رواية الزوج الخائن الفصل السادس 6 بقلم عادل عبدالله

رواية الزوج الخائن الجزء السادس

رواية الزوج الخائن البارت السادس

رواية الزوج الخائن الحلقة السادسة

وفعلا رجعت البيت لكن رأفت بقي ينام في اوضة الاطفال وبيتعامل معايا في اضيق الحدود حتي في الشغل نقلني مكتب تاني بعيد عنه وكنا بنروح ونرجع من الشغل مع بعض وتقريبا مش بنتكلم .
ماما كلمت سارة واعتذرت لها بالنيابة عني ووضحتلها ازاي انا بحبها وبعتبرها اختي واكتر وان موضوع الغيرة ده مرض عندي مش قادرة اتخلص منه وطلبت منها انها تساعدني اني اتخلص من الغيرة .
لكن سارة رفضت اعتذارنا وقالت ان شكي فيها واهانتها وفضيحتها اللي حصلت وهي مش لها اي ذنب فيها كفيلة بأنهاء العلاقة بشكل نهائي دون رجوع !!! وانها بتشوف شقة تانية تعيش فيها بعيد عننا .
رأفت لما سمع كلام ماما ليا عن سارة قال انها معها حق واننا لازم نأجل مصالحة سارة علي الاقل لما تهدا وتنسي الموقف اللي حصل .
وفي يوم اتفاجأت ان شيرين زميلتنا في الشغل فسخت خطوبتها !!!
كنت عارفة ومتأكده انها لسه بتحب رأفت .
اكيد شيرين هترجع تلعب علي رأفت تاني و تحاول توقعه في حبها خصوصا انها عارفة المشاكل اللي بينا .
وفعلا بعد فسخ خطوبتها رجعت شيرين تلزق لرأفت تاني !! ورأفت بقي يتعامل معاها زي الاول قبل ما نتجوز !! طول اليوم كلام وضحك وهزار ، فعلا حسيت بفرق كبير في معاملته معها ، عرفت فعلا انه كان بيحافظ علي كرامتي ومشاعري لكن انا كنت فاهمة غلط !!! لكن دلوقتي هو بيتعامل معها بحرية زي قبل جوازنا !!
دلوقتي ولأول مرة احس ان شيرين موقفها قوي وممكن فعلا تخطف رأفت مني !!
لكن رغم كل ده حاولت اظهر قدامه اني مش بغير عليه واني مش مهتمة بكل اللي شروق بتعمله .
عدت فترة الحمل وولدت ولد سماه رأفت سعد علي اسم باباه .
و كنت فاكرة انه هيقربني من رأفت اكتر ، لكن رأفت فضل بعيد عني رغم محاولاتي الكتير .
كنت بحاول امنع نفسي من الغيرة والشك فيه واظهر له اني اتغيرت لكن من جوايا كنت كل ما اشوفه بيكلم بنت او ست خصوصا شيرين كانت نار الغيرة بتحرقني ، وكل ما المح شيرين بتبص عليه كنت بحس انها مصممة تخطفه مني .
سارة تركت الشقة ونقلت في شقة جديدة بعيدة عننا .
ورأفت غير باسوورد موبايله و ده ضايقني جدا لأني علطول كنت بشوفه مشغول في الموبايل ومش بيتكلم معايا !!
كنت عاوزة افتح موبايله بأي طريقة واعرف بيكلم مين ومشغول مع مين دايما بالشكل ده . يا تري شيرين هي اللي شغلاه وبيكلمها ولا واحدة تانية ؟؟
كان الحل الوحيد اني اقعد اراقبه وهو بيفتح تليفونه علشان اعرف افتحه ، وفعلا قدرت اعرف الباسوورد من غير ما يعرف .
المشكلة انه ماسك الموبايل طول ما هو في البيت وبينام في اوضة الاطفال والموبايل معاه !! مش عارفة همسك تليفونه امتي ؟
كان افضل وقت لما يدخل ياخد شاور الصبح .
