رواية أحلام قاتلة الفصل الثاني 2 بقلم عادل عبدالله

رواية أحلام قاتلة الجزء الثاني

رواية أحلام قاتلة البارت الثاني

رواية أحلام قاتلة الحلقة الثانية

وبعد اقل من شهر شعرت صابرين ببعض الالام فتوجهت الي الطبيبة التي علمت منها انها في اولي شهور الحمل .
كاد كمال ان يطير فرحا عندما ابلغته صابرين بحملها .
مرت شهور الحمل بسلام حتي جاء يوم الولادة .
دخل كمال علي زوجته صابرين بعد ولادتها مباشرة و قبل يدها وقالها : حمد لله علي السلامة يا قلبي .
: الله يسلمك . بقلم/عادل عبد الله
حمل علي يديه مولوده و كاد يطير فرحا ودموع الفرحة تملأ عينيه وقبله وقالها : جميل اوي شبهك يا حبيبتي .
: لأ هو حلو اه لكن شبهك انت يا حبيبي .
: ربنا يخليهولنا ويباركلنا فيه يارب .
: يارب ، قولي يا كمال هتسميه ايه ؟
: ما انا قولتلك يا حبيبتي اني هسميه عاصم علي اسم صديق عمري الله يرحمه .
: ماشي يا حبيبي اللي تشوفه يا ابو عاصم .
: الله ، حلو اوي اسم ابو عاصم من شفايفك يا حبيبتي .
: ربنا يخليك ليا يا كمال ، طول عمرك رومانسي وكلامك حلو ، نفسي عاصم ابننا يطلع عنده احساس جميل زي ابوه كده .
: وانا نفسي ابننا يطلع في جمال و اخلاق امه .
مرت الشهور و السنين حتي دخل عاصم المدرسة وبدأ منذ اللحظة الاولي في اظهار تفوق ونبوغ غير طبيعي .
لفت عاصم انتباه الجميع ، مدرسوه الذين قالوا عنه العبقري الذي لا يتكرر الا كل سنين طويلة .
جميع من حوله لم يتوقعوا ان يكون عاصم طبيب او مهندس فقط ولكنهم توقعوا ان يصبح عاصم احد علماء هذا الجيل .
وفي نهاية الشهادة الاعدادية كان عاصم الاول علي مدرسته و محافظته ومن الاوائل علي الجمهورية .
جلس كمال مع ابنه عاصم يهنئوه بتفوقه : الف مبروك يا حبيبي ، نجاحك وتفوقك مش غريب عليك ، انت تستاهل كل خير .
: الله يبارك قيك يا بابا . بقلم/عادل عبد الله
: خلي بالك يا عاصم كويس لسه الطريق طويل ، اكيد تفوقك مهم لكن الاهم استمرار النجاح ده .
: طول ما انت وماما جنبي ان شاء الله هكمل طريقي بنجاح .
: لأ يا عاصم مش مهم مين جنبك ، المهم انت عاوز ايه وتقدر تعمل ايه ولازم تعمل ايه ، متخليش حد يوقفك او يبعدك عن حلمك ، وافتكر كلامي ده طول عمرك .
دخل عاصم المدرسة الثانوية العامة وزادت اعباء الحياة علي كمال فقد اصبح عنده من الابناء اربعة عاصم ثم ثلاثة بنات جميعهم في مراحل التعليم .فأضطر كمال للجوء لعمل اضافي حتي يفي بكل احتياجات ابناؤه .
زادت الأعباء علي صابرين لغياب زوجها طول الوقت عن البيت انشغالا في تحصيل الأموال اللازمة لتوفير احتياجاتهم ،كمال كان لا يعود الي منزله الا علي النوم فقط بعد يوم عمل شاق .
ولأن صابرين هادئة الطباع رقيقة المشاعر فكانت المسئولية كبيرة ولكن ما ساعدها فيها كانت تربيتها الجيدة لعاصم واخوته البنات .
و ذات يوم لاحظت صابرين انشغال ابنها عاصم ووجود تغير غير مفهوم في حياته !!!
بدأت صابرين في مراقبته من بعيد حتي علمت بأنشغال عاصم بابنة الجيران !!!
صابرين نادت علي عاصم وقالت له : تعالي يا عاصم يا حبيبي عاوزاك في موضوع .
: خير يا ماما ؟
: ماشاء الله عليك يا حبيبي بقيت شاب .
ابتسم عاصم في خجل .
: انت لسه بتتكسف يا عاصم !!! الحمد لله يا حبيبي انا ربيتك انت واخواتك احسن تربية وانت بالذات كل الناس القريب والغريب عارفينك وعارفين اخلاقك كويس لدرجة انك لسه بتتكسف لحد دلوقت .
: الفضل بعد ربنا ليكي ولبابا في تربيتنا .
: الفضل لله يا حبيبي ، انا كنت عاوزة انبهك لحاجة مهمة يا عاصم انت دلوقتي في اهم مرحلة في حياتك واي حاجة هتشغلك عن مستقبلك هتضرك وتأذيك مش هتنفع .
: مفيش حاجة يا ماما شغلاني عن مذاكرتي ومستقبلي .
: لأ ، ده مش حقيقي ، انت مشغول بالبنت جارتتا اللي ساكنه قدامنا دي ، وخلي بالك دي هتشغلك عن مستقبلك يا حبببي ، وعايزة اقولك كمان ان انت عندك اخوات بنات لازم تخاف عليهم واللي مش ترضاه لهم مش ترضاه لبنات الناس .
: حاضر يا ماما .
: انا كنت ممكن مش اكلمك واقول لأبوك لكن انا كلمتك علشان عارفاك ان انت عقلك ناضج وهتفهمني علطول ومش هترضي تزعلني منك .
مرت ايام المرحلة الثانوية حتي جاءت امتحانات الثانوية العامة وانتهت واقترب موعد النتيجة .
،،،،،،،،،،،
سلمي : منار دي لازم تطلع حاجة تانية خالص .
شريف : ان شاء الله ربنا يخليهالنا وتبقي دكتورة قد الدنيا .
: لأ مش كفاية تبقي دكتورة ، انا عاوزاها تطلع نجمة .
: ان شاء الله .
: ايوه تبقي نجمة مجتمع او سيدة اعمال او نجمة سينما المهم تبقي مميزة عن اي بنت غيرها .
: ربنا يخليهالنا ويحميها وتشوفيها يارب زي ما انتي عايزة .
ومرت الشهور والسنين وبدأت تكبر منار وفي نفس الوقت كبرت المشاكل بين شريف وسلمي .
ورغم ان شريف وسلمي خلال عشر سنوات زواج اصبح عندهم ثلاثة اطفال الا ان ضعف شخصية شريف امام سطوة سلمي جعلته يعيش في خنوع مريب معها .
منذ نعومة اظافرها كانت منار تسمع من امها توجيهاتها لها فدائما تردد لها وتكرر : انتي يا منار غير اي بنت .
: ازاي يا ماما ؟ بقلم/عادل عبد الله
: هو في جمالك ولا حلوتك !!! ده انتي عسوله اوي شعرك وعينيكي ، كلك قمر يا بنتي ، انتي لازم اللي يتجوزك يقدرك ويقدر جمالك ويدفع دم قلبه .
: هو انا هتجوز امتي يا ماما ؟
: لسه بدري اوي علي الجواز دا انتي لسه عندك تسع سنين ، لسه قدامك سنين كتير وحاجات كتير لازم تعمليها .
: وليه بتقوليلي الكلام ده دلوقتي ؟
: علشان عاوزاكي دايما تعرفي قيمة نفسك .
: طيب ما انا عارفه ان انا حلوة يا ماما .
: مش بس علشان انتي حلوة ، مش كفاية ، انتي لازم تبقي نجمة .
: نجمة ازاي يا ماما ؟ نجمة زي اللي في السما دي ؟؟
: ايوه زي اللي في السما تبقي انتي بتلمعي وكل اللي حواليكي مطفيين ، الناس تشوفك يبقي حلمهم يقربوا منك بس انتي تكوني بعيدة اوووي عنهم .
: ازاي يا ماما ؟
: تبقي نجمة سينما او مطربة او سيدة اعمال المهم تبقي نجمة مشهورة الناس كلها تتمني تقرب منها ويكون معاكي فلوس كتير اوي .
: وازاي يا ماما هعمل كده ؟ انا مبعرفش .
: انا هعلمك يا حبيبتي ، و اول حاجة لازم تتعلميها لازم يبقي عندك اصدقاء كتير ، اصدقائك دول هيسهلوا عليكي كل حاجة .
: مش فاهمه يا ماما .
: مش مهم تفهمي دلوقت ، المهم اللي اقولك عليه لازم تعمليه .
سنة ورا سنة بدأت منار تكبر شوية شوية و فعلا بقي لها اصحاب كتير في كل مكان رغم انها كانت دايما تتعامل بأستعلاء وكبرياء مع الجميع حتي المدرسين !!!
لدرجة ان في يوم مدير المدرسة طلب حضور ولي امرها .
وعندما ذهبت سلمي مع منار لمدير المدرسة فوجئت به يقول : بنتك يا مدام بتتعامل مع زمايلها والمدرسين بكبر واستعلاء غريب !! انا اول مرة اشوف الحالة دي لدرجة اني كلمت الاخصائية الاجتماعية تدرس حالتها .
: لكن انا منار بنتي متربية احسن تربية يا استاذ .
: انا مش بقول انها مش متربية لاسمح الله لكن بقول ان سلوكها محتاج تقويم خصوصا في السن ده ، لازم يا مدام تعرفيها انها طالبة زيها زي غيرها وتعرف تتعامل مع كل حد من اللي حواليها بطريقة سليمة .
: ممكن اعرف الاخصائية الاجتماعية قالت ايه عن بنتي ؟
: قالت نفس الكلام اللي بقوله لحضرتك بالظبط .
: يا استاذ انا منار بنتي غير اي بنت هنا في مدرستكو .
: يعني ايه بنتك غير زميلاتها ؟ كل الطلبة هنا في المدرسة سواسية ، وبعدين يا مدام بنتك مستواها متوسط في الدراسة .
: بعد كلامك ده يا استاذ انا عرفت فين المشكلة بالظبط ، المشكلة عندكم انتم وعلشان كده انا لازم اعمل اتصالاتي وانقلها مدرسة تانية خالص .