رواية يداوي الجروح الفصل الأول 1 بقلم أمينة علاء
رواية يداوي الجروح الجزء الأول
رواية يداوي الجروح البارت الأول
رواية يداوي الجروح الحلقة الأولى
_الواحد اتراكم عليه تِرندات مع قرة عينه أكتر ما اتراكم عليه المنهج والله
_أيوه يعني عايزة إيه برضو مش فاهمه؟
_عايزة قرة عين، عايزة اتجوز
_ ياسمين فوقي إنتي بترفضي أي عريس بيتقدملك وأي حد بيخش يكلمك بتبلكيه هتتجوزي إزاي بقي هتحصل معجزة يعني ده طنط هتفرقع منك
بصتلها بهدوء وانا بقول :ما إنتي عارفه اللي فيها، أنا عايزة واحد حنين، واحد قريب من ربنا، شخص مش سطحي، وأغلبية اللي بيجوا مش كده يا سلمى، أعمل إيه بقا أخد أي حد؟ أنا عايزه حد يصلح جروحي ويكون …ويكون أب ليا
قولت آخر كلامي وانا ببص قدامي بدموع وهي بصتلي بشفقه وقالت: ياسمين قولي الحقيقه إنتي بطلتي تروحي للدكتور صح؟
وكأن سؤالها كان زي الانذار اللي خلاني انفجر وانهار في حضنها وزي كل مره كانت المنقذ بالنسبالي بأنها بدأت تمسح علي ضهري
_طيب ليه يا ياسمين احنا مش متفقين إن إحنا نحاول عشان نبقى احسن؟!
-مش قادرة والله مش قادرة أنسى جوايا ألم وجرح كبير مش راضي يخليني انسى….. أنا مش هقدر أكون مع حد وأنا كده
سكت وهي سكتت وفضلت بس تمسح علي ضهري لحد ماقمت من حضنها وأنا بقول بضحك مصطنع: يلا يا بت بقا نكدتي عليا عرسان إيه بلا هم السنجلة جنتلة
ضحكت هي وانا ضحكت وقمنا نتمشي، ورغم كل حاجه وحشة حصلت في حياتي لكن سلمي كانت طوق النجاة بالنسبالي، الحلو اللي بيجي بعد المر.
__________________________________________________
-ياسمين بت يا ياسمين فوقي يا بت
_إيه يا سلمى
– يا بت قومي بقا
اتعدلت وأنا بقول بزهق: إيه يا سلمي إيه
_اسمعي من كام يوم لقيت شركة عاملة إعلان طالبين فيه designers فبعت السيفي بتاعي أنا وإنتي
_وبعدين
-اتقبلنا يا فقرية
صرخت بفرحه وهي شاركتني الصريخ بالإضافه لتنطيطنا علي السرير لحد ما ماما زعقت: إيه يا هبله إنتي وهي؟ هي هبت منكوا؟!
قعدنا واحنا بننهج وبنبص لبعض وفجأه انفجرنا في الضحك في لحظات عمرها متتنسي.
__________________________________________________
بعد كام يوم
دخلنا الشركة وكانت مبهره جدًا قطع انبهاري صوت التيلفون
_سلمى بقولك اسبقيني شوفي الجو جوا علي ما اكلم ماما اشوفها بترن ليه…وأجيب قهوة من الكافيه اللي برا …اجيبلك معايا ؟
هزت راسها بنفي وأنا خرجت ارد
-إيه يا حبيبتي؟
_وصلتوا؟
-أه يا ماما وصلنا ياحبيبتي
_طيب يا حبيبتي أنا عايزة اقولك علي حاجة
-مدام اتكلمتي بالطريقة دي يبقي موضوع عريس .. ولو صح يا ماما اقفلي عشان ما يتنكدش عليا من أول اليوم ومتتفقيش مع حد من ورايا عشان منزعلش سوا ممكن؟
_يابنتي ولحد أمتي ؟
-صدقيني هيجي اليوم اللي يحصل فيه بس ده مش وقته ادعيلي بس وخلاص
_ربنا معاكي ويوقفلك ولاد الحلال…ويرزقك بإبن الحلال
ضحكت بقلة حيلة وأنا بقول :برضو مافيش فايدة ماشي يا ماما تسلميلي يا ماما
خلصت معاها واشتريت القهوة وأنا ماشية خبطت في واحد والقهوة بقت علي قميصه
_أنا أسفة بجد والله أسفة…… أنا هحاول أصلح اللي عملته
-اهدي اهدي مافيش حاجة محصلش حاجة
_انا أسفة مأخدتش بالي والله
عيطت وأنا بتكلم وهو رد بإستغراب من عياطي :يا بنتي بتعيطي ليه ده حتي القهوة باردة لو سخنه كان زماني مبهدلك بصتله بخضة وهو ضحك وقال: يابنتي في إيه انا بهزر …محصلش حاجة لكل ده
-أكيد؟!
ابتسم و رد: أكيد
ابتسمت ابتسامة خفيفة وانا ببص في الأرض وده لأني مش هتعاقب واستاذنته ودخلت
_ اتأخرتِ ليه يا حلوفة
-اسكتي أنا كان هيغمي عليا …
_إي اللي حصل حد ضايق…
وقبل ما تكمل كان في واحد خرج ونادي علينا وقال :المتدربين الجداد يروحوا مع أستاذة سمر تدلهم على أوضة الإجتماعات عشان المدير عملكوا إجتماع
قمنا اتحركنا ودخلنا اوضة الإجتماعات اللي كانت أحلى من حياتي
ثواني ودخل علينا المدير وده عرفته لما الهمهمات وقفت رفعت راسي والصدمة بأنه الشخص اللي قلبت عليه القهوة وقف وبصلنا شوية وبعدين عينه جات عليا وأنا بحاول استخبي في ضهر سلمى اللي مش فاهمة حاجه ابتسم بخفة وكتم ضحكته وقال:اهلا بيكوا كلكوا ،والشركة بترحب بيكوا وبالموهبين اللي زيكوا ،طبعاً كلكوا اتقبلتوا قبول مبدأي، بناءا علي التصاميم اللي قدمتوها ووصفكم اللي حقيقي من أشخاص موهوبين، بس طبعا الشركة هتعملكوا فتره تدريب عبارة عن أربع شهور وفي منكم اللي هيكمل ومنكم اللي هيودعنا، وده كان موضح في الإعلان، اللي كان مش موضح أن هيبقي في مرتب ممكن ميكونش كبير بالنسبة ليكو بس طبعا دي حاجة بسيطة لأن إنتوا في مرحلة التدريب ولم يتم تثبيتكم بإذن الله يتحسن عن كده بكتير ، ولو في حد معترض يبلغني.
سكت عشان يسمع لو في اعتراض لكن الأوضة كانت عبارة عن هدوء، شكرنا وقال:تقدروا تتفضلوا انهارده ومن الساعه ٩ بكرة أتمنى تكونوا موجودين وبدون تأخير
ما صدقت الجملة دي اتقالت وطلعت بسرعة وأنا بسحب سلمى ورايا وهي مش فاهمة في إيه
لكن أنا كل اللي كان جوايا الهروب، عايزة اهرب من إيه ؟
مش عارفه
يتبع…
لقراءة الفصل التالي : اضغط هنا
لقراءة الرواية كاملة اضغط على : (رواية يداوي الجروح)
