روايات

رواية البر التاني الفصل السابع والثلاثون 37 بقلم لولو محمد

رواية البر التاني الفصل السابع والثلاثون 37 بقلم لولو محمد

رواية البر التاني الجزء السابع والثلاثون

رواية البر التاني البارت السابع والثلاثون

رواية البر التاني الحلقة السابعة والثلاثون

عباده / هو ايه اللى على فين رايحين للجوارحه انت ناسى اننا هنحدد معاد الفرح النهرده
مختار / اخيرا
عباده / والله الاوضه و اتفرشت و جهازها كمل العطله منين بقى انا شخصيا جاهز
مختار / هههههههههههههه ان شاء الله الخميس الجاى
عباده / ان شاء الله يلا بالاذن … سلام يا جماعه
عبد الله / بسرعه كدا ما تيجي يا عم
عباده / مره تانيه ان شاء الله … خف
عباده يضرب مختار على كتفه بالراحه مختار يهز راسه اه عباده يمشى مختار يبص ناحيه هند باصه الناحيه التانيه و بتهز رجلها بسرعه يروح يقعد جنبها
مختار / لو ضربنا تلت اربع ارانب هيصعبوا عليكي
هند تبصله
مختار / تعتبر اهداف متحركه برضها
هند / انا بخاف عليك على فكره انا مش هعيش يوم واحد لو جرالك حاجه
مختار يهز راسه
مختار / عارف بس انتى مكبره الموضوع جامد اوى بصراحه امال لو شوفتى واحد مثبتنى و حاطت المسدس على دماغى من ورا هتعملى ايه
هند / هعمل ايه فى ايه هموت طبعا انت بتهزر
مختار / يا مرك يا مختار … يعنى مش هتضربيه فى دماغه و تنقذيني
هند / و لو جت فيك هتفرح ساعتها هتبقى يا فرحتك يا مختار يا سعدك يا هناك يا مختار
مختار / اه هبقى مبسوط انتى الوحيده اللى لو اتكتبلى اموت على ايد حد هيبقى انى اموت على ايدها بالنسبالى رحمه
هند / مش وقت كلام اهبل لو سمحت انا مش فى المود للتخاريف دى
هند تبص الناحيه التانيه و تدارى دموعها مختار يتنهد
مختار / طلع سبت ارانب من جوه يا عبد الله لو سمحت
عبد الله يهز راسه و يجرى على الاوضه
مختار / حقك عليا
هند تبصله
مختار / كل ده مش هيحصل يا هند بس ما فيش ضرر لو امنا نفسنا ما حدش عارف الدنيا مخبيالنا ايه تفتكرى لو لا قدر الله حصل مش هتندمى ان كان عندك فرصه تتعلمى و انتى خفتى و ضيعتيها
هند / انت شرير اوى بجد
مختار / لو مش عاوزه خلاص انا ما عدش عندى حاجه اعلمهالك اكتر من كدا الباقى كله اننا نغير العلامات و انتى تفضلى تضربى لحد ما تضمنى ان كل العلامات هتيجي فى النص بعد كدا تحصيل حاصل قومى احطلك العلامه عشان نلحق الشمس قبل ما تغيب
مختار يروح يغير العلامه و عبد الله يجيب الارانب و يحط السبت فى الارض مختار يشاورله يروح يشيل قصاده مجرى العلامه المتحركه و يرجعوه الاوضه و يرجعوا مختار يمسك مسدس و يفتح الخزنه يتاكد انها مليانه
مختار / يلا يا هند و لا ايه ؟
هند باصه فى الارض تتنهد و تقوم تاخد المسدس
مختار / اضربى
هند / هضرب عليهم فى القفص ؟
مختار يهز راسه و يروح يفتح السبت و يطلع تلت ارانب و يحط كل واحد فى حته و يطلع جزر و خس و يوزعهم بشكل عشوائى بعيد عن الارانب و يروح يقف جنب هند و الارانب تبدا تجرى ناحيه الاكل
مختار / اضربى
هند تستنى اول واحد يثبت و تضربه الاتنين التانين يجروا
مختار / اضربى
هند تضرب التانى و هو بيجرى تجيبه
مختار / اضربى يا هند مستنيه ايه
هند تضرب التالت تجيبه
مختار / جدعه … يلا يا جماعه كفايا كدا النهرده
هند / هو الارانب دى هتروح فين ؟
مختار / الكلاب الليله هتاكل و تدعيلك يلا نروح
الكل يمشى و مريم تمشى جنب هند
مريم / انا كنت خايفه زيك كدا فى الاول
هند تبصلها
مريم / مره فى مره هتثقى فى نفسك و هتحاولى مره و اتنين و تلاته و هتجيبيها
هند / لو جراله حاجه
مريم / مش هيجراله حاجه ان شاء الله انتى بتعرفى تنشنى كويس
هند / ما حدش فاهمنى ما حدش حاسس باللى جوايا
مريم / والله حاسين و هو كمان حاسس على فكره … طب لو كان حد تانى اللى بيلف غير عمى كنتى هتضربى ؟
هند / ما اعرفش … بس اكيد برضه هخاف عليه برضه دا روح برضه
مريم / ما الارانب كانت روح برضه؟
هند / اقصد انسان يعنى
مريم / بس مش زى مختار مثلا ؟
هند / انتى عاوزه ايه يا مريم ؟
مريم / مش عاوزه خلاص
مختار و عبد الله يركبوا العربيه و مريم و هند يركبوا ورا و مختار يسوق و باين انه مضايق
………………..
