Uncategorized

رواية كحل عرب الحلقة الخامسة والعشرون 25 للكاتبة زينب ماجد

 رواية كحل عرب الحلقة الخامسة والعشرون 25 للكاتبة زينب ماجد

رواية كحل عرب الحلقة الخامسة والعشرون 25 للكاتبة زينب ماجد

رواية كحل عرب الحلقة الخامسة والعشرون 25 للكاتبة زينب ماجد

(الدخيلة ) 
ياشايل حلاوة خوف الحديثات
ومحمّـِل سحر…                          
ضحكة بنات بيوت                                           
يامايع ترافه..                             
اتهيّب من احويك..               
خاف اصعب عليك..
وخاف بيدي تموت!      
(عريان السيد خلف ) 
سرحان :كاموا مني و سلموا اعليه ، لچن كلبي مستريح عبن كضت اعلى خير و ما توهدنت بيها . 
وادعتهم اعلى الباب و كلت الهم : هلا بيكم شرفتونا . 
ودشيت انا و حاكم : خايب من دهر الدهرك كون ، جا هكو وحيد يطي امه فصلية، شمالك تسودنت ؟ 
يو ما رادينها جا توهدنا . 
– انا موش  غبير و تفوتني الفايتة يبو ستار ، لجن انا ساعة الرحت ليهم و دشيت بالسالفة طباب خير واجبهم يكرموني واعرف طبايع الشيوخ ما يرضون العيبة ، و عرفت يو اطيتهم امي و انا الطباب خير ما ياخذونها . 
صفن : شلون طرت اعلى بالك ولك ؟.
-جا انا نخيت الله و حاشى الله يرد ناخيه . 
– و النعم بالله ، بس ارد انشدنك ، عليش جاي تصف ويا بيت ثجيل ، انت كلش زين تعرف ما يودون ابوك وحتى امك ما يحترمونها و كلساعه موهدنينا بزواج يا فصلية يا بزلمة مريض واطوها هدية . 
– مرادي عد ال ثجيل و لزوم اطيب الكلوب خاطر اخذ مرادي . 
– شنهو مرادك ؟ 
ابتسمت بوجهه : شغيلة خاصة بيه . 
– جا خوش ، ما دامها شغيلة انا اروحن ، هديت البيت والضعن ملفلف ، ما خذت ايدي شغلت خفت لا تتوهدن، لجن طلعت ما ينخاف اعليك يبن ال مطر. 
– ههههه هلا بيك ابو ستار ، هلا ومرحبا . 
طلع و انا صكيت الباب وراه و دشيت لامي ، عاينت اعليه : ها راحو ؟ 
– اي والله يمه راحو حرامات 
– ياااع عليش حرامات؟ 
– موش انا شفتج ساعة الكتلج حضري اغريضاتجي ياله اتروحين نشنشتي وردت ارويحتج ، ومن ما رضوا تضايكتي، ياله يمه شنسوي موش قسمتج. 
– فلشك كون، خايب انا حمل زلمه بعد وعلي من اعاينهم و اتضكر ضيمي تجز روحي من الدنيا . 
– لا تبررين يمه انا اعرفنج 
ضحكت .. و هي تكول : الله يحفظك و يعلي علومك يوليدي ويبعد عنك كل ردي بجاه الكاظم . 
– الله يحفظج يمه . 
اندكت الباب كمت ليها ، فكيتها كريم اخوي جدامي : ها كريم ؟ 
– من شفتهم راحو  اجيت انشد عنك، شنهي شصار 
– فضت راحت 
– لا عليك الحسين 
– اي والله.  
– شلون 
– انا حاسبها حساب عرب و تم بفضل الله . 
– ابوي حيل متضايك و باله كله منشده اعليك، مر اعليه و احجي وياه . 
– جا امشينا نمرله . 
رديت الباب و طلعيت تمشينا للمضيف، دشينا ابوي كاعد و زلمه مجابله يحجي، من دشينا شال عينه : هااا ؟ 
حجه كريم : فضت 
رد يحجي ويا الزلمه و يكله (محلوله ان شالله لا يضل بالك ) و صرفه، مشا الزلمة اندار لينا : شنهي شصار ؟ 
سولفت اله السالفة بما انزلت ، تنهد : هديت حيلي يسرحان بويه . 
– حيلك دايم ، لجن انا كتلك افضنها و يو اعرف موش كد هالطلابه ما ادشن بيها . 
زناد : طلابة و تطي امك فصلية ، سوايتك ما يسويها بس الردي 
رده الشيخ : احترم يزناد ، سوايته و تفكيره تفكير شيوخ وانا متعشم بسرحان و اعرفنه ازلمه و يخلف عهدي بخير . .
اندار و اشر اعليه و رد حجه : لجن الشغيلة البراسك تشيلها من راسك من عبنها ما تصير ، لا تعشم رويحتك وانت اتعرف هالأمر لا انا ولا كل واحد يحله . 
– الله موجود 
– والله اطانا عكول خاطر انفكرلها . 
كريم : شنهي هي هاي الشغيلة ؟ غير نعرف . 
الشيخ : هيج سالفة .. مالكم غرض بيها . 
كاطع : لوني اكطع سالفتكم بخير ، لجن دشت سلطان لكاع ال ضاحي ما اشوفنها بمحلها . 
