رواية صراع القلب والعقل الفصل الأول 1 بقلم إيمان شلبي
رواية صراع القلب والعقل الجزء الأول
رواية صراع القلب والعقل البارت الأول
رواية صراع القلب والعقل الحلقة الأولى
هتسيبي جوزك عشان اتشل حرام عليكي!
-اومال اكمل معاه واعيشله خدامه طول العمر ؟
قالتها بنت خالتي بكل قسوه وهي بتلم في هدومها عشان تسيب البيت وتمشي وتسيب جوزها في الظروف ديه وكأنها انسانه بلا قلب وكأن الرحمه والإنسانية اتبخروا من عندها كبني آدمه
-حرام عليكي يا علياء جوزك بيحبك ومش هيقدر يتحمل انك تسيبيه وتمشي
-بقولك ايه يا “ثراء” انا اخدت قراري خلاص ولو سمحتي بقي متتدخليش انا مش هقدر اعيش مع واحد مشلول انا عايزه اعيش حياتي واتفسح واتنطط وابقي علي حريتي ،لو صعبان عليكي اوي كده خليكي انتي معاه انا معنديش اي مانع
قالتها وهي بتقفل الشنطه بتاعتها وبتخرج من الاوضه وانا واقفه مصدومه من اللي بتعمله
معقوله هي ديه علياء بنت خالتي؟
هي ديه البنت الجميله البريئه اللي مفيش في قلبها غير الطيبه والحب والحنان
هي ديه علياء اللي كانت طايره من الفرحه يوم جوازها
هي ديه علياء اللي دايما كانت تقولي انا عمري ما حبيت ولا هحب حد قد “ايهم” جوزي!
صحيح الكلام سهل
سهل جدا اي حد يقولك انا بحبك مع أنه شايل في قلبه كُره السنين ليك
سهل جدا حد يقولك انا عمري ما هسيبك ولا هتخلي عنك
ومع اول مشكله تلاقيه اتبخر وكأنه مكانش موجود من الأساس
المواقف والافعال هي بس اللي قادره تحدد صدق المشاعر أو كذبها!
ــــــــــــــــــــــــــــــــــــــــــــــــــــــــــــــــــــــــــــــــــــــــــ
-هتسبيني يا علياء هتسيبي جوزك في اكتر وقت هو محتاجلك فيه؟
-بقولك ايه يا ايهم جو الصعبنيات ده مش بحبه اللي يخليك ،طلقني يابن الناس وكل واحد يروح لحاله بلا جوزك بلا بتنجان
بصلها والدموع بتلمع في عينه
هز رأسه بنفي
مكانش مصدق أن حبيبته ومراته تعمل فيه كده
تتخلي عنه في اكتر وقت هو محتاج وجودها
احساس صعب
مفيش بني آدم ممكن يستحمله إلا لو كان جبل!
-ا انتي ا انتي اكيد بتهزري صح ؟
قالها بنبره مهزوزه وهو بيبصلها بكسره
نفخت بضيق وبصتلي :
-بقولك ايه يا ثراء فهمي جارك ولا صاحبك ده اني مش بهزر واني عايزه اتطلق منه خليه يبعتلي ورقه طلاقي علي البيت بالذوق بدل ما اخليه يلف في المحاكم وهو مش قادر يجيب لنفسه كوبايه مايه حتي
قالت كلامها بقسوه اكبر وجرت شنطتها وراها وخرجت من البيت
بصيتله اول ما خرجت لقيته بيبص قدامه بسكون وصمت تام
بلعت ريقي وانا بقرب منه بتوتر وبنبره كلها دموع :
-ا ايهم
رفع عيونه وهو بيضحك ضحكه كلها قهر ووجع :
-ع علياء سابتني ياثراء م مراتي اتخلت عني عشان بقيت عاجز
قعدت على رُكبي قدامه وانا بشهق وبعيط بحرقه:
-متستاهلكش و والله العظيم يا ايهم علياء متستاهلكش
علياء انانيه و و مبتحبش حد الا نفسها هي عمرها ما حبيتك ل لو كانت حبيتك بجد مكانتش اتخلت عنك مع اول فرصه جاتلها!!
وحياه اغلي حاجه عندك متزعلش نفسك
تغور علياء ويغور اي بني آدم المهم انت
ا انت عارف ا انت عارف و والله انا لو مكانك هحمد ربنا عارف ليه ؟
عشان عشان ربنا كشفلك حقيقتها القذره
ك كنت طول الوقت هتفضل مخدوع فيها وفي حُبها ليك
احمد ربنا و وابعتلها ورقه طلاقها خليها تغور في داهيه
رد بنبره كلها قهر ووجع ودموعه علي خده :
-ا انا مكانش ليا حد غيرها يا ثراء
هي امي واختي واهلي كلهم
هي ليه عملت فيا كده؟
انا اذيتها في ايه عشان تسيبني ،و والله العظيم انا محبتش حد زي ما حبيتها ،ليه خدعتني طيب
ا انا ا انا حاسس اني تايه
انا مش عارف اعمل ايه او اروح فين أو….
