رواية عشق الصخر الفصل الرابع والعشرون 24 بقلم شيماء عصمت

قاطع كلامه باب الشقة اللي انكسر ودخول اخر شخص كانت تتوقعة

عشق بصدمة: بابا!!!! حضرتك بتعمل ايه هنا

ناصر بحنان اول مرة تشوفه منه: جاي انقذك يابنتي

عشق بأستغراب: تنقذني؟ وكمان بنتك! طب ازاي؟ هو في ايه بالظبط؟

ناصر بندم: انا ندمان على كل حاجة عملتها فيكي ياعشق صدقيني يابنتي ندمان وبتمنى الزمن يرجع بيا وساعتها عمري ماهغلط في حقك ابدا

عشق بوجع: الزمن عمره ماهيرجع واللي انت عملته فيا وفي امي عمري ما هسامحك عليه

ناصر بصدمة: امك! وانتي عرفتي اللي انا عملته فيها ازاي

عشق بكذب: مش مهم تعرف ولو سمحت امشي دلوقتي قبل ما صخر يجي انا مش عايزة مشاكل

ناصر قرب منها وحاول يلمسها بس بعدت عنه بخوف: خلاص مش هقرب .. انا عايز اخلصك من صخر انا عارف اني جوزتك ليه غصب عنك .. انا هعمل اي حاجة تسعدك ياعشق صدقيني ياحبيبتي

عشق بضحكة وجع: ههههه حبيبتك! حلوه دي .. ما علينا انا مقدرش اسيب صخر فـ وجودك حاليا ملهوش معنى

ناصر: لو مهددك بحاجة او انتي خايفة منه .. انا هحميكي منه ومن اي حد يفكر يأذيكي انا ابوكي ياعشق ومحدش هيخاف عليكي قدي

عشق بسخرية وقهر : دلوقتي بتقول بنتك! بعد ايه؟ وبعد كام سنة؟ انت عارف انا عشت عمري كله وانا عامله ازاي؟ وانا بيحصل فيا ايه؟ انا لحد كام شهر بس كنت بتضرب واتهان في بيتك وعلى ايد مراتك وبنتها ومنك انت شخصيا! انا عمري ما هسامحك عمررري .. انا ضعيفة وجبانة ومعنديش شخصية وكل ده بسببك .. انا مبعرفش اتعامل مع اي حد من حبستك ليا في اوضة من اربع حيطان .. انا معرفش الصح من الغلط ودا لانك معلمتنيش اي حاجة .. انا معنديش اي ثقة في نفسي .. ياريتك ما كنت ابويا .. على الاقل مكنتش هتحرم من امي وبسببك .. كل حاجة وحشة حصلتلي في حياتي فهي بسببك انت وبس .. انا حتى لو عايزة اسامحك مش هقدر .. قلبي وعقلي هيمنعوني .. ظلمك ليا هيمنعني .. ضربك واهاناتك ليا اللي دايما بتتردد في عقلي هتمنعني .. امي اللي كل ما ابصلها واعرف انت حرمتني من ايه .. كل دول هيمنعوني اني اسامحك .. ربنا كبير وعظيم وممكن يسامحك لكن انا مستحيل اسامحك مستحييييل

ناصر بدموع: يعني كريمة عايشة

عشق بغضب: سواء عايشة او لا دا شيء ملكش فيه لو سمحت امشي انا مش عايزة اشوفك حتى لو صدفة اخرج بره حياتي بقا سبني اعيش اللي باقي من حياتي وانا سعيدة .. مع ناس احبهم ويحبوني

ناصر: يابنتي انا خايف عليكي صخر السيوفي مش سهل والله اعلم ناويلك على ايه تعالى معايا ياعشق تعالي وانا هحميكي صدقيني

عشق ببكاء هستيري: هتحميني من مين؟ من جوزي؟ اللي انت بنفسك اختارته ليا؟ انا بحب صخر ولا يمكن اسيبه .. صخر اماني وابويا واخويا وحبيبي وكل حاجة انا اتحرمت منها هو العوض اللي ربنا بعتهولي ولا يمكن افرط فيه ولا ابعد عنه ولو ثانية واحده .. امشي لو سمحت صخر زمانه جاي امشييي

ناصر قرب منها ومسكها بعنف بسيط: افهمي ياعشق صخر ميستهلكيش تعالي معايا انا

قاطع كلامة دخول مايا ومش هي لوحدها .. لا دي معاها حوالي اربع رجاله شكلهم مرعبين واجسامهم ضخمة جدا

مايا بمكر: Surprise .. Surprise

عشق بقلق وخوف من شكل الناس اللي معاها: مايا!! انتي بتعمليي ايه هنا؟

مايا بشر: ابدا جايه اخلص عليكي بس

ناصر اخد عشق خباها وراه بحمايه وبجدية قال: عايزة ايه يابنت نريمان من بنتي امشي اطلعي بره

مايا قعدت على كرسي كان موجود وحطت رجل على رجل وبضحكة كلها استهتزاء: هههههه بنتك؟ ودا من امتى بقا يا اونكل؟

ناصر: من دلوقتي ويلا من هنا و ورينا عرض كتافك

مايا وقفت بغضب وشاورت للحراس اللي معاها على عشق وقالت: هاتوها

نفذوا الامر فعلا وقربوا من عشق وبيحاولوا يمسكوها وسط مقاومة منها ومن ناصر .. اللي كان نصيبة ضرب وبطريقة بشعة من طرف الرجال اللي مع مايا لدرجة ان جسمة بقى ينذف .. بس لأخر لحظة كان بيحاول بكل قوته يمنعهم من اخد عشق .. بس زي ما بيقولوا الكتره تغلب الشجاعة .. ومسبهوش الا وهو مغمى عليه .. وقدروا يمسكوا عشق ويخدروها ومش بس كده دول اخدوها ومشيوا ومعاهم مايا وتركوا ناصر غرقان في دمه

____________ استغفر الله العظيم

اما عند صخر فكان بيسوق العربية زي المجنون .. بعد ما سمعوا صوت ناصر وتاكد من وجوده مع عشق واللي ذاد قلقه اكتر ان تليفون عشق اتقفل ومبقاش عارف حصلها ايه .. في اقل وقت كان وصل للشقه .. دخل وقلبه بيدق بخوف ورعب عليها .. شاف دم .. وحاجات كتيرة متكسرة وكأن كان فيه معركة هنا .. دور بهستيريا ورعب على عشق في الشقة ملقهاش افكار كتيرة سوداء هاجمته .. اتجمد مكانه لما شاف ناصر مرمي في الارض زي الجثة الهامدة قرب عليه بسرعة وحاول

يفوقه واخيرا قدر

ناصر بتوهان وصوت ضعيف : ا لـ حـ ق عـ شـ صخر بعدم فهم: بتقول ايه مش سامعك .. عشق فين .. ايه اللي حصل؟

ناصر استجمع قوته وقال بتعب: الحق ععـشق يا صصـخر مايا خطفتها .. قال كلامة ورجع اغمى عليه

صخر بخضه وذهول : خطفتها

قام برعب اتصل على الاسعاف وطلب على وحكاله على كل اللي حصل وطلب منه يبلغ الشرطة ويجي يلحق ناصر ويكون معاه

ولحسن حظه ان عشق كانت لبسه السلسلة اللي ادهالها هدية يوم ما اعترفتله بحبها .. السلسلة اللي ساعدته اول مره يلاقيها دلوقتي هتساعده من تاني

_______________ اللهم صلي على سيدنا محمد

فاقت لقت نفسها في مكان كله كراكيب ومربوطة في كرسي .. الخوف اتمكن منها والدموع عرفت مجراها بتدعي ربنا ينجيها .. عياطها بقا شهقات عاليه

_تؤتؤتؤ وفري دموعك ياحلوة

اتفاجئت بـ مايا قدمها وعيونها مليانه كره وحقد

مايا بشر: مالك خايفة اوي كده ليه دا احنا حتى لسه في البداية .. متتخيليش فرحتي قد ايه وانا شيفاكي منهارة بالشكل ده فرحانه فوق ما تتخيلي

عشق ببكاء: حرام عليكي يا مايا انا عمري ما اذيتك؟!!! .. ليه بتكرهيني بالشكل ده انا عملتلك ايه؟!

مايا بكره: متعمليش فيها الملاك البريئ بسببك انتي الانسان الوحيد اللي حبيته محبنيش .. فاكرة دكتور طارق اللي كان عندنا في الجامعة كنت بحبه .. لا بعشقه قررت اصارحة بمشاعري بس للاسف البيه كان بيحبك انتي فيكي ايه زياادة عني عشان يحبك انتي وانا لا فيكي اييييييه

عشق : انا مليش ذنب انا حتى مش فاكره الدكتور اللي بتقولي عليه ده

مايا بغل: بس انا فاكرة وزي ما حرمتيني من الانسان الوحيد اللي حبيته هحرمك انتي كمان من صخر هخليه يكرهك ويكره اليوم اللي شافك فيه هخليه يقرف يبص في وشك .. هخليه يبعد عنك ويرميكي وساعتها بقى هخليه يحبني باي طريقة وهتجوزه وهنعيش في سعادة متتخيلهاش

عشق بصراخ: لو فاكرة ان صخر ممكن يبصلك حتى فـ تبقى عبيطة صخر بيحبني انا .. انا وبس

مايا مسكتها من شعرها بعنف: والحب دا هينتهى بمجرد ما يشوفك مشوهه سواء من جوه او من بره

عشق بخضه وخوف : مشوهه؟!! قصدك ايه ؟ ا انتي ناويه على ايه يامجنونه

مايا بمكر: ناويه على كل شر .. واهدي كده ونصيحة مني وفري الدموع دي هتحتاجيها بعدين وخصوصا بعد المفاجئة اللي انا محضرهالك

عشق بخوف وبكاء : حرام عليكي سبيني امشي

مايا: تمشي هههههه دا بعدك وبعدين انتي لسه معرفتيش بقيت شركائي

دقايق ودخلوا اخر اتنين عشق كانت تتخيل يكونوا مع بعض .. سيف ودينا

عشق بصدمة ورعب: انتوا

سيف قرب منها ولمس بطريقة وقحة: ايه رايك في المفاجئة دي؟ حلوه صح!

عشق بصراخ: ابعد عني يا حيوان انت ابعد ايدك صدقني صخر لو عرف هيقتلك سامع هيقتلك

دينا ضربتها بالقلم: اخرسي بقا صدعتيني .. وبعدين صخر هيعرف مكانك من ياحلوة

عشق بثقة: هيعرف دا مش اي حد دا صخر السيوفي ياحيوانات .. هيعرف وهيلاقيني ووقتها هتندموا على الساعة اللي فكرتوا تقربوا مني

مايا: ههههههه طموحه اووي ياعشق وحتى لو زي مابتقولي ولقاكي ف اكيد مش هتبقي عايشة لاني هخلص عليكي وبايدي دي

وفي ثانية قربت منها وخنقتها بـ ايديها لدرجة ان عشق ما بقتش قادرة تتنفس

___________

اما صخر فكان في طريقة هو ورجالته اللي كان عددهم مهول وكأنه رايح يحارب .. لمكان عشق ودا عن طريق جهاز التتبع اللي موجود في سلسلتها .. فهل هيقدر يلحقها ولا الوقت هيكون فات

يتبع..