روايات

رواية البر التاني الفصل الحادي والثلاثون 31 بقلم لولو محمد

رواية البر التاني الفصل الحادي والثلاثون 31 بقلم لولو محمد

رواية البر التاني الجزء الحادي والثلاثون

رواية البر التاني البارت الحادي والثلاثون

رواية البر التاني الحلقة الحادية والثلاثون

هند / والله عاجب فى اى حاجه و كل حاجه
مختار / طب ينفع نبقي صاحيين احنا الاتنين و نقضيها رغى كدا
هند تدفس وشها فى حضنه
هند / انا نمت خلاص
مختار / جزمه
هند / هههههههههههههههههههههه
مختار / دا انا امى طلعت دعيالي يا ولاد
……………………….
فى السرايا
انتصار بتتقلب فى السرير تلاقى ناصر صاحى و سرحان تقوم تقعد
انتصار / مالك يا خويا فى حاجه و لا ايه
ناصر / لا ما فيش ما تشغليش بالك انتى
انتصار / عليا برده امال انت ايه اللى مصحيك و قالق منامك
ناصر / هو حد فيكوا زعل البت سماح و لا قالها كلمه تضايقها
انتصار / ابدا و بعدين هى يعنى هتسكت ان كانت هى و لا امها ما يتوصوش
ناصر / طب ما تعرفيش ان كانت شدت مع حد من اهلها ابوها و لا اخوها و لا حتى امها
انتصار / هو فى حاجه و لا ايه
ناصر / لا ما فيش ما تشغليش انتى بالك انا هتكلم معاها بكره
انتصار / طب فهمتى و انا هعمل ما اعرفش حاجه
ناصر يبص لانتصار و يتنهد
ناصر / عبد الله شافها بتعيط … كانت بره السرايا بره السور خالص
انتصار / ازاى ؟ خرجت لوحدها ؟
ناصر / تخيلى
انتصار / و رجعت تعيط و انت عرفت و سكت
ناصر / لا مش ساكت بس النهرده السرايا كانت مليانه قولت لو اتكلمت من غير فهم ممكن ما اقدرش اسيطر على عمى و لا على عباده و الموضوع يكبر و تبقي فضيحه و يبقي ياللى ما شوفتش تعال شوف انما لما استنى للصبح و اجيبها المكتب و اتكلم معاها افهم
انتصار / لا معلش يا خويا ما تجيش منك برده انا اللى هكلمها و مش الصبح دلوقت
انتصار تقوم تلبس العبايه بسرعه
انتصار / انت لو كنت قولتلى فى ساعتها كنت ارتحت و ريحتك انا مش فهماك بصراحه
انتصار تحط الطرحه على راسها و تمشي و ناصر يقوم يلبس العبايه بس بهدوء
…………………..
فى اوضه سماح
سماح نايمه ببجامه برمودا و تيشيرت نص كم من غير غطا انتصار تفتح الباب و تدخل تقفله وراها و تروح تقعد جنب سماح بالراحه و تصحيها
انتصار / سماح … سمسمه … سماح
سماح تفتح و تستغرب و تقوم تقعد
سماح / هو احنا امتى ؟ … هو الفجر اذن ؟
انتصار / لا يا حبيبتي انا جيالك عشان عاوزاكى فى موضوع
سماح / خير فى حاجه و لا ايه ؟
انتصار / انتى خرجتى من السرايا من غير اذن النهرده ؟
سماح / مين قالك ؟
انتصار / ما ترديش على سؤالى بسؤال حصل و لا لا
سماح / لا ما حصلش انا بس طلعت وقفت جنب السور شويه
انتصار / يعني حصل خرجتى من البوابه لوحدك و من غير ما تقولى لحد
سماح / هو انا فى سجن يعني؟ حصل ايه يعني ؟
انتصار / يا قلبي الحمد لله انه ما حصلش احنا بنخاف عليكي
سماح / حاضر اول و اخر مره
انتصار / كنتى بتعيطي ليه ؟
سماح / من خنقتى من حبستى من العيشه و اللى عايشينها
انتصار / اتكلمى عدل يا سماح مالك فيكي ايه سايقه العوج بقالك فتره و لا اكمنى سكتالك
سماح / هو انا يعني ما ينفعش اخرج و اتفسح زى باقي الخلق اغير جو و اشم نفسي الاجازه هتخلص و انا ما روحتش فى حته
انتصار / يا ستى هنخرج و نتفسح و اوديكي البحر كمان بس اصبرى
سماح / لامتى فرح مختار بعديه فرح عباده هوب الدراسه تبدا و الاقي نفسي بين مدرسه و دروس و شغل بيت ما بيخلصش
انتصار / لا اله الا الله قولتلك هوديكي و هفسحك الصبر يا بنتى مش كدا لا اله الا الله
سماح / صابره يا ام فاتن والله بس الواحد له طاقه انا حاسه انى بقره مربوطه فى ساقيه حاسه انى اكبر من سنى بقي هاين عليا اوافق على اى عريس و اتجوز يمكن ارتاح شويه
انتصار / يا لهوى للدرجادى ليه كدا
سماح / كل الناس بتحسدنى سماح بنت شاكر الزيني سماح اخت عباده الزيني ما يعرفوش ان سماح بتتعامل و لا الخدامين
انتصار / لا اله الا الله انتى اتجنيتي رسمى
سماح / ايوه اتجنيت اتجنيت عشان فتحت بقي و اتكلمت بدل ما انا كاتمه جوايا و هطق اموت
انتصار / بعد الشر عنك اتكلمى و طلعى اللى جواكى قولى
سماح / كل يوم و التانى دبايح و عزايم .. ربنا يديم الفرح بس هو انا مش من حقى افرح ليه اقعد وسط الناس هموت على روحى من التعب
انتصار / من يومنا و احنا على الحال ده لا عمر حد اتكلم و لا حد اشتكى
سماح / عشان ما حدش بيسمع و ان سمعوا ودن من طين و دن من عجين
انتصار / اديني بسمع قولى
سماح / و اخره القول ايه يعني فى حاجه هتتغير و لا هتروحى تشتكيني لامى تضربنى
انتصار / و انا يعني ما اقدرش اضربك و اربيكي و لا ايه دا انا اربيكي و اربى امك كمان
سماح تبتسم و تبص الناحيه التانيه
انتصار / يا بت دا انتى بنتى دا انا اللى مربياكى انتى و البت مريم كنت بحميكي باديا و اغيرلك عمرى ما فرقت بينكوا فى المعامله
سماح / عارفه
انتصار / امال ليه الكلام ده ايه اللى وصلك الاحساس ده انتى عارفه يا بت يا سماح انتى ايه مشكلتك
سماح / ايه
انتصار / انك هبله العزايم و الاكل اللى بيقطم ضهرك ده متعه بنجرى عليها كلنا و نتسابق عشان دى ثوابها كبير عند ربنا حد يكره يا بت الخير و الثواب دا كفايا دعوه ست غلبانه اكلت و اكلت عيالها
سماح / ربنا عرفوه بالعقل
انتصار / ربنا كريم يا بنتى و رجالتنا حياتهم على كفوفهم بيطلعوا يا عالم هيرجعوا و لا لا بنتصدق و نطعم عشان ربنا يحوش عنهم الاذى و يرجعولنا بالسلامه يا بنتى
سماح / احنا معانا فلوس كتير ما نجيب بدل الست عشره
انتصار / قولتلك هبله ما بنجيب بس برده نشتغل وياهم و نتعب و نعرق عشانا احنا و عشان ربنا … الثواب يا سماح
سماح / بس مش بالشكل ده
انتصار / خلاصه الكلام … انتى المطبخ هو اللى تاعبك
سماح / و هو فى غير المطبخ فى السرايا اللى يقطم الضهر
انتصار / خلاص يا سماح ما تخشيهوش و خديلك منه اجازه بس بكره يا بنت فاطمه لما تتجوزى و تلاقي نفسك شايله بيت لوحدك كل يوم فطار غدى عشا ترويق لوحدك هتعرفى ان الله حق و لا لو اتجوزتى فى بيت عيله هتقولى و لا يوم من تعب السرايا خصوصا لو لا قدر الله اتجوزتى اى جوازه عشان تخلصى زى ما قولتى … فكرى تانى يا سماح فكرى فى مستقبلك … فكرى و فكرى كويس و عيدي حساباتك .. وربنا يهديكي يا بنتى … اسيبك تكملى نوم عن اذنك