فى سرايا الجوارحه
شاهين / و انا مش هكسرلك كلمه يا حج شاكر الخميس الجاى كتب الكتاب و الدخله و الاربع باذن الله الحنه
شاكر / ايوه بقى يا حج شاهين اهو ده الكلام دا الواحد ريقه نشف
ناصر / فراق البنات مش بالساهل يا عمى اسالنى انا عمال ياجل عشان تفضل جنبه
شاهين / والله ابدا بس انتوا عارفين تجهيزات الحريم ما بتخلصش و جيل اليومين دول ليهم حركاتهم برده و لا ايه يا عريسنا
عباده / والله يا حج انا مستعجل فالحاجات دى كلها دلوقت بالنسبالى ما لهاش تلاتين لزمه
شاهين / هههههههههههههههههه الله يحظك يا عباده على العموم يا سيدى من هنا للخميس مش بعيد تعال على نفسك الكام يوم دول يا سيدى
عباده / بتيجي عليا جامد والله يا حج بس هاجى على نفسى و اصبر عشان خاطرك انت بس
شاهين / هههههههههههههههههههههه هقولك حاجه مش عارف كنت تعرفها و لا لا ابوك ده ايام شبابى كان حلانجى زيك كدا برضه ما كانش حد يقدر يغلبه فى الكلام
شاكر / بقولك ايه يا حج شاهين هتسيحلى هسيحلك ما احنا دافنينه سوا
مغاورى / ايه يا سيد الحجاج انت ليك زكريات انا ما اعرفهاش و لا ايه
ناصر / ابوك دا سيد الناس احنا بنهزر مع بعضينا
شاهين / هههههههههههههههههههه هزرنا كتير نتكلم فى الجد بقى ما دام كلنا متجمعين … عملتوا ايه يا رجاله فى حوار اللى ما تتسما
مغاورى / كلمتها و قولتلها انى موافق اشتغل معاها بشرط لو اتعاملت معايا ما لهاش اى دخل بالزنايته انا زى الفريك ما ليش شريك و هاخد تلاته مليون دولار على كل تحويله
شاكر / و وافقت
مغاورى / وافقت طبعا … البتاع اللى بتعمله ده الدوا شكلها عملت منه كميه كبيره لو قدرنا نعرف هى مخزناه فين و اتمسكت متلبسه بيه يبقى خلصنا منها ليوم الدين
عباده / هو ده بالظبط اللى محتاجينك تشتغل عليه يا مغاورى الفتره الجايه انك تعمل كل اللى تقدر عليه انك توصل لمكان التخزين احنا مش بس عاوزين نخلص منها احنا عاوزين نمنعها انها توزع الحاجات دى جوه مصر
ناصر / اللى فهمته من مختار انها ما كانش نيتها تصنع فى مصر على قد ما كان هدفها تبيع جوه مصر يعنى لو ما طلعتش الحاجات دى بره هتبيعها هنا
شاهين / و انت الصادق هى كدا كدا هتبيع هنا اللى هيطلع ده فايض التصدير
شاكر / لما هتدفع تلاته مليون دولار عشان تطلع فايض التصدير بره على كدا اللى وزعته جوه بكام
شاهين / احنا هنتحرك فى كل الاتجاهات دى يا رجاله عاوزين نفتح عنينا فى كل حته عاوزين نعرف عنها كل اللى نقدر عليه عشان لما نتحرك نتحرك مره واحده و ما نديلهاش فرصه تهرب مننا و ما تنسوش ان ليها عنين فى الحكومه مش عاوزين نكرر غلطنا تانى
عباده / ما يتهياليش انها حاطه البضاعه فى الفيلا اللى هى قاعده فيها و لا ان ده حتى مكان التصنيع ما افتكرش انها غبيه لدرجه انها تحط البيض كله فى سله واحده
مغاورى / ما تنساش ان ده برضه احتمال وارد على اساس يعنى تركز الحراسه كلها فى مكان واحد بدل ما تفرق رجالتها
ناصر / احنا عاوزين نشتغل فى كل الاتجاهات و عاوزين لو قدرنا نزرع اى حد من رجالتنا عندها يبقى حاجه حلوه برضه
مغاورى / امال انا ايه
ناصر / لا ما اقصدش انا اقصد يبقى من رجالتها يبقى جوه الفيلا او اى مكان
شاهين / هى فكره حلوه بس خطره و الحد ده لازم نبقى بنثق فيه اوى
شاكر / ايه رايكوا فى عبد الرحمن ابن زكريا
ناصر / لا يا عمى عبد الرحمن ما لوش اى دعوه بشغلنا الحمد لله انه بره مصر اساسا
شاكر / عبد الرحمن صيدلى و اللى بيحضروا الادويه دى اكيد صيادله
مغاورى / او كيميائين ما المخدرات و الحاجات دى كلها كيميا برضه مش شرط صيدلى يعنى
شاهين / مش عاوزين نمسك فى الرفايع و نسيب الموضوع الرئيسي على قد ما هنجمع معلومات عن الحربايه دى هنحط خطتنا و نتصرف معاها
مغاورى / عاوزين نركز كمان اننا نعرف مين عينها اللى فى الحكومه الحوار ده هيسهل علينا كتير و يوفر علينا وقت و مجهود
عباده / و دا هتعرفه ازاى احنا بلغنا المحافظ و مفيش جديد هنعمل ايه اكتر من كدا احنا ما لناش سلطه على الحكومه
مغاورى / نفكر اكيد هنوصل لحاجه
شاهين / برده بقول كل اللى هنعمله واقف على المعلومات اللى هنقدر نعرفها يبقى رغى قليل و شغل كتير يا رجاله
عباده / اللى تشوفه يا حج شاهين
مغاورى / و انت هتعرف تعمل حاجه الشهر ده
عباده / خليك فى حالك يا ابنى و ما تنبرش فيها احنا ما صدقنا
الكل يبص لعباده و يضحك
……………………..
فى اوضه هند
هند و مختار ممديين على السرير بيتفرجوا على التليفزيون و هند بتقلب بالريمود مختار يقوم يروح يحط شويه مايه فى الكاتل و يشغله و يلقم كبايه شاى
هند / بتعمل ايه
مختار / شاى
هند تقوم تروحله
هند / طب ما قولتليش ليه اعملهولك
مختار / و انا يعني مش هعرف اعمل لنفسي كبايه شاى يعني
هند / انت زعلان منى ؟
مختار / عشان عملت لنفسي شاى !!!
هند / مختار
مختار / اقولك بلاها كبايه الشاى خالص انا هنام … ابقي وطى التليفزيون
مختار يروح ينام و يشد الغطا عليه و ينام هند تبصله و تطفى الكاتل و التليفزيون و النور و تنام و هى بتفرك و تديله ضهرها
……………………
فى اوضه عباده
عباده شغال على اللاب الباب يخبط
عباده / ادخل
سماح تفتح الباب
سماح / ادخل
عباده يقفل اللاب و يشاورلها تقفل الباب و تدخل
سماح / لو بعطلك عن حاجه امشي
عباده / لا تعالى يا ستى خير … مجيتك عندى ما بتحصلش كتير … خير
سماح / عاوزه انزل اشترى فستان حلو لفرحك من مصر المحل اللى جبنا منه لفرح مختار حاجته كانت حلوه اوى و منزل على الفايس فساتين تهبل
عباده / و ماله ايه المشكله
سماح / و بتسال قال يعني مش عارف
عباده / المحل ده بيفتح الحد
سماح / اه بيقفل الجمعه نص يوم بس
عباده / خلاص هاخدك و ننزل مصر نجيب اللى انتى عوزاه
سماح / بجد يا عباده
عباده / و انا هكدب عليكي يعني .. انا كدا كدا كنت هسافر اخلص حوار كدا بس مش دلوقت .. فالخيره فيما اختاره الله
سماح / حوار ايه ده
عباده / حاجات تبع الشغل انتى مالك انتى
سماح / حقك عليا مالك اتحولت كدا ليه
عباده / كلمى امك و شوفى لو هتيجي معانا او بمعنى تانى شوفى حد يجي معانا انا هوصلك المحل و اسيبك و اروح اخلص ورقي و ارجعلك
سماح / ورقك !!!
عباده / انا قولت بلاها و انا اللى جبت لنفسي وجع الدماغ
سماح / خلاص خلاص حقك عليا تمام
عباده / يلا روحى شوفى وراكى ايه كفاياكى عطله
سماح / ماشي و بتسال ما بتحصلش كتير ليه
عباده يبتسم سماح تبتسم و تمشي و تقفل الباب عباده يفتح اللاب تانى و يكمل تقليب فى موقع
………………….
