رواية روح فارس الفصل السادس 6 بقلم محمد منصور

رواية روح فارس الفصل السادس 6 بقلم محمد منصور

رواية روح فارس البارت السادس

رواية روح فارس الجزء السادس

رواية روح فارس الحلقة السادسة

وفعلا نزلت روح ورجعت ومعها ادوات الرسم وبصيت للورقة الفاضية وبصيت لصورة سهيلة وبدات الرسمة تترسم واللوحة تكمل وروح ما كنتش تعرف اني انا باخد روح سهيلة من جسمها وبنقلها للوحة الملك غادر لكن

ما كنش بايدية اللي انا بعمله دة ولا كنت عايز اعمله وفعلا خلصت اللوحة وسهيلة في سريرها بتصرخ وبقيت هيكل عظمي. ودخل مراد اوضة سهيلة علي صوت صراخها وشاف المنظر المخيف دة ومن بعده والدته اللي صرخت من المنظر. وفي نفس الوقت في مملكة غادر كان جودا عصبي جدا وكان شايف منظر سهيلة عن طريق عيون مراد وقال لنفسه

في حد قدر يوصل لفارس ويخلي يرسم. بس ازاي دة حصل واللوحة فارس لسة مسجون فيها

وخلي جودا مراد يخرج من الاوضة بسرعه ويروح ناحية الاوضة اللي كان حاطط فيها اللوحة المسجون جوة منها فارس واتصدم جودا لما لقي اللوحة موجودة لكن فارس مش جوة منها ومسك الجسم المصغر من مراد وبدأ يبص للجسم دة ويقول بمنتهي العصبية

غبي غبي غبي. انسي غبي

ومسك دماغ الجسم المصغر دة وبدأ يضغط عليها بمنتهي الشر ومراد يصرخ ويطلب الرحمة لكنه مش عارف سبب للي بيحصل له ويقع مراد علي الارض وهو تقريبا بيطلع في الروح فيسيب جودا الدماغ اللي ماسكها ويقول

موتك مش هايفدني لسة محتاج لجسمك

ويبدأ الوجع يروح من مراد وجودا يهمس له في ودانه

دور علي فارس في المكان اللي في روح. فارس هو اللي قتل اختك. ورجعه للوحة مسجون

ويقف مراد علي رجله ويخرج من الشقة وهو ناوي يجيب فارس. وفي نفس الوقت ومن جوة بيت وصيفة كان جدي سلطان ببربط شاش علي ايد عمي عمر. المقطوعه علشان يوقف الدم اللي نازل منها وبعدها راح سلطان ناحية وصيفة وقال

كنت بفكر انسي اللي عملتي زمان وهروبك مني وجوازك من ضرغام غصب عني. لكن كل نقطة دم نزلها عمر بسببك

رجعت غضبي من تاني عليكي

وصيفة وهي بتحاول تفك نفسها

قتلت لية ابني مايكل. لو عايز تنتقم من حد انتقم مني انا مش من ابني

فيمسك سلطان شعر وصيفة ويقول لها

انا مش ظالم ولا كافر علشان انتقم من ابنك. الذنب اللي انتي عملتي وجوازك من ضرغام فارس ابنك برئ منه

وصيفة

انت كذاب يا سلطان عظيم. انت قتلته علشان تنتقم مني

فيضربها سلطان بمنتهي القوة وهو بيقول

انتي نسيتي اني والدك. ازاي تتكلمي معايا كدة. خلاص العصيان وصل بيكي للجحود

فتصرخ وصيفة في وش سلطان صرخة بها رياح سوداء صرخة ساحرة تمارس السحر الاسود والصرخة دي خليت سلطان عظيم لحم جسمه يبتدي يتلاشي وهنا قام عمر ولف الشال بتاعه حوالين بوق وصيفة ومنها من الصراخ وكتم بوقها وراح بسرعه ناحية سلطان اللي كان واقع علي الارض وقال بقلق

والدي انت بخير

سلطان وهو بيقف علي رجله بصعوبة

مابقتش بخير بعد ما عرفت ان بنتي ساحرة مسخرة الجن الكافر لخدمتها

فيخرج عمر السيف بتاعه ويحط السيف علي رقبه وصيفة وهو بيقول

أمرني وانا هاقطع راسها في الحال

سكت سلطان وفكر للحظات وقال

استني لغاية ما نعرف الجن اللي سخرته لخدمتها ونحرقة وبعدين نقطع راسها

عمر

بس يا والدي.،،،،،

فيقاطعه سلطان قائلا

مافيش بس. لازم انتقم من الجن اللي سخرته وبعدين هي

وفي نفس الوقت ومن جوة شقة روح كنت قدرت استرد جسمي واخرج من اللوحة وقربت من روح اللي بصت لي وقالت

تعرف اني شوفتك كتير قبل كدة

فارس

في احلامك اكيد

روح

مش في احلامي وبس ساعات كنت بشوفك وانا لوحدي وانا بفكر وانا ماشية كنت ديما شيفاك وبخاف احكي لحد عنك ليقولو عليه مجنونه.