انتصار تقوم و تطلع بره تلاقي ناصر واقف
ناصر / فى ايه ؟
انتصار / طهقانه من شغل البيت … طبعها و لا هتشتريه الحمد لله انها مش حاجه كبيره … يلا يلا نلحق نريح ساعتين قبل الفجر
ناصر / يلا تعالى
انتصار و ناصر يرجعوا اوضتهم سماح تفتح الباب و تتاكد انهم مشيو و تدخل الاوضه تجيب الموبايل و تدور فى النمر و تتصل بمغاورى يرد و هو نايم
مغاورى / السلام عليكم
سماح ترد كانها بتعيط
سماح / كتر خيرك ما صدقت جريت تقولهم و تفتن عليا
مغاورى / مين
سماح / يلا سلام على العموم شكرا
مغاورى / سماح
سماح / يعني كنت هتخسر ايه لو سكت اتخنقت شويه و خرجت افك عن روحى اجرمت
مغاورى / انتى جبتى رقمى منين
سماح / دا كل اللى همك رقمك سر حربى يعني تولع السرايا حريقه و
مغاورى / انا ما قولتش حاجه لحد فاهدى
سماح / و المفروض اصدقك
مغاورى / و هكدب ليه هخاف منك و لا ايه
صمت
مغاورى / انا ما قولتش حاجه لحد و انا اصلا ما اعرفش حاجه اقولها
سماح / احلف
مغاورى / لا اله الا الله قسما بالله ما قولت حاجه هو انا يعني الوحيد اللى شوفتك
سماح / امال مين ؟
مغاورى / و انا اش عرفنى ما السرايا كانت مليانه ناس
سماح / انا اسفه
مغاورى / حصل خير
سماح / انت هتقول لعباده انى كلمتك
مغاورى / لا اله الا الله … لا مش هقوله
سماح تعيط
سماح / انا ما كانش المفروض اعمل كدا … انا اسفه … انا هقفل … سلام
سماح تقفل و تحط الموبايل جنبها و تاخد نفس عميق و تنام
…………………..
فى الساحل
مختار يطلع من الحمام بينشف شعره يلاقي هند بتلعب فى موبايله يروح ينام جنبها
مختار / حمله تفتيش دى و لا ايه
هند / ههههههههههههههه لا بلعب … و بعدين ايه حمله تفتيش دى عندك حاجه تخاف منها
مختار / لا دا احنا جامدين اوى و نضاف اوى و فى السليم اوى اوى و لو مش مصدقانى تعالى فتشيني بس بالله عليكي يكون التفتيش ذاتى
هند تبصله و ترفع حاجبها
هند / اديني خسرت
مختار / بيقولك سعيد فى الحب تعيش فى اللعب باين حاجه زى كدا
هند / فاير اينف
مختار / ها يا ست الستات نويتي تقضي اليوم ازاى النهرده
هند / مش عارفه انت ايه رايك
مختار / لو عليا انا هقضيه فى السرير
هند / مش هرد عليك
هند تقوم تفتح الدولاب و تطلع طقم خروج
مختار / هى بقت كدا ماشي
مختار يروح يطلع طقم هو كمان و يبدا يلبس
هند / انا بفكر ننزل نزل نتمشي على البحر ايه رايك
مختار / و ماله دا حتى هوا البحر بيحسن المزاج و يجدد النشاط و يزود ضخ الدم و ينزل ضغط الدم و كويس لصحه الجهاز التنفسي
هند / ايوه هو ده مختار اللى انا عرفاه كل حاجه يقلبها حصه احياء
مختار / نسيت اقولك انه كمان كويس عشان البشره
هند / مفيش فايده
هند تروح الحمام
مختار / و بيعالج نقص اليود
هند تقفل باب الحمام
مختار /انا لسه ما قولتلكيش على فوايد المشى
…………………..
فى جنينه سرايا الجوارحه
مغاورى قاعد لوحده خديجه تدخل لابسه
خديجه / صباح الخير
مغاورى / صباح النور على فين كدا ان شاء الله
خديجه / عباده كلم ابويا اروح اشوف الاوضه ان كان لونها هيعجبنى و لا اغيره عشان ننزل ننقى العفش و قالى اقولك توصلنى
مغاورى / ما كلمنيش يعني
خديجه / لو مش مصدقنى كلمه
مغاورى / لا ازاى مصدقك طبعا قومى اوصلك
مغاورى و خديجه يتمشوا ناحيه العربيه
خديجه / انبسطوا فى السهره امبارح ما شوفتكش طول اليوم
مغاورى / ما كانتش احلى من ليلتك
خديجه / تسلم
مغاورى و خديجه يركبوا العربيه و مغاورى يسوق
خديجه / لو ما وراكش حاجه ممكن تخليك معايا
مغاورى / موراييش بس ليه
خديجه / امى ما رضيتش تيجي قالت انتى اللى هتعيشي وسطيهم بس انا مش عاوزه ابقي لوحدى
مغاورى/ ههههههههههههههههه دا على اساس ان حد يقدر عليكي دا انتى قادره
خديجه / كتر خيرك لما اخويا يقول عنى كدا هستنى ايه من الغريب
مغاورى / و الغريب يستجرى يجيب سيرتك على لسانه و لا يرفع عينه فيكي ليه بايع عمره و لا ايه
خديجه / انا بتكلم جد
مغاورى / و انا بتكلم جد الجد كمان … و لعلمك انا مش بغلط فيكي انا كنت بمدح
خديجه / و انت بتسمى ده مدح
مغاورى / اش فهمك انتى اصلا
خديجه / يعني هتخليك معايا و لا لا
مغاورى / لو لقيت رجاله هخليني بس لو طلعتوا اتفرجتوا حريم فى بعض هستناكى مع الرجاله
خديجه / قولت لامى تيجي
مغاورى / بصى يا بنت ابويا خلاصه الكلام صحيح هتعيشي معاهم بس الاوضه دى انتى اللى هتعيشي فيها و بعدين ما تقدريش البلا قبل وقوعه الناس شاريين و ولاد حلال و عباده راجل و انتى مش جايه من الشارع انت بنت شاهين الجارحى و اخت مغاورى الجارحى يعني يتعملك الف حساب دا بغض النظر يعني انك كخديجه يعني مش شويه برده
خديجه / دا مدح برده
مغاورى / هههههههههههههههههههههه
مغاورى يسوق و خديجه تبص من الشباك و هى مبتسمه
…………………………
فى سرايا الزنايته
فاطمه / بقى هيجي تشوف على الطبيعه برده ما كنت صورتهولها بالموبايل
عباده / و هى ان جت هتضايقك فى ايه يعني بقولك ايه يا امى ابوس ايدك عدى اليوم على خير اقولك عدى الجوازه على خير
فاطمه / اخص عليك يا عباده و انا يعني اللى هبوظلك الجوازه
عباده / قسما بالله ما اقصد بس انتى فاهمه قصدى
فاطمه / اسمع يا عباده ان كانت هى بنت الجوارحه فانت عباده الزيني
عباده / ههههههههههههههه مش محتاج تفكريني بس تمام حاضر
فاطمه / بقولك ايه
عباده / خير
فاطمه / اختك مش مريحانى قولت لابوك قالى انتى امها اتكلمى معاها
عباده / مالها
فاطمه / قافله على روحها و كل ما ادخل الاقيها سرحانه و مش مظبوطه كدا انا اتكلمت معاها البت حاسه ان ماحدش مهتم بيها و اتكلمت مع ام فاتن و ام فاتن قالتهلها ما تحطش ايدها فى شغل البيت خالص و مع كدا قافله على روحها
عباده / غريبه دى طب انها تدارى وقت الشغل و فهمناها انما تدارى من غير شغل ليه
فاطمه / تفتكر حكايه الاستاذ دى ماثره عليها
عباده / امال لو ما كانتش هى اللى رفضاه على العموم هتكلم معاها انا كمان و نشوف الدنيا فيها ايه
فاطمه / اطلع كلمها دلوقت
عباده / لما الناس يمشوا
فاطمه / و هو الناس لسه وصلوا ؟ اطلع كلمها على ما يجوا قولها تلبس و تطلع تسلم على خديجه
عباده / امرى لله حاضر يا امى
فاطمه / حضرلك الخير يا ابن بطنى يا حبيبي
عباده يبص لامه بطرف عينه و يمشي
……………………..
على الساحل
مختار و هند بيتمشوا على الشط و كل واحد شايل جزمته فى ايده فى صمت
مختار / تحبى نقعد نشرب حاجه فى اى كافتريا من دول
هند / تمام مفيش مشكله
مختار يروح هو و هند يقعدوا على كرسين على البحر و يشاور لوايتر شايل صينيه الراجل يروحله
مختار / عندكوا عصاير فريش
الراجل / موجود حضرتك
مختار / تشربي ايه ؟
هند / فى فخفخينا نفسي اوى فيها مش عارفه ليه
الراجل / موجود حضرتك
هند / عاوزه واحده لو سمحت
مختار / خليهم اتنين
الراجل / اى حاجه تانى
مختار / ازازه ميه ساقعه بقي و خليك متابعنا
مختار يبتسم و يدى للراجل فلوس الراجل يبتسم و يمشي
هند / المكان هنا وهم و البحر مغرى اوى بصراحه
مختار / انا بحب البحر جدا على فكره كنت لما اتخنق اركب العربيه و اطلع اقعد على البحر
هند / البحر ده و لا اللى عندكوا
مختار / هههههههههههه اللى عندنا بس لو مورايش حاجه كنت بطلع على اسكندريه
هند / بس دا مشوار كبير اوى
مختار / ما انا ببقي فاضي بقي و بعدين انا اصلى بستمتع بالطريق فمش بحس بيه
هند / هو مفيش طريقه انى انزل البحر خالص يا مختار
مختار / ما فيش حاجه و ما لهاش حل نشوفلها تصريفه
هند تبتسم و تبص على البحر
مختار / عبى صدرك بهوا البحر
هند / اه مفيد للجهاز التنفسي قولتلى
مختار / الحق عليا بديكي معلومات مفيده
الراجل يدخل يحط كاسين كبار مليانين فاكهه و عصير و على الوش بوله ايسكريم و صوص شيكولاته و معلقه و شليمو هند تاخد بتاعها و تبتسم الراجل يمشي
هند / دا متوصي بينا على الاخر
مختار / بتعرفى تعملى البتاع ده
هند / دا اساسي عندى بعمله و ليا فيه شويه تكات و حركات بقي هبقي اعملهولك لما نرجع السرايا و تحكم و تقولى بتاعى بقي و لا بتاعهم
مختار / دى منافسه غير متكافاه خالص انتى عارفه ان بتاعك هيكسب انا اى حاجه بيتي معايا تكسب طبعا
هند / يا اخى حن عليا مره يا اخى قول مثلا كفايا انه من ايديكي كفايا انك هتعمليه عشانى مش اى حاجه بيتي تكسب
مختار/ هههههههههههههههههه لا اله الا الله
هند / محمد رسول الله يا مختار بيه كل كل قبل ما يسيح انا اصلا الغلطانه انى عشمت نفسي انك اتغيرت
هند تبص لمختار تلاقيه مبتسم و مركز معاها تبتسم هى كمان
…………………..
فى السرايا
عباده يخبط على باب اوضه سماح سماح تفتح الباب
عباده / بتعملى ايه ؟
سماح / قاعده … هعمل ايه يعني ؟
عباده / طب خشي عاوز اتكلم معاكى كلمتين
سماح / خير فى حاجه و لا ايه ؟
عباده / على الباب كدا ؟
سماح توسع عباده يدخل يقعد تروح تقعد قدامه
عباده / امك بتقول انك زعلانه و حابسه نفسك فى اوضتك قولت اجى اشوف مالك
سماح / ما ليش
عباده / لا يا بت فوقى انا مش جوزك تدلعى عليه اللى مضايقك تقولى على طول مش هنقضي اليوم مالك ما فيش مالك ما فيش بتاعتك دى
سماح / انت عاوز ايه يا عباده لقيت نفسك فاضي قولت تيجي تتسلي عليا شويه و لا ايه
عباده / تصدقى انا الغلطان انى سايب اللى ورايا و اللى قدامى و جاي لواحده قليله الربايه زيك
عباده يجي يقوم سماح سماح تمسك فيه
سماح / حقك عليا اقعد
عباده يقعد
سماح / انا اسفه انا … انا تعبت من الكلام كل حد يجي يسالنى مالك واحكى و خلاص مش حكيت خلاص الموضوع خلص تعبت من كتر الحكى و الكلام اكتر من السبب اللى تاعبنى
عباده / طب تعالى على نفسك اخر مره و احكيلى
سماح / زهقانه و عاوزه اخرج و اتفسح و اشم هوا
عباده / خلاص لما الناس يمشوا اخدك افسحك حلتهالك اهو حاجه تانى
سماح / ناس مين اللى يمشوا
عباده / خديجه هتيجي تتفرج على الاوضه عشان تنقى لون النقاشه
سماح / ما لونها حلو
عباده / اوضتها و هى حره نقاشه ورق حائط اوضتها و هى حره فيها
تليفون عباده يرن
عباده / دا مغاورى شكلهم وصلوا لما يمشوا هرنلك تلبسي يلا بالاذن انا بقي
عباده يقوم و يطلع بره و سماح عينها معاه
………………………
فى المضيفه
عبد الله قاعد فاتح دفتر قدامه و عمال يحسب حاجات بالاله الحاسبه الباب يخبط يقوم يفتح يلاقى ناصر شايل كيس
ناصر / على الله ما اكونش بعطلك عن حاجه
عبد الله / ازاى بس يا كبير اتفضل
ناصر يدخل يبص على الدفتر
عبد الله / هنعمل جرد بكره فقولت اراجع الدفاتر قبل ما نجرد عشان يبقي معايا تصور مبدئي لكل حاجه الكميه المفروض تبقي موجوده منها قد ايه
ناصر / الله ينور لا دا انت اتودكت خالص
عبد الله يبتسم ناصر يديله الكيسه
ناصر / حاجه صغيره مش قد المقام
عبد الله يفتح الكيسه يلاقى جهاز ضغط و سماعه يبص لناصر و يبتسم
ناصر / تستعملهم فى الخير
عبد الله / بصراحه انا مش عارف اقول لحضرتك ايه انا متشكر جدا
ناصر / على ايه بس يلا اسيبك ترتاح
ناصر يفتح الباب يلاقى مغاورى بيركن العربيه و نازل منها هو و خديجه شايله طبق شيكولاته فضه و عبد الله واقف على باب المضيفه بيتفرج
ناصر / الله دا الليله عيد يا ولاد و انا ما اعرفش
مغاورى يسلم على ناصر و يبوس ايده ناصر يسحب ايده عباده يطلع بيجرى من السرايا
عباده / اهلا و سهلا نورتوا
ناصر / مش كنت تقول يا عباده كنا فرشنا الارض ورد و لا دبحنا حاجه
مغاورى / يدوم عزك يا كبير
فاطمه و انتصار يطلعوا من جوه يحضنوا خديجه و يسلموا عليها
خديجه / حاجه صغيره مش قد المقام
فاطمه / تعبتى روحك
انتصار / و احنا فى بينا الكلام ده برده يا خديجه انا ليا كلام تانى مع امك
خديجه تبتسم
فاطمه / هنستاذنكوا ناخد خديجه نفرجها الاوضه
خديجه تبص لمغاورى و عباده مركز
عباده / هتيجي يا مغاورى
مغاورى / الموضوع مش مستاهل يعني خليني واقف هنا مع الكبير
ناصر / و احنا هنفضل هنا يعني تعال يا راجل نقعد فى المكتب نشرب حاجه
الكل يدخل جوه و خليفه يجيب فوطه صافره و يلمع لمغاورى العربيه عبد الله يطلع يقف جنبه
خليفه / تؤمرنى بحاجه يا سي عبد الله
عبد الله / تسلم انا بس ضهرى وجعنى من التاتيبه على الدفاتر جوه قولت امشي رجلى فى الشمس شويه
خليفه / صحه الشمس كلها صحه يا سي عبد الله
ياسمينا تعدى بتجرى تروح الجنينه الورانيه و وراها عيل اكبر منها شويه عبد الله يبتسم و يروح وراهم
عبد الله / عن اذنك يا خليفه
خليفه / اذنك معاك يا سي عبد الله اتفضل
عبد الله يروح الجنينه الورانيه يلاقي العيال قاعدين بيتمرجحوا و مريم بتزقهم يقف بعيد
مريم / حاسب لتقع انت مش ناقص
مريم تساعد ولد صغير يطلع يتزحلق
ياسمينا / تعالى زقيني بقي يا مريم
الولد يتزحلق
مريم / انتوا محتاجين تلاته مريم على الاقل فى الجنينه دى
مريم تيجي ترجع ناحيه المرجيحه تشوف عبد الله تتخشب عبد الله يبتسم و يمشي
ياسمينا / يلا بقي يا مريم
مريم تروح تزقها تمرجحها
…………………….
فى اوضه خديجه و عباده
عباده / و ماله بكره ننزل ننقى الرسمه اللى تعجبك
فاطمه / يا ابنى ورق الحيطه بقي موضه قديمه اوى
خديجه / بس ورق الحائط بقي فى منه رسومات ثرى دى تحفه انا جبت من النت شويه رسومات حلوه اوى
فاطمه / براحتك احنا كنا عاملين اوضه مختار نقاشه و فى الاخر جاب ناس ركبوله حاجات على الحيطه و غيروا شكل الاوضه خالص
عباده / مختار عامل الاوضه عازله للصوت
خديجه / و دى شكلها حلو يعني على كدا
فاطمه / يا اختى اهى كلها تقاليع و كل يوم يطلعولنا فى حاجه شكل بقولك يا ام فاتن ما تفتحى الاوضه تفرجيها
عباده / ما لوش لزوم هبقي اجبلها صورها من النت
فاطمه / على الطبيعه تفرق طبعا النت بيبقوا لاعبين فى الصور و الاضاءه و الفوتوشوب دوه
انتصار / المفتاح مش معايا مع ام عبد الله
خديجه / خلاص ما لوش لزوم
فاطمه / مش هتقول حاجه انا هروحلها اخده منها
فاطمه تمشي
خديجه / و انت ايه رايك فى حوار عزل الصوت ده
عباده / والله كل واحد ينام على الجنب اللى يريحه
انتصار / اصلهم بيحبوا يعلوا صوت التليفزيون بالليل كانهم فى السيما يعني فعشان ما يعملوش ازعاج لباقي البيت عملوا كدا
سماح تدخل تسلم على خديجه و تاخدها بالحضن
سماح / السلام عليكم
خديجه / سالت عليكى اول ما جيت فينك
سماح / فى الدنيا ها اخترتوا ايه
عباده / امى مصممه تجيب مفتاح اوضه مختار تفرجها لخديجه
سماح / لو منك بلاش ليقولوا بتقلدى هند
انتصار / و هى هند الوحيده اللى عملاها ما اكيد قبل هند يعني فى كتير عملوها
فاطمه تدخل
فاطمه / فتحتلنا الاوضه تعالى يا ست العرايس
الكل يروح ناحيه اوضه مختار شيري واقفه على الباب خديجه تدخل تتفرج
خديجه / حلو مش وحش و جديد كمان بس هو ما فيش منه اللوان تانيه
عباده / بكره اكلم الراجل رقمه معايا و اساله
خديجه / تمام حلوه الفكره عجبتنى
انتصار / الحمد لله يلا بينا بقي ننزل ناكل لقمه كدا على ما قسم
خديجه تبتسم و تمشي و الكل وراها و شيرى تقفل الباب بالمفتاح
…………………..
