رواية قهر الفصل الرابع 4 بقلم رويدا القاضي

رواية قهر الجزء الرابع

رواية قهر البارت الرابع

رواية قهر الحلقة الرابعة

قاسم : اصعب شئ تشوف وتسمع بالغلط وماتقدرش تتكلم لانك مدلول عبد للقرش بعد موقف خديجة للي انحط فيه قدام عيني ونا تميت ساكت … بدا الندم ..وتأنيب الضمير … والحسرة تنهشم فيا…
وفي ليلة فارقت الدنيا كنت بروحي لامن يلقني الشهادة ولا من يونس خوفي اخر شئ شفته قبل مايرقى الضغط وتتطلع روحي … مفتاح ماد ايديه ويضحك … باتي تعالى نا مسيبلك مكان جنبي…
كلنا نعرفوا إكرام الميت دفنه كيف لو كان الميت ليه يومين روحه مفارقه جسمه وهو مايعلم عليه حد حي ولا ميت….
بعد يومين من مشكلة امباركة ورجعة الصبح حسن وين باتي ماشفتش ليه يومين…
رجعة: تلقاه في مربوعته مع صورة ولده مفتاح ينعي ع موته…
محمد: هههه باتي صايرله كيما صار لزير سالم بعد موت خوه كليب…
رجعه: ههههه جبتها صح..
حسن: اقلها مفتاح لاقى من يبكي عليه اما انت في الشك تلقى من يدفنك … وطلعت من يالاهم عديت باش نحق باتي.
محمد: مش عارف نا متأكدة انهم خوتي بالك من ام اخرى.
رجعه: طالع هبل شور بوه بسلامته.
…….سبحان الله الانسان مايملك في نفسه شئ فجأة وتسمع فلان مات امتا الانسان ايفيق ويرجع لله امتا يعرف انه وقت يموت لابتنفعه فلوس ولازوج ولاصغار ولا أي شئ بروحه بس هو واعماله … خير او شر….
حسن: يامحمد يامحمد باتي باتي ميت ….
رجعه: اه ويش يقول
محمد: ان لله وانا اليه راجعون خلي نرفعوه للمستشفى…
حسن: ربي يسامحنا بونا ميت واضح ليه يوم او اكثر كيف كيف امي ماتجيش اطل عليه تحقه تشوفه ربي يسامحها وخلاص…
امباركة: شن الهرجة هذي تسمع فيها ياولد ولا نا نتخايل…
خالد: لا حق صوت عياط صبايا واضح..
امباركة: قال صبايا 😏 انضني الا صوت رجعه تعيط من وجع عظامها بعد الطريحة للي كلتها..
خالد: لالا هضا عياط قوي الواضح فيه شئ فتحت الباب وانا طالع…
امباركة: وين معدي تعال هنا مادخلنا فيهم.
خالد: الا هذي ياامي سامحيني فيها هضوم جيران جيران كان مافزعت توا ماعاد عندي وجه نقابلهم …
امباركة: صدقت ياولدي والرسول موصينا ع سابع جار .
لبست وطلعت وراه حقيت مريم تعيط في الشارع …
مريم: ياعمي …ياغالي
امباركة: قربت منها وطبتب ع كتفها الدوام لله عظم الله اجركم.
مريم: بنضرة خوف انتي علاش جاية شامتة اه شامته فينا.
امباركة: النية مايعلم بيها كان ربي وعمي قاسم ونعمة الجار في موت راجلي كان لينا جار واب ومشكلتي معاكم انسوها انا جارتكم وحضنتها وبكيت انا وياها….
اكيد تقولوا هكي بالساهل ياامباركة انسيتي مشاكلك معاهم اكيد لا… لكن احنا الليبين بصفة عامة نتعاركوا ونتقاطعوا لكن في مواقف تحتاج الفزعة والعون وننسو فيها كل خلافتنا…
خديجة: البسي يامنال انت وخواتك جدك مات …
هالة: وبالك يطردونا لو مشينا…
خديجة: لو يذبحونا راهو حد يتكلم لين نعزوا وتم الوفاة…
وفعلا لبسوا البنات وامشينا وسبحان مقيد العفاريت لا رجعة ولامريم كلمتنا فتت جنب حوشي تفكرت مفتاح وايامي فيه لكن هذا حال الدنيا مايدوم حال….
امباركة: غريبة نحسهم مثأترين هلبا مع انه رجعه قلبها ميت ..
خديجة: راهو راجلها مهما كانت المشاكل للي بينهم…
منال: وانا مقمعزة في امان الله جت جنبي حليمة بنت عمي محمد.
حليمة: نحق في الدم جرى في وجهك البيان كان بوك منغص عيشتك…
منال:🤨 تعرفي في مثل يقول عافنة النساء تتكلم في الفرح والغزا لذلك مش رح نرد عليك وخصوصا عارفة انه تفكيرك محدود…
حليمة: هههه بتطلع ابلة ودايرة روحك واو لو مهندسة ولادكتورة شن كنتي بديري .
منال: شفت اسماء مرت عمي حسن تأشرلي تبي نمشيلها…
اسماء: تعالي معاي وفكك منها هذي دور في المشاكل واضح عليها….
منال: ماتخافيش اصلا عارفة انه مش رح نتكلم لانه امي وصتني نقعد ساكتة … فكرتيني مرام وين مانحقش فيها …
اسماء: خلوها تلعب مع البنات برا صغيرة شن تبي فيها.
منال: ماهو تعرفي وضعنا حساس ولازم نرد بالي ع خواتي هدوما امانة بوي وريحته.
اسماء: ربي ايعينكم يعلم الله قلبي قعد معاكم لكن مايغبى عليكم للي يخالف كلام رجعه شي ايصير فيه …
منال: والله يامرت عمي عارفين كل واحد في مكانه.
وفات النهار وجاء الليل بدت الزحمة تخف وتمينا بروحنا ..
اسماء: هيا خديجة انتي والبنات تباتوا في حوشنا .
امباركة: صحيتي لكن نا كلمتها بتعدي معاي.
رجعه: تبيت حتى في حوشنا كبير وواسع.
خديجة: شكرا لكن الحوش للي اندليت فيه والله مانقدر نخشه ونبات فيه…
منال:خلي نجيب هالة ومرام … وفعلا عدينا مع عمتي امباركة لحوشها ….
امباركة: بعد وصلنا منال الله ايربحك راسي مصدع دريلنا قهوة.
منال: حاضر.
خديجة: شفتي شن يقول حسن لامه وقت الجنازة انه بوه مات وهو بروحه .
امباركة: قال خالد ميت له يوم وهما مايعلموا عليه .
خديجة: لاحول ولاقوة الا بالله .
خالد: توا نا نستأذن منكم بنروح.
سالم: خالد…
خالد: ها .
سالم:بارك الله فيك صبيت معانا .
خالد: بلا جميل والله وكيف ماقتلك الخيمة اتم في ارضنا هنا لين يكمل العزا..
حسن: اجعلنا مانفقدوك .
خالد: هي تصبحوا ع خير.
وصلت الحوش وراسي حده متصدع من الجنازة والزحمة قلت ماليها حل كان طويسة قهوة ونا خاش المطبخ نشوفلكم هذيك الشوفة…
منال:حسيت حد خش لكن اخر مايخطر في بالي انه خالد..😳 نا نا..
خالد:🤣 كنك بسم الله العظيم شن صابك…
منال: انت انت امتا دخلت…
خالد: كيف صار ممنوع نخش حوشنا ولاكيف..
منال: قلة ذوق الناس تتنحنح تكح وتعيط باش للي جوا يفهموا مش لين اطب عليا هك..
خالد:نتنحنح ع امي ولامن ونا وين نعلم بيك هنا نوحي بيك نا.