قاطعته وانا بمسك أيده:
-بيتك في العماره بتاعتنا لسه موجود ،انا وماما وبابا ومحمد معاك مش هنسيبك!
ــــــــــــــــــــــــــــــــــــــــــــــــــــــــــــــــــــــــــــــــــــــــــ
-ايه ده مين اللي نضف الشقه؟
سأل ايهم محمد اخويا وهو بيتحرك بالكرسي بتاعه في بيته القديم اللي كان موجود في عمارتنا
كنت واقفه بنضف المطبخ واول ما سمعت صوته طلعت اجري بلهفه وانا ببتسم بفرحه
-ايهم حمدلله علي السلامه
بص حواليه بذهول :
-الله يسلمك يا ثراء انتي اللي عملتي كل ده؟
هزيت راسي بابتسامه هاديه وانا ببص في عيونه بحب يمكن يحس بيا وبقلبي اللي بيحبه!
-ليه كده يابنتي تعبتي نفسك
محمد وهو بيبصلي بتحذير:
-ولا تعب ولا حاجه يا ايهم في ايه انت اخوها الكبير مش كده برضو يا ثراء ؟
بلعت ريقي بتوتر وانا بهز راسي :
-ا اه ا اه طبعا اكيد ا احم ا انا هطلع اجيب الغداء
-لا لا متتعبيش نفسك أنا مش جعان و…
قاطعته بحزم :
-لا هتاكل عشان تاخد العلاج بتاعك
بصلي بنظره مقدرتش افهمها
بعدها هز رأسه بابتسامه باهته من غير ما ينطق حرف زياده
ــــــــــــــــــــــــــــــــــــــــــــــــــــــــــــــــــــــــــــــــــــــــــ
طلعت علي فوق لقيت ماما محضراله الاكل اللي بيحبه
اصل في الحقيقه هي بتحبه جدا يمكن زي محمد بالظبط
-ايهم وصل ولا لسه يا ثراء؟
سألت بجمود وهي بتبصلي بصه غريبه وكأنها عتاب؟؟
-اه ياحبيبتي وصل حضري الاكل يلا عشان انزلهوله و….
قاطعتني بنبره كلها حزم:
-لا مفيش نزول انا اللي هنزل الاكل
رديت باستغراب :
-يعني ايه مفيش نزول ؟
-يعني مفيش نزول يا ثراء مينفعش الناس تقول عليكي ايه لو شافتك وانتي داخله وخارجه من عنده!
ضحكت وانا بهز راسي بذهول:
-انتي بتهزري ياماما
حضرتك عارفه أن ايهم قبل ما يتجوز علياء كان اكتر من اخ ليا وان العماره كلها عارفه كده وكلهم عارفين أن انا محترمه وهو كمان محترم
ردت بعصبيه:
-بس الوضع مختلف دلوقتي يا ثراء هو واحد مطلق وحضرتك مخطوبه ولا انتي ناسيه!
بلعت ريقي بتوتر وانا بهز راسي بنفي والدموع بتلمع في عيني
-ل لا مش ناسيه
-يبقي تحترمي خطيبك وتحترمي نفسك وتشيلي اللي بتفكري فيه ده من دماغك يا ثراء لانه استحاله يحصل
-بفكر في ايه ياماما ؟
قربت مني وهي بتحط عينيها في عيني :
-انك تسيبي خطيبك وتفضلي مع ايهم وتلفي حواليه عشان قلبه يحس بيكي ويحبك ،اوعي تفتكري انه ممكن يحبك ياحبيبتي مانتي كنتي قدامه زمان!
هو عمره ما حبك ولا شافك غير اخت وبس
متخربيش علي نفسك يابنتي عشان وهم في دماغك
واسمعي نصيحه امك “خدي اللي يحبك ومتاخديش اللي تحبيه” اوعي يابنتي تكرري غلطه امك وتاخدي واحد انتي اللي بتحبيه اكتر وبتديله مشاعر اكتر صدقيني محدش هيتوجع ولا هيتعب في حياته غيرك انتي
انتي غاليه ياثراء ومش اي حد يستاهلك
انتي تستاهلي حد يحبك بجد حد يعافر عشانك ويحارب الدنيا كلها عشان تبقي معاه تستاهلي حد يحبك زي مانتي من غير ما تتجملي ولا تتصنعي عشان تعجبيه!
فكري في كلامي كويس يا ثراء
ايهم مهما عملتي مش هيحبك لانه مش شايفك اصلا
انما “سامر” خطيبك بيحبك وشاريكي ويتمنالك الرضا ترضي
طبطت علي كتفي لما شافت شرودي وتأثير كلامها عليا وقالتي قبل ما تمشي من قدامي
-خطيبك بيحبك يا ثراء متضيعهوش عشان وهم في دماغك
يتبع….
لقراءة الفصل التالي : اضغط هنا
لقراءة الرواية كاملة اضغط على : (رواية صراع القلب والعقل)
