روايات

رواية ما بعد الاغتصاب الفصل السابع عشر 17 بقلم هنا عادل

رواية ما بعد الاغتصاب الفصل السابع عشر 17 بقلم هنا عادل

رواية ما بعد الاغتصاب الجزء السابع عشر

رواية ما بعد الاغتصاب البارت السابع عشر

رواية ما بعد الاغتصاب
رواية ما بعد الاغتصاب

رواية ما بعد الاغتصاب الحلقة السابعة عشر

رقية بتضحك بصوت عالى.جرى ايه ياسى فتحى
انت اتجننت ولا ايه
ما عفريت الا بني ادم
قوم يلا علشان تفطر
فتحى بفزع بيشاور على عنيها.عف.عين..ع..
عنيكي لونها اسود
رقية بأبتسامة.اسود ايه ياسى فتحي عنيا لونها عسلي
هروح انزل الفول زمانه سخن على البابور
رجعت عين رقية لطبيعتها
لكن اللى مش على طبيعته هو فتحى
كان حاسس ان رقية بقى فيها حاجة مش طبيعية
قام بسرعة
غير هدومه

 

 

وخرج من غير ما يفطر
طلع بسرعة على القهوة
قعد شرب كوباية شاى
وهو عمال يفكر ايه اللى بيحصل فى رقية
فتحى.جرى ايه يافتحى
انت جيت تكحلها عميتها ولا ايه
البت شكلها بقيت معفرتة
ما داهية لا يكون ضربك ليها
خلاها اتلبست
وبعدين بقى
ايه المصيبة اللى جيبتها لنفسى دى
ما انا كنت مرتاح
قوم اتوكل على الله بقى شوف اكل عيشك
وكله بوقته
فعلا مشى فتحى من على القهوة
وراح استلم عربيته
بعد ما كل اصحابه اللى قابلوه
باركوله
وهزروا معاه
وهو كمان حاول يتناسى اللى بيحصل
اما فى البيت عند اهل رقية
نبوية.ياااه على قد المشوار بتاع اسكندرية ده ما بيبقى حلو وخفيف على قلبي
على قد ما جتتى بتتكسر من الطريق
ابو اشرف.عجزتى انتي يا نبوية
نبوية.فشر مين دى اللى تعجز ياراجل
ده انا اللى يشوفنى مع بناتك يقول اختهم
رشا.بقولك ايه يابا
ابو اشرف.خير
رشا.انا عايزة اشتغل
نبوية بتضرب بأيديها على صدرها.يا حومتي
تشتغلى ايه يا مايلة

 

 

داكتورة ولا استاذة
رشا.هو مفيش شغل ياما غير للداكتورة ولا الاستاذة
نبوية.اومال ايه
رقاصة ياحبيبة امك
رشا.لاء
بس عادى انا ممكن اشتغل فى بيت من بيوت الناس الاكابر
ناس كده تكون غنية
ومرتاحين
يربطولي مهية معتبرة
واعيش بقى
نبوية بصدمة.خدامة
عايزة تشتغلى خدامة يابت نبوية
بدل ما تقعدى فى بيتك معززة مكرمة تستني عدلك
عايزة تشتغلي فى البيوت
ابو اشرف قاعد بيسمع الحوار وساكت
رشا وفيها ايه ياما
هو يعنى الواحدة عدلها مش بييجى غير بالجواز
نبوية.اومال بأيه يااخرة صبري
ما انتي شايفة اختك اهى عايشة فى ضل راجلها
مهنيها ومشبعها
ومصيغها هو واهله
ايه بقى لازمة المرمطة والتنطيط فى البيوت
ودى جوزها عينه تزوغ عليكي
ولا اللى ابنها ايده تطول
لالالا مفيش اللى فى دماغك ده
رشا.ياما مش كل البيوت كده
ده فيه بنات بتشتغل فى بيوت بيكونوا شبه الهوانم بصحيح
مش بتتفرجى على التلفزيون انتى وتشوفيهم
نبوية.وانا مالى ياختى بالتلفزيون
وانتى عايزانى ابص للي بيمثلوا
لاء ياختى ماهو فيه برضه اللى بيضيع شرفها واللى بيطلعوها حرامية
واللى بتخطف الراجل من على مراته
انسي يا رشا الكلام ده

 

 

رشا.ييييه ياما بقى
انا مش عارفة امتى الواحدة مننا تفكر بدماغها
نبوية.جرى ايه ياخويا
انت عاجبك كلام المعدولة ده ولا ايه
شايفاك ساكت يعنى
ما داهية لا يكون عاجبك
ابو اشرف.جرى ايه يا نبوية
ما تتكلمي عدل اومال
وبعدين انتى يعنى شوفتي الشغلانة على الباب
ولا حتى العريس على الباب
نبوية بصدمة.يا مصيبتى
يعنى ايه يا راجل الشغلانة على الباب
هى يعنى لو فيه شغلانة
هتقول ماشى
هتنزل بتك تخدم فى البيوت
ابو اشرف.ياام العيال
متقاطعيش
مش يمكن بكرة تلاقى بابك بيخبط
وجايلها راجل ابن حلال
يشيل الجمل بما حمل
نبوية.ان شالله يا خويا

 

 

بس افرض مجاش
اسيبها انا بقى تمشى على كيفها
رشا.ياما كيف ايه بس
هو الشغل عيب
وبعدين لو مش هعرف احافظ على نفسى
هرجع اقعد فى بيتنا تانى
لكن خلينى اجرب حظى
يمكن افلح فى الشغل
ومفلحش فى الجواز
انا اصلا مش عايزة اتجوز
ابو اشرف.ليه يا رشا
مغيرتيش لما شوفتى بيت اختك وراجلها
مقولتيش نفسى انا كمان يبقالي بيت
وعيلة تروح وتيجي عليا
وراجل اتحامى فيه
رشا بأستهزاء.لاء يابا مغيرتش
وبعدين اقول نفسى فى راجل ليه
ما هو ربنا يخليك انت واخويا اشرف
لو مش انتم اللى هتبقوا حمايتنا يعنى
الغريب هو اللى هيكون
ابو اشرف اتفاجئ من رد رشا.يابت انتى لا دخلتى مدارس ولا بتفكى الخط
بس لسانك مبرد
يابت الكل…
عندها رد على الكلمة عشرة
رشا.وافق يابا الله يخليك
وخلى اشرف اخويا يوافق
ويشوفلى شغلانة هناك
واقعد معاه

 

 

وابقى جنب رقية ومعاه اخدمه بعنيا
واهو انا وهو نساعد فى مصاريف البيت
يمكن ربنا يكرمنا ويوسع علينا
ونروح ننقل كلنا عيشتنا فى اسكندرية
ابو اشرف.طيب لما ابقى اروح لاخوكى
ابقى افاتحه فى القصة دى
نبوية.قصة ايه ياراجل
هى البت كلت عقلك بكلامها ولا ايه
ابو اشرف بيغمز لمراته علشان تقفل الكلام.خلاص بقى يا نبوية
هتساير مع اشرف فى القصة دى
واخد برأيه برضه
اخوها وراجلها من بعدى
ورأيه يمشى
نبوية فهمت ان جوزها بياخد بنته على قد عقلها.ماشى يا خويا
اللى تشوفوه صح بقى
انا قولت رأيي وانتم حرين
ابو اشرف.الله ينور عليكي
يلا بقى اطلع انا اتوكل على الله
اشوف اكل عيشي
نبوية.ربنا يوسع رزقك ياخويا
خرج ابو اشرف
ورجعت نبوية قعدت فى الاوضة
وبسة فاردة جسمها على الارض
ودخلت رشا الأوضة ورا امها
نبوية بأستهزاء.عايزة تشتغلى فى البيوت ياحلوة
طيب ياختى اخدمى فى بيت ابوكي اولى
يابت ده انا لحد دلوقتى بغسلك هدومك الداخلية
يا موكوسة
رشا.بقولك ايه ياما
بلاش الكلام اللى يسم البدن
ده انا والبت شايلين البيت كله
وبعدين على رأى ابويا
انتى شايفة الشغل على الباب يعني

 

 

نبوية.يابت بصى انك تلاقى عريس حلو كده
رشا.بقولك ايه ياما
هو انتى بجد مصدقة ان البت رقية مبسوطة
نبوية.انتى عميتى فى عنيكي ولا ايه
مشوفتيش ضحكتها اللى من الودن للودن
رشا بحزن.ضحكة ايه ياما
اش حال كانت بنتك وربايتك
يعنى مخدتيش بالك منها
ولا من وشها البهتان
ولا حتى ضحكتها الصفرا
بتك مش مبسوطة ياما
بس هى متقدرش تتكلم ولا تقول
انا مش عارفة ده علشان توصيتك ليها انها متطلعش سر بيتها
ولا علشان خايفة من جوزها
بس انا حاسة ان اختى مش مرتاحة
بسمة وهى نايمة على الارض.تصدقى يابت يا رشا صح
رقية مش زى عادتها
تحسيها شايلة الهم كده
رشا بتبص لامها.اهى العيلة الصغيرة خدت بالها
ياما الجواز مش هو الراحة
ولا هو عوض البت
نبوية ب حيرة.انتم هتخوفونى على البت ليه
انا ياختى مشفوتهاش غير مبسوطة وضحكتها منورة وشها
رشا.علشان ده اللى انتى عايزة تشوفيه بس ياما
يلا انا هقوم استحمى بقى

 

 

قامت رشا
وسابت نبوية
تسرح فى رقية
على باب رقية
صوت خبط
قامت رقية من جنب الراديو اللى كانت قاعدة بتسمع فيه اغنية للست وردة
وراحت فتحت الباب
عواطف.صباح الخير
رقية بأبتسامة.يسعد صباحك
اتفضلى ياعواطف
ادخلى
عواطف.امى بعتتنى اشقر عليكي
واشوفك لو محتاجة حاجة
رقية.ان شالله تسلم يارب
ربنا ميحوجكم لمخلوق ابدا
ادخلى طيب يا عواطف
تعالي محدش هنا
دخلت عواطف وهى بتقول بصوت عالي.اما انا عند رقية ماشى
ودخلت قعدت على الكنبة
رقية.البيت نور
عواطف.منور بيكي
عاملة ايه النهاردة
وعم فتحى عامل ايه
رقية.اهو فى نعمة
عواطف.لسه عيان
رقية.هو مش عيان ولا حاجة
بس والنبى يا عواطف انا ما عارفة ايه اللى جراله
عواطف.ابويا بيقول ممكن تكونوا اتنظرتوا
رقية.من مين بس
احنا مدخلش بيتنا حد غريب
واللى دخلوا كلهم يتمنوا الخير
عواطف.يابت انتى صغيرة لسه
بس عم فتحى حلو ويملى العين
ممكن تكون واحدة كانت عنيها عليه ولا حاجة ولما عرفت انه اتجوز
تكون ربطته
ولا عملتله عمل
رقية.عمل
عمل ايه يا عواطف
لالا ياشيخة
عواطف.اسمعي مني بس
اصل ان راجل يقعد يضرب فى نفسه من غير سبب كده
ده اكيد عمل
حد عمله حاجة علشان عقله يتلحس
ويتوه

 

 

ويتربط من ناحيتك
رقية بتفكير.انتى هتخوفينى ليه
بصى يا عواطف
بس امانة عليكي الكلام اللى اقوله ده يبقى سر بيني وبينك
والله ياختى ولا ليكي عليا يمين
انا حتى مقولتهوش لاخواتى ولا امي
عواطف.قولى يا حبيبتى
فى بير
رقية.هو سي فتحى من يوم الدخلة
بيعمل معايا حاجات غريبة
وانا كمان بحس بحاجات غريبة
عواطف بتركيز.ازاى يعنى يارقية
احكي ياختي
رقية.بصى
ساعات بتحصل حاجات
واحس انى ناسياها
وبعديها بشوية
الاقى نفسى افتكرتها
ولما اجى اتكلم معاه
يقولى لاء محصلش
وهو كمان ساعات يقول ان فيه حاجات حصلت مني
وانا ابقى مش فاكرة انى عملتها
ناهيكي بقى عن الضرب والبهدلة دول انا اتعودت عليهم اسبوع بحاله
لكن هى الحاجات دى بقى اللى من يومين بالظبط حصلت
انا اشوف حاجات وانساها
وافتكرها يكدبنى
وهو نفس الحكاية
ومش عارفة ايه السبب
عواطف بأستغراب.يامصيبتى يابت يا رقية
لاء ده كده اللى بيحصل ده
ميتسكتش عليه
انتى لازم تقولى لأبويا
رقية.لاء ابوكي ايه

 

 

ولا اقدر افتح بوئي بكلمة واحدة
ده يقطع رقبتي
عواطف.يابت ابويا بيفك ويربط متخافيش
لو فيه حاجة معمولة هيطلعهالك
ولو حتى جن ابن جن ابويا يخلصك منه ومن عشيرته كمان
رقية بخوف.جن ايه
انتى هتخوفيني ليه يا عواطف
لاء ياختى متقوليش الكلام ده
عواطف.طيب ماهو يابت انتى لازم تعرفى ايه اللى بيحصل
بدل ما تلاقى واحدة بتلف على جوزك وتخطفه منك
رقية.ياستى تخطفه
بقولك ده مبهدلني
خليه يحل عني
عواطف.طيب بصى سيبينى كده لبكرة
وانا هفكرلك فى حاجة
نعرف منها ايه اللى حاصلك انتى وجوزك
ايه رأيك
رقية.ان شالله يسترك يا عواطف
اوعي ياختى تتكلمي مع حد
انا مش ناقصة
عواطف.عيب عليكي يابت
اعتبرينى اختك
متخافيش والله ما هتكلم مع حد
رقية.حبيبتى ياختى
قعدت رقية وعواطف وقت طويل
واتصاحبوا على بعض
وعواطف قالت كل حاجة عن نفسها لرقية
وحكيتلها كمان عن جيران البيت كله تقريبا
وبقيت رقية عارفة الجيران كلهم
وهى قاعدة فى اوضتها
قافلة بابها عليها
سنية.بت يا عواطف
انتي يابت
عواطف.يالهوى
دى امى هتطلع عيني
هروح اشوفها عايزة ايه
واسيبك انتى بس تشوفى بيتك
رقية.ماشى تعالي لما تخلصي بقى
سى فتحى هييجى بليل
عواطف.ماشى
خرجت عواطف من الاوضة
ورقية قفلت الباب وراها
دخلت اوضتها

 

 

وفجأة النور قطع
ودى حاجة بقيت بتخوف رقية
من وقت ما جت البيت ده
اكتر ما كانت بتخاف فى بيت ابوها لما النور بيقطع
مجرد ما قطع حسيت برعشة فى جسمها
ومغص جامد فى بطنها
وصوت همس فى ودنها
بيقول
ابنك
ابنك يارقية
ده ابني
حافظى عليه
وانا اجيبلك حقك من اى حد ظلمك
وفى اقل من لحظة
كانت الدنيا بتلف برقية
ومحسيتش بنفسها
غير وهى بتقع على الارض
غابت رقية عن الوعي
ومحسيتش بالدنيا
وفات وقت طويل
كان فتحى خلص شغله
وراح قعد مع اصحابه
مش بس كده
ده كمان شاف واحدة من اللى كان مصاحبهم
ومتأخرش فى انه يروح يقضى ليلته معاها
وبعد ما خلص كل الحرام اللى عمله
من شرب وزنا
ونميمة
قرر انه يرجع البيت
ميعرفش ايه اللى حصل مع رقية طول اليوم
ولحد نص الليل
رقية فى عالم تانى
ومحدش حاسس بيها
حتى عواطف مخبطتش عليها مرة تانية فى اليوم ده
رجع بليل فتحى
وهو رايق
ومزاجه عالى اوى
رجع البيت دخل من باب الشارع
نزل اول درجتين
اصل البيت له بوابة من الشارع
يدخل مدخل مترين
ويلاقى درجتين سلالم

 

 

ولأن البيت كبير اوى
متقسم جزئين
وكل جزء له مدخل خاص بيه
نزل فتحى السلالم
ودخل من المدخل اللى يوصله لأوضته
كان عبارة عن ممر طويل
فى اخره
فيه اوضة مقفولة
لأن اصحابها مش عايشين فيها الفترة دى
وجنب الاوضة ممر صغير يطلعه على الحوش اللى فيه اوضته
ماشى فتحى فى الممر وبيدندن
وقبل ما يوصل لنهاية الممر
حس انه اتسمر مكانه
بيحرك رجليه
وبيحاول يتقدم بخطواته
لكن فيه حاجة منعاه
محدش ماسكه
ومفيش اى حاجة تمنعه من المشى ولا الحركة
لكن كأن حيطة اتبنت قدامه
شايف باب الاوضة
وقدام رجليه الارض فاضية
لكن الطريق مسدود
حاول فتحى اكتر من مرة
يقنع نفسه انه شرب كتير
واللى بيحصل ده نتيجة شربه
لكن النور قطع
وظهر قدامه
اللى خلى قلبه يقف
ويشل لسانه
ويمنعه حتى انه يطلع الصرخة اللى جواه

يتبع…

لقراءة الفصل التالي : اضغط هنا

الرواية كاملة اضغط على : (رواية ما بعد الاغتصاب)

اترك تعليقاً

لن يتم نشر عنوان بريدك الإلكتروني.

زر الذهاب إلى الأعلى