحها تلاقى فيها ملف اكسيل تبص على الحمام و تبص على باب الاوضه و تقرقض ضوافرها و تحمل الملف و تفتحه ارقام فوق بعض تفر فيه صوت الميه يقف سمر تتوتر و تفضل تتلفت و فى الاخر تاخد نفس عميق رشيد يفتح الباب لافف وسطه ببشكير سمر تناوله الموبايل
سمر / فى حد بعتلك شيت اكسيل انا لقيته من رقم غريب فتحته
رشيد ياخد منها الموبايل و يرميه على الكومدينو
رشيد / ما تعمليش كدا تانى
سمر / افتكرته حاجه مهمه
رشيد / سمر … دا شغلى و فلوسى … حاجه ما بتفهميش فيها ما تلعبيش فيها
سمر / انا اسفه
رشيد / ما تعمليش كدا تانى و خلاص
سمر / انا بشوفك كتير بتعمل شيتات زى دى و بتوصلك كتير منها
رشيد / قولتلك مليون مره حسابات
سمر / طب ليه مش مسجل الرقم اللى جيالك منه
رشيد / عشان بيغير رقمه كل شويه
سمر / هو مين
رشيد / رجالتى … رجالتى فى كل حته فى الدنيا فى كل بلد … انا جاوبتك … اجابتى فرقت معاكى فى حاجه
سمر / انت اضايقت منى صح
رشيد / انا كدا كدا مضايق فما تاخديش فى بالك
رشيد ياخد غيار من الدولاب
سمر / انت خارج
رشيد / هنزل تحت شويه
سمر / بلاش
رشيد / سمر انا هنا ليه … اقعد جنبك فى الاوضه اكل و اشرب و انام
سمر / انا اسفه
رشيد / خدتى الحبايه
سمر/ خدتها
رشيد / تمام
رشيد ياخد الهدوم و يدخل الحمام سمر تقعد على السرير تعيط
سمر / خدنى بقي يا رب انا تعبت خدنى
…………………….
فى اوضه شيري
مختار يفتح الباب شيري تعمل نفسها نايمه
مختار / ممكن ادخل
شيري تقوم تقعد و تبصله
مختار / انا اسف
شيري / على ايه بس
مختار يروح يقعد قدامها
مختار / انا بجد اسف … بجد … اسف
شيري تطبطب على كتفه
شيري / زمان حياتنا كانت بسيطه كنا فاكرين ان اسوء حاجه ممكن تحصل لهند ان يوسف يتنرفز عليها بس عمرها ما كانت سعيده … معاك انت بقي … هند عملت حاجات و عاشت حاجات عمرى ما كنت اسمع عنها غير فى الافلام
مختار يبص فى الارض شيري تمسك ايده
شيري / بس هند مفيش اسعد منها عبد الله سعيد و ياسمينا طايره من السعاده … و انا كمان مبسوطه
مختار يبصلها
شيري / عبد الله لاول مره يحس ان ليه اهل و عزوه فرحان و بيحب عبد الله كبر و بيحب
مختار يبتسم بكسره
شيرى / و هند … كلكوا حواليها قبل منى تجروا عليها … و انا مطمنه عليها و هى معاك
مختار / اللى حصل ده
شيري / عارفه عارفه … امال كنت هقعد هنا كدا هاديه ازاى
مختار يبص فى الارض
شيري / ما تشيلش نفسك فوق طاقتها … مرحله و هتعدى
مختار يبصلها تبتسم يهز راسه
مختار / انا اسف انى دخلت علي حضرتك كدا من غير استاذان
شيري / اعملك لقمه تاكلها
مختار / تسلم ايدك مش جعان … عن اذنك هسيبك ترتاحى
مختار يقوم و يمشي و شيري متبعاه بحزن
…………………….
قدام القسم
عباده قاعد فى العربيه مع سماح
سماح / يعني كل الناس الداخله و الخارجه دى احسن منى
عباده / طب والله انا اللى غلطان انتى يا بت انتى مش قولتى عاوزه اشوفه و اطمن عليه و انا تنتنى معاكى
سماح / و لاطعنى من ساعتها فى العربيه
عباده / و جبتلك ساقع و شيبسي و شيكولاته و دلعتك اخر دلع يمين بالله ما عملتها مع حد قبل كدا حصل و لا لا
سماح / يا سيدى هو انا عيله صغيره هتسكتنى بحاجات حلوه انا عاوزه ادخل اطمن عليه
عباده / استنى يا بنت الناس لما الدنيا تهدى جوه و الرجل تخف هتقفى وسط العساكر و المجرمين
سماح / دا هى خمس دقايق بس خمس دقايق
عباده ينفخ
عباده / ماشي انزلى
سماح تنزل من العربيه و عباده ينزل و الناس توسعلها الطريق تدخل و عباده وراها يلاقوا فارس خارج من مكتبه
عباده / بعد اذن جنابك يعني هنطمن على مغاورى .. خمس دقايق بس مش هنطول
فارس يهز راسه بانكسار
فارس / اتفضلوا فى مكتبى و هبعت عسكري يناديه
عباده / تشكر يا باشا مش عارفين نودى جمايلك فين
فارس يبتسم و يطلع يقف على باب القسم و عباده و سماح يدخلوا المكتب
………………..
فى سرايا الزنايته
مختار خارج من الباب ناصر يناديله
ناصر / مختار
مختار يقف من غير ما يبص على ناصر
ناصر / تعال المكتب عاوزك
مختار ياخد نفس عميق و يمشي ورا ناصر على المكتب
ناصر / اقفل الباب وراك
ناصر يقعد على الكنبه و مختار يقفل الباب
ناصر / تعال اقعد
مختار يروح يقعد و هو باصص فى الارض
ناصر / ناوى على ايه
مختار / و لا حاجه
ناصر / عليا يا ابن الزنايته دا انا اللى مربيك يا وله
مختار ساكت ناصر يهز راسه
ناصر / ايه الكلام اللى قولته لعبد الله ده
مختار / هتقعدهم ليه ما تجوزهم و خلاص
ناصر / عبد الله هيحمى مريم اكتر منى و منك هيحميها فى بيته اكتر ما احنا بنحميها فى السرايا مش كدا
مختار / هيتجوزوا معانا هنا
ناصر / و مين قالك ان عبد الله هيقبل
مختار / شقتهم اقرب للكليه …اسهله
ناصر / انا فاهمك و حاسس بيك … بس … يا مختار لو حصل و ربنا كتبلنا كلنا نموت مش هتفرق ان كانت مريم متجوزه و لا لسه بنت بنوت لان عبد الله نفسه ساعتها هيكون ميت
مختار يبص لناصر
ناصر / ما انت ما تقنعنيش ان فى ايد هتتجرا توصل لواحده من حريمنا الا لو كل رجاله البلد كانوا عند اللى خلقهم يا مختار و هى جربت قبل كدا و ما عرفتش و مش هتعرف طول ما انا عايش و فيا نفس مش هتعرف
مختار / ربنا يديك الصحه و طوله العمر
ناصر / انا و انت و الكل … هند عامله ايه ؟
مختار / كانها جايه من رحله
ناصر / هههههههههههههههه انت ربنا كرمك فى البت دى بتعجبنى والله ولاد الحج محمد الجمل الله يرحمه كلهم داخلين دماغى
مختار / الله يرحمه
ناصر / انا عاوز اجوز البت النهرده قبل بكره بس الجواز هيعطله و يعطلها لا هو هيزاكر و لا هى هتزاكر و ان ربنا كرمها بحمل يبقي ايه العمل ساعتها
مختار / عارف والله كل الكلام ده بس
ناصر / مختار … انت اكبر و اعقل من كدا بلاش تخلى الشيطانه دى تلعب فى قلبك و عقلك و تخليك تعمل حاجات نندم عليها كلنا الست دى مش فارق معاها انك تشتغل معاها و لا لا زى ما كانت بتقول الست دى عاوزه تعمل منك عبره لكل الناس اللى تفكر تحط عليها و لا على حد من رجالتها خايفه مش بس مننا لا خايفه من الدنيا بحالها قلبها يقوى عليها و يعملوا زيينا ساعتها مش هتقدر ساعتها هيعصروها عصر هى لمت كل اللى تقدر عليه و جتلنا عشان نشوفها كبيره و نخاف بس احنا اكبر عارف ليه
مختار/ عشان احنا الحق
ناصر / عشان معانا ربنا اللى اقوى من الكل
مختار / و نعم بالله
ناصر / ما تخافش يا نعيش رجاله يا نموت برده رجاله رجالتنا رجاله و حريمنا رجاله دا احنا عيالنا رجاله يا مختار نسيت اللى حصل فى الجنينه نسيت ابن اختك اللى وقف زى السبع و لا ان واحده من حريمه تتلمس تخاف و دى عيلتك يا مختار
مختار / خايف عليكوا
ناصر / طب قول الكلام ده لحد تانى … دا انا اللى مربيك … ربيتك تشيل روحك على كفك كدا و تنزل مع الرجاله ربيتك على ان الاعمار بيد الله و انك ما تخافش من الموت لانه مش هيجيلك الا فى اوانك لا فى حاجه هتقدمه و لا حاجه هتاخره و انك تموت واقف احسن من انك تموت فى فرشتك … حصل و لا لا ربيتك كدا و لا ما ربيتكش
مختار يهز راسه و هو باصص فى الارض
ناصر / الخوف مش وحش … خاف … خاف عشان تفكر الف مره عشان تخطط صح عشان المره دى ما تبقاش زى المره اللى فاتت عشان نضرب الضربه … تقتل مش توجع
مختار يهز راسه و هو باصص لناصر
ناصر / خليتهم يبعتوا لرشيد ان حبيبه هيقدم استقالته
مختار يستغرب
ناصر / الباشا لما هيقدمها مش هيبقي فى حما الحكومه و لما يخرج من البلد مش هيبقي فى حمايتنا و حبيبك بيتهيالي يعني يمكن يكون ليه عنده تار و لا حاجه
مختار يبتسم و يبص الناحيه التانيه
ناصر / هى يعني البت الغلبانه دى ما لهاش اللى يجيبلها حقها من ابن الكلب اللى وقعها و وقع اخوها اهو يشفى ناره و نارها و نارنا احنا كمان
مختار / انا متاكد ان رشيد محتاج حاجه زى دى الفتره دى هو كمان
ناصر/ و ان ما كانش صدقني فى كتير غيره محتاجين
مختار يطبطب على رجل ناصر
مختار / شكرا
ناصر / عد الجمايل و لا ما تعدش ادينا بنعمل الخير و نرميه البحر
مختار / هههههههههههههههههههه ماشي يا كبير
ناصر / اخرج الوقت لسه بدرى شقر على الارض و شم هوا نضيف و ملى عينك من الزرع و الخضره و هاتلنا حاجه حلوه فى ايدك و انت راجع … اقولك هاتلى مشبك
مختار / هههههههههههههههه عنيا حاضر تؤمرش بحاجه تانى
ناصر / سايبها لكرم اخلاقك يلا يلا امشي
مختار يحضن ناصر ناصر يبتسم و مختار يقوم و يمشي انتصار تدخل
انتصار / اتكلمت معاه
ناصر يهز راسه و يبتسم انتصار تتنهد و تبتسم
…………………….
فى مكتب فارس
مغاورى يدخل العسكرى يقفل الباب
مغاورى / انتى بتعملى ايه هنا
عباده / شوف انت بقي
مغاورى / قدمها و لا لسه
عباده / يا عم خليك فى اللى جيالك خلينى اروحها
مغاورى يبص لسماح
سماح / هو انت مطول هنا
مغاورى / مش هتفرق هنا من بره الرجاله هيشتغلوا فى السرايا عندنا و خلى عباده يجيبك تشقرى عليهم عاوز اخرج من هنا تكون كل حاجه جاهزه نتجوز علاطول
عباده / مش عاوز دى فى دى كمان
سماح / بس بقي يا عباده الله
مغاورى / سبيه يفرح بشبابه يومين اخرج من هنا بس و هيبقي هو اللى يجي يشوفك عندى
عباده / والله هنرتاح منك و منها
سماح / عباده الله
عباده / ههههههههههههههههه موقفانى فوق الساعتين عشان تشوفى البيه اهو الباشا قدامك اهو زى القرد
مغاورى / لا يا خويا انا مش زيك و لم روحك
عباده / ناقصك حاجه هنا
فارس يفتح الباب
مغاورى / تشكر
عباده / طب ما دام اطمنا عليك نفوتك بعافيه يلا يا سماح
فارس / ما تخليكوا شويه
عباده / مره تانيه اصلنا مستعجلين عن اذنك
فارس يوسع سماح تعدى و عباده يعدى وراها
فارس / هو جواز القاصرات
مغاورى / ما هياش قاصر
فارس / شكلها صغير
مغاورى / ياما ناس شكلها صغير و هى كبيره و ياما ناس شكلها كبير و هى صغيره … صغيره اوى
فارس / رجعه الحجز
مغاورى / انضف برده
مغاورى يعدى و العسكرى يمشي وراه و فارس يقفل الباب بعصبيه و يتصل بالتليفون
فارس / عاجبك كدا عاجبك
فيرا / الصراحه عاجبنى اصل انا روحى رياضيه و بشجع اللعبه الحلوه
فارس / انا خسرت شغلى انا هقدم استقالتى ياما اتفضح و اتحبس
فيرا / مش احسن ما تموت بص لنص الكبايه المليان
فارس / مهو هيفضى انا خسرت شغلى و بكره اخسر مرتبى هجبلك فلوس منين هيبقي عندى ايه اقدمهولك مقابل الحبوب دى
فيرا / ساعتها نبقي نتكلم سلام
فيرا تقفل و فارس يقعد على المكتب و هو هيطق
…………………….
فى اسكندريه
وسام بتبص على مكان كبير معاها صاحب المحل اللى جنبها
الشاب / دا هيبقي البارتيشن بتاعك مش عليكي غير انك تجيبى العمال يركبوا الاستاندات و تفرشي شغلك و نتوكل على بركه الله
وسام / بصراحه تحفه ما كنتش متخيله المكان بالروعه دى
الشاب / ما قولتلك صارفين عليه و مكلفينه و حاجه اخر عظمه دا انا كنت متابع معاهم كل حاجه بنفسي
وسام / بجد من غيرك مش عارفه كنت هعمل ايه
الشاب / ما تقوليش كدا ازعل بجد … بقولك ايه مش كفايا شغل كدا النهرده بقي و تسمحيلى اعزمك على الغدى فى اى حته انتى ما اكلتيش حاجه من الصبح خالص
وسام / اكل ايه انت عارف انى عامله دايت
الشاب / يا بنتى دايت ايه انتى فيكي حاجه بقولك ايه انا مش هقبل اى اعزار اتفضلى قدامى على المطعم
وسام / هههههههههههههههه طب بالراحه ما تزوقش
الشاب / لا ما انا مسيطر برده
وسام / هههههههههههههههه ماشي يا مسيطر
وسام تمشي و الشاب يمشي وراها
……………………
على سطح فيلا فيرا
رشيد واقف بيراقب الحركه حواليه فيرا تدخل
فيرا / بقالك كتير واقف هنا لوحدك قولت اجى اسليك
رشيد يبصلها و يرجع يبص قدامه تانى
فيرا / مالك شكلك مش مبسوط
رشيد/ انا كنت عايش حر بتنقل من بلد لبلد بعمل شغلانات خفافى و عايش حياتى ملك ايه اللى جابنى هنا فى الحبسه دى
فيرا / انت مش محبوس يا رشيد الباب مفتوح ممكن تمشي
رشيد يبصلها
فيرا / و كمان انت مش قاعد هنا ببلاش
رشيد / خدمه خمس نجوم الشهاده لله بس
فيرا / لا دا انت فعلا مش فى المود خالص بقولك ايه ما تيجي اوضتى يمكن اقدر اظبطلك مودك ده
رشيد يبتسم و يبص الناحيه التانيه
فيرا / ايه خايف سمر تشوفك و لا ايه هههههههههههههه
رشيد / سمر !!! سمر … عملتلك ايه لكل ده
فيرا / ايه كل ده ؟ رشيد دا بيزنيس … تجاره مش اكتر
رشيد يبصلها
فيرا / السلاح و المخدرات اللى كنت بتهربها عمرك سالت نفسك السلاح ده هيقتل مين و لا المخدرات دى هتلوث دم مين مش يمكن عيل صغير يموت اوفر دوز مش يمكن ام تخسر ابنها بسببك كنت بتاخد فلوسك و تطير اشمعن المرادى اللى عامل مشكله
رشيد / عشان دى ما لهاش نهايه اللى بيتعاطى ممكن يبطل لو اخد القرار اللى بيقتل ممكن يبطل اللى بيعمل اى حاجه ممكن يبطل لكن دى لا
فيرا / غلطان انك تقتل خمسين راجل مثلا و تصحى الصبح و تقرر تبطل زى ما بتقول و تستغفر و تتوب دا مش هيمسح اللى فات دا مش هيشيل من عليك دم الخمسين اسره اللى انت دمرتهم
رشيد / بس احسن ما اخليهم ميه و متين و الف
فيرا / فى مثل مصرى جميل اوى بيقولك لو سرقت اسرق جمل
رشيد يبص الناحيه التانيه
فيرا / عاوز تبطل شغل مش كدا بتفكر تعمل ايه تفتح مشروع و تتجوز و تعيش فى تبات و نبات و تخلف صبيان و بنات
رشيد يبصلها
فيرا / و المفروض ان الناس و الحكومه هتسيبك فى حالك عادى كدا … ان الحكومه سابتك الناس مش هتسيبك بص حواليك يا رشيد … انت فى غابه البقاء الوحيد فيها للاقوى … يا تكون اسد يتبقي ارنب تستخبى انت و مراتك و عيالك فى الجحر لحد ما يجي الاسد و ياكلكوا … الحيوانات بتعيش فى قطعان عشان تستقوى ببعض و مع كدا اول ما بيجي الاسد كلو بيجرى و الضعيف بيتاكل … تحب تقضي الباقي من عمرك بتجرى يا رشيد
رشيد / انتى لتاته اوى عارفه كدا … انتى بترغى اكتر من اى ست مصريه قابلتها فى حياتى
فيرا / بجد !!! ميرسي انا اصلى بحب مصر جدا انا درست مصر اربع سنين و السبب الاساسي انى بتكلم مصرى طول الوقت انى اطور الاكسنت بتاعتى نفسي امشي وسط الناس و ما يعرفوش انى اجنبيه نفسي انزل وسط المصريين و ابقي منهم
رشيد / قصدك من اللى يتبقي منهم
فيرا / ما قولتلك احنا فى غابه و البقاء للاقوى
رشيد يبص الناحيه التانيه و يتابع حركه الرجاله
……………………
فى الارض فى البلد
مختار واقف سرحان عباده يدخل مختار ما يحسش بيه
عباده / الله ينور يا هندسه
مختار يبصله
عباده / مالك واقف لوحدك كدا ليه خير بتفكر فى ايه
مختار / ما بفكرش او بحاول ما بفكرش
عباده / ميديتايشن يعني
مختار يبص لعباده و يبتسم و يرجع يبص قدامه
مختار / سالت عليك قالولى انك مع سماح بتشوف مغاورى
عباده / حله و لقت غطاها انا كانت هى و لا هو ما ينطاقوش
مختار / هههههههههههههههه
عباده / البت نزلت طول الطريق ندب و لا كانه واخد اعدام و قال ايه انا ما عنديش قلب و ما بحسش
مختار / ربنا يهنيهم انت زعلان ليه
عباده / دا مغاورى يعني مش احمد عز
مختار / الله الله انت بتغير و لا ايه
عباده / تعرف تتلهى
مختار / على خفيف كدا
عباده / ناوى على ايه
مختار / مش ناوى
عباده / كداب … ناوى و ناوى على مصيبه كبيره
مختار يبتسم و يبص الناحيه التانيه
عباده/ بس هتفشل و هترجع قفاك يقمر عيش دا ان رجعت
مختار / بعشق ثقتك فيا
عباده / يا ابنى انت من غيرى لا تعرف تروح و لا تيجي و ان صابت مره و لا اتنين فدا زى ما بيقولوا بيجينرز لاك
مختار / انت بتاخد كورس انجليزى من ورايا
عباده / دا التويفل اونلاين بسلى وقتى انا و خديجه بس جايب نتيجه صح
مختار / ههههههههههههههههه وربنا كنت محتاجك
عباده / شوفت ما انا لسه بقولك ما تقدش من غيرى
مختار / ما اتحرمش منك يا عباده
عباده /المهم عشان ما اضربكش و اقل منك هنا وسط الفلاحين قولى بقي ناوى على ايه
مختار / مش ناوى بجد بقولك ايه انا جعان ما تيجي نروح ناكل لقمه
عباده / عاملين رز معمر و كفته رز
مختار / فضل و نعمه حد لاقى
عباده / الحمد لله
مختار و عباده يمشوا
………………
فى فيلا فيرا
رشيد يدخل الاوضه سمر تعمل نفسها نايمه يقفل الباب بالراحه و يدخل الحمام و يقف قدام المرايه و هو بيفكر فى كلام فيرا
/////////////
فيرا / السلاح و المخدرات اللى كنت بتهربها عمرك سالت نفسك السلاح ده هيقتل مين و لا المخدرات دى هتلوث دم مين مش يمكن عيل صغير يموت اوفر دوز مش يمكن ام تخسر ابنها بسببك … انك تستغفر و تتوب دا مش هيمسح اللى فات دا مش هيشيل من عليك دم الخمسين اسره اللى انت دمرتهم
/////////////
فلاش باك
رشيد و مختار نايمين على الرمل فى الصحرا جنب عربيه و بيبصوا على السما
رشيد / بس هو عنده حق يا مختار انا لا هتغير و لا هينصلح حالى و مش بعيد فى يوم انا اللى اثر عليك و تبقي زيي
مختار / مش هيحصل ما حدش هيسمحلى و انت كمان يمكن لو كنت اتربيت فى مكان مختلف مع ناس تانيه ما كانش ده بقي حالك و يمكن لما ربنا يكرمك بصاحب زيي يشدك و يصلح حالك
رشيد / ههههههههههههههههههههه مهو انا بحبك عشان انت عسل و دمك خفيف كدا يا ابنى انا عمرى ما ركعتها
مختار / طب ما احنا فيها قوم نصلى ركعتين لله سوا
مختار يقوم يفتح شنطه العربيه و يطلع جركن مايه رشيد يربع فى الارض
رشيد / و بحب فيك برده حماس الشباب ده
مختار / والله ما بهزر قوم ياض نتوضى
رشيد / خلص بقي شويه الميه اللى حيلتنا و بعدين انا
مختار / انت طاهر و لا لا
رشيد / يعني ايه
مختار / يعني كنت مع واحده من اياهم قبل ما تجيلى شربت خمره اتشقلبتلك شقلبتين
رشيد / لا يا سيدى لو على كدا نضيف ما انا مش معفن للدرجادى
مختار / طب قوم صبلى قوم ياله ما تبقاش رزل قوم
رشيد يقوم و يصبله مختار يتوضي
رشيد / طب انت هتصلى ايه دلوقت؟ … هتصلى ايه ؟… انت يا عم بتتوضى تصلى ايه ؟ … طب يعني دى عروستى مثلا … انت يا نيله … سبب واحد يارب يصبرنى على الجدع ده سبب واحد بس
مختار / يا ابنى مش بتوضى ما ينفعش اتكلم و انا بتوضي هنصلى ركعتين قضاء حاجه
رشيد / قضاء حاجه ايه دى وله لتكون بتصيع عليا كدا رشيد يزعل و يقل منك
مختار / ابو جهلك يا اخى يا ابنى قضاء حاجه يعني احنا عندنا مشكله و عاوزين ربنا يفرجها
رشيد / و اللى هى
مختار / انك تتوب و تبطل معصيه
رشيد/ طب ما تقول من الاول كنت ريحتك و وفرت شويه الميه اللى اتكبوا على الارض دول … انا غير قابل للتغير اقولك يا مختار انت عرفتنى ليه مش عشان اهربلك السلاح مش عشان انا مهرب انا مهرب يا مختار و دى شغلتى مش هصحى الصبح مثلا اقرر انى اغير توبى و اعمل شيفتينج كارير و ابيع صواريخ و بومب العيد بدل السلاح يعني
مختار / كلو بيفرقع هههههههه … و بعدين احنا بنطلب من ربنا يعني مفيش مستحيل و لا حاجه تكبر عليه اعوذ بالله جرب جرب مش هتخسر حاجه … بتعرف تتوضى و لا اعلمك
رشيد / مش كافر انا يعنى بعرف
مختار / طب وريني
مختار يصب لرشيد و رشيد يتوضي
///////////////
رشيد يمسح وشه و يفتح الحنفيه و يبص على المايه اللى بتنزل منها و يبدا يتوضي
……………………
فى اوضه خديجه
خديجه قاعده على اللاب عباده يدخل تيجي تقوم يشاورلها
عباده / زى ما انتى خلصى اللى فى ايدك براحتك انا هاخد غيار و ادخل اتشطف قبل الغدى
خديجه تبتسم عباده يفتح الدولاب و ياخد هدوم و يدخل الحمام خديجه تليفون خديجه يرن ترد
خديجه / السلام عليكم … بخير يا ست الكل محتاجانى انزل اساعد فى حاجه … لا عباده فى الحمام … تسلمي يا ست الكل تمام … ما اتحرمش منك و من عسلك … فى حفظ الله سلام
خديجه تقفل التليفون و تقفل اللاب و تفضي الترابيزه و تقوم تلبس الاسدال و تروق الدنيا باب الاوضه يخبط تروح تفتح تلاقي مريم شايله صينيه عليها اكل
خديجه / تسلم مجايبك تعباكى
مريم / تعبك راحه هتحتاجوا حاجه تانى
خديجه / ما نتحرمش
مريم / يلا سلام انا
مريم تنزل و خديجه تقفل الباب برجلها و تروح تحط الصينيه و تقلع الاسدال عباده يطلع من الحمام
عباده / مرزق و لا ايه
خديجه / انا ما اتغديتش مستنياك ناكل لقمتنا سوا
عباده / طب اقعدى اقعدى لحسن انا واقع
عباده يقعد خديجه تروح تكشف الاكل و تجيب مايه و كبايه و تصب
خديجه / اجبلك عصير
عباده / عصير ايه تعالى اقعدى
خديجه تروح تقعد و تحط طبيخ على رز عباده
عباده / يا بنتى كلى انتى ما لكيش دعوه بيه انتى حامل كلى انتى انا بعرف اكل نفسي
خديجه / ما انا هاكل اهو ما فيهاش حاجه يعني
عباده / طب كلى بقي
خديجه تحط لنفسها و تاكل معلقه
عباده / كنتى بتعملى ايه على اللاب
خديجه / لسه مفيش اى ابحاث او مقالات علميه عن الدوا دا و انا خدت الحاجات اللى عبد الرحمن بعتها المركبات بتاعه الدوا يعني و دورت عليها و بقرا عن الابحاث اللى اتنشرت عنها
عباده / المهم وصلتى لحاجه
خديجه / لسه والله بس ان شاء الله خير
عباده / ربنا يستر على الايام الجايه الشهاده لله ما عدتش متفائل
خديجه / ليه كدا بس يا عباده
عباده / بتتحرك اسرع مننا و فى كل الاتجاهات و رجالتها كتير
خديجه / ما احنا بسم الله ما شاء الله اللهم بارك
عباده / اه بس احنا بنخبط انما هى عارفه هى بتعمل ايه الست دى ما جتش مصر لما مختار علم عليها زى ما بتقول لا دى دارسه البلد و السوق و الناس و درساهم كويس اوى
خديجه تحط ايدها على بطنها بحزن و عباده متابع
عباده / فى حاجه و لا ايه
خديجه تنتبه و تبتسم
خديجه / لا ابدا
خديجه تكمل اكل و عباده متابعها
عباده / مختار ناوى على حاجه
خديجه / اقل واجب بعد اللى حصل
عباده / الكبير بيقول انها كلمته و قالتله على اللى هى نوياه
خديجه / يا ليله مش فايته
عباده / و من ساعتها و هو مقلوب حاله و كملت بانه يصحى ما يلاقيش هند
خديجه / بس الحمد لله هنخلص من اللى اسمه فارس ده
عباده / يا عالم مين هيجي مكانه … و لا الاسوء يا عالم فى الفتره دى سم مين من القسم
خديجه / دى سهله ديتها شكه دبوس
عباده / ما انا ناوى اعمل كدا بس قلبي بقي مقبوض … انا عارف ان لا ده وقته و لا انتى فى ايدك حاجه تعمليها بس انا ما بعرفش اخبى عنك بحتاج ارتاح و افك مع حد و كل اللى حواليا مش ناقصين
خديجه / امال انا هنا ليه
عباده / يخليكي ليا يا ست الكل … انتى ما بتكليش ليه … كلامى سد نفسك
خديجه / باكل والله اهو باكل
عباده / انا عارف انى جيت عليكي جامد بس وعد منى بعد اللى احنا فيه ده ما يخلص و تقوميلنا بالسلامه هاخدكوا و افسحكوا فسحه العمر انا عارف انها مش هتبقي زى انا و انتى لوحدينا
خديجه / ما تقولش كدا دا هو اللى هيحليها
عباده / انا مش ناوى ابقي زى الرجاله اللى بيرموا حمل العيال على مراتاتهم … هو صحيح انا ما افهمش فيهم حاجه و بخاف اقربلهم و هم صغيرين اوى كدا
خديجه / دا احلى سن
عباده / بس بيبقوا صغيرين اوى و حمر كدا الواحد بيحس انهم هيتكسروا لو لمسهم
خديجه / امال مين هيشيله و ياذن فى ودانه غيرك
عباده يبتسم
خديجه / بكره ربنا يكرمنا فيه و يطلع شبهك كدا و تربيه تحت جناحك و نشوف فيه خير
عباده / امين
خديجه / و لو جت بت
عباده / يبقي زياده الخير خيرين بس من اولها اهو عشان ما تفهميش غلط انا ما بفرقش بين واد و بت هى الحكايه انى ما بعرفش اتعامل معاهم
خديجه / دا البت روح ابوها ما تقولش كدا
عباده / طب كلى ياختى و اكليها و بطلى رغى
خديجه / والله انا باكل انت اللى بتتكلم و طبقك زى ما هو اهو
عباده / ربنا يعدى الايام دى على خير
خديجه تطبطب على ايده يبصلها و يبتسم
…………………….
فى اوضه مختار
مختار قاعد على طرف السرير متابع هند نايمه الباب يخبط هند تصحى يشاورلها تنام تانى و يروح يفتح يلاقي انتصار شايله صينيه اكل
مختار / بنفسك كدا
انتصار / و انا عندى اعز منكوا
يتبع…
لقراءة الفصل التالي : اضغط هنا
لقراءة الرواية كاملة اضغط على : (رواية البر التاني)
تعليق واحد