فارس

من قبل ما نتولد وباين اننا مقدرين لبعض

روح

هو ممكن حد يحب حد من غير ما يشوفه

فيقرب فارس من روح ويبص في عيونها ويقول

انا حبيتك من قبل ما اشوفك. ويوم ما كنتي بتغرقي كنت حاسس اني انا اللي بغرق

روح باستغراب

انت عرفت ازاي باليوم دة

فارس

انتي نسيتي ان العراف نديم خلاكي روح فارس. يوم ما خلي روحك تدوب جوة روحي. كنت كل ماغمض عيوني اشوفك ووقتها شوفتك وانتي بتغرقي ولما كتمت نفسي لقيتك انتي اتنفستي.

روح وقلبها بيدق بسرعه

يعني انت اللي انقذت حياتي. يعني انا ما كنتش بخرف

فارس

مش فاهم تقصدي اية

روح

اصلي حكيت لسهيلة وقولت لها ان ساعه ما كنت بغرق نفسي راح لكني قدرت اخد نفسي تحت المية لكام ثانية حتي هي وقتها قالت عليه اني مجنونة

فارس وهو بيبص في عيون روح اكتر واكتر

لا. انتي مش مجنونه فعلا وقتها انا كتمت نفسي علشان انتي تتنفسي لكن الملك غادر امر الحراس بانهم ياخدوني لي وماقدرتش اكتم نفسي تاني علشان انتي تتنفسي ولو حتي كان فيها موتي

روح وقلبها بيرفرف ودموعها بتنزل من لذة الحب

يعني انت كنت ممكن تموت علشان اعيش انا. للدرجة دي انا غالية عندك وانت عمرك ما شوفتني قبل كدة

فارس

الحب مايعرفش شوفتك امتي وشوفتك ازاي. ولا انا اعرفك بقالي قد أية. ياما ناس اتربينا معاهم وهما زي الغرب لينا وساعات الغريب بيبقي احن علينا منهم. الحب انك تكوني روح حبيبك ومافيش اغلي من الروح اقدمها ليكي يا. روح فارس.

فضلت روح ساكتة وبصالي وانا ساكت وباصص لها وفي السكوت اتقال احلي كلام وهو في احلي من كلام العيون لكن السكات كان لازم يكون لي نهاية والنهاية جت لما مراد كسر باب الشقة برجله وبقوة مش قوة بني ادم عادية ودخل للشقة وهو باين عليه الشر فقالت روح بعصبية

مراد اية اللي انت عملته دة

مراد وهو بيبص لي

جاي اخد حق اختي سهيلة. من السفاح اللي انتي مقعده في بيتك

فارس

انا مش سفاح. واختك سهيلة انا معملتش ليها حاجة

وراح مراد ناحية صورتها المرسومة وقال

والصورة دي اللي خليت سهيلة تبقي مجرد هيكل عظمي

اتصدمت روح وبصت لي وانا كنت بقول

انا ماعرفش انت بتتكلم عن اية

بس كان باين عليه اني بكذب وروح قالت

اللي بيقوله مراد دة حصل. رسمتك لسهيلة كنت عارف انها هاتكون السبب في موتها

سكت وماعرفتش ارد اقول اية. فصرخت فيه روح وقالت

انطق.

ماكنش قدامي غير اني اقول الحقيقة وقولت

كنت عارف بس انا رسمتها غصب عني وكاني مسحور

روح وهي بتضربني بالقلم

يا مجرم. يا سفاح. خليتني اكون السبب في موت اعز صاحبة ليا. دي كانت اختي. السحر المشؤم اللي عملت بي كدة سحر ميعملهوش الا شيطان

فارس

روح. انا فعلا رسمتها بس والله غصب عني ما كنتش اقدر اعمل حاجة.

روح وهي منهارة من العياط

انت رسمتها علشان تحرر جسمك من اللوحة وانا غبية وصدقتك وساعدك واكيد بالسحر قدرت تعرف اني كنت بغرق يعني لا في حب ولا روح فارس ولا اي كلمة صدق

فارس

لا يا روح.

لكن روح اديتني ظهرها وبصت لمراد وقالت

اطلب البوليس يا مراد. خليهم يجيو يقبضوا عليه

فارس

روح لازم تصدقيني انا فعلا

روح وهي بتصرخ في فارس

اخرس. يا شيطان

وجعتني الكلمة جدا ولقيت دموعي نزلت غصب عني روح صدقت اني شيطان وبقيت ضدي والوجع خلاني اصرخ من جوة ومراد بيقول

حساب اختي انا هاصفي بايدية منه

وهجم عليه مراد وهنا كنت لازم ادافع عن نفسي واستخدمت السحر اللي اتعلمته واللي لسة بيجري في دمي ونطيت جوة اللوحة ولقيت نفسي في مكان غير المكان وقدرت اهرب لكن قلبي كان مع روح وساعتها لقيت نفسي واقع علي الارض قبل اذان العشاء بكام دقيقة في بلد تانية وعرفت اني في اسكندرية وبقيت غريب وسط اهل اسكندرية وعمال ابص للناس والناس تبص لي وهي مستغربة ظهر ازاي دة فجاة. ومين دة. ولقيت راجل كبير في السن اسمه عم ربيع بيبص لي وبيقول

جاي لمين يا ابني

سيبته ومشيت ولقيته جاي ورايا وبيقولي

انت ما ردتش عليه لا.

فارس بصوت حزين

مافيش كلام يتقال.

عم ربيع

السكات مش في كل الاوقات بيبقي صح. ساعات الكلام بيريح

فارس

وانا راحتي في السكوت

عم ربيع

براحتك. انما لوحبيت تتكلم او احتجت لمساعدة هتلاقيني في الجامع دة. انا عمك ربيع

وسابني عم ربيع ودخل الجامع وانا مشيت وماكنتش عارف انا رايح فين وفضلت امشي وامشي لغاية ما تعبت من المشي وقعد علي الرصيف في الشارع ولقيت نفسي فجاة جوة شقة وشقة فيها كل ادوات الرسم من لوحات لي الوان مكان كامل ومجهز لاني ارسم وبس استغربت وحاولت اخرج من الشقة دي اللي مش عارف مين اللي جابني فيها. لكني ماعرفتش اخرج وكأن الشقة دي بقيت زنزانتي فقعد علي كرسي وفضلت افكر في اللي بيحصلي ومين خلاني ارسم سهيلة. معقوله يكون الخبيث جودا طيب وهو اية مصلحتة في كدة. انا لازم ما استسلمش واقوم واحاول اخرج من الشقة دي. وحاولت استخدم السحر لكني لقيت نفسي من غير اي سحر حاولت تاني وتالت ورابع ويأست وقعد تاني علي الكرسي وهنا سمعت صوت الباب بيخبط. قومت وفتحت الباب وانا زي المسحور لقيت بنت في ال20 من عمرها اسمها خلود واقفة قدامي فقولت لها

انت مين

خلود

انت ناسيتني ولا اية يا فارس

فارس باستغراب

انتي تعرفيني

خلود

طبعا. احنا اتقابلنا في النادي واتفقت معايا علي النهاردة علشان ترسمني لوحة

فارس باستغراب اكتر

انا اتفقت معاكي. انتي اكيد غلطانة

خلود وهي بتدخل الشقة بتقول

غلطانة اية بس. انت باين عليك عايز تحرمني من اللوحة الاخيرة ليا

فارس

اللوحة الاخيرة

خلود

اة. انا هاموت بعد اللوحة دي

فارس

انتي عارفة انك هاتموتي وجاية تترسمي برضو

خلود

عبيد الملك غادر ملهمش اختيار.

وبصيت لي خلود بصة مجنونه وقالت

ارسم اللوحة الاخيرة. ليا

وبعت ماقالت كدة لقيت نفسي بمسك اللوحة الفاضية وبرسم خلود وانا مش عايز اعمل كدة وبمجرد ما خلصت اللوحة حصل لخلود نفس اللي حصل لسهيلة ولقيت خلود قدامي هيكل عظمي وما بقتش ضايق نفسي. لاني اكيد باللي بعمله دة انا بكمل لوحة غادر. انا كدة فهمت. جسمي وعقلي تحت تاثير لعنه خبيثة ازاي بس اخلص منها ازاي. وفي نفس الوقت ومن جوة قصر الملك غادر كان غادر باصص للوحة بتاعته وهي بتكمل ووقفت وراء منه الغنجمية وقالت

المخطط بتاعك بيتنفذ زي ما انت عايز. وجودا بيفكر ازاي يوصل لفارس وهايتجنن من اللي حصل. انت بجد عبقري

غادر

جودا ساحر خبيث وبيسخر الجن لخدمته. لكن انا الجن نفسه

استغربت الغنجمية وقالت

مولاي غادر يقصد اية

فيبص غادر للغنجمية ويتحول لصورة ضرغام والدي فتنصدم الغنجمية وتقول

ضرغام. انت ميت من سنين ازاي عايش

ضرغام

الجن اللي زيي ما يموتش. ولا انتي صدقتي زي وصيفة اني انسي وبحبها وخليتها تتجوزني وتهرب معايا

ويضحك ضرغام ويرجع يبص للوحة من تاني. والغنجمية مش مستوعبة ولا فاهمه اللي سمعته وشافته ،،،،،،،،،،،،

يتبع….

لقراءة الفصل التالي : اضغط هنا

لقراءة الرواية كاملة اضغط على : (رواية روح فارس)