رواية البر التاني الفصل الثاني والسبعون 72 بقلم لولو محمد

رواية البر التاني الجزء الثاني والسبعون

رواية البر التاني البارت الثاني والسبعون

رواية البر التاني الحلقة الثانية والسبعون

عباده/ الخساره قدامك مكسب يا سيد الناس تتكتب فى السى فى بتاعى
شاهين / السي فى حته واحده
ام مغاورى / جرا ايه يا حج هى الوقفه عجبتك و لا ايه … بقولكوا ايه احنا ندخل على الاكل و هو سخن و بعدين نبقي نقعد بقي نتكلم براحتنا و نسيبهم يشوفوا حوار الطاوله بتاعهم ده
خديجه / بس انا بحزرك يابا مغاورى بيتمرنلك من يوميها
شاهين/ يا بت ابوكى حريف طاوله من قبل ما جوزك يتولد
عباده / طب اى حاجه قدام مراتى طيب .. طب عشان خاطر شاكر الصغير اللى جاى فى السكه
شاهين / تخسر بشرفك احسن من انك تكسب تفويته و لا ايه يا جوز بنتى
عباده / هو صح بس انت اللى مش هاين عليك تخليني اكسب نوبه على العموم انا جاهز وان شاء الله اكسب النهرده
الجماعه يدخلوا السفره ماجده و كذا ست بيرتبوا السفره يسلموا سماح مغاورى يدخلوا
مريم / سماح
سماح / وحشتيني اوى اوى ما كنتش متخيله ان البعد عنك هيبقي صعب كدا
عباده / و انا ما كنتش اعرف ان الجواز بيحلى كدا
عباده يحضن سماح ويبوس راسها فاطمه تاخدها من حضنه
فاطمه / انا بنتى حلوه من يومها يا خويا و لا ايه يا عريس
مغاورى / امال ايه يا ست الكل هى يعني جيباه منين
مغاورى يحضن فاطمه و تطبطب عليه
شاهين / اتفضلوا اتفضلوا
انتصار / مش هنستنى باقي الجماعه
شاهين / ما تاخذيهمش يا ام فاتن بس انتى عارفه الارض و العمال هنعمل ايه
انتصار / ربنا يقويكوا يا حج طب ام عباس فين
ماجده و ام مغاورى يتكلموا فى وقت واحد
ماجده / نايمه
ام مغاورى / تعبانه
ماجده و مامتها يبصوا لبعض
ام مغاورى / خدت المضاد الحيوى و نيمها
انتصار / لا سلامتها الف سلامه
فاطمه/ ما قولتيش ليه يا سماح انها تعبانه كنا جينا نطل عليها
ام مغاورى / مهى ما كانتش تعرف … النهرده صحيت تعبانه شويه و قالت تلحق روحها قبل ما الدور يزيد عليها
انتصار / ان شاء الله ناكل و نطلع نبص عليها تكون فاقت
مغاورى يقوم و يغرف
مغاورى / انا خليت الراجل يحضرلنا الاكله دى وصايه و الراجل قالى هيعملى غديوه حكايه دوقوا بقي و قولولى الراجل وفى بكلامه و لا ضحك عليا والله ارجعله
عباده / يا عم الجواب بيبان من عنوانه يدوم العز
فاطمه تبص لسماح و يبتسموا لبعض
فاطمه / اكلى جوزك يا سماح
سماح / ما انتى عارفه انى ما بعرفش افصص لوحدى
فاطمه / هههههههههههه و هو انا هفصصلك طول عمرك
مغاورى / و ماله يا ست الكل افصصلها انا
عباده / و لما تفصصلها انت تاكل انت امتى
مغاورى / ما انا هفصصلها فى طبقها و هى تاكلنى اللى فصصتهولها بايديها شوفت التريب بقي
الكل يضحك
عباده / مش سهل انت يا مغاورى … فصصيلى و اكلك فى بقى … انا ما بحبش اقلد حد
خديجه / عنيا
خديجه تفصص و تحطله و مغاورى يفصص و يحط لسماح فاطمه تفصص و تحط لمغاورى و الكل بياكل و هو بيضحك
عباده / ليكي ابن تانى هنا ياما
ام مغاورى / يا قلبي افصصلك انا
عباده / تسلم ايدك يا ست الكل انا بعرف افصص لروحى بس قولت انكوشهم يعني
الكل ياكل فى سعاده
………………….
فى عربيه مختار
مختار يركن فجاه
ناصر / وقفت ليه
مختار / عشان مش هينفع نروح بعد ما عرفنا مصيبه زى دى من غير مانعمل حاجه
ناصر / هتعمل ايه يا مختار هتمنع عن الناس العلاج
مختار / فى بديل يا كبير هو اللى خلقه ما خلقش غيره و الحمد لله انها جت فى مسكن مش حاجه كبيره ناقص فى السوق و بيحصل
ناصر / احنا قايلين للناس ما يخدوش بدائل من غير اذن دكتور
مختار / و هو الدوا ده محتاج اذن دكتور دا اى حد محتاج مسكن بياخده دا الحوامل بياخدوه يا كبير
ناصر / عشان كدا بقولك لازم نروح و نفكر و نشوف هنتصرف ازاى ما حدش عارف فى كام علبه اتباعت و وصلت لكام بيت
مختار / نقول فى ميكروفون المسجد نلم اهل البلد و نتكلم معاهم نلم الصيادله و نضف الصيدليات نلم الدكاتره نلم البلد كلها بس ما يطلعش علينا نهار الا و البلد نضيفه يا كبير
ناصر / يبقي نروح البيت و نهدى و نفكر و نشوف كل واحد هيعمل ايه
مختار / بيتنا و لا بيت الجوارحه
ناصر / اطلع على بيت الحج شاهين اهو بالمره نسلم على البت سماح و نطمن عليها
مختار يهز راسه و يسوق
……………….
فى اوضه سماح
سماح / لا دا مغاورى هيغيرلى التلاجه الصغيره دى و يجبلى واحده كبيره ام بابين دى بالفريزر بتاعها
مريم / و دى هتحطيها فين هتضيق عليكوا الاوضه
سماح / الليفينج اصلا ما لهاش عازه احنا بناكل و بنقضي الوقت كله جوه بنقعد هنا بسيط و بعدين ما الدنيا واسعه اهى
فاطمه / يعيش و يجبلك
سماح / النهرده كان عاملى مفاجاه و جابلى العقد ده هديه
انتصار / زوقه حلو تسلم مجايبه
فاطمه / عامله ايه فى مزاكرتك و دروسك
سماح / باخدها هنا مكان ما انتوا قاعدين كدا و الشهاده لله مغاورى ما بيخلينيش اعمل اى حاجه و لما بيجي و انا بزاكر ما بيرضاش اقفل الكتب و ابطل مزاكره انا اللى بقوله كفايا
فاطمه / اه بس ما تجيش عليه برضه و تهمليه
سماح / طب والله ابدا حتى اساليه دا انا شيلاه جوه حباب عنيا
انتصار / ربنا يهنيكوا و يعوض عليكوا
سماح / امين يا عمتى امين … عامله ايه مع عبد الله يا مريم
مريم / بنزاكر طول الوقت و مقضينها رنات اخر الليل
انتصار/ بكره الاجازه تيجي و يفضالك
مريم / ما انا ما ليش اجازه يا ست الكل
فاطمه / وقتها هتفضيله نفسك ياختى … قال علينا احنا الكلام ده
سماح / ههههههههههههههههه اعملكوا شاى و لا اجبلكوا ساقع
انتصار / ما تشوفيلنا عمتك كدا يا خديجه صحيت و لا لا نروح نطمن عليها
خديجه / حاضر
سماح / خليكي مرتاحه هو انتى جايه نشغلك هروح انا اشوفها خليكوا مرتاحين البيت بيتكوا قومى يا بت يا مريم اعملى اى حاجه كل حاجه فى التقفيل عن اذنكوا ثوانى
سماح تطلع بره
مريم / انا هعمل شاى
انتصار / ياريت والله بس تقليه لحسن السمك بدا يشتغل و شكلى هدخل اريح جوه على ما تخلصوا
الكل يضحك
…………………….