منال: في خاطري قليل ادب جهزت السفرة وحطيت فيها البكرج متع القهوة وبنطلع…
خالد:الله شكرا اكيد نبي قهوة اصلا خشتي للمطبخ كلها ع خاطر القهوة نردوهالك في الفرح..
منال: نا من الصدمة نتفرج وخلاص صب القهوة وطلع لاتأسف ولا عبر ..مابعد امك منك بجد بليه..
خالد:تأثرت حسني بنبكي 🤣🤣 عدي لا نمدلك كف ع فسختك .
منال:في سري حيوان حقير تافه..
امباركة: الساعة المباركة للي حضرت القهوة والله نحساب اطيبي الا في عشاء.. كنك ياعيني خيمتي ع خاطر قهوة.
منال: ماعرفتش وين حاطتها قعدت ندور.
خديجة: حق وين تعلم هي انت وعازفة قشيشك 😂.
امباركة: مشكلة انت ساكتة ساكتة ولما تتكلمي تقصفي طول انبصر عليك نا قمعزي معانا واشربي قهوتك…
خالد: خشيت بنرقد حسيت النوم جلا من عيني كيف الراي كيف الراي مابيها الا نعدي لبشير …
ولعت السيارة وطلعت وصلته…رنيت الجرس
بشير: من من…
خالد: قابض الارواح حل ياراجل امتا تبطل حركة الصبايا هذي كيف العنز من من … حرام فيك اللحية قال محسوب ع الرجال قال..
بشير: خش انطمر الواضح تاكها عركة انت وامك..
خالد: باهي باهي بلا جو دل توا …اسمع نبيك في موضوع…وتربح فكنا من الشلخ متعك…
بشير: كلي آذان صاغية… اتحفني
خالد: في بنت قيسها خشت قلبي ونا مش عارفة كيف نقولها …
بشير: هههه قاهر البنات معشوق الجماهير🤣🤣 انضرب ع قلبه وجاي اخيرا يشكي ويبكي من الحب…
خالد: عندك علم والله نا الحمار للي جيتك هنا …ياعيل.
بشير: اسمع خليك ثقيل …باحث فيها بس راك تتكلم معاها .
خالد: اه خلي نحكيلك …وحكيتله شن صار بالتفصيل…
بشير: قصدك هضا كله قلته لها… ومازال تقول خشت قلبي نا من هنا نقولك … ضيعت البنت .
خالد: مش قبل شوي كنت تقول خليك ثقيل…
بشير: في فرق بين الثقيل وبين الخرا للي مايعرفش يتكلم كيفك 🤣🤣.
,,,,,,,في الحاضر،،،،،،،،
مازال تتفكري بعد السنين هذي كلها مانسيتيش بكل…
في حد ينسى روحه انت من اول يوم خشيت فيه حياتي كنت نعلم انك مش محرد زوج انت اخ وحبيب وابن واب وزوج وصديق وحتى ام …
كل سنة تعدي علي معاك كل مانزيد نشوف فيك اشياء جديدة …
وتعجب فيك … ولا ماتعجبش فيك..
انت تعرفي انه عمره ماحبيت ولا رح نحب ولا يعجبني حد غيرك انت ام صغاري ورفيقة دربي
وسندي انت قوتي وراس مالي في الدنيا هذي كلها.
ربي يحفظك لي العمر كله ويجعل يومي قبل يومك.
تصدقي عاد لو قتلك تنمني ناخد من اسنين عمري ونعطيك ولانخسرك في يوم…
…. ممكن تفتحوا كملتوا الاجواء الرومنسية متعك ولا مازال.
….تحشم ياولد واقف تتسمع قدام الباب وانت راجل بمرتك.
….. والله الحق جيت بالصدفة نبي امي نا لين سمعت المسلسل التركي متعكم.
…… ها ياامي دقايق ونجيك..
…… خليك هنا هضا عيد زواجنا يعني بتمي معاي عدي نا امتا انحق فيها معاكم
……عيب عليك 😳ولدك كبير ويفهم حشمتني كيف بنتصبح فيهم الصبح.
….. ايش رايك نعدو لاستراحة الجبل ونقعد ناوياك يومين غادي.
…… والحوش والعمل.
….. الشغالة موجودة وكلهم كبار وامك ومرام هنا ومرت ولدك بتوقف الدنيا لو غيرنا جونا يوم ورجعنا….
…… تمام خلي نغير ونطلع.
،،،،،،،الماضي،،،،،،،،
يوسف للي هو راجل حليمة بنت محمد ومريم…
ها وين كنتي العزا وليه توا اسبوعين وتم مش كل يوم تقعدي تتسبلي بيه….
حليمة:كنك انهبلت انت هضا للي تحكي عليه جدي ….
يوسف: شديتها من يدها …. اسمعني كويس ليك كم يوم وضعك مش عاجبني بكل والله والله لو نشوف ونتأكد من اي تصرف غلط ايصدر منك ماتكوني الا لاحقة جدك.
حليمة: ارخي ايدي بلا هم زايد وساعة للي تتأكد بعدها دير للي يريحك…وخر من طريقي جه ايجيب الغم.
يوسف وبشير وخالد اصحاب في نفس القروب …
في حوش خديجة ….
منال: الوقت عدا بسرعة والبنات تمن يجهزن للتخرج ونا مادرت حتى حاجة…
هالة: وحتى نا امتحاناتي بعد اسبوع وقيسني خايفة ومتوترة بكل…
خديجة: خشيت عليهم تعالي يما منال هنا جنبي امسكي هدين خودي للي يلزمك.
منال:🥺لا خواتي والحوش اهم مانبي شئ كان دعاك لي وبس…
خديجة: يعلم الله الود ودي ماينقص عليكم شئ لكن انتن تعلمن الظروف ونا نعرف البنات للي معاك مجمعين فلوس وبياخدن لبس جديد عدي البسي وجهزي نفسك المشروع متعك باش ترفعي راسي بين العرب..
منال: حضنتها وتميت نبكي ياريت بابا كان حاضر كان هضا بيفرحلي واحد نا متأكدة.
خديجة: الله يرحمه.
هالة: حولن مافيش حضن ليا نا.
خديجة: هههه تعالي هنا ياقلبي انت.
،،،،،،،عند رجعه،،،،،،،،
حسن: اها شن قلتي نا نبي نبيع وبنرحل لاعاد عندي علاش بنقعد هنا …
رجعة: مازلت محملني مسؤلية موت باتك الله يرحمه.
حسن: انت امي وهو باتي لكن مافيش مراه تقعد يومين ماتعلمش ع راجلها تعبان جيعان.
رجعة: قضاء وقدر موته.
حسن: لكن الانسان لازم ياخد بالاسباب …
رجعه: تبي تبيع بيع حوشك وانت حر فيه…
حسن: وحوش مفتاح بيرجع لمرته ولا كيف ..
رجعه: هضا موضوع ومسكر وكلمة وقلتها ماعندها يالاي شئ.
حسن: امتا بس ياامي تفيقي وترجعي لكل واحد حقه…
رجعه: هضا ماقعد كان انت تعلمني نا الصح من الغلط.
حسن: نشوفك ع خير ياامي وجيت طالع وقفت في الباب حفظت تفاصيل حوشنا ….ماتخافيش مش رح نقطعك انت مزلتي امي …بين فترة وفترة رح انجيك …
رجعه: لا كثر الله خيرك والله فضلت عليا بهل الجية وهل الكلام…
،،،،،،،عند الشباب،،،،،،،،
يوسف: نحس في شئ صاير لكن مش قادر نعرف ..
خالد:تعوذ من ابليس ياراجل انضني ماتكون هاذي كان اوهام في عقلك انت.
بشير: هي في تصرفاته معاك مازالت كيف ماعرفتها ولاتغيرت…
يوسف: تغيرت واجد تمت ماعاد يعجبها شئ فيه كانه عايشة معاي جثة بلا روح..
خالد: تأكد تأكد يايوسف الكلام هضا لاهو ساهل ولاهو هين بالك موت جدها مأثر فيها بالك صايرة معاها مشاكل في عيلتهم…
يوسف: مش عذر هضا لانه سألتها مرة واثنين وعشرة قتلها لو في شئ مضايقك تكلمي احكي..
بشير: اسمع عمرك ماتعطي لحد الامان ارخي عليها الفترة هذي ونا عندي لك دبارة وبعدها ادعيلي .
خالد:اسمع ياقول كلمت خير ياخليك ساكت..
بشير:😏😏 نقولك انت نوض جيب ورقة واكتب فيها اعتذار للبنت خير بالك تنسى كلامك للي قلته لها وامشي وانت رافع امك اعطيها لاختها الصغيرة ….
يوسف:ومن هاذي سعيدة الحظ.
خالد:بنت عم مرتك غير خلينا نسمعوا الدبارة…
بشير: تعال لها يوم وقلها نا بنعدي مع اصحابي للبر ونبي يومين خليك هنا في النهار في حوشك وفي الليل وقت بترقدي عدي باتي مع امي …
وخليك الليلتين تراقب فيها لو فيه شئ رح ايصير في اليومين هضوما وكان ماصار شئ معناها كيف ماقلك خالد عدي علاج نفسك من الوهم…
يوسف: والله نا نتمنى نكون نا الغالط مع انه احساسي عمره ماايخيب تصدقوا انه الخونة ليها بنة نحس في روحي لما نخش الحوش نشم في بنة الخيانة …. ماتضحكوش والله نحكي بجد…
خالد: انا نستأذنكم بنرفع امي مشوار ونتلاقو ويوسف حط عقلك في راسك نصيحة اخ …
روحت للحوش كيف ماقال بشير وخديت ورقة وكتبت فيها نا نتأسف ع للي صار مش قصدي ..
وخديت امي وطلعت وقفت ع محل غدائية خديت شكلاطة ومشينا…
امباركة:كنك خاش بعضك تقول داير عملة.
خالد: ومنين جبتيه الكلام هضا .
امباركة:نشم فيه في الهواء تكلم شن وراك بالضبط.
خالد:انزلي وصلتي حوش صاحبتك علاش اضيعي في وقتك…
امباركة:نازلة ياولد فرج اما نشوف اخرتها معاك ..لكن ماتخافش عيوني عليك.
خالد:🤣الله يصلح حالك هضا مانقول.
نزلت وتسبلت انه نبي مرام لانه الصغيرة ومش رح يدورها حد طلعت مرام وخديتها تقمعز ع رجليا ..
مرام: الشكلاطة هذي كلها لي نا.
خالد:اها وكل انجيكم نجيبلك زيها تمام.
مرام : شكرا عمي خالد.
خالد: لكن نبيك في خدمة اعطي الورقة هذي لاختك منال بروحها تمام.
وانا قاعد نحكي واطب عليا امباركة
امباركة:😒😒 مش قتلك نشم فيها في الهواء
هات جاي طيح سعدك نا توا نعطيها لها…
خالد:اه راك فاهمة غلط.
امباركة:فتحت الورقة وقريت نا متأسف خايب كيف باتك ماتعرفش تتكلم …عدي اقلب وجهك… خشيت للطبخ…هاك الحمام الزاجل جايبلك مرسول🤣🤣🤣 كنت في عبيط تميت في اثنين …
منال: خديت الورقة وسكتت ومافهمت شئ لعند فتحتها وقريتها حي عليا شن يخلصني منها تو…
شن قصة يوسف وحليمة وشن بيصير معاهم
وشن بيصير بين خالد ومنال في الحاضر ها الحاضر …. شن بيغير امها عليها وغيره وغيره….