رواية درة أدهم النادرة الفصل الأول 1 بقلم نور

– يا ماما انا مش عايز اروح بقا 

– ولد ، انت ها تناقشني ولا ايه ، معقولة ما تروحش تبارك لطنط نوال ، مش انت بتحبها عشان بتساعدك تحل الواجب ، دي جابت بنوتة زي القمر

– أنا مبحبش بنات ، انا بحب الولاد بس ، مش كفاية بنتك قارفانا عياط عياط على طول

– كده يا ادهم تقول على مي اختك كده ، دي عندها سنتين بس ، يعني عادي تعيط لما تعوز اي حاجة يا حبيبي ، و انت كنت زيها ، ولا تكونشي اتولدت شحط عنده 10 سنين كده 

– لا انا اتولدت عندي 5 سنين ، و كل سنة بأكبر سنتين 

– بسم الله الرحمن الرحيم ، مخلفة كائن فضائي يا ناس ، قدامي يا ابني ، يلا ربنا يهديك ، دي طنط نوال جمايلها علينا كتيرة و خاصة عليك ، و اقل حاجة تروح تباركلها على البنوتة الجميلة 

– و انتي اش عرفك انها جميلة ، بقولك ايه يا ماما هي لو طلعت وحشة انا هقول عادي و مش هتكسف ، و لا لو طلع معندهاش ودان او عندها اتنين مناخير 

– ادهم ، مفيش تلفزيون و لا موبايل و لا أفلام تاني  انت سامع ، دي غلطتي انا اساسا ، قدامي يلا 

انا ادهم ، عندي 10 سنين ، على فكرة ميغركمش عمري ، عشان عقلي اكبر من كده بكتير ، هو صحيح بتفرج كتير على افلام الخيال العلمي و المغامرات و الاكشن لكن بقرا كتب اكتر 

 انا شاطر اوي في المدرسة الا في حاجة واحدة بس ، هي اللغة العربية ، غلبت معايا كتير ، كل سنة بسقط فيها و مجموع آخر السنة ينقص بسببها ، لحد ما طنط نوال بقت جارتنا ، حببتني اوي في العربية و بقيت اشطر واحد بين زمايلي 

 بس من وقت ما بقت حامل بقت تتعب على 

طول و تاجل حصص الدروس و رجعت فاشل من تاني ، عشان كده كرهت البييي ده من قبل ما يجي ،  و كرهته اكتر لما عرفت انه بنت مش ولد 

 أصل انا مبحبش البنات ، حتى مي اختي اتمنيت لو كانت ولد عشان تشاركني الحاجات بتاع الولاد اللي بحبها ، بكرههم عشان بيبقوا كيوت و مدلعين اكتر من اللازم و من اقل حاجة بيعيطوا 

حتى زمايلي البنات في المدرسة بكرههم ، عشان مدلعين ، بيقولوا مامي و بابي ، و بيقولو هاي و جود باي ، ببقا عايز اضربهم اوي بس بخاف من بابا ، اصله هو مدير المدرسة بتاعتي ، اخر مرة لما لصقت لبانة في شعر بنت في الصف بتاعي ، حلف ياخذ مني الموبايل و الكتب بتاعتي ، و بصراحة دي مش حاجة هينة اخاطر بيها،  و من يومها بقيت بدي المهمة دي لصاحبي سيف ، انا بمضغ اللبان و هو يلصق على الطاير ، و بكده ابقى انا بره الصورة و سيف يتعاقب على الخفيف 

– مبروك يا نوال يا حبيبتي ، زي القمر الله اكبر ، الف مبروك تتربى في عزكم ان شاء الله 

– ماما هو انتي طلعتي القمر قبل كده ، يعني تعرفيه ، رحتي بالصاروخ ولا بالطيارة زي…

– يا واد اسكت ، حسابنا في البيت.. احم … ادهم حبيبي مش تبارك لطنط 

– مبروك يا طنط نوال ، هي عندها كم عين 

– ههه تعال شوف بنفسك يا ادهم ، انت مش عايز تشيلها 

– عقبال ما تخاويها يا نوال

– ما هي عندها اخوات ، ادهم و مي ولا ايه

– طبعا أمال،  يلا يا ادهم تعال شيلها

– لا انا هقلب من بعيد لبعي….دي طلعت مش وحشة يا ماما 

– هههه قول بسم الله و شيلها يلا

– بسم الله ، دي مسكت في صباعي يا طنط 

– شفت ازاي اتعلقت بيك من اول مرة و انت بتقول عليها وحشة 

– لا دي مش وحشة دي حلوة ، حلوة اوي ، هي اسمها ايه 

– معرفش ، ايه رايك تختار معايا الاسم

– دي حلوة و ناعمة اوي ، و وزنها خفيف زي ورقة الشجرة ، خدودها حمراء و ايديها صغيرة ، هادية و مبتعيطش خالص زي مي المجنونة ، و كله كوم و  عينيها كوم لوحده ، بتلمع زي النجوم في عز الليل ، زي الجوهرة نادرة الوجود ، لؤلؤة مستحيل تلاقي مين يشبهها

– ده دروس العربية اللي بديهالك ثمرت فيك يا واد ، مممم أن كان كده نسميها نادرة …او جواهر  

– لا ، انا هسميها درة …..