سرحان : من رخصت ابوي ، لجن البيت بيتنا و الكاع كاعنا ، الغربة مالهم راي اعلينه ..
زناد : خالي موش غريب وجلمته جلمة حك، شنهي طبت سلطان الكاعنا . 
الشيخ : موش سلطان ، ثجيل بخويطهم ما اريدنك تكربهم ، خوووش ؟ 
تنهدت : ان شالله. 
( بيت حاكم ) 
– ها خلصتو ؟ 
كواغد : جا غير ناطرينك وين رحت . 
– رحت لسرحان ظل بالي اعليه . 
فزت هدية : بويه شماله سرحان ؟ 
رد حاكم : هيج سالفة 
اندارت كواغد : خايبة يمه عليش تخليني اكضن ارويسج هاذ واهلسنة ، طويبجات حطينهن بجيوبج و اثكلي يبتي ، سوالف زلم عرف ولف و تنشدين اعليهم ولج. 
– جا يمه انا ما كلت شي ، بس هيج اعلى لاهيتي نشدت . 
– امشي اكضي شغلج ومالج غرض . 
هدية : مشيت وانا بالي عد سرحان ، شماله ؟ و شجاريله وابوي باله منشده اعليه . 
كضينا اغريضاتنا وابوي جاب سيارة حمل، و شلنا غاد بذاك البيت حولنا ، لجن البيت مكصوم نصين ، نص النا ونص ليمان، لجن بيت ايمان بيه قفل و معزول عنه الا من الباب الخارجية ياله ندش اعليه. 
 رادت امي وحبوبتي ويسرى يشوفنه ، لجن ابوي رفض و كاللهن موش وكته. 
طشينا كل واحد لحجرته يعدل 
امي تنظف بحجرتها و جمارة وياها ، و يسرى تنظف بحجراتها وانا وجدتي بالهول ، كمنا ليها  كشينا الكاع وحطينا اغريضاتنا و كعدنا . 
لهناك اجا ابوي و صف سيارة حمل جبيرة ، نزلت اشكال الوان الغراض لبيت ايمان، حتى من هاي البيت الخاتون اليتغوسلون بيها ، هم جابها الها ، ضاكت ابنفسي امي بطرك الكومدي و ايمان جاب و حط . 
حجت يسرى : جا شنهي هي بشر و احنا لاله ، شو انا غريضاتي بقج حتى ما عدي شي اضمهن بيه . 
جسومة : من فلوس اهلها ما جايبة من جيوبنا البت ، اساس هالبيت كله من ورثها عود من يشتغل حاكم و يتوفك يوفي فلوسها . 
– عليش يوفيها جا غير مرته 
جاي نحجي ، صف الشيخ ووياه الخاتون وايمان وراه ، لبست حبوبتي العباية و امي ما طلعت ولا شافت ، رحبت بيهم حبوبتي ، و ابوي يكلهم : تفضلوا تفضلوا . 
ايمان : دخلت واني اباوع ع البيت ، حلو بس مو مثل احسن من ذاكه اللي بيه طنطن ، يخوف جان ، هذا حلو طابوك و الكاع مالته زينه . 
نزلوا الغراض و عمتي  حسنية واكفة و تحجيلي : لا تخلين احد يدخل لبيتج ، لما يطلع زوجج من البيت اقفليه . 
– اني اثق بس بهدية منهم . 
– هدية اعرفها خوش بنية ، بس يسرى و شاكلتها لا تخليهم ، يروحون يأذوج . 
دا نحجي و اجا السيد اللي طلبه الشيخ ، دخل و قرأ سورة ياسين بصوت واضح بالبيت ، و كال النا : تخلون القرأن مفتوح على سورة يس للصبح و بكترة شمعة، و حدر كل سكف بالبيت تكتب (بسم الله الرحم الرحيم ) خاطر الجن ما يتكرب ويو تكرب ما يكدر يطلع لبشر ببركة اسم الله، اوقات الصلاة ارفعوا القرأن بالبيت ، انتم تقرون ، مسجل اعلى كيفكم لجن زكوا البيت بأيات الله . 
وكتب النا حرز ووصى حاكم يحطه بمكان ما توكع عليه عين، و حتى ع الباب الخارجية كتب . 
بقت عمتي توصي بحاكم هواية ، بس حسيته تضايق كلش ، كام يجاوبها اي و اي ، و يفرك بركبته . 
فندست عمتي كلت الها : عوفي بعد لتحجين وياه هو ممقصر وياية بشي ، يحبني 
– الحب مو كافي الواجب عليه يحميج قبل ليحبج و يعرف اللي مكعدهم ابيته شنو . 
– هي بس يسرى 
– ومنو غيرها ، كواغد اعرفها مرة تخاف الله و طيبة ، بس هذه مشكله لازم تتحذرين من عدها وافتحي عيونج كلش زين حتى متغافلج و تسويلج شي . 
-تمام . 
كملوا تنزيل الغراض و الشيخ بقى يوصي بحاكم و اني اباوع بالبيت و افتر ، طلعوا كلهم اجا يمي : هاا 
– راحو ؟ 
هز راسه بمعنى ( اي ) 
– غرفة النا و غرفة لأمك و هنا المطبخ ، نحط التلفزيون هنانه ؟ 
سوا حركه بمعنى (بكيفج ) ، سكتت، حسيته متضايق ، ظليت افتر و اعدل بالمكان و هو كاعد و يشرب جكارة . 
– اني وحدي ما اكدر انظم كل هذا اشون 
– باجر يجي نجار و ينصب الاخشاب . 
– ومي ؟ 
– ماي ماكو تأسيس خاطر اسحب 
– انت شبيك ؟ 
– ما بيه شي 
– لا بلي دا تحجي وياية بوجه ناشف، اني شنو سويت ؟
– ما سويتي شي لجن جنتي تكدرين تكضين عمتج و ما تخلينها تحجي وياي هيح ، و ما اظنن يو طلبتي مني بنفسح اردنج .. بالاول و الاخير الفلوس فلوسج انت حرة بيهن 
– ليش تكول هيج اني والله كلت الها متحجي وياك هيج بس هي متضايقة عليه لإنو اني ضجت من مصدكتني . 
-هز راسه 
تقربت يمه : هسه اني شسوي حتى متزعل ؟ 
رفع راسه ، باوعلي، ابتسم و دار وجه ينكث بالجكارة بأصبعه : ما عدي شي وياج بويه ، لجن الخاتون زودتها وياي ، وانا اتحمليت لخاطرج. 
– بعد ما احجيلها والله . 
– الله كريم ، ياله كومي خاطر نلم شغلنا 
– وشلون انام والغرفة ممنصوبه ؟ 
– نفرشلنا هنا فريش وندبرها ليما يطر الصبح اغبش اجيبن نجار  . 
كمت اجر وياه و اعدل ، حسيته يتحرش هواية بس حجلت محجيت ، اخيرها كال : هدي من ايدج خلينا نستراح ، انا تعبان . 
فرشت فراش ، و اني مدنكة ، سحبني وكعد و كعدني على رجليه : اكوووم 
– اششش ظلي 
– شرايد 
– تكليلي شرايد ، ولج ابو ابوي مستلك صالي ١٠ تيام اروحن منا و اجي منا و انت موش راضية تردين 
– انت مشفت اللي شفته بذاكه البيت اشكال تخوف، بهاي عيوني شفت يسرى و هي تاخذ الطفل هلكدوته ، اخذته مني. 
– هم ردينه لسالفة يسرى ؟ 
– انت ليش مدا تصدكني ؟ 
-انا مو ما مصدكج لجن كاعدين خلينا من هالمواضيع.  
حجه و هو ياخذ براسي و يقربني منه : اشتاكيتيلي ؟ 
– اي هوايه 
– كليلي احبنك يحاكم 
ضحكت : احبك 
– موش احبك .. احبنك . 
– ليش ؟ 
– علييييش ، انا اكللج من عبن احبنك تطلع من سباح الكلب . 
– يعني سباح 
– اهيييي ، جا هسه نلتهي نترجم يو نتحبحب . 
ضحكت و هو يصيح : اييي دكربي مو حركتي افادي بت الاوادم . 
(القصر ) 
ملوك : شنهو الراي ولكم ، ابن ردحة جاي يلعب بعكل الشيخ ودهونه ، جا شسوي بعد و ابعدنه ؟ 
كاطع : هاذ  صار ما ينجرع بعد ، لزوم نتصرف . 
زناد : جا شحال انا البوي يكلي بوجهي اخوك احترمه و يخلف عدي بخير ، هيسيت روحي مالي كدر كلش . 
ملوك : انا و سرحان و الزمن طويل اعلى كص ركبتي يو صار شيخ 
كاطع : جا شيمنعه و الشيخ مفضله ؟ 
– اذا ابني العود مكابل الجامع و يطك ركع وهاذ يسرح و يمرح و حاط الشيخ بجيبه . 
زناد : جا شلون ابطل اروحن للجامع و هو مالت ابوي و موصيني اعليه ، اعلى ظنتي ابوي متعارك ويا سرحان ، انا اعرف بعلوم سرحان و دسايسه و ضمايمه . 
– بس خلوني اصفنلها ، الا اوهدنك يبن ردحة بس صبرك علي . 
دش الشيخ و الخاتون طلع كاطع بسرعة .. حجه : عجلو بغشاكم و انهدوا سرحان و امه اعلى العشا و بلغوهم ، وكت اليصير الامل يدشون للقصر ياكلون ، سالفة منعزلين انا ما احبنها . 
ملوك : جا شبيدا اذا ردحة ال ثجيل ما تود دشت القصر . 
الخاتون : لو صحتولها على الأكل و حجه الشيخ مترده ، اني هماتين ممرتاحة بالقصر وسرحان منعزل عنه ، ياريت يكابلنه وقت الأكل. 
اندار الشيخ للخاتون : من كونه هو موش ابنج لجنج بريتي بي و حسبتي ابنج . 
الخاتون : سرحان هدية ربي اليه ، و الله يعلم شكد احبه و ما الي غيره ، بس هالأيام هو مشغول عني ودا اشتاق له هوايه ياريت نكابله على الأكل . 
ملوك ما عجبها الحجي، كامت : انا اروحن اوصيهم اعلى العشا.  
كملوا العشا و طلب من سرحان يحضر ، و اجا هو وامه بس بقى روحه منعزله لراحة باله ، من عبن كعدته بالبيت ما تجيبله غير ضيجة الخلك ، خصوصا بعد ما هدية بطلت من القصر ما كام يطيك كعدته ، من يدش يختنك و هو يتخايلها و ما يلكاها ، ما يطول ويطلع . 