فى المضيفه عند الجوارحه
شاهين / انا مع مختار احنا نمشي فى كل السكك ان شالله ندخل بيوت البلد بيت بيت نفتشها
مغاورى / الناس هتخاف يا كبير و مش هيسكتوا
ناصر / هيخافوا لو قولنا ان ده البى كاى انما لو شوفنا حجه تانيه مش هيخافوا
عباده / منتهى الصلاحيه بس دا التاريخ مكتوب على العلبه
مختار / ممكن نقول الشركه بتجمعه عشان فى مشكله فى الماده الفعاله او وقع عليه ماده بالغلط اى حاجه
مغاورى / الصيادله مش هيصدقوا احنا نقول الحقيقه و اللى يحصل يحصل
عباده / احنا نلم الدكاتره و الصيادله و نتكلم معاهم و هم اللى هيحلواها دا شغلهم
مختار/ صح … بس هنلم اللى فى البيوت ازاى
عباده / نخلى الدكاتره يتكلموا الاول و ناخدهم و نطلع نلف على البيوت بس لازم الدكاتره هم اللى يتكلموا عشان ما نقولش كلام و هم كلام
ناصر / ابعت حد يناديهم و لم الرجاله كل مجموعه تلف مع دكتور النهرده ما لقيش حبايه فى البلد لا اصلى و لا مضروب لحد ما نشوف هنعمل ايه
مختار/ بعد اذنك يا كبير
الكل يبص لمختار
مختار / الدكاتره تشيل بدايل معاهم الحبايه اللى ناخدها ندى للعيان بدالها و كل واحد حسب حالته
شاهين / عداك العيب و كدا يبقي ما جيناش على حد
ناصر / على بركه الله يا رجاله انا هروح الحريم يا عباده
عباده يهز راسه و يمشي مع مختار شاهين يبص لمغاورى
مغاورى/ انا كمان … اه حاضر
مغاورى يقوم يجرى وراهم و ناصر و شاهين بيضحكوا
شاهين / ما تيجي اللاعبك طاوله
ناصر / و ماله هات
ناصر و شاهين يفتحوا الطاوله و يلعبوا
……………………..
فى اوضه سماح
انتصار / معقول لسه نايمه لحد دلوقت
فاطمه/ يبقوا يوصلولها اننا سالنا علينا وانا هبقي اكلمها فى التليفون
انتصار / على رايك يلا بينا
سماح / انتوا رايحين فين طب استنوا حتى اما مغاورى يرجع مش قولتلكوا طلع مع الرجاله
فاطمه / نسيبك تزاكرى حبه قبل ما يرجع عشان ما نبقاش عطلناكى
سماح / طب والله كنتوا واحشيني
مريم / ابقى هاتى مغاورى و تعالى قضى انتى بقي معانا يوم
سماح/ هقوله والله
فاطمه تحضن سماح و تبوسها و تروح تفتح الباب لحد ما سماح تخلص سلام و ينزلوا على السلم فاطمه تمسك ايد انتصار
فاطمه / كوثر مش عيانه هى مش عاوزه تقابلنا او هم مش عاوزينها تقابلنا
انتصار / ما لناش دعوه هم ادرى باهل بيتهم احنا نعمل اللى علينا وخلاص
فاطمه / على رايك انا اساسا مش طيقاها
انتصار تبصلها و تضحك و تسبقها فاطمه تجرى وراها
…………………..
فى اوضه عباده
عباده بيقلب فى درج الادويه
خديجه / طب فهمنى بتدور على ايه
عباده يطلع علبه الدوا و يدخل الحمام و يفضيها فى القاعده
خديجه / طب فهمنى طيب بتعمل كدا ليه
عباده / عشان فى احتمال يكون مضروب يا خديجه بنت الكلب ما سابتش حاجه ما حشتهاش .. بقولك يا خديجه عاوزك تقلبي فى البيت اكيد فى منها كتير قوليلهم هتفرزى الادويه عشان تاريخ الصلاحيه و ارميهم
خديجه / ما تقول الحقيقه و خلاص
عباده / مش عاوزهم يخافوا مش عاوزهم يحسوا انه دخل لحد اوضنا كمان
خديجه / و ان حاولوا يشتروا جديد
عباده / جرا ايه يا دكتوره هو اللى خلقه ما خلقش غيره و لا ايه
خديجه / هحاول بس لو اتزنقت هقول الحقيقه انت عارف انى فى الكدب خيبه
عباده / سبيها لله … انتى عارفه اللى قاهرنى ايه
خديجه / ايه ؟
عباده / انى لسه واخد منه امبارح
خديجه تقرصه يبصلها باستغراب
خديجه / اطمن انت فى السليم
عباده / لا و الله مش واخد بالى انا ان كنت بحس و لا ما بحسش
خديجه / لو مش مسامح انا قصادك … خد حقك
عباده يشدها فى حضنه
عباده / هاخده
خديجه / بالراحه على الواد الله
عباده / كلو الا الواد و ام الواد
عباده يشيلها و هى بتضحك
………………..
فى فيلا فيرا
فيرا بتلعب بلايستايشن مع ادواردو رشيد يدخل فيرا تبصله و تكمل لعب
فيرا / كنت عارفه انك هترجع
رشيد / و يا ترى عارفه انا رجعت ليه
فيرا / تعددت الاسباب و الموت واحد مش بتقولوها كدا
رشيد / سمر قالتلى على كل حاجه
فيرا تسيب اللعب و تقوم تقف قدامه
فيرا / كدا يبقي اللعبه خلصت
رشيد / ذكيه و بتعرفى امتى تنسحبى قبل ما تخسرى
فيرا / انا مش بزعل لما بخسر اصل ما حدش بيكسب كل حاجه
رشيد / بس فى ناس بتخسر كل حاجه
فيرا / كفايا كلام ما لوش لزمه و ندخل فى الجد طلباتك
رشيد / الولد
فيرا تروح للمكتب و تشد ورقه و تكتب عنوان و تديها لرشيد
فيرا / انا اللعب معايا ما بينتهيش يا رشيد و دى لعبه هتعجبك المكان ده مليان اولاد ممكن يكون اللى بتدور عليه هناك و ممكن ما يكونش
رشيد / مصره برده تخسرى كل حاجه
فيرا/ قواعد اللعبه تدخل و تخرج من غير ما حد يحس بيك لان اللى هناك عندهم تعليمات لو حصلت اى حاجه المكان يتحرق باللى فيه يعني اقل غلطه هتضيع حياه كل الاطفال اللى هناك
رشيد / انتى بتتكلمى جد
فيرا / الخبر الكويس ان الاطفال اللى هناك كلهم كدا كدا هيموتوا لانهم فى مركز اعضاء بشريه فكل ساعه بتتاخرها فى طفل بيموت
رشيد يبص فى الورقه و يبص لفيرا
فيرا / اوعى تثق فيا يا رشيد دا ممكن يكون فخ عشان اخلص منك
رشيد / تؤ انتى مش محتاجه فخ عشان تخلصى منى لو كان ليكي شوق فى موتى ما كنتش هكلفك كتير
فيرا / ههههههههههههههههههه بحبك
رشيد / قولى كلام غير ده يمكن اصدق
رشيد يبص للورقه و يمشي فيرا ترجع و تكمل لعب
فيرا / ذا جايم ايز اون ( اللعبه ابتدت )
………………….
فى اوضه سماح
سماح لابسه عبايه ضيقه اوى و مسيبه شعرها و عامله مكياج و مشغله اغانى و بترقص شرقى و معليه الصوت على الاخر و فى ترابيزه عليها عشا و شمع مطفى مغاوري يدخل
مغاورى / وطى الصوت شويه يا
سماح تروح و ترقص قدامه يبتسم
مغاورى / وطى الصوت الدنيا ليل
سماح / و هو الرقص يحلى الا باليل
سماح تلف و تبعد و تكمل رقص و تمسك الولاعه و تقيد الشمع مغاورى يحضنها من ورا
مغاورى / كنت فاكرك بتزاكرى
سماح تلف و تتعلق فى رقبته
سماح / زهقت قولت اقوم افك عن نفسي و اديك جيت تفك معايا و لا انت ما لكش فى الفك
مغاورى / لا لو الفك بالشكل ده يبقي ليا و نص
سماح تروح تعلى الاغانى و ترقص و هو يسقفلها و يرقص معاها الباب يرزع سماح تروح تقفل الاغانى
سماح / يادى قله المزاج
مغاورى / خليكي هنا ما تطلعيش كدا
سماح تبص الناحيه التانيه بخنقه مغاورى يروح الليفنج و يقفل باب اوضه النوم الباب يرزع تانى
مغاورى / حاضر جاى
مغاورى يفتح الباب يلاقي كوثر
كوثر / هو ده اللى هطلع اخليها توطى هو ده اللى ربنا قدرك عليك يا سبع البرمبه طلعت و عليتها بدل ما توطيها
مغاورى/ طفيناها خالص و هنام يا عمتى
كوثر / نوم العواف يا حبيبي
كوثر تيجي تمشي سماح تفتح الباب و تركن على جنب و تربع ايديها
كوثر / ايه ياختى شغل الغوازى ده
سماح / و لا كانك قولتى حاجه و لا انتى قولتى؟
كوثر تمشي مغاورى يقفل الباب و يروح لسماح
مغاورى / مش قولتلك ما تطلعيش كدا
سماح تتعلق فى رقبته
سماح / وحشتني و بعدين هو انا عريانه و لا طلعت قدام رجاله غيرك دى عمتك
مغاورى/ سماح
سماح / عيون سماح على فكره مليتلك السخان و جيبالك الملح الملون اللى عجبك
مغاورى / بس بلاها الليفه اياها دى
سماح / بلاها ايديا تنفع
مغاورى يبتسم سماح تسبقه على الحمام و هو بيجرى وراها يقفل الباب و هم بيضحكوا
……………………
فى منطقه شعبيه
رشيد واقف على سطح بيت لابس جلوفز جلد بيراقب مخزن كبير قاعد قدامه مجموعه بلطجيه بيحششوا و بيضحكوا يقعد على ركبته فى الارض و يفتح شنطه فيها خزنتين رصاص ياخدهما و يحطهم فى جيوبه و يطلع مسدسه من بنطلونه و يركب كاتم صوت و قدامه فى الشنطه و قنبله غاز و رزم دولارات ياخدها و يفك الاستك و يحدفها من فوق الرجاله تشوف الفلوس تقوم تلمها بسرعه و يبصوا فيها مش مصدقين فجاه يقعوا فى الارض واحد ورا التانى يكون رشيد وصل لبوابه العماره و القنبله فى ايد و المسدس فى الايد التانيه يفتح بوابه المخزن بالراحه و يحدف قنبله الغاز جوه و يداري و هو بيعد ثوانى و يظهر حواليه رجاله من كل حته يضرب نار و يشوف مكان يدارى وراه و يفضل فى تبادل اطلاق النار و فجاه يدخل اربع رجاله ينضفوا المكان رشيد يقف و يسلم عليهم و يفتحوا باب المخزن فيه خمس اطفال و تلت حراس كلهم نايمين
رشيد / انا عاوز اى حد عايش
الرجاله تهز راسها و تتحرك تليفون رشيد يرن فى جيبه يطلعه يلاقى فيرا يرد
فيرا / ما فكرتش ليه ان المكان يكون ملغم مثلا
رشيد / عشان اللعبه ما خلصتش بالبساطه دى
فيرا / جاهز يعني لليفل اللى بعده
رشيد / اربع عيال برده
فيرا / ما تبقاش طماع
رشيد / لا انا مش طماع انا بس خلقى ضيق و لو زهقت هقول ابو الولد على ابو امه و ساعتها هرجعلك
فيرا / ما انت كدا كدا هترجعلى هو انت ليك بركه غيرى هههههههههههههههههه
رشيد يقفل السكه و يبص على كاميره المراقبة يضربها بالنار و يمشي
………………….
فى اوضه سماح
مغاورى واخد سماح فى حضنه و هى نايمه مغاورى يبعد شعرها عن وشها نايمه
مغاورى/ سماح … سمسمه .. ما تصحي يا بت
سماح / لسه بدرى على الفجر
مغاورى/ عاوز اتكلم معاكى فى حاجه
سماح / و انت ما شبعتش كلام
مغاورى/ هههههههههههههههه لا يا بت كلام من التانى كلام من اللى بجد
سماح تفتح عنيها و تبصله
مغاورى / مع ان الكلام اياه بيجي على هوايا قوى بس الموضوع مهم و كل ما اجى اكلمك فيه تاخديني فى دوكه و تبلفيني
سماح تقوم تقعد
سماح/ دا شكله حاجه كبيره اوى
مغاورى / انا عاوزك تراضي ماجده
سماح / يا لهوى هى زعلانه منى ؟ والله ما
مغاورى / هى ما اتكلمتش بس انا عارف ان كلامك عن عباس وجعها دا برده جوزها ابو عيالها و مهما حصل بينهم كانت بتحبه
سماح / و الله معاك حق ازاى فاتتني دى لا بكره باذن الله هروحلها
مغاورى / انا هبعتهالك هقولها انك عوزاها ضرورى
سماح / و دا يصح اناديها اوضتى عشان اعتزرلها
مغاورى / ما انتى هتراضيها عن الحكايه دى كمان هتقوليلها انك اضطريتي عشان عمتى و عشان ما تكبريش الحكايه
سماح / حاضر يا خويا عيني دا حتى ماجده طيبه و بنت حلال و قلبها ابيض و عمرى ما اقدر على زعلها ابدا
مغاورى / ماجده غلبانه مش هتعاتبك اصلا بس انا عارف ان الكلمه وجعتها
سماح / لا والله اراضيها و ابوس راسها كمان انا مش عارفه عقلى كان فين … طب تصدق ماجده معاها حق
مغاورى / فى ايه
سماح / قالتلى لما هتردي هتقلبي الكفه و بدل ما الحق يبقي معاكى هيبقي عليكي و اهو حصل و مش بس ضيعت حقى ركبت روحى الغلط
مغاورى / كلنا بنغلط المهم نتعلم
سماح / معاك حق
سماح و مغاورى يبصوا لبعض
سماح / فى حاجه تانيه كمان مش كدا
مغاورى / فى
سماح / خير قول
مغاورى يقوم يطلع المحفظه من جلبيته و يطلع عقد و يديهولها
سماح / ايه ده ؟ عقد ايه ده؟
سماح تقعد على ركبها بحماس
سماح / دى ارض !!! دى باسمي !!! يلاهوى بكام
مغاورى / هبنيلك عليها سرايتك الجديده
سماح تغطى بقها
مغاورى / هعملك بيت لوحدك
سماح / انت بتتكلم جد يا مغاورى … انا مش مصدقه روحى
مغاورى / الموضوع ده هياخد وقت و الوقت ده هنفضل فيه هنا
سماح تقعد بخيبه امل
مغاورى / انا عارف ان هيحصل مشاكل كتير بينك و بين عمتى الفتره دى بس انتى اتعلمتى الدرس و هتعرفى تتصرفى مش كدا
سماح / هة بتفضل تضغط عليا و
مغاورى / فتره و هتعدى و هنبعد عن كل ده سرايتك هتبقى اكبر من السرايا دى و اكبر من سرايا الزنايته نفسهم
سماح / بس دى كلفتك كتير اوى يا مغاورى
مغاورى / مفيش حاجه تغلا عليكي و بصراحه كدا انا ما دفعتش تمنها لوحدى ابويا ساعدني هو اللى قالى اخد الارض دى و ابنى عليها نصها هديه منه و نصها هديه منى
سماح / طب دا انا كدا المفروض اتشكرله بقي
مغاورى / تشكريه بانك تستحملى اخته الفتره دى ابويا تعبان يا سماح و كل يوم تعبه بيزيد و مشاكلك مع عمتى بتتعبه اكتر لانه بيحبك و بيحبها
سماح / و انا والله بحبه و ما بحبش المشاكل بس انت شايف
مغاورى / يعني ما تجيش على روحك شويه عشان خاطرنا انا عارف انك لا ناقصك لا دهب و لا ارض بس ما عندناش اغلى من الارض نقدمهالك
سماح / والله يا مغاورى و من غير ارض و لا سرايا كفايا تقولى عشان خاطرى انت ما تعرفش خاطرك غالى عندى قد ايه
مغاورى يشد العقد من ايدها
مغاورى / طب عشان خاطرى يا سماح
سماح / عيونى يا سيد الناس
مغاورى يبتسم و يرجعلها العقد سماح تحضنه
مغاورى / الفجر قرب ياذن هقوم اتشطف و اقعد اقرا الورد بتاعى
سماح تبتسم مغاورى يقوم و سماح تقرا العقد و هى مش مصدقه نفسها
…………………..
فى اوضه فاطمه
فاطمه فى الحمام باب الاوضه يخبط فاطمه ترد من جوه
فاطمه / مين
خديجه تفتح الباب و تدخل
خديجه / انا يا امى الاقيش عندك حاجه للصداع
فاطمه تطلع من الحمام
فاطمه / سلامتك يا دودو فيكي ايه يا ضنايا
خديجه / شويه صداع الاقيش عندك مسكن و لا اى حاجه
فاطمه / درج الدوا بتاع عمك الله يرحمه هتلاقيه مردوم مسكنات الله يرحمه كان تعبان فى اخر ايامه
خديجه / الله يرحمه
خديجه تروح تقعد على السرير و تفتح الدرج و فاطمه تروح تفتح الدولاب و تطلع عبايه
فاطمه / صحيتي عباده للصلاه
خديجه / و انتى هتوهى عن عباده ياما دا كلو الا صلاه الفجر
فاطمه/ لقيتي يا ضنايا و لا ابعتلك حد بسرعه يستقضاهالك
خديجه / و هى الصيدليات فتحت لسه دا الفجر هياذن اهو
فاطمه / هيصلوا الفجر و يفتحوا مش هيطولوا يعني
خديجه تطلع علبه الدوا و تفتح شريط و تبص على تاريخ الصلاحيه
خديجه / لا اله الا الله دى صلاحيتها منتهيه
فاطمه تروح تاخد منها العلبه
فاطمه / لو كنتى بتبصى فى اى درج تانى اقول ماشي انما الدرج ده لا يمكن دا انا اللى فرشاه بايدي و برتبه اول باو … اهو يا بت انتى مش شايفه و لا ايه لسه بدرى
خديجه ترتبك
خديجه / هههههه تصدقى صح الواحد شكله لسه ما فاقش … هتحتاجيها العلبه هخلى عباده يجبلك بدالها
خديجه تاخد العلبه
فاطمه / يخربيت طمعك يا بت طب قولى اخد شريط و اسبلك شريط … على العموم ما تغلاش عليكي بس اديني حبايه لحسن دماغى صاحيه بتون
فاطمه تمد ايدها لخديجه
خديجه / لا دا مش حلو للصداع بتاعك هجبلك دوا تانى احسن
فاطمه / هو ايه اللى مش حلو للصداع امال انتى عوزاه ليه و بعدين دا احسن دوا للصداع هو فى ايه يا خديجه
خديجه / مفيش يا ست الكل هو بس .. اصل … هو
فاطمه/ فى ايه يا خديجه ما تجنينيش
خديجه / الصراحه فى ادويه نزلت السوق مضروبه و دا واحد منهم
فاطمه / مش فاهمه … اااااه الله يخرب بيوتهم قصدك قللوا الماده الفعاله… لا مش ده اصل ده مجربينه دا كان دوا عمك الحج دا ما كانش بيرتاح الا عليه
خديجه / لا يا امى ما قللوش الماده الفعاله … هم غيروها
فاطمه / انا مش فاهمه حاجه ما تتكلمى عدل يا خديجه مش قدرالك فى ايه و مالك كدا وشك اصفر و مش على بعضك شيفانى شيلالك الكرباج و لا بطفى اعقاب السجاير تحت بطاطك
خديجه / هههههههههههههه و الله عسل
فاطمه / ما تتكلمى يا بت ما تضيقيش خلقى الله بدلوا الماده الفعاله ازاى يا بت
خديجه / هو مش اكيد كل الادويه كدا بس زياده امان هيلموها كلها
فاطمه / اللهم طولك ياروح
خديجه / فى ادويه مضروبه نزلت السوق ما تتخيرش عن دى بس فيها اللى ما يتسمي
فاطمه تبص لخديجه
فاطمه / المدعوق البى كاى ؟
خديجه / اه
فاطمه / لا عمك كان بيحس بدبه النمله
خديجه / مهم قللوا التركيز فمالغاش الاحساس اوى يعني هو مسكن و بيسبب الادمان بس
فاطمه / انتى متاكده من الكلام ده يا بت
خديجه / عباده قالى اللمه من البيت و الرجاله طول اليوم كانوا بيلموه من الصيدليات
فاطمه تقع فى الارض خديجه تجرى عليها
فاطمه / انتى متاكده من الكلام ده يا خديجه
خديجه / يالهوتى السوده يا اما قومى معايا قومى لا اله الا الله … يا عباده يا ناس
فاطمه الدموع تنزل من عنيها
فاطمه / دا انا كنت بديهوله بايدي … دا انا كنت بتخانق معاه لو فوت حبايه … كنت بسمه بايدي
خديجه / يا عباده … يا ناس … يا اى حد
فاطمه تنهار
فاطمه / كنت بسمه بايدى … كنت بديله السم بايدي كنت بديله السم بايدي كانت تنقطع ايدي اياكش كانت تنقطع ايدي
فاطمه تخبط ايدها فى الارض و خديجه بتحاول تمنعها عباده و انتصار يدخلوا يجروا عباده يبعد خديجه و يرجع يجرى يحضن امه
فاطمه تصرخ
فاطمه / كنت بديهوله بأيدي يا عباده انا قتلت ابوك يا عباده قتلوا ابوك يا عباده قتلوا ابوك و انا ساعدتهم يا ابنى حسبى الله و نعم الوكيل حسبي الله و نعم الوكيل
فاطمه تحاول تقوم و التعب باين عليها
فاطمه / حسبي الله و نعم الوكيل … ناوليني الطرحه يا خديجه
انتصار/ ما ترتاحى يا فاطمه و اهدى و فهميني فى ايه
فاطمه تاخد الطرحه و تلبسها
فاطمه / هاهدى ان شاء الله هاهدى … هقتلها الاول و بعدين اهدى … والله لاقتلها والله لاخد بتاره و اقتلها
عباده / اهدى يا امى ابوس ايدك احنا والله ما ساكتين
فاطمه / و لا عمركوا هتقدروا عليها شغل النسوان السو ده ما تفهموش فيه انا اللى هجيبها من شعرها و اجيب اجلها باذنك يارب
عباده / ابوس ايدك يا ست الكل ابوس ايدك يا امى عشان خاطرى عشان خاطر سماح و كل حبايبك اهدى و ارتاحى
انتصار / انتى اصلا تعرفيلها طريق
فاطمه / اللى يسال ما يتوهش
انتصار / اصلا مين قالك ان العلبه دى من المضروب الكبير بياخد احتياطه انما ما حدش عارف السليم من المضروب
خديجه / ممكن نبعتها معمل تحاليل و نتاكد و ان شاء الله هتطلع سليمه
فاطمه / برده هنقتلها
عباده / هنقتلها و الله هنقتلها ما ابقاش ابنك عباده ان ما قتلتها بايدي بس انتى اهدى
فاطمه / الليله
انتصار / ما تهدى يا فاطمه هو ايه اللى الليله
فاطمه / تار ابوه يجي الليله يا ام فاتن
عباده / اهدى يا امى نتاكد ان هى اللى قتلته
فاطمه / لو مش هو يبقي غيره ما هى اكيد قتلت حد
انتصار / لا اله الا الله الصبر من عندك يارب
فاطمه / حسوا بيا يا ناس نار و قادت جوايا نار فوق نارى دا انا ما قدرنش اصدق انه مات تقولولى انه مات بايدي … بسببي
انتصار / و لا بايدك و لا ليكي اى دخل فى اللى حصل و هنتاكدلك كمان
هند تدخل تلاقي فاطمه بتعيط
هند / مالك يا بطه فى ايه
فاطمه / مفيش يا هند اتوضيتي
هند / ايوه مالك بتعيطي ليه
فاطمه/ بيقولوا الدوا مضروب و انا كنت بديله منه
هند تبصلهم يبعدوا تروح تقعد جنب فاطمه
هند / انا لسه واخده منه امبارح قبل ما مختار يجي علاطول و ما حصليش حاجه اهو
عباده / و انا كمان اخدت قبل ما اعرف
خديجه / و انا عايشه عليه ما ده بتاع الحوامل
فاطمه تخبط على رجليها و هى بتعيط
فاطمه / و كمان بديله دوا الحوامل
عباده / دوا حوامل ايه يا اما هو انا حامل بقولك واخد منه
فاطمه / الله مش هى اللى بتقول
خديجه / هههههه اقصد مسموح للحوامل تاخده ما بياثرش على الجنين
فاطمه تقوم تجرى و تحط ايدها على بطن خديجه
فاطمه / انتى خدتى منه … الواد … امشي قدامى على المستوصف
خديجه / انا كويسه اهو ما فييش حاجه
فاطمه / امشي قدامى من سكات ما تتعبيش قلبي خليني اطمن على شاكر الصغير امشي
انتصار / روحى معاها يا خديجه ريحيها
فاطمه / و انتى كمان هتيجي معايا
فاطمه تمسك ايد هند
هند / انا مش حامل
فاطمه / بلا حامل بلا هم خدتى منه تيجي معايا اطمن عليكي انا مش هستحمل يجرالك حاجه امشي
عباده / طب وانا
فاطمه / ما انت زى الشحط اهو مالك
عباده / هى بقت كدا ماشي يا ست هند ربنا يديم المحبه
فاطمه / بقولك ايه انت لا ابنى و لا اعرفك لحد ما تيجي تقولى انا خدتلك بتار ابويا و قتلتهالك انت فاهم و لا لا
انتصار / انتى بتقولى ايه يا فاطمه
فاطمه / بقول اللى سمعه ان عرف يحط راسه على المخده و هو عارف مين اللى قتل ابوه انا مش هعرف ان كنت امك ريحنى
انتصار / خديجه … خديها و روحوا المستوصف و ابقوا طمنونا
خديجه تهز راسها
انتصار / و انتى كمان يا هند روحى
هند تهز راسها خديجه و فاطمه وهند يمشوا انتصار تقرب من عباده واقف مسهم
انتصار / كدا كدا كنتوا هتقتلوها النهرده بكره هتموت باوانها اللى ربنا كاتبهولها
مختار يدخل
مختار / بس على ايدينا
عباده / لا … على أيدي انا
مختار / و انا و انت ايه
عباده / الا دى … الا دى يا مختار … الا دى
ناصر يدخل
ناصر / الاول اكشفلنا على الدوا ده شوفه سليم و لا … على الاقل نتحرك بهداوه و نعرف نفكر و نخطط
عباده / مش هتيجي غير بالغباوه
انتصار / و مراتك و امك و ابنك اللى لسه ما شافش النور
عباده يبص لانتصار و يبص للكبير
ناصر / تار ابوك راجع راجع بس انت الكبير من بعدى لازم تعيش لازم تعرف ان الغباوه مش بس فيها موتك فيها موت رجالتك و اهلك و ناسك كمان لازم تعرف ازاى تهدى وقت الصعب و تاخد القرار الصح عشان انت مش كبير نفسك و بس انت كبير الزنايته يا ابن عمى
عباده يبص لناصر و مش مستوعب و انتصار بتبص على مختار عينه على ناصر مختار يبص فى الارض اذان الفجر
ناصر / الصلاه … اتحركوا
مختار و عباده يمشوا ناصر يجي يمشي انتصار تمسك ايده يبصلها
ناصر / بعد الصلاة هتكلم معاه دا ابنى يا ام فاتن .. ابنى
انتصار تهز راسها ناصر يمشي
…………………..
فى كافيه فى اسكندريه
وسام / بس مش دا اللى اتفقنا عليه انا حاسبه كل حاجه بالمليم و الورق قدامك
الشاب / هو انا اللى بحسب دا كومبيوتر هو الكومبيوتر هيغلط
وسام / اه يغلط لما يطلع اقل من اللى انا حسباه و تديني تمن اقل من اللى انا بايعه بيه يبقي بيغلط دا انت حتى ما جبتش جمله الهدوم
الشاب / طب ما يمكن انتى اللى غلط يا وسام
وسام / لا مش غلط انا كنت بسجل كل قطعه بتطلع اول باول و بعمل جرد اسبوعى و منظمه شغلى و بعمله بنفسي دا انا سبت المحل لماما و اتفرغت للموضوع ده
الشاب / اصل اشمعن انتى اللى حسابك غلط مهو ما حدش اشتكى غيرك
وسام / ما يمكن ما حدش حسبها غيرى
الشاب / انا ما اعرفش انا زيي زيك
وسام / بس انت اللى معرفنى عليهم و انت اللى متفق معاهم
الشاب / و انا ما غشتكيش انتى قريتى العقد خمسين مره قبل ما تمضي
وسام / حصل بس اللى بيحصل ده ما لوش دعوه بالعقد اللى بيحصل ده شغل حلق حوش من تحت الترابيزه
الشاب / انا هشوف الموضوع بنفسي مهو لو كلامك صحيح يبقي انا كمان ليا فلوس و انا بصراحه كنت معتمد على الفلوس دى عشان … حوار كدا
وسام / حوار ايه
الشاب/ بصراحه ما بحبش اتكلم فى حاجه الا اما اكون جاهز
وسام / و دى فزوره و لا ايه ؟
الشاب / و لا فزوره و لا حاجه بس انتى عارفه ظروفى انا حطيت كل الفلوس اللى معايا معاكى فى المول و دخول البيوت مش لعبه
وسام / اااااه قول كدا ماشي يا سيدى الف مبروك و مين بقي سعيده الحظ حد اعرفه
الشاب / انتى هتستهبلى ما انتى عارفه كل حاجه
وسام / ههههههههههههههه الواحد ما يعرفش يهزر معاك ابدا
الشاب / انا كنت بتكلم مع ماما و قالتلى على فكره بنت لذينه
وسام / ايه هى
الشاب / قالتلى اكتبلك البارتشن بتاعى فى المول بدل الشبكه
وسام / وليه ما يكونش المحل
الشاب / ما يغلاش عليكي طبعا بس هو مش بتاعى لوحدى زى ما كنتى عارفه و فى خلافات و الشراكه هتتفك و انا كنت بفكر اصلا اخرج منه و اشوف محل تانى صغير على قدى
وسام / ازاى دا المحل فى منطقه تحفه و له اسم هو فى محل مقطع عليا فى اسكندريه كلها الا محلك
الشاب / ههههههههههههههه بس المركب اللى ليها ريسين و دول كتير
وسام / انا ممكن اخد قرض و اتصرفلك فى قرشين و بدل ما تمشي انت نمشيهم هم
الشاب / يا وسام احنا داخلين على جواز و محتاجين كل قرش
وسام / هو احنا هنتجوز بكره و بعدين دى فرصه ما تتعوضش
الشاب / و لو الفلوس ما كفتش
وسام / هصفى محلى بس تكتبلى كل جنيه دفعته
الشاب / انا اصلا كنت ناوى اكتبهولك كله بس ده شبكتك و مهرك ما تجيش بعد كدا تقولى دهب اديكى شايفه الدهب نط ازاى
وسام / و لا حتى دبله و محبس
الشاب / ما يغلوش عليكى
وسام / طب و الشقه
الشاب / ما انتى عارفه ان ليا شقه فى بيت ابويا متشطبه على الفرش
وسام / بس ما شوفتهاش انا حتى ما اتعرفتش على اهلك لحد دلوقت
الشاب / و احنا فيها نحدد معاد و نتقابل و تبقي الحكايه رسمي ايه رايك
وسام / افكر
الشاب / نعم يا اختى
وسام / ههههههههههههههه انت الواحده ما تعرفش تهزر معاك ابدا
الشاب / هزارك رخم
وسام/ اخص عليك
الشاب / بهزر .. هطلب الحساب عشان اروحك
وسام / اوك
الشاب يشاور للمتر
…………………….
فى المستشفي
الدكتوره بتكشف على خديجه بالسونار
الدكتوره / كل حاجه تمام الحمد لله انا مش فاهمه القلق ده سببه ايه
فاطمه / خدت دوا غلط
الدكتوره / دوا ايه ده ؟
فاطمه / قوليلها
خديجه تقوم تقعد و هند تساعدها
خديجه / هو حضرتك ما عرفتيش بالدوا المضروب
الدكتوره / ايوه عرفت بس انا شخصيا مش شايفه اى حاجه على العموم ممكن تخليهم يعملولك صوره دم كامله و شويه تحاليل هكتبلك عليها و نطمن
فاطمه / طب و هند
الدكتوره / ما لها هند
هند / انا كمان اخدت من الدوا
الدكتوره / اعملى نفس التحاليل
فاطمه / هى هند مش ممكن تكون حامل
هند / انا مش حامل
الدكتوره / و ليه لا انتى مش بتاخدى العلاج
هند / باخده
الدكتوره / يبقي الاحتمال موجود طول الوقت
هند / انا بحلل كل يوم الصبح و مفيش حاجه بتطلعلى
فاطمه و خديجه يبصوا لبعض و يبصوا للدكتوره و يبصوا لهند
هند / عشان اخد حريتي فى الحركه طول اليوم بطمن على نفسي اول باول
الدكتوره / بس تحليل اليورين مش دايما بيبقي مظبوط
فاطمه تشد خديجه
فاطمه / ايه اليورين ده
الدكتوره / تحليل الحمل بيتعمل فى الدم او فى البول يا ست ام عباده و ممكن يتعمل حتى فى الدم و برده النتيجه مش دقيقه فى الاول ممكن تكونى حامل و انتى مش عارفه
فاطمه / طب والجهاز بتاعك ده ما يعرفناش و يطمنا دا سى شاكر الله يرحمه كان بيقول ان عندكوا احدث حاجه فى مصر
الدكتوره / للاسف مش بيبان فى الاول كدا
هند / انا مش حامل يا جماعه و عشان ترتاحوا هعمل التحليل تمام
فاطمه / يا بنتى هو احنا بنتكلم غير من خوفنا عليكي حد عارف الزفت ده بيعمل ايه فى العيال مش يمكن ممنوع على الحوامل و لا ايه يا دكتوره
الدكتوره / والله هو ما اتعملش عليه اختبارات اصلا بس ما دام كدا كدا مش مصرح من وزاره الصحه على الكبار يبقي اكيد ممنوع على الاطفال والحوامل
فاطمه / شوفتى و من غير علام و لا غيره
هند / و انتى محتاجه علام يا بطه دا انتى تعلمى بلد ممكن نمشي بقي
فاطمه / كتر خيرك يا ست الدكتوره تعبناكى
الدكتوره / ازاى بس دا انتوا نورتونا
فاطمه / بالاذن يلا يا بنات عشان نلحق المعمل
فاطمه تاخد هند و خديجه و يطلعوا بره
…………………..
فى الارض
عباده ساند على كبوت العربيه مختار معدى يشوفه يركن و ينزله عباده يشوفه يتعدل
مختار / فى حاجه و لا ايه
عباده / بعت الدوا
مختار / بعته بس صدقنى ما فيهوش حاجه متاخد منه كتير يعنى متجاب من فتره يعني قبل كل الوغش ده
عباده / فى كام اب غير ابويا كان تعبان و بدل ما يداوى مات
مختار / حاسس بيك و تعرف الاسوء … انى بعت رشيد هناك عندها بايدي
عباده و مختار يسندوا على العربيه
عباده / دا انت عملت فيه جميل العمر اهو تاب و اتجوز و ستر البت انت بس اللى خايف عليه بزياده و بعدين رشيد مش ابن امبارح دا لافف و داير و عمل حاجات لو اتعملت افلام فى السيما ما حدش هيصدقها
مختار / و لا هى كمان حد هيصدقها انت كنت تصدق اننا نقابل حاجه زى دى
عباده / الدنيا مليانه بلاوى انت ما بتقراش الاخبار و لا ايه و بعدين دى لا مله و لا دين هتخاف من ايه و لا هتعمل حساب لمين … على العموم نهايتها قربت
مختار / الواد عندها فى الفيلا بتاعتها
عباده / الواد اللى رشيد بيدور عليه
مختار / اخر مكان رشيد هيدور فيه
عباده / جايز خصوصا ان رشيد ساب الفيلا هو و سمر بس اقولك حاجه
مختار يبصله
عباده/ رشيد لازم يرجع
مختار / رشيد ما عدش بتاع زمان ما يقدرش يشوف القرف ده كله و يسكت
عباده / ههههههههههه الوليه الباكسه بتقولهاله فى وشه
مختار / ما كانش ينفع معاها غيره عشان ما كناش نعرف حد فلتان و ضميره ميت قده
عباده / ما كانش ميت قوى كان فيه برده حته حلوه
مختار / و اهى كبرت و ما عدش ينفع للشغلانه بعد ما اتغرز فيها
عباده / تبعت بديل
مختار / ياريت كان عندى و حتى لو عندى مش هغرزه غرزه رشيد
عباده / قطمه احسن من نحته يا مختار اسمع منى
مختار / قسما بالله ما فى فى دماغى غيرها بس الكبير مش راضي خايف علينا و عنده حق لا انا و لا انت و لا حتى مغاورى لسانا زى الاول كل واحد فينا بقي فى رقبته اللى يخاف عليه اللى هيروح مننا هيسيب وراه كوم لحم
عباده / بس هيلحق اكوام اكتر
مختار / مش عاوز تشيل ابنك يا عباده
عباده / انت اللى بتسال السؤال ده … هتكدب على روحك و لا عليا دا انت ما فيش حاجه مهدياك فى حوار الخلفه الا انك خايف تشيل ابنك فى الظروف دى صح و لا لا
مختار / صح … مش هنكر … بس الظروف دى مش هتتغير لوحدها
مغاورى يركن العربيه
عباده / و ادى مغاورى كمان جه أهه
مغاورى / متجمعين عند النبى ان شاء الله
مختار و عباده فى نفس واحد
مختار/ اللهم صلى عليك يا نبى
عباده / عليه الصلاه و السلام
مغاورى / فى ايه مالكوا كل واحد فيكوا شايل طاجن سته على راسه ليه
مختار / سيبك مننا فينك غطست بعد الفرح ما قبتش يعني
مغاورى / دا باماره ايه ما انا كل يوم فى الشارع اهو
عباده / اخبار سماح ايه
مغاورى / جبتلها التلاجه يا سيدى بتقولى نجيب غساله اطفال و منشر فى الفرانده
مختار / ههههههههههههههههههه و ماله ما تجيب انت هتجيب لاغلى منها
مغاورى / ايه يا عم انت هتركبنى الغلط ليه نجيب يا عم
عباده / هو فى مشاكل عندكوا فى البيت يا مغاورى
مغاورى يرتبك
مغاورى / لا اله الا الله ليه بس الكلام ده
مختار / على فكره عادى هند لو فى بقعه صغيره بتغسلها على ايدها و تنشرها على الشباك عادى يعني و بعدين انت ناسي دا انا بعد ما اتجوزت و دخلت فرشت و وضبت من اول و جديد دا انت اللى اتسحلت فيها
عباده / ياض ما تقولش كدا … الا صحيح كنت هنسي هو الكبير كان بيتكلم معاك فى ايه بعد الفجر
مختار / يا نهار ابيض دا انا سقطته خالص سلام انا ماشي
مختار يجرى على العربيه و مغاورى و عباده بيضحكوا
مغاورى / ههههههههههه الله يرحمه كان غتت
عباده / ههههههههههههههه ليلته كانت بيضه من الاول دلوقت بقت اللوان
مغاورى / ليه ماله فى ايه
عباده / حوارات الحريم ما انت عارف ما بتخلصش المهم طمنى كنت جاى منين كدا و رايح على فين
مغاورى / جاى من البيت و رايح للمهندس فرج عشان يجي يعاين الارض و يبدا يشتغل فيها
عباده / ارض ايه
مغاورى/ هى سماح ما قالتلكوش و لا ايه
عباده / و احنا من امتى حريمنا بيطلعوا اخبار رجالتهم بره
مغاورى/ لا مش القصد بس كنت فاكر يعني … ما علينا عارف الارض ناحيه البر الغربى
عباده / بتاعه ولاد ابو عويس
مغاورى / لا اللى قبلها من ناحيه الطريق
عباده / اه عرفتها مالها
مغاورى / كتبتها باسم سماح و هبنى فيها سرايا لوحدينا … مش هننقل فيها دلوقت بس يعني بعد كدا لو حبينا يعني
عباده / انت متاكد ان كل حاجه تمام
مغاورى / يا عم السرايا عندنا مش كبيره زى بتاعتكوا و بقيت ضيقه و بعدين
عباده / يا سيدى ربنا يوسعها عليكوا بس تكتبها باسم سماح ليه
مغاورى/ ما عملتلهاش فرح يا اخى و لا خدتها فى حته زى اى عروسه و ابوك الله يرحمه قولت يعني
عباده / ما انت لسه جايبلها دهب جديد
مغاورى / ما اجيبلها يا عم انت هتعد علينا و لا ايه
عباده / استغفر الله ربنا يزيدكوا يا عم انا ما قصدتش والله بس بطمن … انا عارف انك ابو الكرم … بس استغربت ان سماح … لا والله تعملها بس ابوك رايه ايه
مغاورى / ابويا ما اتكلمش بالعكس دا ادانى نص تمن الارض و قالى خلى الباقي تبنى بيه
عباده / بس ابوك تعبان يا مغاورى و محتاجك جنبه و لو لا قدر الله امك و اخواتك
مغاورى / هو انا مهاجر يا جدع دا حياله مشوار نص ساعه بالعربيه اكون من هنا لهنا و بعدين يا سيدى السرايا الجديده واسعه و تساع من الحبايب الف اللى يحب يجي ينورنا على راسنا من فوق
عباده / ربنا يعملكوا اللى فيه الصالح بس انت عارفنى انا ما احبش احط قرشي فى طوب الارض يعني طين و زرع و خير غير كدا تبقي بور ما لهاش عازه
مغاورى/ بكره مع الايام السرايا هتضيق عليكوا و ساعتها غصب عنك هتعمل زيي
عباده يبتسم
عباده / على خير … طب والله ما ازعل ابدا طب والله فكره
مغاورى / ايه دى
عباده / الجنينه الورانيه كبيره نعمل فيها مبنى دورين و لا تلاته و لا نشوف ابو ابراهيم لو يرضينا يدينا حته من الارض بتاعته اللى ورا السرايا نبنى و نوسع بس نفضل كلنا مع بعض
مغاورى / من هنا لوقتها يحلها حلال المهم انا هضطر استاذن لحسن اتاخرت اوى
عباده / ربنا يوفقك ابقي سلملى على الحبايب
مغاورى / يوصل سلام
مغاورى يمشي و عباده قاعد مبتسم
عباده / هو مين زاد يعني الواد شاكر الصغير ياخد اوضه البت سماح و ان كان على فاتن و بنتها … لا لا خلى اوضه سماح زى ما هى يمكن تحمل و امى تصمم تيجي عندنا … ايه اللى بقوله ده … انا بعمل ايه هنا اساسا … انت اتجنيت يا عباده واقف بتكلم روحك
عباده يركب العربيه
عباده / استغفر الله العظيم ما خلتوش فى الواحد عقل
…………………..
