روايات

رواية مجرد كارثه الفصل الثامن 8 بقلم أروى طاهر المسلاتي

رواية مجرد كارثه الفصل الثامن 8 بقلم أروى طاهر المسلاتي

رواية مجرد كارثه الجزء الثامن

رواية مجرد كارثه البارت الثامن

رواية مجرد كارثه
رواية مجرد كارثه

رواية مجرد كارثه الحلقة الثامنة

صوت نبض متقطع …
سقف ابيض وريحة مطهر ادوخ الراس …
أخيرا رجعلي الشعور وبدت نحس
كأن جسمي مكسر ويتقطع بي الطرف من الألم يلي نحس بيه
مفيش ولا اي شي يتحرك غير عيوني يلي كانت تشوف يمين ويسار
شن صارلي ؟!شنو اخر شي درته باش يوصلني هنايا!!
شنو يلي خلاني م…..
عزام:الحمد الله على السلامه
مياسين:وكل وجها خدوش وكدمات….وين انا
عزام:يسكر في الروشن….بعد يلي درتيه وين تبي تكوني يعني!
مياسين:سكرت عيونها واسترجعت كل شي
✨اول ما طاحت من السياره بدي جسمها يلف في الطريق وجسمها يتخبش من اثر الاسمنت
درس عزام سيارته ونزل في نص الطريق واقف ويأشر لي السيارات الجايه بمعنى وقفو
فقدت الوعي من قوة الطيحه …وقرب منها عزام والخوف في عيونه
مش خوف عليها لا!

 

 

خوف انه يفقد (الدجاجه يلي تبيض ذهب)
او البنت يلي وراها كل العز والثروات
قلبها ووجها كله دم وجسمها متكسر تكسير
قامها بهدوء وبشويه عليها ويديه يرجفو وسعفها…
عزام:ربع يديه وهوا يشوفلها…..جاب ربي مكانش في سيارات قريبه ورانا وسرعتي مخففها عشان المطب
انتي شنو يلي تبي توصليله بزبط!!
مياسين:انك تقلب وجهك من عليا ونرجع وين ما كنت
خلاص انا معش نبي لا قرايه ولا شي بنرجع لي ماما
عزام:خدي نفس عميق….لو كانت امك جايباتك من لما صغيره راهو عرفت كيف نربيك بدل طباع امك يلي ماشيه فيك هيا
مياسين:قامت راسها ورجعت رقدت بعد ما شافت رجلها اليمين مجبسه لعند الركبه
خشت بنت قصيرونه وواضح من عيونها انها فلبينيه❤️
ابتسمت وقالت اهلا
قربت على مياسين وساعدتها لين قعمزتها وسندت ضهرها على المخده ودارت فحص روتيني وطلعت
مياسين:تتفحص في جسمها بعيونها
رجلها اليمين مجبسه ويديها اليسار لافينها بي شاش ابيض وراسها حتى هوا لافينه
من غير الخدوش يلي معبيات جسمها ووجها ….
عزام:بخطوات ثابته قرب على الباب …سكره بي المفتاح ورجعلها
مياسين:قامت عيونها فيه
عزام:مسك حديدة السرير وقرب عليها …..استقبلي الامر الواقع زي ماهو
الربايه يلي عند امك انسيها وابدي من جديد
حاولي متعانديش لان وربي انتي يلي بتتعبي والخاسرة في الموضوع
لما نشوفك ماشيه زي ماني وقتها نعطيك حريتك في طلوعك وخشوشك وتصرفك
اما توا ممنوع عليك حتى زيارة امك
مياسين:تشوفله في عيونه بدون اي ردة فعل
عزام:واول حاجه او خطوه تتعلميها هيا انك تنزلي عيونك لما نكلمك زيك زي اي بنت محترمه الاكبر منها
مياسين:ابتسمت ع جنب بهزوه…..اكبر مني في العمر ولا في العقل حدد!
كان في العمر منك لكن العقل ….معتقدش!
عزام:شاف للارض شويه ورجع شاف لعيونها…تم امالا انتي يلي بديتي
وطلع وسيبها
اما مياسين ارتمت على المخده بتعب والف كسره فيها
___________________________

 

 

طق طق طق طق
قربت بتول وهيا تتمشى في الممر لابسه فستان ابيض وفيه وردات صغيره حمر❤️
فتحت الباب وتعابير وجها كلها فرح🌸
بتول:اخيرا جيتي 😮‍💨
خشي خشي
مريم:خشت وهيا ماسكه حافضة الكيك ….لين استأذنت منه باش قدرت نطلع
بتول:بي الشفي عليك ان شاء الله
يلي يسمعك يقول تسكني في اخر الدنيا باب شقتي في شقتك ره
مريم:خشت للحوش وهيا مبتسمه عطت التحيه❤️
اهلين بيك
عفاف:ابتسمت اهلا حبيبتي
مريم:قربت وسلمت عليها وقعمزت❤️
بتول:وهااادي سلفتي الحلوه مريم بابها في بابي ومتجيش الا لما تسأل راجلها دراه الكبد
عفاف:ضحكت ….تشرفنا
بتول:وهاذي صاحبتي عفاف طبعا معنديش صاحبات غيرها صندوق اسراري
مريم:تشرفت بيك عفاف❤️
عفاف:تسلميلي
بتول:تصب في الشاهي…..كنت نحكيلها على عيشتنا الغريبه مع ازواجنا الغريبين
مريم:اممم …على سيرة راجلك وراجلي
بتول:شني !
مريم:ابتسمت بخجل…..امس صار بينا شوية
بتول:اي!!!
مريم:تهنيت
بتول:تبصرررري؟!😂😂……اخيراااا
عفاف:تشوفلهم بي استغراب ….على شن تحكو؟
انتم قريب تسكرو شهر زواج
بتول:ضحكت بهزوه …هه بالله ياصاحبتي خليني نحكيلك
انتي متعلمي بي شي
عفاف:خدت كاسة الشاهي ….ومع اول رشفه بدت المواضيع بشويه بشويه
___________________________

 

 

فاطمه:طلعت من غرفة الكشف وهيا تعدل في ملابسها
لمحت بي الصدفه شخص تعرفه!
وتعرفه كويس
قربت من الممر والحيط كانت تتخبى بيه
ولما شافت اكتر زادت تأكدت انه عزام ….واقف في الممر ويتكلم بتالفون
طلعت التالفون من جيبها واتصلت
ايات:تسرع في خطواتها …..ها شنو!
فاطمه:ترا قولي من قدامي!
ايات:منو؟وين انتي اصلا !!….مخليتيني مع البنات دورت عليك م….
فاطمه:غير اسكتي توا اسمعيني
لقيت عزام واقف في المصحه قدام غرفه مفهمتش في شنو يستنى
ايات:وقفت …عزام!
فاطمه:اي خاش طالع ع الغرفه وتوا واقف ع الباب بزبط
ايات:سرحت شويه بعدين فاقت…..انتي شنو اديري في المصحه؟
فاطمه:ارتبكت والكدب راح من عقلها ومعرفتش تحكي
كذبه مرتبه
اءءء ص صاحبتي ريهام داخت وجيت معاها بدير كشف
تلاقيت معاه صدفه
ايات:اهاا
خلي عينك عليك حاولي تعرفي من فيها الغرفه
فاطمه:تمام
ايات :في اي قسم؟
فاطمه:الاسعافات وال…..
ايات:الووو
فاطمه:حطتهم بي الضهر عشان ميشوفوهاش
وعزام ماشي وراها وفي يديه الكروسه يلي مقعمزه فيها مياسين

 

 

فاطمه:مع مياسين
شكلهم داروو حادث تعرفي ملابسها كلهم دم وحالتها حاله
ايات:كملت تمشي وتسرع في خطوتها….هوا صارله شي!!
فاطمه:تلفتت بشويه ….لا مش باين عليه حتى حاجه بس هيا هلبااااااا رجلها ويدها تي كلها
ايات:ان شاء الله يطلع عاطيها طريحه مرتبه
خلي تكرها من توا احسنلها
فاطمه:وقفت على شباك المصحه وتراقب فيه كيف يركب فيها لي السياره….
قامها وحطها في السياره من الخلف عشان تتمدد براحتها
ايات:شنو صار ؟؟
فاطمه: تخيلي قام…..وسكتت
ايات:رجعت وقفت في الطريق….شنو قام!
فاطمه:سرحت شويه
هدى:منهاره وتبكي مفهمتش علاش هكي يصيرلي كل ما يصير شي حلو بيني وبين عزام حياتي كلها تخرب كأن في حد يراقب فيا وديمه يحول في فرحتي لي تعاسه
ايات:فاطممممه نكلم فيك
فاطمه:رجعت لي وعيتها ……تخيلي لوح الكرسي وخلى الممرضات يقيموها
حتى مساعدهاش
ايات؛قلبها ارتاح…..سرعي روحك خلي نروح نفهم شن صاير فيها
فاطمه:شافت لي الساعه……تمام شويه ونروح

 

 

ايات:اوكي….وسكرت الخط
فاطمه:نزلت التالفون من على ودنها وقعدت سارحه في عزام كيف واقف يحكي مع الدكتور
استاذه فاطمه؟
فاطمه:نخلعت في مكانها….نعم تفضل
بكرا الساعه8يكون التحليل جاهز
فاطمه:صعب اليوم؟
مستحيل والله بس بكرا الساعه8الصبح بزبط تلقيه جاهز
فاطمه:لبست شنطتها….اوكي تمام❤️
شكرا
العفو
🔥أروىى الطـــــــــــاهرالمــــــــســـــــــلاتـــــي🔥
🔥روايــــــات بنوتــــــــة الشيــــــــخ400الف عضو🔥
ربيعه:حاشه النعمه والله متعرفو اديرو حاجه
زكيه:ليا 28سنه متزوجه ياعمتي اليوم بس طلع اكلي اخي!
ربيعه:ترا ياسرك من طولة اللسان والدوه
مسد دريتك كلها بنات بايرات وتزيدي فيها بطولة لسانك
ربيعه:عصبت ووجها راح أحمر…..معليشي ياعمتي راك زدتيها عليا
حاولي تفهمي ان المسؤل على جنس الصغار الراجل مش المرا
وبناتي الله يبارك عليهم وراجلي راضي شن مزال تبي انتي!
ربيعه:شن مزال تبي انتييبي؟؟؟؟؟
ليا انا الكلام هاذا!
زكيه:خدت نفس…..استغفر الله ياربي
ياسر بالله عليك معادش تستفزيني بي الكلام …..وطلعت
ربيعه:هاذا وجهي كان مزال قعدتي عند ولدي يلي متتحشميش

 

 

عزام:خش للمطبخ وهوا مركز في زكيه وراه طالعه متكنطيه…خيرك شن في
ربيعه:تبدلو ملامحها من غضب وشر لي تعب وحسرة وبدت تتسخف ….اخ ياوليدي تعالا شوف شن دارو في حناك وربي ها الكناين 24ساعه وهما يهينو فيا وخلاص حسبي الله فيهم
عزام:قرب منها ومسكها من يدها وساعدها لين وصلت لي الصالون ✨
ربيعه:اه يا اعصابي اه
اه ياربي الواحد بدي كبير الله غالب ويلي يجي يهزب فيه
معاش عندي لا قدر ولا احترام مع الكناين
عزام:قرب عليها بي كاس الميه ….اهدي ياحناي حشاك
ويلي ضايقك اليوم تو يتحاسب ساهل
ربيعه:شربت الميه وتمسح في دموعها يلي مطلعوش اصلا!
عزام:مياسين في السياره و….
دارت حادث بسيط هكي
بنركبها دار ساره بنت عمي واهتمو بيها شويه
غداها عشاها وهكي
ربيعه:ناضت …انا مدخليش فيها كلم وحده من نساوين عمك معندي فيها قبول حتى نشوف وجها ….
عزام؛تكنطا من كلام حناه لكن موضحش!
ضرار:واقف على باب السياره…..لا حول ولا قوة الا بالله
وجعتيني وربي
مياسين:شافت لي باب الحوش بتوتر….ضض ضرار!
اسمك ضرار صح
ضرار:عيونه😅….اي اسمي
مياسين؛لو طلبت منك خدمه بسيطه هكي
ضرار:اكيد تفضلي
مياسين:نبي …..
عزام:امتى جيت انت؟
ضرار:توا كيف خشيت شفت البرنسيسه هاذي تقول كانت في الجبها
عزام:قام مياسين في مره وحده
ضرار:نعاونك!
عزام:درسلي السياره في القراج وساويها مليح
مياسين :نزلني نقدر نمشي على رجل وحده
عزام:مردش عليها وكمل مشي بيها وركب الدروج

 

 

اما مياسين كانت متجاهله قربه منه
وانفاسه يلي تخبط في وجها✨
فتح الباب برجله وساره وقفت مفزوعه…..خيرها😨😨
عزام:حادث بسيط…..وحطها على السرير
ساره:الف لاباس يارب انتي كويسه؟
مياسين:سارحه…..اي اي
عزام:تكلم وهوا طالع من الغرفه…..تعالي ساره نبيك
ساره:طلعت بعد ما رتبت السرير لي مياسين
عزام:يحكي وهوا يفتح في ازرار جاكيته …ديري بالك
غدي ولا عشي نحيلها منه وركبيهولها
بعدين بنجيبلك الادويه عطيهولها ومتخليش حد يجي يدوي معاها
ومتعطيهاش تالفونك
ساره:مش فاهمة شن يلي يقصده ولا علاش يحكي هكي
لكن من خوفها وافقت بدون اي سؤال
____________________________
جت الساعه11في الليل وبدي صوت الريح القوي زي الاشباح!
والصقع بدي اضعاف ✨
سفر العشي نحطو ❤️….وكان العشي رشده مبكبكة بي القديد ومفيش حاجه ناقصتها من الخضرا🫶🏻
جعفر:ترا الليم يلي جنبك
ضرار:تفضل
رجب:جهاد ديرو يوم وارفع الشباب لي المزرعه رتبولي الدنيا غادي
جهاد:ان شاء الله اهو عزام وتو نزيد نكلم سلطان وخوه
رجب:امالا وبن حناك مقابلتش؟
عزام:في دارها ركبلها السكر
رجب:حط الكاشيك…..علاش!
عزام:مرت عمي مفتاح غلطت عليها في الكلام

 

 

مفتاح:نعم!!
عزام:شافله بنضره حاقده…..المره هيا كبرت راسي وقلت نساوين وعقلهم صغير
لكن الجايه مش رح يصير خير …وناض
ايات:اهااا الف سلامه عليك
مياسين:بدون نفس…..الله يسلمك
فاطمه:لكن سيارة عزام مفيها شي !
وعزام كويس يعني كيف صار الحادث مفهمتش
ساره:اءء يا مياسين كولي شويه باش تقدري تاخدي دواك
مياسين:مخاطريش انا نبي نرقد بس
فاطمه:شافت لي ساره….اعتقد اني سألت مياسين وعيب تقصي عليا في الكلام
ساره:به مصار شي خلاص خلوها ترتاح بس
ايات:قربت على ساره ….اهدي ياحلوه تمام!!
اهدي ومعش تتخطي حدودك وتردي الدوا سلم بنتي
ساره:تباعدت على المشاكل وردت بي استسلام….تمام
ايات:شافت لي مياسين ….هي بسلامه ومتشوفي شر يارب
مياسين:ابتسمت بي مجامله ورقدت
ايات:شافت بنضرة تهديد لي ساره وطلعت من الغرفة
___________________________
كلام عفاف ونصائحها اطبعو بي الحرف ✨❤️
ويلي تصدف معاه بيكون الرابح
ويلي متصدفش معاه مرات نصيبه مش هنايا!
✨مش كل الرجاله تحب البنت المطيعه ويلي تتقبل طلباتهم بدون مناقشه وتكون عديمة شخصيه ،بعض او كل الرجاله يميلو للمراءه القوية يلي تعاند ✨
يوم تمشي في طوعه يحس روحه دار انجاز!
لكن مش كل انك تكوني قويه يعني تفقدي وتنسي ان عندك انوثه قادره اذوبي بيها الراجل ذوب👌✨
نبدو بي اول طريقه واول اسلوب ممكن تستخدميه معاه…
بتول:قامت شعرها …

 

 

ودارت مكياجها أخف من الخفيف ✨🌸
ولبست روب أسود بارز بياضها❤️
وعطرت الغرفة بريحتها يلي تجذب👌
سكرت اضواء الحوش كلها وخلت ضي الغرفه المطفي
وعلى الملحق حطت كاستين عصير وشوية ضيافه يلي فضلت من صاحبتها
اما عند مريم بخرت الغرفه وتبتها❤️
لبست روب قصير حني وشوية تنت ومسكره وفتحت شعرها✨
نقصت الاضائه وحضرت سفره تحل العين المغمضه ✨
عشاء متكم❤️
سلطان:فتح باب الحوش واستغرب !
قال في نفسه لما شاف الضي مطفي ….معقوله رقدت من ال11؟!
خش وجذباته الريحه من وسط الحوش لعند غرفة النوم
بتول:ابتسمت بدلع وقربت منه …على سلامتك
سلطان:يشوفلها وقلبه بيطلع من حلاوتها وحلاوة الجو يلي مدايراته ….سلمك
خيرك مسكرة الضي
بتول:قربت اكتر ونحت جاكيته وحطت يديها على كتافه ….فكرت وسخفتني كيف طلعت بلا فطور وتعبتك جبتلي كل شي
قلت نعوضك الليله
لو تحب يعني
وكملت كلامها بدلع…..ولو متحبش عادي غير ملابسك وارقد ❤️
سلطان:اما نرقد وقدامي الزين هاذا كله
بتول:ضحكت بدلع وفي عيونها نضرات النصر …
هنايا كلام عفاف طلع صح✅
___________________________
صدام:دف الباب برجله وخش⚡️
عصب لما لقي الدنيا ضلام …
خش لغرفة النوم وهوا يسأل ….خيرك مضلمه الدنيا هكي
مريم:قربت منه وخدودها الحمر طاغيين على جمالها🌸
قلت اكيد بتروح تاعب❤️

 

 

وتيتلك العشيه وخليت الجو مهيئ لي نومك✨
الايام يلي فاتو عصبتك هلبا ….وفكرت نعوضك
صدام:سكت شوي وهوا يتأمل في الغرفه والاجواء يلي مدايرتها ❤️
لين وصل فيها وفي عيونها✨
مريم:شافتله وهيا تراجي في ردة فعله بلهفه🔥
لين حطمها بي كلامه
صدام:ترا بلا جو شعابيط طلعي العشي من دار النوم وبري البسي حاجه زي الناس بدل العار يلي مش طالع عليك هوا وافتحيلي الضي بلا جو اتراك
مريم:تشوفله بصدمه
صدام:تحرررركي ولا متسمعيش….
مريم:واقفه ودموعها يطيحو
مسحت روجها بي طرف الروب وخشت للحمام طول ودموعها سابقينها
صدام:سكر عيونه وهوا يشم في عطرها❤️
وطلع من غرفة النوم
الواضح ان الوضع ممشاش مع صدام✅
_______________________________

 

 

مياسين:فتحت عيونها والعطش قاتلها
شافت يمينها ولقت ساره في سابع نومه
خدت القيلات يلي جابهم عزام وطلعت من الغرفه وهيا تمشي ببطئ وتساير في نفسها
وهيا تمشي خطمت على غرفة كان بابها مردود
والشي يلي شفاته خلاها تتراجع خطوات لين…

يتبع…

لقراءة الفصل التالي : اضغط هنا

لقراءة الرواية كاملة اضغط على : (رواية مجرد كارثه)

‫4 تعليقات

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى