Uncategorized

رواية عائلات راقية بفسادها الحلقة الثالثة عشر 13 بقلم أروى طاهر المسلاتي

  رواية عائلات راقية بفسادها الحلقة الثالثة عشر 13 بقلم أروى طاهر المسلاتي

 رواية عائلات راقية بفسادها الحلقة الثالثة عشر 13 بقلم أروى طاهر المسلاتي

 رواية عائلات راقية بفسادها الحلقة الثالثة عشر 13 بقلم أروى طاهر المسلاتي

قعمزت معاهم بهدوء بديت ناكل وانا نلمح في تعابير الصدمه على وجوهم لين فجآه نقلبت السفره بيلي فيها …
بنت اسراء الصغيره طاحت في صونية الطبيخه ونحرقت منها????????‍♀️
كلنا انخلعنا وقعدنا نبردو ع البنيه وخشت بعضها علينا ومحدش فينا كمل غداه ????
ناضت اسراء وراجلها رفعو بنتها للمشفى وقعدت انا وامينه بس نلمو في الحوسه يلي صايره
_________________________________
المديره:لكن يا استاد يلي صار اليوم مش شويه
انت متخيل كمبة الدم يلي نزفاته البنت الله اعلم شن صاير فيها توا
بنتك تستحق فصل 3ايام على سلوكها هاذي مدرسه محترمه مش مكان للمجرمين
جمعه:اهل البنت انا نعطيهم تعويض ويلي يبوه ياخدوه في النهايه انا وياهم اكيد رح نوصلو لي حل
بس توا طالب منك تخليها اداوم عادي لان السنه هاذي شهاده مش لعب ويلي تبيه انا حاضر …وحط ربطة فلوس ع الطاوله
المديره:تنهدت….. يصير خير بس لازم توقع تعاهد انها تكون اخر مره !
جمعه:اكيد توقع طبعا ….جنان تحركي قدمي
جنان:قلبت عيونها بملل ومشت خطوتين
مسكت القلم ووقعت
المديره:يعني المره الجايه مش رح نتساهل معاك ياجنان اي شكوه بتوصلني من زميلاتك بنتصرف
جنان:هزت راسها وتعابير وجها واضح انها مش راضيه!
طلعت جنان وجنبها بوها يلي يحكي بصوت واطي
جمعه؛نفذتي منها المره هادي ردي بالك في الجديد منبيش كل شويه نطلع من خدمتي عشان فضايحك ومشاكلك
جنان:لوحت المستكه يلي كانت في فمها….لو عليا انا مكنتش اتصلت بيك ولا دورتك
قبلت فصل 3ايام ارجل من انك تجي هنايا
لانه يلي بعتوهولك اسمه استدعاء ولي امر!
ولي امر يعني شخص مهتم بي صغاره ….شافتله بنضره استخفاف وخدت شنطتها وركبت
اما جمعه اكتفى انه ياخد نفس كبير وطلع من المدرسه
________________________________________
على سفرة الفطور:-
احسان:يحط في السكر لي كوب الشاهي ….شنو يا امير ؟
امتى بتمشي شهر العسل !
رحمه:اضايقت وهيا مش قادره ترفع عيونها
امير:عاقد حواجبه ويفطر…..مفيش شهر عسل
ليلى:شهقت…..علاش العفو ؟خيرك عليها البنيه خليها تدهور وتعيش حياتها في اول ايام زواجها
امير:عندي خدمه وحتى هيا معندهاش نيه في المشي
ليلى:خيرك رحمه حبيبتي شنو يلي صاير!؟
رحمه:ابتسمت بتوتر….ولا شي بس عندي فوبيا من السفر مادابيا نقعد الحق
ليلى:براحتك ❤️
احسان:باش تخطم على الوكيل متع الواثقون خود الطلبيه بي اسمي
امير:علاش شنو شريت؟؟
احسان:ماريا قداش ليها خاطرها في تالفون خذيتهولها امس
ليلى:مش كويس الدلع هلبا تالفونها كويس ومفيه شي
احسان:محدش دخله بنتي وبندلعها
نبي نربيها على العز والشبع احسن ما تكبر وتبدا ادور فيه برا
رحمه:احووو احوووو احووو
ليلى:اسم الله عليك خيرك!؟
رحمه:شرقت شويه….صحتين عليكم شبعت
وناضت بسرعه
جميله:خيرها مرتك ياولد مرتبكه هكي
امير:مسح فمه….امورها
وناض طلع من جنبهم
جميله:ولدك شكلها نكدت عليه من اول يوم ????
ياخوفي ناخد لي ولدي حسام وادير فيه هكي
ليلى:تنهدت بضيق وسكتت مردتش على سلفتها
_____________________________________
امينه:تفضلو مرحبتين بيكم تفضلي ….رؤى يارؤى
رؤى:مسحت يديها من الميه ولبست ذبلتها…نعم!
امي ????????????????
حسنه:كيف الحال
رؤى:قربت عليها وحضنتها بقوه❤️….كان شعور حلو زيارة حسنه لي بنتها اول مره❤️
بعدت من على امها وحضنت بنتها ودخلتهم لي الصاله
بيسان:ماما انتي تعيشي هنايا؟
رؤى:باستها ….اي
وبنجيبك تعيشي معاي هنايا ياقلبي باهي
بيسان:سكتت
حسنه:مسحت على راس بيسان….وهاذي المفاجأه يلي قتلك عليها
جبتلك حوايج وبتقعدي جنب ماما ….تنهدت بصوت حزين
والله مانعرف كيف بنخليها تعودت عليها والحوش اخي من غيرها
بيسان:منبيش نقعد هنايا
رؤى:نصدمت!….علاش حبيبتي ؟؟
تقعدي جنب ماما هنايا وترقدي جنبي
بيسان:لكن نبي حنينه وبابا جلال وخالو سولي
ماما نحبك انا لكن خليني عندهم
رؤى:سكتت مصدومه
بيسان:قربت من امها وباستها….ماما تزعليش باهي؟ديمه نجيك
رؤى:ضحكت….به حبيبتي براحتك
كيف حال ارسولان؟
حسنه:جاوبتها بضيق….ااااه على ارسولان وخلاص
رؤى:خيره شن صاير
حسنه:يطلع من الصبح منعرفش وين يمشي يروحلي عقابات الليل
رؤى:احمدي ربي ع الاقل في الحوش وسيب الحروب وميجي منهم
حسنه:الحمد الله
رؤى:لو تبيه يستقر زوجيه يكون احسن خليه يدير مرا وصغار يلهى فيهم
تشوفيه قداش يتغير بعد مايتزوج
حسنه:يتزوج؟؟ ووين بيسكنها؟
رؤى:علاش منو يلي عايش معاكم يا امي غيرك انتي وبابا وهوا ؟
الحوش فيه 4غرف الله يبارك عطيه وحده يتزوج فيها وتعيش معاك حتى تونسك
حسنه:بدت تفكر بجديه …..زعمى منو نخطبله؟
رؤى:شوفيه هوا مرات فيه حد في باله!؟
حسنه:فرقت حاله ع اساس هوا متع مواضيع هكي !
رؤى:به شوفي ماريا….بنت قنينه وديما العين عليها
حسنه:مستحيللل طبعا
انا نبي وحده من ثوبنا تاكل زينا وتشرب زينا وترضى تعيش في غرفه معاي
بعدين عقلية خوك صاعبه تبي ماريا ترضى بي خمار وتمشي على شروطه؟؟…لالا شيليها من راسك تو نزيد ندور وحده تناسبه كويس ويصير خير
ناجيه:ساعه ترغي مع امك ومقدمتيلها شي ؟
تبيهم يقولو علينا منعرفوش في الاوصول ولا كيف !
وقربت سلمت على حسنه
حسنه:حشاكم يا ناجيه غير خدتنا الهدرزه شوي
رؤى:عن اذنكم…..وناضت
بيسان:قربت على وذن حسنه
تخوف ياحنينه
حسنه:مبتسمه…..حبيبتي اي تو تجي ماما
ناجيه:كيف حالك وحال العويله؟
حسنه:الحمد الله بخير انتم شن مدايرين؟
ناجيه؛في فضل ونعمه …..واستمرت الهدرزه
????رِوَايـــــــــات بـــَـنـُـــووتِـــة الشـِــيـــْـخ????
????أروى الــــطـــاهــــر المــســلاتــــي????
جنان:فتحت باب الفصل….نخش؟
الابله:تفضلي
جنان:خشت للمقعد وقعمزت والفصل كله يهمس من تحت لتحت ويسألو في بعض كيف ترجع جنان بعد يلي دراته
لوحت ماريا ورقه صغيره لي جنان مكتوب فيها
(شنو صار؟)
جنان:ردت عليها وعطتهولها
(الفلوس ادير طريق في البحر)
ماريت:ابتسمت بخبث ولوحت الورقه
الابله:شافت لي الساعه ….لعند هني تمام يابنات انا بنطلع مستعجله منبيش حد يطلع قبل ما تكمل الحصه مزال 4دقايق ….ولمت حجاتها وطلعت بسرعه
تلفتت موده وماريا بسرعه لي مقعد جنان وهبه
موده:شن صااااار وه عليا قريب متت
جنان:نزلت رجلها من المقعد وناضت مشت خطواتها لين وصلت لي طاولة الابله
وقفت وحطت يديها على الطاوله وتتكلم بصوت عالي
حشره حقيره تحاول الطيران حاولت تلعب معاي انا والبنات يلي معاي شفتو جزائها كلكم !
وركبت عادي جدا مصار شي
في الجديد اي وحده فيكم تحاول تقرب مني انا ولا ال3يلي مقعمزين الاخيرات متلومش الا نفسها وفي نفس اليوم ترقد في العنايه زي مرقدت الفرخه يلي معانا اليوم
موده:نفخت روحها بفخر
جنان:مفهووووووم!؟
طلع صوت خفيف من البنات وهما يرددو في كلمة مفوم مع تعابير الخوف والدهشه في عيونهم!
رجعت جنان لي مقعدها وهيا راضيه على الانطباع يلي دراته في المدرسه بعد ماكانت ولا شي ومفيش حد معبرها
ضرب الجرس وطلعو البنات وشبه المدرسه كلها يحكو في نفس القصه
ماريا:احنا مدخلناش فيك مفروض محسبتينيش معاهم بيقولو اني صاحبتك بعدين وانا مهتمه بسمعتي هنايا منبيش نكون صاحبه لي اشكالك
جنان:شفتك مدايره جهدك باش تولي معروفه في المدرسه ومفيش حد معبرك
قلت ندير فيك خير ونقلهم انك صاحبتي باش تلفتي النضر شويه
ماريا:قلبت عيونها على جنان وشافت لي موده…وانتي شنو رفعك للمتوكل؟؟؟شنو اديري غادي فهميني
موده:شبكت يديها في بعض بتوتر ….بعنا حوشنا بابا عليه ديون
كنت نكدب لا صيانه لا شي خدينا شقه صغيره في عماره
وتالفوني بعته باش نسدد حق المدرسه السيمستر هاذا مش فاسد زي ماقتلك
هبه:مسكت يدها….عادي حبيبتي بلعكس مضايقيش روحك وخيره المتوكل حتى لو شريتي منه المهم حاجه جديده غيرك مش قادر يشري جديد احمدي ربي ❤️
ماريا:ضحكت بصدمه….يعني انتي توا ع الحديده!!
موده:بابا قال شهر 12نرجعو زي قبل واحسن
ماريا:خذت شنطتها….انا الشله هاذي لازم نبعد عليها لان ابدا مش من مستواي ولا تنفعني
وصلت لعند الباب ورجعت ….شافت لي هبه
ماريا:وانتي يلي يربطني بيك المرواح والمشي فقط
اطلعي اكيد اسلام يراجي برا
وطلعت ماريا
هبه:اففففف….متواخدوهاش ماريا هكي طبعها اكيد ترجع في كلامها
جنان:هاذي لفعه بعدها علينا يكون احسن….وطلعت
هبه:حضنت موده❤️…..انا ماره بنفس الضرف بزبط
ديمه اذكري ان حالك خير من هلبا ناس واكيد ربي في النهايه رح يفرجها
موده؛ابتسمت…..ان شاء الله
هبه:طلعت تجري لحقت على ماريا وجبدتها من يدها….. ع فكره الكلام يلي حكيتيه لي موده عيب تخيلي روحك مكانها
ماريا:هه شن تحكي انتي اي مكانها ياماما فلوس بوي متاكلهمش النار ….بعدين شبحت ورا هبه
امير جي بدل اسلام!????
هبه:على وجها خيبات الامل…ع فكره ارسولان كان معاه حق في كل كلمه قالهولك
انتي فعلا تافها ومتفكريش غير في المضاهر
ولانه هوا ولد الناس وراجل معطاكش وجه…..سيبت هبه ماريا
وركبت في السياره وضميرها يأنب فيها ممكن تكون جرحت ماريا بي الكلام هاذا
اما ماريا قعدت واقفه فتره مصدومه من الكلام يلي سمعاته بس حطت على وجها ملامح اللامبالاة!
وركبت السياره
ماريا:اهلللين…مش ع اساس اسلام بيجينا ؟
امير:ولع وطلع ….مدام انا قاعد علاش يجيكم هوا بعدين تعرفيه كيف يقعد راقد للعصر
ماريا:ضحكت….امير وقفتي ع المكتبه هيا بناخد حجات ناقصتني
امير:درس ع اليمين ومداها فلوس
ماريا:رغم ان كان عندها بس خدتهم ونزلت
بمجرد ما تسكر الباب قام امير عيونه لي هبه في المرايا
امير:الناس تقول السلام عليكم لما تركب
هبه:اول ما ستوعبت ان امير يحكي معاها حلقها جف وبدت دقات قلبها تتسارع!
هبه:اءءء اسفه بالي مشغول شويه
امير:استمر يشوفلها من المرايا وهبه ارتبكت …ممكن تمدلي طرف كلينكس؟
امير:اكيد….خدي كلينكس من السياره ومدلها يده
اول ما هبه حطت يدها ع الكينكس امير مسك يدها❤️
هبه:بدون شعور قامت عيونها في المرايا طول
امير:ابتسم ع جنب ….تأكدي ديمه الحاجه يلي مديرها ببصاره المره الاولى بس
اما التانيه تكون حقيقيه
هبه:ءء ش شش شن قصدك؟
امير:في البيان وهمتك ان الاشاره مش ليك!
وفي الدخول كانت ليك
في هلبا حاجات القدام رح تصير بنفس الكيفيه
هبه:بلعت ريقها وهيا تحاول تهدي ضربات قلبها
حاولت تسحب يدها منه بس زاد ضغط على يدها❤️
هبه:حست ان حركتها نشلت ومعش قادره ادير شي غير ان تشوفله في المرايا
طلعت ماريا من المكتبه واميره طلق يدها في لحضه
ولا كأنه صار شي !
__________________________________
رؤى:قعدتي تعشيتي يا امي بالله عليك
حسنه:تعرفيني يابنتي منحبش نقعد برا الحوش بعد المغرب
تعالي مره تانيه انتي ورعد باتي عندي
رؤى:ابتسمت ….ان شاء الله ياغاليه سلميلي على بوي وارسولان هلبااااا
حسنه:يوصل
رؤى:حضنت بنتها ….ديري بالك ع روحك
بيسان:حتى انتي مديريش شطانه هنايا باهي
كنهادا حنينه تقول لي خالي سولي يضربنا
رؤى:ضحكت ….حاضر
ودعت رؤى امها وبنتها وسكرت الباب ❤️
سمعت نفس الصوت المشؤم وراها
ناجيه:ان شاء الله بتباتي في حوش بوك وانتي قاعده عروسه؟
رؤى:ابتسمت….سواء كنت عروسه او لا
غلط المرا تبات برا وتخلي راجلها بروحه
ناجيه:انصدمت !!….رجع بيها الزمان لي سنوات فاتو
كانت مقعمزه تتغدى والعيله كلها متجمعه
اسراء:اليوم بنباتو في العرس ره
ناجيه:برو طريقكم زينه
امينه:به الحمد الله خدينا الموافقه من السلطات العليا هههههه
ناجيه:ضحكت معاهم
نجمه:وانا لا طبعا
اكينه:علاش بس????????‍♀️ديمه هكي انتي
نجمه:ابتسمت…..غلط المرا تسيب راجلها وتبات براا
ولا ياعمتي !؟
ناجيه:سلمها ياربي العاقله فيهم ❤️
رؤى:شنو رايك ؟
ناجيه:بلعت ريقها ومشت وسيبتها بدون ماترد عليها
هنايا رؤى فهمت كويس انها اثقنت الدور✅
________________________________________
هبه:سكرت باب غرفتها وحطت يدها على قلبها
قعدت دقايق واقفه بعدين طاحت على السرير
تراجع في كلمات امير ليها شن كان يقصد !؟
لعند وين يبي يوصل؟
بدون شعور لقت نفسها تتصل بي جنان وتحكيلها
جنان:شوفي ….هوا في النهايه متزوج تمام !
يعني اموره طيبه يعني دار عيله ودار مسؤليه
انتي مجرد بنت يشوف فيك مراهقه يرفع فيك ويجيب
ويحاول يأثر عليك بكلامه باش تكوني لعبه في يده لا اكتر
ديما اذكري انه متزوج يا هبه
هبه:اي صح
جنان؛افهمي كيف تتصرفي معاه نعرفك طيبه وغبيه وعبيطه وخرا متعرفيش تتصرفي
هبه:افففف باهي
جنان:اقلبي وجهك توا بنرقد
هبه:سكرت الخط وهيا مضايقه
تحشمت من نفسها هلبا????….شنو كانت تفكر!!
صح كانت خايفه وقريب ماتت بعد لقطة اليوم بس حركة اليوم عطتها امل في شنووو؟؟
لوحت هبه الشنطه ع طول يدها وزادت اضايقت اكتر
__________________________________
ماريا:وقفت قدام الباب تفك في خيوط سبيدروها
شافت ارسولان واقف قدام الخوش كأنه يراجي في حد
ابتسمتله ❤️واشرتله بيدها
ارسولان:اشرلها بعيونه بمعنى اهلا
فجأه درس حسام قدام الحوش ونزلو رزان واريج من السياره بكااااامل زينتهم مروحين من الجامعه كأنهم كانو في عرس صوت ضحكهم وصال لعند داخل
رزان:ههههههه وووه قداش ليا مريتش بدلة الثانوي
ماريا:ضحكت….خلاص معش مزال غير السنه هاذي وبعدها نبدا نطرح زيكم
اريج:شدي حياك ياعمري ….وخشت هيا واختها
ماريا:سرحت في ارسولان ولا حضت شي!!
رغم منضر رزان واريج الملفت ارسولان مقامش عينه فيهم!!!
كأنهم تراب يلي قدامه????
كأنهم ولا شي
حسام؛من روح بيك؟
ماريا:امير
حسام:ضحك ع جنب بعد ما فهم
ماريا:علاش شن فيه!!
حسام:لا شي سلامتك…..وسيبها وخش
ماريا:حطت السبيدرو ع جنب وشافت سارة متع كتيبه جايه من بعيد وقفت عند ارسولان
نزلو منها شباب يسلمو عليه هدرزو شويه بعدين ركب معاهم ومشي ❤️
_________________________________________
#تسريع_في_الاحداث
احيانا تفكير البني ادم قادر انه يتغير في ايام بس !
ماريا يلي كان هدفها في الدنيا انها اطيح حسام
اليوم محور حياتها ارسولان❤️
تراقب فيه يوميا !!
امتى يطلع امتي يرجع شنو يدير كيف يهدرز مع خوتها ضحكته !
بس هيا متقدرش تقرب منه ولا تحاول حتى ادير الاعيب عليه عشان اطيحه لانها فاهمه كويس ان ارسولان غير !
مش مته اي شي فاضي ولا ميوله الحاجات هاذي !
انسان جدي خدمته وبس
هبه يلي كانت تكره امير وتشوف فيه طاغي ووقح
اليوم تحارب في شعور صغير داخلها متبيشي يكبر ????لان لو كبر بتصير مصيبه
رحمه يلي كانت تبي تنهي حياتها وتخلص اليوم تفكر وترتب لي سفره تبدا فيها كل شي من جديد برا مع ولدها الغير شرعي
رؤى يلي كانت تضايق من سيرة نجمه اليوم هيا نسخه تانيه منها !
تقعمز مع صاحبات ناجيه وتحكي في نفس الكلام وتهدرز بنفس الطريقه لدرجة حتى صاحبات ناجيه لاحضو الشي هاذا !!
نفس الكلام تقول فيه نفس طريقة تقديم الدواء حتى رعد كان طول الوقت مصدوم وخايف يحكي مرات هيا متقصدش تقلد مرته لان من وين بتعرف تصرفات نجمه؟
مكانش يعلم ان رؤى قعدت اسابيع وهيا تجمع في كل شي يخصها
????رِوَايـــــــــات بـــَـنـُـــووتِـــة الشـِــيـــْـخ????
????أروى الــــطـــاهــــر المــســلاتــــي????
في جيها معينه من الساحه كانت موده وجنان وهبه مقعمزين
قدامهم حكة تن وهريسه وفازو زيتون
وهبه مقعمزه ادير في نفاص
وقفت عليهم ماريا
جنان:خيررر؟؟شن جايه تبي ؟
وين صاحباتك يلي حتى خراهم ماركه؟!
ماريا:قعمزت وجوها اخي ……منسجمتش معاهم
هبه:بتردد….نديرلك نفص؟
ماريا:شن هاذا؟؟؟
خيره هكي جايبين شريتو طول؟
جنان:قولي منبيش وسكري فمك
ماريا:قلبت عيونها وشافت لي موده ….وهاذي خيرها حاطه يديها ع وجها ؟
موده:وووه علياااا وووه عليا بنبككككي
شوووفي شوووووفي
ماريا:طاحت عينها على ايفون x…تالفون جديد؟
وكان يعني حاجه والله جديد الاسبوع يلي فات بس بابا جابلي 11
موده:بفرح….انتي متخيله انه هديه ؟
ومن مجهول زيااااده …شوووفي
طلعت من شنطتها بوكس….جاني من الوفااااق
ووووه بنبكيييييي
ماريا:يلي مش متعود ع الهدايا المليحه هكي يصير فيه????
هبه:مدت النفص لي جنان…..بجديات خاطري نعرف منو بعتهولك !؟
اكيد عارف كويس ان معندكش تالفون
موده:اااييييييي????????????
نحس فيه ولد جيرانه كان يحبني زمان
ماريا:بلا تخيلات عبيطه واتصلي بيهم يقولولك مواصفات يلي جي حطها عندهم
موده:خدت تالفونها وتباعدت عليهم
ماريا:خدت نفس….حاسه في شي في حوشنا مش طبيعي
جنان:ايوا هكي قولي من الاول متجيناش الا وقت عندك مصيبه وتبي حل
ماريا:جنان بجد مش ناقصاتك
هبه:كيف يعني مش طبيعي!
ماريا:خليني من قصة حوشنا توا…..فهمت ان عيد ميلاد ارسولان السبت!
يعني مزال يومين بس! نفكر نديرله شي ولا نفوت الموضوع
جنان:معش تدحنسي ع الولد خليه في حاله مش ناقص لفاعي
هبه:بطلي جنااااان…..تقدري تحسبيه في حاجه بسيطه
بوكس ورد مثلا مش شرط هديه لانك متعرفيشي شنو يحب
ماريا:ممكن !
قربت منهم موده تصيح وتجري لين حضنت جنان وطاحو ع الارض الزوز
موده:ووووووه عليا طلعتي انتي صحيتتتتتتي صحيتتتتتتتتتي ????????????????????
جنان:اااااه ياضهري نحي اقلبي وجهك مجبت لي حد شي انا
موده:انتي الوحيده يلي قال نفس مواصفاتك بزبط احسن صاحبه في الدنيا ورررربي
جنان:الله يفضحهم????????‍♀️
هبه:تشوفلهم وتبتسم ❤️
اما ماريا حست بشي غريب ????
عمرها مافرحت موده صاحبتها هكي !
وعمرها ما حصلت صاحبها تفرحها هكي !؟؟
شن فايده الاصحاب يلي كانت معاهم !
______________________________________
الساعه 5العصر :-❤️
رؤى:طلعت للمزرعه متع رعد وقربت على الخيل
عبد الرحيم:اهلا بي مرت الاخ
تبي حاجه ؟
رؤى:لا بس خاطري نطلع ندهور شويه
عبد الرحيم:يمشط للخيل في شعره…..من حقك ادللي
رؤى:ابتسمت ربي يخليك…..اءءء عادي لو ركبت ع الخيل؟
عبد الرحيم:تعرفي؟
رؤى:لا بس بنجرب
عبد الرحيم:تردد في البدايه بس لما شاف اصرارها وافق
ركبت رؤى وكان عبد الرحيم حريص هلبا عليها
رؤى مكانتش تعرف ان الخيل يلي تدريب ايام طويله عشان تقدر تجري بيه وتتحكم فيه كويس زي نجمه
ضربت الخيل بي الحزام وانطلق يجرررررري
لدرجة انفك من على يد عبد الرحيم ????
قعد الحصان يجري بسرعه رهيبه وفجآه طاحت رؤى والدنيا راحت ضباب اسود
__________________________________
هبه:توتي في القهوا وتحكي ع الهاتف ….تمام جنان تعالي خوديهم مني الكتابات وريحي راسك
جنان:افففف ياربي افففف
هبه:عندك منو يجيبك؟
جنان:سيارتي طبعا
هبه:تصب في القهوا…..ياريتني زيك في العمر هاذا وعندي سياره
جنان:بالله اقلبي وجهك راني معصبه شوي ونكون عندك
هبه:ضحكت ….هي تمام
طلعت هبه فرقت القهوا واحلام تهدرز مع حسنه
طق طق طق
هبه:ناضت من جنبهم وفتحت الباب
ماريا:اهلين
هبه:اهلا خشي
ماريا:خشت ….اسمعي بسرعه ونبي كتاب الاحياء
هبه:كيف بتجي جنان تاخده مفروض حليتو من المدرسه طول
ماريا:افففف جيبيه خلي نصوره
هبه:اوكي تمام…قدمت خطوتين وطاحت في ودنها كلمة
حسنه:كان سخر ربي نبي بنتك هبه لي ولدي ارسولان
تلفتت هبه عشان تشوف تعابير الصدمه يلي ع وجه ماريا????
_____________________________________
جنان:كانت تجري بي السياره كل ما تدكر شن صار معاها قبل دقايق????
طلعت سياره قدامها فجآه وخبطت فيها
نزل من سيارة الامن ولد طويل وعريض خبط ع روشن جنان بقوه
وطبعا مكانش شايف جنان بسبب السياره المضلمه
قعد يخبط ع المرش بقوه
جنان:عطت راسها ع الدومان ….علاش ياربي !؟
علاش محاطه بي ناس اغبياء في حياتي علاااش
الولد:افتتتتتتح الروشن ياولد الكلب وربي اليوم ماك بايت الا في الشيله ياخامر افتتتتتح تو نوريك التسهويك ع التريس كيف
جنان:نزلت المرش وهيا مبتسمه بي استفزاز
تغيرت ملامح الولد وابتسم…..اهلا
جنان:اهلين مشفتكش اسفه
مدوري شي اصلا عادي للسياره مصفحه الامور طيبه
مد يده …..صدام
ارسولان:نزل من السياره….شن صاير؟
_____________________________________
صوت عياط من اريج
ورزان تجري واطيح وهيا تنادي ع امها
ليش!؟
بسبب رحمه يلي كانت طايحه وسط الصاله
عيونها معلقات في السقف والرغوه طالعه من فمها
فجآه شافت بنضره لكل شي جنبها كأنها تودع
يتبع..
لقراءة الحلقة الرابعة عشر : اضغط هنا
لقراءة باقي حلقات الرواية : اضغط هنا
نرشح لك أيضاً رواية أدوار وهمية للكاتبة أروى طاهر المسلاتي

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى