رواية مملكة دانيال الفصل الثاني 2 بقلم عمرو راشد
رواية مملكة دانيال الجزء الثاني
رواية مملكة دانيال البارت الثاني
رواية مملكة دانيال الحلقة الثانية
انت بتقول ايه يا بابا
= انا مش ابوك يا حسن
انت بتهزر صح ، يعني ايه اصلا اللي انت بتقوله دا ، انا مش هصدقك ، انت كداب
= الله يسامحك يا ابني ، بس للاسف دي الحقيقة ، احنا لقيناك بتعيط في الشارع وانت صغير ، صعبت علينا خدناك وحاولنا نعرف مكان اهلك ولكن موصلناش لحاجة ف قررنا نربيك لاننا معندناش أولاد
” كنت واقف مش عارف انطق ، مصدوم من اللي بسمعه ، يعني اهلي اللي انا فضلت قاعد معاهم طول عمري طلعو مش اهلي ، و اهلي الحقيقيين محدش عارف هما مين ولا هما فين ، حسيت اني دايخ ، قعدت والسكوت هو اللي داير بينا ، امي اتحركت وجت جنبي
مهما يحصل ، انت هتفضل ابني وانا امك اللي ربيتك ، انت ابني يا حسن ومش هعرف اعيش لو انت بعدت عني ، خليك معانا يا ابني وانسى اللي ابوك قاله
= هو مقالش حاجة غلط بالعكس دا فهمني كل حاجة ، عموما شكرا على أي حاجة انتو عملتوها معايا ، وهنبقا نتقابل قريب ان شاء الله
” مشيت ، مكنش ينفع اقعد دقيقة كمان هناك ، دموعي كانت ماسكة نفسها بالعافية وأنا ماشي في الشارع ، كنت بسرع خطواتي عشان اوصل بسرعة واول ما وصلت البيت ، فضلت اعيط بشكل هستيري ، في كام ساعة بس خسرت كل حاجة ، انا عملت ايه في حياتي عشان يحصل معايا كدا ، يمكن ظلمت حد ولا يكونش أاذيت حد وانا مش واخد بالي ، بسأل وبرد على نفسي ، خلاص هتجنن لحد ما حسيت اني محتاج انام وفعلا استسلمت ونمت مكاني ، صحيت تاني يوم لقيت حاجة غريبة جدا ، المفروض اني كنت نايم برا في الصالة لكن انا دلوقتي صاحي وانا على السرير في اوضتي ، بس دلوقتي فهمت السبب لاني شوفتها تاني
صباح الخير ، نمت كتير أوي
= أنتي بتعملي ايه هنا
جاية اطمن عليك ، عارفة ان اللي سمعته امبارح مكنش سهل
= وانتي كنتي موجودة هناك
أنا معاك علطول يا حسن
= أنتي بقا تبقي مين ، أنتي واخدة بالك انك بوظتي حياتي في يوم وليلة ، من كام ساعة كنت هتجوز و اعيش حياتي مع اللي قلبي اختارها وحاليا انا لوحدي و حتى اهلي مش هما اهلي الحقيقيين واني مجرد طفل لقوه في الشارع ، واخدة بالك أنتي عملتي فيا ايه
عشان دا اللي لازم يحصل ، انت مكانك مش هنا ، مش دول اهلك ولا دي حبيبتك ولا حتى دا بيتك
= امال انا مكاني فين بقا
هناك في مملكة دانيال ، مملكتك يا حسن
= مين مملكة دانيال دي ، يعني ايه اصلا انا مش فاهم
ب اختصار كدا ، انت من مملكة دانيال ومش بس كدا ، انت امير مملكة دانيال ، الأمير جلال الدين دانيال ، و ابوك حاليا هو حاكم المملكة بس للاسف ابوك عنده أعداء كتير ، ولما عرفو انك انت اللي هتورث الحكم من بعده قرروا يخطفوك ويبعدوك تماما عن المدينة ، وطبعا بعدها حد لقاك وقرر يربيك اللي هما الناس اللي انت كنت عايش معاهم وعشان هما ميعرفوش اسمك ايه ، قرروا يسموك حسن
” كان المفروض اتأثر بس بصراحة ضحكت جدا لدرجة انها استغربت ، مكنتش عارف اسيطر على نفسي من الضحك
هايل ، هايل أوي يا…. ، قولتي اسمك ايه
= ماجيدة
هايل يا ماجيدة ، برافو عليكي ، مين بقا اللي بعتك عشان تقوليلي الكلام الفارغ دا
= دي الحقيقة ولازم تصدق عشان مفيش وقت ، عزيز عرف مكانك ولو جه هتبقا مشكلة كبيرة يا جلال
عزيز مين ، وبعدين ايه يعني خليه ييجي وهو انا هخاف
= عزيز يبقا من الناس اللي خطفوك وهو صاحب الفكرة اساسا ، أما لو انت مش خايف ف انت لازم تخاف ، عزيز هو أقوى راجل عندنا لانه بيملك قدرات محدش يملكها غيره ، وثانيا هو مش هيبدأ بيك ، هو هيبدأ باللي حواليك الاول
يعني ايه انا مش فاهم
= وقتي خلص يا جلال و لازم ارجع
أنتي يا ماجيدة أنتي استني انا لسة في حاجات كتير عايز افهمها
= مفيش وقت لازم ارجع حالا ، بس خلي بالك عزيز هيكون موجود النهاردة عند داليا الساعة 8 ، لازم تروح وتمنعه بأي شكل ، وعشان تعرفه هو عنده وحمة في رقبته لونها أحمر ، امنعه يا جلال
استني طي..
#بقلم #عمرو راشد
” امنعه ازاي دا ولا اعمل ايه ، داليا ، دي قالت هيروح عند داليا ، حاولت اكلمها كتير جدا بس متردش ، بعتلها رسايل بس مفيش نتيجة برضو ، الساعة داخلة على 4 ، قدامي 4 ساعات هعمل ايه ولا اتصرف ازاي ، رايح جاي في الأوضة بفكر بس لفت نظري حاجة موجودة جنب السرير ، خاتم بيلمع ، خاتم شكله غريب جدا واول مرة اشوفه ، ممكن يكون بتاع ماجيدة ، حبيت اجربه وكان شكله مميز جدا عليا ، انتبهت للساعة وكانت 5 ونص ، مضيعتش وقت ونزلت بسرعة عشان اروح ل داليا ، الدنيا زحمة جدا ، زحمة بشكل مش طبيعي ، مفيش حاجة بتتحرك من مكانها ، نزلت من المواصلات وفضلت اجري بأقصى سرعة ، جريت كتير جدا لحد ما وصلت ل بيتها ، طلعت السلم وبصيت على الساعة لقيتها 8:05 ، اتأخرت 5 دقايق مش مشكلة ، بس لقيت باب الشقة مفتوح ، قربت بحذر وسمعت صوت غريب جوا
بصراحة انا كنت جاي وحابب اطلب ايد الانسة داليا ، انا يشرفني جدا انها تقبل تتجوزني ، انا عارف انها لسة خارجة من علاقة بس انا بحبها وما صدقت ان دا حصل عشان ااجي واتقدم
” مكنتش مستني دقيقة واحدة ، فتحت الباب بكل قوتي و دخلت
حضرتك جاي عايز ايه
= انا جاي اطلب ايد الانسة داليا
الانسة داليا!! ، انت جاي تطلب ايد مراتي!
يتبع…
لقراءة الفصل التالي : اضغط هنا
لقراءة الرواية كاملة اضغط على : (رواية مملكة دانيال)
تعليق واحد