رواية لنرقص تحت المطر الفصل الأول 1 بقلم نورهان حلمي
رواية لنرقص تحت المطر البارت الأول
رواية لنرقص تحت المطر الجزء الأول
رواية لنرقص تحت المطر الحلقة الأولى
يا عز..يا استاذ اصحي بقي هتتأخر علي الشغل
فتح عنيه و هو بيبصيلي بإرهاق
عز
من امتى النشاط ده كله على الصبح يا ست نور ده انا وخالتك كل يوم بنغلب عبال ما بنصحيكي!!!
صفاء خالت نور
اصل النهارده اول يوم كليه ليها عشان كده زي ما انت شايف متحمسه زياده عن اللزوم
نور
سيبيه يا خالتي يسأل كمان ما اصل لو كان مهتم بأخته الوحيده كان عرف انا رايحه فين وجايه منين
عز
انا اكيد فاكر يعني بس.. لسه صاحي من النوم ومش مركز
نور
طب يلا فوق يا حبيبي عشان انت اللي هتوصلني اول يوم
قام من مكانه وبعدين وقف وهو حاطط ايديه على دماغه كأنه بيحي العلم
عز
عُلم يا فندم ربع ساعه و اكون جاهز
روحت بسرعه دخلت اوضتي وانا بجهز نفسي قدام المرايه للمره الثالثه تقريباً وبعدين طلعت لقيته اتوضا وبيصلي و بعدين اتجمعنا على السفره وبدانا نفطر
عز
لما تخلصي اول يوم ليكي رني عليا وانا هاجي اخدك
نور
اكيد مش هخليك تسيب جامعتك وتيجي تاخدني من الكليه بتاعتي
صفاء
عندها حق يا عز وبعدين كليه الطب بعيده عن كليه التمريض
عز
ما تشغليش بالك بكل اللي انتي بتقوليه ده انا ممكن ما امشيش من قدام الكليه بتاعتك لحد ما تخلصي ونروحوا مع بعض
نور ضاحكه
فكرتني بأيام الحضانه و المدرسه بجد كنت تسيب كل اللي وراك وتعرف تستناني قدام المدرسه لحد ما الشمس تحرق راسك.. بس دلوقتي الوضع اتغير يا دكتور عز
عز
ايه اللي اتغير انتي لسه اختي وبنتي حبيبتي اللي بخاف عليها وبعدين انا خلاص شبه خلصت جامعه يا دوبك بدرب
نور
خلاص اللي يريحك بس ابقي روح الجامعه و بعدين تعلالي مش تستنا قدام باب الجامعه!!
عز
خلاص يا ستي اتفقنا
ابتسمت له وبعدين بصيت له و هو بيكمل اكل عز اخويا اللي عوضني عن خساره ابويا وامي عمره ما حسسني بغيابهم ما اعتقدش اصلا ان في حد في الدنيا ممكن يبقى حنين عليا ربع حنيه عز،طول الوقت انا اول اهتماماته في الحياه واكثر حاجه في الدنيا بيحبها ويخاف عليها ما تخيلش اصلا ان في يوم من الايام ممكن اخسر الحب والحنيه دي كلها عشان كده عمري في حياتي ما هختار واحد اقل من عز اخويا في اي حاجه
صفاء
صحيح يا عز قبل ما انسى … سمعتك امبارح بتتكلم في التليفون بصوت حنين كده انت رجعت لريم ولا في واحده جديده
عز
احم.. دا انت ودانك اقوى من ودان الفيل
صفاء
لا رد يا اخويا من غير استعباط
عز
انا وريم رجعنا لبعض من اسبوع
نور
يا واطي!!! اسبوع بحاله من غير ما تقولنا ورجعتو ازاي اصلا
عز
ده موضوع طويل محتاج قعده طويله انا كنت بس مشغول في الدراسه الفتره اللي فاتت وكمان ما جتش الفرصه ان انا احكي لحد لاني ما كنتش متاكد من رجوعنا لكن امبارح لما اتكلمنا مع بعض حسيت ان احنا رجعنا كلياً
نور
لا ده موضوع طويل بقى تعالى احكيهولي في العربيه
صفاء
اوعى تحكي لها حاجه غير لما نتجمع كلنا مع بعض خلينا نصبر لحد العشا يا نور عشان نتكلم في الموضوع ده على روقان
عز ضاحكاً
والله كبرتو الموضوع يا شباب!
نور
هو كده كده اصلا كبير ده مستقبل الراجل اللي حيلتنا يعني لازم نكون مهتمين جدا بيه!!
عز
طب يلا قومي يا ام لسان ونص خلينا ننزل عشان ما نتأخرش
نور
ما تقولش انك هتوصلني بعربيه جدو اللي فاضلها حمار وتبقى عربيه خضار!!!
