Uncategorized

رواية حب أعمى الحلقة الحادية عشر 11 بقلم ندى شريف

رواية حب أعمى الحلقة الحادية عشر 11 بقلم ندى شريف 

رواية حب أعمى الحلقة الحادية عشر 11 بقلم ندى شريف 

رواية حب أعمى الحلقة الحادية عشر 11 بقلم ندى شريف 

وعد : انا كنت مخطوبه و اليوم اللي انا و انت اتقابلنا فيه اول مره كان يوم فشكلة خطوبتي….و خطيبي السابق كان زين….انا بس حبيت اقولك عشان تبقى علاقتنا مبنيه على الصدق

اوس : عشان كده وقعتي الكوبايات؟؟

وعد بتوتر : لأ…انا اتكعبلت في الفستان

اوس : انتي لسه بتحبيه؟؟….جاوبيني بصراحه

وعد : لو كنت لسه بحبه…..مكنتش هديك رقم بابا و لا هنكون مخطوبين دلوقتي 

اوس : يعني مشاعرك متحركتش لما شوفتيه امبارح؟؟

وعد : لأ و الله

اوس : تمام…. مش يلا نروح بقى؟؟

وعد : تمام

★★★★★★★★★★★

اوس في بيت زين…

اوس : كلامك امبارح عن وعد خلاني احبها اكتر….انت شايف انها تستحق حبي ليها؟؟

زين بقلق : وعد محترمه…. يارب يتمملكوا على خير

اوس بخبث : عملت ايه مع وعد بتاعتك دي؟؟

زين بتوتر و ضحكه : هي القاعده خلاص بقت كلها وعد 

اوس : تقريبا كده….هو انت مخبي عليا حاجه؟؟

زين بقلق : حاجه زي ايه يعني؟؟

اوس : مقولتليش ليه ان وعد خطيبتي هي وعد اللي انت بتحبها؟؟

زين : ملوش لازمه الكلام ده دلوقتي

اوس : انت بتحبها؟؟

زين : لا طبعا….استحاله احب خطيبة صديق عمري

اوس : مهما هتكدب انا عارف الحقيقه كده كده

زين : صدقني هي و لا فارقه معايا….و انا و هي مكناش لبعض و استحاله هنكون لبعض….وعد تستاهلك انت…تستاهل شخص يكون واقف جمبها لما هي تحتاجه…..تستاهل شخص يحبها زي ما هي بتحبه…. امبارح….شوفت قد ايه هي كانت فرحانه و انت بتلبسها الشبكه…و كان باين من عينيها انها بتحبك

اوس : انا بس…..انا مش عايز علاقة الصداقة اللي بينها يجرالها حاجه

زين و هو يضحك : يسطا انت عبيط…… فكك انت….بس وعد كانت هتموت من الغيره امبارح من منار…. الله يكون في عونها

اوس : صعبانه عليا بصراحه…بس انا هحاول على قد ما اقدر اوقف الخناقات دي…و اكيد لما نتجوز هيتحطوا في الأمر الواقع و خلاص…و فوق كل ده ابويا متكلف بالمهمه

زين : سيبك انت….ماتشوفلي صاحبتها

★★★★★★★★★★★★★

سناء : عملتي ايه؟؟

وعد : حكيتله كل حاجه

سناء : اتعصب؟؟

وعد : لأ كان هادي جدا….و عادي يعني هم الاتنين باين عليهم صحاب اوي…و اكيد مش هيحصل حاجه

سناء : خلاص بقى كبري دماغك من الحكايه دي

وعد : عندك حق…انا هقوم أناملي شويه

سناء : تمام يا حبيبتي

وعد و هي كادت أن تنام…وجدت رساله من منار…(استر يا رب????????????)

منار : عامله ايه؟؟….انا بس حبيت اقولك ان عيد ميلاد اوس بعد بكره…..فلو حيرانه في هديه و لا حاجه قوليلي….انتي اكيد عارفه أن انا و هو عايشين مع بعض….و انا حافظه هو بيحب ايه و بيكره ايه….بس خلي بالك متجيبيش ساعه…لإن انا كنت جايباله ساعات كتير اوي….و لا بيرفيوم و لا نضاره…بصي ابعدي عن الحاجات دي

ارسلت لها وعد : تمام شكرا انك قولتيلي…و اكيد لو احتاجتك في حاجه هقولك

ثم تركت هاتفها..

وعد لنفسها : متظلميهاش يا وعد….اكيد قصدها مساعدتك يعني مش حاجه تانيه….ممكن تكون نيتها خير….اكيد انا فهمتها غلط

ثم خلدت للنوم..

★★★★★★★★★★★★

في الصباح..

وعد : ماما….ماما

سناء : عايزه ايه؟؟

وعد : اوس عيد ميلاده بكره و مش عارفه اجيبله ايه؟؟

سناء : جيبيله حاجه على ذوقك

وعد : ايوه….اللي هي حاجه زي ايه!؟

سناء : معرفش…شوفي انتي بقى

وعد : يا ماما بس قوليلي هدايا غير الساعات

سناء : بقولك ايه…سيبيني اعمل الاكل قبل ما ابوكي ييجي

وعد : ماشي يا ماما…شكرا

ثم أمسكت هاتفها و كانت سترسل رساله ل منار و لكن جاءت لها فكره..

وعد و هي سعيده : الفكره دي حلوه اوي…و مع أي هديه تانيه هيبقى يوم تحفه….انا متأكده أنه هيتبسط منها…..بس لو ؟!!!…..هتصل بيه أسأله

وعد : الو

اوس : عامله ايه؟؟

وعد : الحمد لله…..فاضي؟؟

اوس : ايوه….و لو مش فاضي…افضيلك طبعا

وعد و هي منتهزه الفرصه : طب تمام….بكره عايزاك من اول اليوم لحد اخره

اوس : ليه…هو في حاجه؟؟

وعد : لا لا مفيش….بس هو انت عندك القلب؟؟

اوس : لأ ليه؟؟…قلقتيني

وعد : طب الحمدلله…متقلقش…..بس اهم حاجه بكره الساعه 8 هتلاقيني قدام بيتك

اوس : طب هنروح فين طيب؟؟؟

وعد : بكره هتعرف

اوس : طب و شغلي؟؟

وعد : انا اجلت الكورس بكره…عادي يعني استأذن يوم من الشغل مش هيحصل حاجه

اوس : تمام يا ستي…ده انتي تؤمريني

وعد : اشوفك بكره

اوس : و انا كمان

★★★★★★★★★★★★

في الصباح الباكر…

منار تطرق باب بيت اوس..

منار : افتح يا اوس….هتتأخر على الشغل…يا اوس اصحى

اوس و هو مازال يستيقظ من النوم : في ايه؟؟

منار : انت لسه ملبستش !!…..هتتأخر على الشغل

اوس : مش هروح النهارده

منار بقلق : تعبان؟؟….في حاجه واجعاك؟؟…نروح للدكتور؟؟..انت ك….

اوس مقاطعا لها : ششش…ايه راديو؟؟…مفيش حاجه….انا بس هخرج مع وعد

منار بغضب : و يا ترى رايحين فين؟؟

اوس : لسه معرفش

منار بمكر : و انت مش هتروح الشغل النهارده عشانها؟!!!….ده انت عمرك ما عملتها

اوس بتكبير دماغ : انا هدخل اكمل نومي…تصبحي على خير

منار بغضب : و انت من أهله

ثم نزلت..

كريمه : ايه يا بنتي؟؟….مش هينزل و لا ايه؟؟

منار بغضب : مش هيروح الشغل النهارده….أصله هيخرج مع السنيوره

كريمه : البت دي عماله تاخده مننا شويه شويه….احنا لازم نوقفها عند حدها…و لازم نفشكل الموضوع ده بسرعه….عشان لو الموضوع وسع…مش هنعرف نلمه

منار : يعني نعمل ايه يعني؟؟

كريمه بمكر : تؤ تؤ…انتي اللي هتعملي

★★★★★★★★★★★

وعد : يلا انا قدام البيت اهو

اوس : تمام هنزل 

وعد : بسرعه عشان هنتأخر

اوس نزل مسرعاً..

منار : اوس….عايزه اقولك على حاجه

اوس و هو يكمل سيره نحو الباب : بعدين بعدين….لما آجي تبقي تقوليلي

ثم خرج و ركب السياره..

اوس : هنروح فين؟؟

وعد بسعاده : لما نروح هتعرف

★★★★★★★★★★★

عندما وصلوا..

اوس بتعجب : انا سامع ناس بتصوت… احنا فين ؟؟

وعد : دريم بارك

اوس : و تطلع ايه دريم بارك دي؟؟

وعد بصدمه : متعرفش دريم بارك !!!!!

اوس : لا معرفهاش

وعد : ملاهي….بس مش زي اي ملاهي

اوس : مش فاهم حاجه

وعد : تعالى معايا و انت هتفهم

ثم دخلوا لعبه و جلسوا في المركبه…

وعد : بص بقى….دي لعبة الشلال…هنطلع فوق…بعد كده ندخل يمين…و بعد كده هننزل تحت و هتحس ان قلبك وقع…بس متخافش…المياه هتفوقك

اوس بقلق : هو في مياه في الموضوع؟؟

وعد و هي تضحك : اومال انت فاكر ايه؟؟

اوس : نزليني…نزليني

وعد : لا لا…هنبدأ خلاص

اوس : بقولك ايه انا بخاف

وعد : و انا برضو…بس اللعبه حلوه اوي….اهم حاجه تمسك في المسند ده

اوس : فينه

وعد أمسكت بيده و وضعت يده على المسند..

وعد : اهو

ثم بدأت اللعبه..

وعد : بدأت اهيه

اوس بقلق : طب قبل ما ننزل قوليلي 

وعد : ماشي

اوس : اشهد ان لا اله الا الله….و أشهد أن محمد رسول الله

وعد و هي تضحك : ده انت تحفه

اوس : يا ستي سيبيني في حالي بقى

وعد : هننزل…استعد

ثم تعالى الصراخ…..و أصبحوا متبللين..

اوس و هو منذهل : انا عايش؟؟!

وعد و هي سعيده : احنا عايشين

اوس : طب احنا مبلولين دلوقتي

وعد : عادي عادي…هننشف من الشمس

اوس : طب…انا عايز العبها مره تانيه

وعد : و انا كمان

ثم لعبوا مره ثانيه..

وعد : تعالى نلعب لعبه تانيه….ده لسه في لعب كتير

و بعدما لعبوا جميع الألعاب…و تبقت لعبه واحده..

اوس : فاضل كام لعبه؟؟

وعد : فاضل قطر الموت…بس انت بتحلم…انا مش هركبها

اوس منتهز الفرصه : لا يلا بينا…انا عايز العبها

وعد : انت عارف دي بتعمل ايه؟!!….دي طويله و بتشقلبنا….اومال اسمها قطر الموت ليه

اوس : حلوه اوي…يلا بينا

وعد : يبقى العبها لوحدك بقى

اوس : يلا متبقيش جبانه 

وعد بغضب مصطنع : انا مش جبانه

اوس بخبث : اثبتيلي

وعد : ماشي تعالى نلعبها و انا هوريك اني مش بخاف

ثم انتظروا الطابور و ركبوا..

وعد بخوف : لو جرالي حاجه مش مسامحاك

اوس و هو يضحك : متخافيش…انا معاكي

ثم بدأت اللعبه..

وعد بدأت بالصراخ : نزلونااااي…..اعاااااا

اوس بضحك : خلي قلبك جامد…الللاااه

و عندما انتهوا من اللعبه..

اوس : حسبي الله ونعم الوكيل فيا

وعد : كانت شورى هباب

اوس : بس كانت حلوه

وعد بقلق : و الله ما مجرباها تاني…انا ماشيه

اوس : خديني معاكي طب

★★★★★★★★★★★★

في السياره..

وعد : كل سنه و انت طيب

اوس بإستغراب : مين اللي قالك؟؟

وعد : منار

اوس بتعجب : غريبه يعني…قصدي و انتي طيبه…. انا خروجي معاكي نساني أن عيدميلادي النهارده…..بس هديتك كانت تحفه و غير متوقعه كده

وعد : بجد فرحتني اوي…بس لسه في هديه كمان…اتفضل

و قدمت له صندوق صغير..

اوس : ايه ده؟؟

وعد : ده بيرفيوم كده… ريحته عجبتني

اوس : طلاما عجبك…يبقى اكيد ريحتها جميله

★★★★★★★★★★★

عندما اوصلت اوس للبيت..

اوس : لما توصلي كلميني

وعد : حاضر

اوس : سلام

وعد : باي

ثم دخل اوس للمنزل..

و استقبلته منار و هي تبكي…

منار : كل سنه و انت طيب….كنت دايما متعوده اقولك اول واحده…بس اهم حاجه انت مبسوط…و اتفضل هديتك

اوس بحزن : منار…

ثم تركته و ذهبت..

كريمه : انت مش اوس ابني لأ….وعد دي عايزه تبعدك عننا…انا فاهمه دماغها كويس….يا بني فكر…وعد مش زي ما انت فاكرها

اوس بغضب : متجيبيش سيرة وعد على لسانك…..وعد محترمه و كويسه…مش هسمح يتقال عليها كلمه وحشه طول ما انا موجود

كريمه قامت بضربه بالقلم..

كريمه : انت شكلك نسيت ازاي تتكلم مع امك

اوس تركها و صعد الى شقته..

ثم اتصل به زين…

الهاتف : زين يتصل بك

اوس : الو

زين : فينك يا عم؟؟…تليفونك مقفول من الصبح

اوس : كنت بره البيت و لسه راجع…و البيت منكد عليا

زين : ليه بس ايه اللي حصل

اوس : عشان خرجت مع وعد

زين : مانت عارف….اول ما بيسمعوا سيرتها بيتعفرتوا

اوس : خلاص فكك….انا هغير هدومي و استريح شويه

زين : تمام

كاد اوس ينهض و لكنه لمس هدية منار له..

فقام بفتحها..

فوجد ورقتان تشبهان تذاكر ما…

اوس بتعجب : تذاكر ايه دي؟؟….لما اقابلها أبقى اسألها

ثم قام بتغيير ملابسه..

هاتفه رن..

وعد : انا وصلت

اوس : تمام

وعد : اخبارك ايه؟؟

اوس : مرهق جدا

وعد : و انا كمان…بس اهم حاجه اتبسطنا…مال صوتك؟؟

اوس : لا مفيش….عايز انام بس

وعد : تمام تصبح على خير

اوس : و انتي من اهله

★★★★★★★★★★★★

كريمه : هي وعد عرفت منين ان عيد ميلاده النهارده؟؟

منار : انا اللي قولتيلها….بس انا قولتلها بطريقه تخليها تتنرفز و تتعصب و الله

كريمه : يا بت خليكي ذكيه…..يا ريت متعمليش حاجه قبل مانا اوافق عليها….لإنك لسه متفهميش انتي في الشغل ده

في الصباح..

اوس نزل ليذهب إلى شغله..

منار و هي حزينه : اتفضل…الفطار جاهز

اوس : هي ايه التذكرتين اللي انتي كنتي جايباهم دول

منار بسخريه : متشكره جدا انك اهتميت بالهديه بجد

اوس : تمام….انا غلطان اني سألت

منار بتوتر : كانوا…كانوا لحفلة محمد منير…انا عارفه انك بتحب صوته…و انا تعبت اوي عقبال ما جبتها…و في الآخر ملقتش تقدير 

اوس : حقك عليا….انا آسف

منار بحزن : اعتذارك مش مقبول

اوس : بقى كده؟؟…ماشي

منار بقلق : لا لا خلاص….انا اصلا مقدرش ازعل منك

★★★★★★★★★★★★★

بعد اسبوع…

سناء : اصحي يلا…..قومي أعملي الاكل عشان العزومه

وعد بخيبة أمل : حاضر…قايمه اهو

سناء : بصي بقى….انا عايزه الأكل يبقى طعمه تحفه…انا مش هستحمل أمه دي تقول عليكي حاجه

وعد : هحاول

سناء : انا مش عايزه كلام….انا عايزه أفعال….يلا قومي

وعد بخيبة أمل : كان مالها السنجله…..ما السنجله چنتله برضو

★★★★★★★★★★★★

في العزومه و كان الجميع يأكل…

سناء : اتفضلوا يا جماعه….دي وعد هي اللي عامله الاكل 

اوس : من قبل ما ادوق…تسلم ايدك يا وعد

وعد بكسوف : شكرا

كريمه بمكر : اممممممم …….. الاكل دلع شويه ولا ايه يا منار ( حد يقتلها يا جماعه و نخلص???? )

منار: ايوه المحشي اللي بعمله احلي من كده

سناء بغضب : الملح بيختلف على حسب مانتوا متعودين 

وعد ملطفه الجو : احطلكوا ملح؟؟

كريمه : لا لا….اديها مره و مش هتتكرر…بس انتي بقى لما تتجوزي انتي و اوس هخلي منار تعلمك ازاي تطبخي

وعد ابتسمت ابتسامه بسيطه..

اوس : انا بصراحه مش عارف ايه اللي خلى الاكل دلع….مهو حلو اهو يا جماعه….قولوا بسم الله و كلوا

★★★★★★★★★★★★

في نهاية اليوم…..وعد دخلت غرفتها و أصبحت تبكي بشده…

في الصباح….

سناء : مالك عينيكي منفخه كده ليه؟؟

وعد : انا مش قادره بجد…انا خلاص صبري نفد….كل شويه كنت عماله اقول مش قصدهم…مش قصدهم بس كده كتير

سناء : انا شايفه يا بنتي انك تاخدي موقف في البدايه كده…و حطي النقط على الحروف

فأمسكت بهاتفها..

اوس : الو

وعد : انا عايزه أسألك سؤال….مامتك و منار بيحبوني؟؟

اوس : اكيد يا وعد

وعد : بس أفعالهم و ردودهم بيخلوني افكر في عكس كده

اوس : طب ممكن نتقابل بعد ما اخلص الشغل

وعد : تمام

★★★★★★★★★★★★★

عندما تقابلوا..

اوس : انا عايزك تحكيلي اللي في قلبك

وعد بغضب : بص بقى… مبدئياً كده مامتك بتعاملني وحش….و دايما تفضل منار عليا ..و بتقارني بيها

ثم بدأت بالبكاء..

وعد و هي تبكي : و انا مبحبش اتقارن بحد…..لإن الأكل امبارح كان حلو و تعبت فيه….ده غير أن في مواقف كتيره اوي….و انا كنت بعَّديها…انا بس عايزه سبب واحد عشان اعرف هم بيعملوا فيا كده ليه

ثم أصبحت تبكي بحرقه…

اوس : متعيطيش طيب…منار و امي أفعالهم غريبه و انا معاكي في كده…بس صدقيني بعد الجواز هيتغير كل ده

ثم أصبحت تبكي أكثر..

اوس و هو يغني…

حطي راسك عالمخدة، جوا قلبي ما في قدك

لونه أبيض هو قلبك، ما حدا زيك

يما شو عجبني ردك، أنا دايمًا حضلني جنبك

لو كانوا كلهم ضدك، حضل أحبك

حضل أحبك

وعد و هي مندهشه و تمسح دموعها : صوتك حلو اوي….انت ليه مقولتليش ان صوتك حلو؟؟!!

اوس : بتكسف

وعد و هي مبتسمه : لا لا غني تاني

اوس و هو يضحك : هي الاغنيه بتطلع مني تلقائيا كده…مبعرفش اطلعها تاني

وعد و هي تضحك : غني يلا….مش هسيبك غير لما تغني

اوس و هو يضحك : لما يجيلي الإحساس تاني

★★★★★★★★★★★★

عندما عادت إلى المنزل…

سناء : هاااااا…..قالك ايه؟؟

وعد : قاللي أن كل ده هيتغير بعد الجواز…..بس انا مبسوطه اوي

سناء : من ايه يا خيبه؟؟

وعد و هي سعيده : غنالي يا ماما

سناء بغضب : قصدك سكتك بكلمتين يا هبله….بصي بقى طلاما مفيش خير في أهله يبقى مفيش خير فيه

وعد : قصدك ايه يا ماما؟!

سناء : قصدي اللي انتي مش هتقدري تعيشي مع أهله في بيت واحد…..ف يا يجيب شقه جديده…يا تفسخي الخطوبه

وعد : لأ طبعاً…..و بعدين يا ماما ده ابنها الوحيد يعني….و لازم يكون جمبها….و الجواز تضحيات برضو

سناء : مينفعش نبدأها تنازلات و تضحيات….امسكي تليفونك و اتصلي بيه…و تقوليله يا انا يا عيلتك

وعد و هي تبكي : لأ يا ماما مش هقدر….انا بحبه و مش هقدر استغنى عنه

سناء بغضب : امسكي اتصلي بيه…يلا

وعد و هي تبكي : يا ما…

سناء بغضب : يلا

وعد أمسكت بهاتفها و هي تبكي….تأمل بأن اوس لا يرد على المكالمه و لكنه رد…

وعد بتوتر : الو

اوس و هو يبكي : ابويا مات يا وعد

يتبع..

لقراءة الحلقة الثانية عشر : اضغط هنا

لقراءة باقي حلقات الرواية : اضغط هنا

نرشح لك أيضاً رواية ظلام الرعد للكاتبة فاطمة عيد.

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى