Uncategorized

رواية عشق مخيف الحلقة الأولى 1 الجزء 2 بقلم ندى

 رواية عشق مخيف الحلقة الأولى 1 الجزء 2 بقلم ندى 

رواية عشق مخيف الحلقة الأولى 1 الجزء 2 بقلم ندى 

رواية عشق مخيف الحلقة الأولى 1 الجزء 2 بقلم ندى 

دخلت سيلا بسعادة بعد رجوعها من المدرسة لاوضة مامتها لقيتها بترتب الدولاب بتاعها وقفت قدامها وفتحت ورقة فيها درجة الامتحان  : ماما ..تيرررررا 

جنة حضنتها بحب : مبروك يا حببتي ربنا مش بيضيع تعب حد ابدا 

سيلا : اووف اخيرا المادة دي خلصت منها .. انا مكنتش بحبها وذاكرتها اهوو هااا 

جنة بضحك : سيلا قولي عايزة ايه من غير لف و دوران

سيلا : احبك وانتي فاهماني  …ماما عايزة اتنقب بقي

جنة : ليه 

سيلا : عشان حاباه جدا لما بشوف عمتو بسنت ببقي حابة البسه،كمان عشان 

جنة قطعتها بحزن وقالت : عشان فهد صح 

سيلا بتوتر: ماله ابيه فهد 

جنة بحنية : مفيش داعي تخبي عني حاجة انا عارفة انتي بتفكري في ايه من غير ما تقولي 

سيلا بدموع: هو واحد اناني اساسا، بيوعدني وبيخلف وعده دايما ، مش هعتبره ابيه بعد كدة 

اخفت جنة ضحكتها وحاولت تتكلم بجدية : طب مش هتسألي بابا الاول 

سيلا بسرعة : هو هيوافق والله 

جنة : طيب نستني لما يجي من الشغل ونسأله ونشوف 

سيلا : اشطا ، هو احمد جيه ولا لسه 

جنة : لا لسه قدامه ساعة كدة ويوصل 

سيلا وهي خارجة : طويب هاروح اغير واجي 

” سيلا بيجاد  16 سنة عيونها زرقاء جذابة شعرها اسود طويل مجعد، نفس ملامح مامتها الرقيقة ، رفيعة و متوسطة الطول ، في تانية ثانوي ادبي ” 

“احمد بيجاد 14 سنة في 2 اعدادي نفس ملامح بيجاد مش شبه مامته في اي حاجة … بيحب الرياضة جدا خصوصا كرة السلة ” 

دخلت سيلا اوضتها وبتفكر في باقي خطتها : ماشي يا ابيه ، انا هوريك  ونشوف هتعرف تسافر تاني ولا لا بعد كدة .

غيرت سيلا هدومها وخرجت 

سيلا : ماما ، انا هاروح عند عمتو بسنت 

جنة : طيب متتأخريش عشان الغداء ها 

سيلا : حاضر 

خرجت سيلا وخبطت عالشقة اللي في مقابل شقتهم: افتح ياسطا 

كريم : ايه ياسطا دي ، مش فاتح 

سيلا بهزار: افتح اكيمو

كريم فتح : يا ساتر عالرخامة خشي 

سيلا : يابني احترمني اكتر من كدة انا اكبر منك علفكرة 

كريم : تلاعبيني جيم عالسريع 

سيلا: طب فين عمتو بسنت الاول وفين اختك الموكوسة

كريم : انهو واحدة فيهم 

سيلا : الكبيرة الهبلة 

كريم : جوة في اوضتها 

سيلا : هقولها حاجة و اجيلك 

كريم : اشطا 

“كريم 12 سنة  في 6 ابتدائي،  شعره اسود بعيون زرقاء، شبه جاد جدا ، بيحب اللعب اكتر من حياته، عنده اخت تؤأم اسمها كارما و فيها نفس الملامح ” 

” ياسمينه اخت كريم وكارما الكبيرة اصغر من سيلا بسنة ونص نفس ملامح بسنت عيون سود وشعر اسود ناعم ، في اولي ثانوي ” 

دخلت سيلا : ياسميييييناااااااه 

ياسمينة بخضة : يا حمارة خضتيني 

سيلا : بقولك انا هتنقب عشان 

ياسمينة قطعتها بحزن : سيلا انا عايزة اعترف بحاجة 

سيلا باستغراب : مالك حصل حاجة 

ياسمينة : انا بحب فهد 

سيلا بصدمة مخفية : ابيه فهد 

ياسمينة: ايوة انا حاسه اني بحبه جدا .. و كنت خايفة اعترف ب ده 

سيلا : بس احنا لسه صغيرين علي المواضيع دي 

ياسمينة بدموع : معرفش بقي بس هو في فترة غيابه دي وحشني جدا 

سيلا بغضب : ياسمينة ده اخونا ازاي تفكري كدة بالطريقة دي ، متوقعتش ده منك ابدا 

خرجت سيلا بزعل ومشت 

سيلا دخلت اوضتها تعيط : انا بعيط ليه دلوقتي انا مالي ..ممكن يكون بيحبها هو كمان .. طب هو كان بيقولي اننا اخوات ممكن يكون بيكدب عليا 

بيجاد دخل سيلا : الجميل بيعمل ايه 

سيلا حضنت باباها بسرعة وعيطت : بابا انا متضايقة 

بيجاد بضيق وقلق : مين ضايقك.. حصل ايه 

سيلا : محصلش حاجة 

بيجاد : هتخبي عليا 

سيلا بدموع : لا .. بس ابيه فهد مشي زي كل مرة وبيضحك عليا 

ابتسم بيجاد : ده شغله هيعمل ايه طيب 

سيلا : بس هو مش بيسلم عليا حتي مشي كدة من غير ما يقول 

بيجاد : اكيد يومين وهيكلمك مش انتوا اخوات مفيش اخ بيتخلي عن اخته ابدا

سيلا بتوتر : عندك حق ، بس هو بيكدب عليا 

بيجاد باستغراب :  كدب عليكي  في ايه .. طب انتي ناوية علي ايه 

سيلا افتكرت موضوع النقاب : بابا بص انا عايزة البس نقاب عشان حاسه هتقرب من ربنا بيه وهتجنب اي سيئات ممكن اكون باخدها من غير ما اقصد.. وفي نفس الوقت عايزة اعاقب ابيه فهد 

بيجاد باستغراب: تعاقبيه ازاي 

سيلا : هو دايما بيضحك عليا ويقولي انه هيفضل معانا ويمشي ف انا بقي هبعد عنه خالص حتي لو جيه ومش هخليه يشوفني اساسا 

بيجاد : بس دي طريقة مش حلوة 

سيلا : يا بابا انا عايزة اعمل كدة .. كدة احسن 

بيجاد : انتي فيه حاجة تانية مضايقاكي 

سيلا بتوتر : لا 

بيجاد بحنية : سيلا انتي بتحبي فهد حب تاني غير الاخوة ده 

سيلا خجلت بشدة واتوترت : لا طبعا يا بابا ازاي تقول كدة

بيجاد ابتسم :  انا بفكر معاكي مش اكتر .. طب بصي هو ده طبعا غلط انك تتصرفي كدة حقيقي و انتي لسه صغيرة استني خلصي ثانوي واعملي اللي عايزاه

سيلا بحزن : بابا عشان خاطري 

بيجاد : طب موافق بس حرام تقلعيه لو لبستيه علفكرة 

سيلا : مش هقلعه ابدا 

بيجاد : امممم طب ممكن طلب قبل ما تاخدي قرار 

سيلا : ايه 

بيجاد : صلي استخارة وشوفي هترتاحي ولا لا لو ارتاحتي هوافق 

سيلا : ماشي اتفقنا 

بيجاد : فيه حاجة تانية مضايقاكي 

سيلا بتوتر : لا مفيش 

احمد دخل ليهم : يلا عشان الغدا ماما جهزته 

بيجاد خرج لجنة ووقف جانبها وباصصلها بحب : قلب بيجاد عاملة اكل ايه 

جنة قربت وباسته بحب : اللي قلب جنة بيحبه 

بيجاد : وحشتيني 

جنة : وانت كمان اوي 

بيجاد : سيلا حكتلك حاجة 

جنة : هي مشتته شوية ، انت دايما مدلعها

بيجاد : انتوا اغلي حاجة عندي لازم ادلعكوا كلكوا 

جنة : ابقي اقعد مع احمد شوية 

بيجاد : اكيد بعد الاكل 

جنة : طيب يلا 

بعد الاكل 

سيلا موبايلها رن .. دخلت ترد 

سيلا : الو 

فهد : سيلا 

سيلا : ابيه فهد 

فهد: عاملة ايه 

سيلا : الحمدلله وانت 

فهد : الحمدلله ، انتي زعلانة 

سيلا : ايوة زعلانة ومش عايزة اكلمك تاني 

فهد بحزن : ليه طيب ده شغلي علفكرة 

سيلا : بس مشيت فاجأة مقولتليش كأني مش اختك ابدا وقولت ل ياسمينه بس 

فهد : هي وقتها كانت بتكلمني فقولتلها 

سيلا بغيرة : طيب انا مليش ذنب بردو زي ما تعرفها تعرفني انا كمان ، انا مش هسامحك ابدا ، انت كدبت عليا .. انت موعدتنيش بكدة 

فهد لسه هيتكلم سيلا قفلت في وشه 

وعيطت كتير بدون سبب مدرك بالنسبالها وشوية واغمي عليها 

بيجاد بقلق : بقولك شوفي سيلا عشان صوتها مش مطمني 

قامت جنة و دخلت ليها تشوف مالها لقتها واقعة عالارض : بيجاد الحقني .. سيلا 

جري بيجاد واحمد ل سيلا وحاولوا يفوقوها 

فاقت سيلا بعد شوية وحضنت باباها وعيطت 

جنة بقلق : حصل ايه 

سيلا : اتخانقت مع فهد 

جنة : عيب يا سيلا هو أكبر منك وعيب تتخانقي معاه كدة ، مش احنا اتكملنا قبل كدة في الموضوع 

سيلا بدموع : انا اسفة 

بيجاد : حصل خير ، متزعليش نفسك من اي حاجة .. انتي كويسه ولا حاسه بتعب 

احمد : كويسه اهي ، بقولك ايه ما تيجي تروحي معايا النادي  بكرة بدل ما انتي طول اليوم هنا

بيجاد : اه روحي غيري جو مع اخوكي 

سيلا : ماشي 

——–

حسام قاعد عند التليفزيون يزهق.. وسلمي بتغسل الاطباق في المطبخ… فنادي عليها بزعيق : سلمي ، يا سلمي 

سلمي بتعجب وقلق يابت اللي في ايديها وراحتله : ايوة 

حسام ضحك عليها وحضنها : بردو بتقلقي عالفاضي كل مرة 

سلمي : يا ساتر لازم تخضني كدة بردو 

حسام ضحك: اقعدي معايا شوية انا نازل الشغل اساسا ف اقعدي شوية معايا 

سلمي بصتله بحب وقعدت جانبه في حضنه  وبعد وقت قالت : حسام 

حسام : اممم 

سلمي : انت عمرك ندمت انك مخلفتش تاني 

حسام : ابدا ، زي ما قولتلك انا بحبك ومش حاجة زي دي كانت هتفرق في قراري 

سلمي : يعني لو مت هتتجوز غيري 

حسام بزعل : سلمي اوعي تقولي كدة تاني ، حتي انتي بتفكري كدة 

سلمي مسكت ايديه بحب : اسفه والله انا بس قولت اللي في بالي مش قصدي… حسام بقي … 

مردش عليها 

سلمي : بحبك والله ،، يا حُس بقي 

ضحك حسام : ايه حُس دي مش كبرتي عليها 

سلمي قامت بزعل مصطنع: قصدي ايه اني كبرت انا لسه صغيرة علفكرة.. وايه رأيك بقي هاروح اجيب كيك بالشوكلت لوحدي وانت لا.. هاا 

حسام بضحك : مجنونة والله ، مش عارف هتعقلي امتي ..لسه هتتعبيني معاكي كتير شكلك .

———–

فهد دخل شقته بتعب في بلد تانية غريبة وحيد فيها بشكل لا يطاق ورمي نفسه عالسرير من التعب والارهاق بس مش عارف ينام بعد مكالمه سيلا فتح موبايله وشاف صورتهم سوا  : انا عارف انك زعلانه بس غصب عني ، لازم اخلص شغلي ولازم تركزي في مذاكرتك،  مع اني حاسس انك مش كويسه بس عايزك تعتمدي علي نفسك انا مش هكون أخ ليكي للأبد.  

———

جاد مع ابنه كريم  وبنته كارما  بيلعب معاهم شوية: يا ولاد الاوزعة … هتخسروني 

بسنت قاعدة بتتفرج عليهم  : انا اوزعه 

جاد : ايوة 

بسنت : ماشي يا جاد خليك فاكرها 

جاد بصلها بمكر : ناوية علي ايه 

بسنت بخجل : مش علي حاجة انت بتفكر في ايه 

جاد : يؤغتي لسه بتتكسفي يا بيضة 

بسنت ضحكت بشدة : لا بس انت كبرت جدا يا حبيبي

كارما : بابا مكبرش..  بابا قمور دايما 

جاد : حببتي اللي في صفي دايما 

كارما بتطلع لسانها لبسنت 

بسنت : ماااشي هقصلك لسانك ده 

كريم : وانا هساعدك يا ماما عشان هي مش بتبطل رغي 

كارما : وانت مش بتبطل لعب طول النهار والليل ، خليني العب شوية لوحدي 

جاد : ما احنا بنلعب اهو كلنا بقي 

بسنت : انا هقوم اشوف ياسمينه فين 

جاد بغمز : يا جدع 

بسنت ضحكت : طب علفكرة هاروح اشوفها بجد بقي واسكت بقي 

جاد : ماااشي مااااشي يا سوسن 

———-

بعد شهرين 

ياسمينة : ازيك يا عمتو 

جنة : حبيبة عمتو،  عاملة ايه 

ياسمينة: الحمدلله .. فين سيلا 

جنة : في البلكونة جوة ، ادخليلها بقي لحد ما اجيب حاجة ناكلها 

ياسمينة : اشطا يا قمر انت 

دخلت البلكونة : سيلاااا 

سيلا : لسه فاكرة تسألي عليا 

ياسمينه : والله امتحانات بقي وحاجة نيلة يعني ومش بخرج اساسا بكسل 

سيلا اتضايقت من تصرفها بس سكتت : ربنا يوفقك 

ياسمينة: انتي اتضايقتي من اللي قولتهولك اخر مرة 

سيلا بكدب : لا ابدا بس براحتك يعني لو انتي وهو فيه نفس المشاعر خلاص 

ياسمينة : متأكدة ان مفيش حاجة 

سيلا ببرود : لا مفيش 

ياسمينة : تفتكري بجد ممكن يطلع بيحبني ونتجوز … كلمني امبارح علفكرة.. هو مش بيكلمك 

سيلا : لا كنت مشغولة ف مردتش 

ياسمينة : اممم عموما هو سأل عنك زعلان انك مش بتكلميه 

سيلا بتوتر : قال ايه 

ياسمينة : ابدا بس صوته متضايق  ، سال عليكي كويسه ولا لا ، بتذاكري ، بتعملي ايه جديد في حياتك وهكذا 

شعرت سيلا بإحساس جديد وواشتياق غريب : بجد 

ياسمينة: ايوة ف ابقي كلميه حرام عشان ميزعلش بس 

سيلا بتوتر : هحاول لو فضيت 

ياسمينة: انتي صح اتنقبتي بجد 

سيلا بفرحة : ايوة استني هوريكي 

لبسته سيلا 

ياسمينة بانبهار : شكله جميل اوي عليكي 

سيلا : بجد 

ياسمينه : اوي والله ، ربنا يحفظك يارب 

سيلا : يارب 

فضلوا يتكلموا وقت طويل وفات كذا ساعة في الكلام . 

رن تلفون البيت احمد جري يرد 

احمد : الو 

سلمي : ازيك يا احمد

احمد : الحمدلله .. عاملة ايه يا عمتو

سلمي : الحمدلله يا باشا ، جنة فين

احمد نادي علي مامته 

جنة : سلمااااي 

سلمي بضحك: قلباااااي .. بقولك بكرة عازمينكوا

جنة : يبقي عشان فهد راجع 

سلمي بسعادة : ايوة هيرجع يومين وعايزين نتجمع وكدة يوم عالاقل بس 

جنة : جايين طبعا .

سلمي بطيبة وحب : وحشني جدا يا جنة والله رغم انهم شهرين بس عدوا كأنهم سنين .. بحس بوحدة فظيعة لما يكون مش موجود .. حسام كتر خيرك بيخفف عني كتير 

جنة : حببتي والله انتي احلي حاجة في حياتنا .. فهد بيحبك جدا وكذلك حسام وانا و سيلا وكلنا بنحبك وعمرنا ما هنبعد.ابدا عن بعض 

سلمي : يارب نفضل نتجمع كدة دايما 

جنة : يارب .. يلا بقي اتكلي علي الله عشان اقول لسيلا 

سلمي : جنة 

جنة : ايوة 

سلمي : فهد بيحب سيلا 

جنة : قولي حاجة جديدة 

سلمي : بتكلم بجد ، انا والله مش عارفة انتوا متضايقين من ده ولا لا بس انا بشوف نظراته ليها بتبقي ازاي .. هي بتحبه طيب 

جنة : حاسه كدة بس هي مش مدركة ده 

سلمي : يااااه  هخطبهاله علفكرة وهخطفها منك 

جنة بضحك : خديها ????

سلمي : بكرة تعيطي لما تيجي تمشي من عندك 

جنة : منا هاجي اعيش معاكي 

سلمي : لا ياختي هو انا ناقصة 

جنة : امشي يا كلبة البحر من هنا

سلمي : ليكي يوم ، سلام 

———

دخلت جنة ل سيلا وياسمينه : عندي خبر جديد جبار بمليون جنيه

سيلا بتلقائية قلبها دق بعنف : ايه 

جنة : فهد راجع بكرة 

سيلا اتوترت وفرحت  وقالت هي وياسمينه في نفس الوقت: احلفي 

جنة بضحك : ايوة سلمي لسه مكلماني 

ياسمينة: طب انا همشي بقي 

سيلا : رايحة فين 

ياسمينة: اكيد فيه عزومة بقي زي كل مرة .. هاروح اظبط طقم جديد لبكرة 

سلااااام 

سيلا شعرت بغيرة.. حاسة مش عارفة تسيطر علي مشاعرها اطلاقا فكرت في قرار هيريح تشتتها فقالت: 

يتبع..

لقراءة الحلقة الثانية : اضغط هنا

لقراءة باقي حلقات الرواية : اضغط هنا 

نرشح لك أيضاً رواية وحدة شغف للكاتبة ندى.

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى