رواية اعتقال قلب من فولاذ الفصل الأول 1 بقلم هبة الله محمد

_ مُرتضى الحقني 

= ايه يا سيدة فيه ايه مالك

_ انا حامل 

= نعم ياختي 

_ بقولك انا حامل اهبب ايه ف المصيبة دي 

= تهببي ايه ف ايه انت ازاي مش واخدة احتياطاتك 

_ اهو اللي حصل بقى اعمل ايه ده لو حد عرف هتبقى فضيحتي بجلاجل 

= تعملي ايه ف ايه العيل ده لازم ينزل 

_ انت بتقول ايه يا مرتضى عاوزني اقتل ابنك لا انت هتكتب عليا ودلوقتي 

= بقولك ايه يا حلوة مش عليا انا الكلمتين دول انت هتروحي لأي زفت دكتورة تنزلهولك او تخليكي بفضيحتك واهلك يقتلوكي المسائل دي متخصنيش 

” أنا سيدة السيد بنت عادية من العشوائيات معايا ثانوية عامة وده مرتضى ابن حتتي انا مكنتش بكلم شباب خالص بس هو فضل سنتين بيحاول لحد ما جابني ووعدني بالجواز وحصل اللي حصل ورماني انا واللي ف بطني ولو فضلت كده بطني هتكبر واهلي هيعرفوا وهتفضح قررت اروح لدكتورة عندنا مشيها بطال والبس نقاب وانزله عندها”

سيدة: سلام عليكم 

التمرجية: وعليكم السلام اؤمري ياختي 

سيدة بتوتر: انا حامل و 

التمرجية: خلاص ياختي فهمت طلبك عندي و 

رجل وهو يمسك ذراعها: بعد اذنك يا مدام عاوز الهانم شوية “جذبها وأخرجها إلى الشارع”

سيدة: فيه ايه يا جدع انت 

هادي: اخلعي اللي على وشك ده يا سيدة ملوش لزوم 

سيدة: ه ه هادي انت عرفت مكاني ازاي 

هادي: انا سمعتك وانت بتتكلمي مع مرتضى 

سيدة يدموع: طب اوعى بقى ربنا ينتقم منك انت واخوك انا كنت ف حالي وأخلاقي يشهد بيها الكل بس منه لله اخوك حسبي الله ونعم الوكيل حسبي الله ونعم الوكيل فيه ما كان سابني ف حالي 

هادي: الكلام ده كله ملوش لزوم أحمدي ربنا اني انقذتك من المصيبة اللي كنتي هتهببيها دلوقتي دي 

سيدة: مصيبة ايه اني اخرج نفسي من الورطة اللي ورطهالي اخوك كده ابقى بعمل مصيبة ماهو كله من تحت رأس اخوك إلهي ينتقم منه 

هادي: اه يا سيدة تبقي بتعملي مصيبة انك تقتلي روح 

سيدة ببكاء: طب قولي بقى يا سيد العاقلين هداري على نفسي ازاي طبعا ما اللي ايده ف الماية مش زي اللي ايده ف النار انت خسران ايه انت واخوك ولا حاجة 

هادي: ممكن تهدي وانا هحللك الموضوع ده 

سيدة: هتعمل ايه يعني 

هادي: هتجوزك 

سيدة: ايه!