رواية المتعة الحرام الجزء الثاني الفصل الحادي عشر 11 بقلم عادل عبدالله

رواية المتعة الحرام الجزء الثاني الجزء الحادي عشر

رواية المتعة الحرام الجزء الثاني البارت الحادي عشر

رواية المتعة الحرام الجزء الثاني الحلقة الحادية عشر

الضابط : طيب يا وائل انت هتفضل معانا لبكره الصبح وبعدها هتتعرض علي النيابة تاخد اقوالك .
وائل : يا فندم انا مليش علاقة بالموضوع ده اكيد جوزها هو اللي ورا اختفائها ده ويمكن يكون قتتلها لما عرف انها خانته .
الضابط : كل حاجة هتبان .
بعدها نادي الضابط علي العساكر واخذوا وائل وادخلوه ” نفس الحجز اللي موجود فيه سامي ” !!!!!!
سامي قعد طول الليل في الحجز مش بيتكلم مع حد ومش بيعمل اي حاجة غير انه بيولع سجاير وبيفكر .
سامي كان بيفكر في حاجات كتير ، بيفكر في سلمي وسليم اللي لأول مرة هيقضوا الليلة بعيد عن امهم وابوهم !! بيفكر لو النيابة مش اقتنعت بكلامه هيكون مصيره اي ؟! وهيفضل في الحجز أد اي ؟ بيفكر لو سهام حصلها حاجة هل هيقدر يثبت انه برئ ومش له علاقة بأي حاجة تحصلها ؟
الف سؤال وسؤال بيدوروا في رأسه وتفكيره طول الليل للصبح !!!
وائل لما دخل الحجز كان في قمة الغضب وطول الليل في مشاجرات مع المحبوسين في الحجز .
لم يظن ابدا سامي أن وائل ذلك الرجل الذي حاول البحث عنه كثيرا لا يفصله عنه الا بعض سنتيمترات قليلة !!!
ايضا لم يشك وائل لحظة واحدة ان زوج سهام عشيقته والتي تسببت في سجنه من قبل يجلس بجواره في نفس الزنزانة بين اربعة جدران !!!
وفي الصباح تم اقتيادهم الي سراي النيابة لأخذ اقوال كلا منهم علي حده .
دخل سامي الي وكيل النيابة وبعد استجوابه الطويل
أمر وكيل النيابة الجهات الشرطية المختصة بعمل التحريات اللازمة و سرعة البحث عن سهام .
كما طلب وكيل النيابة من سامي اثبات انه كان في الشغل وقت اختفاء سهام .
وتم الافراج عن سامي من سراي النيابة .
بمجرد خروج سامي اتصل مباشرة بعايدة .
سامي : صباح الخير يا عايدة .
عايدة : صباح النور يا سامي . خير عملت اي ؟
سامي : لسه خارج من النيابة حالا وكيل النيابة افرج عني لكن طلب مني اثبات اني كنت في الشغل يوم اختفاء سهام ، المهم طمنيني علي الولاد عاملين اي ؟
عايدة : متخافش علي سلمي وسليم بخير وكويسين معايا اهو .
سامي : انتوا فين ؟ في البيت عند الاولاد ولا عندك في بيت باباكي .
عايدة : لا احنا هنا في بيت بابا ، بعد ما كلمتني البارح وقولت لبابا قالي اجيب الولاد يباتوا معانا هنا .
سامي : مش عارف اقولك اي يا عايدة الف شكر علي اللي بتعمليه معايا .
عايدة : عيب الكلام ده احنا اصحاب ولازم نقف جنب بعض وقت الشدة ، المهم انا خايفة اوي يا سامي علي سهام .
سامي : ليه ؟ عرفتي حاجة جديدة ؟؟
عايدة : لا ابدا ، لو كنت عرفت حاجة كان خوفي وقلقي قل شوية ، انما النهاردة كده تالت يوم وسهام ولا حس ولا خبر وده شئ ميطمنش ابدا .
سامي : فعلا عندك حق ، انا كمان حاسس انها حصلها حاجة وحشة .
عايدة : اوعي تقول كده ، ان شاء الله هنطمن عليها قريب اوي .
سامي : بالعقل كده يا عايدة لو سبب غيابها حاجة بسيطة كانت ظهرت او علي الاقل اتصلت وقالت سبب اختفائها بالشكل ده .
عايدة : عندك حق ، طيب تفتكر يكون اي سبب غيابها ؟
سامي : اللي في دماغي ٤ احتمالات اما ان اللي اسمه وائل ده قتتلها بدافع الانتقام او انها حصلها حادثة و ماتت او في غيبوبة ومفيش معها اثبات شخصية او انها تكون اتخطفت عن طريق وائل ده او حد غيره ، والاحتمال الرابع انها تكون هربت سواء بردو مع الشخص ده او اي حد عرفته جديد .
عايدة : احتمال انها هربت ده انا استبعده نهائي لأن سهام مستحيل تعمل كده ، سهام انسانة محترمة يا سامي ومش معني انها في لحظة ضعف غلطت وكلمت واحد تبقي انسانة مش محترمة وكل يوم هتكلم واحد !! وهي ندمت يا سامي والموضوع انتهي .
سامي : خلاص ارجوكي بلاش سيرة الموضوع ده .
عايدة : وكمان استبعد احتمال ان حد يكون خطفها لأن انتوا امكانياتكم مش كبيرة للدرجة علشان حد يخطفها ويطلب فدية مثلا !! وحتي لو كان ده حصل كان المفروض اتصل بيك وده محصلش لحد دلوقتي .
سامي : اومال تفتكري هي مختفية ليه ؟
عايدة : زي ما انت قولت اما انها حصلتلها حادثة او ان يكون وائل انتقم منها وقتللها .
سامي : معني كلامك ان اغلب ظنك انها دلوقتي تكون ماتت ؟؟
عايدة : متقولش كده يا سامي ارجوك .
سامي : معني كلامك كده !!
عايدة : احنا نصلي وندعي ربنا اننا نطمن عليها وترجع بالسلامة احسن من التفكير المتشائم ده .
سامي : طيب انا جاي دلوقتي في الطريق علشان اخد الاولاد .
عايدة : ما تسيبهم معايا يا سامي وخليك انت علشان تعرف تدور علي سهام ومتتشغلش بيهم .
سامي : مش عايز اضايقك او اسببلك احراج مع اهلك بسببنا اكتر من كده .
عايدة : لا ابدا بالعكس ، ده انا بحبهم اوي .
سامي : طيب خليهم معاكي ولو ضايقوكي كلميني هاجيلك اخدهم علطول .
عايدة : انت هتعمل اي دلوقتي ؟
سامي : لازم اروح للحيوان ده اللي اسمه يسري .
عايدة : خلاص يا سامي سيبه دلوقتي هو ومامته اكيد خايفين وقلقانين علي سهام زينا بالظبط ويمكن اكتر .
سامي : وانا ذنبي اي اقعد ليلة كاملة في الحجز بسببه ؟ ده غير كلامه معايا البارح كان في منتهي قلة الأدب !!
عايدة : اعذره يا سامي اكيد هو عمل كده تحت ضغط خوفه وخوف مامته علي سهام .
سامي : حاضر يا عايدة ، هسمع كلامك وهسيبه دلوقتي لما نشوف اخرتها ، لكن اول ما نطمن ونعرف حاجة عن سهام هحاسبه علي اللي عمله ده .
******
دخل وائل عند وكيل النيابة لأخذ اقواله
وبعد استجوابه الطويل طلب ايضا من وائل اثبات مكان تواجده وقت اختفاء سهام ، كما أمر بتفريغ المحادثات التي تمت بينه وبينها بعد خروجه من السجن .
تم الافراج عن وائل من سراي النيابة بعد اخذ اقواله .
بمجرد خروج وائل من النيابة اتصل بعايدة اللي كانت انهت مكالمة سامي منذ قليل .
وائل : شوفتي جوز صحبتك ؟
عايدة : قصدك سامي ؟ عمل اي ؟
وائل : بيتهمني اني خطفت وقتللت سهام !!
عايدة : وانت معملتش كده ؟؟
وائل : ايوه طبعا مستحيل اعمل كده .
عايدة : مش قادرة اصدقك يا وائل .
وائل : ليه ؟ معقول تفكري اني ممكن اعمل حاجة في سهام ؟؟ تبقي لسه مش عارفة انا بحبها قد اي !!
عايدة : ماهو حبك لها ده بردو ممكن يدفعك انك تعمل حاجة فيها غلط ترجع تندم عليها .
وائل : لا طبعا ، ده مستحيل ، انا اللي هيجنني جوزها ده اللي بسببه نمت ليلة كاملة في الحجز .
عايدة : معلش ، انت لو مكانه اكيد كنت هتعمل اكتر من كده .
وائل : قوليلي يا عايدة انتي اقرب صاحبة لسهام واكيد تعرفي مكانها ، قوليلي هي فين ؟
عايدة : يا بني ادم افهم ، احنا فعلا كلنا منعرفش عنها حاجة .
******
سامي قعد يفكر ازاي يحاول يعرف سبب اختفاء سهام لكنه اتفاجئ بضابط المباحث بيتصل به وبيقوله تعالي حالا يا استاذ سامي .
سامي : خير يا سعادة الضابط ؟؟
الضابط : انا هقولك الحقيقة قبل ما تيجي علشان مش تتفاجئ .
سامي : حقيقة اي ؟
الضابط : احنا وجدنا جثة مجهولة فيها مواصفات كتير من مواصفات مراتك وكلمنا اخوها يسري وبنكلمك علشان تتعرفوا عليها .
سامي : بعد اذن سيادتك مش عايز اخوها يكون موجود .
الضابط : لازم يكون موجود لأنه مقدم بلاغ زيك بالظبط .
سامي : طيب يا فندم انا جاي في الطريق .