رواية ما بعد الاغتصاب الفصل العشرون 20 بقلم هنا عادل

رواية ما بعد الاغتصاب الجزء العشرون

رواية ما بعد الاغتصاب البارت العشرون

رواية ما بعد الاغتصاب الحلقة العشرون

فتحى واقف فاتح عنيه بصدمة
هو مش خايف من ان حد يشوفه
هو عنده القدر الكافى من البجاحة اللى يخليه مش بيخاف من حد
لكن هو مش محضر رد يقوله لأى حد ممكن يحطه فى موقف زى ده
وعلشان كده كان واقف قصاد رشا ساكت
ميرفت ببجاحة.ازيك يابت يا رشا
عاملة ايه وازى امك
رشا بأستهزاء وهى باصة لفتحى اللى واقف بيفكر فى كلام.الحمد لله احنا زى الفل وكويسين
ايه يا جوز اختى اللى جايبك عند خالتي ميرفت
فتحى.معرفة يا رشا
جاى جايبلها خبر من ناس تبعها فى اسكندرية
رشا بعدم اقتناع.اااا علشان كده بتقولك ادخل يا سيد الرجالة
هو الخبر وصل قبل منك يا جوز اختى ولا ايه
فتحى ببجاحة.جرى ايه يا رشا فى ايه
هو انتى فاتحالى تحقيق ولا ايه
الست زبونتى
ومعرفة قديمة
ميرفت.مرافقنى يابت يا رشا
روحى قولى لأمك وختك
هيهيهيهيهيهيهي
فتحى بص لميرفت بصدمة
ميرفت.جرى ايه ياسي فتحى
هو من امتى الحريم بتحاسب الرجالة ياخويا
هو اكل وبحلقة ولا ايه
بت يارشا
يلا امشى روحى على بيتكم بقى
ومتنسيش ياختى تروحي تجيبيلي امك وتيجي
علشان اخلى اللى ما يشتري يتفرج عليكم
رشا.لاء يا خالتي
احنا عارفين ان انتى مالكيش كبير ولا حاكم
وبعدين امى تجيلك ليه
مش مستاهلة
انا اختى ست الستات قاعدة فى بيتها
جوزها بيرجعلها اخر الليل قدام الناس
لكن انتى اهو جايلك يتسحب
ومش لاقى حاجة يقول انه داخلك بيها
علشان كده واقف محروج
انتى بس اللى الخشا مكشوف عنك
علشان كده بقى مش هريحك ولا هخلى حد يشمت فى اختى
جوز اختى يخلص قاعدته معاكى
ويرجع لمراته
يلا افوتك بعافية ياجوز اختى
خلي بالك منها بقى
احسن دى فاتحة بيتها للى رايح واللى راجع
بالأذن
كان فتحى واقف مصدوم من كلام رشا
اللى مش مصدق انه يطلع منها
وميرفت واقفة مضايقة انها بدل ما تضايق هى رشا
لاء رشا اللى حرقت دمها
ميرفت.بقولك ايه انت هتفضل واقف على الباب
ادخل يا خويا وكمل تتنيح جوة
بدل ما نبقى فرجة للي رايح واللى جاي
دخل فتحى ولسه ردود رشا فى ودنه
ميرفت.عكننت علينا بت نبوية
يحرق دمها البعيدة
فتحى وهو بيقعد على حرف السرير.اه البت لسانها متبري منها
البت اختها مالهاش لسان
تتهد الدنيا من حواليها وهى ساكتة
ميرفت.اه رقية هبلة
لكن البت دى ارشانة
بقولك ايه
احنا هنضيع وقتنا فى زفتة وهبابة
خلينا فى اللى احنا فيه بقى
فتحى.نكدت عليا
ميرفت.ياراجل متعملش البت حجتك
لاء احنا هنروق شوية كده
ولا نكد ولا وجع دماغ
فتحى بيضحك.وماله
روقيني بقى
نسينى الكلمتين اللى عكنونى دول
فعلا ميرفت متوصتش
ولاغية من قاموسها هى كمان الحرام والحلال
وكان جسمها ارخص من الخضار اللى بتنزل تبيعه فى السوق
وبرغم ان فتحى مش مستمتع معاها
لكن هو عايز يعمل اى حاجة تفصله عن اللى بيحصل فى بيته
واللى بقى يسمعه ويشوفه
اما فى البيت عند رقية
طلعت فاطمة لمحل بقالة
استعملت منه التليفون
علشان تقدر توصل لجوزها عن طريق جاره ليهم
وتبلغه باللى حصل فى بيت رقية
اه هى مقالتش كل التفاصيل
لكن بلغته ان رقية تعبانة ومحتاجين يروحوا بيها المستوصف
وفعلا علي متأخرش
مجرد ما عرف
كان مسافة الطريق عندهم
علي.يلا بينا انا موقف عربية برة تاخدنا لحد هناك
رقية بتعب.لاء يا عمى علي
احسن سي فتحى يتشاكل معايا
اخاف اطلع من غير علمه
فاطمة.يابنتى متخافيش
هو لو يعرف انك عيانة كان زمانه هنا
لكن انتى مع اخوه الكبير ومعايا مش طالعة لواحدك
لازم نروح نشوف فيكي ايه
هما هيبقوا فاهمين اكتر مننا
على.هو مش انتى بتقولى الحكيمة قالت حامل
فاطمة بتبص لرقية و علي.ياسيدى دى ممرضة
تلاقيها برضه مش زى الدكتورة
خلينا نروح المستوصف احسن
هناك لو فيه حاجة محتاجة تتلحق هيلحقوها
علشان كلامها مدخلش عقلي
علي.طيب مش وقت انى استفهم ايه اللى مدخلش عقلك
جهزيها انتى بس
ويلا بينا
انا مستانيكم برة
فاطمة.ماشى
خرج علي
فاطمة.يلا يابنت الحلال
خلينا نطمن عليكي
احسن تكون فيه حاجة فى بطنك
والست دى فكرتها عيل
خلينا نطمن
رقية بخوف.ياست فاطمة ده عيل
بصحيح
فاطمة.انتى يعني عارفة ان اللى بيتحرك ده عيل
رقية.مش عارفة هو اللى بيتحرك ولا لاء
بس انا عارفة انى حامل
انا حسيت او حلمت او حد قاللى
والنبى ما انا عارفة بالظبط
انا منين عرفت انى حبلة
من قبل ما الست دى تقول
فاطمة.طيب معلش يا حبيبتى
برضه حتى لو حمل
خلينا نروح ونطمن
ولو على فتحى
مش هيقول حاجة لما يعرف انك معانا احنا
رقية بخوف.يعنى انتم هتيجوا معايا تانى
وتقولوا ان انتم اللى قولتوا نروح للمستوصف
فاطمة.اه يا حبيبتى متخافيش
يلا بقى عم على واقف بقاله شوية
فعلا قامت غيرت هدومها و لفيت الايشارب بتاعها
وخرجت مع فاطمة
لعلي اللى كان واقف جنب العربية مستنيهم
واول ما خرجوا
ركبوا معاه
واتحركوا مع بعض
على اقرب مستشفى
فى بيت ابو رقية
بسمة.طب وهتعملى ايه يابت يا رشا
هتقولى لابوكى
ولا لرقية
اخص عليك يا عم فتحى
رشا.عم فتحى ايه
الراجل الناقص
رايح يلعب بديله قبل ما يكمل حتى جمعتين
من جوازه
انا كنت حاسة اختى باين عليها مش فرحانة زى العرايس كده
بسمة.طيب ما تقولى لأمى تروح تفضح الست اللى اسمها ميرفت دى
رشا.تفضحها ايه
هى مفضوحة من غير حاجة
والبلد كلها عارفة مشيها البطال
وبعدين حتى لو فضحتها
ما هو اللى ديله نجس مبينضفش
الراجل ده بتاع حريم
وانا من يوم ما دخل بيتنا
وانا مش مرتحاله
ومش هينفع نخرب على اختك
الناس تقول ايه
اترميت ورجعت بيت ابوها بعد اسبوع جوازها
يفكروها معيوبة ولا شاف عليها حاجة
بسمة.عينى عليكي يا رقية
نبوية وهى فى الفسحة.يا عيال
انتم قاعدين جوة وسايبينى اخبز لواحدى
قومى ياختى منك ليها تعالوا ساعدوني
بنات اخر زمان بصحيح
رشا.تعالي نطلع لامك
بدل ما تيجى تمسك في خناقنا
بسمة.مش هتقولى حاجة
رشا.لالا
وانتى اوعى تجيبي سيرة
خلينا نفكر ايه اللى المفروض يتعمل وبعدين يحلها الحلال
بسمة.ماشى
خرجت رشا وبسمة لأمهم
وقعدوا يخبزوا معاها
ومحدش منهم بيتكلم
ونبوية برغم انها مش متعودة ان بناتها يبقوا سرحانين كده
الا انها مهتمتش تسأل
حتى لو لاحظت سكوتهم
فى المستشفى
الدكتورة.ماشاء الله
الطفل حركته كويسة اوى
فاطمة بتبص لرقية
الدكتورة.بس انتى محتاجة تتغذي شوية بقى
علشان تتحملى الولادة والطفل يفضل بحالة كويسة
فاطمة.هو انتى يادكتورة تعرفى هى حامل فى الشهر الكام
الدكتورة.هو انتم مش حاسبين الحمل كان من امتى
رقية وفاطمة بيبصوا لبعض
فاطمة.لاء يا دكتورة
هى كانت عند اهلها ومراحتش لدكاترة هناك
واول ما رجعت جينا عليكي علطول
الدكتورة.حمد الله على السلامة ياستى
انتى صغير برضه على انك تبقى حامل
بس ان شاء الله كله هيكون كويس
حركة الطفل دى تقول انها فى الخامس تقريبا
فاطمة حسيت بدوخة
فى اللحظة دى
ورقية بتلقائية.ازاى يا ست الدكتورة
انا بقالى اسبوع بس متجوزة
الدكتورة اتصدمت
وبتبص لفاطمة
شافتها مش متوازنة
وكأنها هتقع
قامت بسرعة من جنب رقية اللى كانت بتكشف عليها
وقربت من فاطمة تسندها
وتقعدها مكانها على الكرسي
الدكتورة.انتى مفطرتيش ولا ايه
فاطمة.لا الحمد لله يا دكتورة
انا كويسة
طمنينى بس على رقية
بصيت الدكتورة لرقية بشك.دى بتقول انها متجوزة من اسبوع
والطفل اللى جواها
حجمه يقول انه بقاله شهور
فاطمه الدوخة زادت فيها
وده اضطر الدكتورة انها تكشف عليها
رقية كانت مستغربة كل اللى بيحصل
وخايفة
وفى نفس الوقت فرحانة انها هتبقى ام
مع انها مش فاهمة يعنى ايه بنت فى سنها تكون ام
كل اللى كان بيدور فى دماغها
حاجات مالهاش علاقة ببعضها
لكن الدكتورة قطعت تفكيرها وهى بتقول لفاطمة.انتم متفقين تعملوها سوا ولا ايه
فاطمة بتبص للدكتورة ومش فاهمة قصدها
الدكتورة.انتى كمان مروحتيش لدكاترة الفترة اللى فاتت ولا ايه ياست فاطمة
متعرفيش ان انتى حامل
فاطمة بفرحة وذهول وصدمة فى نفس الوقت.حامل
انا حامل
والنبي ما اعرف يا دكتورة
الدكتورة.هو فى ايه ياستات
انتم بتتكسفوا تروحوا تطمنوا على روحكم ولا ايه
6 شهور متعرفيش انك حامل
فاطمة بذهول.هو ايه ده يا دكتورة اللى 6 شهور
انا محصلش اى حاجة معايا تقول انى حامل
الدكتورة.متأكدة ان مفيش اى حاجة حصلت
حاجة اتمنعت
تدل على انك حامل يعنى
فاطمة.والله ابدا يادكتورة
كل حاجة طبيعية وكويسة
مفيش اى حاجة
الدكتورة.عادى ياست فاطمة
وارد يحصل
فى حالات ممكن تحمل من غير انقطاع للظروف الشهرية
وعموما مبروك
ورجعت تانى بصيت الدكتورة لرقية
اللى كانت سرحانة
فاطمة.الله يبارك فيكي يا دكتورة
الدكتورة.اما الست رقية بقى
لازم تتغذى كويس اوى
علشان هى ضعيفة
وعلشان الحمل يكمل على خير
فاطمة.متأكدة يا دكتورة ان اللى فى بطنها بقالها خمس شهور
الدكتورة.الطفل مبيتحركش قبل العمر ده يا ست فاطمة
مبيكونش لسه اتكون
ربنا يسترها على بناتنا
راحت الدكتورة لمكتبها
وكتبت روشتة ادوية لرقية
وروشتة لفاطمة
وخرجوا سوا من عند الدكتورة
علي.خير طمنينى
قالت ايه الدكتورة
فاطمة.قالت اللى قالته الست باتعة
رقية حامل يا علي
علي بأبتسامة.الف مبروك يا رقية
اخيرا الواد فتحى هيبقى اب
بقولك ايه بقى يا رقية
تعالى اقعدى معانا فى البيت
وفاطمة هتراعيكي
انا هنا مكان ابوكي متخافيش
كل طلباتك مجابة
ده انتى مرات ابني مش مرات اخويا
رقية بخجل.دايما عامر بحسك يا عمي وبحس خالتي فاطمة
ومبروك ما يجيلكم
على.مبروك على العيلة كلها
هيجيلنا نونو نلعب بيه يا فاطمة
رقية.خالتى فاطمة كمان هتجيب نونو
بص علي لمراته اللى كانت واقفة وزعلانة على ان فتحى استغل طفولة رقية وعمل اللى عمله معاها من قبل الجواز
علي.فاطمة
صحيح اللى بتقوله رقية ده
انتى حامل بجد
فاطمة رجعت لوعيها.اه يا علي
تصدق
الدكتورة بتقولى انى حامل فى السادس
وانا بقالى اسبوع بشيل واحط فى البيت
ولا حسيت بأى حاجة
6 شهور ومعرفتش انى حامل
علي بفرحة.يافرج الله
شوفتى ربنا باعتلنا الفرح ورا بعض ازاى
يلا بقى شدى حيلك انتى هاتيلنا واد
ورقية تجيب بنت
علشان يبقوا متسميين لبعض
فاطمة.ربنا يتمملها بخير
مش يلا بينا بقى نمشى
ولا هنقعد هنا
علشان فتحى يرجع يلاقى حد فى البيت
فعلا مشيت رقية وفاطمة وعلي
راحوا على البيت
كانت فاطمة مبسوطة انها حامل
هى عندها بنات ونفسها تجيب ولد
يبقى سند لأخواته
وكان علي فرحان جدا
انه هيجيله طفل
وراضى سواء بنت او ولد
وفرحان جدا لأخوه انه اخيرا هيبقى اب
وهيعرف يعنى ايه يبقى مسؤول بجد عن عيلة
اما رقية كانت فى عالم تانى
طيب الناس هتقول ايه لما تخلف بعد اربع شهور
وهى مكملتش شهر متجوزة
طيب اشرف اخوها وابوها لو عرفوا هيعملوا فيها ايه
فتحى هو الوحيد اللى عارف انها شريفة ومحدش لمسها غيره
وصلوا البيت
ودخلوا سوا
علشان يستنوا فتحى
ويكونوا موجودين فى الوقت اللى هيعرف فيه الخبر
ويشوفوا رد فعله
رقية.اهحضرلكم لقمة بقى
علي.لالا
متتعبيش نفسك
فاطمة.ارتاحى انتى يارقية انا هقوم احضر
علي.لاء ولا انتى
انا هطلع اجيب لقمة على ما قسم كده
نتصبر بيها لحد ما فتحى يرجع
قام علي وقبل ما يخرج
فاطمة.علي
ايه سر الاوضة دى
فيه حاجة انت لازم تقولها
ولو مش هتقولها ليا
قولها للبت الغلبانة دى
بدل ما تعرفها من الجيران اللى عارفين
ان فيه حاجة فى الاوضة دى
وقف علي وهو باصص لفاطمة ولرقية
ومش عارف المفروض يرد عليها يقول ايه فى اللحظة دى
رقية.ايوة ياعمي على
صحيح
انا حاسة ان فيه حاجة هنا
والناس كمان اللى حواليا كلامهم بيقول ان الاوضة دى حصل فيها حاجة
ومستغربين اوى ان سي فتحى اتجوز فيها
ما تقولي يا سي على يمكن الاوضة دى السبب فى اللى انا فيه
علي بيبص لفاطمة بلوم على سؤالها
فاطمة بحدة.علي
انا يمكن سألتك قبل كده
وانت رفضت ترد عليا
وغيرت الكلام
لكن الجيران هنا بيتكلموا عن ان الاوضة دى
فيها حاجة حصلت
للدرجة اللى خوفتهم انهم واقفين فيها
فى ايه ياعلي
لو مش عايزنى انا اعرف
اطلع اقعد عند الست سنية وانت احكى لرقية
علي بأرتباك.مفيش حاجة يا فاطمة
انتى ليه مكبرة الحكاية
وبعدين انتى عارفة الناس اللى هنا
مفيش وراهم غير الكلام الكتير
وبعدين يعني هيكون في ايه فى الاوضة
فيها ايه الاوضة يا رقية
انتى حصل معاكى حاجة يخوفك منها
رقية ب حيرة تتكلم ولا لاء
بس قررت ترد.ايوة ياعمي علي
الكهربا بتقطع علطول
وبعدها جسمي كله بيرتعش
غير سي فتحى
بيعمل حاجات غريبة
انا فكرت ان هو ده الجواز
لكن انا حبلة فى الشهر الخامس يا عمي علي
وانا محدش لمسني غير سي فتحى يوم دخلته عليا
واقلب المصحف على عيني وعلى اللى فى بطني
لو فيه حاجة ياعمي علي قولي
انا عقلي على قدي اه
ولا بعرف اخد وادي فى الكلام
لكن هفهم والله
فاطمة قاعدة على الكنبة وبتبص لعلي اللى شافت فى عنيه الحيرة والتوتر
فاطمة.اتكلم يا علي
حصل ايه فى الاوضة دى
علي.امي اتقتلت فيها يا فاطمة
امى اتقتلت هنا يا رقية