رواية السر القديم الفصل الثاني 2 بقلم علاء جمال

رواية السر القديم الفصل الثاني 2 بقلم علاء جمال

رواية السر القديم البارت الثاني

رواية السر القديم الجزء الثاني

رواية السر القديم الحلقة الثانية

أغمي على فورا من الخوف. ولما فوقت بعدها لقيت نفسي نايمة علي السرير وجنبي محمود وحماتي وبعض الجيران‘ سألتهم إيه اللي حصل؟ ردت حماتي
“واحنا هنعرف منين إيه اللي حصل؟ انا سمعتك بتصرخي وكأنك مخطوفة سبت كل اللي في ايدي وجريت عشان اشوف مالك بتصرخي ليه. ولما دخلت الشقة لقيتك مرمية على الأرض وافتكرتك موتي ‘ ندهت علي الجيران وشيلناكي جبناكي في اوضتك. ونبيل لسه جاي اهو ياعيني من الشغل ميعرفش حاجة.. أنتي اللي لازم تقولي إيه اللي حصل؟ إيه شوفتي عفريت ولا شوفتي إيه المرادي ؟
-اانا شفت نبيل في المطبخ لكن رأسه كانت مقطوعة ‘ خوفت و مقدرتش اتمالك أعصابي واغمي علي ومحستش بنفسي غير دلوقتي وانتوا بتفوقوني.
-بعد الشر عن أبني‘ يارب انتي وابني لا
كلهم بصولي وضحكو كأنهم متأكدين إني مجنونة

لكنى مقدرتش أدافع عن نفسي لان مفيش حاجة أقدر أدافع بيها عن نفسي ، أو أقنعهم بيها إني مش مجنونة وإني فعلا بيحصلي حاجات غريبة ممكن تدمر اي حد مش تجننه بس.
خرجو كلهم و سابوني لوحدي.
حتي نبيل خرج معاهم هو كمان ومفكرش يقعد جنبي يطمن عليا. او حتي يطمني إنه جنبي وخصوصاً إنه عارف ان الحاجات دى مبتحصلش غير وانا لوحدي.
تمر الايام وكل يوم بيكون أصعب من اللي قبله مبقتش قادرة أعيش حياتي بشكل طبيعي زي باقي البني أدمين. حاسة إني بدمر واحدة واحدة وكل ما بحس الاحساس ده بفتكر كلام رأس نبيل وهي مقطوعة لما قالتلي “هدمر ياابتهال” وافهم واتاكد ان الموضوع مش مجرد تخيلات وخلاص لأ دي مصيبة كبيرة بتحصل من ورايا وأنا مش فاهمة حاجة ولا قادرة اتصرف فيها.
بعد أسبوع لقيت مريم صحبتي بتكلمني وبتقولي إنها جاية تزورني وتطمن عليا. الحقيقة مريم هي الوحيدة اللي بحكيلها وبعرفها كل حاجه بتحصلي. هي طول عمرها واقفة جنبي وبتسمعني، كنا اصحاب في الجامعة وكنا على طول داخلين خارجين مع بعض وكانت بتبات عندي في البيت وكنت بروح ابات عندها اوقات كتير اوي. وطول اليوم كنا بنقضيه مع بعض. وهي كمان اللي شجعتني على إني أقبل اتجوز نبيل جوزي وقالت إنه باين عليه شخص محترم وهيصوني ويراعي ربنا فيا. وعشان كده وافقت عليه.

بس بعد الجواز بدأت الحياة تاخدنا من بعض و مبقناش نشوف بعض كتير زي الأول. خصوصاً بعد ما هي كمان اتجوزت وخلفت طفلين وبقي كل وقتها لبيتها وولادها.
ومبقناش نتقابل غير كل فين وفين
لكن تفاجأت النهارده لما لقيتها بتتصل عليا وتقولي إنها جاية تزورني. وكأنها حاسة بيا وباني عايزة اتكلمي واحكي اللي جوايا.
بعد ما دخلت البيت شفت في عيونها نظرة شفقة علي حالي بعد ما شافت شكلي اللي اتغير وجسمي اللي خس النص. بس مرضتش تقولها بشكل مباشر. وغيرت كلامها عشان متوجعنيش.
“إيه يابنتي مالك كده، هو نبيل مش بياكلك ولا إيه.
“اسكتي يامريم ده اللي انا فيه محدش فيه.
“مالك بس فيكي إيه ؟
“عمري ما كنت أتخيل ان حماتي تعمل فيا كده‘
طول عمرها بتعاملني بطريقة وحشة وكأني عدوتها
دايما بتضايقني وعمرها ما عملتلي اعتبار حتي قدام الناس كانت تحب تتنمر علي وتعاملني بأسلوب سخيف. لكن كل ده عادي ممكن يحصل في اي بيت وممكن اتحمله ‘ لكن تأذيني بالسحر والشعوذة لأ دي حاجة لا يمكن اتحملها أبدا.
“سحر ايه بس! وشعوذة ايه اللي بتتكلمي عنها دي.
بدأت احكيلها كل حاجه حصلت ليا من يوم ما دخلت البيت ده. وقد ايه انا عايشة في رعب وقلق ليل ونهار لما خلاص حاسة إني هبقي مجنونة رسمي.
“طيب كل ده مفهوم ياستي. لكن ايه اللي خلاكي متاكدة اوى كده وواثقة إن حماتك هي اللي بتعملك السحر ده. ما يمكن الشقة نفسها هي اللي فيها حاجه غلط. مش يمكن تكون الشقة مسكونة مثلاً.

“لا طبعاً الشقة مش مسكونة عشان أنا الوحيدة اللي بيحصلها كده في البيت كله.ولا نبيل بتحصله حاجة ولا حماتي العقربة عمرها حصلها حاجة. وبعدين هنروح بعيد ليه
أنا رحت لشيخ .
لقيتها اتخضت وهي بتقولي.
“شيخ! شيخ ايه يخربيت وعرفتيه منين الشيخ ده وروحت له امتي وازاي؟
“ناس كتير اوي في الحتة عندنا بيتكلموا عنه و بيشكروا فيه وأنه سره باتع وبيفهم اوي في الحاجات دي وعمر ما حد عنده مشكله راحله ومخلصوش منها. بس كنت بسمع وبطنش عادي قلت أكيد موصلتش للدرجادي. لحد ما في يوم صحيت من النوم على صوت خبط جامد اوي جاي من الحمام. قمت مخضوضه ومش قادرة اتلم على نفسى. وفتحت باب الاوضة وروحت ناحية الحمام وكل ما اقرب الصوت يزيد أوي. صوت طبل غريب كأن حد قاصد يسمعني الصوت ده. او كأنه بينده عليا من خلال الصوت ده .
قربت اكتر من باب الحمام وكنت مترددة افتح ولا مفتحش.
وفجاة لقيت دم كتير بينزل من فتحة الباب الصغيرة اللي هي مكان المفتاح دي.
وقفت متسمرة مكاني مش عارفة اعمل ايه. والدم عمال بيزيد وبيتسحب ناحيتي أقسم لك يا مريم الدم كان بيمشي في اتجاهي انا وبس مكنش بينتشر في الأرض كلها زي ما المفروض يحصل. لا كان بيمشي ناحيتي انا. وكل ما احاول أرجع يقرب مني اكتر. لحد ما لقيته بيوصل لحد رجلي. وبدا يطلع وينتشر على جسمى كله. كان الدم اول ما يلمس جسمي بيتجمد مكان وبيجمد المنطقة اللي بيقف عليها. شوية شوية لقيت جسمي كله اتملى دم واتجمد ولقيت نفسي بقيت عبارة عن كتلة تلج واقف مش قادرة تتحكم في نفسها.
حاولت اتحرك معرفتش واقفة متخشبة في مكاني جسمي كله محمد لكن دماغي صاحية. بس مش قادرة اصرخ حتى وانده على حد لاني بوقي كمان كان متجمد.

حاولت اتحرك اعمل اي حاجه عشان اتفك من التخشيبة بتاعتي دي وفجاة لقيت توازني اختل ووقعت علي ضهري زي الشجرة لما بتتقطع من جذرها بالظبط.
الخبطة خلتني دوخت وحسيت إن الدنيا كلها بتلف بيا ، استجمعت نفسي وصرخت بصوت عالي. لكن محدش اتحرك ناحيتي ولا جه عشان ينجدني إلا الست ام عبد الرحمن جارتي اللي في الدور الأخير.
تخيلي جارتي اللي في الدور الأخير تسمعني وتيجي عشان تلحقني وحماتي اللي تحت مني متتحركش ولا تسال فيا.
دخلت الست وشالتني من على الأرض و حطتني علي الكنبة.
وبعدها دخلت المطبخ وعملت لي يانسون دافي. شربته وانا جسمي كله بيتنفض وحاسة إني كنت في ديب فريزر. وسالتني ايه اللي حصل وأما حكتلها حسيت اني صعبت عليها وأنها مصدقاني ولأول مرة احس ان في حد مصدقني ..
بعدها لقيت الست بتقولي.
“يابنتي انتي مينفعش تسكتي على نفسك اكتر من كل اللي بيحصل معاكي ده كتير أوي. وانا خايفة يحصلك حاجة.
اول ما سمعت كلامها لقيت دموعي بتنزل مني غصب عني. واترميت في حضنها وانا بقولها طب أعمل إيه؟ محدش مصدقني ولا حد راضي يقف جنبي.
“مش مهم اقفي انتي جنب نفسك وصدقى نفسك.

روحي بابنتي لشيخ حكايتك دي مش هينفع لها غير شيخ.
“فين الشيخ ده ؟ انا عمري ما فهمت في الحاجات دي ولا عمري رحت عند حد خالص.
“في حد كويس اوي انا عارفاه ومش انا بس ده كل الناس تعرفه. إسمه الشيخ إدريس كويس اوي والناس كلها بتشكر فيه انا نفسى مجرباه.
“طب وده انا هوصله ازاي بس.
“ملكيش دعوة رتبي نفسك وجهزي حالك وانا هاخدك اوديكي عنده.
قالت كلامها وبعدها سابتني وخرجت.
“طب معلش سؤال هو أنتي قولتي لجوزك علي الموضوع ولا لا؟
-لا ، نبيل مبيشغلش باله بحاجة دايما مكبر رأسه من اللي بيحصل ومش مهم عنده غير راحته هو وبس دنا حتي لما كنت بحكيله عن الحاجات الغريبة اللي بتحصل معايا مكنش بيصدق وبيقول عليا مجنونة..
“وبعدين عملتي ايه انتي وام عبدالرحمن دي؟

يتبع….

لقراءة الفصل التالي : اضغط هنا

لقراءة الرواية كاملة اضغط على : (رواية السر القديم)