رواية زوجة محرمة الفصل الثالث 3 بقلم حنان حسن

وبعد فترة وانا راجع من الشغل لقيت كل اهلي واهل سارة عندنا في البيت !!

دخلت وسلمت عليهم وانا مندهش وسألتهم بلهفة : خير هو في حاجة حصلت ولا ايه ؟

رد عليا عمي الكبير : احنا متجمعين هنا النهاردة علشانك .

رديت بدهشة : علشاني انا ؟!! ليه خير يا عمي ؟

عمي : اللي موجودين هنا يا امير كلهم اهلك اذا كانوا اهل ابوك او اهل امك او نسايب اخوك الله يرحمه ، يعني مفيش حد غريب .

قولتله : بيتكم ومطرحكم طبعا .

عمي : كل اللي قاعدين واولهم الحاجة والدتك شايفين ومتفقين علي انك الواجب والضرورة تحتم عليك تتجوز ارملة اخوك .

: يا عمي انا قولت رأيي في الموضوع ده قبل كده اني مش هقدر اخد مكان اخويا .

: يابني اخوك دلوقتي عند ربه ملوش في الدنيا غير سيرته بالخير . ولما تتجوز ارملته وتربي ابنه هيرتاح في قبره .

: يا عمي بعد اذنك انا مش موافق ؟؟

: يعني هتعصانا كلنا واولنا امك !!! مفيش واحد من اللي قاعدين مالي عينك ولا ايه يا امير ؟

: كلكم علي راسي يا عمي بس …

عمي : من غير بس ، خلص الكلام احنا كبار مش صغيرين ولازم تبقي كبير زينا وقد المسئولية ، والا هنغضب عليك وتبقي خالفت العيلة وملكش مكان وسطنا ، النهاردة السبت يا امير والجواز الخميس اللي بعد الجاي .

: وهي موافقة يا عمي ؟؟

رد ابو سارة : ايوه يا امير كلنا موافقين واولنا سارة .

: حاضر يا عمي اللي تشوفوه .

سبتهم ودخلت اوضتي وانا دماغي هتنفجر من التفكير ومش مستوعب الموقف اللي انا فيه !!! ومش عارف اتصرف ازاي . مستحيل اتجوز مرات نور !!

اتصلت بساره وقولتلها : كنت عاوز اتكلم معاكي شوية يا ام وحيد .

: اتفضل انا سمعاك .

: انتي بجد وافقتي علي كلامهم ؟

: كلام مين ؟

: عيلتي وعيلتك .

: بخصوص ايه ؟

: بخصوص انهم عاوزين يجوزونا لبعض .

: ماما الحجة كانت كلمتي في الموضوع ده قبل كده وانا قولتلها رأيي .

: رأيك اللي هو ايه ؟

: من غير زعل يا امير انا مش عاوزة اتجوز بعد نور الله يرحمه .

: تمام ، يعني انتي فعلا مش هتفكري في الجواز ابدا ؟

: ايوه انا عايزة اعيش لابني اربيه واعلمه ويكون كل حياتي .

: وده كان رأيي انا كمان . لكن النهاردة لقيت اهلي واهلك قاعدين مستنييني وكلموني تاني وقالولي انك وافقتي !!

: ما انا رفضت في الاول لكن لقيتهم كلهم مصممين وهيكبروا الموضوع قولت اريحهم واقولهم اني وافقت وخلاص .

: يعني انتي مش موافقة ؟

: ايوه .

: اومال قالوا انك موافقة ليه ؟

: انا قولتلهم كده علشان اريحهم بس .

: طيب هنعمل ايه دلوقتي ؟

: هنريحهم ونتجوز ، بس كنت عاوزة اطلب منك طلب .

: انا مش فاهم حاجه !! اتفضلي .

: انا عرفت انك مكنتش عاوز تتجوزني ومادام اتغصبنا كنت عايزة الجواز يكون صوري بس مش اكتر ويبقي مننا رضناهم وفي نفس الوقت حافظنا علي ذكري المرحوم .واوعدك انك وقت ما تحب تتجوز مش هعترض وهفرحلك من كل قلبي .

: ايوه انا كده فهمت يعني نتجوز صوري ؟

: بالظبط كده .

: كويس ، نفس اللي كنت عاوز اكلمك فيه بالظبط بس كنت مش عارف اقولهالك ازاي ، خلاص انا كده موافق . بس سيبك من موضوع اني اتجوز عليكي ده دلوقتي لأني مش بفكر في الجواز علي الاقل في الوقت الحالي .

: انا متشكرة ليك اوي يا امير ، ربنا اللي يعلم انك زدت في نظري اوي بعد كلامك ده ، و ربنا اللي يعلم كمان انا طول عمري بعتبرك زي اخويا .

: وانا كمان من اول ما دخلتي بيتنا وانا بعتبرك زي اختي .

: خلاص متفقين ؟

: خلاص احنا كده متفقين وهبلغهم ان انا كمان وافقت .

روحت بلغت امي اني وافقت ، كانت هتطير من الفرح وقعدت تحضني وتقولي انت دلوقتي راجلنا كلنا وفضلت تدعيلي كتير اوي .

عدت الايام و كنت متوقع اني هروح اعيش مع سارة وابنها في بيتهم وده كان هيسهلنا تنفيذ اتفاقنا لأننا هنكون بعيد عنهم ونفضل علي اتفاقنا ، لكن اتفاجئت قبل الدخلة بيومين بأمي بتقولي اننا هنعيش معها في نفس الدار علشان مش عاوزة تحس بالوحدة !!!!!

ويوم الدخلة تم الزواج ولكن بدون المظاهر المعتادة للافراح ماعدا حضور كل الاهل والاقارب .

وبعد تناول الجميع للعشاء ومباركتهم لنا انصرفوا جميعا ما عدا انا وسارة وابنها وامي ، لقيت امي بتقول لسارة : من الليلة يا حبيبتي وحيد هيبقي معاكي طول النهار وبالليل هينام في حضني !! علشان تاخدي راحتك انتي وعريسك ، الف مبروك يا حبايبي ربنا يهدي سركم .

سارة وضح عليها الارتباك لكن مقدرتش تعترض .

انا كمان ارتبكت وبقيت مش عارف اتصرف ازاي !! لكن اضطريت اطلع اوضتي بسرعة اللي كانت اتجهزت وبقيت اوضة نوم عرايس بجد !!

طلعت اوضتي وبعدها سمعت امي بتقول لسارة اطلعي يلا عريسك مستنيكي . ربنا يهنيكم يا حبايبي .

طلعت سارة وهي في قمة الارتباك فحاولت اهدي ارتباكها شوية وقولتلها : متخافيش احنا عند اتفاقنا ، سيبك من كلام امي دلوقتي بعد اسبوعبن تلاته هجيب وحيد ينام في اوضتنا .

كل ده وسارة واقفة ساكته ، قولتلها : بصي انتي هتنامي علي السرير بس هاخد منك مرتبة ومخدة انام عليهم في الارض .

قالتلي : لأ ، نام انت علي سريرك وانا هنام علي الارض .

: لأ طبعا مش هينفع . متخافيش عليا انا مش هتفرق معايا وهرتاح كويس علي الارض .

: طيب ما تجيب سرير تاني هنا في الاوضة .

: لو انا عملت كده دلوقتي امي هتفهم اتفاقنا ، خلينا كده دلوقتي وبعد كده كل الامور هتتظبط لوحدها مع الوقت .

وفعلا اخدت مرتبة ومخدة وحاولت انام لكن معرفتش ، واللي ضايقني ان سارة نامت بهدومها كاملة واتغطت كمان و كنا في بداية الصيف والجو حر .

وفضلت افكر وأسأا نفسي هل هي هتتحمل الجو ده لمدة قد ايه ؟؟ !!! دي كده حاجة صعبة اوي عليها .

اصرار امي اننا نعيش معها في نفس البيت لخبط اتفاقنا وهيخلينا نعيش في عذاب .

فضلت اتقلب طول الليل وانا حاسس انها هي كمان صاحية !!!

وكل لما اتقلب احس انها بتتقلب علي الس رير من خوفها .

حاولت امثل اني نمت علشان سارة تاخد راحتها وتنام .

وبعد اكتر من ساعتين حسيت بها وهي بتقوم من السرير !!!!

لقيتها فتحت باب الاوضة وخرجت !! وبعدين سمعت صوتها بتتكلم مع امي لما امي سألتها : رايحة فين يا عروسة ؟

ردت سارة : كنت داخلة الحمام يا ماما ، خير انتي صاحية لدلوقتي ليه يا ماما ؟ انتي تعبانه ولا حاجة ؟

: حمام الهنا يا حبيبتي ، لأ انا كويسة الحمد لله بس مش جايلي نوم .

دخلت سارة الحمام ورجعت نامت في الس رير وهي فاكرة اني نايم .

بعدها بشوية سارة بطلت تتحرك ففهمت انها نامت .

زهقت من نومتي في الارض وانا صاحي مش عارف انام ، قومت ولعت سيجارة لقيت سارة قامت بتقولي : ايه ده انت لسه صاحي ؟

فهمت انها هي كمان كانت بتمثل انها نامت ،، قولتلها : متشغليش بالك بيا ونامي انتي واطمني انا مش هخل باتفاقنا ، انا بس عندي ارق من التفكير .

قالتلي : طيب حاول تنام يا امير مش معقول هتفضل صاحي كده للصبح !!

: حاضر هنام دلوقتي .

خلصت السيجارة و حاولت انام لكن بدون فايدة وفضلنا كده احنا الاتنين قلقانين ومش عارفين ننام لحد بعد طلوع الصبح .

ويادوب عيني كانت غفلت يمكن مش اكتر من ساعة وصحيت تاني لقيت سارة لسه صاحية وقاعدة !!

عدت اول ليلة والنهار طلع وقامت سارة تجهز الفطار .

امي صحيت وقالت لسارة : معقول يا عروسة قايمة تجهزي الفطار بنفسك ؟!! ادخلي يا حبيبتي لعريسك وانا نص ساعة اجهزلكم الفطار وادخلهولكم .

: لأ يا ماما ميصحش اتعبك وانا موجودة .

: ده شوية دلع يومين كده بس يا عروسة .

دخلت سارة الاوضة بسرعة وقالتلي : الحق يا امير مامتك بتحضر الفطار وهتجيبه هنا .

قولتلها : ودي فيها ايه ؟ مالك خايفة كده ليه ؟

: لو دخلت وشافت نايم في الارض هتفهم ، قوم يلا بسرعه ارفع المرتبة والمخدة فوق الس ري ر واطلع نام فوق بسرعه .

قومت بسرغة ورفعت المرتبة والمخدة و عملت نفسي نايم علي حرف الس ري ر وسارة قعدت علي حرف الس رير الناحية التانية لحد لما امي دخلت الفطار وباركت لنا .

قعدت افطر مع سارة واحنا ساكتين وانا بفكر اذا كانت اول ليلة عدت بصعوبة كدة من غير نوم اومال باقي الليالي هتعدي علينا ازاي وانا وهي نايمين في اوضة واحدة لوحدنا !!!!لو التفاعل فضل كده هاحزفها