 |
| رواية مهمة عاشق الفصل الخامس والعشرون 25 بقلم خلود وائل |
رواية مهمة عاشق الفصل الخامس والعشرون 25 بقلم خلود وائل
طلعت شمس تاني يوم وليلي في بيتها بتجهز شنطتها وبتستني علي وحسام كلهم هيتجمعو قدام بيت ليلي ويطلعو سوا
ماهر:ليلي يالي لي متكلمي حسام تستعجليه علي جه اهوة
ليلي بفرحه:بجد علي جه
ماهر:مالك منشكحه كدة ليه لا مجاش بلعب عليكي
ليلي:انت اخ مش جدع علي فكرة
ماهر:لا انا جامد زوحليقه
ليلي:طب وسع كدة ياعم زوحليقه اما اعدي
ماهر:كل دى شنطه ايه هتهاجري بلجيكا
ليلي:بس يابابا عدي من هنا دي حاجتي انا ومامتي وببايا حبايب قلبي
ماهر:طب وانا ،،،،امال خليتوني ليه اعمل شنطتي لوحدي
ليلي:هو انت متعرفش ان بابا لقاك علي اول الشارع واحنا مربينك معانا شفقه وكدة
ماهر:وانتي متعرفيش انك غلسه
ليلي:لا صراحه مخدتش بالي
الحاجه كوثر:يلا ياولاد علي وحسام برة يلا ياماهر شيل الشنطه ياحبيبي
نزلت ليلي وبباها ومامتها وماهر وسلمو علي حسام وسلمي وعلي واخته وبباه ومامته
الحاجه منال:وحشاني ياكوثر والله تعالي احنا بقي نركب سوا مع حسام وسلمي
ماهر:وانا مع بابا وعمي محمود هسليهم طول الطريق
نهي:وانا مع علي وليلي
الحاج مصطفي:طيب يلا ياولاد علشان منتأخرش ولو بعدنا عن بعض انتي عارفه الطريق ياليلي
ليلي:طبعا يابابا يلا بينا
ركبو كلهم العربيات وطلعو علي الطريق وبدأت رحلتهم ال كانت طول الطريق ضحك وهزار من القلب
ليلي:شفت الصدفه لولا ماما منال مكنتش ركبت معاك
علي بتصنع :اه فعلا سبحان الله
مدت نهي ايدها لعلي وضربو كفهم في بعض
نهي بمرح طفولي:معاكم منسقه الصدف نهي محمود سابقه اعمالنا بتقلك مين احنا
ليلي بتهكن:لا اوعي تكوني انتي ال اتفقتي مع مامتك
نهي:اوعي تفهميني صح يالي لي وانا هطلع اخت جدعه ومش هقولك ان الموضوع تم بالتخطيط من البيج بوس دة وشاورت علي علي
علي بتصنع البراءة:انا يابنتي 😂 داانا غلبان
ليلي بضحك:اممممم مطلعتش سهل يالولو
علي:لولو ايه لولو دي انا حضرة الرائد علي الناهي ظابط من أكفء ظباط المخابرات واسمي له وزنه يتقالي يالولو ياشماته طنط ظاظا فيا
نهي :طنط ظاظا مين
ليلي بمرح:اسكووووووت😹
ضحكو كلهم مع بعض وقضو الوقت كله هزار وضحك…وبعد ٣ساعات رن تليفون ليلي وكان حسام
ليلي:ايوة ياحس
حسام:لولو بقلك
ليلي:قول يابيبي
حسام:ماهر مراهني علي ٣٠٠جنيه انه هيوصل قبلنا واننا هنخاف من ابوكي ومش هنسبقه
ليلي:وبعدين
حسام:بصراحه الواد دة غيظني وعلي طول مقلبني في الرهنات ومامتك راكبه معايا ومخلياني ماشي علي قشر بيض وكمان عشان سلمي والحمل
ليلي:ها ف انت عايزني اخلي علي يسبقه مثلا
حسام:بالظبط بس عاوزك اول ماندخل البلد تاخدي الطريق بتاعنا فكراة
ليلي:طب لو وصلت قبله
حسام:ماديه قذرة
ليلي بضحك: الله ياحسحس بقي فيفتي فيفتي ياأما خليه يعلم عليك قلت ايه
حسام:امري لله سلام
ليلي:سلام
علي:حسام عاوز حاجه
ليلي:اه عاوزنا نسبق ماهر علشان متراهنين مين يوصل الاول
علي:سهله دي سبيها عليا
ليلي:ياواثق طب متعلمني السواقه علشان خاطري
علي:من عنيا الاتنين حاضر
نهي بضحك:ذي ماعلمني كدة
ليلي:بتعرفي تسوقي
نهي بتصنع مضحك:يعني سواقه كلابي كدة😂
ضحكو كلهم من كلام نهي ووصلو اول طريق البلد وعربيه الحاج مصطفي هي الاول وماهر بعت رساله لليلي فتحتها
-حاولو تقلدونا بس عمركو متحصلونا🤘😛
بعتتله ليلي
-ياربي علي السرسجي شغل رخيص اوي بس هتوصل تلاقيني هناك
-اممممم هتدفعي ذي اخوكي متحاوليش تهربي
-من عنيا حااااضر اوماااال😹😹
قفلت ليلي تليفونها وبصت لعلي
ليلي:ادخل اول شمال يقابلك
علي:بس هما ماشيين علي طول ممكن اسبقهم لو عاوزة
ليلي:لا هنستخدم عنصر المفاجأة دة طريق مختصر كنت باجي منه انا وحسام لما نكون متأخرين هنوصل قبلهم ونشرب الشاي كمان وهما هيحصلونا
نهي:يااااه طب وماهر ميعرفوش
ليلي:لا كان علي طول نعسان واحنا جايين وكمان الطريق دة اكتشفته صدفه انا وحسام لما كانو هما بيجو يباتو وانا كنت ببقي في الجامعه وحسام يجي ياخدني،، ادخل يمين ياعلي
علي:الطريق دة مفيهوش بيوت كله اراضي زراعيه هنتوة هنا
ليلي:عيب عليك انا معلماه بشجرة
علي:نعم
ليلي بضحك:يابني متخافش
نهي:هما اهلك دول صعايدة بقي وكدة
ليلي:صعايدة في الدقهليه اذاي يانوني لا متقلقيش دول ناس عسل خالص هتحبيهم اوووي
نهي:اكيد هيبقو عسل ذيك ياليلي
ليلي:حبيبه هارتي والله خدي بوسه😘
علي: احم
ليلي: احم ….خد الطريق لاخرة ياعلي وبعدين ادخل
يمين
علي:زمانهم وصلو يابنتي واحنا هنتوة هنا الوقتي
ليلي:خلاص قربنا نوصل اطلع بقي علي الاسفلت دة وادخل رابع شارع يقابلك
نهي:هو البيت نهو ياليلي
ليلي:البيت ال هناك دة اققف هناك ياعلي
علي:هو دة البيت
ليلي:تمام كدة وصلنا وقبلهم اهوة ياما نفسي اشوفك ياماهر
كانت واقفه في بلكونه البيت بنت قمورة بتستناهم اول ماشافتهم دخلت وبعدها بدقيقه اتفتح باب البيت وخرج منه اعمام ليلي واولاد اعمامها واطفال كتير وبنات واقفين في البلكونات بيبصو عليها ونزلت ليلي وعلي ونهي من العربيه واهلها بيسلمو عليهم بحرارة وفرحه وعلي كان فرحان جدا بمقابله اهل ليلي ونهي كانت محروجه وليلي مسكتها جمبها علشان مش عارفه حد فيهم
محمد عم ليلي:نورتونا يااغلي الحبايب اهلا وسهلا
ليلي:وحشني ياعمو اوي
مختار عم ليلي:ياالف نهار ابيض خطوة عزيزة ياعلي يابني منورنا والله
علي:منورة الدنيا بوجودك
جلال: امال الجماعه فين ياليلي يابنتي انتو جايين لوحدكو ولا ايه
ليلي:لا ياعمي احنا سبقناهم هما شويه وهيوصلو انشاء الله
محمد:طب اتفضلو تعالو ارتاحو عما يوصلو بالسلامه البيت نور
دخلو كلهم البيت ونزلو بنات عم ليلي وامهاتهم وعمتها وبناتها يسلمو عليها ويرحبو بنهي ال كانت مبسوطه بجو العيله ولمتها وقعدو يتعرفو علي بعض وبعد شويه وصلو اهل ليلي وعلي وقام اعمام ليلي يقابلوهم بحفاوة وفرحه ودخلو قعدو معاهم اما ماهر ال اتصدم اول ماشاف ليلي وعلي كان متابعهم في صمت
ماهر:انتي وصلتي هنا اذاي
ليلي: بالعربيه
ماهر:ليلي متغظينيش انطقي جيتي هنا اذاي
ليلي:اماانت عليك اسئله غير منطقيه والله ياميمو ياحبيبي
ماهر بغيظ:بت قوليلي وصلتو قبلنا اذاي
حسام:ادي الله وادي حكمته بس انا مقدر موقفك انا جربته كتير دفع الفلوس بيحرق جامد😂
ليلي:ادفع من سكات ياميمو بدل ماانت حر انا في حمايه الحكومه
ماهر:بقي كدة ياليلي
حسام:ادفع يلا ياحبيبي وبالشفا انشاء الله انا١٥٠واختك ذيهم
دفع ماهر الفلوس علي مضض وليلي وحسام كانو فرحانين جدا انهم اخير قدرو يغلبو ماهر في رهان اما علي فكان ميت علي نفسه من الضحك هو ونهي ال فاهمين الموقف كله…شويه وطلعت ليلي تغيير هدومها مع البنات ولبست جلباب بيتي انيق وطرحه بسيطه عليه وجابت واحد لنهي تلبسه هي كمان ونزلو يقعد مع الاهل علشان العيلتين يتعرفو علي بعض
ليلي :احم احم المايك معايا تست تست
كلهم ضحكو علي ليلي
ليلي:اوفر انا بقي عليكو انت مين وانتي مين وهعرفكو انا ببعض تمام
كلهم:تمام
ليلي:دة علي خطيبي ودة عمي محمود بباه ودي ماما منال مامته ودي نهي اخته اما مامتي وبابا واخواتي ف انتو عارفينهم من زمان وكدة يعني فهنمنتج الحته دي
كل الموجودين ضحكو من اسلوب ليلي الطفولي
ليلي:اما بالصلاة علي النبي كدة بقي دول اهلي وعشيرتي بمعني الراجل الحلو العسليه دة عمي محمد كبير العيله مراته الست الطيوبه دي ال باكل من ايدها احلي حله محشي وابنه الكبير جمال ومراته سلمي بردو ذي مرات اخويا وولادهم ياسر ومنه وابن عمي التاني مصطفي علي اسم بابا ومراته بسمه وبنته يارا القمر دي وبنت عمي هناء مخطوبه للبشمحاسب سلام الدويدي
اما عمي التاني مختار بردو اكبر من بابا ومراته طنط ميادة وابنه الكبير أحمد ومراته روان وولادة تمارا وعمر وايسل ودةابن عمي التاني أسامه وحاليا بيدور علي عروسه
دة بقي عمي جلال الصغير اصغر من بابا ومراته طنط سميحه احلي صنيه كنافه فيكي يابلد وبناته سلوي في كليه تربيه وايه ثانويه عامه وابنه الكبير محمود في كليه طب اسنان ودي بقي عمتي القمر عمتي عزة يعني الحلو يعني كيك الشيكولاته يعني الكريم كراميل يعني السهر والضحك لحد الصبح وبناتها ندي الكبيرة ودي متجوزة ومخلفه الواد الشقي دة ونيرة في كليه صيدله وابنها الكبير حماد متجوز ست البنات رحاب ومخلف كريم واكرم ودول تؤام واخوة الصغير يبقي مدحت ال قاعد هناك في اخر الدنيا دة وبس كفايه كدة علشان هبط وتعبت وعاوزة حاجه حلوة بقي
ضحك علي من قلبه علي ليلي وطريقتها هو والموجودين وعدي النهار وعلي راح ارض اعمام ليلي مع الشباب وكان بيشتغل معاهم بكل تواضع وكلهم حبوة واعجبو بيه وليلي مع الستات والبنات بيطبخو ويلعلبو ويهزرو وشويه وكلهم اتغدو وجه الليل والرجاله سهرانين مع بعض
محمد:انا ليا عندك طلب ياعلي ياابني وبتمني لو تخدمني فيه
علي:انت تؤمرني ياعمي
محمد:دة العشم ياحبيبي ،،عمك مصطفي قالي انك ظابط وليك مركزك مشاء الله عليك وكنت حابب انك تقبض علي عصابه قاعدة ومتربعه في البلد ومحدش قادر عليهم
علي بأهتمام:طب ومركز الشرطه ال في البلد ياعمي
محمد:بيخافو منهم ياعلي دول عصابه كبيرة ومداريين في البلد وبيستغلو طيبه اهلها وناسها ومفيش حد قادر عليهم وواخدين جمب في البلد وعاملينه وكر ليهم طب تصدق بأيه
كل الموجودين:لا اله الا الله
محمد:انا شفتهم بعنيا دول وهما بيفتحوصناديق مليانه سلاح ومخدرات واثآر وبلاوي كتير
علي:ياااه لا دة الموضوع كبير بقي
جلال:كبير اوي ياعلي يابني وياما كلمنا ظباط البلد بس مفيش فايدة ومنهم المرتشيين ال بيبلغوهم لو حد جاي يقبض عليهم
مختار:يابني دول محدش قادر عليهم وبقو خطر علي البلد احنا بردو ميرضيناش نبقي شايفين دة بعنينا وساكتين
علي:طب انا محتاج اشوفهم ولو من بعيد ياعمي حتي اعرف هتصرف معاهم اذاي
الحاج مصطفي:حد من الشباب ياخدك وتروح من بعيد تشوفهم ياعلي
الحاج محمود:بلغ القيادة ياعلي الموضوع باينه كبير
علي:لما اشوفهم بس واحدد هتصرف معاهم اذاي
جلال:يبقي في عز الليل لما الطريق يبقي مداري يابني وانا هبعت معاك شباب العيله كلهم
علي:لا متخافش عليا ياعم جلال انا بس محتاج واحد يعرفني الطريق وانا اشوفهم من بعيد وبعدين هبلغ فرقتي ونتعامل معاهم
أسامه:انا هوديك ياعلي
علي:شكرا ياأسامه
بعد فترة خلصت قعدة الرجاله والبيت كله نام وعلي وأسامه قاعديين مستنيين الوقت يتأخر علشان يروحو يراقبو العصابه وتليفون علي رن وكانت ليلي
ليلي:نمت يا علوتي
علي:انا بقول تقوليلي ياعلي احسن
ليلي بضحك:مااااشي بتعمل ايه كدة
علي:ابدا شويه وهنام وانتي
ليلي:شويه وهنام بردو
علي:هو انا المفروض اشوفك امتي واذاي طول النهار مع الرجاله وحتي الغدا انتي مع الستات ومش بشوفك نهائي اعمل ايه بقي
ليلي:اممممم عندك حق
علي:منا عارف ايه النصاحه دي
ليلي بضحك:بكرة انشاء الله هتصرف واققابلك وبالمرة احكيلك ذكريااتي في البلد هنا
علي:موافق بس تحكيلي من اول مااتولدتي
ليلي:لا انا اتولدت في القاهرة انا وماهر حسام اخويا هو ال اتولد هنا
علي:يعني انتو نقلتو قبل ماانتي تتولدي
ليلي:بالظبط كدة بكرة هحكيلك بالتفصيل سلام بقي عشان بينادولي وهنام
علي:سلام ياحبيبه قلبي ♥️
قفل علي التليفون وبعدها نزل مع اسامه وراحو راقبو العصابه وعلي صور المكان كله وال حواليه علشان يدرسه كويس واتفاجئ بل انه اتصدم لما شاف رئيس العصابه ال عرفه فورا ومكانش مصدق عنيه ورجع من مكانه بسرعه مع أسامه للبيت وهو ماشي لمح ليلي ماشيه قدامه ومخبيه وشها وكأنها خايفه حد يشوفها