فى اوضه هند
مختار نايم و هند مش عارفه تنام
هند / انا مش جايلى نوم … مختار انت نمت
مختار مديها ضهره و مش بيرد هند تهزه
هند / مختار
مختار / نعم
هند / مش جايلى نوم
مختار / اللعبى فى الموبايل و لا اقعدى على اللاب و لا ايدى التليفزيون بس وطي الصوت
هند / مختار قوم اقعد معايا
مختار / مش قادرلك يا هند عاوز انام و ورايا شغل الصبح
هند / مختار قوم انا
مختار يقوم و ينطر الغطا و يبصلها بغضب
مختار / نعم اؤمرى
هند تبصله و عنيها تتملى دموع
هند / مفيش .. نام
هند تمسك الموبايل و تفتح الفايس مختار يبصلها و ينام و يديها ضهره
هند / انا مهرى كان ايه يا مختار
مختار يقوم يقعد و هو بيتخلق
مختار / هو انا كلمتك ؟ هو انتى بتتلككى للمشاكل و خلاص
هند / احنا من ساعه ما جينا من الرمايه و انت ما بتتكلمش معايا
مختار / اتكلم فى ايه ؟؟ عاوز انام .. فين الجريمه فى كدا
هند / انا عاوزه اتكلم معاك
مختار / ماشي يا هند … اتكلمى سامعك
هند تفكر
هند / اتكلم انت
مختار / يا الله يا ولى الصابرين … انتى يا بنت الناس الطيبين مش قولتى عاوزه اتكلم
هند / يا سيدى تتكلم انت اتكلم انا نتكلم سوا يعني
مختار / لا اله الا الله و انا يا ستى ما عنديش كلام اقوله ممكن انام بقي
هند / اعملك الشاى اللى كنت عاوزه ؟
مختار / لا كتر خيرك هنام
هند / شوف بتكلمنى ازاى اصلا
مختار / هند … انا مش طايق نفسي فسبيني انام و ما تخلقيش المشاكل
مختار ينام و يديها ضهره
هند / انا عملت ايه لكل ده ذنبى انى بخاف عليك
مختار / دا انا انام فى المضيفه ارحم
مختار يقوم يلبس الجلابيه و هند تجرى تسد الباب بجسمها
هند / انت ما جبتنيش من بيت اهلى عشان تسبنى لوحدى و تمشي
مختار يقف قدامها و يهز راسه موافق و يروح يقلع الجلبيه و يعلقها و ينام و يشد الغطا عليه هند الدموع تنزل من عنيها تمسحها و تروح تقعد على السرير و تقلب فى صورها مع مختار و تعيط فى صمت
……………….
فى المطبخ وقت الفجر
فاطمه و الستات بيحضروا الفطار عيل يدخل
عيل / ام فاتن ام فاتن عمى مختار عاوزك
فاطمه / خير يعني دا حتى ست هند ما نزلتش لدلوقت
انتصار / حالا هنعرف
انتصار تطلع بره تلاقى مختار واقف
انتصار / خير يا ابنى فى ايه
مختار / هند نايمه فوق ما حدش يصحيها ممكن
انتصار / مش هتصلى الفجر
مختار / معلش يا ام فاتن انا هطلع من الصلاه على الارض ورايا شغل كتير النهرده هتعوزى منى حاجه
انتصار / لا يا حبيبي كتر خيرك … بس انا مش فاهمه حاجه هى كويسه طيب
مختار / سهرنا شويه زياده
انتصار / مريم حكتلى اللى حصل امبارح
مختار / و هو ايه اللى حصل امبارح يا ام فاتن بلاش تعملوا حوارات يلا بالاذن انا عشان يادوب اللحق
انتصار / ماشي يا ابنى
مختار يمشي انتصار تفتكر حاجه و تتكلم بصوت عالى
انتصار / نطلعلها تفطر طيب ؟
مختار يمشي قبل ما يرد
انتصار / قلبي مش مرتاح
انتصار تتنهد و ترجع المطبخ
فاطمه / امال فين ست العرايس
انتصار / نايمه بيقول تعبانه ما حدش يزعجها
فاطمه / اللى تلاقى دلع و ما تدلعش
فاطمه تمسح ايدها فى فوطه المطبخ و تطلع بره انتصار تجرى وراها
انتصار / على فين
فاطمه / مش واجب نطمن على العيانه دى
انتصار تلحقها و توقفها
انتصار / انتى هتجريني وراكى و لا ايه استنى هنا رايحه فين
فاطمه / انتى بتحابيلها ليه كل يوم تطلع فى حاجه شكل عشان ما تساعدناش و تقعد هانم فى البيت ده لو فاكره اننا خدامين اللى جابوها
انتصار / لمى لسانك و وطى صوتك انتى مالك و مالها حطاها فى دماغك ليه
فاطمه / انتى بتحابيلها ليه مشغلانا كلنا خدامين عندها ليه فيها ايه
انتصار / مش هرد عليكي انتى خلاص اتهبتلى
فاطمه / ان كانت هى تعبانه قراط انا تعبانه اربعه و عشرين مش هنجوز عيالنا عشان نخدمهم هم و مراتاتهم امال بنجوزهم ليه
انتصار / هو كان حد قالك اخدميها
فاطمه / خلاص يا ام فاتن شيلى المطبخ لوحدك انا كمان هطلع انام
انتصار / مش هتصلى
فاطمه / هصلى فى اوضتى و لا هى الصلاه اتفرضت علينا و هى لا
فاطمه تطلع فوق و انتصار بتضرب كف على كف
انتصار / ربنا يهديكي
انتصار ترجع المطبخ و فاطمه تطلع تقف قدام باب اوضتها و تبص على باب هند و تاخد نفس عميق و تروح تخبط على الباب ما حدش يرد ترزع على الباب هند تفتح
فاطمه / مش هتفطرى يا ست البنات
هند / لا شكرا
فاطمه / هى عينك وارمه كدا من قله النوم و لا من العياط لتكونوا اتخانقتوا
هند / لا من قله النوم سهرانين طول الليل امبارح فى حاجه تانى
فاطمه / ربنا يعنى سعيد بسعيده بس هنا يا حبه عيني البيت له نظام يعني تسهرى ما تسهريش اذان الفجر ياذن كل واحده تشوف اللى وراها
هند / و انا ايه بقي اللى ورايا معلش
فاطمه / مش هتحضرى لقمه جوزك مش هتاكلى براحتك اللى ياكل على درسه ينفع نفسه على الاقل انزلى حضرى اكل جوزك و لا احنا كنا جوزناه عشان نفضل نخدمه
هند / جوزى هيطلع من الصلاه على الارض مش هيفطر لما تبدؤا فى الغدى يبقي يحلها حلال ممكن انام بقي
فاطمه / و الصلاه
هند / هصليها فى اوضتى
فاطمه / طب ما دام كدا كدا صاحيه ما تنزلى تصلى معانا جماعه تحت
هند / مش قادره انزل و زى ما حضرتك شايفه انا فتحتلك بالبجامه عشان انزل هطلع عبايه و طرحه و اغير
فاطمه / اللبسي الاسدال يا اختى بلاش تماحيك
هند تبص الناحيه التانيه و تحاول تكتم جواها
هند / انا مش نازله و عن اذنك عشان عاوزه انام
فاطمه / انا هكلم امك تيجي تشوفلها حل معاكى
هند / و لا تكلميها و لا تتعبى نفسك انا ريحالها
هند ترزع الباب و تقفله بالمفتاح فاطمه تزعق
فاطمه / كتر خيرك يا متربيه … ادى ربايه بنات مصر … بترزعى الباب فى وشي … غورى اياكى روحه من غير رجعه … دا احنا نبدلك و نجيب ست سيدك … لتكونى فاكره نفسك حاجه … فوقى
هند تفتح الباب لابسه عبايه و طرحه و حاطه الشنطه على كتفها
فاطمه / ما القلع و اللبس ما طلعوش مشكله اهو و لا هو الصلاه اللى تقيله على اللى زيك
هند / مش هتعب نفسى فى الرد عليكي
هند تقفل الباب بالمفتاح و تيجي تمشى فاطمه تمسكها من ايدها هند تمسك ايد فاطمه و تلويهالها فاطمه تصرخ
هند / انا عمرى عمرى ما فكرت انى همد ايدى على الاكبر منى بس انتى بتفتكرى ان ادبى و اخلاقى ضعف منى و بتسوقى فيها يوم بعد يوم لما جبت اخرى
هند تزقها انتصار و الحريم يطلعوا
فاطمه / طلاقك على ايدى يا بنت الكلب يا انا يا انتى فى السرايا دى يا هند يا بنت شريهان
هند تسيبهم و تمشى
انتصار / هند … هند
هند ما تعبرهاش و تمشى
فاطمه / شوفتوا المتربيه شوفتوا بنت مصر اللى كنتوا طالعين بيها السما
انتصار / انتى مالك و مالها ايه اللى جابك هنا مش قولتلك سبيها فى حالها
فاطمه / حابيلها كمان حابيلها ما طبعا قله ادبها عليا و ضربها فيا جه على هواكى
انتصار / انا ما ليش كلام معاكى انا حطيت صوابعى العشره منك فى الشق
انتصار تروح اوضتها و مريم تجرى وراها تطلع عبايه سمره و تلبسها فوق هدومها
مريم / هو ايه اللى حصل يا اما
انتصار / ولعت ولعت و ما حدش هيعرف يطفيها
مريم / و انتى رايحه فين
انتصار / هرجعها قبل ما الموضوع يكبر اكتر هعمل ايه يعنى
مريم / و انتى عارفه راحت فين ؟
انتصار /و هى الغلبانه دى ليها مكان تانى تروحه هتروح عند امها هتروح فين يعنى
مريم / عارفه بس هو انتى عارفه عنوانهم فين يعنى
انتصار / لا ما اعرفش بس البلد كلها اوضه و صاله و اكيد حد من الغفر هيبقى عارف
مريم / اجى معاكى
انتصار / لا خليكي هنا جنب المجنونه التانيه و لا خشى اوضتك و اقفلى عليكي الباب اقفليه بالمفتاح اما نشوف الليله دى هتخلص على ايه
مريم تهز راسها و انتصار تطلع بره فاطمه تدخل عليها
فاطمه / اخر كلام عندى يا انتصار يا انا يا البت دى
انتصار / ما تقوليش كلام ما انتش قاده يا فاطمه عن اذنك
انتصار تسيبها و تمشى
فاطمه / شاهدين شايفين بتحابيلها و تقويها علينا ازاى بدل ما تجيبها من شعرها و تعلمها ما تمدش ايدها على الاكبر منها انا والله لولا انى عامله حساب لراجلها كنت وريتها بس انا عملت باصلى
مريم تبص للكل
فاطمه / روحى يا اختى اتجوزى اخوها يا اختى اتبطرى على سيد البلد و خدى اخوها يا اختى
مريم تسيب المكان و تجرى على اوضتها
فاتن / هو الموضوع كبر كدا ليه هو ايه اللى حصل
فاطمه / انا ما ليش كلام معاكوا الرجاله زمانهم جايين و كلامى معاهم البت دى ما عدلهاش عيش وسطينا بلا هم جت و جابت النكد و القرف فى رجليها
الكل يبص لبعضه فاطمه تسيبهم و تنزل تحت
فاتن / ولعت و الحمد لله
سماح / هند اللى غلطانه ازاى تمد ايدها على الاكبر منها
فاتن / و ايه اللى طلع امك اوضتها
سماح / بتصحيها فىها ايه يعنى
فاتن / انا ما اعرفش اللى حصل و حتى لو اعرف ما ليش اتكلم انا هنزل اكمل غرف زمان الرجاله على وصول هنقولهم ايه
سماح / هنقولهم اللى حصل هنقول ايه يعنى و بعدين امى معاها حق الناس دى خدت اكتر من قيمتها لما اتمرعوا علينا هو فى حد فى الدنيا يستجرى يعمل اللى بيعملوه
فاتن / ربنا يصلح الحال عن اذنك
فاتن تشاور للباقين يمشوا و سماح واقفه مبسوطه
………………………..
فى شقه عبد الله
هند واقفه فى اوضه مامتها بتتكلم فى التليفون و هى مضايقه و عماله رايحه جايه و صوتها عالى و متعصبه
هند / يعنى ايه اللى ودانى يجيبنى
مختار / يعنى مش كفايا اللى عملتيه سبتى البيت من غير اذن و مشيتى
هند / يعنى بعد كل ده و انا الغلطانه
مختار / ما استنتنيش ليه ما كلمتنيش ليه
هند / و انت يعنى بترد عليا بتكلمنى يعنى
مختار / و ما دام انا ما ليش لزمه بتكلمينى دلوقت ليه هاه
هند / عشان انا حماره و ما بفهمش
هند تقفل السكه و تحدف التليفون فى الارض و تقعد على السرير تعيط شيرى تدخل و فى ايدها الموبايل
شيري / كلمت اخوكى و جاى فى الطريق كلمتى مختار
هند / بيقولى اللى مشاكى يرجعك
شيري / و عنده حق الله يكون فى عونه موقفه زى الزفت فى وسط اهله دا زمان السرايا والعه و الكل ماسك فى بعضه
هند تبص لشيرى
شيري / يعنى ما كنتيش قادره تتحكمى فى اعصابك يعنى
شيري تقعد و تبص بعيد و تكلم نفسها بصوت عالى
شيري / و انا اللى روحت اكلم عبد الله اقوله اللحقنى اختك جايه معيطه يلحقنى ايه ؟ دا عبد الله محتاج اللى يلحقه هيعمل ايه يعنى الغلبان دا بيشتغل عندهم و خاطب بنتهم ما فكرتيش فى اخوكى يا هند
شيري تبص لهند تلاقى هند بصالها و عنيها واسعه و مصدومه شيري تبص فى الارض
شيرى / حقك عليا ما كانش قصدى
جرس الباب يضرب شيري تقوم تقف
شيري / طب ايه رايك ان قلبى بيقولى ان ده مختار … هروح افتحله
شيري تروح تفتح تلاقى انتصار
انتصار / هند هنا ؟
شيري / ليها مكان تانى تروحه ؟
انتصار / بيتها موجود هى فين
شيري / اتفضلى جوه قاعده بتعيط
انتصار تدخل تجرى على الاوضه هند تشوفها تقوم تقف
انتصار / ينفع الدوخه دى تجرينى وراكى كدا ما حدش علمك ان الست ما تسيبش بيت جوزها
هند تبص الناحيه التانيه
انتصار / قومى روحى معايا قبل ما مختار يروح و ما يلاقيكيش فى البيت و المواضيع تكبر
هند / انا قولت لمختار انى هنا ما تقلقيش
انتصار / كلمتيه ؟ قولتيله اللى حصل
هند / الحمد لله ما احتجتش احكى حاجه كان عارف و فى الطريق للبيت
انتصار / هيجي يعنى ؟
هند / و هو دا بيته ؟
انتصار / لو مش بيته يبقى مش بيتك انتى كمان مكانك مكان ما يكون جوزك
هند تبص فى الارض انتصار تمسك ايد هند و يقعدوا على السرير هند تبصلها و شيري واقفه عين هنا و عين هنا
انتصار / البيوت ياما بيحصل فيها و بينى و بينك فاطمه ما تتعاشرش بس هى والله هبله و اللى مطلع عينها و عين كل اللى حواليها هبلها دا هو
هند / ما افتكرش ان المشكله كانت فى فاطمه المشكله كانت فيا انا انا اللى السكينه كانت سرقانى ما كنتش شايفه الدنيا صح
انتصار / و شوفتيها دلوقت ان شاء الله
هند / انا عاوزه اطلق
شيري / بتقولى ايه يا هند
انتصار / الكلمه دى ما تقوليهاش تانى طلاق ايه اللى بتقولى عليه طب خلى واحده غيرك تقول الكلام ده
هند / ليه يعنى ما لى
انتصار / بتحبى يا هند بتحبى و بتحبى واحد بيموت فى التراب اللى بتمشى عليه يعنى لا هتقدرى تبعدى عنه و لا هيقدر يبعد عنك بصى يا بنتى اللى حصل ده شيطان و دخل بينكوا و دا بيحصل و بيحصل اكتر من كدا كمان بس انتى عاقله ما تهديش بيتك فى لحظه عند
هند / مين اللى بيعند انا و لا هو
انتصار / و ايه دخل مختار فى حوارات الحريم بس
هند / انا هناك ليه مش عشان انا مراته انا ليا مين وسطيكوا مش هوا
انتصار / اخص عليكي بقى السرايا باللى فيها ما لكيش فيها غير مختار
عبد الله يدخل و هو بينهج
عبد الله / فى ايه ؟ ايه اللى حصل ؟ … السلام عليكم
انتصار / و عليكم يا حبيبى جيت فى وقتك تعال وقفلنا تاكس يروحنا بقى
عبد الله / يروحكوا فين؟؟ مش افهم الاول … ايه اللى حصل يا هند ؟
انتصار / قفشت مع ام عباده حوار حريم ما تشغلش بالك بيه
عبد الله / هند
هند بتبص فى الارض
عبد الله / مالك يا هند
عبد الله يروح يقعد جنب هند الناحيه التانيه يشد ايدها بالراحه تبصله و تعيط
انتصار / ما تكبريش الدنيا بقى يا هند
تليفون انتصار يرن تطلعه و تبص فيه
انتصار / عاجبك كدا اهو الكبير بيتصل اقوله ايه بقى انا دلوقت
انتصار ترد
انتصار / ايوه يا خويا
ناصر / انتى عند هند
انتصار / اه انا معاها اهو هاجيبها و اجى اهو روح انت شوف اللى وراك
ناصر / عبد الله عندك
انتصار / اه هنا جه على ملا وشه يا حبه عينى
ناصر/ اديهونى
انتصار / ثوانى
انتصار تناول عبد الله التليفون
انتصار / الكبير
عبد الله ياخد الموبايل و يرد
عبد الله / السلام عليكم
ناصر / و عليكم السلام يا عبد الله … انا فى السرايا هات هند و تعال انا مستنيكوا
عبد الله / معلش يا كبير مش هينفع لو حضرتك عاوزنى انا هجيلك طبعا لكن هند لا
ناصر / دا بيتها يا عبد الله
عبد الله / ما كانتش هتسيبه لو كانت حست بكدا
ناصر / مختار عاوز يكلمك
عبد الله يسيب المكان و يطلع بره
مختار / ايوه يا عبد الله
عبد الله / انا لحد دلوقت مش فاهم حاجه فلو سمحت تعال
مختار / هات هند و تعال يا عبد الله
عبد الله / تعال خدها
مختار / انا ما غضبتهاش عشان اجى ارجعها
صمت
عبد الله / انت عارف انى بحبك صح
مختار / و انا كمان بحبك
عبد الله / بس انا مش هينفع ارجعها … ما ينفعش تجيلى و ارجعهالك غصب عنها اقولها ايه ما لكيش مكان تروحيه ما لكيش حد ارضى بوضع مش عاجبك
مختار / يا عبد الله ما تكبرش الموضوع
عبد الله / اختى فى بيتها معززه مكرمه عاوزها تعال خدها و دا اخر كلام عندى خد طنط ام فاتن معاك
عبد الله يدخل و يدى التليفون لانتصار
انتصار / ايوه
عبد الله يروح يقعد و يطبطب على اخته
انتصار / ماشي لا اله الا الله سلام
انتصار تقفل
انتصار / الناس كلها فى البيت يا هند و هيبعتولنا عربيه تاخدنا
هند تبص فى الارض
عبد الله / مختار عاوزنى اجيبك قولتله هتقعدى هنا لحد ما تهدى
انتصار / جرا ايه يا عبد الله مش هتعمل اعتبار لمجيتى و لا ايه
شيري / ما تقوليش كدا يا اختى
انتصار / هند … انتى عارفه غلاوتك لو فى زعل بينك و بين مختار تحلوها بينكوا بعدين انما دلوقت هتيجي معايا عشان نحل حوارك انتى مع فاطمه ما تصغريش جوزك قدام اهله و لا انتى ايه رايك يا شيريهان يا اختى
شيرى / والله اللى تشوفيه ما فيش كلام بعد كلامك
عبد الله / لو عوزانا نيجي معاكى هنيجي
انتصار / تنورونا بس والله الموضوع ما مستناهل و كان هيتحل فى كلمتين لولاش بس غضبان هند يا بنتى انتى لو ليكي حق غضبانك ده هيضيعه
هند باصه فى الارض و الكل ملموم حواليها
انتصار / ها يا بنتى قولتى ايه دا انا جيالك لحد عندك هترجعينى مكسوره الخاطر ايد ورا و ايد قدام
هند تبص لانتصار
………………………..
فى السرايا
ناصر واقف مع مختار فى الجنينه
ناصر / انا جبتك هنا بعيد عن الجنان اللى جوه لحد ما يهدوها
مختار / جتلها على الطبطاب
ناصر / بتحصل بتحصل … ياما بيحصل فى البيوت انت نسيت خناقتها الكبيره مع ام فاتن و لا ايه
مختار / مش ناسي بس هند مش ام فاتن و لا انا انت
عباده يطلع من جوه و هو بينفخ
ناصر / قلبى عندك
عباده / ما انا عارف بختى لازم حاجه تحصل على فرحى لازم
ناصر / ههههههههههههههههه ما علش هتعدى زى غيرها
عباده / مش باين امى حلفت يا هى يا هند فى البيت
ناصر / ما ياما حلفت هى اول مره تتخانق مع حد يعنى
عباده / لا يا كبير بس كل مره كانت خناقه بالالسنه اول مره توصل لمد الايد جرا ايه يا مختار انت بتسهر تمرن هند فى الجيم عشان فى الاخر تضرب امى
مختار / مش هرد عليك
ناصر / بيهزر معاك
مختار / عن اذنكوا
ناصر / على فين يا ابنى
مختار / هروح اجيب هند
مختار يروح يركب العربيه الغفير يفتح البوابه و لسه هيطلع من البوابه بوز العربيه يفرمل قدام عربيه تانيه بابها يتفتح و انتصار تنزل منها
انتصار / على فين يا مختار
مختار ينزل من العربيه عبد الله و هند و شيرى و ياسمينا ينزلوا
انتصار / روحى اللعبى مع اخواتك فى الجنينه الورانيه يا حبيبتى
ياسمينا تجرى على الجرينه الورانيه و هند و مختار عنيهم فى عنين بعض هند تبص الناحيه التانيه
انتصار / هند عملتلى خاطر و رجعت معايا تعالى يا هند
عبد الله يسلم على ناصر و يبص لعباده
عباده / سلم سلم
عبد الله يسلم
ناصر / تعالوا جوه مش هنتكلم قدام الغفر و الجناينيه
الكل يدخل جوه و مختار يتاخر يدخل جنب هند
هند / انا جيت عشان خاطر ام فاتن على فكره
مختار / لينا اوضه نتكلم فيها
الكل يدخل السرايا
شاكر / يا فاطمه استهدى بالله الا حتى ما ورمت و لا ازرقت
فاطمه / لو سمعت كلامى و عملنا الاشعه هتلاقي كسر دا انا مش قادره احركها
فاطمه تشوف هند
فاطمه / عملتى اللى فى دماغك و رجعتيها برده يا ام فاتن
انتصار / بيتها زى ما اهو بيتك و الرك على اللى بدء بالغلط يا ام عباده
فاطمه / لا و انتى الصادقه الرك على التربيه
شاكر / فاطمه
فاطمه / فاطمه ايه اللى تمد ايدها على الاكبر منها
شيرى / و اللى تحط عقلها بعقل الاصغر منها تبقى ايه يا ام عباده
فاطمه / و هى مين دى اللى احط عقلى بعقلها
انتصار / روحتيلها الاوضه ليه مع انى منبهه عليكى ما لكيش دعوه بيها
فاطمه / قولتى تعبانه طلعت اطمن عليها
انتصار / يا شيخه اتقى الله ليتردلك فى بنتك
ناصر / طب ما دام هتقضوها حريم فى بعضيكوا سيبتونا اشغالنا ليه و نازلين ردح لبعض فى وجودنا
فاطمه / انا ما اتكلمتش انا ناديتلكوا تجيبولى حقى انا عملت حساب ليكوا و ما رديتلهاش اللى عملته فيا
هند / و فين حقى فى اللى بتعمليه فيا من يوم ما جيت البيت
فاطمه / انا كلمتك و لا جيت جنبك
شاكر / بتعمل فيكي ايه يا هند
هند / طول الوقت تلقيح كلام و مضايقه و حطانى فى دماغها
شاكر / و دا يديكى الحق تلويلها دراعها بالشكل ده
هند / ربنا شاهد ان هى اللى بدات انا كنت رد فعل مش اكتر
شاكر يبص لفاطمه
فاطمه / بتحلفى بالله دا انتى هتتشوى فى نار جهنم
هند / هخاف منك و لا ايه اه نسيت ما انتى هتبدلينى و تجيبى ست سيدى مش دا كلامك برده
ناصر / هنسيب اللى ورانا و اللى قدامنا و نفضى لشغل الحريم ده يعنى … اعتزرى لمرات عمك يا هند
عبد الله / يعنى ايه ؟
ناصر / الاتنين هيراضوا بعض بس الاصول بتقول ان الصغير يبدا و هند سيد من يفهم فى الاصول يلا حلوها بقى خلونا نشوف اشغالنا
هند تبص لمختار مختار باصص للناحيه التانيه تبص لفاطمه
هند / حقك عليا
فاطمه / ماشى
هند / دورك
فاطمه / انا كلمتك و لا عملتلك حاجه على العموم يا ستى من النهرده ما ليش دعوه بيكي ان شوفتك بتفرفرى قدامى حتى مش هعبرك
هند / ياريت يبقى عداكى العيب و ازح
انتصار / كان من الاول و خلصنا يلا يا اختى انتى و هى على المطبخ عشان نحضر الغدى كفايا العطله دى كلها
البنات يتحركوا ناحيه المطبخ
ناصر / يلا يا عمى و لا ايه
شاكر / يلا
الكل يمشى و يفضل عباده و شيرى و عبد الله و هند و مختار و انتصار
عبد الله / لو مش هتعوزى منى حاجه يا هند هروح الشونه عشان اتاخرت
هند / حقك عليا عطلتك
عبد الله / امشى يا مختار
مختار / تعال هوصلك و هعدى اخدك نتغدى سوا
شيرى / خدونى فى سكتكوا انا و ياسمينا
عباده / ما تصغريناش يا ست الكل و لا انتى لسه واخده على خاطرك من اللى حصل والله امى طيبه و غلبانه هو بس البوقين دول حلاوه روح مش اكتر
شيري / لا يا ابنى البيوت ياما بيحصل فيها
مختار / خلاص يا امى خليكوا النهرده اتغدوا معانا
هند تمسك فى ايد شيرى
شيرى / ماشى
انتصار / اطلعوا ريحوا فى اوضه هند و انا هناديكوا لما نخلص
شيرى / لا انا هاجى اساعدك
انتصار / والله ما يحصل و بعدين انا عوزاكى تتكلمى مع هند و تنصحيها تعلميها ازاى تتعامل فى المواقف اللى زى دى
شيري / جبتك يا عبد المعين دا مفيش اخيب منى
انتصار / ههههههههههههههههه الله يحظك يلا اطلعوا ارتاحوا ما تعطلوش الرجاله اكتر من كدا
هند تبص لمختار و تبص الناحيه التانيه شيري تبتسم و تمسك ايد هند و يطلعوا فوق
انتصار / انا رايحه المطبخ
انتصار تمشى
عبد الله / انت بجد مش زعلان من اللى حصل
عباده / مضايق طبعا بس هعمل ايه يعنى حريم فى بعض و انا متاكد ان الموقف مش هيتكرر تانى مش كدا يا مختار
مختار يبتسم و يهز راسه
مختار / يلا يا عبد الله
مختار و عبد الله يمشوا و عباده يمشى وراهم و هو بيضرب كف على كف
……………………..
فى الصيدليه الجديده
راجل يدخل
الراجل / السلام عليكم يا ابن عمى
الصيدلى / و عليكم السلام اتفضل يا ابويا اؤمر
الراجل / لو سمحت كنت عاوز الدوا اللى فى الورقه دى
الصيدلى / لا الف سلامه عليك يا والدى دا مين اللى كاتبلك الدوا ده
الراجل / الدكتور عادل الخواجه
الصيدلى/ اه بس دا كاتبلك دوا غالى اوى يا حج
الراجل / ما حدش بيستخسر فى صحته يا دكتور دا هى اللى شيلانا
الصيدلى / انا عندى بدايل ارخص بكتير و نفس الماده الفعاله و يمكن اقوى كمان
الراجل / كتر الف خيرك بس انا عاوز العلاج اللى الدكتور كاتبه فى الورقه
الصيدلى / انا عامل عليك يا ابويا
الراجل / يا ابني ما تعطلنيش احنا ورانا اشغال لو ما عندكش الدوا قولى و انا اجيبه من حته تانيه
الصيدلى / لا ازاى عندى ثوانى
عيل يدخل و شايل علبه دوا و روجته
العيل / امى بتقولك الدوا ده جه بالغلط و مش مكتوب فى الورقه
الصيدلى ياخد العلبه
الصيدلى / ازاى ده وريني كدا
الصيدلى يبص فى الروجته
الصيدلى / اه فعلا ثوانى
الصيدلى يفتح الدرج و يدى للولد فلوس و ياخد العلبه
الصيدلى / ثوانى يا والدى اجبلك العلاج
الراجل / ماشي بس بسرعه الله يباركلك
الصيدلى يجيب العلاج
الصيدلى / الدوا ده مرتين فى اليوم بعد الاكل
الراجل / ما تتعبش نفسك يا دكتور انا عارف كل واحد هيتاخد ازاى
الصيدلى / عشان ما تتلخبطش بينهم
الراجل / و انت فاكرنى جاهل و لا ايه دا ابنى فى تالته حقوق و بكره يبقي محامى قد الدنيا
الصيدلى / العفو يا والدى اتفضل الحساب ربعميه خمسه و تلاتين
الراجل يطلع المحفظه
الراجل / اتفضل يا ابني
الراجل ياخد الفلوس و يمشي تليفون الصيدلى يرن
الصيدلى / ايوه يا باشا
المعلم / مش هتسمعنا اخبارك الحلوه يا دكتور
الصيدلى / والله نفسى بس اعمل ايه بس ان ما كانش الدوه فى الروجيته ما ياخدوهوش ريقى نشف و انا بقنعهم ان الادويه ليها بدايل دا انا حتى فكرت احط علبه بدل علبه ابدا
المعلم / و اخرتها يا دكتور ايه هنرفع الرايه من اولها و لا ايه
الصيدلى / والله انا بحاول على اخرى
راجل يدخل
الصيدلى / هكلمك بعدين معايا شغل
الصيدلى يقفل
الصيدلى / اؤمر يا ابن عمى
الراجل / عاوز العلاج ده ربنا يرحم والديك
الصيدلى / عنيا يا ابن عمى
الصيدلى يجيب الادويه و يمسك علبه من جنب و يشيل الشريط و يحط شريط تانى و يديها للراجل
الصيدلى / حبايه كل اربعه و عشرين ساعه
الراجل / كتر الف خيرك يا دكتور
الصيدلى / خمسه و تلاتين
الراجل يطلع الحساب و يحاسب
الراجل / سلام عليكوا
الراجل يمشى
الصيدلى / على الله تصيب بقى المرادى و نخلص
……………………..
فى فيلا فيرا
المعلم / انا نفذت تعليماتك بالحرف اعمل ايه اكتر من كدا دا ما عدش فاضل غير انى امسك الناس دى واحد واحد و افتح بقهم بالعافيه و احط الحبوب
فيرا / و ايه اللى منعك يا معلم
المعلم يستغرب
فيرا / فى مثل مصرى سمعته قريب و عجبنى اوى بيقول اسعى يا عبد و انا اسعى معاك يعنى حاول و ربنا اكيد هيوفقك انت مش مؤمن بربنا و لا ايه يا معلم
المعلم / استغفر الله
الراجل يبصلها باستغراب
المعلم / ما تاخذينيش يا ست الستات بس انا فى حاجه محشوره فى زورى
فيرا / و ساكت ليه يا معلم ما تقول و لا الحاجه دى هتضايقنى
المعلم / و احنا نقدر على زعلك يا جميل انا بس مش فاهم انتى حاطه البلد دى فى دماغك ليه دا احنا الحمد لله عاملين شغل عالى اوى فى حتت تانيه كتير دا انا حتى امبارح رفعت السعر فى اسكندريه و الناس لسه بتشترى
فيرا / انا مش هلف و ادور و هكون صريحه معاك عشان تقدر تستمر فى مكان و تبنى امبراطوريه قويه فيه لازم بطريقه او بالتانيه تقصى المنافسين
المعلم / بس البلد دى نضيفه و ما فيهاش مخدرات خالص دا حتى اللى بيشرب سجاير بياكلوا ودانه لحد ما يبطلها اصل صحتهم هى راس مالهم
فيرا / مهو اللى مخلى البلد دى نضيفه يا معلم لما يخلص على مشاكل البلد كلها هيدخل فى الحتت اللى حواليها و الخوف الاكبر لا الحتت اللى حواليهم تقرر تقلدهم ساعتها هنعمل احنا ايه بقى
المعلم / طب ما انا قولتلك اطحنها و احطها فى السكر
فيرا / انا تاجره مش سفاحه و دا دوا يعنى لازم يتاخد بجرعه محدده لو واحد حط لنفسه سبع معالق سكر ممكن يموت يا معلم دا لو معلقه واحده لعيل صغير اقل من اتناشر سنه هيموت و لو واحد مات يا معلم الكل هياخد باله و هنفتح على نفسنا فواتيح احنا فى غنا عنها
المعلم / انا غلبت معاكى انا عن نفسى محقق التارجت بتاعى فى كل حته محقق ايه انا معديه بمراحل انتى اللى راكبه دماغك بقى على ام البلد الفقر دى و ادينى بحاول اصبرى بقى
فيرا / هصبر طبعا و انا ورايا ايه خد وقتك انا ما يهمنيش هتوصل للنتيجه امتى المهم توصلها
المعلم / ادىنى شغال بايدي و سنانى
فيرا / يبقى هتوصل ما دام بتحاول يبقى هتوصل يا معلم ما تقلقش
………………………….
فى اوضه هند
هند قاعده على السرير بتعيط و شيرى جنبها
شيرى / طب جينا ليه ما دام هتقضيها عياط
هند / كنت اقولها ايه يعنى
شيرى / يعنى هاخدك معايا و انا مروحه و لا هتعملى ايه
هند / تاخدينى معاكى !!
