رواية البر التاني الفصل السابع 7 بقلم لولو محمد
رواية البر التاني الجزء السابع
رواية البر التاني البارت السابع
رواية البر التاني الحلقة السابعة
عبد الله / انت ليك اهل فى مصر !!
مختار / ما ليش الا عبد الرحمن و غالبا بنتقابل بره
عبد الله / انا اسف بس هو فضول يعني ليه مش بيبعتولك اكل و كدا بدل ما
مختار / قولتلك ما ليش الا عبد الرحمن و هو فى الكميا شاطر لكن فى الطبيخ اضرب انتينال على طول
عبد الله / ههههههههههههههههههههه و مامته ما فيش مره
مختار / بينا شويه مشاكل كدا بس حليناها الحمد لله
عبد الله / طيب … طب ما دام حليتوها
مختار / هههههههههههههههههههه هقوم اجيب معالق ندوق الرز بلبن ده و لا هو للفرجه و لا هتاخده معاك و انت مروح و لا ايه
مختار يدخل المطبخ
عبد الله / ههههههههههههههه لا للاكل بس اصله من عينه اضرب انتينال اصله عمايل هند
مختار يرجع يقعد جنبه
مختار / بكره تتعلم كتر خيرها ما تقلش منها تانى قدام حد خصوصا لو غريب زيي
عبد الله / بس انت مش غريب يا مختار
مختار / يسلم اصلك بس برده اختك انت اولى بيها تدافع عنها و تنصفها
عبد الله / انا كنت بهزر معاك على فكره هند دى مش اختى الكبيره دى توأمى دا ربنا وحده اللى يعلم غلاوتها عندى عامله ازاى
مختار / ربنا يصلحلكوا الحال
مختار يدوق بحزر
مختار / مهو حلو اهو يا ابني امال بتطلع سمعه و خلاص
عبد الله / يا عم ما كانتش كلمتين هزار قولتهم
عبد الله ياخد طبق و ياكل
مختار / اعملك شاى ؟
…………………..
فى السرايا
انتصار بتسرح شعرها و ناصر بينام فى السرير
ناصر / يا ستى كنتى قولتيلها و خلصتي
انتصار / و اريحها !!! .. ليه دا انا ما صدقت
انتصار تحط الفرشه و تقوم تنام جنب ناصر
انتصار / خليها كدا تفرك فى روحها تصدق و تؤمن بايه
ناصر / لا اله الا الله
انتصار / لا هتهدى و لا يرتاحلها بال الا لما تعرف مين الناس اللى جايين
ناصر / اكبرى بقي يا انتصار و كبرى مخك من تفاهات الحريم دى
انتصار / شوف احنا النهرده طول اليوم بنشيل و نحط الا ما عدلت مخده حتى دا البت سماح لهلوبه عنها
ناصر / والله ما عارف مين فيكوا اللى بتهرى و تنكت فى روحها
انتصار / هى بقت كدا ماشي مقبوله منك بقولك ايه ما فيش اخبار من مختار
ناصر / هو ما بيكلمكيش و لا ايه
انتصار / بيكلمنى بس صوته متغير يا حبه عيني حسه ان باله مش رايق كدا و انت عارفه لا بيتكلم و لا بيشتكى
ناصر / زهقان من وحدته
انتصار/ هو كلمك ؟ الله و من امتى كان بيضايق من الوحده طب دا من صغره و هو فردانى كدا بطوله كان يقفل على نفسه بابه بالساعات ما نسمعش حسه حتى لما سافر مصر قعد لوحده لا رضي يقعد فى السكن و لا يشارك زمايله
ناصر / ما تشوفيله عروسه حلوه كدا على زوقك الواد كبر برده
انتصار / و انا لسه هشوفله
ناصر / تانى يا انتصار
انتصار / اللى ما يشوفش من الغربال يبقي اعمى
ناصر / شوفتى ايه يخليكي تقولى كدا يا ست الكل البت مصراويه و انتى عارفه بنات مصر و جرئتهم
انتصار / مش كلهم البت دى غير اخلاق و اصل و فصل و عيله و حلوه و ماليه عنيه
ناصر / هو كان كلمك فى حاجه
انتصار / عنيه بتقول لما بجيب اسمها عنيه بتقول و تقول و تقول
ناصر / لا يا شيخه
انتصار / بكره لما تيجي هنا هخليك تشوف بعنيك
ناصر / يا وليه بلاش فضايح ما تحرجيناش مع الناس الواد هو اللى فى الوش
انتصار / احرجه دا ايه طب اصبر انت بس و انت تشوف
ناصر / صبرنا ممكن انام بقي
انتصار / هتنام بجد و تسيبني و انا اللى بقالى ساعه عماله احطلك اخضر و احمر
ناصر / انتى لا محتاجه لا اخضر و لا احمر جمالك رباني
انتصار / يجبر بخاطرك زى ما انت جابر بخاطرى كدا
ناصر / الا بالله حقيقه و ما فيها مجامله ان كنت بحمد ربنا على نعمه فاغلى نعمه عندى هى انتى يا انتصار لولاكى لا كنت و لا هكون
انتصار / ما تقولش كدا دا انت الخير و البركه هو احنا من غيرك نسوى حاجه يخليك لينا
…………………
فى عربيه مختار
مختار بيحط شنطه فى شنطه العربيه عبد الله ينزل شايل شنطه صغيره
عبد الله / حط دى معاك
مختار يحطها فى شنطه العربيه
عبد الله / بقولك ايه
مختار / خير
عبد الله / ما تخليني اسوق شويه انا معايا رخصه على فكره
مختار / مره تانيه نبقي لوحدنا و دا وعد المرادى معانا حريم و طالعين على طريق
عبد الله / تمام خلاص
هند و شيري و محمد و ياسمينا ينزلوا
محمد / صباح الخير يا مختار
مختار / صباح النور اتفضلوا
مختار يفتح الباب اللى ورا هند تركب و جنبها شيري و عبد الله يلف يركب جنب هند الناحيه التانيه و محمد يركب قدام و على رجله ياسمينا
مختار / نتوكل على الله بالسلامه
محمد / على بركه الله
مختار يسوق
……………………..
فى السرايا
انتصار واقفه بتشرف على ستات فى المطبخ
انتصار / الهمه يا جماعه الناس زمانهم على وصول
فاطمه تدخل
فاطمه / الله الله على الروايح تسلم ايديكوا والله عباده خلص الكهارب لو تحبي تتفرجى خلهالك ضهر
انتصار / تسلم ايديه عقبال ما نفرش كهارب فرحه
فاطمه / من بقك لباب السما ايه لقتيله عروسه
انتصار / احلى عروسه ان شاء الله عن اذنك اشوفهم عملوا ايه
انتصار تطلع بره السرايا و وراها فاطمه تلاقي رجاله بتدبح فى جنب و عباده واقف و رجاله بتعلق كهارب و تنصب فراشه فى الناحيه التانيه
انتصار / الله ينور عقبال فرحك
عباده / تسلمى و تعيشي
انتصار / ما حدش من الرجاله يمشي الا لما ياكلوا
الجزار / يدوم العز يا ست الكل
انتصار / ما تنساش ترش ميه على الدم ده و ترمى فوقيه رمله جايلنا ضيوف فى الطريق
الجزار / ما تقلقيش يا ست الكل هخليهالك اخر حلاوه
انتصار / اتفقت مع الجماعه بتوع المزمار
عباده / كلو تمام ما تشيليش انتى هم حاجه خالص
فاطمه / يا اختى اهدى ليجرالك حاجه
انتصار / خايفه الناس توصل قبل ما ننضف مطرح الدبيح يقرفوا مننا
فاطمه / ليه ما بيضحوش طب دا عز و رزق واسع
انتصار / مش كل الناس بتفهم فى الحاجات دى
فاطمه / شكل الضيوف دول ناس من البهوات بتوع مصر
انتصار / يوصلوا بالسلامه و هتشوفيهم عن اذنك مش فاضيه
انتصار تدخل و فاطمه تشاور لعباده
عباده/ ايوه يا اما خير
فاطمه / مين الناس المهمين دول اللى جايين دى ما بتهتمش بزياره البيه المحافظ كدا
عباده / علمى علمك
فاطمه / طب مش تبقي تسال يا وله
عباده / يا اما يا خبر النهرده بفلوس بكره يبقي ببلاش
فاطمه / هتفضل طول عمرك كدا لحد امتى صبرنى يا رب
فاطمه تسيبه و تدخل يتنهد و يرجع يقف مع الرجاله
………………….
فى عربيه مختار
مختار يبص في المرايه هند نايمه على كتف مامتها
مختار /فى استراحه كمان عشر دقايق و لا حاجه فيها بنزينه و حمامها نضيف لو تحبوا
عبد الله / هو لسه بدرى على الطريق انا رجلى نملت
محمد / لما نوصل الاستراحه ابقي انزل اتمشالك شويه و فك نفسك
مختار / معلش انا عارف المشوار بعيد بس يستاهل و الله ان شاء الله هتنبسطوا
شيري / ان شاء الله
عبد الله / انا متحمس جدا على فكره
مختار يبص في المرايه و يبتسم
مختار / الحمد لله وصلنا الاستراحه اهو
مختار يركن شيري تصحي هند
شيري / دودو اصحي دودو
هند تفتح عينها
هند / وصلنا ؟
شيري / استراحه ندخل تويلت و نجيب مايه و عصير او اى حاجه
هند / اوك يا ريت
عبد الله ينزل و يتمطع و محمد يفتح الباب و يفضل قاعد و رجليه بره و هند و شيرى و ياسمينا يروحوا الحمام
مختار / انا هجيب قهوه اجبلكوا
عبد الله / انا جاى معاك
محمد / انا لسه رجلى ما فكتش هخليني هنا مع العربيه
مختار / تمام يا عمى هجبلك قهوه معايا
محمد / تسلم ايدك
مختار و محمد يدخلوا الكافتريا مختار يفتح التلاجه و يعبى ميه و عصاير يدخل الكافتريا راجل ملامحه اجنبيه عنيه تيجي فى عنين مختار الراجل يبتسم بحزر و يروح يجيب حاجات من الرف عبد الله يروح ناحيه مختار
عبد الله / انا طلبت تلاته قهوه مظبوط دوبل
مختار / حلو اوى هى هند بتحب البيبسي و لا ال
سيفن
عبد الله / بتحب الاناناس شويبس اناناس ماما بتحب السفن ياسمينا دايسه فى اى حاجه
عبد الله يفتح التلاجه و يطلع شويبس اناناس و يروح يجيب شيبسي و بسكوت هند تدخل الكافتريا تروح ناحيه التلاجه
هند/ هموت من العطش
مختار يديها الازازه من ايده
هند / ميرسي
هند تشرب
عبد الله / اجبلك نسكافيه او اى حاجه
هند / ياريت يا عبد الله بليز
عبد الله / شوفي لو هتعوزى حاجه تانيه
هند تلف على الرفوف و تنقي حلويات و مختار متابعها تبصله يعمل بينقي اى حاجه و يروح للكاشير يحاسب الراجل الاجنبي يمشي و مختار عينه معاه هند تنقى كام حاجه و تروح تحطها عند الكاشير
مختار / دول كمان
هند / لا دول بتوعى
مختار / مش هتدوقيني يعني
هند تبتسم
هند / هبقي اديك حته بس معلش انا بحب احاسب على حاجتى
عبد الله يروحلهم شايل صينيه عليها تلاته قهوه و واحد نسكافيه
عبد الله / سيبها تحاسب دى مكوماهم على قلبها قد كدا
هند / قل اعوذ برب الفلق
مختار / لا معلش خليها عندى المرادى ما يصحش انتوا ضيوفنا و القهوه دى كمان انا هحاسب عليها
عبد الله / يا ابني ما
مختار / بقولك ايه الطريق طويل وفر المناهده دى انا خلاص حاسبت
مختار يدى للراجل فلوس و يرجع يروح ناحيه الرف و يجيب بزياده من الحاجات اللى هند اختارتها و يحطها عند الكاشير و يبص لهند
مختار / عشان ابقي اخد حته كبيره
هند تبتسم مختار ياخد الباقي من الراجل و يرجعوا ناحيه العربيه شيري قاعده و ياسمينا واقفه جنب العربيه و الباب مفتوح
شيري / حد جابلى شاى او اى حاجه
عبد الله / سفن
مختار / فى قهوه لو عاوزه شاى اجبلك
شيري / الواحد مصدع جدا ما كنتش متخيله الطريق بعيد اوى كدا انا مش عارفه انت ازاى رايح جاى كدا كل اسبوع
مختار / انا اصلي بحب السواقه فمش بحس بالموضوع
مختار يديها القهوه بتاعته يلاقي الراجل الاجنبي داخل الحمام
مختار / هتعوزوا حاجه تانى هروح الحمام بسرعه
عبد الله / انا هروح اجبلك قهوه تانيه
مختار / تمام
مختار يروح الحمام يلاقي محمد بيغسل ايديه و الراجل جنبه بيغسل ايده برده
مختار / القهوه هناك فى العربيه
محمد / تسلم ايدك
مختار / مش هتاخر
محمد / خد وقتك دا اسمه بيت الراحه ههههههههههههههههه
مختار يبتسم و محمد يمشي مختار عينه على الباب لحد ما يتقفل و يبص للراجل
الراجل / الشحنه وصلت و النهرده فى المعاد هتكون فى مكان التسليم
عبد الله يفتح الباب و يدخل الحمام الراجل يمشي و مختار يسند على الحوض و يبص فى المرايه
…………………
فى شقه وسام
وسام قاعده جنب يوسف عماله توريله ردود الافعال على صورهم فى السينما
وسام / شوفت عشان تبقي تصدقني
يوسف / يا فرحتى مصر كلها شافتها الا هى
وسام / و انت مين قالك انها ما شافتهاش و لا تكونش فاكر عشان ما علقتش تبقي ما شافتهاش لا يا حبيبي دا قال يعني مش فارق معايا و كدا
يوسف / لو كان كدا كانت ردت عادى و قالت اى حاجه زى الناس دول كدا
وسام / انا تعبتلك سلف يا ابني انت علاطول مستعجل كدا اقولك روح صالحها روحلها انت و قولها كل اللى بيني و بين وسام تمثيل عشان اغيظك و خليها تبيع و تشترى فيك تانى و ساعتها مش هتبيع و تشتري فيك لوحدك انا كمان هبقي رميت كرامتى فى الارض عشان ما فيش و شكرا
يوسف / اهدى بس انا عمرى ما هعمل كدا
وسام / بقولك ايه ما تيجي نخرج ناخدلنا كام صوره فى برج القاهره و لا نروح نركب جمل فى الهرم و لا اى حاجه