عملت نفسي بجهز الفطار لما دخل الحمام وفتحت تليفونه وبدأت اشوف رسايل الواتس والماسنجر لكن للاسف ملحقتش اشوف كتير منها ولقيته خارج .
قفلت الموبايل و رجعته مكانه قبل ما يلاحظ ، لكن رأفت لاحظ اني اتأخرت في عمل الفطار .
اشتريت فلاشة علشان انقل كل حاجة من تليفونه علي تليفوني واشوفها براحتي .
تاني يوم رأفت دخل الحمام وانا مسكت موبايله و ركبت الفلاشة وفجأة لقيته قدامي وبيقولي : انا كنت عارف انك هتعملي كده ، انتي مريضة ومفيش منك امل .
: طيب استني انا هشرحلك …
: من غير شرح كل حاجة واضحة ومفهومة .
: لأ اسمعني طيب الاول
: مش هسمع كل حاجة انتهت .
: يعني ايه ؟
: يعني كل واحد يروح لحاله بهدوء .
: هتطلقني ؟
: ده افضل حل .
: طيب اديني اخر فرصة .
: اديتك فرص كتير لكن انتي مريضة و حالتك ميؤس منها .
: اعتبر دي اخر فرصة علشان الولاد مش علشاني انا .
: الولاد لما يتربوا في جو هادي احسن ما يتربوا في جو كله مشاكل .
: انا بحبك ومش عاوزاك تضيع مني ، وسعد وريتاج محتاجينا احنا الاتنين مع بعض .
: انا اللي هسيب البيت المرة دي .
مشي رأفت وحاولت اني امنعه معرفتش ، حاولت اوسط ناس كتير سواء من قريبي او من قرايبه وكمان زمايلنا المقربين لكن مفيش فايدة !!!
فضلت مع ولادي فترة وهو رجع يعيش مع اهله .
والمصيبة الكبيرة اني عرفت ان شروق بنت خالته اتطلقت من جوزها !!! والكارثة اني عرفت انها بتروح عند خالتها ( مامت رأفت ) كل يوم !!!!!
يعني معني كده انها بتقابل رأفت كل يوم عند مامته !!!
ده معني كده انها ممكن تقدر بسهولة تخلي رأفت يحبها خصوصا انها مايصة وانهم واخدين علي بعض اوي .
عدت فترة طويلة وحاولت اني اكلمه كتير في الشغل واتفاهم معاه علشان الحقه قبل ما واحدة تقدر تخليه يحبها ويضيع مني لكن فشلت .
لحد ما في يوم بعد ما رجعت من الشغل اتفاجأت به بيدخل من باب الشقة وقعد وقالي تعالي علشان عاوزك في موضوع مهم .
: اخيرا يا رأفت رجعت بيتك .
: لا انا عاوزك في موضوع مهم .
: خير .
: انا بحب واحده تانيه وهتجوزها.
: ده اخر كلام عندك ؟
: ايوه ده اخر كلام .
: طب وانا وعيالك هتعمل معانا ايه؟
: انا اسف بس هى مش عايزه ضره ف انا هطلقك ومتقلقيش العيال هيكونوا معاكي وانا كل فترة هاجي ابص عليهم ومصروفهم هبعتهولك كل اول شهر .
: انا مش عاوزة مصروف العيال انا عاوزاك انت تفضل معانا .
: اسف ده قرار نهائي .
خرج جوزي وقعدت مع نفسي افتكر كل حاجة حصلت من اول يوم عرفته فيه لحد دلوقتي .
من صدمتي كنت مش عارفة افكر لدرجة اني حتي مش سألته عن مين اللي بيحبها وهيتجوزها !!!
بس معقول رأفت بجد يحب واحدة تانية غيري وكمان هيتجوزها ؟؟!!
لازم اعرف هي مين دي اللي قدرت تخطفه مني !!
يا تري شيرين نجحت انها توقعه في حبها المرة دي ؟ ولا شروق بنت خالته قدرت توقعه بعد ما اتطلقت ؟؟
ولا مين اللي قدرت تخليه يحبها ويقرر يتجوزها ؟