رواية رجل الأحلام الفصل الأول 1 بقلم إيمان شلبي
رواية رجل الأحلام الجزء الأول
رواية رجل الأحلام البارت الأول
رواية رجل الأحلام الحلقة الأولى
-مبسوط اوي اني قابلتك النهارده ،ملامحك جميله احلي من الصور بكتير
شوفت الماسدج اول ما فتحت الفون بعد ما روحنا من اول مقابله
قلبي دق
عيوني لمعت بفرحه
حسيت اني في فراشات بتطير من حوليا !
اول مره حد يقولي كلمه حلوه
انا اول مره من الأساس اقابل ولد
بالرغم اني كنت عارفه أن اللي بعمله غلط وضميري بيأنبني من وقت ما وافقت علي المقابله دي
بلعت ريقي وانا بكتب وأيدي بتترعش :
-بجد؟
شافها ورد :
-والله بجد انا من وقت ما شوفتك عمال اسأل نفسي ازاي ربنا حط الجمال ده كله في بني آدم ؟!
وشي احمر من كتر الكسوف وابتسمت ابتسامه واسعه وانا برد عليه بأحراج
-ربنا يخليك تسلم
-طب ايه مش مبسوطه انك شوفتيني؟
رديت بلهفه :
-لا مبسوطه اوي
-امممم طيب عجبتك الهديه
بصيت علي شنطه الهدايا اللي كانت علي الكمود وانا ببتسم
-جدا البوكيه حلو اوي بجد
-والروايه ؟
-الروايه اجمل حاجه
-مش اجمل منك اكيد
ضحكت وبعتله قلوب كتير
اصل بصراحه يعني انا مش بعرف ارد
فنون الرد عندي زيرو ربنا يحميني
لقيته بعت ماسدج استغربتها :
-جميله في الحجاب وزي القمر اومال بشعرك عامله ازاي ؟
شوفت الماسدج وحسيت اني اتضايقت اصل هو عمره ما بعتلي ماسدج زي دي
حاولت اغير الموضوع وبعتله ماسدج ملهاش علاقه باللي باعتها
-بتعمل ايه ؟
-ولا حاجه وانتي
-عندي شغل عايزه اخلصه
-بقولك ايه
-قول
-ما تبعتيلي صوره بشعرك
الماسدج صدمتني وبرقت وانا بقرأها اكتر من مره وبعدها رديت بعلامه استفهام
-نعم؟؟؟؟
عملي عليها ريبلاي وهو بيبعت ايموشن اللي بيبص لفوق
-اكيد بتهزر صح
-لا اهزر ليه انا فعلا عايز اشوفك بشعرك
رديت بعصبيه:
-انت اتجننت ازاي تقولي حاجه زي كده
-انا قولت ايه بس عادي يعني هو انا هعمل ايه بصورك !
-لا انت الظاهر انك فاهمني غلط انا مش زي البنات اللي كنت تعرفها يا استاذ مراد لما تقول لواحده ابعتي صورك تبعتها وتبعتلك بكات وشورت وكأنك جوزها وتخرج معاك كل يومين تلاته وتمشي معاك في الشارع وميهمهاش حد من أهلها ،انا مش كده يا مراد بيه انا غيرهم انا اتربيت
مش عشان وافقت اتكلم معاك واقابلك مره تتجرأ وتقولي كده
رد بلا مبالاه:
-انتي مكبره الموضوع اوي كده ليه
-ولا مكبره ولا مصغره يامراد سلام
-هو اي اللي سلام استني
-افندم
-خلاص يا سيليا انا اسف
-ماشي انا هقفل عشان عندي شغل
-طب خلاص بجد انا مكنتش اقصد حقك عليا
-خلاص يا مراد حصل خير بعد اذنك هقفل عشان عندي شغل كتير
-طيب خلصي وكلميني
-ان شاء الله
قفلت معاه وانا عيوني بتلمع بالدموع …
حطيت ايدي علي قلبي وفضلت أعيط بصوت مكتوم وانا بفتكر ازاي اتعرفت علي مراد
فلاش باك
كنت قاعده علي السوشيال كالعاده بتنقل من ابليكيشن للتاني بملل وفجأه جالي اشعار أن في حد اسمه مراد بعتلي أدد
فتحت الاكونت بتاعه كان حاطط صوره بروفايل وهو واقف قدام الكافيه المفضل عندي اللي مش بقعد غير فيه
معرفش ليه اتشديت؟؟
دخلت على الصور واتنقلت من صوره للتانيه للتالته انجذبت لملامحه
في الحقيقه كان وسيم اوي
عيون خضراء ،شعر اصفر ،لحيه صفراء ،بشرته ابيض مني شخصياً !
جسمه رياضي ،واللي زاد جماله الغمازات اللي علي خدوده
كان أشبه بالاجانب اللي بشوفهم في التلفزيون
سكتت لحظه وانا بسأل نفسي
ازاي ربنا حط الجمال ده كله في شخص ؟؟
فعلا كان جميل بشكل يخطف القلب والعقل
لقيت ايدي بتروح نحيه قبول الصداقه
علقت صباعي في الهواء لمده ثواني وانا متردده لكن في النهايه قبلت الطلب
بالرغم اني عمري ما قبلت ولد ولا حتي اتكلمت مع ولد ولا كنت بفكر اني اتعرف علي شخص من خلال السوشيال
دقائق ودخل بعتلي صوره
بلعت ريقي وانا بفتحها ،خايفه تكون صوره مش كويسه
اول ما حملت برقت بصدمه وحطيت ايدي علي بوقي لما لقيتها صورتي وانا قاعده في الكافيه بقرأ روايه ومندمجه
بعتلي ماسدج تحتها :
-انا عارف اني غلطت لما صورتك من غير اذنك لكن ضحكتك كانت رقيقه وجميله في الحقيقه خطفت قلبي
تلقائياً لقيتني ببتسم ووشي بقي احمر زي الفراوله
رديت بفضول :
-وعرفت الاكونت بتاعي منين !
-سألت واللى يسأل ميتهوش
-وياتري سألت مين
-امممم عايزه الصراحه
-ياريت
-طيب ياستي بصراحه كده يعني انا اخو داليا صاحبتك
-بتهزر
-والله ولما قالتلي انك زي القمر مكنتش مصدق لحد ما شوفتك واتأكدت انك احلي من القمر
ضحكت ووشي سخن وانا برد باحراج :
-تسلم
-بالمناسبه انا اسمي مراد وبشتغل مهندس ديكور وعندي ٢٦ سنه ،وعندي شقه علي النيل ،وحلو وبسمسم
ابتسمت على كلامه وانا برد :
-ربنا يوفقك
الكلام جاب بعضه وبدأ يسألني عن نفسي وانا أسأله لحد ما فات ساعه !
-ياخبرر احنا بقالنا ساعه بنتكلم ؟
-تصدقي محستش بالوقت
-ولا أنا
-طب ما تجيبي رقمك نتكلم واتس احسن
بعتله رقمي وبدأنا نتكلم ونتعرف اكتر علي بعض ومن اليوم ده واحنا بنتكلم ومحدش يعرف من أهلي في الحقيقه
اصل انا اهلي ناس شديده اوي وبيخافوا عليا وخاصه اني البنت الوحيده علي ولدين
حاولت اكتر من مره اتناقش معاهم في حوار أن البنات اللي مرتبطين مش وحشين وانهم لازم يرتبطوا قبل الخطوبه عشان متتحسبش علي البنت خطوبه والسلام وأنه مش عيب ولا حرام
حاولت اقنعهم بكل الطرق لكن للاسف محدش فيهم كان متفق معايا ،كل واحد فيهم بيتفلسف ويقول كلمتين حمضانين ويعملي فيها شيخ
عشان كده مبقتش بتناقش معاهم تاني ولا حتي بقعد معاهم
ـــــــــــــــــــــــــــــــــــــــــــــــــــــــــــــــــــــــــــــــــــــــــ
-سيليا انا اسف متزعليش مني
شوفت الماسدج لما فتحت بعد ما خلصت شغلي
اتنهدت تنهيده طويله وانا بدعك عيني بتعب
-خلاص يامراد مش زعلانه حصل خير
-بجد
-والله
-طيب عملتي اي خلصتي شغلك؟
-اه وانت فينك كده
-علي القهوه مع صحابي
-طيب
فضلنا نتكلم شويه لحد ما النوم غلبني ونمت وانا بكلمه والفون مفتوح علي الشات
تاني يوم صحيت علي صوت المنبه لبست ونزلت شغلي وانا متشيكه
الفون بتاعي اتهز برقه رديت عليه باستغراب
-الو
-صباح الخير
-صباح النور في حاجه ولا ايه
-لا ليه؟
-لا اصل يعني انت اول مره تكلمني فون احنا كلامنا كله شات عشان كده استغربت !
-قولت اسمع صوتك القمر علي الصبح
ابتسمت بخجل :
-امممم طيب يالا عشان انا وصلت
-هتوحشيني
-احم يالا باي
قفلت معاه وانا بحط ايدي علي قلبي وباخد نفس عميق وببتسم وانا جوايا مشاعر وأحاسيس كتيره جدا مش قادره اوصفها لكنها في النهايه لطيفه
خلصت الشغل واول ما خرجت لقيته واقف وساند ظهره علي عربيته وفي ايده بوكيه ورد
بصيت حوليا بخوف وتوتر وقربت منه :
-مراد
مدلي أيده بالبوكيه وهو بيمسك ايدي وبيبوسها برقه
-قولت اجي اعتذرلك علي كلامي بتاع امبارح
بلعت ريقي بتوتر وقلبي اتنفض بخوف وانا بلف حوالين نفسي
-مراد مراد امشي دلوقتي الله يخليك
-ليه؟
كنت علي وشك اني اعيط
-ارجوك يامراد ابن عمي معايا في الشغل وزمانه خارج ولو شافني هيطين عيشتي
رد ببرود :
-احنا مش بنعمل حاجه غلط وبعدين انتي مش صغيره
-يامراد ارجوك عشان خاطري متعمليش مشاكل
-طيب ماشي همشي بس بشرط
-ايه هو
-اوصلك البيت
لطمت علي خدي وانا برد بنبره أوشكت علي العياط:
-امشي يامراد امشي عشان خاطري
رفع حاجبه ورد بلا مبالاه:
-مش همشي غير لما تيجي تركبي معايا
وقفت لحظه افكر بحيره وانا ببص ورايا بخوف
هزيت راسي وانا بقرب من الباب:
-يلا
كنت لسه هركب بس وقفت مكاني بصدمه لما سمعت صوت ابن عمي بينادي عليا بنبره كلها غضب
-سيليا
يتبع….
لقراءة الفصل التالي : اضغط هنا
لقراءة الرواية كاملة اضغط على : (رواية رجل الأحلام)