على البحر
هند بتتكلم فى التليفون
هند / و انا الموضوع ده يضايقني فى ايه عادى يعني
شيري / انا عارفه انه مش هيضايقك بس قولت تبقي عارفه
هند / مفيش مشكله
شيري / السمسار جاب لاخوكى شقه حلوه اوى قريبه خالص من الجامعه بتاعته
هند / برده يا ماما
شيري / هنروح نشوفها الجمعه
هند / هو مش مختار قاله يستنى اما نرجع
شيري / يا ستى مش هنمشي الا اما ترجعى بس نشوفها و نربط عليها لو كويسه
هند / ما فيش فايده يعني
شيري / نتكلم اما ترجعى هروح اساعدهم فى الغرف
هند / تمام يلا سلام
هند تقفل و تبص لمختار متابعها و مبتسم
هند / لقوا شقه
مختار / والله لولا اخاف اخوكى يعرف و يزعل كنت بعت حد يبوظ البيعه
هند / و هتبوظها كل مره برده
مختار / دى بلدى على فكره و ليا فيها كلمه لو قولت ما حدش ياجرلهم مش هيلاقوا خرم ابره
هند / و ليك كلمه على مصر كلها يعني
مختار / لا بس سكه ابو زيد كلها مسالك
هند تبص الناحيه التانيه
هند / خديجه هتعزل اوضتها زينا
مختار يبتسم
هند / ماما فتحتلهم الاوضه فرجتهم عليها هى خديجه نظامها ايه ما تعرفش
مختار / ان شاء الله ما تطلعش زى اخوها
هند / هههههههههههههههه امين لا امين اوى
مختار / و انتى شوفتى منه حاجه مغاورى ده انتى ما تعرفيهوش بصي حاجه كدا ما لهاش كتالوج بغزاله زى ما بيقوله دا كان هيموتى مره
هند / يا لهوى ليه
مختار / هههههههههههه يوميها دخلت فيه بريزه و احنا بنلعب كوره اتجنن و اتشال و اتحط كلمه منه كلمه منى قامت معجنه و الكل مسك فى بعضه
هند / دا مجنون اوى كنتوا قد ايه
مختار / دا قريب سنتين تلاته بالكتير
هند / هو باين عليه بصراحه
مختار / يلا خساره فيه حسناتنا بقولك ايه ما تيجي نروح
هند / لسه بدرى خلينا شويه
مختار / خلينا على الله يطمر
هند تبصله مبتسم
هند / مفيش فايده
……………………..
فى السرايا
الكل قاعد بياكلوا
انتصار / ما تاكلى يا خديجه هو انتى ضيفه
ناصر / ليكون ابوكى يا بت مانعك تاكلى عندنا
مغاورى / بتقول ايه بس يا كبير دا موصيني اخدله منابه و انا مروح
ناصر / ههههههههههههههههههه ابوك دا حبيبي
مغاورى / تدوم المحبه يا كبير
سماح / عن اذنكوا
فاطمه / على فين يا سماح ما تكملى اكلك
سماح / معلش اصلي تعبانه شويه
سماح تقوم تسند على الترابيزه عين الكل معاها فاطمه و انتصار يقوموا يسندوها
انتصار / مالك يا بت فيكي ايه
سماح / مش عارفه دايخه شويه
الكل يقوم و يتلموا حوالين سماح
شاكر / ابعت يا عباده هات الدكتوره تيجي تشوفها
عباده / حالا
عباده يطلع بره و الستات يسندوا سماح تقع منهم فاطمه تصرخ
فاطمه / سماااااح
…………………….
فى اوضه سماح
سماح ممدده فى السرير و الكل ملموم حواليها و الدكتوره بتكشف عليها و تطلع الروجته تكتب حاجه
الدكتوره / هى كويسه ما فيهاش حاجه
فاطمه / امال اللى حصل ده سببه ايه يا دكتوره
الدكتوره / هو مبدئيا الضغط طبيعى جدا خليها تعمل التحاليل دى و ان شاء الله نقدر نحدد السبب
انتصار / يعني هتتكرر تانى
الدكتوره / حضرتك الدوخه دى ممكن يكون ليها اكتر من سبب و لحد ما نحدد السبب وارد جدا انها تتكرر
فاطمه / يعني البت كويسه و لا لا فهميني
الدكتوره / قولت لحضرتك ابص على التحاليل الاول و بعدين احدد
فاطمه / انتى مش عاوزه تريحينى ليه امال دكتوره ازاى
انتصار / حقك علينا يا بنتى بنتها و خايفه عليها اهدى يا فاطمه مش كدا
الدكتوره / عن اذنكوا
الدكتوره تفتح باب الاوضه تلاقى الكل واقف ما عدا مغاورى و عبد الله
شاكر / طمنيني يا بنتى
انتصار / عاوزه التحاليل دى عشان تعرف هى عندها ايه
الدكتوره / على العموم مبدئيا هى كويسه التحاليل دى عشان نعرف سبب الدوخه
عباده / انميا يعني و لا ايه
الدكتوره / ممكن جدا و ممكن جيوب انفيه و ممكن حاجات كتير اوى و ممكن ما يكونش فى اى حاجه خالص
خديجه / يعنى ايه تقع من غير سبب
الدكتوره / لا طبعا فى سبب بس مش عضوى ممكن نفسي مثلا
فاطمه / ايوه هو نفسي ده بقالها كام يوم قافله على روحها و بتقول زهقانه دا ممكن يكون السبب ؟
الدكتوره / الله اعلم زى ما قولت ما اقدرش اجزم باى حاجه الا لما اشوف التحاليل و تعملوا حسابكوا حتى لو التحاليل كويسه ممكن يكون السبب من حاجه تانيه خالص
فاطمه / انتى متاكده انك دكتوره بجد و لا ايه ؟
شاكر / انتى بتقولى ايه يا فاطمه عيب كدا … ح/
قك علينا يا بنتى
الدكتوره / عن اذنكوا
الدكتوره تمشي و عباده يوصلها
فاطمه / اقطع دراعى من هنا هو ان كانت الوليه دى بتفهم عماله تجيبنا و تودينا و ما فهمناش منها حاجه
شاكر يدخل يبص على سماح الكل يدخل وراه سماح تتعدل فى السرير
سماح / فى ايه يا جماعه انتوا صدقتوا انى عيانه بجد و لا ايه دا انا بقيس غلاوتى
ناصر / غاليه يا بنت الغالى ايه يا بت مالك فيكي ايه مش تشدى حيلك كدا ينفع بنت الزيني تبقي خرعه كدا
سماح تبتسم
فاطمه / بقالها كام يوم ما بتاكلش عاجبك كدا
سماح / ابوس ايدك يا اما بلاش تقطيم كفايا خروجتى اليتيمه اللى انضربت
شاكر / تتعوض اى حاجه تتعوض ما دام انتى بخير يا سماح
سماح / تسلم يا با تسلموا كلكوا
خديجه / الحمد لله انى اطمنت عليكي هستاذن بقي عشان انا معطله مغاورى معايا من الصبح
شاكر / الزياره دى مش محسوبه المره الجايه تقضي اليوم بطوله
خديجه / ان شاء الله يا عمى
خديجه تسلم على الكل و تنزل تحت مغاورى بيتكلم مع عباده و عبد الله
عباده / والله امى برده فوق هتتجنن من كلامها ده بس هنعمل ايه امشي ورا الكداب لحد باب الدار هنحللها و نشوف
مغاورى / ما نشوف دكتوره و اتنين و عشره ايه اللى يسكتنا
خديجه / السلام عليكم
عباده / و عليكم السلام ايه ماشيه و لا ايه
خديجه / كفايا كدا
مغاورى / سلمتى على سماح
خديجه / اه فاقت و كويسه الحمد لله … زعلانه ان خروجتها باظت
عباده / ملحوقه تقوم بالسلامه و ناخدكوا و نروح مكان ما تحبوا … احنا حتى ما اشتريناش لا شبكه و لا دياولو اتلخمنا و الايام بتعدى
مغاورى / تقوم بالسلامه و نطمن عليها و ننزل فى اى وقت قى بيتها يعني الدنيا مش هتطير
عباده / باذن الله … باذن الله
……………………..
فى عربيه مغاورى
مغاورى سايق و خديجه جنبه فى صمت
خديجه / هنعمل الاوضه عازله للصوت
مغاورى / احسن عشان ما حدش يسمع نقيركوا
خديجه / كتر خيرك مش هرد عليك اقولك انا الغلطانه انى بتكلم معاك اساسا
مغاورى / و الله انتى هبله هو فى اتنين فى الدنيا ما بيتناقروش دا مصارين البطن بتتخانق يا بت و بعدين الفكره مش انكوا تتناقروا و لا لا الفكره ان طول ما صوتكوا مش معدى حيطان الاوضه ما حدش هيدخل و هتعرفوا تحلوها سوا
خديجه / فى دى معاك حق بس هيقولوا مقلده هند
مغاورى / انا ما برتاحش للبت دى
خديجه / لا دا هند فى السرايا خاطرها غالى اوى و شكلها كدا مقامها عالى
مغاورى / دا مبدا ارحموا عزيز قوم ذل انما لا هى و لا اهلها ليهم متوى تانى سمعت ان عمامهم بهدلوهم بعد موت ابوها الله يرحمه
خديجه / سمعت انا كمان بس شكلها غلبانه وعاوزه تعيش
مغاورى / او بتتمسكن لحد ما تتمكن على كل حال انتى ليكي جوزك و بس غير كدا سلامات سلامات يا حبايبنا يا بلديات
خديجه / كنت ناويه على كدا من غير ما تقول
مغاورى/ بقولك يا خديجه ما تتصلى تطمنى على سماح مش واجب برده
خديجه / هتصل بس مش دلوقت انا لسه ماشيه من عندهم لما اروح هقول لامى تكلمهم و تطمن عليها
مغاورى / تكلمهم ايه واجب تروح دى الاصول الناس تاكل وشنا
خديجه / ربنا يعمل اللى فيه الخير
مغاورى يسوق و هو ساكت
…………………..
فى الجنينه الورانيه
عبد الله قاعد على المرجيحه و بيهزها برجله و مبتسم سماح تدخل
سماح / ليك حق تقعد و تتشمس
عبد الله يقوم يقف و يبص عليها
سماح / مهو ما يفتنش الا العيل الصغير كسبت ايه لما فتنت عليا يعني علقولك نياشين
عبد الله / انا كنت قلقان عليكي لما شوفتك بتعيطي
سماح / و تقلق عليا بصفتك ايه جوزى خطيبي حبيبي اديك ولعت الدنيا حريقه
عبد الله / انا اسف صدقيني ما كانش قاصدي اسببلك اى مشاكل
سماح / انا ما كنتش بعمل حاجه انا بس اتخنقت من زحمه الستات فى المطبخ قولت اشم هوا ايه اجرمت
عبد الله / انا ما ليش انى ادخل
سماح تلف و تديله ضهرها و ترجع تبصله
سماح / انا اسفه انى قولت عنك عيل فتان انا بس كنت مفروسه منك
عبد الله / بعتزر مره تانيه
سماح / شكرا انك ما اتكلمتش مع عباده دا كان ممكن يقتلنى
عبد الله / ما افتكرش عباده بيحبك و عمره ما ياذيكي ابدا
سماح / و انت عرفت منين هو بيكلمك عنى
عبد الله / اكيد لا بس النهرده كان هيتجنن عليكي لما وقعتى
سماح / طيب … بيتهيالي ما ينفعش نقف نتكلم مع بعض بالشكل ده حد يشوفنا يفهمنا غلط هنا مش زى مصر و انا ما اردلكش تتاذى بسببي … و اه مبروك يا دكتور … عن اذنك
سماح تمشي و تدخل السرايا و مريم واقفه فى البلكونه و سانده على السور تشوف عبد الله طالع من الجنينه الورانيه تعدل فى وقفتها عبد الله يبص يشوف مريم بصاله و ملامحها جد تدخل جوه و هو متابعها يدخل المضيفه
………………………..
فى اوضه سماح
سماح تدخل الاوضه و تقلع الطرحه و العبايه و تقعد قدام المرايه مريم تفتح الباب و تدخل
سماح / خضيتيني مش تخبطى
مريم / كنتى فى الجنينه الورانيه
سماح / و دا سؤال و لا اجابه
مريم / انا شوفتك
سماح / ما انتى بتلعبى فيها طول اليوم حد كلمك و لا هو حلال ليكي و حرام ليا
مريم / لا مش حرام ليكي بس انتى تعبانه
سماح / دوخت شويه ايه هتدفنونى بالحيا و لا ايه
مريم / مش انا اللى هدفنك بس ابوكى و اخوكى لو كانوا شافوكى مع عبد الله
سماح تحط ايدها على بق مريم و تجرى تبص بره الاوضه فى حد و لا لا و تقفل الباب
سماح / اوعى لكلامك يا مريم انتى عرفانى كويس انا روحت افك عن نفسي لقيته هناك سبت المكان و مشيت
مريم / لا يا شيخه دا انا شوفتك لابسه و خارجه جريت لبست عبايتي و طرحتى و طلعت اشوفك روحتى فين لقيتك خارجه من الجنينه
سماح / حاسبي على كلامك يا مريم انا ما خرجتش من باب السرايا على الجنينه الورانيه علاطول اتمشيت شويه قدام السرايا و بصيت على الورد اللى قدام الباب
مريم / انا بتكلم عشان خايفه عليكي
سماح / عارفه و الا ما كنتش سكتلك و انتى عارفه انا اللى يرشنى بالميه ارشه بالدم
مريم / انتى اختى صح؟
سماح / و دا سؤال يا مريم !!
مريم / انتى ايه رايك فى عبد الله
سماح / عيل فرفور تعرفى … انا روحت لقيته بيتمرجح و لا العيال الصغيره
مريم / ما عمى كان بيتمرجح مع هند و عمى لا هو عيل و لا فرفور
سماح / الحب يا خايبه يعمل اكتر من كدا انما عبد الله بيتمرجح مع روحه
مريم / طب ما احنا بنتمرجح احنا كمان طب دا انا النهرده طلعت مع العيال و اتزحلقت كمان ههههههههههههه
سماح / ما انتى عيله و لا تكونيش فاكره نفسك كبيره يعني
مريم / مش هيخلوا الاستاذ عصام يجي يدينا تانى
سماح / قطعت و قطعت سيرته هو راخر شوفى الراجل الواطى كان بيقعد يتبصص عليا فى الحصه و انا اللى كنت فكراه بيبصلى خايف اكون بغش
مريم / الراجل دخل البيت من بابه يا سماح ما غلطش
سماح / هو ايه اللى ما غلطش انتى عارفه فرق السن بيني و بينه كام سنه
مريم / ما الفرق بين ابوكى و امك كبير لما يبقي فى حب يا سماح الفروقات دى كلها بتروح
سماح / و هو ما فكرش يتقدملى الا لما مختار ساب السلاح و عباده بقي هو الكبير
مريم / عباده مش الكبير ابويا الكبير ربنا يديله الصحه و طوله العمر
سماح / طبعا امال ايه انا بس بتكلم عن اللى الناس بتقوله
مريم / الناس بتقول ايه بقي ان شاء الله
سماح / اهو كلام هو الناس بتبطل رغى … بس سيبك انتى تعالى هنا مالك كدا قيدتى نار لما شوفتيني مع عبد الله لتكون عينك منه هههههههههه
مريم / اسكتى و اعرفى بتقولى ايه دا زى اخويا
سماح / ما عندناش حاجه اسمها زى يا ست مريم
مريم / يا بت انا كلمتك عشان كنت خايفه عليكي حد غيرى يشوفك تقومى تقلبى الدنيا عليا كدا
سماح / و مالك اتوترتى كدا ليه و وشك جاب اللوان على العموم انتى عارفه .. افرحلك
مريم / مفيش حاجه انا حتى عمر لسانى ما خاطب لسانه ابدا
سماح / ابدا !!
مريم / اقسم بالله يا سماح هو فى ايه !!
سماح / ههههههههههههههه يلاهوى خلاص خلاص صعبتى عليا مالك يا بت
مريم / ما ليش و الحق عليا انى جيت اتكلم معاكى اصلا
مريم تسيب المكان و تمشي و ترزع الباب وراها و سماح تقعد على السرير و هى بتضحك
………………………
تانى يوم الصبح
مختار و هند بيركبوا ياخت دورين و هند متحمسه جدا و مش على بعضها
هند / هيبقي معانا طول اليوم يعني
مختار / ههههههههههههههه اى خدعه يا ستى عشان تعرفى بس
هند عماله تتحرك بسرعه و تبص على الياخت تدخل الكابينه في اتنين رجاله قاعدين تتفاجئ مختار يدخل
مختار / صباح الخير يا كابتن ان شاء الله عاوزين فسحه حلوه
الكابتن / باذن الله يا مختار بيه مش عاوز حضرتك تقلق خالص البحر النهرده هادى و الجو جميل
شاب / الفطار فوق لو حضرتك تحب
مختار يبص لهند
مختار / نحب جدا و ما يبقاش فيها قله زوق يعني لو يعني
الكابتن / ما تقلقش يا مختار بيه مفيش اى حد هيطلع فوق الا لو حضرتك ناديت علينا
مختار يبتسم
مختار / عن اذنكوا
مختار و هند يطلعوا فوق و هند بتجرى على السلم
مختار / حاسبي تقعى بس
الياخت يبدا يتحرك هند تقف تتفرج على البحر
هند / انا طول عمرى بتفرج على المشهد ده فى الافلام و اتخيلت انى اعيشه
مختار / مش هتطلبى منى نعمل زى الناس الهبله و نقلد التايتانيك
هند تبصله و تبتسم و تبص للبحر مختار يحضنها من ضهرها تفرد ايديها و يضحكوا تلم ايديها
مختار / فاضل ايه
هند / كدا تمام اوى … انا فرحانه اوى فرحانه اوى بجد ما تيجي ناخد سيلفى
مختار / ناخد
مختار يطلع موبايله و يتصور هو و هند و هم مبتسمين هند تاخد منه الموبايل و تروح تقعد و قدامها ترابيزه عليها اكل و عصاير مختار يروح يقعد جنبها و ياخد واحده ساليزون و ياكلها و هى بتقلب فى الصور
هند / الصور حلوه اوى
مختار / انتى عارفه ان فى دور تحت غير الدور اللى كنا فيه
هند / بجد !!
مختار / فيه اوضه النوم لو حبينا نريح يعنى شويه
هند / طب ما تيجي ننزل نتفرج عليها
مختار / تعرفى لو كنا لوحدينا على الياخت كنت اخدتك بس مش عارف مش هبقي مرتاح خلينا هنا احسن
هند / انا قولت نتفرج عليها على فكره
مختار / مهى بتبدا بكدا و بعد كدا الخيط بيكر بعضه
هند / ههههههههههههههه دا انت مشكله
مختار / ايه ده انا ما عدتش مجرم و لا ايه !!!
هند / ههههههههههههههههههه
……………………..
فى السرايا
ام مغاورى قاعده مع خديجه و سماح و ستات السرايا
الست / دا انا كنت هشق كرشها الجزمه دى
خديجه / والله جيت اقولك لقيتك نايمه اعمل ايه يعني
انتصار / ههههههههههههههه كانك عرفتى و جيتي بالظبط
الست / الدكتور كاتبلى دوا بينيمنى زى الفسيخه اخده من هنا و اروح دنيا تانيه خالص بس الشهاده لله جاب من الاخر دا انا الكحه جابت اجلى
فاطمه / لا يا اختى الف سلامه كلو الا الصدر ما يتسكتش عليه
خديجه / ياريتها بتلتزم بتعليمات الدكتوره انما نقول ايه
الست / الوليه منعانى من كل حاجه دا حتى الفلفل الاسود ممنوع
خديجه / مهو على ما تخفى يا امى الله
الست / و كلو كوم و المكسرات كوم تانى طب اقولها ايه دى يعني لما اقعد اتفرج على الفيلم مع الحج كدا ما يبقاش فى على الاقل شويه لب و سدانى حتى دا حتى الشيكولاته ممنوع
انتصار / انا ممكن استحمل كل ده انما الشيكولاته نقطه ضعفى اهرش علاطول
الكل يضحك
فاطمه / برده يا حجه صحتك بالدنيا
خديجه / و بعدين لما هتخفى كلى براحتك انما كدا بتطولى فتره العلاج بتاعتك
الست / سبكوا منى خلونا نطمن على ساموحه بتاعتنا عملتوا التحاليل
فاطمه / اه رحنا الصبح دى فضحتنا هناك
سماح / نزلوا فيا شكشكه لما اتهريت دول صفونى
فاطمه / ياختى بلا مياصه بلا وجع قلب
سماح / انا برده طب اشهدوا انتوا
سماح تشمر العبايه دراعها بقع زرقه
خديجه / يلاهوى دى حماره اللى بتسحب دى و لا ايه
سماح / اهو يعني ما كنتش انا اللى بدلع اهو و دراعى التانى كمان على كدا
فاطمه / و انتى يعني اللى كنتى ثابته اوى
سماح / ايدها تقيله و الله شاكه انها كانت بتتعلم فيا
الست / لا دا خديجه ايدها خفيفه خالص انا ما بخليش حد يدينى الحقنه الا هى مش عارفه هعمل ايه لما تاخدوها منى
فاطمه / قال ناخدها منك قال دا احنا نجيبهالك لحد عندك تديكى الحقنه كل يوم
انتصار / بس بشرط تعمليلى السخينه الحلوه بتاعتك
الست / بس كدا بكره اعملهالك مخصوص
فاطمه / لا بكره ايه بكره عاوزين ننزل نشترى الشبكه بقي اتاخرنا كتير
الست / و ماله نشترى الشبكه و نروح عندنا فى السرايا ناكل السخينه بس الاول نشوف الحج شاهين ليكون وراه حاجه كدا و لا كدا
فاطمه / ان شاء الله ما يكونش انتى بس انويها و ربنا هيقدم اللى فيه الخير
…………………
فى المكتب
مغاورى / و الله انا كمان ريقي نشف مع ابويا هنفضل كدا لحد امتى
ناصر / الحكومه مفتحه عنيها اوى يا مغاورى و الرجاله ما بتتعوضش
مغاورى / بس احنا مش صغيرين يا كبير و عيبه فى حقنا لما حد يقصدنا فى حته و لا اتنين نقوله ما فيش المخازن فاضيه
عباده / والله نفس كلامى الواحد بقي بيطلع الحته كانه بيقطع من لحمه عشان مش عارف امتى هيعوضها
مغاورى / الناس لو ما لقتش عندينا هتجيب من بره و الزبون اللى بيروح ما بيرجعش يا كبير
شاكر / الرجاله معاهم حق
ناصر / عارف بس انت كمان يا عمى عارف انا موقف الشغل ليه
مغاورى / انا مش فاهم انتوا ليه عاملين للحرمه دى حساب ديتها ايه يعني
عباده / وربنا ما ليها عندى ديا بس الكبير ياذنلى كل يوم بيعدى بتمد جدورها فى البلد دى اكتر و بنخسر شباب اكتر الوليه دى حيه بجرس لازم نقطع راسها قبل ما تبخ سمها فينا
ناصر / تعرف مكانها ؟
عباده يسكت
ناصر / سكت يعني لما تعرف مكانها يا عباده هنخلص منها انما طول ما هى مندسه فى حجرها هنفضل نعملها حساب و ساكتين
مغاورى / طب و احنا ايه اللى يخلينا نستناها تطلع ما نطلعها احنا
الكل يبص لمغاورى باهتمام
مغاورى / و بعيد عن الحكومه ما دام مش عارفين مين ابن الكلب اللى تبعها نخلى الموضوع بينا و بين بعضينا
ناصر / بس الحوار ده لازم يفضل بعيد عن مختار
مغاورى / اكيد يا كبير
عباده و مغاورى يبصوا لبعض و يبتسموا
………………..
تانى يوم فى الصاغه
خديجه و الستات بينقوا و الرجاله بره قاعدين على قهوه قدام المحل بالظبط بيشربوا ساقع و يضحكوا و عباده و مغاورى واقفين على باب المحل سماح تطلع من المحل
عباده / فى حاجه و لا ايه
سماح / دخت من الزحمه قولت اشم هوا
عباده / تعالى
عباده ياخد سماح و يفتحلها العربيه و يقعدها و يشغلها التكييف
عباده / و تكييف كمان يا ستى
سماح تبتسم
عباده / هجيبلك حاجه ساقعه و عارف طلبك ما تقلقيش
سماح / تسلم و تعيش
عباده يبتسم و يقفل الباب و يمشي ناحيه القهوه تليفون سماح يرن تبصله الابتسامه تروح من على وشها
سماح / افندم
عصام / عملتى ايه كلمتيهم
سماح / لسه
عصام / لسه ليه يا سماح لسه ليه
سماح / حصلت ظروف كتير انت ما تعرفهاش و على فكره اسلوبك ده هيوديني فى داهيه انا العيله كلها حواليا
عصام / ما انتى اللى مصره تماطلى قولتلك اقطع عرق و سيح دمه احسن
سماح / دمك انت اللى هيسيح يا بنيأدم
عصام / انا مش هقدر اصبر اكتر من كدا انا تعبت
سماح تبص قدامها تلاقي مغاورى مركز معاها
سماح / انا لازم اقفل اخويا جاى
سماح تقفل و تفضل باصه لمغاورى يبص الناحيه التانيه
سماح / والله شكلها مش هتيجي غير بكدا فعلا اقطع عرق و اسيح دم و اللى يحصل يحصل
…………………..
فى الفندق
هند و مختار بيقفلوا الشنطه
هند / بس انت كدا ضحكت عليا كنا متفقين على شهر
مختار / هعوضهالك ده وعد
هند / لا ما دام كدا يبقي امان
مختار / و بعدين انا مش عملتلك كل اللى نفسك فيه
هند / انت كل اللى نفسي فيه
مختار / لا بالراحه عليا انا غلبان و قلبي رهيف و مش حمل الكلام الحلو ده
هند / هههههههههههههههههه تمام كدا الشنطه جاهزه ممكن بقي ننزل نتعشي و نسهر و نقضي باقي اليوم و لا انت ليك خطط تانيه
مختار / والله كان عندى بس لو اجلناها كام ساعه الدنيا مش هتطير
هند / هههههههههههههههههه ماشي اعدل الطرحه و ننزل
هند تروح تقف قدام المرايه تعدل الطرحه
……………………………
فى سرايا الجارحى
الكل متجمع و الشبكه مفروده على ترابيزه فى النص و الستات عماله تتفرج و يضحكوا
فاطمه / هو مش مختار و هند راجعين يبقي خلاص خير البر عاجله نستنى ليه
خديجه / بالسرعه دى هم ما انبسطوش هناك و لا ايه
انتصار / لا انبسطوا خالص دا كل يوم بيبعتوا صورهم لمريم اخر انسجام
ام مغاورى / امال راجعين ليه ما يخلوهم شويه
مريم / هو مش مرتاح لاكل الفندق وعدنى انه هيشوفلنا فيلا كبيره و نطلع كلنا نصيف
عباده يوطى على ناصر
عباده / انت قولتله يا كبير
ناصر / امان ليهم يبقوا وسطينا
عباده / بس احنا اتفقنا ان مختار يبقي بعيد عن العمليه
ناصر / يبقي بعيد عن العمليه لكن مش بعيد عن عنينا
عباده / اللى تشوفه يا كبير
عباده يبص قدامه و هو مضايق عينه تيجي فى عين مغاورى مغاورى يطلع بره السرايا و عباده يطلع وراه
مغاورى/ قال الاكل مش عاجبه قال
عباده / الراجل له وجه نظر
مغاورى / و هى ايه بقي ان شاء الله
عباده / هما هناك لوحدهم و لو قلبت بغم هيبقوا فى وش المدفع
مغاورى / لوحدهم ايه امال لو ما كنتش بعت رجاله يسدوا عين الشمس دا انتوا احتليتوا الفندق
عباده / و دى نقطه تانيه برده احنا فى عرض كل راجل
مغاورى / بس دا ما كانش اتفاقنا
عباده / ما فيش حاجه اتغيرت مختار ساب السلاح
مغاورى / بكره نقعد جنب الحيطه و نسمع الظيطه
عباده / هى هتبقي ظيطه فعلا بس ظيطه فرحى يا ابن عمى
مغاورى / ههههههههههههههههههههه دى هتبقي ظيطه صباحى
عباده / بيشاورولى جوه عن اذنك
مغاورى / اذنك معاك
عباده يدخل و مغاورى يقف فى الجنينه تجيله رساله
////////////
سماح / ممكن تساعدنى ؟
////////////
مغاورى يقرا الرساله و هو مستغرب يدخل يبص جوه يلاقي سماح عينها عليه يبص على عباده قاعد جنب خديجه و بيلبسها الشبكه و الكل بيزغرط سماح تقوم و تروح توشوش عباده يديها مفتاح العربيه و الكل مبسوط سماح تروح ناحيه مغاورى و تعديه و تطلع بره يطلع وراها
مغاورى / خير !!
سماح / انا واقعه فى مشكله كبيره و لو قولت لاى حد من اهلى الموضوع هيكبر اكتر و مش هنعرف نلمه
مغاورى / مشكله ايه دى ؟
سماح تطلع موبايلها و تفتح رسايل الواتس بينها و بين عصام
سماح / كان المدرس بتاعى فى الاول كنت لما اغيب ابعتله الواجب او اساله فى حاجه و بعدين بقيت اما اغيب يتصل يطمن عليا و يدينى الجديد و الواجب عشان ما اتاخرش
مغاورى يقلب فى الرسايل
سماح / و بعدين فجاه بقي بيسال كتير و يتصل كتير و انا ما كنتش بعرف احرجه و لا اعمل ايه قولت لما الاجازه تيجي كل واحد هيروح لحاله لقيته بيتقدملى و مقتنع انى بحبه مع ان الكلام قدامك ما فيهوش اى حاجه تقول كدا
مغاورى يدى لسماح الموبايل

يتبع…

لقراءة الفصل التالي : اضغط هنا

لقراءة الرواية كاملة اضغط على : (رواية البر التاني)

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى