رواية البر التاني الفصل الرابع والأربعون 44 بقلم لولو محمد

رواية البر التاني الجزء الرابع والأربعون

رواية البر التاني البارت الرابع والأربعون

رواية البر التاني الحلقة الرابعة والأربعون

مختار يفتح الباب و هو شايل الصينيه بايده التانيه يدخل يلاقى هند نايمه يروح يحط الصينيه على الترابيزه و يرجع يقفل الباب بالمفتاح و يقلع العبايه يعلقها و يدخل ينام جنب هند فى السرير و يحضنها تصحى
هند / انت جيت
مختار / لسه جاى فى السكه اهو
هند تبتسم و تقوم تقعد
هند / اكلت
مختار يشاورلها على الترابيزه تبص تلاقي صينيه الاكل محطوطه
مختار / الاكل ما لوش طعم من غيرك
هند / طب قوم ناكل سوا … ام فاتن و ام عباده اتكلموا معايا النهرده ما سابونيش الا اما فطرت
مختار يشدها فى حضنه تانى
هند / معاهم حق اى كان اللى هيحصل لازم اكل و ابقي قويه ما ينفعش لا اضعف و لا اقع
مختار يبوس راسها

هند / انا تعبتك معايا اوى امبارح حقك عليا
مختار / سلامتك عندى بالدنيا .. ما يهمنيش حاجه تانيه
هند / ربنا يخليك ليا و لا يحرمنى منك
مختار / و لا يحرمنى منك
هند / تعرف انا عاوزه اقولك حاجه بس خايفه تزعل
مختار / قولى
هند / انا كنت ناويه اسميها لو جت بنت رحمه و لما حصل اللى حصل
مختار يبصلها
هند / مش عارفه شيطان بس
مختار يبوس راسها
هند / انا تعبت
مختار / على فكره بقي قلبي حاسس انه كان هيبقي ولد اصلا
هند / لو كلام الدكتوره دى طلع صح هو لا كان بنت و لا ولد مفيش اساسا
مختار يتنهد هند تبصله بحزن
هند / كان نفسك فى ولد
مختار / عادى والله ما كنتش هتفرق كل اللى يجيبه ربنا كويس المهم سلامتك انتى
هند / انا عارفه انه هيكمل و ان شاء الله هجيبلك الولد اللى نفسك فيه
مختار/ ما تعلقيش نفسك يا هند بيه ما تتعبيش نفسك اكتر من كدا تعرفى … انا بفكر لما كل ده يخلص و تقومى بالسلامه نطلع انا و انتى عمره نغير جو نزور بيت ربنا و نغسل همومنا
هند / ياريت والله انا طول عمرى نفسي فيها اوى و نفسي احج كمان
مختار / و ماله قومى بالسلامه و انا اوديكي انتى بس قومى بالسلامه
هند تحضنه اوى
مختار / انا ما اكلتش حاجه من الصبح و لو ما اكلتيش مش هاكل
هند / هاكل قوم ناكل سوا نفتح نفس بعض
مختار يبوس راسها و يقوموا ياكلوا سوا
………………….

فى اوضه مغاورى
مغاورى قاعد و حاطت الهاند فرى فودانه و بيسمع باب الاوضه يخبط يوقف و يشيل الهاند فرى و يحطها مع الموبايل فى الدرج و يروح يفتح يلاقي خديجه يبتسم تدخل يقفل الباب و يروح يقعد هو و هى على كرسيين قدام بعض
خديجه / طمنى لقيتوا حاجه
مغاورى يبص الناحيه التانيه بضيق
خديجه / طب انت خدت منى الموبايل ليه هو انا عملت حاجه
مغاورى يروح يطلعه من الدرج و يديهولها
خديجه / و اخرتها يا مغاورى هنفضل فى الهم ده لحد امتى
مغاورى / لحد ما ربنا يفرجها هنعمل ايه
خديجه / مش اولى نروح نطمن على هند عمتك عماله تولع البيت حريقه و تقومهم على الزنايته انا ما قولتش لابويا بس دى ضربتنى بالقلم عشان بدافع عنهم
مغاورى / امتى ده
خديجه / انا قولت امى هتقوله بس ما قالتش فسكت انا كمان … انا عارفه ان البيت مش ناقص
مغاورى / اى كان مش من حق حد يمد ايده عليكي و امك ما كانش ينفع تسكت عمتك مين فيهم اللى عملت كدا
خديجه / عمتى كوثر
مغاورى ياخد نفس عميق و يكتم جواه
مغاورى / روحى ارتاحى و كلمى عباده طمنيه عليكي و انا ليا كلام مع عمتى
خديجه / خلاص يا مغاورى انا عارفه ان الكل
مغاورى / مش من حق حد يمد ايده عليكي انا مش هعمل مشاكل ما تقلقيش على الاقل مش دلوقت بس صدقيني مش هتعدى بالساهل
خديجه تهز راسها و تمشي و مغاورى يبص لنفسه فى المرايه و يروح اوضه تانيه و يخبط على باب اوضه تانيه كوثر تفتح
كوثر / خير يا مغاورى فى حاجه و لا ايه
………………………
فى اوضه عباده
عباده بيتكلم فى التليفون مع خديجه
عباده / انا بس عاوزك تعرفى انى بحبك
خديجه / ما انت ما تقلقنيش و تقولى بحبك انا مش فاهمه منك حاجه
عباده / اعرفى انى بحبك و خلاص يا خديجه ما تتعبيش قلبي
خديجه / و انا كمان بحبك بس فهمنى بتقولهالى ليه و اشمعن دلوقت و الطريقه دى تقلق
عباده / انا تعبان يا خديجه ممكن نتكلم بعدين
خديجه / ممكن
عباده يقفل و يروح يفتح الشباك و ياخد نفس عميق و هو بيبص للسما و يتصل بحد تانى
عباده / السلام عليكم … ما تيجي نخرج … هفاجاك
………………

قدام اوضه كوثر
مغاورى / انا قولت اللى عندى اختى ليها كبير انما تمدى ايدك عليها
كوثر / كبرت يا مغاورى ما شاء الله كبرت و بترد على عمتك لا و بتهددها كمان
مغاورى / لا بهددك و لا غيره بس اللى عملتيه ما يصحش
كوثر / روح اتشطر على اختك و ربيها علمها ازاى تكلم الاكبر منها نضفلها دماغها من اللى ابن الزنايته ماليهالها بيه انا كنت طول عمرى معاك ان علامها هيفتح عنيها و يجرائها و يقلعها برقع الحياه و ادى النتيجه
مغاورى / ما تغيريش الموضوع انا اختى متربيه احسن ربايه لا بتسهر فى كباريهات مع نسوان و لا بتشرب خمره
كوثر / فى و الاخر راجل يعمل اللى هو عاوزه مدام بيلف لفته و يرجع لفرشته ما حدش له عنده حاجه ما دام مكفى بيته من ساسه لراسه ما حدش له عنده حاجه و تحمدوا ربنا مش احسن ما كان جابلها ضره
مغاورى / انتى شايفه كدا يا عمتى
كوثر / والله مش لوحدى اللى شايفه كل السرايا شايفه كدا و بعدين الست المفرفشه جوزها يجيلها من العشا اختك لو كانت بتاخد بالها من روحها و من جوزها ما كانش بص بره انما نعمل ايه عماله تجرى ورا العيال و تشخط و تزعق صبح و مسا لما طفشته من فرشته
مغاورى / معاكى حق العيب على اختى فعلا العيب علينا كلنا انما انتوا زى الفل
كوثر / اه يا خويا زى الفل وانت اللى هتحاسبنا و لا ايه
مغاورى / ازاى … ربنا اللى بيحاسب افتكروه بس
كوثر / لا ما تشغلش انت بالك بالحكايه دى كتر خيرك
مغاورى / اخر الكلام لو ايدك اتمدت على خديجه تانى هزعل و ساعتها العين بالعين و البادى اظلم
كوثر / هتمد ايدك عليا و لا ايه
مغاورى / عيب يا عمتى احنا برده متربيين ما بنمدش ايدنا على حريم بنمدها على رجاله بس
كوثر / لو لمست من عباس شعره
مغاورى / لا ما تخافيش هرجعلك شعره سليم الباقي بقي ما اضمنوش تصبحى على خير يا عمتى
مغاورى يمشي و كوثر واقفه بتغلى ترزع الباب
………………………..
فى الكابريه
عباده داخل هو واتنين شباب الشاب الاول يوقفه
الاول / انت متاكد ان هو ده المكان يا سي عباده
التانى / الواحد كان فاكر الحاجات دى فى الافلام بس
عباده واقف بيبص فى المكان الناس سكرانه و البنات عماله ترقص و الرجاله بيرموا عليهم فلوس
الاول / ما تيجوا نمشي الكبير لو عرف اننا
الراجل اللى شغال مع فيرا يدخل

الراجل / اهلا اهلا اول مره تنورونا
عباده يقرب منه و يحط مبلغ كبير فى جيبه الراجل يشوف الفلوس عنيه توسع
عباده / الحق يتقال اول مره ننور فى اى حته زى دى
الراجل / و اوعدك مش هتبقي اخر مره احنا اللى يجربنا مره عمره ما يقدر يبعد عننا
عباده / هو المكان علاطول زحمه كدا انا اصلى مش عاوز حد ياخد باله انى هنا
الراجل يبتسم
الراجل / يا باشا دا احنا نفضيلك المكان اتفضل اتفضل
الراجل يروح ناحيه الباب و يفتحه و عباده وراه الاول يمسكه
الاول / هتعمل ايه يا عباده
عباده يسحب ايده و ينزل السلم اوض اوض اوض الراجل يفتح اوضه عباده يدخل و الرجاله وراه ترابيزه و كنبه و بار الناحيه التانيه فى سرير متحوط بناموسيه
الراجل / دا الجناح الملكى ما بيطلعش غير للحبايب قولى طلبك و عنيا ليك
الاول / لا ما لوش لزوم احنا ماشيين يلا يا عباده
عباده / يا عم جينا بقي نجرب
الاول / هنجرب ايه يا عم هتشرب خمره و لا
اربع بنات يدخلوا الاوضه منهم البنت اللى كانت مع عباس
التانى / هو يوم باين من اوله
الراجل / وارد روسيا اصل اهم حاجه عندنا السريه عشان كدا ما تلاقيش واحده من بناتنا بتتكلم عربى و بالنسبه للصحه العامه مش عاوزكوا تقلقوا خالص احنا شغلنا كله على مايه بيضا
البنت عينها على عباده و هو بيحاول ما يبصلهاش بس واخد باله
عباده / تسلم
الراجل / خدوا راحتكوا و اى حاجه تحتاجوها اضربوا الجرس
الراجل يشاور على زرار محطوط على الترابيزه عباده يبتسم الراجل يمشي و يقفل الباب وراه
الاول / انت بتهرج يا عباده بقي انت اللى تعمل كدا يا اخى
البنات بيبصوا لبعض عباده يروح يقعد بنت تروح تشغل المزيكا و التانيه تروح تصب خمره
الاول / انا ماشي خليك انت بقي
الاول يروح يفتح الباب بنت تروح تمنعه يزقها و يعدى يطلع بره البنت تقفل الباب و البنت التانيه تحط الكاسات على الترابيزه و تقعد جنب عباده و تناوله كاس يهز راسه لا
عباده / بحب ابقي فايق
البنت / يانى بونيما ( مش فاهمه )

عباده يبص الناحيه التانيه بنت تقعد جنب الشاب و تدلع عليه
التانى / احنا جايين هنا ليه يا عباده هتشرب خمره و لا استغفر الله العظيم … يا بنتى ارحمى امى
عباده / لو مش عاجبك امشى بصراحه الواحد عمره ما جرب الحاجات الحلوه دى
التانى / انت بتتكلم جد و لا بتهرج بقي بعد خديجه هتبص لدول
عباده / و هى فين ست خديجه ان شاء الله بقولك ايه حل عن سمايا ليك فى الليله اقعد عاوز تحصله الباب يفوت جمل
الشاب يبص لعباده البنت تعدى بصابعها على خده يقشعر و يقوم يمشي
عباده / براستى يجوا يو نيجو نيا دولى فا بلاجى( سامحوه ما لوش فى الطيب نصيب)
البنات تبص لبعض و تبص لعباده و يضحكوا البنت اللى كانت مع عباس تناول عباده كاس
البنت / فاش اكسنت يرودليف ( لهجتك بشعه )
عباده / قولنا نتكلم عربي انتوا اللى مش راضيين
البنت / يانى بونيما ( مش فاهمه )
عباده / ما انا واخد بالى
عباده تليفونه يرن يرد
عباده / ايوه يا مختار
مختار / مشيت اللى فى دماغك برده و روحت
عباده / مخنوق و قولت افك عن نفسي اجرمت يعني
مختار / طب الكبير عرف و شايط هات كفنك فى ايدك بقي و انت جاى
عباده / قوله هتاخر شويه
مختار / ما تهزرش يا عباده ما تخليهوش يجي يجيبك من هناك
عباده / سلام يا مختار
عباده يحط الموبايل فى جيبه و ينفخ و يقوم البنات تقف
عباده / ما لكوش فى الطيب نصيب يلا بالاذن انا بقي
عباده يمشي و البنات بيبصوا لبعض الراجل يدخل
الراجل / مشي ازاى انتوا لحقتوا
البنت / مختار كلمه
الراجل يضرب كف على كف و ينفخ
…………………..

فى سرايا الزنايته
ناصر يضرب عباده بالقلم قدام الكل فاطمه تصرخ انتصار تشدها بعيد و ناصر بيصرخ في عباده
ناصر / عملنالك ايه عشان تعمل فينا كدا
عباده باصص فى الارض و ساكت
ناصر / فاكر ان عشان مختار بعد عن طريقك الدنيا بقت ساهله ضامنها انت ايه العيله ما فيهاش رجاله غيرك
عباده يبص لناصر
ناصر / بص حواليك بص لامك و اختك و قولهم كنت فين يا قدوه وريني هترفع راسك ازاى قدام اهل البلد مسحت اسمك و هيبتك باستيكه ليه
مختار / خلاص يا كبير هو حاسس بغلطه
ناصر / ما عدش ليك مكان بينا
فاطمه / لا
ناصر / مش هكررها اطلع بره
عباده يسيب السرايا و يمشي مختار يجي يحصله
ناصر / مختار
مختار يقف
ناصر / ورايا على المكتب
ناصر يمشي و مختار بيبص على شاكر قاعد باصص فى الارض فاطمه تجرى عليه
فاطمه / انت هتسكت على كدا هتسكت
شاكر يسيب المكان و يطلع فوق فاطمه تروح لانتصار
فاطمه / عباده ما يعملش كدا دا انتى اللى مربياه على ايدك عباده ما يعملش كدا ابدا
انتصار / اقول ايه بس
فاطمه / قولى اى حاجه بس عباده ما يعملش كدا
هند تنزل من فوق مش فاهمه حاجه
انتصار / كل واحد يشوف اللى وراه ما لهاش لازمه اللمه دى يا جماعه
…………………..
فى اوضه خديجه
خديجه واقفه فى الشباك بتبص على القمر باب الاوضه يخبط تتنهد و تروح تفتح تلاقى كوثر
كوثر / الا ما تعرفيش اخوكى فين ان شاء الله
خديجه / لا ما اعرفش هو مش فى اوضته
كوثر / لا مش فى اوضته ما علينا اصلى كنت عاوزه اوريله صور المحروس و هو فى الكباريه وسط الراقصات
خديجه / مين المحروس

كوثر / سى عباده بيه عشان لما اقولك انه ابن كلب واطى ما تتحمقيش عليه اوى كدا
خديجه / عباده ما يعملش كدا
كوثر / الصوره ما بتكدبش يا اختى اتفضلى اتفرجى
كوثر تدى خديجه الموبايل و تشوف صور عباده و هو جوه الكباريه
خديجه / انتى جبتى الصور دى منين
كوثر / ولاد الحلال شافوه و بعتوهالى
خديجه / و ايه اللى وداهم هناك و اشمعن انتى اللى بعتوهالك
كوثر / عقلك رافض يصدق حتى بعد اللى شوفتيه بعينك حقك ما انتى خايفه نقول عليكي هبله بعد العمر دا كله لسه مش عارفه مين عدوك من حبيبك انا عملت اللى عليا و بلغتك انتى حره بقي و اللى تشيل قربه مخرومه
كوثر تمشي و خديجه مش مصدقه اللى شافته و الدموع بتنزل من عنيها تجري تقفل الباب بالمفتاح و تطلع الموبايل و تتصل ما بيردش تتصل تانى ما بيردش تعيط اكتر تتصل تالت يرد
عباده / ايوه يا خديجه
خديجه / هو ده اللى كنت تقصده بانك بتحبني .. طب ليه
عباده / مش هقدر اشرحلك بس كان غصب عنى
خديجه / غصب عنك !!! تخونى و تقولى غصب عنك … انت ما خونتنيش يا عباده انت خونت ربنا
عباده / كان غصب عنى
خديجه / انا مش عاوزه اعرفك تانى و الحمد لله اننا على البر
عباده / خديجه .. الموضوع مش زى
خديجه تقفل السكه و تقعد على السرير تعيط عباده يتصل تانى ما تردش يتصل تالت تقفل الموبايل يتصل من رقمه على موبايلها تقفل موبايلها باب الاوضه يخبط
خديجه / سيبونى فى حالى
مغاورى / انا مغاورى يا خديجه افتحى
خديجه تفتح و هى بتعيط
خديجه / انا بكرهه
مغاورى يدخل الاوضه و يقفل الباب بالمفتاح
مغاورى / كان غصب عنه
خديجه / هى مجده ما بتصعبش عليك عاوزنى ابقي زيها
مغاورى عينه توسع و يتفاجئ
…………………..

فى المكتب فى سرايا الزنايته
ناصر قاعد على المكتب باصص فى الارض و مختار واقف قدامه باصص فى الارض
ناصر / يعني كنت عارف
مختار يبصله
مختار / ما كنتش اعرف انه هيعملها النهرده قالى الفكره و قولتله لا ما كنتش اعرف انه هيمشي اللى فى دماغه و يعملها
ناصر / كبرتوا يا مختار كبرتوا و كبرت معاكوا … كبرت لدرجه انكوا ما عودتوش بتشوفونى بتعملوا اللى فى دماغكوا و يبقي كتر خيركوا لو بلغتونى
مختار / ما تقولش كدا انت
ناصر / انا ايه ؟ انا ايه يا مختار ما مسكتش فى مغاورى و حطيتونا قدام الامر الواقع كلنا ما راحش المكان ال…. استغفر الله العظيم
مختار / الغايه
ناصر / اوعى تكمل اوعى اشرب خمره و اسهر مع نسوان و تقولى الغايه
مختار / ما كانش قدامه طريق تانى
ناصر / على كدا وصل لحاجه بقي ان شاء الله
مختار / ما اعرفش بس اكيد ما لحقش يعني
ناصر / لا كان يكمل يباتله ليله و لا اتنين هناك و برده ما كانش هيوصل لحاجه… كل اللى حصل انه عرنا كلنا
مختار / ما عباس
ناصر / الروس اتساوت يعني بعد ما كان عباده الزيني بقي زى عباس … هى مالت من شويه
مختار يبص فى الارض ناصر يتنهد
ناصر / كلمه شوفه فى انهى داهيه و اطمن عليه بس ما تقولوش ان انا اللى طلبت منك انا زعلان منه
مختار يهز راسه و يطلع الموبايل و يتصل
…………………..
فى اوضه خديجه
خديجه / هتقولى اقبلى عشان بيتك ما يتخربش و نزوه و يلف لفته و ينام فى فرشته و الراجل ما يعيبوش الا جيبه و الكلام ده
مغاورى / بس عباده مش كدا
خديجه / ما انت برضه قولتلها نزوه و عدت و ما تخربيش بيتك ما امى برضه اللى قالتلها اهتمى بنفسك و اهى كل يومين تعمل شعرها لون شكل لما نصه وقع اياكش تعجب عايشه عامله هبله و مغمضه عنيها و راضيه عشان عيالها اللى بيزيدوا كل سنه عيل و كانها بتسلسل روحها و تلخم نفسها عشان تلاقى سبب تكمل معاه كل يوم و التانى مسافر عنده قضيه و احنا مصدقين اصل مش احنا اللى بنغسل هدومه اللى غرقانه بريحه الحريم و الروج
مغاورى / اهدى يا خديجه

خديجه / كنت واقفه جنبها و هى بتحطهم فى الغساله كدبت عليا من حرجها و قالت انهم اتخانقوا عشان كان نازل و هى بهدلته كدا كدبت عليا و على روحها بس ان كانت هى اتجوزت خلاص فانا لسه على البر اقف معايا اقف معايا فى دى بس
مغاورى / عباده مش كدا و انا علاطول معاكى عباده لو فيه عيب واحد قسما بالله
خديجه / و هو فى عيب اكبر من الحرام يا مغاورى
ام مغاورى تدخل
خديجه / انا خدت قرارى حاجته ترجع انا مش هتجوزه لو اخر راجل فى الدنيا
ام مغاورى / عين العقل وفرتى عليا كلام كتير كنت جايه اقوله
خديجه تفتح الدولاب و تطلع علبه دهب كبيره و تديها لامها و تقلع الدبله و تحطها جواها و هى بتبص لمغاورى و عنيها كلها دموع
ام مغاورى / النهار يطلع و هبعت الحاجه مع ابوكى و الحمد لله اننا ما استعجلناش فى الجوازه دى
خديجه تهز راسها
خديجه / سيبونى لوحدى لو سمحتوا
ام مغاورى/ اوعى تقهرى روحك دا انتى
خديجه / سيبونى لوحدى ابوس ايديكوا
ام مغاورى تبصله يمشي تمشي وراه و تقفل الباب و خديجه بتعيط
……………………
فى اوضه هند
مختار رايح جاى فى الاوضه
هند / هو عباده عمل ايه لكل ده
مختار يبصلها
مختار / ششششش
هند / ما الكل عارف الا انا صحيت على صوت الصريخ و الزعيق لبست و نزلت لقيت الكل بيعيط و ام فاتن وزعتهم و ما فهماش حاجه
مختار / مفيش حاجه يا هند
هند / ازاى ما فيش امال كل ده ليه
مختار / سوء تفاهم و هيتحل ان شاء الله
هند / يا خبر بفلوس بكره يبقي ببلاش مش عاوزه اعرف
هند تنام على جنبها مختار يروح يقعد جنبها
مختار / عباده كان مخنوق و ولاد الحرام قالوله هنسهر و نغير جو لقاهم واخدينه كباريه
هند تتعدل
مختار / على ما مشي كانوا كلموا الكبير و قالوله عباده فى الحته الفلانيه طبعا الدنيا قامت ما قعدتش
هند / مش عارفه اقولك ايه

مختار / ما تقوليش و ياريت ما تتكلميش فى الموضوع تانى خصوصا مع او قدام ام عباده احنا ما صدقنا
هند / ايوه بس هو ليه الكبير ما سمعلوش
مختار / عشان فى حاجات مش مقبوله يا هند هو مش صغير
هند / بس مش لدرجه يطرده من السرايا هو اولردى مخنوق بدل ما نحتويه و نقدر زعله بنزوده و نتخلى عنه
مختار / الدنيا ما بتمشيش كدا هنا يا هند
هند / بس عباده معروف و اخلاقه معروفه
مختار / غلطه صغيره زى دى ممكن تدمر كل تعب عباده سنين
هند / مش مهم الناس و لا كلامهم احنا مش ملايكه و لا هم اللى هيحاسبونا
مختار / احنا اتربينا اننا نكون قدوه اننا نطبق على نفسنا اللى بنطلب من الناس انهم يعملوه عشان لو حد اتكلم نقوله ما احنا اهو
هند / فهمت
مختار / عباده مش وحش بس الناس ما بتصدق تلاقي على الواحد غلط و انك تكونى من عيله الزيني بيخليكي طول الوقت تحت المكريسكوب و الكل بيتصيدلك اتفه غلطه
هند / فهمت
مختار / الحمد لله انسي بقي كل اللى سمعتيه و تقفلى بقك نهائي و حتى لو هم اتكلموا ما تحشريش نفسك
هند / حتى لو
مختار / انا قولت ايه ؟
هند / حاضر
مختار / اجبلك تتعشي
هند / مش جعانه
مختار / و لا حتى كبايه لبن
هند / اللبن فى التلاجه شويه كدا و هقوم اغليلى كبايه و اشرب ما انا مستحيل انام دلوقت يعني انا لسه صاحيه
مختار / تمام شغليلك فيلم و لا اشغلى روحك باى حاجه على ما اجى
هند / هتروح فين
مختار / هشوف الجزمه اللى ما بيردش ده راح فين و اطمن عليه
هند / ابقي طمنى تمام
مختار / ان شاء الله يلا خدى بالك من روحك
مختار يلبس العبايه و الجزمه و يمشي و يقفل الباب وراه و هند قاعده على السرير تتنهد
…………………….
فى اوضه خديجه
خديجه قاعده على السرير بتعيط و واخده رجليها فى حضنها باب الاوضه يخبط تبص على الباب و تكمل عياط
مغاورى / افتحى يا خديجه عاوز اتكلم معاكى
خديجه / سيبونى لوحدى
مغاورى/ هسيبك والله هسيبك بس افتحى دلوقت هقولك كلمتين و اطمن عليكي و اسيبك
خديجه تمسح دموعها و تروح تفتح الباب يدخل و يقفل الباب
مغاورى / على عيني قهرتك بس اى رد فعل منك غير ده كان هيبوظ كل اللى عملناه
خديجه تبصله باستغراب و تمسح دموعها

مغاورى / عباده ما عملش حاجه و مدام كدا كدا انتى عارفه عباس و عمايله السوده يبقي اولى تعرفى كل حاجه
خديجه / عباس هو الخاين
مغاورى / هو اللى حط نفسه فى موضع شبهه كل اللى فى البيت زى الفل او على الاقل منضفين وراهم كويس اوى الا هو
خديجه / لا اله الا الله
خديجه تروح تقعد على اقرب كرسي
مغاورى / ما ينفعش نظلمه من غير دليل قوى
خديجه / و لو جبتوا الدليل
مغاورى / و هو فى مصير تانى للخاين غير الموت يا خديجه
خديجه / لا اله الا الله لا اله الا الله
مغاورى / كدا كدا واحد مننا هيموت الفكره بس مين عشان كدا مش هنتسرع فى الحكم الا بعد ما نجيب دليل قوى
خديجه / عشان كدا عباده كان هناك
خديجه تبصله برجاء
مغاورى / ايوه عباده حتى ما شربش بق ميه هناك ما عملش اى حاجه كان لازم حد يروح و ما حدش يعرف غير خمسه و انتى السادسه و لا انتى و لا ابويا و لا الكبير ينفع يروحوا و مختار متجوز و مراته ما تعرفش اى حاجه و تعبانه و مش هتفهم يبقي ما فيش غيرى انا و عباده
خديجه / انت بتقول
مغاورى / يمكن كان المفروض انا اروح بس عباس كان هيبقي هناك و مش هيتصرف براحته و انا موجود فا ما كانش قدامنا الا عباده و صدقيني ما كانتش سهله عليه يدخل مكان زى ده
خديجه / انا اديت لامى الشبكه
مغاورى / قولتلك لو كنتى خدتى اى رد فعل غير ده كانوا هيشكوا فينا عشان كدا ما قولتلكيش
خديجه / و بعدين
مغاورى / لحد ما الدنيا تروق و الحقيقه تبان كدا هيبان للكل ان الدنيا وسعت
خديجه / ابويا عارف الكلام ده صح
مغاورى / عارف و بكره هيتكلم مع عمتى يسالها جابت الصور منين هيواجهها بحقيقه عباس يمكن نعرف منهم حاجه
خديجه / طب و ماجده
مغاورى / يمكن ده يكون علاجها من الهم اللى هى فيه تعيش و تربى عيالها زى ما كانتش عايشه
خديجه / و عيالها ابوهم هيبقي خاين
مغاورى / اتكلمت مع ابويا فى الموضوع ده … هيبقي سر و يندفن معانا ما حدش هيعرف بيه
خديجه / و عمتى هتسكت على موت ابنها
مغاورى / قضاء و قدر ما حدش بيعيش اكتر من اللى مكتوبله
خديجه / لا اله الا الله
مغاورى / ازعلى واتقهرى ان شالله تنقهرى على ماجده من جواكى بس تبيني انك مقهوه من عباده اوعى حد يحس بحاجه
خديجه تهز راسها حاضر
مغاورى / كلمى عباده ما تبقيش انتى و الدنيا عليه
خديجه / ليه ماله عباده
مغاورى / الكبير طرده من السرايا
خديجه / بس الكبير عارف الحقيقه
مغاورى / ما كانش موافق على اللى حصل و عباده عمله من وراه
خديجه / لا اله الا انت سبحانك انى كنت من الظالمين طب هو فين دلوقت
مغاورى يهز كتافه ما اعرفش
خديجه تهز راسها
خديجه / تمام .. شكرا و ما تقلقش انا هاخد بالى
مغاورى يقرب و يرجع بتردد و بعدين يبوس راسها تبصله و تبتسم
مغاورى / تصبحى على خير
خديجه / و انت من اهله
مغاورى يمشي و خديجه تقفل الباب
………………..
فى الجبل
عباده مولع نار و قاعد و مختار قاعد جنبه
مختار / بكره الصبح تروح تبوس ايده و تراضيه و توعده انك مش هتكررها
عباده يهز راسه اه
مختار / مغاورى هيكلمها هيفهمها كل حاجه ما تقلقش
عباده يهز راسه اه
مختار / لقيت حاجه هناك
عباده يهز راسه لا مختار يتنهد
عباده / بس قلبي بيقولى انها هناك
مختار / مين دى
عباده / فيهم واحده عرفانى
مختار يبصله
عباده / بصتها ليا و تركيزها معايا حاسس انها عرفانى
مختار / يمكن

عباده / بيقولوا ما بيتكلموش عربى و لا يفهموه بيتكلموا روسي
مختار/ ما انت ما شاء الله لبلب فى الروسي
عباده / هى مش شايفه كدا بتقولى لهجتى تقرف
مختار يضحك
مختار / امال لو سمعتنى بقي و انا بعجن فيه
عباده / قلبي بيقولى ان ده اول الخيط قلبي بيقولى انى يمكن لو كنت طولت هناك شويه
مختار / دا شيطانك عشان ترجع لو كنت طولت هناك كنت طولت فى الغلط كنت اكيد هتغلط ما تقنعنيش ان اربع بنات معاك فى اوضه واحده يعني
عباده / انا مش صغير
مختار / ما حدش كبير على الغلط كنت هتغض بصرك ازاى كنت هتشوف برده و انت فى الاول و الاخر راجل يعني … بشر
عباده / ما كنتش شايفهم
مختار يبصله
عباده / قسما بالله ما كنت شايف غيرها … خديجه
مختار يبتسم عباده يتنهد
عباده / هنعمل ايه دلوقت
مختار / مش عارف … الحكايه كل ما دا ما بتوسع … السلاح هيوصل امتى
عباده / اخر الاسبوع و خدلك بقي على الاقل اسبوع كمان لحد ما نمرن الرجاله عليه
مختار / لا مش دلوقت
عباده / ليه
مختار / هتعرف اننا جبنا سلاح و هتجيب الاقوى منه و كانك يا ابو زيد ما غزيت
عباده / و بعدين
مختار / مغاورى هيجيبه و هى عارفه هيمرن رجالته عليه الاول
عباده / و احنا رجالتنا هيبقوا من غير تمرين
مختار / لا هنمرنهم و الفتره الجايه هنشد عليهم فى التمرين كمان
عباده / ازاى من غير سلاح
مختار / السلاح امره سهل الصعب ان اللى شايله يكون جاهز و قوى
عباده / تمام
مختار / الرجاله مش لازم تفهم هم بيتمرنوا ليه و لا بنشد عليهم ليه انت مضايق و بتفش غلك فيهم و كدا كدا ما حدش هيستجرى يرفع عينه فيك
عباده / بعد اللى حصل ؟
مختار / ان حصل زعق و اتعصب زياده فكرهم مين هو عباده الزيني لو نسيوه
عباده يهز راسه

مختار / بتقول اول الخيط فى الكباريه ده مش كدا
عباده / قلبي بيقولى
مختار / سهله سيب الحكايه دى عليا انا
عباده / هتعمل ايه
تليفون عباده يرن خديجه عباده يبص لمختار و الاتنين يبتسموا
مختار / هسيبك انا و نكمل كلامنا بعدين
عباده يرد
عباده / ايوه يا خديجه
خديجه / مغاورى قالى على كل حاجه
مختار يبتسم و يمشي
عباده / والله ما خنتك والله ما عرفت اشوف غيرك قولتلك انى بحبك
………………….
فى سرايا الجوارحه
الكل متجمع يفطر فى صمت و بيبصوا لبعض و خديجه قاعده وسطيهم بتفطر عادى
مغاورى / هتيجي معايا يا حج عشان نسجل الارض اللى على الطريق
شاهين / مش هينفع النهرده لازم اروح ارجع الشبكه للزنايته
كوثر / عين العقل كان من بدرى
شاهين / الا صحيح يا ام عباس انتى جبتى الصور دى منين
كوثر / ولاد الحلال بعتوهالى
شاهين / ولاد الحلال !!!
ماجده / هروح اعلق على الشاى عن اذنكوا
ماجده تبص لخديجه و تقوم تمشي
شاهين / تعالى يا كوثر عاوزك و لما عباس يجي … دا لو جه خلوه يحصلنى
كوثر / و ماله عباس بالحكايه دى عباس فى اسكندريه
شاهين / تعالى المكتب
كوثر / مش اخلص اكلى الاول
شاهين / الاكل مش هيطير
كوثر تبصلهم و تقوم تروح ورا شاهين مكتب شاهين يقفل الباب
شاهين / اقعدى يا ام عباس اقعدى و ارتاحى
كوثر / خير يا كبير اؤمرنى
شاهين / ما يؤمرش عليكي ظالم انتى عارفه عباس فين يا كوثر
كوثر / ما قولنا فى اسكندريه

شاهين يفتح موبايله و يطلع صور لعباس و هو بيرقص و يشرب و حواليه بنات كتير
شاهين / زمان لما جوزت ماجده لعباس ضحكنا عليها و قولنالها هيتصلح حاله بعد الجواز و لما ما اتصلحش ضحكنا عليها تانى وقولنالها نزوه و عدت و مش هيكررها و لما كررها قولنالها اصبرى عشان العيال و بكره ربنا يهديه
كوثر / الست هى اللى بتخسر من الطلاق و ان كان عباس بيغلط فما تكررش الغلط مع خديجه على الاقل عباس مننا و علينا
شاهين / عباس اللى بعتلك الصور صح
كوثر / الحق عليه يعني
شاهين / و انتى بدل ما توريهانى جريتي ورتيها لخديجه مش كدا
كوثر / خفت عليها
شاهين/ خفتى عليها و لا السواد اللى جواكى عماكى
كوثر / انا !!
شاهين / اوعى تفتكرى انى ما اعرفش انك مديتي ايدك عليها انا سكت بس عشان حريم فى بعضيكوا و انك اكبر منها و ياما ربتيها و عملتيلها انما انك تكايلى بمكيالين تحللى لابنك و تحرمى على غيره
كوثر / عباس بيحاول بيغلط و يتوب و يستغفر ما كلنا بنغلط و ربنا عارف باللى جوانا
شاهين / و عباده كانت اول مره
كوثر / السكه دى اللى بيروح فيها ما بيرجعش ما احنا قولنا على عباس كدا اول مره و لا نسيت و بعدين احنا فيها لو عاوز تكمل الجوازه ما ترجعلوش شبكته و كملها انا ما قولتلكش افسخها
شاهين / تشحنى البت و تكرهيها فى خطيبها لحد ما هى اللى تفسخ و ترجعى تقولى انا ما قولتش افسخوها
كوثر / انت هتسيب الزنايته و عمايلهم و تمسك فى اختك
شاهين / عملوا ايه الزنايته عملوا ايه
الباب يخبط و مغاورى يفتحه عباس يدخل
عباس / خير يا خالى من على الباب بيقولولى انك عاوزنى
شاهين / تعال ادخل … اقفل الباب يا مغاورى
مغاورى يقفل الباب و عباس بيبص لكوثر
عباس / خير يا خالى فى حاجه و لا ايه
شاهين / كنت فين امبارح يا عباس
عباس / فى اسكندريه
شاهين يضربه بالقلم كوثر تتخض و تغطى بقها
عباس / كنت سهران فى كباريه النجوم
شاهين / بتيجي بالضرب زى البهايم يعني
عباس يبص لامه
شاهين / كنت هناك امبارح و صورت عباده صح

عباس / مش انا .. صحابى اللى صوروه و بعتولى الصور
شاهين / كنت فين ساعتها
عباس يبص لامه شاهين يمسكه من بقه
شاهين / كنت فين يا عباس ساعتها و بتعمل ايه
كوثر / مش كدا يا خويا
شاهين / اسكتى انتى
عباس / كنت نايم فى اوضه تحت لما عباده جه و مشي انا كنت نايم شربت لما اتولت و نمت
شاهين / و كنت نايم لوحدك بقي على كدا
عباس / لا مش لوحدى
شاهين يبص لكوثر باصه فى الارض و بتهرب بعنيها من اخوها و هو باصصلها
شاهين / بيتوب و يستغفر مش كدا
كوثر / اخر مره اخر مره مش هيعمل كدا تانى
شاهين / ناصر طلع ارجل منى ناصر لما عباده عتب بس باب المكان طرده من البيت و انا ان كنت جلدتك من اول مره ما كنتش عتبتها تانى
عباس / الجو فى البيت كان متوتر و انا اتخنقت من كتر العياط و الكأبه
شاهين / قدامك حل من اتنين يا تمشي و ما تعتبهاش تانى يا تتجلد تمانين جلده انك شربت خمره مع انك لازم تترجم
عباس / و انت بقي يا خالى اللى نصبوك تطبق شرع ربنا يعني انت اللى هتطهرنى
شاهين / لو عليا كنت طخيتك
كوثر / كل ده عشان ابن الزنايته
شاهين / و انتى ما سمعتيهوش بودانك ما سمعتيش قال ايه كان فين و مع مين و بيعمل ايه سديتى ودانك لما الغلطان كان ابنك

عباس / ماشي يا خالى انت مش قولت حلين انا يا خالى مش هعتبهالك تانى
عباس يسيب المكان و يمشي
كوثر / ارتاحت كدا انبسطت بدل ما تحابى عليه و تلمنا بتفرط السبحه من ايدك بتقفل بابك فوشه و تقوله ارجع للغلط تانى
شاهين / انتى اللى فرطتى السبحه مش انا عشنا سنين مغميين عنينا و عاملين مش واخدين بالنا عشان المركب تمشي جيتي انتى خرمتيها امبارح و نسيتي انك ركباها معانا
شاهين يسيبك المكان و يمشي و مغاورى يجري وراه و الكل بيبص على كوثر كوثر تسيب المكان و تطلع اوضتها فوق الكل يبص لبعضه
ام مغاورى / كل واحد يشوف اللى وراه يلا مش وقت لمه و فرجه دلوقت
الكل يتفرق
…………………..
فى المطبخ
خديجه تدخل تلاقي ماجده قاعده بتصبع كفته رز تقعد قدامها تساعدها
خديجه / بيقولوا ابويا طرد عباس من البيت
ماجده تبتسم بسخريه و تكمل تصبيع
خديجه / يمكن لو كان عمل كدا من زمان
ماجده / العيال ما عادوش صغيرين يا خديجه دلوقت هيجوا يسالوا جدنا طرد ابونا ليه
خديجه / اتخانقوا سوا و عباس ما رضيش يعتزر
ماجده تهز راسها اه باستهزاء و تكمل تصبيع
خديجه / اكيد عمتى هتخليكي تضغطى على ابويا ترجعيه
ماجده / مش محتاجه تكلمنى انا هكلم ابويا يرجعه يا اما هاخد العيال و نروحله ماطرح ما هو قاعد
خديجه / بتسامحيه بعد اللى عمله
ماجده / ما بسامحوش ما عادش يفرق معايا بس يفرق مع عياله
خديجه / بيربيهم اصله بيسهر جنبهم لما يعيوا بياخد باله منهم و منك
ماجده / عوزانى اعمل ايه اطلق ؟ ما بنطلقش ما انتى عارفه و اللى عند ربنا ما بيروحش
خديجه / ربنا ما قالكيش تستحملى حاجه زى دى دا ممكن ينقلك انتى و عيالك اللهم احفظنا امراض وحشه
ماجده / كان زمانه نقل

خديجه / انتى مستسلمه كدا ليه
ماجده تقوم تغسل ايدها و تسند على الحوض و تعيط خديجه تقوم تحضنها
ماجده / سخنت و زعقت و هللت و بعدين ايه اللى هيجد ؟ بنت الحاج شاهين الجارحى تطلق !! عيالك هتوديهم فين ؟ مين هياخدك بعيالك ؟ اهو ضل راجل ولا ضل حيطه ؟ حاجى على بيتك و ما تخربيش على روحك و ما دام كدا كدا مش هتتجوزى غيره يبقى خليه يربى عياله ؟ هيطلقك و يتجوز غيرك و هى هتعرف تلمه و تنسيه باقى الحريم و انتى اللى هتربيله عياله ؟ كام مره اتقالى الكلام ده يا خديجه كام مره
خديجه / حقك عليا
ماجده / انتى فكرانى ما اعرفش اعمل زيك و اصمم على الطلاق ما اعرفش ابقى قويه يعنى اعرف و اعرف اجبرهم يعملولى اللى انا عوزاه و هيطلقونى منه و بعدين هرجعله تانى عشان العيال و عشان ما بقاش مطلقه و عشان هيجي و يعيطلى اخر مره و هتبقى اتحسبت عليا طلقه
خديجه / الدنيا اتغيرت دلوقت
ماجده / ما فيش حاجه اتغيرت و لا حاجه هتتغير فوقى يا خديجه لو كنا فى ظروف تانيه غير دى ما كانتش خطوبتك اتفسخت هم اصلا طول الفتره اللى فاتت بيدوروا على حجه يفسخوها بيها و اقولك الكبيره لولا فسخ خطوبتك ما كانش حد اتكلم فى عباس و اللى بيعمله عباس هو يعنى ابويا ما يعرفش هو ابويا ما يعرفش عباس بيبات فين كل يوم و التانى لا عارف و مطنش و اتكلم النهرده عشانك عشان ما تقوليش او انا ما قولش اشمعن
خديجه تبص لماجده بحزن ماجده تروح تدهن ايدها زيت و تصبع الكفته خديجه تقعد تساعدها و هى بصالها
ماجده / تعرفى انى قولتلهم جوزه ما دام انا مش كفايا و كدا كدا هعيش اربى عيالى عارفه امك قالت ايه
خديجه / جنازته و لا جوازته
ماجده / ما انتى عارفه كل حاجه اهو لا قادر يطلقنى و لا قادر يتجوز عليا و انا مش عاجباه و لا ماليه عينه يبقى يعمل ايه
خديجه / انتى مقتنعه بالكلام ده و لا بتحاولى تلاقيله عذر
ماجده / و لا عمرى هقتنع و لا عمره هيكون له عذر انا ما غصبتوش عليا هو اللى حفى سنين يتحايل على ابويا انى اتجوزه و على يدك بس خلاص ملكنى يجرى ورايا ليه الخلفه و العيال خدوا خيرى يبقى عليا ليه
خديجه / و ابويا باقى على امى ليه و كل رجاله العيله باقيين على مراتاتهم ليه
ماجده / عشان ولاد اصول عشان العشره ما تهونش الا على ولاد الحرام عشان عباس واطى مبسوطه انتى دلوقت
خديجه / لا
ماجده / و لا انا و اقولك و لا هو
خديجه تتنهد
ماجده / بكره هكلم ابوكى يرجعه البيت هقوله العيال سالوا على ابوهم لو مش هيرجعه و يسامحه يسمحلى اخد العيال و اروحله
ماجده تبص الناحيه التانيه و تدارى دموعها خديجه تقوم تبوس راسها و تحضنها ماجده تفتح فى العياط
…………………………
فى سرايا الزنايته
الكل واقف و عباده واقف باصص فى الارض قدام ناصر و شاكر
ناصر / قسما عظما
عباده / مش هتتكرر
ناصر / بوس ايد ابوك و خليه يسامحك
عباده يبوس ايد شاكر هند تنزل من فوق

انتصار / تعالى يا حبيبتي ما رضيناش نصحيكي مختار قال انك نمتى متاخر قولنا نسيبك ترتاحى
هند / تسلمي
عباده / ادخل ؟
ناصر / اخر فرصه ليك
عباده يهز راسه و يطلع فوق الغفير يستاذن و يدخل
الغفير / لا مؤاخذه يا كبير الحج شاهين مستنى جنابك فى المضيفه انت و الحج شاكر
عباده ينزل من فوق ناصر يبصله و يتنهد
ناصر / يا ترى جاى ليه يا عباده
عباده يبص فى الارض و يروحوا التلاته و مختار يروح وراهم
فاطمه / السكه اللى تودى ما لو ما كانوش عملوا كل ده ما كانش حاجه من دى حصلت
انتصار / خلاص يا فاطمه
فاطمه / ان ما جوزته ست ستها ما ابقاش فاطمه
فاطمه تروح المطبخ و هى متعصبه
و الكل بيبص لبعضه
……………………
فى المضيفه
شاهين قاعد هو و مغاورى و رجاله كتير و ناصر و شاكر و مختار و عباده
ناصر / والله يا حج انا ما عارف اقولك ايه
عباده / اول و اخر مره والله ما هكررها
شاهين / كدا احسن للكل و بعدين الحاجات دى قسمه و نصيب
مختار / يا حج شاهين
شاكر / خلاص يا مختار … لعله خير
عباده / ايوه يابا بس
شاكر / الجواز زى ما الحج شاهين قال قسمه و نصيب و ان كانلك نصيب فيها هتتلف تلف و ارجعلك
راجل / ليه هى خديجه بايره و لا ايه
شاكر / يبقي مالوش نصيب فيها
ناصر / خلاص يا رجاله ما يصحش كدا
الراجل / و هو اللى سى عباده عمله اللى يصح اوى
عباده / غلطت و بعترف بغلطى و عهد عليا مش هكررها
شاهين / تكررها و لا ما تكررهاش دى حاجه ترجعلك احنا جبنالك حاجتك و كل شئ قسمه و نصيب
ناصر / تمام يا حج اللى تشوفوه
شاهين يشاور للرجاله يمشوا عباده و مغاورى يبصوا لبعض و الكل يمشي و الزنايته واقفين يبصوا لبعض
شاكر / انا رايح ابص على الارض
شاكر يمشي
ناصر / تعال يا عباده نتمشي شويه بالعربيه عاوز اشوف المدرسه الجديده وصلوا فى بناها لحد فين
عباده / تمام يا حج اتفضل
مختار / اجى معاكوا
ناصر / تعال
ناصر و مختار و عباده يمشوا
امين / يروحوا يتشطروا على سى عباس بتاعهم اللى مش عاتق
سليمان / امين

امين / ايه؟ قولت حاجه غلط مش دى الحقيقه جايين نافشين ريشهم و بيتنطوا على ايه قال على راى المثل اللى بيته من ازاز
شاب / والله انا كمان شايفها تلكيكه عمايلهم من يوم المخزن اللى اتحرق و هى لا تسر عدوا و لا حبيب و ما عمالين يماطلوا اياكش عباده يزهق و يفسخ هو لحد ما جاتلهم على الطبطاب
سليمان / و مين اللى جبهالهم مش عباده مش معنى ان عباس بيغلط ان عباده يغلط زيه و مش معنى ان ماجده راضيه بعمايل عباس ان خديجه مجبره ترضي
راجل / و فى الاول و الاخر كل شئ قسمه و نصيب
امين / بس حسيت ان عباده ما زعلش ان الخطوبه اتفسخت
الشاب / ما قولتلك كانت مساله وقت مش اكتر اكيد هو كمان كان فاهم كدا و مستنى
سليمان / فضوها سيره الحكايه دى و ما تتكلموش فيها تانى و سبوها على الله
امين / ايوه بس
سليمان / خلاص يا امين خلصنا ما تعصبنيش عليك على الصبح و انتوا يا رجاله كل واحد يشوف شغله سيبه اللت ده للحريم ما يصحش كده يلا
الكل يتحرك و سليمان يمشي و هو متعصب
…………………….
فى عربيه عباده
ناصر / و هتجيبهم منين الناس دول بقي ان شاء الله
مختار / و هى تعرف كل رجالتنا اللى فى مصر و اسكندريه يعني
ناصر / و الرجاله دى وزرها على مين
عباده/ انا متاكد يا كبير ان ده اول الخيط انا متاكد اننا لو
ناصر / انت بتقول ان البنت اللى هناك عارفاك و انكوا اول مره تروحوا قدمولكوا الخدمه دى مع ان ممكن كنتوا تبقوا حكومه
عباده / يعني منطقى ابقي اول مره اروح و اول تلت دقايق ليا فى المكان و ينزلنى تحت و حريم و كدا مش الاول اسكر شويه و اتفرج على الرقاصات و لا اى حاجه
مختار / ما يمكن المكان مشهور بكده و الناس بتجيله من كل حته عشان ده يا عباده
ناصر / بصوا يا رجاله انا مش مرتاح اننا نجبر حد على حاجه زى دى سكر و حريم و قله ادب و مسخره هم هيعملوها عشانا
مختار / رجالتنا مش كلهم ملايكه برده يا كبير فى منهم اللى بيعملوا كدا فعلا
ناصر / و انا ما اعرفش حاجه ليه عنهم دول
عباده / عشان هم مش مقصرين فى شغلهم خالص يا كبير فخلاص ربنا بيحاسب كل واحد على عمله
ناصر / الكلام ده ما بيمشيش عندى الرجاله دى
مختار / الرجاله دى هى الحل الوحيد قدامنا عشان ندخل المكان و نخرج و نعرف اللى بيحصل فيه
عباده / انا متاكد انهم بيتكلموا عربى مع انهم اكدولى انهم اجانب و ما بيتكلموش عربى و خد راحتك ليه اكد على خد راحتك لو ما كانش عاوزنى اتكلم
ناصر / الراجل ده جرى عليك اول ما دخلت صح
عباده / ايوه
ناصر / حطه تحت عينك الاول
مختار/ يا كبير احنا فى عرض كل يوم و بعدين احنا بقالتا شهر بحاله بنلف حوالين نفسنا عشان نوصل بس للنقطه دى خلينا نمشي الاتنين فى وقت واحد خلينا نحط كل اللى داخل و اللى خارج تحت عنينا و كمان خلينا ندخل على قد ما نقدر جواهم احنا كمان ممكن نستخدم الموضوع ده لصالحنا
ناصر / ازاى يعني
مختار / والله يا كبير انا عندى افكار كتير فى الموضوع ده بس انت اديني الاذن و صدقني مش هتندم
ناصر / مفيش اذن قبل ما اسمع و افهم و اقتنع
عباده / قوله كل حاجه يا مختار و اهو يمكن يكون له راى تانى

ناصر / او يمكن يكون الكبير و المفروض انكوا ما تعملوش حاجه الا اما ترجعوله
عباده / لا مؤاخذه يا كبير والله ما اقصد
ناصر / اتكلم يا مختار قول بتفكر في ايه
مختار / هقولك يا كبير
…………………….
فى شقه محمود
يوسف / صدقني يا بابا الكافيه ده
محمود / يا يوسف انا مش معترض انا ما عييش
يوسف / احنا ممكن ناخد قرض بضمان المحل
محمود / يا يوسف
يوسف / دلوقت فى تسهيلات كويسه جدا على القروض للشباب
محمود / انا ما اقدرش اجازف بالمحل دا الحاجه الوحيده اللى بقيالنا
يوسف / يا بابا افهمنى احنا هناخد القرض و نعمل كافيه كبير يسندنا مع المحل
محمود / يا ابني الكافيهات ماليه البلد دا فى كل شارع اتنين و تلاته
يوسف / طب ما المحلات كمان ماليه البلد مش انت اللى دايما تقول الارزاق على الله
محمود / بس المحل دى شغلانتنا من زمان و فاهمينها انما الكافيه ده
يوسف / يا بابا ما انتوا اول ما فتحتوا المحل كنتوا لسه بتجربوا برده
محمود / لا يا حبيبي شوف انا قبلها اشتغلت كام سنه فى محل جدك و اتعلمت و شربت اصول الصنعه و بعد كدا فتحت مش فتحت و بعد كدا اتعلم و يا بختك يا ابو بخيت
يوسف / يا بابا صدقنى دى مكسبها مضمون ميه الميه خصوصا الماتشات بص فى دراسه الجدوى اللى انا عاملها
محمود / دراسه جدوى ايه هو انت بتسمى اللى انت عامله ده دراسه جدوى يا ابني انت حاسب تكلفه معلقه الشاى و السكر و نبيعها بكذا فى كام زبون فى اليوم طب فين الكهربا و الميه والعماله و ايجار المكان و التراخيص و الحى و الدعايا
يوسف / ما كل ده انا حاطه فى المصاريف فى الاول
محمود / بس الحاجات دى مش بتدفع مره واحده و تسكت و يا سيدى انت درست المنطقه دى يعني انت حددت ان يدخلك ميه و خمسين زبون فى اليوم على اساس ايه
يوسف / يا بابا دا القهوه البلدى بيبقي قاعد فيها و لا خمسين واحد
محمود / مهو سعر الشاى فى القهوه البلدى دى ما يجيش ربع سعر نفس كبايه الشاى عندك
يوسف / مهو قاعد فى مكان انضف و خدمه احسن
محمود / يبقي اكيد عدد الزباين عندك اقل
يوسف / مهو الناس دى مش هتبقي قاعده فى نفس الوقت دا على مدار اليوم يعني
محمود / يا يوسف يا حبيبي انا مقدر تعبك و حماسك انت لو بس توجهه المكان الصح
يوسف/ انت ليه علاطول بتحبطنى كدا انا عملت كل حاجه عشان ارضيك نزلت اشتغلت فى المحل و وقفت زى البياعين لما رجلى ورمت عشان تديني يوميتى و رايح جاى مواصلات عشان انت بعت عربيتي عايش معاكوا عشان بعتوا شقتى و برده مش عاجبك
محمود / يادى شقتك شقتك هكتبلك اللى احنا عايشين فيها دى يا سيدى اياكش تنزل من على ودانى بقي
يوسف / و انا هستفيد ايه بالشقه دى ما انتوا عايشين فيها
محمود / انت مش عاوز شقه تتجوز فيها

يوسف / لا كنت هاجرها و لا ابيعها و افتح الكافتريا بتاعتى
محمود / و هتعيش فين ان شاء الله و لا هتتجوز فين ان شاء الله
يوسف / جرا ايه يا بابا ما انا لازم يبقي عندى شغل عشان اتجوز
محمود / ما انت عندك شغل وبتقبض منه كويس الحمد لله
يوسف / انت فاكر ان اليوميه الهبله دى تفتح بيت
محمود / ده اللى عندى عندك شغلانه احسن روح اشتغلها بس بعيد عن دماغى … و ادى ام اللقمه اللى ما عدناش عارفين نحطها فى بقنا فى البيت ده
محمود يسيب البيت و يمشي
يوسف / عاجبك كدا يا ماما
اسراء / يا ابني قولتلك استنى لما الظروف تتحسن شويه
يوسف / تتحسن ايه بس و استني ايه استني لما عمرى يضيع وانا قاعد جنبكوا
اسراء / شوفت بقي لو كنت سمعت كلامى من الاول ادى اللى اخدناه من ست هند
يوسف / يوووووه بقي دى ما بقتش عيشه
يوسف يسيب البيت و يمشي
اسراء / يعني هو انا اللى عايشه وسطيكوا … قرفتونى
……………………….
فى اوضه خديجه
خديجه بتتكلم فى التليفون
خديجه / انا خلاص اخدت قرارى
هند / انا عذراكى و عارفه ان عباده غلط بس هو حلف مش هيكررها ما لوش خاطر عندك تسامحيه
خديجه / انتى مش مكانى لو كان مختار اللى عمل كدا
هند / جابولى صور مختار و ما صدقتش عيني قولت عمره ما يعمل كدا و فعلا طلعت مزقوقه عليه
خديجه / بس عباده راح هناك بمزاجه
هند / من خنقته شيطانه غواه و الحمد لله رجع و ما غلطش لحقناه
خديجه / غصب عنى يا هند ما تضغطيش عليا لو سمحتى
هند / هم بيضغطوا عليكي فى البيت هم اللى عاوزين الجوازه تبوظ ؟
خديجه / لا دا كان قرارى انا و ارجوكى يا هند كفايا بقي
هند / طب فكرى تانى
خديجه / انتى عامله ايه و معادك مع الدكتوره امتى
هند / تمام فهمت
خديجه / انتى غاليه عندى يا هند و كلكوا غالين و ما كنتش اتمنى ابدا ان الامور توصل للمرحله دى
هند / ان شاء الله كل حاجه ترجع زى ما كانت