شيري / مش احسن ما اسيبك هنا و ارجع بكره الاقيكى عامله مصيبه تانيه و لا مسكتى فى مختار
هند / تعباكى معايا معلش اصلى نكديه بتلكك للمشاكل
شيرى / مش قصدى بس انتى مش فى المود و مش عارفه تسيطرى على مشاعرك و انفعالاتك يا بنتى كل ده ليه
هند / ما تساليه هو اياكش كنت ضربت عليه النار و جت فيه يمكن كان ارتاح
شيرى / بعد الشر
هند / شوفتيه و هو بيقولى اللى وداكى يجيبك شوفتيه و هو ساكت تحت و انا واقفه لوحدى وسطيهم
شيرى / الشهاده لله ما كنتيش لوحدك
هند / بس هو ما كانش معايا … مش ده اللى وعدنى بيه
شيرى / مهو معزور برده يا بنتى الواد فى موقف لا يحسد عليه هيقف لعمه اللى اكبر من ابوه و لا هيعمل ايه جوزك متربى هى اللى حربايه
الباب يخبط
شيرى / مين
صوت عيل / الغدى جاهز
شيرى / ثوانى
هند / انا مش عاوزه انزل و لا احتك بحد انا مخنوقه و اللى فيا مكفينى
شيرى / خلاص خليكي و انا هقولهم انك نايمه بس هتقعدى من غير غدى يعنى
هند / اصلا ما ليش نفس
شيرى / اعملى اللى يريحك بس مهما حصل ما تخليش حد يركبك الغلط تانى عشان مش كل مره هيقفوا معاكى و هيجي عليهم وقت و يقولوا لا بقى دى بتاعه مشاكل
هند تهز راسها
شيرى / هعزم مختار بكره على الغدى عدى النهرده على خير و بكره هيجيبك و يجي ماشى
هند / ياريت
شيرى تقوم و تبوس راسها و تطلع بره و هند تقفل الباب و شيرى تنزل تحت تلاقى انتصار شايله سيرفيس كبير
انتصار / امال هند فين
شيري / هاتى عنك اساعدك
انتصار / ما تتعبيش روحك دى خفيفه عملتلك الحمام الكداب اللى بتحبيه
شيرى / تسلم ايدك هاتى اساعدك
شيرى تشيل الصينيه و تدخلها تحطها على السفره تلاقى الرجاله قاعدين
عباده / لا دا مشوار صد رد يعنى مش محتاجه
مختار / ازاى يعنى مش بتقول هتسافروا النهرده بالليل عشان توصلوا على الصبح تاخدوا اليوم من اوله هتسوق ازاى و انت راجع باتوا هناك و بعدين ارجعوا بكره الصبح فى النور
عباده / سبها لله لو خلصوا بدرى هغفل ساعتين تلاته قبل ما العوده لو اتاخروا يبقى هنبات و امرنا لله
شاكر / كدا حتى لو كانوا هيخلصوا بدرى هيتاخروا
الكل يضحك
ناصر / والله جايه فى وقتها اهو الدنيا تهدى شويه بعد اللى حصل
شيرى / بقولك يا مختار
مختار يبص لشيرى
شيرى / اعمل حسابك انت و مريومتى عندى بكره على الغدى باذن الله دا بعد اذنك يا حج ناصر طبعا
ناصر / هتستاذنينى فى ايه يا ست الكل دا انا اوصلهملك بنفسى لحد عندى
شيرى / يكرم اصلك
الستات تدخل شايلين صوانى يحطوها و يقعدوا و انتصار تبدا تقسم
مختار / هى هند مش نازله و لا ايه
فاطمه / تلاقيها مقموصه
شيرى / هند تعبانه و نايمه ما فصلتش عياط من ساعه ما جتنى و لحد ما راحت فى النوم فوق
فاطمه / ابقى طلعيلها اكلها يا سماح دى على لحم بطنها من الصبح و لا كلت عندك ؟ و لا و انا مالى انا واخده قرار ما ليش دعوه بيها بعد كدا
شيرى / ياريت
فاطمه تبص لشيرى و ترفع حاجبها
شيرى / هى ياسمينا فين صحيح
انتصار / ما تقلقيش عليها اكلناها مع العيال و بتلعب مع البنات فى الجنينه
شيرى / تسلمى يا حبيبتى ما اتحرمش منك
انتصار و شيرى يبتسموا لبعض و شيرى تبص لفاطمه فاطمه تعوج بقها و تبص الناحيه التانيه و الرجاله متابعه و بتاكل فى صمت و مختار بيلعب فى الطبق و مش بياكل
…………………………….
فى اوضه هند
مختار يفتح الباب يلاقى هند بتطلع غيار من الدولاب
مختار / بتلمى هدومك و لا ايه
هند / هاخد دوش لو عاوز الحمام هو فاضى دلوقت
مختار / لا كتر خيرك خدى راحتك
هند تقفل الدولاب و تدخل الحمام تقفل الباب بالمفتاح مختار يغير هدومه و يقعد على السرير و يشغل التليفزيون الباب يخبط يتنهد و يقوم يفتح يلاقى انتصار
انتصار / ادى الطبق ده لهند حبيبتى ما اكلتش حاجه من الصبح
مختار / التلاجه مليانه فاكهه و حلويات يعنى ما تشغليش بالك انتى اوى
انتصار / اتقى الله و دا يبقى اكل برده
مختار / ههههههههههههههه انتى حماه مين فينا ؟
انتصار / انا سلفتها اه بس عندى ولايا و اللى يقدم السبت يلاقى الحد يا ابن الزنايته
مختار / بنت اصول من يومك
انتصار / يلا اسيبك بقى لحسن تقول عليا عزول و لا حاجه فتك بعافيه
مختار / ههههههههههههههههههه
انتصار / فتك بعافيه
انتصار تمشى و مختار يدخل و يقفل الباب بالمفتاح و هو مبتسم يخبط على هند فى الحمام ما بتردش
مختار / ام فاتن بعتتلك منابك
مفيش غير صوت المايه
مختار / هند
مختار يفتح الباب مقفول بالمفتاح
مختار / هند
هند / نعم
مختار / ما بترديش ليه قلقتيني عليكي و قافله الباب بالمفتاح ليه
هند تفتح المفتاح لابسه برنص و بتلف شعرها بالفوطه
هند / انت مش قولت مش هتحتاج الحمام
مختار / انا مش عاوز الحمام انا قلقت عليكي
هند / انا كويسه لو مش هتعوز الحمام هستاذنك ادخل اكمل لبس
هند ما تستناش مختار يرد و تدخل تقفل الباب بالمفتاح مختار يروح يقعد على السرير و يكمل تقليب فى التليفزيون ثوانى و هند تطلع من الحمام لابسه بجامه و لفه شعرها بالفوطه تروح تنام فى السرير و تدى لمختار ضهرها
مختار / انتصار بعتتلك منابك
هند / مش جعانه شكرا لو مش هتاكله حطه فى التلاجه
مختار / طب ما تحطيه انتى
هند تتعدل و تبصله و تقوم تفتح التلاجه و تحط الطبق و ترجع تنام و تستغطى
مختار / بخصوص اللى حصل النهرده
هند / خليها وقت تانى انا مش قادره اتكلم خالص النهرده
مختار / انتى شايفه كدا ؟
هند / لو سمحت يا مختار
مختار / بشوقك
مختار يقوم يلبس هند تقعد و تبص عليه
هند / رايح فين ؟
مختار / هقعد مع اهلى نامى انتى و ارتاحى
مختار يمشى و يقفل الباب وراه هند تربع
هند / لا و مش مستعنى يصالحنى حتى ماشى يا مختار .
………………..
فى الجنينه
سميحه و فاطمه بيركبوا ورا و شاكر بيتكلم مع عباده
شاكر / لما توصل طمنى و خد بالك منهم
عباده / ما تقلقش فى عنيا
امين يطلع من السرايا بيجرى
امين / استنوا انا جاى
عباده / جاى تعمل ايه
امين / يا عم انت مش كدا كدا رايح مصر خدنى معاك هتخسر ايه يعنى
عباده / اركب يا خويا ما احنا طالعين رحله
امين / امال طالعين تحاربوا
امين يركب جنب عباده
شاكر / مصلحه اهو يصحصحك فى الطريق و تبدلوا السواقه سوا و تريحوا بعض
عباده / تمام نمشى بقى عشان نلحق
شاكر / بالسلامه

يتبع…

لقراءة الفصل التالي : اضغط هنا

لقراءة الرواية كاملة اضغط على : (رواية البر التاني)

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى