رواية البر التاني الفصل الرابع والثلاثون 34 بقلم لولو محمد
رواية البر التاني الجزء الرابع والثلاثون
رواية البر التاني البارت الرابع والثلاثون
رواية البر التاني الحلقة الرابعة والثلاثون
انتصار / صباحك عسل يا ست العرايس
هند / صباح الفل اقدر اساعد فى ايه
انتصار / ياختى مستعجله على الشقا ليها دا انتى عروسه
هند و مريم يبصوا لفاطمه
هند / لا عروسه ايه بقي ما خلاص و بعدين فاتن و سماح تعبانين قوليلى بقي المنيو ايه النهرده
فاطمه / هنعجن فطير مشلتت بالسمنه الفلاحى
هند / اوبا دا انا دخلت فى الغويط مره واحده
مريم / دا سهل خالص تعالى اقعدى انا هفرد قدامك
فاطمه / حظك حلو احنا بنعجن بدرى جيتي فى السهل
هند / اللى فاتنى المرادى اتعلمه المره الجايه الجايات اكتر
مريم تقعد هى و هند على طبليه قدامهم صينيه و جنبهم طبق مليان كور عجين مريم تحط سمنه و تبطط الكوره هند تشوف فاطمه و انتصار بيفردوا قدام بعض تعمل زيهم
مريم / دى الطريقه السهله فى طريقه تانيه بس انا فشلت فيها فشل زريع لو كانت فاتن هنا كنتى هتلاقيهم شغالين بيها
فاطمه / و انتى هتفضلى خايبه طول عمرك مش هيجى عليكي يوم و تنصفينا دا انا قدك كنت بعجن الفطير ده و اخبزه لوحدى
انتصار / من يومك شاطره
فاطمه / احنا اللى مدلعينهم
انتصار / نعيش و ندلعهم عملت كدا و لا بالطريقه التانيه هتفرق ايه ما فى الاخر بتطلع حلوه و مورقه
فاطمه / ما فرقتش افردى افردى
فاطمه تبص على هند بتعمل بطراطيف صوابعها
فاطمه / غطسى ايدك فى السمنه و حسي بالعز
هند / ما بحبش ايدى تدهنن بقشعر
فاطمه / بتقشعرى !!! عشنا و شوفنا الله يرحمها امى كانت بتشربلها كبايه سمنه على الريق
انتصار / الله يرحمها عشان كدا كان فيهم صحه بس بينى و بينك صعبه حاولت ياختى و انا صغيره ما قدرتش و جبت كل اللى فى بطنى
فاطمه / هههههههههههههههه ضحكتيني
انتصار / الفطير بيحب السمنه و اللغوصه اللعبى
هند / هههههههههههههههههه بحاول والله
هند تخرم العجين
فاطمه / يخيبك خرمتيها
مريم / مش مشكله مش مشكله
فاطمه / مهو من خيبتك مش عارفه الخروم دى هتعمل ايه طب دا انا مره عملت فطيره من علوها كانت لامسه سقف الفرن حصل و لا لا يا ام فاتن
انتصار / حصل بس هند اول مره و لسه بتتعلم بكره تبقى شاطره و ست الشاطرين كمان
فاطمه/ يا ترى من يعيش
هند تبص لفاطمه و تبتسم و تشيل العجينه مع مريم يحطوها على صينيه تانيه و يجيبوا كوره تانيه و يفردوها
………………………….
فى شقه عبد الله
عبد الله يفتح الباب
عبد الله / السلام عليكم انا جيت
شيرى فى المطبخ
شيرى / اتاخرت كدا ليه الاكل برد
عبد الله يدخل المطبخ يلاقيها بتغسل مواعين
عبد الله / جيت اهو … ايه ده خيانه كلتوا من غيرى
شيرى / لا يا سيدى ما اكلتش بس ياسمينا ما قدرتش تستنى اكلتها هى
عبد الله / احسن برده
شيرى / اخبار الشغل ايه
عبد الله / كويس الحمد لله كلمتى هند تطمنى عليها
شيرى / رنتلها رنه صغيره و قولت لو شافتها هتكلمى بس شكلها مشغوله ما كلمتنيش لحد دلوقت
عبد الله / و ما كلمتيهاش تانى ليه
شيرى / بصراحه خفت حد يقولها كلمه كدا و لا كدا ما دام مبسوطه خلاص خليها
عبد الله / ايه اللى بتقوليه ده مش تكلميها تطمنى عليها و بعدين هيقولولها ايه يعنى مامتك بتكلمك تطمن عليكى ما اى ام بتطمن على بنتها عادى يعنى كلميها
شيرى / انت شايف كدا
شيرى تنشف ايدها فى فوطه جنبها
عبد الله / اصلا مختار نزل الشغل النهرده هو اللى موصلنى دلوقت
شيرى / اخص عليك يا عبد الله و تسيبه يمشى من غير ما تمسك فيه يطلع
عبد الله / لا طبعا مسكت فيه و مسكت فيه جدا كمان بس اكيد رفض و قال مش هيسيب هند تاكل لوحدها
شيرى / طيب استنى بقى لما يروح و اكيد ساعتها هتكلمنى
عبد الله / براحتك انا هدخل اغير على ما تغرفى
شيرى / ماشى يا حبيبى حالا
عبد الله يطلع بره و شيرى تغرف
……………………..
فى السرايا
مختار ممدد على السرير و بيلعب فى الموبايل و هند فى الحمام
مختار / هتباتى فى الحمام و لا ايه
هند تفتح الباب و تطلع لفه شعرها بالفوطه تروح تقعد على التسريحه و تسرح شعرها
مختار / يا خارجه من باب الحمام و كل خد عليه خوخه
هند تبصله بطرف عينها من المرايه و تكمل تسريح
مختار / هو الحلو زعلان و لا ايه
هند تحط الفرشه و تروح تنام على السرير على بطنها و تستغطى
هند / لا و انت الصادق الحلو مفحوت
مختار / لا بس تسلم ايدك احلى فطير دوقته فى حياتى
هند تبصله بطرف عينها و تنام تانى
مختار / هى كل حاجه فى اولها صعبه بعد كدا بتتعودى
هند تتعدل و تقعد و تبصله
هند / بجد انا مش عارفه ازاى هقدر اكمل كدا كل يوم لا و فاطمه دى فظيعه بجد … و ما تقوليش ربنا ادانا ودنين عشان ندخل من هنا و نطلع من الناحيه التانيه دى ما بتديش فرصه للكلمه تطلع تلاقى التانيه لحقاها
مختار / ايه يعنى ما كانش فى عيلتك حد رخم مجبره تتعملى معاه لازم فى كل عيله حد منكد عليهم
هند تهز راسها و تبص الناحيه التانيه
مختار / اول يوم ليا فى الشغل مش هتسالينى عملت ايه ؟
هند / سورى يا قلبى عملت ايه ؟
مختار / الحمد لله تمام عدينا على الاراضى كان فى شجر فى جنينه الموز عيان … استنى همتحنك ورق الشجره كان اخضر غامق و الطروف مصفره و فى خطوط متقاطعه على الاعناق لونها اخضر غامق و سهله الكسر
هند / تورد القمة
مختار / جدعه … بيتعالج ازاى بقى
هند / نحط كيروسين على قمه النباتات المصابه قبل ما نقلعها من جدورها و نحرقها و ما نزرعش مكانها الا بعد شهرين و يتساب مكانها معرض للشمس و نطهره بالجير الحى المطفى و نرش كل اسبوعين بمبيد حشرى ضد المن
مختار يسقف
هند / ممكن بقى انزل معاك الارض اسهل من الخبيز اللى قطم ضهرى ده
مختار/ ههههههههههههههههههههه لا لاننا اكيد لما نرجع هنبقى عاوزين ناكل لقمه و لا هنيجى ناكل على الجاهز كدا مش عيب
هند / لا العيب انى اقعد اخبز كل الفطير ده لما ضهرى يتقطم انا اساسا كل اللى اكلته ما يكملش ربع فطيره
مختار / ما الفطير كان كتير ما اكلتيش ليه
هند / شبعت و بعدين دا تقيل جدا
مختار / من حلاوته طب بالله عليكي عمرك دوقتى فطير فى حلاوته
هند / لا بس ليه الكميه دى كلها و كل ما يطلع حبه يلفوهم و يبعتوهم ما اعرفش فين
مختار / اعمليها بنيه اطعام استغلى التعب ده انك تلمى حسنات
هند / ماشى
هند تنام تانى مختار يحضنها
هند / ضهرى يا مختار بيوجعنى و عاوزه انام
مختار / بدرى كدا
هند / بجد مش قادره صاحيه من بدرى و ما ارتحتش ثانيه واحده
مختار / ماشى بس هتعوضيني
هند / ان شاء الله … ما تخليك جدع و تدعكلى ضهرى
مختار / دا انتى تؤمرى
هند / بادب بجد مش قادره
مختار / بادب !!! ماشى امرى لله
مختار يدعك ضهرها بالراحه
مختار / النهرده بعد ما خلصت الشغل وصلت الباشمهندس عمر دا المهندس الزراعى بتاعنا راجل خبره جهبز بصراحه من يوم ما دخلت الكليه كان لازم لينا قاعده كل ما انزل اساله فى اللى درسته و يشرحلى و يورينى عملى كل حاجه و ليه فضل كبير عليا المهم بعد ما وصلته و انا راجع قابلت عبد الله خدته وصلته هو كمان ما حكتلكيش انتى بقى انا و هو اتكلمنا فى ايه امبارح
مختار يبص على هند يلاقيها رايحه فى النوم يغطيها و يبتسم و يمدد جنبها و يبصلها
…………………………
فى اوضه فاطمه
فاطمه / يلاهوى ايدك منها و القبر دا انا فى الاخر قولت اكيد بتعمل كدا قاصده عشان نقولها قومى
شاكر / اول مره برده ما حدش بيتعلم من اول مره
فاطمه / قولنا كدا فى اول و تانى فطيره انما دا لحد ما اخر واحده مفيش فايده بقولك مش فالحه فى حاجه لا و كل شويه تطقطق ضهرها قال ايه وجعها فقعتنى بمياصتها
شاكر / زمانها كرهت المطبخ مدخلينها على الفطير علاطول من الدار للنار كدا
فاطمه / يا خويا انت كمان
شاكر / زمانها قالت لامها ما صدقوا مشيتى و شقونى
فاطمه / ليه و احنا ما خبزناش و لا مره و امها هنا صحيح انا مستغربه ليه هى امها كانت فالحه اوى
شاكر / احنا هنقضى الليل كله بنتكلم فى هند و امها و لا ايه انا مش فايق لتفاهات الحريم دى
فاطمه / ما تفكرنيش … قلبى بيتقبض كل ما افتكر … لا بس شكلها هتبقى ليله طويله على مختار
شاكر / و لا طويله و لا حاجه هو اللى اختار
فاطمه / ياخويا قال اختار قال هو اللى اتجبر
شاكر / مفيش حد يقدر يجبر زيني على حاجه مش عاوزها
فاطمه / فيها ايه يعنى هند دى عن اى بنت تانيه
شاكر / شكلها هتبقى ليله طويله عليا انا
فاطمه / اخص عليك دى اخرتها
فاطمه تتقمص و تدى ضهرها لشاكر و تنام
شاكر / هههههههههههههههههه انا بهزر معاكى
فاطمه / و لا ما تهزرش
شاكر / بلاش شغل العيال ده بقى
فاطمه / خلاص بقى مش كنت عاوز تنام ما تنام
شاكر / بصراحه هموت و انام يلا تصبحى على خير
شاكر يديها ضهره و ينام فاطمه تتعدل و تبص عليه باستغراب و تنام و هى بتفرك
……………………….
فى جنينه السرايا
الرجاله بيركبوا العربيات و ناصر واقف فى الفرانده متابعهم يدخل جوه يقابل مختار نازل على السلم
ناصر / خير ايه اللى صحاك السعادى
مختار / عادى يعنى ما انت صاحى اهو
ناصر / هطلع انام و انت كمان اطلع ارتاح عندك شغل الصبح بدرى
مختار / هقعد فى المكتب شويه
ناصر / ماشى بس ما تطولش
مختار / حاضر
ناصر يطبطب على كتف مختار و يطلع فوق و مختار ينزل و يدخل المكتب و يقفل الباب و يروح يقعد و يفتح الدرج يلاقى مسدس يبصله بحزن و يقفل الدرج تانى و يتنهد و يبص على حيطان المكتب
…………………
فى عربيه مغاورى
مغاورى بيتكلم فى الموبايل
مغاورى / احنا اتحركنا و طالعين الجبل فتح عنيك كويس
وهدان / ما تقلقش يا مغاورى بيه الرجاله فى كل حته مفتحه عنيها
مغاورى / على بركه الله
مغاورى يقفل و يتصل بحد تانى
مغاورى / اتحركتوا و لا ايه
عباده / احنا وراكوا
مغاورى يبص فى المرايه
مغاورى / منورين يا رجاله
عباده / نورك التامين عليك
مغاورى / ما تقلقش لسه قافل مع وهدان و كلو تمام
عباده / كلو على الله
مغاورى يقفل و يسوق و وراه عربيات و بعدين عربيات الزنايته
……………………….
فى اوضه هند
هند تصحى تبص جنبها ما تلاقيش مختار
هند / مختار .. مختار
هند تقوم تخبط على باب الحمام مفيش صوت
هند / مختار
هند تفتح باب الحمام مفيش حد تستغرب و تروح تجيب موبايلها تلاقى موبايل مختار جنبه تستغرب و تفضل رايحه جايه تتنهد و تلبس الاسدال و تفتح باب الاوضه كل الاوض مقفله و مفيش اى صوت تدخل الاوضه تانى و تفتح الشباك و تبص مفيش اى صوت او حركه تقفل الشباك و تطلع من الاوضه و تقفل الباب و تنزل تحت مفيش اى صوت او حركه هند تروح ناحيه باب السرايا تسمع صوت فى المكتب تروح ناحيه المكتب و تفتح الباب تلاقى مختار قاعد مغمى عينه و بيركب رشاش بسرعه الحزن يملا وشها و بسرعه تلم نفسها و تبتسم و تروح تقعد قدامه يفك الرباط من على عنيه تبتسمله
هند / بسم الله ما شاء الله انت سريع اوى
مختار / كنت زهقان قولت انزل اللعب شويه مش حاجه يعنى
هند تبتسم
هند / عبد الله حكالى على اللعبه دى بس ما وفاكش حقك بصراحه امممم ما تعلمنى
مختار / عاوزه تتعلمى
هند / بص شيل الرصاص منها و علمنى ينفع ؟ و لا لازم رصاص و كدا
مختار / ينفع
هند / تمام يلا علمنى
مختار يبتسم و يقوم يقعد على الكرسى قدمها و يجيب القطع و يحطها على الطقطوقه بينهم و يبصلها و هم الاتنين مبتسمين بس ابتسامه مختار اكبر
………………………….
فى الجبل
الرجاله بيحملوا عربيات بصناديق من عربيات تانيه تليفون مغاورى يرن يبص فيه يجرى يوشوش عباده
عباده / يلا يا رجاله لازم نمشى
اللى شايل صندوق يجرى بيه و الكل يتحرك بسرعه شديده و فى ثوانى الكل يتحرك و يفضوا المكان عباده يطلع موبايله و يتصل بمغاورى
عباده / على الله تيجي بفايده
مغاورى / انت خسران ايه ان ما فلحتش ادينا هنملا المخازن و نرجع للشغل النضيف تانى
عباده / على رايك بس برده الواحد عشمه فى ربنا كبير نضرب العصفور الكبير
مغاورى / كلو على الله بس انا قلبى حاسس انها مش هتخيب
عباده / كلو على الله
مغاورى / وهدان بيرن اقفل اما اشوف
عباده / سلام
عباده يسوق و العربيات تتفرق كل عربيه فى اتجاه و عباده تليفونه يرن تانى
عباده / ما لحقتش اوحشك يعنى
مغاورى / العصفوره بلعت الطعم
عباده / هههههههههههههههههههه ايوه بقى اهى دى الاخبار
مغاورى / رجاله وهدان شافوا عربيه غريبه بتتحرك بعد ما مشينا
عباده / قولى بقى الخبر الحلو
مغاورى / و قطروها
عباده / حبيبى اقسم بالله
مغاورى / ان شاء الله ليك عندى البشرى الكبيره
عباده/ قسما بالله حبيبي
مغاورى / هههههههههههههههه يلا سلام
عباده يقفل و هو فى منتهى السعاده
……………………..
فى المكتب فى السرايا
هند بتركب ببطئ شديد و كل شويه تبص لمختار يساعدها
هند / صعبه اوى
مختار / مره فى مره هتتعلمى
هند / مش هنكر انها عجبتنى
مختار يبتسم اوى
هند / كنت بستغرب ان عبد الله حب الموضوع تعرف كانه ميكانو بس على كبير كنت بحب اللعبها اوى و انا صغيره
مختار / مهو لعبك لازم تكبر معاكى
هند / ههههههههههههههههههه صح … هو منطقه الرمايه بتاعتكوا للرجاله بس
مختار / عاوزه تتعلمى و لا ايه
هند / مش كل البنات هنا بيعرفوا يضربوا نار اشمعن انا يعنى
مختار / اعلمك
هند / ماشى … ما تيجي نطلع اوضتنا بقى
مختار يبتسم
مختار / نطلع
مختار يقوم و يعين الحاجه مكانها و هند متابعاه
هند / هو ينفع ناخد واحد فى اوضتنا نلعب بيه فوق سوا و لا لازم نلعب فى المكتب
مختار يبصلها
هند / ايه !!!
مختار / ههههههههههههههه مفيش بس هتعرفى تنامى و فى سلاح فى اوضتك
هند / ما انت هتبقى جنبى هخاف من ايه
مختار / بتشتغلى جيل بعد الضهر يا بت حسيت انى اتثبت كدا
هند / ههههههههههههههههه بطل رخامه بقى
مختار / هههههههههههههههههه يلا نطلع
هند و مختار يطلعوا من المكتب يلاقى باب السرايا بيتفتح و عباده داخل و وراه امين و اتنين رجاله
عباده / فى حاجه و لا ايه
مختار / لا ما فيش
مختار يبص لهند و يشاورلها براسه تطلع فوق هند تسيبهم و تطلع فوق
امين / بالاذن انا كمان لحسن انا على اخرى
امين و الرجاله يطلعوا فوق
مختار / ايه الاخبار
عباده / العصفوره بلعت الطعم و مستنينها تدخل القفص برجليها
مختار / ما تستهونوش بيها
عباده / هنخسر ايه على راى مغاورى ادينا ملينا المخازن و بصراحه العمليه كانت نضيفه و على مايه بيضا
مختار / على البركه
عباده / على البركه .. انتوا كنتوا بتعملوا ايه تحت هنا السعادى صحيح
مختار / بقولك ايه … عاوز منطقه الرمايه بكره
عباده / عاوزها ازاى يعنى
مختار / هاخد هند امرنها
عباده يستغرب
عباده / قول والله
مختار / ما كنتش عارف انام و عمال افكر فيكوا قولت اسلى نفسى و اللعب بالسلاح دخلت عليا و عجبها و قعدت علمتها و طلبت اعلماه الرمايه و بصراحه عندى امل كبير انها اخيرا تفهم
عباده يبص فى الارض و يدارى ضيقه و مفاجاته
عباده / راى انك ما تعشمش نفسك اوى فى الموضوع ده
مختار / ليه يا عباده ما كل حاجه بتتغير واحده واحده اهو و هى دلوقت فهمت الدنيا و اللى حصل فى الساحل خلاها تفهم اكتر
عباده / تفهم و لا تخاف ؟
مختار / قصدك ايه ؟
عباده / مش عارف انت ادرى بيها منى
مختار يبص الناحيه التانيه
عباده / على العموم انا هكلم الرجاله بكره و اقولهم منطقه الرمايه بتاعتك حاول و ربنا يعملك اللى فيه الخير ليك و لينا
مختار / امين … عن اذنك
مختار يطلع فوق و عباده يبص الناحيه التانيه و هو مضايق
عباده / و اخره حكايتك دى ايه يا ست هند
…………………………
فى اوضه مختار
مختار يدخل يلاقى هند قاعده على كرسى التسريحه بتسرح شعرها اول ما يدخل تبصله و هى مبتسمه و تقوم تجرى عليه
هند / ايه كل ده والله دقيقتين كمان و كنت هنام كنتوا بتتكلموا ايه كل ده ؟.. و بعدين تعال هنا يا استاذ انت وزعتنى ليه هو فى اسرار بينا ؟
مختار / صبرك صبرك مالك حاميه عليا كدا ليه انا هحكيلك كل حاجه بس اخد نفسى
هند / تاخد نفسك !!! ايه يا عم ما كانوش سلمتين اقعد كدا و فهمنى وزعتنى ليه
مختار / ما كنتش بوزعك بس وقفتك لوحدك وسط الرجاله ما كانتش حلوه و انا كدا كدا كنت هحصلك
هند / وجهه نظر تحترم بس شوفتنى مؤدبه و بسمع الكلام ازاى
مختار / ست البنات كلها و عشان كدا انا عاملك مفاجاه
هند / لا بص بقى من اولها كدا انا فضوليه جدا و جو عاملك مفاجاه ده خطر جدا على صحتى فقول ايه هى المفاجاه دورغى
مختار / ههههههههههههههههههه مش طلبتى تتعلمى الرمايه ؟
هند / حصل
مختار/ بكره هاخدك و نروح منطقه الرمايه و اعلمك … و اهو بالمره تزوغى من المطبخ بس تعملى حسابك مش هيبقى كل يوم مش عاوزين نفتح على نفسنا فاتوحه
هند / طب ما تعرفش كانوا ناويين يطبخوا ايه بكره لتكون حاجه خفيفه و اضيعها على نفسى و اللبس فى التقيل
مختار / ههههههههههههههههههههه يخرب شيطانك
هند / ايه !!
مختار / انا اتفقت على بكره و انتى و نصيبك بقى فى حوار المطبخ ده
هند / يلا مش مشكله انا و نصيبي بقى … المهم صحيح هم كانوا بره بيعملوا ايه السعادى
مختار / يا أيها الذين آمنوا لا تسألوا عن أشياء إن تبد لكم تسؤكم
الابتسامه تروح من وش هند
مختار / ان كنت انا بطلت السلاح مش معناه ان باقى الزنايته بطلوه و الطلعات دى بتبقى غالبا بالليل
هند / عشان كدا ما كنتش عارف تنام و كنت سهران فى المكتب
مختار / لا مش الفكره بس
هند / كل حاجه صعبه فى الاول انا فاهمه
مختار يبتسم هند تبتسم اوى
هند / على العموم انا شايفه اننا نلحق ننام عشان نكون مفوقين بكره عشان انا ناويه اتفوق على الاستاذ
مختار / احلمى على قدك كان غيرك اشطر
هند / بتتحدانى يعنى
مختار / اعتبريها زى ما تعتبريها
هند تروح السرير و تبصله بابتسامه يروح جنبها
هند / بكره تشوف يا جميل
مختار / لسه ضاهرك بيوجعك ؟
مختار يغمزلها تضحك و تغطى وشها بالغطا
……………………….
فى المطبخ تانى يوم
فاطمه و انتصار و البنات بيلفوا محشى
فاطمه / و الله انتوا طيبين و هى يعنى الرمايه و السلاح احلوا دلوقت و اترش عليهم سكر
انتصار / و ادى نظريه المؤامره اشتغلت اهى
فاطمه / و ايه نظريه المؤامره دى بقى ان شاء الله
انتصار / والله ما اعرف بس ناصر كل شويه يقولهالى لما اعمل فيها شارلوك هولمز و ما تسالينيش مين شارلوك هولمز ده
فاطمه / ليه و انا جاهله شوفت الفيلم
البنات يضحكوا و يكتموها
فاطمه / اهو ده اللى انتوا فالحين فيه
انتصار / اتغيرتى يا فاطمه كنت بقول عليكي لوح تلج مش عارفه من امتى بقيتي حاميه كدا
فاطمه / و لا لوح تلج و لا حاميه انتوا اللى تشلوا
انتصار / ههههههههههههههههه ماشى يا ستى مقبوله منك عشان بحبك بس
فاطمه / و انا كمان بحبك بس شدى على البت هند دى شويه
انتصار / ههههههههههههههه يا دى هند يا شيخه سيبيها تدلعلها يومين بكره خديجه تيجي و تاكل منها الجو
فاطمه / يا اختى بقى
انتصار تضحك و البنات يبصوا لبعض و يضحكوا
…………………….
فى منطقه الرمايه
هند بتنشن و مختار بيوجهها
هند / يا دودو يا جامد
مختار / ما تتغريش يا ست هند دا انتى لسه فى مرحله الاهداف الثابته
هند تبصله يضحك
مختار / امال انتى فاكره ايه
هند / فاكره انك بتخم عشان تصعب الموضوع عليا
مختار / ههههههههههههههههههه و بعدين انتى حتى ما جبتيش تمانيه من عشره اساسا
هند / انا اول مره
مختار / ليه و الملاهى ما تتحسبش و لا ايه
هند / هناك جبت واحده و بالغلط كمان
مختار يبتسم
مختار / مش هاكل حقك ما انكرش انك ابهرتيني النهرده
هند / و لسه المره الجايه انا متاكده انى هكون احسن
مختار / و هو ده بالظبط اللى انا عاوزه و هعلمك كل حاجه اعرفها
هند تبتسم
هند / اممم و انا بقى هعلمك ايه ؟
مختار / علمينى ازاى احلو اوى كدا لما تبصى فى عنيا
هند / ههههههههههههههههههه هنا !!!
مختار يبص حواليه
مختار / هو اه مفيش حد بس نخليها فى السرايا احسن
هند / ههههههههههههههههه انت رغاى و هتضيع التمرين فى الكلام وسع وسع اما اجرب تانى
مختار / هروح اغيرلك العلامه على ما تعمرى السلاح انا عملتك المرادى هتعمليها لوحدك
هند / طب استنى اعملها و انت واقف جنبى
مختار / لا
مختار يسيبها و يمشى
هند / انت شرير اوى ايه ده
هند تفك الخزنه و تبدا تملاها بالرصاص رصاصه ورا التانيه
هند / ما الموضوع سهل اهو امال ايه بقى
…………………….
فى فيلا فيرا
راجل يدخل يورى فيرا فيديو على الموبايل تشوفه و تبتسم و تشاورله يمشى و تطلع الموبايل و تتصل بحد ما يردش تنفخ و تتصل بحد تانى
فيرا / هاى معلم سليم
سليم / اهلا بست الكل عاوز اقولك ان البضاعه واكله الجو
فيرا / قولتلك بس مش دا موضوعنا يا معلم
سليم / خير اؤمرى
فيرا / عملت ايه فى الحوار اللى قولتلك عليه
سليم / انا وشى منك فى الارض بخصوص الحوار ده
فيرا / ازاى يا معلم
سليم / البلد دى صعبه يا ست الكل و هتحتاج وقت عشان البضاعه تخشها اهلها اخرهم سجاره بالعافيه دا لو دخنوها و المستشفيات هناك نضيفه احنا حاولنا مع الناس ما بياخدوش حبايه للصداع حتى من بره الاكزاخانه و نسبه الاميه فيهم قليله اوى البلد دى صعبه مش زى الريف اللى نعرفه
فيرا / مفيش حاجه صعبه يا معلم انت بس اللى مش عاوز تفكر بره الصندوق
سليم / يعنى ايه لامؤاخذه
فيرا / يعنى لكل مكان طريقه شكل و اللى ينفع مع منطقه مش شرط يمشى فى مكان تانى
سليم / انا جربت كل الطرق الناس هناك حتى ما بيثقوش فى اى حد من بره البلد
فيرا / بالظبط و مش جهله يبقى عشان تقدر تدخلهم الحبوب دى لازم تدخلها عن طريق حد يثقوا انه هيديهم حاجه كويسه
سليم / ازاى و لا مؤاخذه
فيرا / يعنى يا مستشفى يا صيدليه يا عيادات الدكاتره
سليم / لا دى صعبه اوى يا ست الكل
فيرا تبص الناحيه التانيه و تهز راسها لا و تتنهد و ترجع تتكلم
فيرا / ما هو مش معقول كل الدكاتره و الصيادله فى البلد دى استرايت يعنى اكيد هتلاقى فيهم واحد و لا اتنين تحت السلم و انت فاهمنى يا معلم
سليم / كلام سليم
فيرا / و ان ما لقيتش فيهم بسيطه شوف حد من حبايبك و افتحله صيدليه هناك هو انا اللى هعلمك الشغل برده يا معلم
سليم / صحيح ما يجيبها الا حريمها باذن الله اول حاجه هعملها من بكره الصبح هبدء فى اللى قولتى عليه ده
فيرا / و هو النهرده خلص و لا ايه يا معلم
سليم / ماشى كلامك يا ست الكل النهرده ابدا فى الحوار ده
فيرا / ميرسى يا معلم و لعلمك انا مستعده ابيع الحبايه فى البلد دى بجنيه
سليم / جنيه !! جنيه واحد يا ست الكل
فيرا / اه شوف انت بقى هيقف عليك انت بكام
سليم / بس دى تخسر معانا جامد اوى
فيرا / انا ادرى بشغلى و اللى هنخسره النهرده هنكسب عشر اضعافه على الاقل بكره
سليم / اللى تشوفيه يا ست الكل من عنيا
فيرا / تسلم عنيك يا معلم سليم
سليم / الا بالحق .. هو احنا يعنى مش هنتقابل خالص غير فى الشغل عاوزين نتملى بطلعتك البهيه
فيرا / هههههههههههههههههه اعمل اللى طلبته منك و انت هتشوف منى اكتر بكتير من طلعتى يا معلم
سليم / اموت انا
فيرا / ههههههههههههههههههه بعد الشر يا معلم … سورى غصب عنى هقفل بس اكيد هكلمك تانى
سليم / فى انتظارك يا جميل و مش عاوزك تقلقى ان شاء الله المره الجايه هيبقى عندى ليكي اخبار حلوه
فيرا / حبيبي يا معلم
فيرا تقفل و تنفخ و تحدف الموبايل على المكتب
فيرا / ستيوبد فول
……………………………
فى السرايا بالليل
مختار و ناصر بيتمشوا فى الجنينه
ناصر / انا شخصيا اتفاجئت بس لعله خير
مختار / عباده بيقولى ما اعشمش نفسي
ناصر / كل حاجه باوانها ان جت خير و ان ما جتش يبقي اكيد برده خير و سبحان الله ما حدش عارف الخير فين
مختار / المهم انا كان فى حوار عاوز اكلمك فيه
ناصر / خير قول
مختار / ايه رايك فى عبد الله لمريم
ناصر يبص لمختار
مختار / مش دلوقت يعني لما يتخرج طبعا
ناصر / والله عبد الله جدع ابن حلال و طيب و بيصفى متعلم و ذكى و بكره يبقي دكتور
مختار / و لا له فى سجاره و لا عينه زايغه زى اللى فى سنه دا غير انه فاهمنا وكانه واحد مننا
ناصر / انت رايك ايه ؟
مختار/ الراى راى مريم بس لو عليا ياريت
ناصر / انت بتتكلم فى الموضوع ده ليه دلوقت خصوصا بعد اللى حصل
مختار / لا ما لوش علاقه هو بس ما جتش مناسبه قبل كدا و مريم بتكبر و بدا يجيلها عرسان و انا عاوزها مع حد كويس عقولهم تقدر تتلاقى
ناصر / والله انا مرتاح مش هقول لا بس هو فين عبد الله كل الكلام ده سابق لاوانه ما يمكن يدخل الكليه و يشوف البنات و تعجبه واحده منهم و نبقي ربطناله البت على الفاضي و يمكن برده ما تكونش مريم فى دماغه خالص و انت عارف رايي الخطوبه لما بتطول بتفتح باب للشيطان
مختار/ عبد الله بيشتغل و انا كفيله لو وافقت عليه نجوزهم ان شاء الله حتى كتب كتاب و براحتهم بقي
ناصر / هههههههههههههههههههه دا انت مستعجل اوى
مختار / اديني بحكى معاك
ناصر / برده كلام سابق لاوانه يا عالم هو عاوز ايه
مختار / انت بس قولى رايك و انا هجس نبضه من بعيد لبعيد و اهو على راى المثل اخطب لبنتك و لا تخطبش لابنك
ناصر / و ان وافقت انا و روحت جسيت نبضه و فى الاخر مريم رفضت
مختار / يبقي مفيش نصيب كل شئ بالخناق الا الجواز بالاتفاق هنعمل ايه يعني
ناصر / والله كلامك حلو و بصراحه جاى على هوايا الواد عبد الله دا سبحان الله فيه شئ لله يتحب و انا بحبه و الفتره الصغيره اللى قعدها معانا ملا دماغى زى ما ملا قلبي و لولا الحركه اللى حصلت دى انا ما كنتش سبته يمشي ابدا و كمان ابوه سابه هو و اهله فى رقبتنا
مختار / الله يرحمه
ناصر / الله يرحمه
مختار / يعني انت موافق ؟
ناصر / و هرفض ليه الرك على اللى هتتجوز هى اللى تقبل او ترفض
مختار / انا اقصد على ظروفه يعني الشقه و الشبكه و الحاجات دى
ناصر / و احنا من امتى بتفرق معانا الحاجات دى احنا بنشترى راجل و يا بخت من وفق راسين فى الحلال
مختار / يبقي على بركه الله
ناصر / بس خد بالك مش هتقل ببنت اخوك
مختار / عيب يا كبير دى اختى الصغيره و غلاوتها عندى ما حدش يعرفها قدى
ناصر / على بركه الله جس نبضه من بعيد و انا برده هشاور ام فاتن و اشوف رايها ايه
مختار / قولها بس مختار كفيله و هى هتوافق على طول
ناصر / انت هتقولى
مختار / هههههههههههههههههه
…………………….
على القهوه
يوسف / انا ما عدتش طايق البيت و لا طايق ابويا شخصيا
حامد / والله يا يوسف مش عارف اقولك ايه انت عارف لو معايا ما استخسرش فيك ابدا
يوسف / و امى ما بتبطلش زن على حوار الشبكه شوف شبكتك .. التاجر لما بيفلس بيدور فى دفاتره القديمه ..انت اولى بالدهب .. الدهب كل يوم بيغلى
حامد / و بصراحه معاها حق انا مش فاهم انت ساكت ليه
يوسف / هقولها ايه و هقولها ازاى
حامد / دا حقك شرعا و قانونا
يوسف / لا اله الا الله
حامد / يا ابنى انت مش امك معاها فواتير الدهب
يوسف / معاها
حامد / خلاص هتهالى و انا هخلى المحامى يجيبهم من حباب عنيها
يوسف / لا لا مش اخلاق دى
حامد / يا ابنى دا حقك و ما تتكسفش و انت بتطلبه مد ايدك فى بق السبع و خد منه حقك
يوسف / انا بفكر اروحلها اتكلم معاها بالزوق الاول
حامد / انت كل مره تقول كدا و ما بتروحش
يوسف / مش قادر اصدق انى ممكن اعمل كدا
حامد / و هو ايه اللى رماك على المر يعنى انا كان ممكن اتخيل ان يجي عليا اليوم انى اشتغل طول اليوم و اداين لطوب الارض و فى الاخر امشى و مفيش فى جيبى تمن تاكس يروحنى
يوسف يبص لعمه و يتنهد
يوسف / ماشى بكره هروحلها
حامد / يبقى مش هتروح قوم دلوقت نروحلها انا هاجى معاك
يوسف / دلوقت !!
حامد / قوم يا يوسف بلاش كسل ما ضاع حق وراءه مطالب يا راجل قوم
حامد يقوم و يشد يوسف يقومه
يوسف / امرى لله هعمل ايه يعنى
……………………..
فى اوضه هند
هند / بتهزر
مختار / اوعى اندم انى قولتلك دا سر بينا
هند / انا مش قادره اصدق نفسى عبد الله و مريم
مختار / تفتكرى هتوافق
هند / اتمنى بصراحه البت سكر و انا بحبها جدا و ماما و ياسمينا بس ان عبد الله يكون معجب بيها بصراحه اتفاجئت بس بشكل حلو بشكل حلو جدا
مختار / بس ناصر لفت انتباهى لحاجه ما فكرتش فيها قبل كدا
هند / حاجه ايه دى
مختار / انه لسه هيدخل الجامعه و ممكن هناك يشوف بنات تانين و يعجبوه
هند / لو كان الموضوع بالبساطه دى كان كل راجل متجوز لما يشوف بنت تانيه يعجب بيها
مختار / برده عبد الله ما اختلطش ببنات كتير
هند / بس بس بس انت شكلك ما تعرفش عبد الله عبد الله فى مدارس مشتركه طول عمره يعنى متعود على البنات طول الوقت انا بس شايله هم لما مريم تعرف عن دينا
مختار يضحك و يبص الناحيه التانيه
هند / صدقنى اللى انت بتتكلم فيه ده اخر حاجه ممكن تقلقنى انا اللى قالقنى حاجه تانيه خالص و بصراحه كل يوم بقضيه مع اهلك بخاف اكتر
مختار / من ايه
هند / من فرق المستوى من مرات عمك و لسانها الطويل … هى دى الشبكه اللى جايبهالك … مرات عمك قالتهالى بالحرف الحاجه الوحيده اللى ليها قيمه هنا هى الدهب
مختار / نوعا ما معاها حق بس فى حاجه اهم من الدهب الرجوله مريم هتعمل ايه بطن دهب و هى متجوزه دكر مش فالح غير فى الشخط و النطر
هند / انا و انت نفهم ده بس
مختار/ كل اللى فى السرايا حريمها قبل رجالها فاهمين ده كويس
هند / و هيعيشوا فين
مختار / نشوفلهم شقه اوسع شويه
هند/ و ماما و ياسمينا
مختار / براحتهم تحب ترجع تقعد معانا اهلا و سهلا تحب تعيش مع عبد الله براحتها تحب تقضيها رحلات يومين هنا و يومين هنا براحتها برده هنا ابنها و هناك ابنها
هند تبتسم
هند / فى جميع الاحوال انا نفسى جدا حوار مريم و عبد الله يتم انا بحب الاتنين اوى بس انا قولتلك اللى قالقنى غير كدا ياريت ينجزوا فى الموضوع قبل ما احمل و بطنى تبقلظ و ما الاقيش حاجه تخش فيا احضر بيها الفرح
مختار / طب بخصوص الموضوع ده انتى مش ناويه تعوضيني بقى
هند / على عينى والله بس هتضر تستنى كام يوم يلا تصبح على خير
تظهر علامات خايبه الامل على وش مختار
هند / انا كمان اضايقت اوى كان عندى امل كبير انى احمل
مختار / كل تاخيره و فيها خيره
هند تهز راسها و تقوم تروح تنام فى السرير و مختار يطفى النور و ينام جنبها و ياخدها فى حضنه
مختار / انا ما اضايقتش ان ما حصلش حمل انا اضايقت ان حقى هيتاخر
هند / ههههههههههههههههههه
مختار / حبيت اوضح بس عشان ما يحصلش لبس فى المواضيع
هند / عاوز تقنعنى انك مش مستعجل على الخلفه
مختار / نفسى فيها بس مش مستعجل عليها تيجي فى وقتها اللى ربنا كاتبهولنا
هند/ و ان ما جاتش
مختار / تؤ تؤ تؤ ما تقوليش كدا تفائلوا بالخير تجدوه و ان شاء الله ربنا يرزقنا و على العموم لو لا قدر الله و ما حصلش عمى شاكر مش هيكون اصيل مع مراته الله يرحمها اكتر منى
هند / هتستنانى اموت عشان تتجوز
مختار / ما حدش عارف مين هيدفن مين يا هند بس اللى اقدر اوعدك بيه انى ما اقدرش اعيش من غيرك
هند / و لا انا اقدر اعيش من غيرك … هو الحوار بينا ماله قلب نكد كدا ليه طب انا هرمونات انت بقى ايه حجتك
مختار / هرمونات برضه عندى نقص حاد فى الاوكسايتوسين
هند / مفيش فايده نام يا مختار
مختار يبوسها من خدها و يديها ضهره و ينام و هى تنام مبسوطه
……………………………
فى شقه وسام
يوسف و حامد وقفين على الباب و فى راجل واقف جوه
يوسف / طب هستاذنك تجبلى العنوان بتاعها فى اسكندريه عشان انا عاوزها فى موضوع ضرورى
الراجل / انا ما عييش عنوانها الحقيقه
حامد / الله امال بتدفع الايجار ازاى
الراجل / انا دافع الايجار سنه مقدم دا غير شهرين تامين
حامد / و مين فى الدنيا يعمل كدا
الراجل / اوفر من انى ادفع ايجار كل شهر الباشمهندسه وسام كانت عامله اوفر ادفع عشر شهور مقدم و اجر سنه كامله
حامد يبص ليوسف و يرجع يبص للراجل
حامد / كتر خيرك اسفين على الازعاج
حامد و يوسف يمشوا و الراجل يقفل الباب
حامد / انا فى حياتى ما شوفتش كدا
يوسف / و ادى السكه دى كمان اتقفلت
حامد / اتقفلت ايه دى فى اسكندريه هى فى الهند
يوسف / و هى اسكندريه دى شويه هلاقيها ازاى فى كل اسكندريه
حامد / يا ابنى فى اختراع اسمه موبايل فى اختراع اسمه فايس
يوسف / عملالى بلوك
حامد / عملالك انت بس مش عملالى انا خد موبايلى كلمها منه و ادخل من اكونت الفايس بتاعى دور عليها و شوف
حامد يطلع موبايله و يديه ليوسف يوسف يطلع موبايله و يدور على النمره و يطلبها من موبايل حامد عفوا لقد نفذ رصيدكم
يوسف / مفيش رصيد
حامد / يادى النيله و ادى كمان الرصيد خلص انا مش عارف هلاحق على ايه و لا ايه و الله بفكر ابيعه بلا هم
يوسف / هتفرج يا عمى فتره و هتعدى
حامد / ازاى بس يا يوسف ازاى و كل الطرق مسدوده فى وشى
يوسف / المحل اهو هيفتح و ان شاء الله بابا هيرجع يوزع النسبه زى الاول
حامد / موت يا حمار
يوسف / ليه بس كدا
حامد / بكره الايام تثبتلك المهم هتعمل ايه دلوقت
يوسف / هعمل ايه يعنى هشترى خط و اكلمها منه و لا اعمل اكونت تانى على الفايس
حامد / اهم حاجه توصلها مهما حصل لازم توصلها
يوسف / يا عمى صدقنى السكه دى مش هتوصلنا لحاجه
حامد / لازم تمشى فى كل السكك
يوسف / حاضر والله
حامد / هو انا لو عاوز اروح من هنا اركب ايه يادى النيله الواحد مهما يكبر هيفضل يتوه فى البلد دى تعال وصلنى لاقرب حته اعرفها لحسن المنطقه دى غريبه عليا خالص
يوسف / تعال يا عمى اتفضل
يوسف و حامد يتمشوا للناصيه
……………………….
فى السرايا
انتصار / و ماله عبد الله طب والله فرحت بيه اكتر ما فرحت بهند
ناصر / للدرجادى
انتصار / الله و هو عبد الله يتعيب
ناصر / و البت دلوقت ما بقيتش صغيره و دراستها و الكلام بتاعك ده
انتصار / عبد الله لسه بيدرس يعنى هيشجعوا بعض و اللى زى عبد الله واعى لاهميه العلام
ناصر / و هيعيشوا فين
انتصار / فى شقته هو يعنى عايش فى الشارع
ناصر / مع امه
انتصار / و هى ام عبد الله وحشه و بعدين ما هند عايشه معانا و بعدين احنا ولاد اصول مش هنرضى الست ام عبد الله و البت اللى على كتفها يسكنوا لوحديهم مش كفايا سابوا بلدهم و اتشحطتوا
ناصر / دا بدل ما تقولى يجوا يعيشوا معانا
انتصار / يالف انهار ابيض دا يبقى نهارنا نادى حد يكره يانسوا و ينوروا و اوضيتهم على حطه ايدهم ما غيرناش فيها قشايه
ناصر / يعنى انتى موافقه
انتصار / انت موافق و مختار موافق انا هرفض ليه
ناصر / اهو يكون ليكي وجهه نظر كدا و لا كدا
انتصار / لا ما ليش قدم المشئيه و ربنا يعمل اللى فيه الخير
ناصر يبتسم
ناصر / ما تفتحيش الموضوع بقى مع حد لحد ما يتقدم رسمى و نشوف هيقول ايه و مش هوصيكى خصوصا البت الموضوع ده مش زى المره اللى فاتت ما يعرفوش غيرى انا و انتى و مختار
انتصار / عيب يا كبير انا عمرى قصرت رقبتك
ناصر / شهاده لله عمرك
انتصار / امال بقى
ناصر / يا ستى باكد عليكي المهم اطفى النور بقى لحسن انا بنام على روحى و انا قاعد
انتصار / حاضر
انتصار تطفى النور و يناموا
………………………….
فى الفرنده
عباده بيتكلم فى التليفون
عباده / يعنى ايه يعنى كل التعب ده على ما فيش
مغاورى / ما يبقاش نفسك قصير يا ابن عمى اللى ما يجيش النهرده يجي بكره و انا هخلى الرجاله بتوعها تحت عنينا لحد ما يدلونا على مكانها
عباده / و انت اش ضمنك انهم رجالتها اصلا
مغاورى/ ما تقلقش مش حكومه انا سالت عنهم و اتاكدت بنفسى
عباده / و هى الحكومه هتقولك انا حكومه يا مغاورى
مغاورى / لا يا سيدى بس الحكومه لو شافتنا و احنا بنهرب السلاح مش هتقف تتفرج كانت هتهجم و تقبض علينا متلبسين و بعدين بتتكلم كان مالناش حبايب فى الحكومه انا اتاكدت بنفسى انهم مش تبعهم
عباده / برده حتى لو مش حكومه تضمن منين انهم تبعها ما يمكن تبع حد تانى
مغاورى / ما دام بيراقبنا من بعيد يبقى اولى بينا نعرف هو مين و بيراقبنا ليه اى كان نهايه الخيط ده فى صالحنا
عباده / كلامك صح
مغاورى / بس انا مش فاهمك متوتر و قلقان بزياده مش طبعك يعنى
عباده / مفيش حاجه تقدر تقول مستعجل عاوز اخلص الحوار ده و اخلص من الوليه دى قبل الفرح
مغاورى / ايه ؟ خايف تنطلك فى شهر العسل بتاعك انت كمان و لا ايه ؟
عباده / طب تبقى تعملها و تبقى جتلى لحد عندى و ريحتنى و ريحتنا كلنا و انا وعهد الله لاريحها هى كمان احلى راحه
مغاورى / هههههههههههههههههههههه هو ده عباده اللى اعرفه … صحيح سمعت ان مختار كان بيمرن هند على الرمايه النهرده
عباده / اه حصل و بيعلماه تركب السلاح و تفكه
مغاورى / هيطلع مسيطر يعنى و كلمته هى اللى هتمشى و لا ايه
عباده / و انت كنت شايفه دلدول و لا ايه فوق يا مغاورى و ما تغلطش ان كان مختار عمل كدا فعملها عشان راجل و ادى وعد للحج ابو عبد الله قبل ما يموت انه هيصون بنته و مختار راجل بيوفى بكلمته حتى لو على رقبته
مغاورى / خلاص خلاص يا عم اتحمقت كدا ليه اول مره نحفل على مختار و لا ايه طب ما انت ياما اتحفل عليك
عباده / حفل فى اى حاجه الا الحكايه دى
مغاورى / خلاص خلاص ما تعملش حكايه من غير حكايه ما كانتش كلمه
عباده / خلاص
مغاورى / شكلك مش فايق نبقى نكمل كلامنا فى وقت تانى
عباده / تمام يلا سلام
عباده يقفل و يقف يسند على السور
عباده / و هو فى حاجه جابتنا ورا غير كلامكوا المستفذ ده
عباده يدخل جوه و هو مخنوق
………………………….
فى عربيه مختار تانى يوم
عبد الله / هو ده اللى اتفقنا عليه انا لو اعرف انك ما بيتبلش فى بقك فوله كدا ما كنتش فضفض معاك
مختار / دى اخرتها طب يا سيدى انا الغطان بناقص بلاها الجوازه دى
عبد الله / لا استنى هنا بلاها ايه احنا فينا من كدا ؟ دا انا بيدو حبيبك
مختار / يعنى هتعمل ايه ؟
عبد الله / انت قولى اعمل ايه ؟ ابوس ايدك تقولى اعمل ايه ؟
مختار / انا اللى هقولك ؟
عبد الله / تم جميلك بقا يا مختار يا حبيبى
مختار / ماشى يناسبك تيجي تتقدم امتى ؟
عبد الله / اتقدم !! اتقدم بجد اللى هو اروح لاخوك و اقوله يا عمى عاوز اطلب ايد بنتك و كدا ؟
مختار / انا بقول بلاها الجوازه دى
عبد الله / خلاص يا عم انت مالك حمقى كدا ليه
مختار / اه هتروحله و تتكلم معاه و تقوله انك عاوز تطلب ايد مريم
عبد الله / ايوه يا مختار بس هقوله ايه لو سالنى على التفاصيل
مختار / مش هيكلمك ما هو عارف البير و غطاه و بعدين ما تشيلش هم انا معاك
عبد الله / طب لو رفضونى
مختار / لو رفضتك هجوزك ست ستها بالعند فيها
عبد الله / انا متوتر اوى هو انت كنت متوتر كدا و انت جاى تطلب ايد هند
مختار / يا عم انا اساسا ما كنتش عارف اننا جايين نطلب ايد هنا انا يادوب كنت بتكلم مع ناصر قبل ما نجيلكوا بخمس دقايق و هو عرف من هنا و طلب ايدها من هنا
عبد الله / طلعتوا اخوات بجد اهو ما شاء الله ما بتصبروش فى الحاجات دى
مختار / يا عم قولنا بلاها الجوازه دى
عبد الله / انت بتتلكك ما تخف بقى انا مش ناقصك
مختار / المهم انا هوصلك تطلع تكلم خالتى و ترتب نفسك و تشوف هتكلم ناصر امتى و تكلمنى
عبد الله / طب انت رايك اكلمه امتى
مختار / يا ابنى انت كلمت خالتى مش يمكن يكون ليها راى تانى و ترفض
عبد الله / و ترفض ليه هترفض ليه يعنى انا هشيل هم الجيش اللى عندكوا يوافق و لا هشيل هم امى دا ايه الجوازه السوده دى
مختار / لا اله الا الله
عبد الله / خلاص يا عم خلاص
مختار يركن العربيه عبد الله ينزل
مختار / عبد الله
عبد الله يبصله من الشباك
مختار / ما تنساش تكلمنى تقولى هتعمل ايه
عبد الله / هكلمك يا عم هو انا ليا غيرك اكلمه هكلمك طبعا
مختار / يلا اشوفك على خير سلام
عبد الله يشاورله و يطلع فوق و مختار يمشى
………………………..
فى السرايا بالليل
الكل متجمع و بيشربوا شاى هند تدخل شايله صينيه عليها كيك
ناصر / انا شامم الريحه من بدرى و ساكت
هند / و اهى وصلت اهى الف هنا
هند تعزم بالصينيه على الكل ياخد
فاطمه / و دى هتكفى مين و لا مين
مريم / دا صاج بحاله
هند / والله واخد تلت مقادير
ناصر / تبقي تعملنا تانى
هند / عنيا
مختار / اقعدى ارتاحى بقي انتى تعبتى جامد النهرده
هند تروح تقعد
مريم / الا صحيح يا عمى هو مش زن حريم والله
مختار / المصيف فاكر والله … انا كنت بكلمك فى ايه يا ابنى الصبح
عباده / المصيف
مريم / الاجازه هتخلص
عباده / هى لحقت و بعدين ان خلصت يعني ايه المشكله نروح فى الشتا الغردقه و لا السخنه و لا الحتت الحلوه دى
تليفون مختار يرن يطلعه يبص فيه و يوطى على ودن ناصر يوشوشه
ناصر / يا خبر و انت قاعد قوم يا ابنى قوم بسرعه
ناصر و مختار يقوموا و الكل مستغرب
هند / هو فى ايه
ثوانى و يرجعوا و معاهم عبد الله
انتصار / جيت فى وقتك حماتك بتحبك
عبد الله / شكرا
مختار / دور شاى فى المكتب يا ام فاتن لو سمحتى
انتصار / من عنيا
انتصار تروح المطبخ و مريم تروح وراها و الرجاله يروحوا المكتب
ناصر / اقعد يا عبد الله
عبد الله يقعد و هو متوتر و محرج و كل شويه يبص لمختار مختار يروح يقعد قدامه و يطبطبله على ركبته عبد الله يبص لمختار
ناصر / خير يا ابنى مختار قالى انك عاوز تتكلم معايا
عبد الله / الحقيقه انا مش عارف ابدء منين
عباده / قول يا ابنى انت هتتكسف و لا ايه امال لو كنا اغراب بقي
عبد الله / لا ازاى دا انتوا اهلى و دا السبب انى جايلكوا النهرده و طمعان يعني
عبد الله يبص لمختار
امين / عاوز فلوس
عبد الله / لا لا لا معايا كتير الحمد لله انا الحقيقه عاوز حاجه تانيه … انا عاوز اتجوز
عباده / و ماله دا يبقي يوم المنى
عبد الله / انا يا كبير طالب القرب منك
الكل يبص لبعضه
ناصر / فى مين
عبد الله / مريم
ناصر يبتسم و مختار كاتم الضحك جواه و عبد الله متوتر و الكل مصدوم
عبد الله / انا عارف انى لسه بدرس بس هى كمان بتدرس احنا ممكن .. لو حضرتك وافقت يعني
الباب يخبط عباده يفتح و ياخد من انتصار صينيه الشاى و يقفل الباب
عبد الله / لو ينفع يعني ممكن تبقي خطوبه
ناصر / اسكت يا عبد الله
عبد الله يبص لمختار و يبص لناصر
ناصر / انت عاوزنى اجوز مريم لواحد قاعد قدامى بيرتعش كدا
عبد الله / حضرتك لازم تقدر موقفى انا اول مره اتحط فى الموقف ده و كلكوا بتبصولى و الموقف مش سهل على فكره
ناصر / بص يا عبد الله انت راجل جدع و انا يشرفنى انى اجوزهالك بس لازم توفى مهرها الاول دا لو وافقت طبعا
عبد الله يبص لمختار
مختار / و ايه مهر مريم
ناصر / تقدير عالى السنادى و عشان انت زى ابنى مش هقولك هات امتياز انا راضي بجيد جدا
عبد الله يبص لمختار و يبص حواليه و هو مبسوط
عبد الله / يعني اروح اجيب ماما و اجى
ناصر / هههههههههههههه مش لما ناخد راى العروسه الاول
عبد الله يبتسم و يبص فى الارض و يبص لمختار متابعه و مبتسم
………………………………
فى اوضه فاطمه
فاطمه / يعني يتكلم على سماح و يروح يخطب اختها
شاكر / فاطمه
فاطمه / فاطمه ايه اصلا ازاى يوافقوا عليه يعنى يرفضوا مغاورى يرفضوا مغاورى الجارحى و يوافقوا على اخو هند
شاكر / الواد ما يتعيبش يا فاطمه و انا قولتلك قبل كدا لو كان جه لبنتي انا شخصيا كنت هوافق
فاطمه / هيعيشها فين هيصرف عليها منين هيعرف يجيبلها شبكه حتى
شاكر يبصلها
فاطمه / هتقولى بتشتروا راجل مش كدا
شاكر يبص الناحيه التانيه
فاطمه / طب كان صبر سنه و لا اتنين يكسرله فيهم قرش … طب دا ولا سبع سنين حتى على ما يخلص كليه و يبدا يشتغل
شاكر / بيشتغل مع الدراسه
فاطمه / اديك قولتها بيشتغل عندنا
شاكر / عيب يا فاطمه مش عشان ساكتلك هتسوقى فيها
فاطمه / لو ما سمعتش منى بكره تسمع من غيرى و على العموم سكت انا مالى اصلا ربنا يهنى سعيد بسعيده
فاطمه تروح تنام فى السرير و شاكر قاعد مضايق
فاطمه / و حوار بنشترى راجل ده
شاكر يبصلها و هو مستغرب
فاطمه / بيقولك و لا تمدح و لا تشكر غير بعد سنه و ست اشهر
فاطمه تشد الغطا عليها و تنام و شاكر قاعد بيضحك
…………………
فى اوضه مريم
سماح / عمرى ما كلمته يا سماح و لا لسانى جه على لسانه يا سماح
مريم / والله ما حصل
سماح / امال يعني جاى يطلبك بمناسبه ايه ؟
مريم / و انا مالى هو انا اللى روحت طلبته
سماح / يعنى انتى مش موافقه ؟
مريم / قولت هصلى استخاره
سماح / و ماله … قال يعني البت ما فطتش من مكانها لما عرفت انه جاى يطلب ايدها
مريم / ما تبطلى بقي يا سماح الله
سماح / بيني و بينك ليكي حق تترددى برده
مريم تبصلها
سماح / هو صحيح عبد الله شكله حلو و بكره و لا بعده هيبقي دكتور بس برده طلع لا و نزل كحيان دا شغال عندنا
مريم / انا ما بيفرقش معايا الحاجات دى و انتى عارفه
سماح / طبعا دا انتى رافضه مغاورى الجارحى بعزه
مريم / خدوهم فقرا يغنيهم الله
سماح / بفلوسك يا عنيا هيغنيه بفلوسك و ساعتها ياخد فلوسك يتجوز بيها
يتبع…
لقراءة الفصل التالي : اضغط هنا
لقراءة الرواية كاملة اضغط على : (رواية البر التاني)
2 تعليقات