رواية أريدك لقلبي الفصل الخامس 5 بقلم ندى أحمد

رواية أريدك لقلبي الفصل الخامس 5 بقلم ندى أحمد

رواية أريدك لقلبي الجزء الخامس

رواية أريدك لقلبي البارت الخامس

رواية أريدك لقلبي الحلقة الخامسة

-قال ايه هيخلوني متدربه بعد كل سنين الكليه دي
دخلت مكتب المدير التنفيذي و اتصدمت لما شافت ان المدير هو مالك
-مالك !!
= انتي المتدربه الجديده ؟ انا قلت للسكرتيره تقولك هتعملي ايه بالظبط وتشرحلك النظام عندنا مكنش فيه داعي تيجي لمكتبي
-مالك انت مش فاكرني !!
= ياريت تتفضلي برا و لو عندك اي سؤال اسأليه للسكرتيره انا مش فاضي
-طبعا انت خلتني متدربه هنا عشان تنتقم مني وتذلني صح !!
بحزم = ايه انت دي ؟! انا المدير هنا و لو محترمتنيش من اول يوم يبقا اتفضلي قدمي استقالتك و انا هسامحك المرادي عالمعامله دي بس دي اخر فرصه

حور مستنتش انه يكمل كلامه وخرجت من اوضه المكتب و قفلت الباب وراها جامد
مالك فنفسه = انا ازاي مراجعتش اسماء المتدربين الي قبلوهم ورا ال HR .. لو كنت راجعتهم مكنتش هخليها تتعامل معايا ولا تعرف اني المدير اصلا .. بس هي لسا حلوه زي م هي .. كأني لسا شايفها امبارح لسا ملامحها طفوليه و لسا لسانها طويل لما بتتعصب .. لا يا مالك ايه الي بتعمله دا انا مينفعش افكر فيها اصلا
اما حور فكانت متعصبه جدا من طريقه كلام مالك معاها وانه مش فاكرها او يمكن بيمثل انه مش فاكرها
-المدير قالي السكرتيره هتفهمك الشغل ف ياريت تفهميني..
السكرتيره فهمتها هتعمل ايه
فنهايه اليوم لما خلص وقت شغل حور خرجت من الشركه و سمعت صوت مواء جامد لقطه ما
اتبعت الصوت وشافت قطه صغيره و رجلها باين عليها مكسوره
الدنيا كانت بتمطر ف اخدتها بسرعه و دخلت الشركه و قعدت عالمكتب الصغير المخصص ليها كمتدربه
كانت بتنشفها بالجاكيت بتاعها و بعدها سابتها عالكرسي و راحت جابتلها لبن وسرنجه وكانت بتشربها اللبن بالسرنجه عشان كانت قطه صغيره جداا
كل الموظفين مشيو وهي قاعده بتهتم بالقطه لغايه لما تتدفي شويه بعدها هتاخدها عند دكتور بيطري . كان شادي بيرن علي حور لانه قلق انها مروحتش لغايه دلوقتي مع انها كلمته لما كانت خارجه من الشركه وقالتله شويه و هكون فالبيت بس حور كان موبايلها سايلنت و ملاحظتش مكالمات شادي
مالك خلص شغله وكان الوقت متأخر و لفت نظره اوضه المتدربين الي اللمبه بتاعتها شغاله ف معني كدا ان فيه حد لسا فالاوضه
دخل الاوضه و كانت حور حاطه القطه علي رجلها وبتشربها اللبن
ب ابتسامه = لسا بتحبي القطط لغايه دلوقتي
حور اتخضت لما سمعت صوته
-خضتني !
= ليه لسا موجوده فالشركه لغايه دلوقتي
-كنت خارجه من الشركه وشفت …

وقفت كلامها
-انت مالك انت موجوده فالشركه لغايه دلوقتي ليه !!
= علي فكره انا المدير التنفيذي هنا ومن حقي اسأل متدربه موجوده فالشركه بعد ساعات شغلها عن سبب وجودها فالشركه فالوقت دا
-اه صح عندك حق ..
= ياريت يلا تتفضلي علي بيتك عشان محدش فالشركه غيرنا وانا عايز امشي و اقفل الشركه بالمفتاح
-يسلام بتقفل الشركه بنفسك بالمفتاح ؟!
= يلا بس اطلعي من الشركه خليني اخلص و اروح بيتي
-انت كنت فين طول السنين دي .. عارف انا دورت عليك اد ايه و معرفتش اوصل لحاجه عنك !!
= اظن مفيش داعي انك تقلبي فالدفاتر القديمه .. حلوه الدبله الي ف ايدك .. و باين عليها غاليه زي م مامتك كانت عايزه
حور خبت ايدها الي فيها الدبله
-اهو هاخد قطتي و هنخرج من شركتك متقلقش مش هناكلها يعني
كانت هتخرج من الشركه بس رجعت تاني
-الدنيا مطر برا و القطه كدا هتتبل تاني
= طب استني انا معايا شمسيه ف عربيتي
مالك جابلها شمسيه من عربيته
= خديها يبنتي مكسوفه ليه
-مالك متستفزنيش ! مش شايفني ازاي ماسكه القطه ب ايديا الاتنين ؟! همسك الشمسيه ازاي
= طب تمام استني اوقفلك تاكسي وانا همسكلك الشمسيه لغايه لما تدخلي التاكسي .. خليكي فالشركه لغايه لما اوقف تاكسي
بس مكنش فيه اي تاكسي فالجو الصعب دا

= خلاص كدا هضطر اوصلك بعربيتي .. مفيش اي تاكسي اصلا
مسكلها الشمسيه لغايه لما ركبت عربيته وهو اتبل عشان مكنش فيه شمسيه فوق راسه
ركب العربيه
=فين بيتك
-اه اعمل نفسك كمان نسيت العنوان وبعدين انت اتبليت جامد وكدا هيجيلك نزله
= هو انا خطيبك عشان تهتمي بيا ! خليكي فنفسك
-انا الغلطانه اني اهتميت اساسا
وطول الطريق وهو بيعطس
-شفت اهو جتلك نزله عشان تبقا تسمع كلامي
= انزلي يلا اهو وصلتي وخدي الشمسيه لو عايزه
-استني هوصل القطه للشقه واجي اجبلك الشمسيه بدل متروح من غيرها وتتبل اكتر
=تمام بس بسرعه
-ماشي
طلعت بسرعه لشقتها وسابت القطه و دخلت المطبخ غلت ميه وحطتها ف ترمس حراري و اخدت معاها شاي ليبتون وسكر و بعدها اخدت كوت طويل من عندها وبيدفي
^بتعملي ايه يا حور !!
-لحظه يا ماما بس
نزلت بسرعه و هي حاطه الشمسيه فوقيها عشان الكوت ميتبلش
= اتأخرتي علي فكره
-خد الترمس دا فيه ميه مغليه اعمل بيها شاي عشان تتدفي و خد الكوت الطويل دا بتاعي بس هيدفيك شويه لغايه لما توصل البيت و اهي شمسيتك
مالك اخد الشمسيه بس و مرضيش ياخد الباقي
-يعني تتعبني عالفاضي !!
= عن اذنك انا اتأخرت ابعدي عن العربيه خليني اعرف امشي
بعدت عن العربيه ومالك مشي
كانت واقفه فالمطره وهي زعلانه علي الموقف الي عمله مالك .. كان ممكن ياخدهم ك جبر خاطر حتي
بس وقتها كان شادي شايف الموقف دا كله .. كان واقف قريب منهم لانه قلق علي حور وكان رايح بيتها يشوفها فالبيت ولا لسا برا
اول لما لفت وشها شافت شادي

بصدمه – شادي !!
~ مين دا الي كنتي هتديه الحاجات دي يا حور .. وبعدين مش دا الكوت المفضل عندك ؟! و ليه تخلي حد يوصلك للبيت يا حور كان ممكن مثلا تردي علي اتصالاتي وانا كنت هاجي اخدك للبيت
-شادي دا .. دا .. مديري فالشغل
~ وهو فيه مدير بيوصل موظفينه للبيت ؟!
-شادي انت مش واثق فيا يعني !
~ واثق يا حور بس من حقي اشك وانا شايفك مهتمه اوي بيه كدا
-خليك واثق فيا يا شادي .. عن اذنك عشان اتأخرت علي البيت
طلعت بيتها و طبعا مسلمتش من اسئله مامتها
^ كنتي واخده الحاجات دي لمين ؟
-لشادي يا ماما بس مرضيش ياخدهم .. عن اذنك هنام
دخلت نامت بعد اليوم المرهق دا و كانت القطه الي انقذتها نايمه جمبها و كانت هتوديها للدكتور البيطري لما الجو يهدي
*اليوم الي بعدو *
صحيت الصبح و لبست و راحت الشغل وكان شادي بيتصل بيها بقاله ربع ساعه بس هي مطنشاه و فالاخر زهقت من الرن الكتير ف ردت
~ كل دا عشان تصحي يا حور ! مفيش مره تصحي بدري !
-لا يا شادي انا صاحيه من بدري وكمان لبست وجهزت
~ غريبه اومال ليه مكنتيش بتردي عليا
-كان الموبايل سيلنت يا شادي .. هتوصلني للشغل ولا اروح بعربيتي ؟
~ اه هوصلك استني دقيقتين وهكون عندك
وصلها للشغل وهو مستغرب انها صحيت بدري من غير م يصحيها و مستغرب من معاملتها الي اتغيرت معاه من امبارح
دخلت مكتب المتدربين فالشركه وطول الوقت بتبص عالطرقه بتحاول تلمح مالك (اوضه المتدربين ملهاش باب )
بس مالك كان طول اليوم فمكتبه
اتحججت انه طلب منها تنفذ حاجه ف هي خلصتها والمفروض تسلمهاله
السكرتيره : استني طيب هستأذن مستر مالك واشوف ينفع تدخلي المكتب ولا لا
-تمام انا مستنيه
بعدها بشويه
السكرتيره : تمام بيقولك ادخلي

دخلت الاوضه و شافته وهو بيعطس كل دقيقتين وكمان باين عليه عنده نزله
-كنت فضلت فالبيت انهارده بما انك تعبان للدرجه
= بتتحججي عشان تشوفيني ليه ؟
-هاه ؟! انا بس كنت هاخد رأيك فحاجه عشان انا لسا جديده وكدا
= اه طبعا اومال ..
حور فنفسها -كاريزما وقمر حتي وهو تعبان .. و بعدها سرحت فخيالها وهي بتقارن بين حالته دلوقتي وحالته زمان . زمان كان بيلبس لبس متخيط او متقطع و شعره مكنش بيتسرح كويس انما دلوقتي شعره متسرح حلو اوي و كمان لابس بدله شيك مزوده جماله
= مبحلقه فيا كدا ليه !
-لا مفيش .. فيه حاجه مش عارفه اعملها ممكن توريني اعملها ازاي ؟
= علي فكره لو مش عارفه تعملي حاجه المفروض بتطلبي مساعده حد من الموظفين الي اقدم منك مش تيجي تقولي للمدير يوريكي ازاي تعمليها !
حور اتقمصت وكانت خارجه من المكتب
=استني ! خلاص تعالي هوريكي بس دي اخر مره
-اول واخر مره والله
مالك ضحك علي طريقتها الطفوليه
-مالك انا مش شايفه ينفع اجي اقعد جمبك ؟ اصل الواحد كبر فالسن ونظره بقا علي اده
= طب تعالي ويلا خلصيني عشان ورايا شغل كتير
حور لما قعدت جمبه قربت منه جامد لدرجه ان نفسهم بقا قدام بعض
=انا .. انا كدا مش عارف اركز ابعدي شويه
بعدين هو بعد عنها و فك الكرافته شويه عشان يعرف يتنفس
-خلاص انت شكلك تعبان اجيلك وقت تاني بقا
وخرجت من المكتب و هي ضميرها بيأنبها انها اصلا بتحاول تكلم مالك وهي اصلا مخطوبه .. هي حست انها انسانه وحشه و المفروض تهتم بشادي وتفكها من مالك خالص .. كانت محتاره ومش عارفه تعمل ايه بس هي غصب عنها مبقتش عارفه تكلم شادي ولا تبقا معاه زي زمان
كان شادي بيتصل بيها بس هي طنشته كالعاده .. دي بقت عادتها من سعت لما قابلت مالك .. اهملت شادي جداا رغم انها كانت بترد عليه بسرعه

بعد لما خلصت شغل استأذنت السكرتيره تاني و دخلت مكتب مالك
-خفيت شويه ولا لسا تعبان
= الصبر يارب الصبر بعدين انا عندي فضول تجاه حاجه
-ايه هي
= طبعا انتي حاليا شيفاني بقيت غني و مش بلبس هدوم متقطعه و كمان اكيد معايا شقه و ڤيله فمكان كويس ف قولتي احاول اقرب منه بما انه بقا يليق بيا صح ! انا لسا فاكر كل كلمه قولتيهالي زمان ومش ناسي
-مالك انا مش عارفه ليه بتفكر فيا بالشكل دا .. بس انا بجد ندمت عالكلام الي قولتهولك زمان و كنت بدور عليك عشان اعتذرلك بس معرفتش اوصلك
= وانا المفروض اصدق طبعا .. حور اتفضلي برا مكتبي عشان مش فاضي
حور خرجت من المكتب وهي زعلانه وفضل يطنشها لمده اسبوع .. دا حتي امر السكرتيره انها متخلهاش تدخل مكتبه و حور فالاسبوع دا مبطلتش تفكير فيه لدرجه انها نسيت اصلا انها مخطوبه لشادي وان فرحهم المفروض بعد اقل من شهر .. كانت بتطنش مكالمات شادي ولما بترد عليه بتحاول تخلص المكالمه بسرعه وبتسرح فوسط المكالمه ولما بيجي عندهم البيت تعمل نفسها نايمه و شادي كان صابر عليها ومش عارف ايه سبب تغيرها بس كان بيقنع نفسه انها مشغوله بالتحضيرات للفرح
بعد الاسبوع دا حور قررت انها لازم تتكلم معاه وتقوله عالحقيقه و تعترفله
السكرتيره حاولت تمنعها كالعاده
-قوليله حور هتقولك حاجه مهمه ولو مسمعتهاش دلوقتي هي هتستقيل من الشركه
السكرتيره دخلت مكتب مالك وبعدها خرجت و بلغت حور بموافقه مالك انه يقابلها
= اوعي تكوني افتكرتي اني وافقت اقابلك عشان خايف تستقيلي .. انا بس عندي فضول اعرف ايه هي الحاجه المهمه دي
-مالك بص انا هقولك الحقيقه
= ماشي قولي
-بص انا من سعت مشوفتك هنا فالشركه وانا مش عارفه ابطل افكر فيك .. انا اتخطبت يا مالك لاني فقدت الامل اني الاقيك وماما كانت بتضغط عليا وبعدين انا عمري م حبيت خطيبي .. كان هو دايما الطرف الي بيحبني و انا كنت ساكته علي امل اني احبه مع الوقت بس محصلش ..

= وانا ايه علاقتي ب خطيبك يا حور .. بتقوليلي ليه الكلام دا
-عشان انا لسا بحبك يا مالك ومستعده اسيب خطيبي عشانك
مالك اتصدم من كلامها .. دا اول اعتراف صريح انها بتحبه
= مش هينفع ..
-يعني ايه مش هينفع يا مالك !! انت بتهزر صح ! انا كمان شايفه فعيونك اد ايه انت بتحبني ف بطل عند بقا
= انا متجوز يا حور

يتبع…

لقراءة الفصل التالي : اضغط هنا

الرواية كاملة اضغط على : (رواية أريدك لقلبي)