يوسف / هو كل يوم خروج هنزاكر امتى
وسام / ادينا قاعدين قال يعني بنزاكر
وسام تمسك الكتاب و هى بتفخ
…………………
فى السرايا
عربيه مختار تركن المزمار يشتغل و العيال تتلم حوالين العربيه و يرقصوا الكل ينزل من العربيه و عيله هند كلها زهول الستات شغاله زغاريط و فاطمه بتابع من فوق و انتصار تطلع من السرايا تحضن و تبوس و وراها مريم كيس الحلويات يقع من هند يتشحطر فى الارض العيال تجري عليه تلمه و يعدوا من بين هند و مامتها و ياسمينا
ولد / الكبير الكبير
العيال ترجع الحلويات لهند كلها و ناصر يخرج من السرايا
هند / خدوها خدوها هما راحوا فين
ناصر يروح يسلم على محمد و عبد الله
ناصر / نورتونا و شرفتونا اتفضلوا اتفضلوا
المزمار يشتغل و العيال ترقص هند تسيب الكيس على العربيه و يدخلوا جوه يسلموا على ناس كتير جدا و زغاريط و المزمار داخل معاهم
انتصار / الاكل جاهز يا سى ناصر
ناصر / اتفضلوا اتفضلوا
مختار و عبد الله و محمد يروحوا يقعدوا حوالين سفره كبيره فى اوضه و قدامهم اكل اشكال و الوان و رجاله كتير و هند و مامتها و اختها يروحوا مع انتصار لاوضه جنبها فيها اكل برده بس كلها ستات
انتصار / شرفتونا و انستونا نورتونا البيت نور والله البيت نور
هند تدى مريم كادو
مريم / دى عشانى
انتصار / والله ما كان ليه لزوم التعب ده
مريم تفتح العلبه تلاقي جواها طرحه برونز تبص لهند و تبتسم
هند / كنت محتاجه مساعده و هو غششني
مريم / تعالى اما اعرفك بسماح
مريم تاخد هند و تعرفها على سماح و فاطمه تدخل تاخد شيري بالحضن تسلم و تبوس
فاطمه / يا تلتميه اهلا يا عشروميت سهلا يا الف مليون مرحب انا فاطمه
شيري / شريهان بس بيقولولى شيري عادى يعني
فاطمه / ايوه كدا احبك و انا قوليلى بطه عادى و لو عالدلع مشيها بطوط
شيري / ههههههههههههههه ماشي يا بطوط
انتصار / طب مش ناكل لقمه قبل الاكل ما يبرد
فاطمه / اه امال ايه اتفضلوا اتفضلوا
مريم / تعالى جنبي يا هند
فاطمه / اسم النبي حارسها و صاينها بدر البدور سبحان من خلق و صور بنتك دى يا شيرى اللى قاعده جنب سماح بنتى
شيري / دى بنوتك لا على كدا هند تبقي اختى الصغيره
فاطمه / ههههههههههههههههههههه طب والله سكر
انتصار تقسم و توزع و تحط اكل قدام هند كتير
هند / بس كفايا مين هياكل كل ده
انتصار / كلى يا قلبي دا انتى جايه من سفر
شيري / والله فعلا الواحد ما كانش متخيل ان الطريق هيبقي طويل كدا دا اليوم راح و مش عارفه ازاى مختار هيروح بينا تانى متاخر كدا
انتصار / انتوا لحقتوا تزهقوا مننا
فاطمه / اخص عليكي يا شوشو ما تقولى حاجه لماما يا هنود تمشي فين يا ست الكل هو احنا ضايقناكى فى حاجه
شيري / ابدا والله هو بس احنا كنا جايين نحضر العقيقه و مروحين عشان دروس عبد الله ابني و كدا
انتصار / العقيقه بكره هتروحوا ازاى دلوقت و هتقعدوا معانا امتى
هند / بس احنا مش عاملين حسابنا على بيات
فاطمه / ازاى دا احنا مجهزين المضيفه و مخلينها و لا احسنها فندق و ان كان على الغيار ثوانى و احسن لبس يكون عندكوا
شيري / مش عاوزين نتقل عليكوا
انتصار / انتى بتقولى ايه بس دا احنا ما صدقنا هو انتوا يتشبع منكوا
شيري / انا مش عارفه اقول ايه الكلمه الاولى و الاخيره لابو عبد الله
انتصار / زمان الرجاله رسوه على كل حاجه و ما تقلقيش ا
عبدلحج ناصر مش هيسيبه الا و هو موافق امال احنا عاملين كل ده لمين
شيري تبص للستات و البنات و تبتسم بحرج فاطمه تحط حمامه كبيره قدام شيري شيري تبصلها
فاطمه / ما طرح ما يسري يمري هههههههههههههههه
……………………..
عند الرجاله
مختار / امال الشنطه اللى معاكوا دى ايه
عبد الله / دا غيار لياسمينا انت عارفها ما بتسترش و بنطلون ملتون ليا عشان لو ما عرفتش اركب الخيل بالجينز يعني
ناصر / ملتون ايه و جينز ايه احلى جلبيه لاجدعها دكتور
عبد الله يبتسم و يوطى على مختار
عبد الله / هو عبد الرحمن مش جاى
مختار / لا مش جاى عبد الرحمن ما لوش فى الحاجات دى
عبد الله / تمام
ناصر / ان شاء الله بعد الاكل ترتاحوا شويه و بعدين اخدكوا افرجكوا على اسطابل الخيل و نسهر بقي سوا فى الغيط نشوى دره و نشرب شاى صعيدى انما ايه هيعجبك اوى يا حج محمد
محمد / ربنا يكرمك يا حج ناصر والله ما له لزوم التعب ده
ناصر / و لا تعب و لا حاجه دا مجيتكوا عندنا عيد … زود للدكتور عبد الله يا مختار
عبد الله / لا تزود ايه انا بس اخلصه
مختار / مش كان نفسك تضرب نار
عبد الله / هينفع
شاكر / لا لو على ضرب النار بقي يبقي عباده اللى يعلمك عباده يجيب العصفوره و هى طايره فى السما
محمد / ما شاء الله بس انا شايف انه بلاش بدل ما يعور نفسه
عبد الله / ليه يا بابا و انا صغير و لا ايه
مختار / ما تقلقش يا عمى كلنا هنبقي معاه و نعلمه بالراحه
محمد يبص لعبد الله واضح انه مضايق
……………………..
فى المضيفه
هند بتلبس عبايه حرير مطرزه بالتيكت و ياسمينا نايمه على السرير
شيري / لما كل الناس دى العيله امال بكره هيبقي الوضع ازاى
هند / تخيلى يا ماما ان كل دول عايشين فى بيت واحد دا تلاقيهم بيجيبوا بعض من شعورهم
شيري تقطع التيكت لهند
شيري / لا ما افتكرش دول هتلاقيهم متعايشين اصل هما واخدين على كدا
هند / بس الاكل كان حلو اوى
شيري / الصراحه اه زمان ابوكى بصم بالعشره انى ما بعرفش اطبخ
هند / ههههههههههههههههههه العبايه دى حلوه اوى بس انا محروجه اطلع بيها قدامهم بصراحه مش كنا عملنا حسابنا و جبنا هدوم
شيري / و انا كنت اعرف اننا هنبات يعني و ابوكى دا كمان اللى ما صدق ربنا يستر و نروح بكره فعلا و ما نعزلش لهنا
هند / مش هكدب لو قولت يا ريت
شيري / و لا تقدرى على العيشه دى يوم واحد
الباب يخبط
شيري تروح تفتح تلاقي فاطمه
فاطمه / جيت اطمن ان مش ناقصكوا حاجه
شيري / ناقصنا ايه بس دا احنا محرجين منكوا اوى
فاطمه / لا والله ازعل الرجاله خرجوا ياخدوا لفه فى البلد فقولت نتلم حريم فى بعضينا نهيص و كدا
فاطمه تبص على هند جوه
فاطمه / الله اكبر الله اكبر ايه الحلاوه دى اللهم بارك ايه ياختى الجمال ده دا انتى لو كنتى هنا فى البلد كانوا اكلوكى هى رجاله مصر عميو و لا ايه
شيري / عميو ايه بس دى لسه صغيره
فاطمه / صغيره ايه انا متجوزه و انا بنت اربعتاشر
هند / بتتكلمى جد
فاطمه / الفرق بيني و بين عباده ابنى الكبير خمستاشر سنه بس بقولكوا ايه يلا يلا خلينا نروح نهيص و نفرفش كدا دا انا حبيتكوا اوى
شيري / القلوب عند بعضيها
انتصار تدخل
انتصار / اخبار الحاجه ايه جت مظبوطه
هند / اه مظبوطه جدا
انتصار / اللهم بارك لايقه عليكي ما شاء الله
فاطمه / هى حلوه ما شاء الله بتليق فى اى حاجه طب دا هى اللى حلت العبايه
شيري / كفايا يا جماعه كدا مش هنعرف نكلمها
ياسمينا تصحي
ياسمينا / ماما بي
شيري / الباب ده يا حبيبي
ياسمينا تقوم تدخل الحمام
انتصار / الحريم متجمعين لو تحبوا تيجيوا تقعدوا معانا
شيري / احنا جهزنا خلاص ياسو بس تطلع من الحمام و نيجى معاكوا علاطول
ياسمين تطلع من الحمام
فاطمه / و ادى ست البنات خرجت من الحمام اهى يلا بينا بقي
شيري و هند يحطوا الطرحه على شعرهم و يروحوا مع انتصار و فاطمه و ياسمينا
……………….
فى اسطبل خيول
عبد الله راكب حصان و مختار ماسكه من السرج و عباده راكب حصان تانى و فى شباب كتير حواليهم مختار يمشي الحصان
عبد الله / هى الخيل دى بتدخل سبق و كدا و لا انتوا بتربوها ليه
عباده / ساعات كتير بنسابق بعض بس لعب بينا يعني
مختار / فى الاغلب الخيول دى عشان تجر العربيات
عبد الله / هو ما فيش هنا عربيات نقل و كدا انا شايف شوارع حلوه يعني
مختار / يعني هو مفيش فى مصر كارو و لا حناطير يعني و بعدين الخيل القديم بيتجوز و يخلف و على فكره الحصان غالي و بيجيب فلوس مش وحشه
عبد الله / انتوا بتبيعوهم
عباده / بنبيع و نشترى و ناجر الخيل اصله كيف
عبد الله / هو ممتع اوى فعلا … هو انا ممكن اخد سلفي و لا هيتحفل عليا و لا ايه
مختار / خد راحتك
عبد الله يطلع موبايله و ياخد سيلفي
عبد الله / ممكن تصورنى
عبد الله يدى لمختار الموبايل ياخده و يصور عبد الله و هو على الحصان و يرجعهوله
عبد الله / حلوه اوى بجد انتوا مش متخيلين انا مبسوط هنا قد ايه
عباده / الحمد لله هنعوز اكتر من كدا ايه
مختار / تحب تروح فين
عبد الله / عندكوا فين تانى يتراح ما انا ما اعرفش اقولك شوفلى حاجه حلوه على زوقك
مختار / لو على زوقى بقي هو مكان واحد و انا متاكد انك هتنبسط فيه
عباده / عرفته ههههههههههههههههههههه
عبد الله / على بركه الله
مختار يساعد عبد الله ينزل و عباده ينزل و يمشوا
………………
فى جنينه فاكهه
محمد و ناصر بيتمشوا وسط رجاله كبار منهم شاكر
محمد / اللهم بارك
ناصر / احنا مش بنصدر بنفسنا احنا متفقين مع شركه بتاخد نص المحصول للتصدير كل سنه
محمد / والله الحاجه شكلها يشرح اللهم بارك
شاكر / الحلو ما يكملش يا حج محمد الجيل الجديد طلع لقي الدنيا سهله مش مقدر النعمه
محمد / ازاى بس
ناصر / فاكرين ان الجناين دى و الارض و الزرايب و كل الحاجات دى بتمشي نفسها العيال فاكرين انهم لو سافروا بره هيلاقوا خير اكتر من اللى هنا
محمد / و هو فى خير بعد كدا طب ياريت مصر كلها ترجع زى زمان و نهتم بارضنا و ناكل من خيرنا
شاكر / حريم البلد ما عدوش بيخبزوا و فى افران كتير فتحت كان مين يصدق ان حد يشترى عيش
محمد / ما فيش احسن من حاجه البيت انضف و احسن بس الدنيا دلوقت ما بقتش زى زمان البنات اتلخموا فى المدرسه و الجامعه و كمان ما فيش الصحه و العافيه بتاعه زمان
ناصر / مهو من قله الغذا الواحد زمان كان يزرع و ياكل من الارض كانت الحاجه فيها بركه تعرف مختار اخويا ما لوش خالص فى اكل الشارع بيحكيلى انه فى يوم قرر هو و صحابه يشتروا بطايه من مطعم كدا بيحكيلى انها كانت معدومه العافيه و ان صدر الفرخه هنا اكبر من صدرها
محمد / الحمد لله على كل حال هنعمل ايه ربنا يصلح الحال
ناصر / امين يا حج محمد امين تعال بقي افرجك على مزرعه المواشي و ادوقك اللبن الطازه اللى لا هتدوق زيه لا فى تقله و لا فى طعمه تعال معايا
محمد / ربنا يزيد و يبارك
شاكر / امين اتفضل يا حج محمد اتفضل
……………….
فى شقه يوسف
يوسف قاعد على الفايس يشوف صور عبد الله مع مختار و هما بيضحكوا و كل شويه عبد الله يشير صوره جديده
يوسف / ما انتوا عيال متنيه زى بعض
يوسف يفتح بروفايل هند ما فيش جديد يفتح الواتس ملهاش وجود
يوسف / ما داهيه لتكونى عملالى بلوك .. صورتها باينه ايه الغباء ده
يوسف يرزع الموبايل جنبه و يطلع بره مفيش حد يروح المطبخ يلاقى مامته بتقلب فى حله
يوسف / هو بابا فين
اسراء / عند اختك امل عندها حوار كدا مع جوزها
يوسف / مش هنخلص بقى من القرف ده
اسراء / ربنا يهديهم
يوسف / طب ما صحانيش ليه كنت روحت معاه
اسراء / انا قولتله يسيبك نايم لنت مالك انت بالهبل ده النهرده اهم كل ساعه بحال هتشغل نفسك بيهم
يوسف / و يا ترى الخناقه الجديده على ايه ان شاء الله
اسراء / مصاريف العيال هيكون ايه غير كدا
يوسف / انا مش فاهم بنتك دى جنس مله جبلتها ايه ما قولنالها مليون مره تعيش على قد جوزها تصرف تصرف تصرف و ترجع تحرج الراجل قدام اهلها
اسراء / مهى بنت عز برده
يوسف / و هو فى واحده متجوزه بتاخد مصروف من اهلها و ياريته بيكفى مصاريفها عشان تعرفى البزخ اللى هى فيه
اسراء / الحياه غاليه يا يوسف
يوسف / افضلى انتى دلعى فيها و امرعيها على جوزها لحد ما تخربى عليها و تقعديهالنا بعيالها فى ارابيزنا
اسراء / انت خارج النهرده
يوسف / امال يعنى هقعد فى البيت زى البنات انا اصلا كنت بفكر اعدى على عمى محمد اطمن عليه
اسراء / ما بلاش يا يوسف ليفتكروك بتتمحك
يوسف / ازاى و انا خاطب انا بس عاوز اثبتلهم يعنى انى بيس يعنى و ان حوار الخطوبه و كدا مش هياثر على علاقتنا يعنى بعمى و كدا
اسراء / شور على ابوك و لا اعمل اللى يريحك ابوك مش فايق النهرده
يوسف / هبقى اكلمه و انا نازل اصلا بصراحه عبد الله مش هناك فا قولت استغلها فرصه و الدنيا هاديه انا مش عارف بس الواد ده هيعقل امتى
اسراء / طول ما هم عمالين ينادوه الدكتور الدكتور عمره ما هيفلح مش يستنوا اما يدخل الطب الاول و بعدين يقولو دكتور و ما دكتورش
يوسف / احنا مالنا بقى يدلعوه و لا يدعقوه احنا مالنا انا داخل اللبس
اسراء / احضرلك لقمه تاكلها
يوسف / لا مش جعان … انتى ما روحتيش مع بابا ليه
اسراء / ما رضيش بيقولى اخر مره قال ايه انا كبرت الموضوع
يوسف / عيله غريبه اقسم بالله انا ماشى
اسراء / لو هتروح لوسام كلمنى من هناك اسلم على امها
يوسف / طيب
يوسف يمشى و اسراء واقفه تطبخ
……………………………..
فى السرايا
البنات بيرقصوا و الستات بتطبل مريم قاعده جنب هند بيسقفوا و فاطمه قاعده مش بعيد
هند / انا مش بعرف ارقص الرقص دا خالص
مريم / امال بترقصى ايه
هند / الشرقى العادى الاوريانتال يعنى
مريم / امال ده اسمه ايه
هند / مش عارفه بس هو غريب شويه يعنى التانى فيه حركه اكتر و ليونه اكتر مش عارفه بس لا دا مختلف
مريم / انا بعرف ارقص زومبا
هند / بجد فى هنا زومبا و جيم و كدا
مريم / انا بشغل فيديوهات من النت و ارقص زيهم بس فى اوضتى طبعا مش قدام الناس و كدا
هند / و لا حتى بنات مع بعض
مريم / ما لهمش هما الحاجات دى يقولوا عليها طبل و رزع و ما يبلعوهاش
هند / لا كدا يبقى ليكي حق انا كمان برقص زومبا على فكره
مريم / خلاص شويه و نتسحب و نطلع اوضتى و نشغل الكومبيوتر و نرقص سوا
هند / ما افتكرش ينفع هنخلع ازاى من الزحمه دى كلها و بعدين انا ما اعرفش ينفع اطلع فوق و لا لا
مريم / و ايه اللى ما نفعوش الرجاله مش هيرجعوا غير على العشا
هند / مش حوار رجاله و كدا بس يعنى
مريم / انا عاوزه افرجك اوضتى هتعجبك اوى مش انتى فرجتيني اوضتك
هند / طب سبيها لله
فاطمه تقوم و تروح تزق البنت اللى قاعده جنب هند تقوم و تقعد مكانها
فاطمه / جرا ايه يا بنات انتوا هتقضوها رغى و لا ايه ما تقومو كدا تفكوا عن روحكوا شويه دا حتى بيقولوا الحركه بركه
هند / لسه بقول لمريم مش بعرف ارقص على الطبله دى
فاطمه / قوليلى بترقصى على ايه و انا اشغلك طب دا احنا هنا عندنا كل حاجه … اطلعى يا بت يا سماح هاتى حزام الشخاليل و الصاجات من اوضتى
هند / لا لا يا سماح مش للدرجادى يا طنط
فاطمه / طنط !!! لا بقولك ايه انتى هتكبريني و لا ايه قوليلى يا بطوط
هند / انا برده مش حساها خالص فعلا هههههههههههههههههههههههههه
فاطمه / اشغلك شيك شاك شوك و لا طبله شرقى … بت يا سماح شغلى السماعات و حطى حاجه حلوه كدا
انتصار / اهدى على البنت يا فاطمه
فاطمه / الله ما احنا بنات فى بعضينا و لا هى مكسوفه مننا بقى هو احنا مش بقينا اهل و لا ايه يا دودو
شيري / على فكره هند بتعرف ترقص حلو اوى هى بس بتنكسف
فاطمه / ياختى باين عليها قاعدين بنات فى بعضينا و شوفى لمالى شعرها ازاى
فاطمه تشد التوكه من شعر هند و تسيبه
فاطمه / ياختى ما شاء الله اللهم بارك و دا يتلم ده خلى ياختى الحرير يبان كدا هتداريه من مين
هند تنكسف و سماح تشغل اغنيه فاطمه تشد الطرحه من على كتافها و تشد هند تحزمها
فاطمه / قومى ارقصى قدامى اما نشوف هتسدى و لا ايه
هند / و انا اجى جنبك برده
فاطمه / طب اسالى كدا انا احسن واحده بترقص فيهم كلهم
هند تبص لمامتها و تبص حواليها الكل بيسقف و بيبص عليها فاطمه ترقص بدلع قدام هند و هى ماسكه ايديها و هند مكسوفه بتتحرك بكسوف شويه بشويه تبدا تندمج و ترقص فاطمه توسع و تروح تسقف و هى بتبص عليها
فاطمه / ادلع ادلع خلى عزولنا يولع و لولولولولولولولولولولى
هند تدحك و تكمل رقص
……………………………..
فى ساحه فاضيه
مختار بيعلم عبد الله النشان
مختار / يجي منك والله
عبد الله / اصل انا بحب اللعبها كتير فى الملاهى و كدا بس صدقنى وزن السلاح الحقيقى يفرق اوى غير كدا ما كنتش فوت و لا واحده
شاب / انت هتجيب وزن السلاح الحقيقى للسلاح البلاستيك و لا ايه يا عباده هههههههههههههههههههههههههههه
عباده يبصله و يزغرله
عبد الله / انتوا بتيجوا هنا فى اى وقت يعنى المنطقه دى مخصصه للنشان و كدا زى نادى الصيد عندنا كدا
مختار / حاجه على قدنا يعنى اهو بنتسلى
عبد الله / انتوا حياتكوا حلوه اوى بجد خيل و مسدسات تحسوا كدا بالتيكساس كاوبويز بتوع زمان
مختار / و احنا اقل منهم فى ايه يعنى
عبد الله / بصراحه النهرده احلى يوم فى حياتى
عباده / اهم حاجه قول بس نفسك فى ايه تانى تجربه و احنا تحت امرك
عبد الله / مش عارف انا كنت فاكر انى جاى يوم عادى بصراحه
مختار / بكره الصبح بدرى هاخدك و نروح نصطاد سمك
عبد الله / لا دى بقى لعبتى دى هوايه بابا المفضله و كان بياخدنى كتير نروح نصطاد من النيل انا و هو
عباده / خلاص يا رجاله بكره الفجريه نروح كلنا نصطاد سمك
عبد الله / اتفقنا … خد صورنى بقى كام صوره و انا بضرب نار
مختار ياخد موبايل عبد الله و يصوره
……………………………………….
فى السرايا
هند تقعد و هى بتنهج
هند / لا انا تعبت خالص حد غيرى يقوم بقى
انتصار / لا يا شوشو ما كدبتيش فعلا بترقص حلو
مريم / و بترقص اجنبى كمان يا ماما لسه قيلالى
فاطمه / يبقى نشوف بقى
هند / لا اجنبى ايه دا حياله زومبا تمارين رياضيه يعنى و بعدين انا خلاص قطعت النفس اصلا
فاطمه / حلو حكايه التمارين دى الواحده مننا برده لازم تاخد بالها من جسمها خدى نفسك كدا و قومى علمينا بقى حركات مصر و تمارين مصر
هند / مهى مريم بتعرف
مريم / هرقص معاكى نقى اغنيه و لو عرفاها هرقص معاكى و على فكره سماح كمان بترقص حلو اوى
فاطمه / امال ايه دا سماح لهلوبه فى الرقص يا شوشو لازم تشوفيها
فاطمه تقوم سماح ترقص
فاطمه / خدى نفسك لحد ما سماح تخلص و قومى بعدها ورينا البومبا و لا الزومبا دى بتترقص ازاى
فاطمه تروح تقعد جنب شيرى و سماح ترقص
فاطمه / البت سماح دى بقى ما قولكيش حكايه بنت امها بصحيح دا غير انها لهلوبه فى شغل البيت اشى محاشى و اشى محمر و اشى مشمر طب دا هى اللى شايله البيت ده حتى اسالى انتصار
شيري / ما شاء الله عليها حقيقى جميله
فاطمه / دا حتى المدرسه شاطره فيها ايه ما قولكيش دى بتطلع من الاوائل
شيرى / ما شاء الله اللهم بارك
فاطمه / دى اخر العنقود بتاعى ما عنديش غيرها هى و عباده مربياهم على ايدى لا عمره مسك سجاره و لا فوت فرض
شيري / ربنا يبارك فيه هو شكله شاب محترم و خلوق
فاطمه / تربيتي زى اسم النبى حارسه و صاينه الدكتور عبد الله مش هو دكتور برده
شيري / لا دا هو ثانويه عامه بس يعنى بيقولوله كدا تشجيع يعنى
فاطمه / ان شاء الله تشوفيه دكتور قد الدنيا و تفرحى بيه و بعوضه على بنت حلال تكون بنت ناس و طيبه و قنوعه
شيري / امين من بقك لباب السما
فاطمه / تعرفى لما ربنا يكرمه و يتخرج نفتحله عياده هنا ما قولكيش بيكسبوا ياما
شيرى / هو بس يدخل طب و ربنا يسهل
فاطمه / و ان ما دخلش ما فيش فى البلد هنا اكتر من المشاريع طب دا حتى الباشمهندسه هند مش هتلاقى شغل احسن من هنا مع ان عندنا يعنى بنحب نستت البنات بس اللى تحب تشتغل براحتها اصل احنا ما بنحبش نجبر حد على حاجه دى حياتهم و هما احرار
شيري / فعلا معاكى حق دى احسن حاجه
الاغنيه تخلص فاطمه تبص لهند
فاطمه / ارتاحتى و خدتى نفسك على الاخر قومى بقى زبطينا بقى بالاجنبى بتاعك ده
هند / قومى معايا يا مريم
مريم / تمام هقوم مريم تروح تشغل اغنيه زومبا و ترقص هى و هند فى الاول الحركات مش متناصقه و كل شويه يضحكوا بعد كدا يظبطوها مع بعض و فاطمه تقوم تتنطت وسطيهم و هى فرفوشه و انتصار بتبصلها و هتتشل
………………………………………….
فى شقه محمد فى مصر
يوسف شايل جاتوه بيضرب الجرس ما حدش بيفتح يضرب جامد ما حدش بيفتح ينفخ و يطلع الموبايل و يتصل بعمه
يوسف / ازيك يا عمو عامل ايه
محمد / الحمد لله يا يوسف انت عامل ايه
يوسف / انا تمام جيت ازورك ما لقتكش انتوا فى مشوار و لا ايه
محمد / اه احنا فى مشوار كدا كنت عاوز حاجه و لا ايه
يوسف / مشوار فين يعنى
محمد / بزور جماعه معرفه
يوسف / طب هى هند معاك اصلى كنت عاوز اسالها على حاجه فى الكليه كدا و بصراحه خفت اكلمها على الموبايل
محمد / هى مش معايا دلوقت كلمها على الموبايل و اسالها فى اللى انت عاوزه
يوسف / طب حضرتك هتروح امتى
محمد / هى الحاجه دى مستعجله اوى يعنى يا يوسف ما تستناش يعنى و لا حتى ما تنفعش فى التليفون
يوسف / لا يا عمو تنفع انا هكلم هند و اسالها
محمد / تمام هتعوز حاجه تانى
يوسف / لا شكرا
محمد / سلام
يوسف يقفل و يتف على الموبايل
يوسف / يحرقك عم ايه القرف ده انا اصلا استاهل ضرب الجزمه انى جيت اعبركوا مكتوبلك الجاتوه يا وسام
يوسف يمشى
…………………………..
فى المضيفه
عبد الله / و انا كمان والله انبسطت جدا انا فرحان اننا جينا يوم بدرى
محمد / احنا جينا عشانك و بتنا عشانك عاوز لما نرجع تاكل الكتب بسنانك اكل
عبد الله / بصراحه انا مش فاهم ليه مختار بيدرس فى مصر مش فى الجامعه هنا مع ان كليه زراعه موجوده عادى
هند / قالى مره ان فى مشاكل بينه و بين حد فى اهله هنا
شيري / و انتى و مختار اتكلمتوا فى الحاجات دى امتى
هند / فى وسط الكلام يعنى يوم ما وصلنى الكليه سمعنى و انا بشتكى لبابا فى التليفون فقال يعنى مش حاجه معينه و لا حاجه
شيري / هو الناس هنا طيبين اوى و كرما و تحسهم على طبيعتهم بس احنا لا واخدين على عاداتهم و لا تصرفاتهم و لا حتى هم واخدين علينا
محمد / بالعكس الرجاله هنا ولاد بلد من بتوع زمان انا شخصيا كنت فاكر انهم شويه فلاحين بجلاليب ما يفهموش غير فى الزرع و القلع لكن لما اتكلمت معاهم اكتشفت انهم مثقفين جدا و فاهمين فى الصناعه و الفن و حتى السياسه
عبد الله / طبعا يا بابا دا مختار عنده فى بيته مكتبه كبير و قالى انه قرا الكتب دى كلها و انه كل فتره بيتبرع بكتب منها عشان يفضى مكان و بيجيب كتب جديده
محمد / طب ما تتعلم منه
عبد الله / يا بابا انا ما ليش خلق اقرا منهجى عشان اقرا غيره
هند / هو انا حكيتلكوا على الكويز بتاع المحاضره
……………………………..
فى الجبل
فى وسط صحرا عربيه فور باى فور راكب فيها اتنين صعايده بجلاليب نقل كبيره توصل و عربيه تانيه وراها فيها اتنين رجاله راجل ضخم ينزل منها ملامحوا اجنبيه بيتكلم عربى مكسر الاتنين الصعايده ينزلوا واحد منهم ماسك شنطه كبيره
الراجل الاجنبى / امال مختار فين المفروض هو اللى يستلم بنفسه
راجل من البلد / جالهم ضيوف مهمين فجاه و انا اللى هستلم منك
الاجنبى / و انا اضمن منين
الصعيدى / مختار قالنا نديكوا شنطه الفلوس دى لما نسلمكوا الحاجه جوه نستلمها منكوا تانى و لو ما يلزمكوش بلاها خالص النقله دى يعنى
الاجنبى / انا ما عنديش اوامر اسلمها لحد غير مختار الزيني
الصعيدى / بقولك ايه يا خواجه اتصل بالمحمول بالست فيرا بتاعتك و خد منها الاذن بس بسرعه بالله عليك ورانا اشغال تانيه و عاوزين نلحق نوصل قبل النهار ما يشقشق و العيون تتفتح علينا انتوا شكلكوا جداد فى الشغلانه دى و لا ايه
الاجنبى يبص للصعيدي و يروح فى جنب و يتكلم فى التليفون الصعيدي يروح يفتح شنطه الفلوس و يوريهالهم و الاجنبى بيتكلم فى التليفون و عينه على الفلوس الصعيدى يقفل الشنطه و يبص هو و اللى معاه لبعض
الاجنبى / تمام
الصعيدى / على البركه
التبادل يتم و واحد صعيدى يركب العربيه النقل و الكل تتحرك
……………………….
فى اوضه انتصار
انتصار / و الله ما انا عارفه الجماعه بيقولوا عننا ايه دلوقت الوليه نزلت رقص و لا فرح ابنها انا فى حياتى ما شوفتش كدا ابدا
ناصر سرحان بيفكر
انتصار / و لا البت يا حبه عينى مش تسيبها فى حالها ابدا كل شويه تقومها ترقصها و تلفها و تزغزغها لما فرهدتها و البت يا عينيى من كسوفها يا قلبى مش راضيه تحرجها يا ربى ايه الجمال ده و ايه الحلاوه دى و الاخلاق دى اللهى يا مختار لو ليك خير فيها يجعلها من حظك و من نصيبك
ناصر / انتى بتقولى ايه يا انتصار
انتصار / البت مريم عشقتها كدا و لا امها ايه الست الكبره دى دا حتى العيله اللى لسه ما طلعتش من البيضه تتاكل حاف اقسم بالله
ناصر / الراجل كمان مثقف و فاهم و لسانه حلو طول ما هو ماشى معايا لسانه ما بيفارقش ما شاء الله اللهم بارك
انتصار / و الله كلهم اخلاق
ناصر يهز راسه
انتصار / انت مالك قلقان كدا ليه
ناصر / ما تاخديش فى بالك نامى انتى و ارتاحى اليوم كان طويل و انتى بكره لسه قدامك يوم اطول
انتصار / والله معاك حق انا ضهرى مفشفش و مفيش حيل لحاجه خالص
ناصر / طب نامى نامى
انتصار تدخل فى السرير و تنام و ناصر لسه قاعد
انتصار / انت مش هتنام
ناصر / لا انا قاعد شويه حبه كدا و احصلك نامى انتى
ناصر يقوم يلبس العبايه و يمشى و انتصار وشها يتخطف و تحس ان فى حاجه
…………………………
فى اوضه عباده
فاطمه / اما عليها رقص يا وله
عباده / ابوس ايدك يا اما عيب اللى بتعمليه ده
فاطمه / دى بت لوزه مقشره يا وله
عباده / اما مش يومك اقسم بالله فى حوار كبير بيتم دلوقت و انا مش ناقص
فاطمه / و من امتى الحوارات الكبيره بتم و انت فى السرايا يا قلب امك و لا انت سبت مختار يطلع الطلعه دى لوحده ياله
عباده / لا اله الا الله بقولك ايه يا اما ما تروحى تشوفى ابويا كدا يمكن محتاجك فى حاجه
فاطمه / نفسى اعرف البطن دى شالتك ازاى
عباده / ماشى يا اما كتر خيرك
فاطمه / ان كنت على مختار يعنى فمختار ما اتكلمش عليها و لا حاجه و انا اتاكدت بنفسى ان البت لا مخطوبه و لا حد متكلم عليها و اللى سبق اكل النبق
عباده / يا اما بتتكلمى فى ايه مش وقته
فاطمه / بناقص يا خويا اللى ياكل على درسه ينفع نفسه انا ماشيه
فاطمه تمشي و عباده يتنهد
………………………….
فى الجبل
العربيه النقل ماشيه و قدامها عربيه تانيه عاديه و فجاه البوليس يهجم و يحاوط العربيتين و يقبضوا على الاتنين الصعايده و ينزلوهم و يفتشوهم ما يلاقوش معاهم سلاح يفتحوا العربيه النقل يلاقوها مليانه بنات فى اعمار مختلفه شكلهم مبهدل جدا و بيعيطوا و خايفين اوى
…………………………….
فى السرايا
هند نايمه جنب شيري و ياسمين تحس بحركه تصحي و تقوم تطلع بره تلاقي عبد الله لابس الجلبيه و بيفتح باب المضيفه
هند / رايح فين يا عبد الله
عبد الله / مش جايلى نوم قولت اطلع اقعد مع الرجاله بره
هند / و هو فى حد صاحي دلوقت
عبد الله / اه انا كنت واقف فى الشباك ناس كتير بره
هند / مش عارفه ما يمكن غفر و لا حراسه
عبد الله / لا مختار و عباده و كلهم واقفين
هند / خير ليكون فى حاجه حصلت
عبد الله / هروح اشوف
هند / خلى بالك من نفسك
عبد الله / تمام
عبد الله يفتح الباب و يمشي
……………………
عند التجمع
عباده / كل شئ وارد النفر منا بيطلع و راسه على كفه مش عارف هيرجع و لا لا و احنا كدا كدا مش هنسيبهم هنقوملهم بدل المحامى عشره
شاب / انا عاوز اطمنكوا يا رجاله اخواتنا ان شاء الله راجعين ديتها حبس كام سنه و غرامه
عباده / و اى كانت الغرامه احنا هنتكفل بيها و اى مصاريف محاماه و مصاريف اهل بيتهم عندنا و دى مش اول مره حد يقع و انتوا ادرى عمرنا ما سبنا رجالتنا
راجل ١ / ايوه يا عباده بيه بس
عباده / ما بسش احنا ما بنضربش حد على ايده يطلع الشغل ابنك طالع برضاه و قابض اتعابه كلها مقدم و قولت مش هنسيبه لاخر لحظه احنا فى ضهره
مختار / اهدى يا عباده دا ابنه برضه
الراجل / يا مختار بيه
مختار / ما تقلقش يا حج ابنك راجلنا و فى رقبتنا هو و اهله
الراجل / كتر خيرك يا ابنى
عبد الله يدخل
عبد الله / هو فى مشكله و لا ايه
عباده / لا دا حوار بسيط و حليناه ايه اللى مصحيك بدرى كده و لا انت ما عرفتش تنام من الناموس و لا ايه
عبد الله / السلام عليكم الاول
الرجاله / و عليكم السلام
عبد الله / بصراحه ما عرفتش انام عشان اتفاقنا و كدا
مختار / شكلك فى الجلبيه حلو اوى على فكره
عباده يغمز لراجل يفرق الرجاله
عباده / انا جهزتلك عده الصيد احنا نطلع على المسجد نتوضي و نعمل حقله زكر لحد الفجر ما فضلش عليه كتير نصلى و نطلع على النيل
عبد الله / تمام يلا بينا
عبد الله متحمس اوى و ناصر متابعهم من فوق فى السرايا انتصار تدخل تقف جنبه
انتصار / ايه اللمه دى يا ناصر في ايه يا خويا
ناصر / انتى لسه ما نمتيش
انتصار / و لا عمرى هشوفه طمن قلبي يا خويا فى ايه
ناصر / اتنين من رجالتنا اتقبض عليهم
انتصار / يا مصيبتي امتى و ازاى
ناصر / كان لازم ده يحصل هو بس ما الراجل حز فى قلبي زعله شكل ابنه ما فهموش
انتصار / فهمه ايه و هو ايه اللى لازم يحصل انا مش فاهمه حاجه
ناصر / فاكره الوليه الخوجايه اللى كانت بتنط لمختار كل شويه
انتصار / قطعت و قطعت سيرتها
ناصر / ما كانش فى حل غير اننا نعملها اللى هى عوزاه و نبلغ عن روحنا و نبان فشله قدامها يمكن تنسانا و تسيبنا فى حالنا
انتصار / و احنا ايه اللى جابرنا على كدا نقفل علينا بابنا و دكر ابن دكر يهوب ناحيتنا
ناصر / يا انتصار الدنيا ما بتتاخدش بالدراع الناس دى لا ليهم مله و لا دين و بعدين البضاعه اللى بيهربوها حريم لو ما دخلناهمش احنا غيرنا هيدخلهم و يا عالم داخلين البلد يعملوا بيهم ايه
انتصار / و دلوقت هيجرالهم ايه
ناصر / دلوقت هما مع الحكومه يشوفوا الصالح و يعملوه ان كانوا داخلين برضاهم و لا مجبورين
انتصار / و الرجاله اللى راحت
ناصر / الرجاله عارفه انهم هيتقبض عليهم و متفقين على كل حاجه و متراضين و كل المصاريف علينا مش هنسيبهم
انتصار / كان مستخبيلنا فين ده بس يا ربي
ناصر / على الله يجي بفايده بس
انتصار تبص على ناصر و هى شايله الهم
…………………..
على النيل
مختار واقف في جنب بيتكلم فى التليفون و عباده و الشباب بيصطادوا مع عبد الله
مختار / الموضوع انتهى
فيرا / ما فيش حاجه انتهت انت عارف انت خسرتني قد ايه
مختار / انا اللى عليا عملته و خسرت رجاله و فلوس عاوزه ايه تاني
فيرا / انت عارف انا اللى بيغلط عندى بعمل فيه ايه
مختار / اولا انا ما بشتغلش عندك انتى طلبتي اعملك الشغلانه دى و انا بعتلك احسن اتنين عندى و الحمد لله انها جت على قد كدا و ربنا يستر و نعرف نلم الليله و ما توسعش مننا
فيرا / عاوز تقنعني ان عيله الزيني اشهر عيله فى الصعيد تقع بالبساطه دى
مختار / لكل جواد كبوه و مش اول مره تحصل معانا ايه عمرك ما وقعلك رجاله و لا باظتلك عمليات و لا ايه
فيرا / ما روحتش ليه يا مختار تستلم
مختار / كنتى هترتاحى لو كان انا اللى اتقبض عليا يعني ماشي يا ست الكل كتر خيرك هروح اسلملك نفسي يمكن ترتاحى
فيرا / ما تهونش عليا المهم البضاعه دى انت مسؤل تعوضني عنها
مختار / لو عاوزه نتحاسب نتحاسب شوفى انتى خسرتى كام و انا خسرت كام و نتحاسب و على العموم مفيش مشكله يا ست الكل شوفي حقك ايه و احنا ما بناكلش حق حد
فيرا / نتحاسب ايه انا بتكلم انك تعوضني فى عمليه تانيه
مختار / يا ست الكل احنا جربنا السكه دى و خسرنا كتير و عنين الحكومه الفتره الجايه هتفتح علينا و حتى شغلنا مش هنعرف ندخله مش هيبقي موت و خراب ديار يعني
فيرا / الرجاله اللى وقعوا لازم تخلص منهم باسرع وقت
مختار / لا لا مؤاخذه لحد هنا و كل واحد يلزم حده انا رجالتى مفيش حد هيقربلهم و هيخرجوا هيخرجوا ان شالله بعد ميه سنه هيخرجوا الرجاله ما بتتعوضش يا ست الكل
فيرا / دا لمصلحتك
مختار / ما حدش فيهم هيتكلم انا اضمنهم برقابتى
فيرا / ماشي يا مختار هسيبك فتره لحد ما الاوضاع تهدى بس خليك فاكر انت مديونلى
مختار / انا مش مديونلك بحاجه و تانى مره هقولهالك احنا ما بناكلش حق حد لو عاوزه نتحاسب نتحاسب
فيرا / هنتحاسب يا مختار بس مش دلوقت
مختار / تانسي و تنورى يا ست الكل تانسي و تنورى
مختار يقفل السكه و هو مخنوق يبص لعباده متابعه مختار يهز راسه لا عباده يبص الناحيه التانيه بغضب مكتوم
……………………
فى المضيفه
شيري / و لا الف جنيه تنفع انت مش شايف اللى احنا فيه
محمد / اعمل ايه ما انا ما كنتش عامل حسابي و لا عارف ان الدنيا هتبقي كدا و بعدين كل واحد بينقط على قده دا انا قولت ٢٠٠ جنيه و جايب الالف معايا احتياطى
شيري / مش عارفه بصراحه
محمد / بصي احنا نحط الالف جنيه و اللى يحصل يحصل هنعمل ايه يعني
شيري تتنهد هند تدخل
هند / انا لميت كل حاجه و وضبت كل حاجه
شيري / شيكتى على كل حاجه
هند / ايوه والله كلو تمام
باب الاوضه يخبط هند تروح تفتح تلاقي عبد الله
شيري / انت فين من الصبح
عبد الله / اما اصطدت شويه سمك انما ايه و اتصورنا صور جامده اوى
محمد / طب يلا خش غير هدومك دى يلا و اللبس هدومك عشان هنتغدى و نمشي
عبد الله يبص لابوه بحزن
عبد الله / بالسرعه دى !!!
شيري / مش هنسيب اللى ورانا و نعيش هنا يعني
عبد الله يهز راسه و يمشي يدخل الاوضه
هند / تعرفوا انه ما نامش من امبارح من كتر ما هو مبسوط و متحمس
شيري / انا شخصيا حطيت راسي على المخده و سافرت من التعب و شايله هم الطريق راجع بصراحه
محمد / يلا يا عبد الله خلينا نلحق نروح فى النور
يتبع…
لقراءة الفصل التالي : اضغط هنا
لقراءة الرواية كاملة اضغط على : (رواية البر التاني)
2 تعليقات