فى سرايا الزنايته
مختار قاعد مع ناصر فى المكتب
مختار / قسما بالله ما حصل و بعدين ما انا كدا كدا عارف انى عمرى ما هبقي الكبير و انا اللى اخترت يوم ما اخترت هند يبقي ازعل ليه
ناصر / عشان عينك فيها
مختار / كان … كانت عيني على حاجات كتيره بس خلاص يوم بعد يوم … الواحد ليه ما طلعش فلاح عادى لا له فى الطور و لا فى الطحين يصحى الصبح يروح الغيط و يروح اخر النهار ياكل لقمه و ينام
ناصر / هتعملهم عليا يا وله دا انا اللى مربيك يا جزمه
مختار / هههههههههههههههههه ربنا يديك طوله العمر انا مش فارق معايا حاجه تانيه … و اوعى تفتكر انى كنت هفرح انى اقعد مكانك من بعدك و انسى حزنى عليك و ربنا يقوى عباده و يقدر يسد
ناصر / هيسد طول ما انت واقف فى ضهره هيسد
مختار / الا صحيح ما شوفتش هند و ام عباده و انا داخل هم لسه ما رجعوش و لا ايه
ناصر / لا يا سيدى لسه ام عباده حالفه ما ترجع الا اما تطمن خدتهم و عملوا تحاليل
مختار / ليلتنا بيضا
ناصر / ما تاخدها مصر
مختار / حتى انت يا كبير هو انا
ناصر / مهو عشان تخلص من الزن ده
مختار / هند ما فيهاش حاجه لو فى حاجه هتبقي منى اهدوا بقي
ناصر / و انت بتقولها كدا عن علم و لا بتسكتنى مهو انا يا مهزء
مختار / ههههههههههههه
ناصر / مش هسكت حتى لو منك و بدل ما ام عباده هى اللى بتزن على هند انا اللى هلف بيك على الدكاتره قولى كشفت و لا لا
مختار / لا
ناصر / امال بتقول الكلام الماسخ زيك ده ليه و تحرق دمى لما اقوم اديك على دماغك دلوقت هتفرح
مختار / طب اقول ايه انا تعبت يا كبير هند اشترت علبه اختبارات حمل و حطاها فى الحمام و بتحلل لروحها كل يوم .. كل يوم اخبط عليها عشان اخرجها من الحمام عشان ما تعيطش فيه الدنيا صعبه علينا من الاول و اللى بتعملوه بيزود الطين بتحبونا اه بس تعبنا
ناصر / اوعى تكون فاكر يا وله انى مش حاسس بيك و لا بيها انا بس
مختار / على راسي و مقدر بس مش بايدي و لا بايدها ان كان على العلاج فقسما بالله بتمشي عليه زى الساعه نعمل ايه تانى
ناصر / خدها مصر
مختار يبص الناحيه التانيه
ناصر / أقولك انا هجبلك مصر لحد هنا
مختار / و بعدين
ناصر / و لا قبلين ان كان على الاجهزه عندنا احسن حاجه و الناقص نجيبه احنا بنصرف كتير و قليل هنيجي على دى و نستخسر … و اه بكره الصبح تروح المعمل و تطمن على روحك
مختار/ هكدب الكدبه و اصدقها و لا ايه
ناصر / زياده امان ما فيهاش حاجه
مختار / حاضر
ناصر / الله … شايف كلمه حاضر حلوه و بتريح ازاى لكن ازاى لازم تجادلوا و تناكفوا و تتعبوا قلب الواحد كدا
انتصار تخبط و تفتح الباب
انتصار / الاكل جاهز و الجماعه وصلوا
ناصر / شايف يا مختار الحاجات الحلوه ازاى بتيجي ورا بعضها
انتصار تستغرب و مختار بيضحك
ناصر / اغرفى يا ام فاتن
انتصار / عيني يا خويا حاضر
انتصار تمشي
ناصر / قوم اغسل ايدك و وشك و اطمن على مراتك و انا هروح اطمن على ام عباده و اشوفها عملت ايه
مختار يهز راسه و الاتنين يقوموا
…………………………….
فى شقه رشيد
سمر / انا همنعك احنا ما اتفقناش على كدا انا مش مستعده اخسرك انا مش هقدر اخسرك
رشيد / انا مش بشورك انا بقولك
سمر / هتموت يارشيد هتقتلك يا رشيد هتقتلك بتلعب بيك و بيا بتلعب بالناس كلها مريضه و بتلعب بالناس كلها بتستمتع بده هى قالتلى كدا قالتلى هتاخد منى كل حاجه و انت كل حاجه يا رشيد انت كل حاجه
رشيد / مهو لو ما قتلتهاش هى هتقتلنى لو مش النهرده بكره بعده هيجي يوم و تقتلنى اللعبه دى مش هتستمر للابد
سمر / يبقى نهرب نستعوض ربنا فى الواد و نهرب اكيد ربنا هيبقى ارحم عليه مننا احنا عملنا اللى علينا و بعدين انت لوحدك و هى معاها جيش بحاله هو انا اللى هقولك
رشيد / و انتى بقى مين اوهمك انى لوحدى انا اه بحب ابان فى الصوره بس ان كان هى بتدارى فى جيشها انا ورايا الف جيش مدارى فيا
سمر / شيل اللى فى دماغك ده و اخزى الشيطان يا رشيد قوم اتوضى و صليلك ركعتين ربنا يهديك رشيد ابوس ايدك ربنا قال و لا تلقوا بايديكم الى التهلكه استهدى بالله يا رشيد ابوس ايدك استهدى بالله
رشيد / ممكن تهدى و تبطلى نكدك اللى لا بيقدم و لا ياخر ده و تسمعينى
سمر / لا مش هسمعك و لعلمك بقى انت اللى نكدى هاه
سمر تقوم و تدخل الاوضه رشيد يضحك و يقوم يدخل وراها و هو بيضرب كف على كف
…………………….
على السطح عند الزنايته
هند واقفه و لفه شال حوالين نفسها مختار يدخل
مختار/ علمناهم الشحاته بتعملى ايه هنا
هند / السما صافيه اوى و النجوم واضحه
مختار / بس انا مش شايف نجمه غيرك
هند تبصله و هى مبتسمه
هند / بتعمل ايه هنا كنت فاكره انكوا فى اجتماع مغلق
مختار / خدت نصيبي و الباقي ما ينفعش احضره
هند / فهمت
مختار / شوفتى اللى حصل مش الكبير طلب منى اعمل تحليل
هند / تحليل ايه
مختار / خمنى ؟
هند / ما تقولش .. بتهزر …و هتعمل ايه؟
مختار / هعمله طبعا
هند / بالبساطه دى