عز
هي عربيه جدك اللي هوصلك بيها هو احنا حالتنا غيرها وقومي يلا انجزي
نفخت بضيق وبعدين مشيت وراه ونزلنا للعربيه شغل اغنيه فيروز بتاعه كان عنا طاحون… دي اغنيتنا المفضله انا وعز كنا بنغنيها و نرقص و الدنيا بتشتي من و احنا صغيرين
فضل بيسوق و احنا لسه بنغني بكل حماس وفرحه زي كل مره لحد ما وصلنا كليه التمريض بتاعتي بوستو من خده وبعدين نزلت من العربيه وانا بعمل له من الشباك باي وبعدين دخلت للكليه وانا ببص حواليا ومش قادره اتصور اني كبرت طالبه جامعيه!!!
سلمي
نور… عامله ايه وحشتني
بصيت للصوت لقيتها سلمي كانت معايا الثانويه
سلمى
واخيرا شوفت حد اعرفه!!
للاسف عمري ما استلطفت سلمى دي لان كلنا كنا عارفين مشيتها عامله ازاي عشان كده كنت بتجنب التعامل معاها لان سمعتها ما كانتش كويسه خالص وسطينا قربت حضنتني وانا كنت بحاول ابعد عنها بهدوء وبعدين سلمت عليها ومشيت من قدامها على طول بحجه ان المحاضره الاولى بتاعتي هتبدأ
دخلت السكشن بتاعي وبعدين جريت على غادة صاحبتي من الطفولة
غادة
واخيرا جيتي انا مستنياكي بقالي ساعه
نور
معلش يا غاده اصل جيت بعربيه اخويا عز
غادة بلهفه
هو عز اخوكي اللي وصلك!!
نور
ايوه!!!
غادة
يا خساره بجد يا ريتني كنت وفقت اني اجي معاكي
نور
يا بنتي اتهدي بقى وشوفيه مستقبلك اصلا اخويا رجع للاكس بتاعته
غادة
بجد عز راجع لريم!!! يا خسارة
نور
خساره في عينك خلي الولد يعيش حياته وبعدين ريم جميله و بنت حلال بس مش فاهمه ليه كل شويه بيتخانقوا مع بعض
غادة
ما فيش بينهم تفاهم يعني صدقيني هيلف يلف ويرجع لي انا
نور
يرجعلك ايه يا متخلفه انتي هو يعرف انك عايشه اصلا!!
غادة بحزن
عندك حق هو ما يعرفش ان انا اعيش يلا مش مهم نشوف غيره!!
ضحكت عليها وانا بهز دماغي وبعدين دخلت الدكتور وبدات تدينا اول محاضره بعد ما عرفتنا على نفسها
خلصنا اول يوم للجامعه واحنا بنتمشى في الكليه وخلاص فاضل شويه ونطلع قابلت في وش للمره التانيه سلمى
سلمي
نور… شوفتك تاني اهو..اومال انتو رايحين فين!!
نور
ءءء احنا خلصنا ومروحين
سلمي
طيب بما ان المنطقه بتاعتي قريبه من منطقتكم ايه رأيك نتمشى مع بعض
نور
بصراحه اصل اخويا هيجي ياخدني
سلمي
و ايه المشكله
بصيت انا و غاده لبعض واحنا مش عارفين نتهرب منها ازاي
نور
بصراحه يا سلمى انا مش بحب اكون منافقه عشان كده عايزه اقول لك اني مش حابه انك تتقربي مني كلامك معايا بيحسسني بشعور مش مريح يا ريت نكون زمايل من بعيد لبعيد احسن
بصيت لي بجمود من غير ما تدي اي تعبير وبعدين حطيت ايدي في ذراع غاده ومشينا من قدامها
نور
حاسه ان كان اسلوبي قاسي شويه!!
غادة
شويه!!!
نور
كلنا عارفين يا غاده مين سلمى وعلاقاتها اللي من كترها ما بتتعدش… اخويا لو شافني في يوم ماشيه معاها بجد هيهزقني جدا
غادة
بس على الاقل كان المفروض ترفضي بطريقه الطف من كده
نور
انا قلت اللي جه في دماغي بقى و خلاص
سكتت غاده وبعدين انا بصيت قدامي وانا حاسه فعلا بالذنب اني جرحتها بالذات ان هي ما ردتش عليا وده وجع ضميري اكتر وحسسني ان تماديت في الكلام معاها بالطريقه دي حضانت الشنطه بتاعتي وانا مستنيه عز اخويا…
***************************
في كلية الطب
ريم مبتسمه
خلصت يا دكتور عز!!
عز
خلصت يا قلب دكتور عز!!
بصه ريم حواليها وبعدين قربت وهي بتحط ايديها على ايد عز
ريم
وحشتني بجد
عز
و انتي اكتر..اصلا انا لحد دلوقتي مش مصدق ان و اخيرا رجعنا!!
ريم
طب ايه رايك عشان تصدق اكتر نطلع نتغدا مع بعض!
عز
للاسف انا مش فاضي حاليا .. نور اختي اول يوم في الجامعه ليها وانا وعدتها اني هروح اجيبها
ريم
صحيح هي عامله ايه!!
عز
كويسه الحمدلله، صحيح يا ريم..كلمتي اهلك علي اتفقنا
ريم
ءءء اتفاق ايه!!
عز
معقولة نسيتي بالسرعه دي كلها.. مش احنا اتفقنا انك هتكلميهم عليا بدل ما كل شويه تقدم لك عريس وانت مش عارفه ترفضيه ازاي
ريم
بصراحه انا لسه ما قلتش حاجه مستنيه الوقت المناسب بس
عز
مستنيه الوقت المناسب ولا مكسوفه تقولي لهم ان الشاب اللي انت عايزه تتجوزيه كان طفل نشأ في دار أيتام!!
ريم
تاني نفس الموضوع ده انت ما بتزهقش تتكلم فيه!!!!
عز
طول ما انت مش صريحه معايا ومش راضيه تقولي لي ايه السبب انك مش راضيه تقولي لاهلك عليا هفضل انا اسيب نفسي لدماغي اللي بتقولي انك مكسوفه تقوليلهم عليا!!
ريم
مفيش اي حاجه من اللي انت بتقولي عليها دي انا بس لسه مش مستعده مستنيه لما انا وانت نقف على ارض ثابته ونحط ايدينا في ايد بعض وبعدين ابقى اعرفهم عليك.. وعلى فكره بقى اهلي مش ماديين خالص ولو كنت انا مأجله فعشان بس مش هينفع اقول لهم اني عايزه اتخطب لطالب لسه
ثم ان الماضي بتاعك انت ما لكش ذنب فيه وهما هيبقوا مقتنعين بده
عز
انا بجد اسف يا ريم لو فرغت عليك عصبتي الفتره اللي فاتت
ريم
انا بس عايزاك تثق فيا ان عمري ما هخذلك طول ما انا عايشه
ابتسمتلها وبعدين ضغطت على ايديها وانا بطمنها انا كمان
عز
انا هروح اجيب اختي من الكليه ولما اروح هبقى ارن عليك
هزت راسها بالموافقه وبعدين ركبت العربيه بتاعتي وروحت للكليه بتاعتها لقيتها واقفه وصاحبتها دخلت ركبت جنبي وصاحبتها ركبت ورا وبعدين حطيت ايدي على شعرها وانا بطبطب على راسي
عز
ايه اخبار اول يوم في الدراسه
نور
انت ليه محسسني اني كنت في الحضانه!!
عز
هو انتي ما تعرفيش تردي من غير لماضه!!
نور
طبعا زي اي واحده في الدنيا كان الحماس واخدني لكن اول ما الدكتوره دخلت وبدات تقول كل كلمه بالانجليزي وانا كنت قاعده قدامها طبعا شبه الحماره حسيت ان انا تسرعت في الحماس!!
ضحك بقوه وهو بيخبط على كتفي وبعدين انا بصيتله بضيق وصلنا قدام بيت غاده ونزلت لانها كانت قبلي بكام شارع وبعدين انا وعز اخويا وصلنا البيت
طلعنا على الغداء وبدا يحكلي انا وخالتي على كل اللي حصل بينه و بين ريم و ازاي اتصلحو
عز
بما انكم عرفتوا كل حاجه انزلوا بقى من على وداني عشان هدخل اذاكر شويه في اوضتي و بعدين انام و صحوني علي العشا
دخل عز وبعدين قربت من خالتي وانا ببص لها بتردد
صفاء
خير يا بنت اختي عايزه تقولي ايه
نور
بصراحه في موقف حصل معايا مضايقني جدا وعايزه احكيلك عليه وتقولي اذا كنت انا غلطانه او لا
صفاء
احكي في ايه!!
نور
في واحده كانت معايا في الثانويه كنت اعرفها من بعيد لبعيد بس كنت دايما بسمع عنها كلام وحش زي ان هي بتعمل علاقات مع الشباب وكده وماشيها يعني مش كويس وده اللي كان بيخليني اتجنب التعامل معاها بالذات اني حكيت في مره عليها لعز اخويا وقالي اوعي تقربي منها
صفاء
وبعدين!!
نور
النهارده اول ما دخلت الجامعه لقيتها بتقربب عليا بحماس كده وبتسلم عليا وكأننا اصحاب مقربين وبعدين انا اتهربت منها وقلتلها اني هروح المحاضره وبعد ما خلصنا المحاضرات وانا طالعه لقيتها عايزه انها تصاحبني وبعدين قالتلي اني هي تركب معانا انا وغاده وتروح معانا البيت عشان كده انا قلتلها ان وجودها قريب مني بيحسسني بشعور غير مريح وانا مش عايزه اصاحبها
صفاء
قولي لي يا نور هو انتي عمرك شوفت منها موقف وحش!!
نور
بصراحه انا عمري ما شوفتها بعيني بس دايما بسمع عنها من صحابي كلام عنها مش كويس
صفاء
بصي يا نور حبيبتي طالما ما شوفتيش اللي قدامك وهو بيغلط يبقى ما تحكميش عليه يمكن البنت اللي كل اصحابك بيتكلموا عنها دي تكون احسن منهم كلهم كمان، عشان كده بلاش تحكمي على حد من كلام الناس كان المفروض تتأكدي قبل ما تحكمي عليها يعني كنت تسيبيها تقرب منك واول ما تشوفي منها اي تصرف مش كويس تبعدي عنها على طول
كلام خالتي صفاء خلاني احس بالذنب اكتر اني جرحتها وبعدين قررت ان بكره لازم اروح اعتذر لها وفعلا تاني يوم روحت الكليه واول ما دخلت من الكليه روحتلها
نور مبتسمه
سلمي..صباح الخير
بصيت لي من غير ما تدي اي رده فعل وبعدين بصت قدامها
نور
ءءء انا بجد اسفه على طريقه كلامي معاكي امبارح بجد ما كنتش اقصد اي كلمه من اللي انا قلتها
بصيت لي شويه بعدين لقيتها بتبتسم ابتسامه خفيفه
سلمي
عادي ولا يهمك
سلمي
على فكره احنا ممكن نبدا من اول وجديد ونبقى اصحاب
نور
بجد…ياريت
سلمي
النهارده عامله حفل في البيت بتاعنا عشان نقلت جديد وعزمت فيها كل صحابي ايه رأيك تيجي
بصيت لها شويه بتفكير وبعدين هزيت راسي بالموافقه وبعدين هي ابتسمت ابتسامه عريضه
غادة
بتهزري!!! يعني انتي رفضتي ان هي تمشي معانا امبارح تقومي رايحه لها البيت النهارده
نور
انا بس بحاول اعبر لها عن اعتذاري وبعدين ممكن سلمى دي تكون احسن مني ومنك كمان
غادة
على العموم براحتك انا كده كده مروحه النهارده بدري علشان اختي جايه لها عريس النهارده بس لما انتي تروحي ما تنسيش تطمنيني عليك
نور
حاضر
خلصنا المحاضرات وبعدين عرفت عز اخويا ان انا هطلع مع اصحابي النهارده وبعدين روحت مع غاده البيت واول ما دخلت لقيت البيت هادي جدا وما فيش اي زينه او ناس
نور
انتي مش قلتي في حفله النهارده!!
سلمي
هي في الحفلة بتبدأ من النهار كده انا بس قلت نقعد مع بعض ندردش ونجهز الدنيا مع بعض بس الاول خليني اقدملك حاجه تشربيها
هزيت راسي وانا بلف حواليا وبتفرج على البيت بتاعها وبعدين حطت قدامي عصير مانجا وطبعا ده المفضل عندي شربت الكوبايه كلها و بعدين كملت لف في البيت فجأه حسيت ان الدنيا بتلف بيا وان الالوان كلها دخلت في بعض و بعدين لقيت شاب واقف وبيبتسملي ابتسامه شريره بعد اللحظه دي فقدت الوعي!!!
***************************
عز
خالتو انا جيت عملتي غدا ايه
صفاء
فراخ وملوخيه
عز
الله عليكي جايه في وقتك!
صفاء
بس انا قلقانه قوي على نور اختك يا عز من الصبح برن عليها!!
عز
هي قالت لي ان هي طالعه مع اصحابها سيبيها تشم هوا مش عايزها تحس بإن هي اتخنقت في الكليه!!!
صفاء
عندك حق
فجأه الباب خبط راحت خالتي صفاء تفتح الباب وانا كنت بتصفح على التليفون فجأه لقيت خالتي بتشهق بقوه ببص عليها لقيت نور اختي وشها منفوخ من كتر العياط وشعرها ولبسها متبهدلين وبعدين بصيتلي بحزن وكسره واترمت في حضني وهنا قلبي انقبض بعد ما استوعبت اني في مصيبه كبيره حصلت!!!
يتبع….
لقراءة الفصل التالي : اضغط هنا
لقراءة الرواية كاملة اضغط على : (رواية لنرقص تحت المطر)
