رواية البر التاني الفصل العشرون 20 بقلم لولو محمد
رواية البر التاني الجزء العشرون
رواية البر التاني البارت العشرون
رواية البر التاني الحلقة العشرون
عبد الله / احلى قرار اخدتوه والله احلى خبر فى الدنيا كدا اللحق اجيب البدله و احجز الحلاق و لا انا هحلق هناك ما تعرفيش فى حلاق حلو عندهم و لا هيعملوا ايه هبقي اسال مختار اكيد هيظبط الدنيا انتى ساكته ليه
شيري / هو انت مديني فرصه ارد دا هند نفسها ما اتحمستش زيك كدا
عبد الله / هى فين صحيح
شيري / على ما افتكرت تسال على اختك داخلى من الباب ماما فين الاكل جعاااان
عبد الله / طب والله كنت جعان جدا
شيري / هند خرجت مع مختار هيشوفوا الفستان
عبد الله / و ما روحتيش معاهم ليه
شيري / بعملك الاكل
عبد الله / لا يا ماما كنا كلنا اى حاجه بس روحتى معاهم
شيري / قولت اسيبهم ياخدوا على بعض شويه
عبد الله / يلا عقبالى
شيري / ههههههههههههههههههه دا انت مشكله
شيري تسيب عبد الله بياكل و تقوم
…………………….
فى كازينو على النيل
هند قدامها كيكه شيكولاته بالايسكريم عماله تصور فيها من كذا زاويه و مختار متابعها و حاطت ايده على خده و مبتسم و قدامه قهوه
مختار / تعرفي ان القهوه اللى بتعمليهالى فى البيت احلى من دى
هند تبصله و تبتسم و تكمل تصوير
هند / شكرا
مختار / تفتكرى لو حاولتى تعملى كيكه زى دى هتطلع احلى و لا هم
هند / هم
مختار / جزمه
هند / ما تشتمش
مختار / اشتم براحتى بوظتى اللى كنت هقوله
هند / طب ما انا عارفه هتقول ايه و هتقوله ليه انا خلاص حفظتك على فكره
مختار / بفهم و لا شغل بصمجيه
هند / بصراحه ساعات و ساعات … ساعات بفهمك و ساعات لا
مختار / و لما ما بتفهمينيش بتعملى ايه
هند / مش بعمل عادى
مختار / لا مش عادى الجواز مش لعبه الجواز سكه اتجاه واحد لازم قبل ما تمشي فيها تعرفي اخرتها ايه
هند / اوفر اوى اخرتها خير ان شاء الله ليه كدا حتى تفائلو بالخير تجدوه مش انت خير برده و لا ايه
مختار / طب اوصفيني كدا يا هند شخصيتي كدا تعرفى عنى ايه
هند / هادى اوى و مش بتاع مشاكل مع ان اتقى شر الحليم اذا غضب يعني دمك خفيف مثقف متكلم فى اى حاجه الا الحب ما شاء الله
مختار يضحك
هند / اوصفنى انت بقي
مختار / انتى مشكله
صمت ثوانى
هند / ايه ده بس كدا
مختار / خير الكلام ما قل و دل
هند / والله الشتيمه كانت على طرف لساني
مختار / بلعيها بحته كيكه بدل ما هتسيح
هند / انا بتكلم جد قول انا ايه اوصفنى
مختار / ههههههههههههههه بصي يا ستى انتى كل حاجه و عكسها و كلو بمزاجك ساعات هاديه اوى او مجنونه اوى او رومانسيه اوى او عاقله اوى او ضعيفه اوى او قويه اوى و طبعا جميله اوى و ذكيه اوى و بتطلعى كل شخصيه من دول بمزاجك
هند / شوفت عشان الملل مش هتزهق منى ابدا التغير مطلوب برده
مختار يبتسم و يبص الناحيه التانيه
هند / انا مش سعيده
مختار يبصلها باهتمام
هند / خايفه معظم الوقت كل يوم عن اليوم اللى قبله ببقي خايفه اكتر عمرى ما فهمت قد ايه موت الاب بيكسر الانسان قد الفتره دى و النهرده بالتحديد احساس انك بتتخان من اقرب الناس ليك ضهرك و سندك ساعات الشيطان بيقولى كلام وحش اوى بس انا مش ناويه اصدقه
مختار / كلام ايه
هند / اللى ما لوش ضهر بينضرب على بطنه و من امن العقاب اساء الادب و انا ليا مين يقفلى و يدافع عنى
مختار / انا
هند / لو يوم فكرت تخونى تتجوز عليا اتخانقنا لو يوم حاولت تمد ايدك عليا
مختار / انا مش هعمل اى حاجه من الحاجات دى انا وعدت ابوكى انى احطك فى عنيا و اتقى ربنا فيكي و انا من الرجاله اللى بتوفى بوعدها حتى لو على رقبتها
هند تبصله
مختار / شكك فيا والله اسوء من انك تشتميني يا ستى لو ينفع اكتب اقرار هكتب
هند / انا ما عدتش حمل وجع
مختار / معاكى حق انتى شوفتى كتير قدامك طريق من اتنين يا تختارى السكه السالكه و تبعدى عنى و تنكدى علينا احنا الاتنين يا تمشي معايا و تجازفى و ساعتها يبقي قدامك طريق من اتنين يا اطلع قد كلمتى و نبقي سعدا احنا الاتنين يا اما اطلع واطى و ابن كلب و اغدر بيكي اختارى
هند / هتطلع قد كلمتك
مختار / يكرم اصلك بس تحسبا للظروف يا هند فى حاجه اتعلمتها فرقت معايا فى حياتي اوى اتعلمت انى ابقي قوى مفيش حاجه تكسرنى و اللى ما يكسرنيش يقويني
هند / كلكوا بتقولولى خليكي قويه فى وقت انا … انا محتاجه ابقي ضعيفه لانى تعبت انا بشر
مختار / و ماله خليكي ضعيفه و اتسندي عليا بس خليكي قويه عشان انا كمان وقت ضعفى الاقي اللى اتسند عليه ما انا كمان بشر و بتعب
هند تبتسم مختار يبتسم
هند / بقول هبقي قويه بقول هتغير بقول و اقول و اقول
مختار / انتى قويه يا هند و دا اثبتيه الفتره اللى فاتت انتى بس زى ما قولتى تعبتي خدى نفسك و كملى
هند تهز راسها و تبصله
هند / هو انا نكديه
مختار / على فكره نفس الشيطان ابن الجزمه ده ساعات بيجيلى برضه
هند / يا سلام
مختار / ايه يا اختى انتى كان حد ضحك عليكي و فهمك انى كنت هموت على الجواز
هند / و ايه اللى رماك على المر يا حبيبي
مختار / ضحكتك بنت اللذينه بهدلتنى
هند / هههههههههههههههههههههه
مختار / بتحسن اهو
هند / لا برافو التركى عامل شغل
مختار / ما قولنى صعيدى على ابوه
هند / اجدع ناس
……………………
فى السرايا
فاطمه قاعده مع فاتن و انتصار و البنات بيجهزوا اكل كل واحده بتعمل حاجه
فاطمه / لا طبعا فرحانه كدا احسن كتير هيستنوا ايه انا بس مش فاهمه ايه اللى حصل خلاهم يقدموا الفرح
انتصار / الزن على الودان دا حتى نزلوا امبارح يجيبوا شويه حاجات من الشوار
فاطمه / يا اختى حاجه مصر غاليه يتخموا
انتصار / حاجتها و هى حره فيها تجبها من مكان ما تحب
مريم / بس احنا كدا يا ماما لازم احنا كمان نشوف هنلبس ايه فى الفرح
فاطمه / اه المرادى الواحد يلحق ينقى حاجه عدله مش شغل كروته زى المره اللى فاتت
انتصار / اللى انتوا عاوزينه هنعمله بس خلونا نخلص اللى فى ايدينا
فاطمه توطى على انتصار
فاطمه / سمعت ان مغاورى اتكلم عن مريم
انتصار / شششش مش وقته البنات قاعدين
فاطمه / انتى ما قولتيلهاش
انتصار / لا ما جاتش مناسبه هستني اما عمها يجي و نشوف رايه ايه
فاطمه / و هو كلمه مختار هتمشي فوق كلمه الكبير و لا ايه
انتصار / لا حصلت و لا هتحصل بس ما خاب من استشار و لا ايه يا فاطمه
فاطمه / صح طبعا بس مغاورى ما يترفضش دي هتبقي كبيره سرايه الجوارحه انتى ناسيه ان مغاورى ديك البرابر بتاع الحج شهين و كل ده هيبقي بتاعه
انتصار / الحج شاهين راجل حقانى و عمره ما اكل ورث حد
فاطمه / يا سلام و اللى عمله مع اخواته البنات ده اسمه حق
انتصار / هو حر فى ارضه و ارض جدوده اداهم تمنها من حر ماله ما فيهاش حاجه و بكره مغاورى يعمل كدا برده مع أخواته البنات
فاطمه / طيب
انتصار / بقولك ايه يا فاطمه شغلى ايدك زى ما بتشغلى بقك و ودانك هننجز
انتصار تحط الصينيه اللى على رجلها على الترابيزه و تقوم و هى متعصبه و فاطمه بتابعها و هى بتطلع من الاوضه ببرود و ابتسامه
………………….
فى شقه هند
مختار بياكل
مختار / والله كلهم كانوا حلوين الرك على القالب
شيري / مهو بيقول كلام حلو اهو امال بقي مطلعه على الجدع سمعه وحشه ليه
مختار يرمى المعلقه فى الطبق و هند تبص لامها و شيري بتضحك
مختار / انا بيتسيحلى و لا ايه
هند / بتبلى عليك يعني و لا اكمنك بدات تتحسن فاكر انه خلاص
مختار / زى القطط والله مهما الواحد هيعمل
هند / مبسوطه دلوقت هقوم اعلق على الشاى
هند تمشي و شيري و مختار قاعدين بيضحكوا
شيري / كلمت انتصار قالتلى انها تعرف ناس بيجيبولها كل حاجه لحد البيت مفارش و ملايات و لبس هتقولهم يجوا الخميس نتقي من السرايا
مختار / ايوه كل حاجه بتيجي السرايا لحد عندهم و احسن حاجه
شيري / انا قولت اقولك الكلام اللى دار
باب الشقه يتفتح و عبد الله يدخل
عبد الله / انا خلصت خلاص … انت هنا حبيبي
عبد الله يسلم على مختار
عبد الله / مش هنروح الجيم بقي و لا ايه
مختار / فيك نفس
عبد الله / عيب عليك دا انا صحتي ردت على هناك
هند تطلع شايله صينيه الشاى و مختار بيضحك
هند / سامعه حد بيقول جيم
مختار / تسلم ايدك
مختار ياخد كبايه الشاى من على الصينيه
عبد الله / نقيتوا الفستان
هند / لسه
عبد الله / امال كنتوا فين كل ده من غيرى اوعوا تكونوا روحتوا سينما ازعل اوى
مختار / اطمن مستنينك مش هنخشها من غيرك
شيري / هيجننى الدنيا كلها كوم و انت لوحدك كوم تانى
عبد الله / دا اسمه تميز
مختار / كفايا عطله كدا ليوم واحد و لا ايه و نلحق نزاكر كلمتين
مختار يقوم
هند / خليك زاكر معايا
مختار / ماجد و هشام زعلانين بقالى ياما فعلا مقصر معاهم
هند تبتسم و تهز راسها
مختار / هكلمك لما اروح
هند / تمام … مع السلامه
هند توصله للباب و تقفل وراه
……………….
فى السرايا يوم الخميس
الكل بيتحرك فى السرايا زى النحل
انتصار / مهو لو كل واحده بتخلص اللى وراها اول باول ما كناش اتزنقنا الزنقه دى
فاطمه / انتى موتره نفسك على ايه ما كل حاجه زى الفل اهى و الغدى على النار و المضيفه زى الفل
عيل صغير يدخل بيجرى
العيل / وصلوا وصلوا
انتصار تطلع تجرى هى و كل البنات و فاطمه واقفه بتتفرج عليهم و ما بتتحركش
فاطمه / دا لو السفيره عزيزه مش هتجروا تستقبلوها كدا
فاطمه تروح وراهم تلاقي مختار بينزل شنط من شنطه العربيه و الكل بيحضن و يبوس فى هند و امها
مختار / الشنطه دى على المضيفه و الباقي على اوضتي
فاطمه / مش بعادتك يعني ايه دا كلو
مختار / دا جهاز هند هخليه فى اوضتى لحد ما اوضتنا تجهز
فاطمه / بجد !!! الف مبروك يا عروستنا
فاطمه تحضن هند و تبوسها
فاطمه / مش تفرجينا تورينا زوقك
هند / دا زوق مختار و انتوا اكيد عارفين زوقه
فاطمه / الحقيقه فاجئنا كلنا
فاطمه تبتسم بسخريه و هى بتبص على هند و انتصار متابعاها
انتصار / زوقه حلو و زى الفل كفايا انه اختارك يا قمر
هند تبتسم
انتصار / احنا هنفضل على الباب كدا يلا يلا
الكل يدخل السرايا عيل يشد مختار من ايده مختار يوطى عليه
العيل / الكبير عاوزك فى جنينه الموالح
مختار يلعب فى شعر الولد الواد يطلع يجرى بره السرايا مختار يروح ناحيه هند و اهلها
فاطمه / لا الزياره دى لازم تشوفي البلد
انتصار / هتعجبكوا خالص
مختار / انا هروح جنينه الموالح ناصر اخويا عاوزنى
مريم / لسه كنا بنتكلم عنها ممكن نيجي معاك
مختار يبص لهند مبتسمه و متحمسه يهز راسه
مريم / ثوانى هلبس العبايه و اجى
سماح / ممكن اروح يا ماما معاهم
فاطمه تبص على الكل
فاطمه / روحى
سماح تطلع تجرى على اوضتها
شيري / انا مش قادره اروح فى حته ركبى لسه قافشه من السكه
انتصار / خليكى معانا هنا زمان ام منصور جايه و جايبه الحاجات الحلوه بتاعه الجهاز
شيري / طب خليكي بقي يا هند عشان تنقي
هند تبص لمختار بحزن
مختار / عشان مريم ما تزعلش يا امى طلعت تلبس
انتصار / خلاص روحوا و ما تعوقوش
مريم نازله تجرى
مختار / ايه السرعه دى دا رقم قياسي
مريم / يلا و لا ايه
فاطمه / سماح بتلبس دقيقه و هتنزل
مختار / هنستناها فى العربيه .. هتيجي يا عبد الله
عبد الله / ماشي يلا
عبد الله و مختار و هند و مريم يروحوا يركبوا العربيه و الكل متحمس مختار يبص فى الساعه
مريم / زمانها نازله معلش انت عارف سماح
مختار / مهو عشان انا عارفها
سماح خارجه من السرايا
مختار / فجأتنى
سماح تفتح الباب و تركب و مختار يسوق و يطلع
سماح / اتاخرت والله لبست اول عبايه ايدي جت عليها .. طرحتى مظبوطه
هند / حلوه
سماح تبتسم
عبد الله / هو احنا مش هنقضي يوم زى المره اللى فاتت
مختار / هرتبلك حاضر
هند / ممكن اجى معاكم عبد الله حكالى كتير عن اللى عملتوه
مختار / ممكن
مريم / و انا
مختار / ههههههههههههههههههه ممكن و انتى يا سماح كمان ممكن
مريم و هند و سماح ماسكين فى ايدين بعض و متحمسين عربيه تعدى بسرعه اوى من جنب مختار و مختار يفاديها
عبد الله / ايه الحلوف ده
مختار / عادى عادى جت سليمه
عبد الله / دا ممكن ياذى حد بسواقته دى
سماح / دا مغاورى الجارحى … عريس مريم
مريم / نعم !!!
سماح / انتى ما تعرفيش و لا ايه مغاورى طالب ايدك
مريم تبص على مختار فى المرايه عينه عليها تبص من الشباك و هى مخنوقه
سماح / مغاورى ده الابن الوحيد لشاهين الجارحى كبير الجوارحه البر اللى هناك ده كله بتاعهم مريم هتبقي ست الكل هناك
مريم / انا موافقتش
مختار / كفايا كلام فى السيره دى
مختار يحود و يمشي فى ممر ضيق
مختار / وصلنا اهو فرجوا هند و ما تبعدوش
مختار يركن و الكل ينزل مختار يشاور لغفير يجرى عليه
مختار / الكبير فين يا عباس
عباس / بيشربوا الشاى عند التربيعه يا مختار بيه
مختار يهز راسه و يشاورله على البنات
مختار / خليك مع الجماعه .. تعال انت معايا يا عبد الله
مختار و عبد الله يمشوا و الغفير واقف مع البنات
سماح / احسن انهم مشيو خلينا ناخد راحتنا
هند / المكان هنا حلو اوى انا عمرى ما شوفت حاجه زى دى
سماح / و لسه ياما هتشوفي البلد هنا كلها خير
هند / عبد الله حكالى عن اسطابل الخيل
سماح / مش بعيد عن هنا على فكره تعالى اما نفرجهولك
هند / ينفع ؟
مريم / ينفع تعالى
مريم و البنات يمشوا و عباس ماشي وراهم على بعد خطوات
……………………
عند التربيعه
رجاله قاعده و فى غفير فى جنب بيصب شاى مختار و عبد الله يدخلوا الكل يقوم و يحضن و يبوس
ناصر / يا اهلا يا اهلا بالدكتور اتارى البلد نورت
عبد الله / منوره باهلها
مختار / عبد الله عاوز يقضي يوم زى بتاع المره اللى فاتت يا عباده
مختار يغمز لعباده
عباده / عنينا غالى و الطلب رخيص قوم بينا
عبد الله يقوم
مختار / يا جدعان طب نقعد نسلم على الرجاله طيب انا بقالى ياما ما شوفتهمش
عباده / ابقي حصلنا
عباده ياخد عبد الله و امين و اتنين رجاله و يمشوا و عبد الله مبسوط اوى
ناصر / جدع انك وزعته
مختار / ما كانش ينفع اسيبه لوحده فى السرايا مع الحريم على فكره هند و مريم و سماح هنا فى الجنينه سبت عباس معاهم
ناصر / كلمتها
مختار / حاولت اكتر من مره الظروف مش سامحه
ناصر يتنهد
مختار / انا ناوى اكلمها هنا لما تشوف البلد هكلمها
ناصر / على الله لحسن كدا مش نافع
مختار / الا صحيح ايه حكايه مغاورى دى كمان بجد و لا
ناصر / والله الحج شاهين كلمنى من فتره و انا قولتله يدينا فرصه نفكر و نشور البنت
مختار / نشورها فى ايه دا فرق السما من الارض ما بقاش الا مغاورى كمان اللى ياخد مريم
شاكر / و هو مغاورى وحش دا هيبقي كبير الجوارحه
مختار / كبير الحجم صغير العقل يا عمى دا كل يوم له حكايه و مصيبه شكل … بيفكرنى بواحد اعرفه
ناصر / ههههههههههههههه بس الجدع ما بقالوش خمس دقايق واصل البلد و انتصار لحقت تقولك
مختار / ما عرفتش منها سماح اللى قالت
ناصر يبص على شاكر شاكر يبص الناحيه التانيه و هو مضايق
ناصر / كدا كدا الحاجات دى ما كانتش بتدارى و الكل كان هيعرف
مختار / مريم مش هتوافق اصلا و الحج شاهين كان لازم يفهم كدا من نفسه
ناصر / هدى نفسك الراجل ما غلطش دخل البيت من بابه و احنا يا نقبل يا نرفض
مختار يبتسم بسخريه
مختار / هتقول لمغاورى بيه مريم بنت الزنايته رفضتك و لا حتى الزنايته رفضوك و هيسكت
ناصر / اعلى ما فى خيله و الحاجات دى ما فيهاش غصبانيه و فى الاول و الاخر قسمه و نصيب
مختار / ماشي يا كبير … هستاذن انا اقوم اشوف هند و البنات وصلوا لفين
ناصر / كلمها يا مختار
مختار يهز راسه و يمشي ناصر يبص لشاكر شاكر بيهرب بعنيه منه
ناصر / تشرب شاى يا عمى
شاكر / لا انا كفايا عليا كدا عشان اعرف اتغدى
ناصر يهز راسه و يبص الناحيه التانيه و هو مضايق
………………………..
فى ارض فاضيه كبيره
هند / هو ده اللى مش بعيد دا احنا عبرنا القناه اسهل من كدا
سماح / هههههههههههههههههه انتى فرفوره و لا ايه
هند / الا ما فى حاجه نقعد عليها نريح حبه
مريم / يا بنتي خلاص والله قربنا خمس دقايق بس
هند / نفس البق اللى قولتيه من خمس دقايق
عباس / خلاص يا ست الكل وصلنا الاسطابل هناك اهو
هند / فين بس
سماح / يا بنتي شايفه المبنى ده ده ضهر الاسطبل هنلف حواليه بس
هند / لا بسيطه خالص انا اساسا جايه هنا ليه عمرى ما شفت حصان قبل كدا يعنى
مريم / ههههههههههههههههههههه
هند / اضحكى اضحكى حقك
مريم / يا ستى فى دكه هناك اهى نريح عليها حبه لو مش قادره تكملى
هند / ماشي
فى بركه طين البنات يلفوا حواليها و يروحوا يقعدوا على ديسك خشب محطوط فى ضهر مبنى
هند / و المهندس اللى صمم المبنى ما كانش يعمل بوابه من هنا
فجاه عربيه مغاوى تعدى بسرعه فى الطين تطرطش على البنات هند تزعق
هند / يا حيوان يا متخلف
البنات و الغفير يتخضوا و عربيه مغاورى تفرمل و ينزل منها شاب جته و يرجعلهم و هو على اخره
مغاورى / هو مين ده اللى حيوان يا بت
هند / انت .. دى سواقه دى بهدلتنا
عباس يقف فى النص
عباس / حقك عليا يا سى مغاورى اللى ما يعرفك يجهلك دى غريبه مش من البلد
هند / واحد غيرك كان نزل اعتزر مش نازل تتخانق
مغاورى / تشتميني و اعتزرلك ليه ان شاء الله بنت مين انتى يعني عشان اعتزرلك
سماح / دى خطيبه مختار
مغاورى ياخد باله من مريم و سماح يهدى و يلم نفسه
مغاورى / احم .. انتوا ايه اللى مخرجكوا لوحدكوا كدا
عباس / ما انا معاهم اهو يا سى مغاورى
مغاورى / اسكت انت … اركبوا اروحكوا
هند / نركب معاك بمناسبه ايه يعني
مغاورى / اللهم طولك يا روح
مختار يدخل و يركن العربيه و ينزل منها يشوف منظرهم
مختار / فى ايه ؟ ايه اللى حصل ؟
مغاورى / خطيبتك شتمتنى
هند / و دا عشان انا مجنونه يعني بشتمك من غير سبب يعني
مختار / اركبوا العربيه
مريم تشد هند يركبوا
مغاورى / ما تبقوش تسيبوا حريمكوا كدا فى حته هيو زى دى
مختار / كتر خيرك على النصيحه بس ابقي خف رجلك من على البنزين الدنيا مش هتطير
مغاورى / هههههههههههههههههه انت بقيت خفيف و لا ايه فاكر لما كنا بنتسابق انا و انت زمان انت قعدتك فى مصر غيرتك باين و بعدين هى حريم البلد خلصت رايح تاخد
مختار / ما لكش دعوه و لحد هنا و تقطم
مختار يسيب مغاورى و يمشي
مغاورى / بتديني ضهرك و انا بكلمك يا ابن الزيني
مختار يفتح باب العربيه و يبص لمغاورى
مختار / هتضربني فيه تانى و لا ايه
مختار يركب و هند و مغاورى بيبصوا لبعض بغل هند تبص الناحيه التانيه مختار يسوق و يمشي و مغاورى متابعه بغل و يبص لعباس عباس يبص فى الارض مغاورى يروح يركب العربيه و يمشي
………………
فى السرايا
الستات متجمعه حوالين ست معاها مفارش و ملايات التلت بنات داخلين و وراهم مختار فاطمه و انتصار و شيري يتخضوا
فاطمه / يلاهوى اى اللى عمل فيكوا كدا
هند / واحد متخلف سايق بسرعه طرطش علينا
سماح / مغاورى الجارحى و هند شتمته و قالتله يا حيوان يا متخلف
فاطمه / يا لاهوى و سكت
مريم / لا طبعا نزل يتخانق معاها
فاطمه / و انت كنت فين يا مختار
مختار / قالوا هيتفرجوا على الجنينه راحوا الاسطبل لوحدهم
سماح / هند اللى كانت عاوزه تروح
هند تبص لسماح
شيري / و عبد الله فين
مختار / مع عباده بيتفسحوا ما تقلقيش عليه
انتصار / حصل خير اطلعوا اتشطفوا و غيروا هدومكوا و انزلوا نقوا معانا الحاجه
شيري / تعالى يا هند
شيري تاخد هند و يروحوا المضيفه و مختار عينه عليهم و مريم و سماح يطلعوا فوق
انتصار / ما كانش المفروض تسيبهم لوحدهم
مختار / قالوا هيتفرجوا على الجنينه سبتهم مع واحد من الغفر و روحت كلمت ناصر دقيقه رجعت ما لقيتهمش واحد من الفلاحين قالى راحوا الاسطبل على ما وصلت
فاطمه / الحمد لله انك لحقتهم … الغدى جاهز اخليهم يحطولك لقمه و هو سخن
مختار / لا انا خارج لما ارجع ابقي اكل عن اذنكوا
انتصار / على فين تانى
مختار / و انا كنت لحقت اولانى
انتصار / كنت عوزاك
انتصار تروح هى و مختار فى جنب و فاطمه متبعاهم من بعيد
مختار / خير
انتصار / اخوك كلمك
مختار / بخصوص مغاورى ؟ اه و انا قولت لا و لو كنتوا كلمتوا مريم من يومها كانت قالت لا و فضيناها سيره بلا هم مغاورى ايه ده كمان اللى ياخد مريم دا هند شتمته يا حيوان يا متخلف نزل يتخانق عشان حيوان و متخلف لا عارف نفسه ما شاء الله تنح
انتصار / هههههههههههههههههههههه طب بس اعصابك ليطقلك عرق و لا حاجه
مختار / و الله انا اللى هطق من اللى بشوفه انا هاخد هند افرجها البلد
انتصار / هتكلمها
مختار / ادعيلى انا تعبت
انتصار / ههههههههههههههههههههه لا انشف كدا انت لسه ياما هتشوف
مختار / ههههههههههههههههههههه آلله يطمنك بالاذن
مختار يمشي و يروح يخبط على المضيفه شيري تفتح و هى مواربه الباب
مختار / ازيك يا امى هند غيرت
شيري / بتستحمى عاوزها فى حاجه
مختار / كنت هاخدها مشوار كدا افرجها على البلد
شيري / حاضر لما تجهز هتكلمك
مختار يبتسم و يمشي و شيري تقفل الباب مختار يروح يقعد على كبوت العربيه مريم تدخل تقعد جنبه يساعدها تقعد
مريم / قاعد كدا ليه
مختار / مستنى هند تلبس اصلها بتستحمى مش زى الناس
مريم / انت بترمى كلام و لا ايه لا احنا نضاف اوى انا بس قلبي دليلى كنت عارفه انك هتاخدها و تخلع قولت ما اديكش فرصه
مختار / ههههههههههههههههه يخربيت شيطانك بس انا فعلا محتاج اخدها و اخلع
مريم / هى بقت كدا يا عمى … ماشي ربنا يهنى سعيد بسعيده … بالنسبه للحوار اللى سماح
مختار / ابوكى كلمنى و انا قولت لا و هو مش مناسب ليكي لو ليكي انتى راي تانى قو…
مريم / لا ما ليش انا اساسا ما بطيقهوش .. و ما افتكرش في حد غير امه بيطيقه اساسا
مختار / هههههههههههههههههه كبرتى يا بت و بيجيلك عرسان
مريم / لا لسه ما كبرتش هم اللى مستعجلين انا لسه قدامى الجامعه يعني مش اقل من ست سنين و يعالم مش يمكن افلح و ادخل طب
مختار / حقه لو عملتيها ليكي منى اللى تطلبيه
مريم / حاسب على وعودك مش يمكن
مختار / اللى تطلبيه هديهولك بس انتى ابقي دكتوره و انا اعملك ليله ما اتعملتش و افتحلك مستشفي كبيره على الطريق و لا بتاعه بلاد بره و اجبلك اكبر دكاتره فى العالم يشتغلوا عندك انتى بس ابقي دكتوره و انتى تشوفي
مريم / ان شاء الله هبقي
مختار / ان شاء الله
مريم / هند جايه هناك اهى هتوزع انا بقي
مختار / يلا اتكلى
مريم تبتسم و تمشي تقابل هند
هند / على فين
مريم / هروق اوضتى و احط فيها السماعات عشان لما ترجعى اخطفك و نولعها
هند / بيس تمام هروح اشوف مختار عاوزنى فى ايه
مريم / ماشي سلام
مريم تدخل السرايا و هند تروح لمختار
هند / ماما قالتلى انك هتاخدنى مشوار
مختار / هوريكي البلد بعنيا تعالى اركبى
هند تتحمس و تجرى تركب
…………………..
فى ارض النشان
عباده / لا دا انت اتحسنت خالص يا ابن الجمل
عبد الله / بلاش يا عم ابن الجمل دى كانك بتشتم
عباده / هههههههههههههههههههه استغفر الله يا عم هتلبسنا العيبه ليه بقولك ايه انت ما جوعتش
عبد الله / والله جوعت بس مستخسر نروح
عباده / و مين قال اننا هنروح تعرف النهرده فى جماعه حبايبنا عملين سهرايه فى الجبل مزمار و شوى و تحطيب هتنبسط على الاخر
عبد الله / سفارى يعني
عباده / ايوه حاجه زى كدا
عبد الله / الله انا نفسي اوى اجرب حاجه زى دى
عباده / و احنا فيها يلا بينا يا رجاله
عباده ياخد عبد الله و الرجاله و يمشوا
……………………..
فى عربيه مختار
مختار سايق و هند جنبه عماله تتفرج من الشباك زى العيال الصغيره
هند / تعرف انى عمرى ما شوفت حاجات زى دى فى حياتى
مختار / ليه ما شوفتيش تلفزيونات
هند / لا مختلفه برده
مختار / احلى و لا اوحش
هند / حلوه جدا
مختار / مع انها مختلفه خالص عن القاهره و تعرفي الكارته غير العربيه كمان
هند / عمرى ما ركبت كرته مش الكارته دى الحنطور
مختار / بنت عمه
هند تبتسم
مختار / المهم كنت بقولك ان هنا غير القاهره يعني فى حاجات كتير احنا هنا بنشوفها عيب و ما تصحش فى القاهره عادى و العكس يعني هنا فى حاجات ما ينفعش ما تحصلش فى القاهره جريمه
هند / زى التار مثلا
مختار / زى التار … و زى السلاح
هند / و ختان الاناث و جواز القاصرات
مختار / فى حاجات كتير بس اللى بحاول اقوله ان …
هند / تعرف ان معظم العادات دى سبب استمرارها الاساسي هو الجهل يعني لو الناس دى اهتمت بالتعليم اكيد كل الحاجات دى هتتغير
مختار / مش معاكى بس مش موضوعنا
هند / ازاى بس يعني لو انت كواحد متعلم و مثقف ممكن توافق على الحاجات دى
مختار / لا بس انا بتكلم فى حاجه تانيه خالص
هند / تعرف انت معاك حق السبب الاساسي هو الفقر… الفقر برده عامل مهم جدا انا اسمع ان فى نسبه كبيره جدا من سكان الصعيد تحت خط الفقر و اكيد الفقر بيخلى الناس تهمل التعليم عشان لقمه العيش يعني انت لو وفرت للانسان ظروف معيشه كويسه هيهتم بالتعليم
مختار باصص قدامه و عاوج بقه
هند / انت مش عاجبك كلامى و لا ايه
مختار يركن العربيه على النيل
هند / دا نيل صح
مختار / بنسميه بحر بس اه نيل
هند تبتسم و تتعدل فى كرسيها و تبص على النيل
مختار /مش سهل نغير ثقافه مجتمع بحاله فكان لازم نغير القوانين
هند تبصله باستغراب
هند / مش فاهمه
مختار / ما ينفعش تقولى للصعايده ما تشيلوش سلاح و لا تخلوه فى بيوتكوا
هند / طب مهو ممكن يترخص
مختار / فى شروط و اجراءات كتير لترخيص سلاح و الناس البسيطه دى مش بتعرف تتعامل مع الحاجات دى
هند / يعني فى ناس بتشيل سلاح مش مرخص
مختار يبتسم و يبص الناحيه التانيه و يرجع يبصلها
هند / طب لو البوليس مسكه
مختار / مش بقولك القوانين هنا مختلفه
هند / بس دا مش قانونى
مختار / مش قانونى عندكم بس قانونى عندنا
هند / ازاى القانون و الدستور واحد للجمهوريه كلها ما فيهوش ماده واحده مكتوب فيها يستثنى من ذلك اهل الصعيد
مختار / معاكى حق مهو عشان كدا القانون هنا عرفى مش رسمي
هند / و دا زى الجواز العرفى كدا
مختار / ههههههههههههههههههه اش جاب لجاب بصي تسمعى عن قعدات العرب و القعدات العرفيه
هند / اسمع عن قاعده العرب
مختار / تسمعى عن الديه و الكفن
هند / ايوه مش دول بتوع الميت و كدا
مختار / ايون الديه و شيل الكفن دى لان الناس هنا مش بتشوف ان القتل الخطا عقابه القانونى كافى فبيحطوا قوانين عرفيه بنطبقها احنا تحت اشراف الحكومه
هند / انا توهت منك
مختار يمسك الدريكسيون جامد و يفرك فيه
مختار / اللى عاوز اقوله ان فى هنا حاجات عادى و بتتعمل تحت عين الحكومه حتى لو هى مش قانونيه فى الحقيقه
هند / و ليه الحكومه تعمل كدا
مختار / لانها لو سابتها من غير تنظيم هتبقي مشكله
هند / الحكومه بتشرف على جرايم صغيره عشان تحافظ عليها صغيره مش كدا
مختار / مش بالظبط خلينا نتكلم بالتحديد مثلا عن تجاره السلاح ما ينفعش تتمنع بس لو اتسابت على الغارب السلاح هيبقي فى ايد كل من هب و دب و مش بس كدا دا هيبقي فى ايد الناس اللى ما ينفعش يوصلها السلاح زى الارهابين مثلا
هند / طب ما دا اللى بقوله السلاح يبقي رسمي و مترخص و الحكومه عارفه
مختار / لا اله الا الله بصي يا هند خلينا نتكلم عن ختان الاناث تمام
هند / هنتكلم نقول ايه
مختار / هقول ان الحكومه اعتبرته جريمه بس فى عقليات ما ينفعش تتغير فلو راح لدكتور و قاله دا جريمه هيقوله السلام عليكم و يروح لغيره و لو لقي كل سكك الدكاتره مقفوله هيروح لدكاتره بير السلم او يمكن دايه او حلاق المهم انه هيعمل اللى فى دماغه حتى لو هيضر بنته و هو مش فاهم انه بيضرها فاهمه حاجه
هند مركزه جدا مختار يبتسم
مختار / الحل هنا ان البنت بتروح تكشف فعلا و الدكتور بيكشف عليها فعلا و بيقول لاهلها ان الحاله مش محتاجه تدخل جراحى و بيقنعه ان لو هى محتاجه كان اول واحد عملها و لو سالتى عن دكتور بيعمل ختان اناث الف من يدلك على الف دكتور
هند / فهمت و الحكومه عارفه ان الدكاتره دول اسم بس لكن مش بيعملوا كدا فعلا
مختار / ايوه عارفين امال يحبسوهم كلهم و يسبوا البنات للحلاقين و ولاد الكلب يقطعوا فى لحمهم
هند / فهمتك
مختار / اهو كدا برده بالنسبه للسلاح
هند / ازاى يعنى
مختار / يعني لو قولتى لفلاح بسيط ما ينفعش تشيل سلاح هيسيبك و يمشي و لو قولتيله لازم ترخص هيقولك انا لسه هرخص و هيروح يجيبه من السوق السوده اصل احنا شعب فهلوى و بيعرف يلف و يوصل للى هو عاوزه
هند / و بعدين
مختار / الحكومه باتفاق مع تجار كبار نظمت الموضوع و بقي فى ناس معروفه بتاجر فى السلاح الغير مرخص
هند / بس دى جريمه يا مختار و مش معنى ان الحكومه عارفه انها بقت صح بالظبط زى بنت بتصيع مع ولد و لما تكلمها تقولك ماما عارفه هو كدا بقت صح يعني
مختار / كدا كدا هيشيلوا السلاح فيشتروه من مصدر معروف ينظم الموضوع و عارف هيديه لمين و لا نسيبها مفتوحه يجي حد يبيع السلاح لكل من هب و دب
هند / احنا بنتكلم فى الموضوع ده ليه انا مش مقتنعه و مش عاوزه اضيع فسحتنا فى جدال مش هيفرق
مختار / عشان انتى مش من هنا مش قادره تفهمى
هند / و انت مقتنع ان ده عادى دا سلاح مش لعبه
مختار / السلاح زى ما ممكن يستخدم فى جريمه ممكن يستخدم فى الدفاع عن النفس و الشرف و الممتلكات
هند / ايوه يبقي مش اى حد يشيله
مختار /سكينه المطبخ تعرفي كام جريمه قتل حصلت بسكاكين المطبخ العاديه هتمنعى كمان السكاكين مهى موجوده فى كل بيت
هند / بس السلاح الابيض ممنوع ناقص تقولى المخدرات ادويه و اعشاب
مختار / لا دى ما فيش عليها خلاف
هند / الحمد لله اننا اخيرا اتفقنا على حاجه و لو سمحت غير الموضوع ده و ياريت تحاول انت كمان تتغير مش معقوله كل ما نخرج مع بعض يا تتكلم في الاحياء يا تتكلم في القانون ده مش اسلوب كلام بين اتنين مخطوبين يعني
مختار / هههههههههههههههههههههههههه
هند / انت بجد غريب … مفيش مكان هنا بيبع ميه ولا عصير ريقي نشف اقولك روحنى انا جوعت احنا بقينا بالليل و انا ما اكلتش
مختار / هههههههههههههههه حاضر هروحك
مختار يسوق العربيه
هند / قال و انا متحمسه و خارجه معاك و هتفسحنى
هند تتنهد مختار يضحك
مختار / هعوضهالك ان شاء الله
هند / انا بدات اشك انى هعيش لحد ما اشوف اليوم ده
مختار / زى القطط .. لا زى ايه ما انتى قطه جنبي اهو
هند / ميااااااو حاسب بقي لخربشك
مختار / هههههههههههههههههههه مجنونه
مختار يسوق و هند مبتسمه و باصه من الشباك و هو مضايق و بيحاول يدارى
………………………..
فى السفارى
الرجاله قاعده و فى خروف بيتشوى و راجل فى جنب بيعزف ربابه
عبد الله / الجو الاوريانتال ده تحفه بجد انتوا كدا كل خميس
عباده / لا بس احنا صحاب فى بعض بنرتبها كل فتره و بنطلع يعني نغير جو
عبد الله / حلوه اوى
امين يشد عباده و يوشوشه
امين / يعني ايه اورنتال دى
عربيه مغاورى تركن و ينزل منها
مغاورى / احلى مسا على اجدع رجاله فى البلد
عباده / الباشا تعال اقعد
مغاورى / مختار رجع كان بقيله فتره ما بينزلش
عباده / اه وصل النهرده شكلكوا اتقابلتوا
مغاورى / عمره ما هيتغير هيفضل طول عمره كدا
عباده / هههههههههههههههههههه
مغاورى / قسما بالله لولا ان كان معاه حريم لكان ليا معاه صرفه تانيه
عبد الله متابع الحوار باهتمام
عباده / يا عم انت بتنكش على المشاكل بمنكاش دا احنا ما صدقنا صالحناكوا اهمد بقي شويه مش كل يوم ليك حوار مع حد و لا انت غاوى تنضرب
مغاورى / اتعدل فى كلامك يا عباده مين ده اللى ينضرب
عباده / ما حدش بهزر معاك انت مالك قافش كدا ليه شكلك شديت معاه جامد
امين يناول مغاورى كبايه شاى
امين / خد شاى روق
مغاورى / تشكر
مغاورى يبص لعبد الله بيبصله بتجهم و مركز معاه
مغاورى / مش تعرفونا
عباده / دا الدكتور عبد الله ابو نسب
مغاورى / شكلك ما يجيبش دكتور
عبد الله / ليه بقي ان شاء الله ناقصنى ايد و لا رجل
مغاورى / يا عم شكلك صغير يعني اخرك تلميذ
عباده / التلميذ بكره يكبر و يبقي استاذ
مغاورى / يعني ما غلطناش يعني … قولتلى ابو نسب … تبع العروسه الجديده يعنى
عباده / اخوها
مغاورى / اااااه طيب
مغاورى يبص الناحيه التانيه و يعوج بقه و الكل متابع مغاورى يبص لعبد الله
مغاورى / ابقي شد عليها شويه مش كدا يعني
عباده / مغاورى
عبد الله / ما لها اختى يعني
مغاورى / وشها مكشوف و بترد و تعلى حسها على الرجاله قسما بالله لولا انها حرمه انا كنت
عبد الله / يا سيدى انا راجل قدامك اهو وريني نفسك
عباده / اهدى يا عبد الله حقك عليا … لم الدور يا مغاورى عيب كدا
مغاورى / يعني اللى اخته عملته عادى و لعلمك هتاثر على حريمكوا هتفلت عيارهم و تقلبهم عليكوا النهرده كانت وخداهم ورا الاسطبل بكره توديهم كباريه
عبد الله يقف
عبد الله / انت شارب حاجه و جاى تطلعها علينا و لا انت عبيط باى ديفولت يعني
الكل يقف بسرعه مغاورى يطلع سلاحه و يشد الاجزاء الكل يطلع سلاحه و يشد الاجزاء مغاورى ينشن على عبد الله عبد الله يتوتر الكل ينشن على مغاورى عبد الله يبص حواليه عيله مختار كلهم فى صفه
مغاورى / دى اخرتها يا عباده
عباده / هتتكلم عن حريمنا و نسكتلك و لا ايه
مغاورى / بتنصروه عليا دا انا و ابن عمى على الغريب
امين / و انا و اخويا على ابن عمى و عبد الله و عيلته بقوا مننا
مغاورى / و ماله هنتقابل تانى
عباده / انست و نورت
مغاورى يركب عربيته و يمشي
عباده / ما تشوفلنا يا ابنى اللحمه اللى مش عاوزه تستوى دى … اقعد يا عبد الله و هدى روحك احنا بنقابل من الاشكال دى كتير اقعد اقعد
عبد الله يقعد راجل يدخل شايل اطباق يدى لعبد الله اول واحد
……………….
فى السرايا
فى اوضه ناصر
انتصار / يعني ما قولتلهاش
مختار / كلمتها والله و ما فهمتش
ناصر / يبقي قطمه احسن من نحته و تقولها علاطول احسن من اللف و الدوران ده
مختار / بقولك ما فهمتش اقولها انا بهرب سلاح و ابيعه
ناصر / يعني هتقلد عمك زكريا الله يرحمه
انتصار / هند غير مرفت يا ناصر هند عاقله
ناصر / يبقي يقولها دا جواز مش لعبه
مختار / هقولها … هحاول معاها تانى
باب الاوضه يخبط انتصار تروح تفتح
عباده / الكبير موجود
انتصار توسعله يدخل
عباده / فى حوار حصل يا كبير و لازم تعرفه
ناصر / خير
عباده / و من امتى مغاورى يجي من وراه خير
عباده يبص لمختار و يبص لناصر
………………..
فى المضيفه
هند بتلبس عبايه فوق بجامه
شيري / طب اسهرى زى ما تحبي و تعالى باتى هنا انا مش هنام
هند / بيقولوا هيسهروا للصبح يا ماما حرام تسهرى كل ده
شيري / اللى يريحك انا كدا كدا نومى خفيف
هند / تمام
هند تلبس طرحتها و تروح السرايا تقابل فاطمه
فاطمه / الله انتى ما نمتيش يا دودو
هند / هسهر مع سماح و مريم فى اوضه مريم
فاطمه / والله … تعرفى ان اوضه مريم لزقه فى اوضه مختار
هند الابتسامه تروح من وشها
فاطمه / فى مصر اوضتك لزق فى اوضه مختار و فى السرايا اوضتك لزق فى اوضه مختار و هانت كلها حاجه بسيطه و الحيطه اللى بينكوا تتهد
هند / ان شاء الله عن اذن حضرتك
فاطمه / تعرفى اوضه مريم فين و لا اجى اوصلك لتدخلى اوضه غلط و لا حاجه
هند / عن اذن حضرتك
هند تسيبها و تطلع و هى بتغلى و فاطمه متبعاها ببرود تطلع وراها مختار يفتح باب اوضه ناصر و عباده يطلع وراه و يقفل الباب هند تعدى ما تعبرهمش و تروح تفتح باب اوضه مريم و تدخل
عباده / انتوا قافشين و لا ايه
مختار / مش على حد علمي
فاطمه تطلع
فاطمه / الله انتوا واقفين هنا ليه فى حاجه و لا ايه
مختار / عن اذنكوا
مختار ينزل و فاطمه متبعاه ترجع تبص لعباده
فاطمه / هو فى حاجه يا عباده
عباده /حاجة زى ايه يعني
فاطمه / مفيش تصبح على خير
عباده / و انتى من اهله
فاطمه تسيب عباده و تدخل اوضتها تلاقي شاكر قاعد على الكرسي و مكشر و باصصلها تروح تقف قدام المرايه و تقلع الطرحه و تسيب شعرها و تسرحه
فاطمه / الله انت لسه صاحي يا اخويا
شاكر / مستنيكي
فاطمه/ حقك عليا كنت بشطب المطبخ انت عارف البنات ملخومين مع هند و ما يعتمدش عليهم
شاكر / اقعدى عاوزك
فاطمه / هستاذنك اخش الحمام لحسن على اخرى
شاكر يشاورلها تدخل تجرى على الحمام تفتح الدش على الميه السخنه و تروح تحط روج و بعديه تجيب طبق بلاستيك من تحت الحوض و تحطه فى البانيو و تحط كحل و روجاجو و برفيوم و بعدين تقفل الحنفيه و تحط ملح باديكير و تاخد الفوطه على كتفها و الطبق و تطلع تحطه فى الارض تحت رجل شاكر
شاكر / دا وقته ده
فاطمه تشمر الجلبيه لفوق و تربع و تقلع شاكر الجزمه و الشراب و تحطها فى المايه
فاطمه / ما انا تحت رجلك اهو و سمعاك انا بس قولت شكلك تعبان اما اخف عنك شويه الله يعينك من الوقفه و تعب اللف على الغيطان طول النهار و بعدين انت عارف انى بحب ادلعك و اهتم بيك
فاطمه تدعك لشاكر رجليه
شاكر / انت قولتى لسماح ان مغاورى متقدم لمريم
فاطمه / انا يا حج !!! اخص عليك ازاى تقول كدا
فاطمه تقوم تقف
فاطمه/ انا هروح دلوقت اجبلك البت سماح من شعرها تقولك عرفت منين
شاكر / ما لهاش لزمه الشوشره سماح مع هند بعدين ابقي اساليها بينك و بينها
فاطمه / طب والله دى عين الوليه ام سعيد
فاطمه تروح تفتح الدولاب و تطلع كيس فيه قمصان نوم و تفردها و توريها لشاكر و تحطها فى حجره
فاطمه / معرفش ايه اللى جابها مع ام منصور و عينها نقرانى و انا بنقيلك الحاجات الحلوه دى … مستكترينك عليا يا خويا
فاطمه توطى و تسند بايديها على رجلين شاكر و تقرب اوى و تبص فى عنيه
فاطمه / تحب اللبسلك انهى واحد
شاكر / شوفيلى حاجه على زوقك
فاطمه / هههههههههههههههههههههههه
…………………
فى اوضه مريم
مريم حاطه اللاب على رجلها و عماله تظبط لسته الاغانى و سماح بتطلع كيسه سوده من الدولاب فيها صاجات و حزام شخاليل
هند / ايه الحاجات دى
مريم / دى حاجات ضربتها من جهاز اخواتى و عيناها هنا لزوم الصياعه
سماح / انتى ما جبتيش بدله رقص فى جهازك
هند/ هههههههههههه لا ما جبتش انا لسه ما جبتش غير شويه لبس بيتي
سماح / جبتى قمصان نوم … فرجيني فرجيني
هند / فى الشنط جوه فى اوضه مختار مش هقدر اقوله هاتهم
سماح تبص لمريم و يضحكوا
هند / فى ايه
سماح / ما فيش
هند / لا فى قولى
سماح / انتى سايبه الحاجات دى فى اوضه مختار عادى كدا طب هو عارف اللى فى الشنط
هند / انا مش هرد عليكوا
سماح / ما تبقيش افوشه بقي بنهزر معاكى
هند / هو اللى شاريهوملى اصلا
سماح / يلاهوى بتهزرى
هند / ممكن نغير الموضوع و نرقص و لا احنا جايين نرغى
سماح / يا اختى فكيها انتى شكلك لسه قافشه من حوار مغاورى امال لو ما كانش خدك فسحك
هند / شغلى يا مريم
مريم تشغل الاغانى و التلت بنات يقوموا يرقصوا و سماح تروح تعلى الصوت و مريم تربط لهند الحزام
………………….
فى الجنينه
مختار يطلع من السرايا يلاقي عبد الله قاعد لوحده فى جنب يروح يقعد جنبه
مختار / اللى شاغل عقلك و مطير النوم من عينك
عبد الله يبصله و يبتسم
عبد الله / قال يعني انت اللى مقطعها شخير
مختار / و هو انا هشوف نوم النهرده البنات عاملين حفله صباحى فى الاوضه اللى جنبي و هيصحوا البيت كلو دلوقت
عبد الله يبتسم مختار ياخده تحت باطه عبد الله يبصله
مختار / شكل فسحتك مع عباده ما بسطتكش
عبد الله / مرزق هو عباده حكالك
مختار / قصدك مغاورى … الراجل معزور كرامته ناقحه عليه
عبد الله / اياكش يفطس
مختار / هههههههههههههههههه
عبد الله / انت بتضحك
مختار / اصلها امنيه شعب بص باختصار كدا انا و الكائن ده من يوم ما وعينا على الدنيا و احنا مش طايقين بعض و بمناسبه و من غير بنتخانق تقوم هند اول ما تقابله تشتمه
عبد الله / هههههههههههههههههه
مختار / شوفت بقي
عبد الله / هنروح بكره
مختار / تحب تخليك
عبد الله / ما عدتش عارف انا قولت ههرب من اللى فى مصر
مختار / مفيش مكان سالك و اتعلم تواجه ما تهربش
عبد الله يهز راسه و بعدين يفتكر حاجه مهمه
عبد الله / لا بس النهرده بصراحه كنت فرحان اوى عارف ابن الكلب ده رفع المسدس عليا فجاه لقيت الكل بيدافع عنى و عباده بيقوله دا اخونا و اخته مننا بصراحه طلعوا رجاله اوى انا قولت هيجروا
مختار / ولاد الزيني يجروا !!! هههههههههههههههههه يا عم لسه بقولك واجه ما تهربش
عبد الله / بس هم كلهم بيشيلوا سلاح كدا
مختار / تعرف انا كنت بتكلم مع اختك فى الحوار ده النهرده
عبد الله / حوار ايه
مختار / الفرق بين هنا و مصر فى حوار السلاح ده
عبد الله / مستحيل تكون الاسلحه دى كلها مرخصه دا امين ما كملش تمنتاشر و شايل سلاح هو ده قانونى ؟
مختار / القانون هنا مش زى مصر
عبد الله / واضح
مختار يبص لعبد الله و يبتسم
مختار / بجد !!!
عبد الله / بس اللى انا مش فاهمه ليه القانون مختلف معقوله الحكومه مش عارفه تسيطر على الصعيد
مختار / ثقافه شعب
عبد الله / بس كدا ممكن حد يتاذى
مختار / لا مهو مش سبهلله يعني فى برده قانون يعني اللى بيغلط بيتعاقب مهما كان سنه
عبد الله / يعني اشيل عيل سلاح و ارجع اعاقبه لما يستخدمه غلط
مختار / سن الطفوله هنا برده مش زى عندكوا احنا طبيعه
حياتنا بتكبرنا اسرع يعني عندنا فى رجاله بتتجوز ١٨ سنه عادى و يشتغل و يفتح بيت عادى
عبد الله / بس رسمى بيمشى عليه القانون العادى فى الجرايم و الخناقات و كدا
مختار / ايوه دا لو الحوار وصل انه يبقي رسمى و حكومه و كدا بس فى حاجات عندنا بتتحل بالقعدات العرفيه
عبد الله / فكره حلوه اوى دى
مختار / المهم نرجع لحوار السلاح
عبد الله / ماله
مختار / مع ان فى ناس كتير شيلاه بس برده مش اى حد ممكن يشيله يعنى بيتباع لناس معروفه و معروف هتستخدمه فى ايه انما لو حد غريب او ارهابى مثلا اكيد لا
عبد الله / والله رجاله
مختار / انت بجد دا رايك !! دا عكس راى هند خالص هند شايفه ان الغلط غلط ما ينفعش نبسطه او نجمله
عبد الله / كل مكان و له عاداته و ثقافته مش هينفع نغيرها لاننا بكدا بناخد روح المكان منه يعني
مختار يبتسم
مختار / انت عارف ان السلاح ده بما ان فى سلاح كتير مش مرخص يعني فى سوق سوده يعني اكيد بيدخل بطريقه غير شرعيه
عبد الله / صعبه دى بيعملوها ازاى دى
مختار / عارف مامتك لما بتسيبك تسرق البطاطس المحمره من المطبخ
عبد الله / هههههههههههههههه ايوه بس لما بتقفشنى بتزعق
مختار / اهو الحكومه كدا ما دام ما اتمسكتش اعمل اللى انت عاوزه تجار السلاح بيشوفوا شغلهم و الحكومه بتشوف شغلها و اخر اليوم حبايب دا كمان لو ظابط اتزنق فى ترقيه ممكن يظبطوله ضبطيه حبى
عبد الله / عالم دماغ اقسم بالله
مختار / لسه نظرتك فى الصعيد حلوه
عبد الله / انت معاك سلاح
مختار / معايا
عبد الله / ينفع تجبلى واحد
مختار / ههههههههههههههههه لما تتمكن منه هجبلك واحد
عبد الله / انا اتحسنت كتير فى النشان اسال عباده
مختار / تعرف تفكه و تركبه و تنضفه
عبد الله يبصله باستغراب
مختار / تعال هعلمك
مختار ياخد عبد الله تحت باطه و يدخلوا السرايا
…………………..
فى اوضه فاطمه
شاكر نايم بيشخر و فاطمه نايمه جنبه مضايقه و تبص عليه بحزن و صوت الاغانى مسمع فى الاوضه فاطمه تتقلب و تغطى ودانها و تنطر الغطا و تقوم تلبس العبايه شاكر يحس بيها يقوم يقعد
شاكر / رايحه فين يا فاطمه
فاطمه / الفجر قرب يدن و دول ما فيش دم خالص معليين الاغانى و لا كان فى غيرهم فى البيت انا مش عارفه انام
شاكر يفتح الدرج و يطلع كيس قطن
شاكر / حطى قطن فى ودانك و انتى تعرفى تنامى
فاطمه / يعني انت عاجبك عمايلهم دى هيصحوا يصلوا الفجر ازاى
شاكر / دى مشكلتهم هم اللى ما تقومش معاكى تصلى الفجر عاقبيها لكن دلوقت سبيهم ينبسطوا البت ما بتجيش كل يوم
فاطمه / يادى البت اللى كلكوا عاملينلها حساب
فاطمه تروح تقعد على السرير و تربع و تحط ايدها على خدها شاكر يلف ايده حوالين وسطها و ياخدها فى حضنه تنام و تحط راسها فى حضنه
شاكر / هدى نفسك ما فيش حاجه تستاهل
فاطمه / اللى تشوفه
فاطمه تغمض عينها و تكتم زعلها جواها و تفتكر
/////////////
بيت طين فقير جدا
عيله ١٤ سنه بتمسح الارض و تمسح عرقها باب الشقه يتفتح و تدخل ست
الست / انتى لسه ما خلصتيش يا اللى تنشكى فى قلبك
فاطمه / هخلص اهو اخر حاجه والله يا مراه ابويا
الست تروح تقعد
الست / بيضالك فى القفص هتعيشي فى السرايا
فاطمه تبصها
الست / خلصى تنضيف يا بت و انجرى على المطبخ الليله جيلنا ضيوف و عاوزين نعملهم ضيافه حلوه
فاطمه / مين جاى يا مراه ابويا و ايه حكايه السرايا دى
الست / بيدوروا لسى شاكر الزيني على عروسه بعد ما مراته ماتت و بالعافيه اقنعتهم بيكي يلا خليكي تغورى من وشي و ارتاح من قرفك كان يوم اسود لما اتجوزت ابوكى و بلانى بيكي
يتبع…
لقراءة الفصل التالي : اضغط هنا
لقراءة الرواية كاملة اضغط على : (رواية البر التاني)
تعليق واحد