و ظل ما عده غير الشط يشوفها اعليه يومية ..
ورغم تحذيرات الشيخ من ال ثجيل ال سرحان ما رد ، و ظل كل يومين بحجة هم اهل امه ، ياخذها ويمر اعليهم و يحاول يبدي صلح بيناتهم بس ما طارح الموضوع . 
اما بيت حاكم فأمورهم بدت تمشي طبيعية .
ايمان ابيتها و صاكة الباب ٢٤ ساعة وكاعدة، بس هدية تمر الها لو تبات يمهم مرات . 
كواغد بعد موت ابوها اعتزلت كلشي .. 
قوعت على نفسها ، بطلت من القصر ، وكاعدة بحجرتها يا تنعى يا طلع لبيوت الوادم تقيم مجالس و تبجي على ابوها 
الشيلة لحد حواجبها و ويا حداد حلكها ، وحزينة ما تضحك لعزيز كلبها ، حتى حاكم لو مر عليها ما الها خلكه عبنها حزينة على ابوها . 
حاكم من شاف ليلة ليلتين اجاها و ما  كربته ، هم  كطعما كرب بعد .. يمرلها عصريه يكعد وياها وفضت ، كل راحته و كعدته صارت ويا ايمان . 
مرت ٥ اشهر … 
و امور هالديرة اعلى حالها 
الا يسرى .. مرت هالفترة و هي مو على طبايعها .. 
خانسة و ما تحجي بس لو اجا الليل صياحها للضالين .. كوابيس ما تفاركها . 
لما كبرت بطنها اخذتها كواغد للجدة و كالت الها: حامل اعليها ٦ اشهر .. وحالتها كل ما جالها بالنازل .
حاكم هالفترة التهى بالمعمل ويا سرحان، ما صار عده مجال ياخذها ، اخذتها كواغد وراحت للسيد .. دلاها على بيت يفتهمون حالتها ، و اخذت يسرى ومشت . 
عاينها الشيخ داورها ، دنجت اعلى الشيخ : ما اريدن احد يعرف بحالتي دخيلك . 
ابتعد وهو يهز راسه ، حجه ويا كواغد : انطريها برا بلا امر اعليج . 
كواغد : جا شنهي هو سر غير ارد اعرف حال مرت ابني شمالها يو اجا الليل وكضته ثغب و نياح.  
– ان شاءالله تعرفين بس اترخصج هساع اعالجها لوحيدها ما اريد احد يأثر علي . 
كواغد : طلعيت و انا اهزن بيدي ، لجن ظلت ابلي سويلفه ، هي عليش شاورته ، الزوم السالفة بيها إنه ، وكفت و انا اتصنت اعليهم وينشدها معاشرة ؟ 
ياااع معاشرة شنهي هاي ، شتعاشر .. يا خافنها معوشرة وهاذ يرطن اعوج  ، دخيل بختك يشيخ جا هي بنص حبالتها حتى ابطينتها ما ادهربت ولا بينت منيلها معوشرة ، يو ما وصاني اعليك السيد فلا اطبنلك . 
رديت و انا اتصنت اعليهم ، يكللها : ما يطلع عدج فريخ صاحي، الوليد اليصير عدج ينجتل ويموت و البت ما تطلع سالمة . 
و هي تبجي و تكله : شيخ دخيلك شسوي . 
– ياع .. شمالها هاي 
شلت البردة و دشيت اعليهم : ها يسرى شنهي الغضية ؟ 
حست دموعها و تكلي : يكلي عدج تابعة 
واندارت اعليه ، وهو عاينلها و دار عنها ، حجه : انا راح اكطعلج لجن مثل ما خبريتج . 
– شخبريتها جا غير نعرف 
الشيخ : حجية انا خبرتها بحالتها 
يسرى تندس بكواغد .. و هاي صافنه : يااا جا شلون هسه ؟ 
اخذت يسرى وردت للبيت ، اول ما دشت حجرتها يسرى ، سمعتها تصرخ ، ركضت هدية و كواغد و ام حاكم للحجرة خاطر يعرفن شمالها 
– خايبة افتحي الباب، شبلاج دفكي 
هدية : صياحها موش خالي يمه 
– جا انا اعرف شمالها ، فوك ضيمي تعلاوة ، انا ساعة العرفت الشيخ عرفته موش زين .  خايبة فكيييي 
نردين نفك الباب اعليها مامش 
طلعيت للشارع و انا انده ، خاب كتلها ( جميرة يمه اركضي اعلى ابيج خل يجي بساع ) 
راحت للبيت مالت ايمان ، فتحت الباب و لنه حاكم متمدد توه جاي ، صاحت : بويه الحك بويه يسرى جاي تصيح وتبجي بحجرتها و الباب مسركى اعليها .  
فز من مكانه و كام يركض : شمالها 
– ما اعرف تعاااال 
طلع وايمان صكت الباب حيل وراه . 
دش للبيت ،و سمع صريخها ، كال الهم : ميلو عن الباب 
وكام يدفر بيه بقوة ، الى ان انعوج مكان السركي و طك .
فك الباب ويا ما دش يسرى خرت من طولها و طاحت ، تراكضوا ليها : يسرى ، بويه فكي اعيونج شمالج 
– البت حبلة خلنا ناخذها 
– وين ناخذها ، دشيلي وياي 
تكابلنا اعليها انا و حاكم و شلنا ، و ركضنا بيها للمضمد ، اطاها جم حبايه و ردينا للبيت ، وهي فاكدة ما تحس اعلى احد : شمالها هاي 
كواغد : جا انا ادري ، غير اخذتها اليوم ومشيت و ما خلاني اعرف حالتها ولا عي سولفتلي شمالها ، يكللها تابعة 
– شنهي تابعة ، عليش 
– على خلفتها مدري اعلى حبالتها .. والله ما ادري 
حجيت و جريتها خاطر اعدلنها ولني اشوف الزراك العلى خدها . 
ظليت اتنوع الها ، وجديت و اشوفن بركبتها هم زراك : خايب حاكم تعال ليه 
– ها 
– هاي شمالها البت زركة
– اعوذ بالله ، ميلي عنها ولج خافنها مرض معدي .
– يااااع ، ميلي عني . 
حاكم : انا اكولن ناخذ البت و نهدها عد اهلها اخيرلنا . 
كواغد : جا روح انده لبوها و اخوتها خاطر يجون يعانونها وياخذونهاة
– هو ابنج وين مرته ماتت و عدلته و هو موش داري بحد . 
– ما تعرف كاض بذيال خاله جبار ويشتغل وياه ، و ياخذ هاليطلع من ايده . 
انا اروحن اعلى بيت ابوها .. اشوفن شنهي الراي و اجيبنهم . 
كضيت روحي وطلعت من البيت وانا مدوهن بسالفة هالبت ، منين طلعتلي .. امشي و ادرم ويا روحي . 
طلع بوجهي خنجر ، صاح : هااا حويكم 
درت ليه : شمالك 
– جا شنهي بحلكك عظم ما تسلم 
– ما اسلم اعليك ولا اريدن . 
هديته و مشيت اعلى ال ثجيل خبرت ابوها ، و كال انا جاي وراك ، رديت وانا اجيبنها منا واردنها منا .. مدري اعلى سالفة يسرى ، لو سرحان الجايب خنجر النكري و حاطة بيناتنا ويريده يشتغل بالمعمل ، بالله هاذ شنهو و نشغله ؟ 
كله شغله خاوات و بالليل ركص و كيوليه و شرب ، هيج بشر شلون يأمن بيه سرحان و يخلي اعلى باب رزقه . 
اخخ يا سرحااان اخ يو بس تسمع كلام، جا انت بخير ، الشيخ يو عرف مشغل خنجر الا يحز بلعومه ، بس يرد سرحان ؟ ماخذ الدنيا بحيل صدر وما حاط احد اباله . 
رديت للبيت و البت بعدها مضعضعه و حالها ما يسر ، شلون بالله انا ابتليت بلوة بهالنسوان، الله ما اطاني ولد غير ستير ، جا غير يكول ابوي يعتازني ويرد لا ما ينزل الليل و الشمس يغيب ضواها ما يبين استير و حاط حملة فوك ظهري ، خوبن البت حبلى وراح تجيب وفوك الحمل تعلوة ، خاف مبتلي بيه و ابمرته ، هساع ابزره هم .
كواغد : ها ؟ 
– شهاا ، ندهت ابوها و خبرته، كال هسه امرن اعلى امها و نجيكم، و هالرديت انطره . 
ساعة و اجا ابوها و امها ، تسودنوا من شافوا حالهم ، كاموا يخرطون بالحجي تخرط ، خاب كتله : شوف تاخذ بتك و تستر اعلى الموضوع تراها روحي واصله الهامة . 
حجت امها – بتنا ما جانت هيج ، جانت جنها الكمر ، شويتولها وهيج صار بحالها . 
كواغد : بتكم تتكوبس واللليل كله تصيح وتبجي و احلام موش زينه كاضيتها ، انا خذيتها الشيخ و يكلها تابعه، بعد تنا شسويلها ، اخذوها يمكم وراعوها ، انا من موتت ابوي مت عيني اعليه و عيوني ما كامن يوجدن عدل و البت عارضها ايدها ما تنشال وانا موش حيلي الأولي .
ظلينا نترادم بالحجي ليما فضوها و اخذوا البت وياهم . 
ايمان : ها ؟ 
هدية : خذوها لاهلها 
– بيها طنطن ؟ 
– ما اعرف بس موش طنطل لجن يكولون تابعه 
– شنو تابعه 
– شي مو زين لا تسمعينه 
– لا يمه اخاف اخاف، ما احجي بعد . 
– هديني من سالفة يسرى ، انا حايرة 
– لويش ؟ 
– ابوي يريد يأسس و يسحب ماي 
– اي واذا 
– جا يو سحبنا ماي ، منين بعد اشوفن سرحان ؟ .
-هو شوكت يخطب ؟ 
– ابوه ما موافك اعلى عرسنا و ما رايدني السرحان 
– لويش ؟ 
– من كون بيت عمي ناهين اعليه ، جابليني و كليلي شسوي ؟ 
– والله ما اعرف ، احجي وياه ، الى متى يبقى ساكت ، هيج و بيت عمج قرروا ياخذوج شراح تسوين ؟ 
– امدوهنه ولج اسكتي ، كل ليلة تمر علي ما انامنه ، كل ساعة حسبة ابالي تمر شكل ،  واتيه اعلومي و اضيع ساعتي . 
– باجر من تشوفيه ، احجي وياه 
– شكلله ؟ 
– كليله ابوي حجه بسالفة ابن عمي و يمكن رايدني اله و اني لو حجه وياي ما اكدر اكله لا ، اخاف لا يشك بيه ، و خليه يستعجل . 
– ما اعرف شسوي . 
دخل ابوي ، كمت اعلى حيلي و انا اخفي حيرتي و هضيمتي ، لجنه حس وكال : ها بويه هدوة شمالج ؟ 
– ما بيه شي ، راحو بيت عمي 
– اي راحو 
– جا انا اروحن 
– هكو شي ؟ 
– لا بويه لجن انا متضايكة اعلى حالة يسرة ، قهرتني . 
– ما بيها شي ان شالله . 
رديت للبيت و انا الف حسبه ابالي، دشيت لكيت امي حاطة اعبيتها اعلى راسه و تريد تطلع : وين ؟ 
– اشوفن هاي الكاع اعاينها ، من كون ابوج قرر ياخذها . 
طلعت ويا امي وانا منشده بالي، هي تسولف هنا نزرع و هنا نشتل و هنا نحط .. و انا بالي ابعيد عنها وما افرزن حجيها شكالت و شحجت ليما زمخت بيه 
– شماااالح موش احجي وياج 
– ها يمه ؟ 
– صالي جم يوم كلبي موش مرتاحلج يهديوة ، هكو شي ؟ 
– لا يمه مامش 
– جا بيش بالج سارح 
– هيج افكر ، من كون شفت بالتلفزيون مالت ايمان فلم حلو ، و انشد عليش ما نشتري مثله 
– من شيب ابيج نجيب ، ما عدنا غير هالفليسات ذن د
– اي خل نشتري 
– و نهد الكاع ونشتري تلفزيون خاطر هديوة خاتون تعاين و توچد 
– جا وشمالني 
– لونج ردتي تضيعينها لجنها ما ضاعت يهديوة و اعرف الشاغل بالج موش تلفزيون . 
– شمالج يمه 
– عبني امج و اعرفج ،  موش اعلى طبايعج ، سولفيلي عليش تضمين اعليه . 
– ما ضامه شي ، انا اروحن 
حجيتها و انظاريت امشي حجت : يا خبر اليوم بفلوس باجر بلاش، لجن لو صار بلاش يضرج يو ينفج ؟ 
مشيت و ما رديت . 
دخلت و كعدت … جمارة فاتحه كتبها و تقرأ ، كعدت هلبت الكفلي حرف منها اتعلم ، جلمه .   
كامت تعلمني و تزمخ اعليه ، خاب كتلها ما تولين مني 
مديت فريشي و سرحت افكر بهواي من كون دلالي موجر ، ساعة اكول اصبر العمر كله و ساعة اصفن اشوف السعة البلياه كوة تمر . 
ظليت اجيبنها منا واردنها منا .. عليش اوهدنه و اخليه يستعجل خله يوازن اموره ليما يحلها .. بس انا ما اصبر ، يو ابوي سحب بماي شلون بيه ؟  ، انا يو ما شفته يوم ما احمل روحي تلوب اعلية لوبة سمجه اعلى الجرف بلايا ماي . 
باجر اكلله بيت عمي حجوا بسالفتنا و اخليه يستعجل ، هلبت يحلها ، اشوفنه توانه وحلتله يوميه اطلع و يعايني و جن خذاه الواهس ونسى سالفة العرس. 
ظليت امخمخها وارتب السوالف براسي خاطر الصبح يو طر اطلع ليه و اعرف شكلله ما اتوهدن . 
نمت ليما طر الفجر و سمعت صياح الديج كمت اعلى حيلي خذيت المسطحة وطريت الدرب ، ليما وصلت غاد . 
ما لكيته .. تضايكت حيل : شنهي اليوم شو مامش سرحان ، جا اعلى حظي من ردت احجي بسالفتنا ما اجا. 
حطيت الجرة و كعديت انطر اعلى الشط ،  ضاكت روحي من النطرة ، كمت اعلى حيلي اخذت الماي و مشيت . 
شوية و هيسيت احد لحكني ..  ما درت راسي 
همس : اصباح الخير يهدوة 
– يا صباح. هاذ وانا انطرنك و انت مامش 
– وعلي اخذني النوم و فزيت اعلى حيلي، و جيتج بلا غسل والله . 
– سرحان انا اهيسك موش ذاك الاولي 
-اهااه عليش تكولين هيج
– ما مهتم بموضوعنا 
– شلون ؟ 
– مستسهل الامور و ناسي انا منهي اعليه و الزوم تستعجل 
– جا انا شنهي البيدي يهدوة ، لجن وعلي ما تغيبين عن بالي ساعة ، بس هالايام مشغول بالمعمل و اكضي الليل شغل ووكفه من كون كربت افتحنه . 
– وليمتها راح نظل هيج 
وكف حصانه : انت متضايكة مني يهدوة ؟ 
– تريد الصكد 
عاين عليها و فز من حصانه : اي 
– انا متضايكة حيل منك من كون متهاون 
– عليش تكولين هيج ، تعرفين الوضع و حال ابوي ويا ال ثجيل، الامر موش بهالبساطة ويعتاز له طولت خلك . 
-عمامي ما ينطرون ، و امس حجوا بسالفتنا 
– يا سالفة 
– عرسي من ابن عمي 
انتفض : عرسج شنهي احجل عدل عليش تسمميني بهالحجاية . 
– جا شكللك يسرحان . 
-نزلي منا ، بس نحجي 
– ما اكدر اتاخر اخافن لا احد يشك بيه 
– جا انت سممتيني و تكليلي ما اكدر، امشي بس افتهم البالج شنهو خاطر ارتاح . 
اخذها و نزل من الشارع ع البستان : شنهو شصاير 
– امس اجو بيت عمي 
– اي 
– و حجوا بالسالفة 
– ارفضي 
– انا ما اكدر اكولن لا 
– شنهي الحجي هاذ يهدوة ، جديد ما سامعه كبل .
– يو كلت لا يشكون بيه 
– محد يشك دام الامر بينا
– ويو دروا 
– لوكتها انا احجي ويا ابوج ، انا ما بايك رايدج بالحلال لجن اموري موش 
– لوكتها شنهي يسرحان ، انا تعبت انطر 
– انا ما غشيتج يهدوة و كتلج دروبنا طويلة و ايدج ما اريدنها تطيح من ايدي ، عليش تعبتي 
– وليمتها 
– انا بس يو اعرف شنهو المضايكج جا ارتاحيت . 
– المضايكني بعدك ، انا فراكك ما احملنه و علي ما احملنه حنضل مر ما ينجرع . 
– جا انا الرايد الفركة، يو عليه جا هسه ابني ابطنج و اسمج بظهر جنسيتي ، بس وعلي موش بيدي ، انا ساعة شوفج اتنطرها ليما يطر الصبح و من كثر ما انطر اغفى ولا ادري بحالي ، لجن والله ما مر يوم وما صحيت و اجيتج حتى يوم الما تجين انا اجي واكعد و انطر ثلث ساعات ليما ايس كلش ياله اكومن .. و ما مليت لجن ما بيدي شي وعلي ، الموضوع مو سهل . 
– تظن ثجيل يوافكون يتنزلون بالنهوة و يرضون بزواجنا . 
– حاليا لا ..
– جا شناطر ؟ 
– شيريني و كليلي شنهو الاكدر اسوي غير اجاري الامور 
– الامور ما تجري ولا راح تصح . 
– ما ظل جدامنا غير حل واحد 
– شنهو 
– تتفق انت وابوي اعلى الخطبة و تاخذني ونمش لغير ديرة . 
– الامر موش بهالسهولة، هيج اهد دمي و دمج و عار اعلى ابوج واوهدن ابوي و عمامي و عشيرتي بثار ما يخلص . 
– خايف 
– جا اذا ما اخاف اعليج و اعلى سمعة ابوج و دم اهلي عليمن اخاف ؟ . 
– انا اروحن 
– هدوة . 
– سرحان انت ما بيك صوج اعرف وما بيدك شي ، لجن وعلي تعبت ، خليني اروحن 
حجيت و بجيت ، تسودن : انت عليش تبجين 
-انا تعبت من فراكك 
– دموعج تيزاب اعلى دلالي ، لا تنزليهن اعليج العباس ، انا اوعدنج احلن الامور ، لجن لا تراويني ادموعج من كون احمل ضيم هالدنيا كلها و دموعج ما احملهن . 
حسيت دموعي : انا حيل اتأخرت، اروحن 
– هدوة 
– هاا 
– عليج العباس اوعديني ، ما تبجين مرت الاخرى . 
– من اشتاكلك يهملن لوحيدهن و ما يعزن اعليك . 
– انا احاول احلن الامور والله بس انت لا تبجين ، ما اريد اخرنج عبنج اتاخرتي ، امشي و طمني بالج . 
ردت امشي، عاين منا و منا مامش احد ، كرب ليه و حبني بكصتي، وجر نفس ترس ريته وتنهد : احبنج والعباس احبنج . 
ابتسمت ليه ومشيت وكلبي وجر اعليه . 
رديت للبيت ، اول ما دشيت ، كضتني امي : وين جنتي اهديوة 
فزيت : ها يمه .
– وين جنتي 
– رحت اجيبن ماي 
– امس ترست ماي كبل الليل . ..
– لكيته مخلص 
– سرحان شعدج وياه ولج ؟ 
….. 
سرحان : شبت النار بجسمي ساعة الشفتها بجت ، توهدنت .. و عكل ما ظل عدي ، ولا كم اهيس احد .. هدوة الترفه تنزل دموعها .  جا شكثر مأذيها انه . 
لزوم اباشر بالموضوع واطرح سالفة الشروة و اكل لابوي على شراية نهوتها . 
دشيت اعلى الديوان .. و انا بلا راي ، من كون اعرف جواب ابوي شنهو بس ما اكدر اسكت بعد و انا اشوفن هدوة يذبلها فراكي .. 
كعدت بالمضيف وابوي و عمي يسولفون و انا اعاين بوجه ابوي ناطر ساعة اليخلى بيها واحاجيه ، لجن مليت الكعدة و هم ما تكضي سوالفها ، ابوي فطن اعليه وشافني متزوهر بمجاني 
التفت : شمالك ؟ .
