رواية جنية المقابر الفصل الثالث 3 بقلم اسماعيل موسى

رواية جنية المقابر الجزء الثالث

رواية جنية المقابر البارت الثالث

رواية جنية المقابر الحلقة الثالثة

انتى ساكنه هنا؟ سألتها وعينى بتبص على كوكى
لا مش ساكنه هنا، لكن المكان دا المفضل بالنسبه ليا
غريبه قلت ____ اول مره اشوف شخص المقابر المكان المفضل ليه!!
هنا فيه هدوء كبير جدآ، الموتى مش بيزعجو حد، كمان المقابر على طرف الزراعات وفيه خضره محببه ليه
مش بتخافى ____
رمتنى بنظره مبتسمه، عنيها كانت بتضحك، وشفت نفسى جوه عنيه انسان مذبذب ويمكن تافه
لا _____ مش بخاف، انا جيت هنا كتير واؤكدلك مفيش اى داعى للخوف
استمرت النظره الضاحكه من عيون زرقه، انت خايف على كوكى منى؟
ارتبكت ومعرفتش ارد، بص انا بعرف اقراء الناس كويس وحتى لو منطقتش انا عارفه إلى جواك ايه
متخفش يا سمسم، اختك فى آمان معايا، وارجوك متحاولش تضغط عليها تغير الطريق تانى
كوكى؟ كوكى، ناديت كوكى الشارده فى ملكوت الله، مش يلا بينا بقا؟
مستعجل ليه يا سمسم؟ هو فيه ايه منتظرنا فى البيت؟
حاولت اوضح اهميتى، انت ناسيه انى منزلتش الشغل النهرده
كوكى قالت مش ناسيه
وعارفه دا معناته ايه وغمزت بعينى
كوكى بضيق عارفه يا سمسم، مفيش شغل، مفيش أكل
اسكتى يا بت فضحتينا، انا بستأذنك احنا لازم نمشى، وياريت متكتريش القعاد هنا لأن المقابر مش مكان مناسب لواحده جميله زيك
الحياه لسه قدامك ولو كنتى مريتى بتجربه فاشله او قاسيه مش معنى كده تقفلى على نفسك وتنعزلى
ودعنا الشابه الجميله إلى عيونها كانت ولا زالت جوه ذهنى وصدرى
انت يابنت يا مفعوصه كان لازم تفضحينا وتجيبى سيرة الأكل؟
متقلش بت يا سمسم، انت عارف مش بحب الكلمه دى، انا لسه ضاربه عيل فى المدرسه قالى يا بت
وعلى فكره ممكن المدير يطلبك فى المدرسه
والله عال يا كوكى، لسه مطلعتيش من البيضه وبتعملى مشاكل؟
امال لما تكبرى هتعملى ايه؟
من فضلك، قالت كوكى بحزم، بلاش تنمر، اهو الكلام ده إلى بيخلى الطفل يفقد ثقته فى نفسه وترجعو بعد كده تلومونا وتقولو فاقدين الثقه واتكالين
اتكالين؟ انتى جيبتى الكلمه دى من فين يا كوكى؟
سيبك يا سمسم انا عقلى سابق سنى، وفكر هناكل ايه عشان انا معدتى بتصوصو
هناكل الموجود يا كوكى، فول، جبنه، مربى واى شيء صالح للأكل
دخلنا البيت وعقلى مش معايا، بنت جميله بتزور المقابر وتقعد فيها اكيد فيه سر
كوكى صراخ، الله بص يا سمسم بص شايف الاكل قد ايه؟
ببص على الطاوله لقيت اكل كتير
فراخ، لحمه، محاشى، سلاط، كفته
حطيت ايدى على بقى، ايه كل ده؟ مين دخل البيت ووضع الاكل دا هنا؟
مش مهم يا سمسم، اقعد كل وبعد كده نفكر يمكن حد من الجيران صعب عليه حالنا
الجيران يا كوكى؟؟ دا أغنى واحد فيهم ما يملكش عنزه
اكلنا باستمتاع، مش فاكر امتى اخر مره اكلت فيها لحم وشبعت، كنت دايما بحاول أوفر الفلوس لكوكى واحوشها عشان لما تكبر اقدر اجوزها
سألت الجيران كلهم لو كان اى واحد فيهم لمح شخص غريب دخل بيتنا، وكانت الاجابه لا
حاجه محيره، اكل زى دا يكلف ثروه مين الشخص الكريم الغامض إلى عمل كده؟
روحت الشغل كالعاده، شغلى متعب جدا، بشيل رمله واسمنت
وأطلع بيها ادوار مرتفعه، لكن اليوم دا كان غريب
كنت بشيل اي حاجه بسهوله ومشعرتش بتعب، وكمان خلصت شغلى بدرى وكان عندى وقت اخد كوكى من المدرسه
حطيت ايدى فى ايد كوكى، يلا افرحى هخليكى تشوفى صاحبتك النهرده
كوكى بلؤم انا برضه؟
امشى يا بت وبلاش لماضه، قبل ما نوصل المقابر شفتها
كانت لابسه فستان ملكى شديد الجمال وشايله قطه فى حضنها
قطه لونها شعرها رمادى ولطيفه جدا، يمكن أجمل قطه شفتها فى حياتى
القطه كانت بتبص عليا وانا بكلم البنت، كأنها بتخترقنى او بتقرانى، والله تكاد تقسم انها ليه عقل زينا وبتفكر