– رايدك بموضوع 
– شنهو 
-اعلى انفراد 
– كوم 
حجه عمي : لا لا ابو زناد اخذ راحتك انا كايم عدي شغل ، بس كون سالفتك يسرحان تسوى الكومة ، من كون طلايبك ما يكضن. 
ما رديت عليه، سلم و طلع ، اندار ابوي : ها سرحان شنهو الراي .
– بويه انت زلمه و تفهمني 
– السالفة يو جانت بيها بت حاكم اعذرني ما افهمنك .
– انا احبنها بويه 
– جوز من هالعشك يسرحان 
– جا تكل للغركان جوز من الماي ، غير يو بيده ؟ 
– جان بيدك و انت الغركت روحك . 
– انا رايدها و عزمت اعلى خطبتها . 
-مامش خطبة و محد يروح يخطب . 
– جا اعذرني بويه انا ردت انطيك خبر بس صبر ما عاد ظل حدر افادي و اصبر ، راح يصير سنه و انا عاشكها ، و حاكم رفيجي زحمة اعلى اشواربي وانا اواعد بته لجن ما بيدي حيلة و كلبي موش بمري . 
– الزلمة الما يعرف يكض كلبه وتسيره عواطفه ، هاذ موش زلمه 
– انت كول بيه شما تكول انا راضي لجن بس اخطبها صبر ما عاد عدي . 
– الموضوع هاذ ناهينه الحجي بيه ما منه فايدة ، و انا البالي عدك سالفة و مدوهن بيها طلعت بت حاكم ، شمالك بويه بت تخليك تتراجف و ما تكض روحك ، البت هاي انساااها انساااها . 
– و اذا كتلك ما اكدر .
– جا ظل اتعذب ولا تظن تخطبها و يو خطبتها و علي يا سرحان لتبرى منك 
– انت عليش هيج معقد الامور خلني اودي طارش لا منا ولا يكربنا و يعرض اعليها شروة النهو ويو بيش ما تصير انا شراي . 
– لا توهدنا ويا ال ثجيل بويه ، ابعد بعد ابوك . 
– تراك شليت حالي بالقران جاي اكلك انا البت عاشكها ما اكدر 
– غصبا اعليك تكدر و غصبا ما على شاربك تكدر ، و يو سمعت غير هالحجي ……….
جاي نحجي و دشت بت : شييييييييييييييييييييييخ انا ادخييييييييييييييلتك شييييخ 
فزينا اثنينا  ، وكفت بنص الديوان و طرت سترها بنصنا ، تسودنا ، رادوا الحرس يدخلون ، صاح الشيخ : حدكم 
و انا شلت شماغي و حطيته اعلى راسها و صحت : ادخيلة و بمان الله ، كضي سترج يمره . 
وسترتها 
وشلت حجابها من كاع و انطيته للشيخ و هو يصيح : حميد حدك الباب ولا ادش . 
طاحت البت عد رجلين ابوي : راح يكتلوني شيخ راح يكتلوني ، ادخيلة الله و ادخيلتك اناااااااااا 
– بمان الله بويه انت اعلى عكالي محد يكضج ، احجي 
وشالها من رجليه 
– اتعدى اعليه زلمه و ما خليته يواطيني ، و فتنوا عد عمامي و عازمين اعلى جتلتي و غسل عاري ، و الحسين ما غلطت ويا احد والله بكبره ما غلطيت ويا احد . 
اشتعل الرمي برا و صاح : يا ااااااااال ضاحي هاااااااا 
التفك متجيهن بزاوية المضيف ، انداريت ليهن ، حطيت اعلى جتافي و شلت ٤ و سلمتهن لزلامنا بالباب و ابوي يريد يطلع و البت ترجف و الدموع تجري و تصرخ : راح يكتلوني  شيخ راح يكتلوني 
طلعت انا وكفت برا ، طلع الشيخ و حجه ويا حميد : ودي اعلى ٦ نسوان من القصر بسع يااااله . 
نزلوا عمام البت ووكفوا : البت يشيخ . 
– البت براية الله و برايتنا و اليكضها خله يدوس عتبتة مضيفنا و يتخطاها ، و اليتعدا مضيف ال جلوب ، النار تلاوي و تلاوي عشر من اجياله . 
– البت فاسدة يشيخ و عار اعلينا 
– البت ادخيله يبن الاجاويد ، امش وانده عمامك ، البت ما تتسلم الا بيد شيوخكم، ورايتها البيضة بيدي . 
– شيخ احنا نعرفك و نحترمك بس هاي عارنا و لزوم نغسل عارنا . 
– و صارت ادخيلتنا و عرضنا ، امش ياله 
حضروا ست نسوان من القصر … اندار الشيخ و كال الها : بستر الله بويه امشي ويا النسوان لقصري . 
– اخافن ، شيخ دخيلك اخاف يكتلوني 
سرحان : اليدش كاعنا لا يحط الخوف اعلى باله ، امشي يا مره و صدورنا دروع . 
لفينا و انطينا ظهورنا وطلعت ، صاح عمها : جروها 
شلنا التفك من الأيد اليسرى حطيناها اعلى الميمنه و سحبنا اقسام ….
يتبع …
لقراءة الحلقة السادسة والعشرون : اضغط هنا
لقراءة باقي فصول الرواية : اضغط هنا

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى