رواية دار الأيتام الفصل السابع والعشرون 27 بقلم أميرة أسامة
 |
| رواية دار الأيتام الفصل السابع والعشرون 27 بقلم أميرة أسامة |
رواية دار الأيتام الفصل السابع والعشرون 27 بقلم أميرة أسامة
ليل.. روح و حكى كل حاجة لوالدته اللي اتصدمت بس كانت من غير ما ليل يأكدلها من الصور انه مش نوح اللي عمل كده…هي كانت مصدقه ان ابنها لا يمكن يعمل كده…كان صعبان عليها نور والحال اللي وصلتله بعد موت ابوها…والصدمات مش رحماها…ورحبت بفكرة جوازها وارتاح ليل ان محصلش منها اي اعتراض….
اما جاسر…فا عرف والده ووالدته باللي حصل. وكانت الصدمه اثرها عليهم هما كمان متقلش. عن صدمه الجميع…..
وجه الوقت اللي الكل مستعد فيه. انه يروح…..ولسه نوح
مظهرش…
وقرر ليل… يكلمه اخيرا…..
ليل…..الووووووو..
نوح…..ايوه ياليل.
ليل…انت فين كل ده احنا المفروض طالعين عند نور.ولا مش ناوي تيجي.
نوح…انا واقف تحت البيت عندها…
ليل….تمام…احنا خارجين..الوقت هعدي اجيب المأذون وهنيجي على طول.
نوح…تمام…
ليل…سلام
نوح..سلام
سهام والدته…ايه ياليل فين نوح.
ليل…تحت البيت هناك
سهام…يعني هو كويس
ليل…ايوه يا امي متقلقيش
ادم…ليل. خف على نوح شويه عشان خاطري
سهام…اه ياليل من فضلك الموقف ياحبيبي اللي هو فيه مش محتاج ضغط اكتر من كده.خصوصا اننا كلنا عارفين ان هو مظلوم يبقى ليه ندمره نفسيا اكتر مش كفايه اللي هو فيه.
ليل…حاضر يا امي..يلا بينا بقى عشان منتأخرش…
خرجو من الڤيلا ركب ادم عربيته. وركب ليل ومعاه والدته..
…….
سراج.والد جاسر….يلا يا جاسر هنتأخر..
جاسر…وهو بيخرج من اوضته…حاضر انا جاهز خلاص فين ماما.
منى …وهي بتخرج من اوضتها…انا اهو ياحبيبي…مش كنتو رحتو انتو
جاسر…ليه يا امي مينفعش طبعا.
منى…مش عايزه البنت تكون محرجه او حاسه ان في كذا عين عليها وتتوتر وتتضايق اكتر..
جاسر…مينفعش يا امي لازم نكون معاهم ولازم تكوني انتي كمان مع طنط سهام. انا معرفش لحد الوقت ايه موقفها من بعد ماليل قالها..
منى…سهام طيبه واكيد مش هتقبل باي حاجه غير الجواز اكيد هتتصدم بس عمرها ما هترفض مبدأ الجواز دي بنت يا ابني.
سراج…مش عارف ايه اللي بيحصلنا الفتره دي بس.
جاسر…خير ان شاء الله ياحبيبي كل حاجه هترجع زي الاول واحسن…وعيلة السيوفي هتفضل زي ماهي
سراج….يارب ياجاسر..
منى…يارب خير ان شاء الله
جاسر…طب يلا بقى بينا ادم كلمني قاللي انهم خرجو من الڤيلا هيعدو يجيبو المأذون.ويطلعو على هناك
سراج…طب يلا بينا عشان نوصل مع بعض.
……..
عشق….يلا يا نور عشان خاطري قومي اجهزي الناس زمانهم جايين ياحبيبتي..
نور…بانهيار…مش هقوم ياعشق…مش هتجوزه لو ايه حصل
تمارا…ايه اللي جرالك يانور… مش ده نوح اللي بتحبيه اللي بتتمني تكوني معاه.
نور….كان زمان ياتمارا قبل ما اعرفه على حقيقته. قبل ما يموتني بالحيا..
زهره…نور ياحبيبتي مينفعش اللي بتعمليه ده الناس جايين خلاص وده احسن ليكي عشان اللي حصل في الجامعه ياستي لو مش عايزه تكملي بعد كده زي ماليل قالك ابقي سبيه بس الجواز الوقت في مصلحتك.
عشق…نور..انتي بتثقي فيا صح…وانتي عارفه اني اكيد عمري ماهتمنالك حاجه وحشه..والله يانور…نوح برئ. انتي مشوفتيهوش وهو بيتكلم والله يانور هو مظلوم زيك
نور…بدموع. الكلام مفيش اسهل منه ياعشق…ومش كلمتين اللي يخلوني اصدقه…انتي مش حاسه باللي فيا ياعشق…انا حاسه ان في حد مخرج قلبي وبيقطع فيه. انا قلبي واجعني اوي ياعشق..
خدتها عشق في حضنها وهي بتعيط معاها..
تمارا…طب عشان خاطري بس يانور قومي البسي اي حاجه هما هيخلصو ويمشو وبس حقك يرجع اعملي اللي يريحك بعد كده بس يبقى حقك رجع وتقدري ترفعي راسك وتحطي صباعك في عين اي حد يكلمك…
نور…ارفع راسي ازاي..وحق ايه اللي هيرجع…طب اللي نوح خده هيرجع ازاي…
عشق…طب عشان خاطري بس.. قومي البسي يلا… واهدي كده شويه. انتي هيجرالك حاجه من العياط ده انتي مبطلتيش عياط حبيبتي بقالك يومين..
نور…ياريت يجرالي حاجه واموت وارتاح…
عشق…بعد الشر متقوليش كده تاني..
نور…الموت مش شر ياعشق…الموت راحه للي زيي. اوي. عالاقل تبقى جت رحمه من عند ربنا انا فكرت اموت نفسي واخلص بس حتى دي انا اضعف كتير من اني اعملها…
تمارا…وتموتي كافره يانور.
عشق…متقوليش كده يانور. ربنا ليه حكمه فاللي حصل ده احنا لسه منعرفهاش..ربنا مش ظالم يانور…ربنا بيعمل لكل واحد فينا اللي في مصلحته يمكن اللي انتي فيه ده صعب اوي…ومفيش حد يستحمله…بس اكيد مع الوقت هتعرفي ان ربنا كان ليه حكمه تانيه..
زهره…يلا يابنات نسبها تجهز على بال مايجو……
عشق…يلا يانور.. احنا هنخرج وانتي حبيبتي يلا اجهزي..
خرجو البنات وسابوها فالاوضه تجهز….
…………..
اما عند نوح… فا كان اعد في العربيه… حزن الدنيا على ملامحه…قافل شبابيك العربيه..مرجع راسه لورا…بيشرب سجاير لدرجه العربيه مش باينه من الدخان…من كتر السجاير اللي شربها…من ساعة ما خرج من الشركه وهو بيلف في الشوارع كلها…راح بيت نور في خان الخليلي راح المدرسه وقف فالمكان اللي كان بيقفلها فيه…راح تحت البيت اللي نور. كانت فيه وفضل واقف تحت يبص على الشقه اللي فيها نور او حركه ولا لا.وفالاخر لما ملقاش اي حد قرر يطلع يخبط. طلع ادام الشقه والغضب كان عاميه..فضل يخبط بغضب..لحد ما باب الشقه اللي فيها الست فتحت..
الست…مين في ايه ليه بتخبط كده…لف نوح وعلى وشه معالم التعب والحزن….
الست…ابه ده مش انت الشاب اللي جيت امبارح مع اللي اداني الكارت…..
نوح…بحزن ايوه انا.
الست…انتو سألتو على هاني وقولتلكم انه مش بيجي كتير..ولو جه هبلغكم..
نوح…سند دماغه على الحيطه وغمض عنيه بقلة حيلة وتعب
الست…انت كويس يا ابني…قوللي لو ممكن اساعدك في حاجه.
نوح…..انا كويس يا امي..
الست…طيب تعالى يا ابني اتفضل جوه شويه ارتاح شكلك تعبان…وقوللي في ايه وعايز هاني ليه يمكن اقدر اساعدك.
دخل معاها نوح. من غير اي اعتراض وكأن الست دي كانت طوق نجاه ليه. ومصدق لقاها عشان يتكلم لانه كان محتاج يتكلم جدا ويرتاح من الوجع اللي حاسس بيه…
الست…تعالى يا ابني اتفضل. اعد
نوح…اعد.على الكنبه. شكرا.
الست…تشرب ايه
نوح…لا شكرا ولا حاجة.
الست…لا طبعا لازم تشرب…
نوح…ممكن طيب كوبايه مايه.
الست…حالا…وغابت خمس دقايق ورجعت لقت نوح حاطط ايديه الاتنين على وشه..
الست…..انا عملتلك بقى كبايه لمون تهديك شويه
نوح…..شكرا يا امي ملهوش لزوم تعبتك
الست…تعبك راحه يا ابني…قوللي بقى ايه حكايتك وعايز هاني ليه… لو مش عايز براحتك بس انا حاسه ان في حاجه كبيره بخصوص هاني ده اصله ميجيش وراه خير وصراحه انت شكلك ابن ناس ومش شبهه.
نوح…اشمعنى..
الست…يعني اصل بيأعد بالمده مبيجيش ويوم مايجي يكون معاه بنات وشباب ولحد الصبح صوت ضحكهم بيبقى طالع… وازايز خمره مرميه بشوفها لما يخرج الباسكت قبل ما يمشي…وللاسف مفيش في البيت كله غيري انا اغلب سكان العماره. مش هنا اللي مسافر واللي واخد شقه بره…مفيش غيري ساكن هنا وهو يعني حتى لو حابه ابلغ مينفعش لاني لوحدي. انا جوزي متوفي ومعنديش غير ولد واحد متجوز ومسافر بره …المهم هتقولي ايه حكايتك ولا مش عايز تحكي
نوح….بالعكس… انا محتاج احكي جدا حاسس اني لو متكلمتش هيجرالي حاجه.
الست…بحنان…بعد الشر عنك با ابني متقولش كده ربنا بحميك لشبابك. طب انت عارف انا حبيتك زي ما تكون ابني وقلبي اتفتحلك انا في العادي عمري ما بدخل اي حد عندي لان زي ما انت شايف كده انا لوحدي. بس الشهاده لله انا ارتحتلك..
نوح…ربنا يخليكي يا امي…انا هحكيلك حكايتي عشان حقيقي محتاج حد يسمعني لان كل اللي حواليا مدونيش الحق اني ادافع حتى عن نفسي…
الست…بطيبة…قول يا ابني. انا سمعاك.
نوح….. مبدأيا كده يا امي انا معرفش مين هاني ده ولا عمري شوفته..
الست…ازاي امال انت بتيجي تخبط على شقته دي ليه..
نوح…لاني عايز اعرف هو يعرفني منين او مين اللي وراه…انا هحكيلك…وابتدا نوح يحكي كل حاجه للست دي بالتفصيل…من البدايه لحد اللحظه اللي هو اعد معاها فيها…
نوح….بس يا امي دي كل حكايتي. ودي كل مشكلتي مع اللي اسمه هاني ده اللي انا ولا اعرفه ولا عمري شوفته. واللي لحد الوقت معرفش ليه عمل كده…
الست…بصدمه..لا إله إلا الله هو في حد بالشر ده…ايه اللي احنا فيه ده ياربي…معقول في ناس كده…قلبي معاك يا ابني اللي انت فيه ده محدش يستحمله والبنت الغلبانه دي ايه ذنبها بس…انا من اول ما شوفتك انت والشاب اللي معاك وانا حاسه ان في حاجه بس عمري ما تخيلت يكون الموضوع كده…بص انا هقولك حاجه لما جيتو امبارح..واديتوني الكارت صراحه مكنتش هتصل عشان ميحصليش مشكله وانت شايف انا ست كبيره قولت يمكن تعرفوه وفي بينكم مشكله نصب عليكم عمل اي حاجه ولو اني كنت شاكه ان انتو تعرفوه لاأنتو شكله ولا هو شكلكم… وخفت قولت بلاش اتدخل في حاجه بس بعد اللي قولتهولي ده انا مش هتخلى عنك يا ابني وهساعدك وطول الوقت هفضل اراقب شقته واي وقت هحس بحركه في الشقه هبلغك متقلقش… خصوصا ان شباك المطبخ بتاعي ادام مطبخه وبشوف النور بتاعه لما يتفتح…
نوح….ياريت ياأمي تبقي عملتي فيا جميل عمري ما هنسهولك ابدا.
الست…اطمن…هساعدك…ومش عشانك انت بس عشان البنت اللي دمرها دي… ياريت يا ابني متسبهاش ومتزعلش من الكلمتين اللي قالتهم وقت غضب… اللي هي فيه ده مفيش حد يقدر يستحمله دي مصيبه. كبيره وحملها تقيل… الواحده مننا لما بتحب يا ابني عمرها ما بتكره بسهوله. يمكن على اد ما هي الوقت تعبانه وكرهاك زي ما بتقول بينها وبين نفسها مبتتمناش حد يطبطب عليها غيرك الوقت.واكيد مع الوقت هتعرف انك برئ….
نوح…انا مش زعلان منها يا امي انا بعمل كل ده عشانها يمكن مش هاممني ان صورتي تكون احسن عندها اكتر مانا عايز ارجعلها حقها..من اللي عمل فيها كده…
الست…هترجعلها حقها وتثبت برائتك. والدنيا هتتحسن بينكم ان شاء الله. واوعى تزعل من الابتلاء اللي انت فيه ده…يمكن تكون مقصر في حق ربنا يا ابني ومحتاجك تفوق وترجعله فا حطك في الابتلاء ده عشان تلجأله…صلي وادعي كتير…ربنا مفيش احن منه علينا..
نوح…ونعم بالله عندك حق…انا اسف طولت عليكي بس كنت محتاج اتكلم اوي…وحقيقي ارتحت جدا لما اتكلمت معاكي.
الست….ربنا يريح قلبك يارب.. وينور بصيرتك وينصرك على اي ظلم اتعرضتله الفتره دي.
نوح….يااااه اهو انا مش محتاج غير الدعوتين دول.
الست…متقلقش انا هفضل مراقبه الشقه بس اديني رقمك بقى.
نوح…حاضر… اتفضلي ده الكارت بتاعى
الست…طب ينفع تسجلهولي عالموبايل عشان لو جه مفضلش ادور عالكارت واتصل بيك على طول..
نوح..حاضر يا امي…مسك نوح الموبايل وكتب اسمه. ورن على نفسه انا سجلتهولك يا امي وكتبتلك اسمي انا اسمي نوح…ورنيت عليا اسجل اسم حضرتك بايه…
الست…عاشت الاسامي يا ابني… سجله… باسم حاجه فاطمه
نوح…ماشي يا امي تؤمريني بحاجه
الست…سلامتك يا ابني نورت..واي وقت تكون محتاج تتكلم تعلالي على طول انا زي مانت شايف لوحدي عالاقل يكون حد بيسأل عليا
نوح…انا عيني ليكي يا امي…بعد اذنك
الست…اتفضل با ابني..
نزل نوح من عند الحاجه فاطمه
فضل يلف كتير وفي الاخر راح وقف تحت البيت عند نور لحد المعاد اللي ليل حدده..كان حاسس بوجع. اول مره يحسه كان صعبان عليه نور والحال اللي وصلتله…كان زعلان انها شكت ان هو اللي عمل فيها كده… كلمتها ليه وهي بتقوله انا بكرهك كأنها سكينه بتضرب في قلبه…بس كان في نفس الوقت مديها عذرها…وعارف ان اللي مرت بيه اصعب من ان حد يتحمله…كان صعبان عليه من ليل… مش عشان مد ايده عليه ولا اتعصب وغضب منه. كان صعبان عليه انه شك فيه ومدالوش فرصه حتى يدافع عن نفسه.. ولا فكر انه يسأله الاول بهدوء…
…………….
عدى الوقت بسرعه….واخيرا وصل ليل ومعاه المأذون… ووصل جاسر بعد ما قابل ليل في وسط الطريق.
….ادم…عربية نوح هناك اهي… شكله نايم ده ولا ايه.
ليل… روح ناديله يلا خلينا نطلع
راح..ادم على عربية نوح..خبط عالازاز…
انتبه نوح…فتح باب العربيه…
ادم…ايه ده يا ابني الدخان ده كله وقافل على نفسك انت كده يجرالك حاجه..
نوح…بحزن…يلا
ادم….يلا هما هناك واقفين مستنينك…
خرج نوح من العربيه. وقفلها. وعدى الشارع مع ادم..
سهام…اول ما شافته…نوح..حبيبي انت كويس
نوح…بخير يا امي.
سراج…ازبك يا نوح
نوح…بخير يا عمي.
ليل….بحزم يلا عشان منتأخرش..
مسكت سهام في ايد نوح…نوح ليل حكالي على اللي حصل انا مصدقاك ياحبيبي.
نوح……بحزن وبصوت مسموع وصل لسمع الكل شكرا يا امي.. كويس ان في حد مصدقني…
بصتله سهام بحزن على حال ابنها اللي كان مبيبطلش ضحك وهزار…
بص جاسر وادم لليل اللي كان مش مدي اي اهتمام لكلامه.
ركبو الاسانسير…وطلعو….ثواني وكان الكل واقف ادام باب الشقه…
رن…ليل جرس الباب.
……..
زهره….ايه ده شكلهم جم…
عشق…روحي افتحي يازهره بسرعه
تمارا…طب ونور اللي جوه دي ورافضه تطلع هنعمل فيها ايه…
عشق…افتحو بس الاول وربنا يحلها ويعديها على خير…
راحت…..زهره…بسرعه ادام الباب. كان قلبها بيدق بتوتر. وكأنها هي اللي فالموقف مش نور..
فتحت زهره الباب…وكان ادامها ليل سادد الباب بجسمه وطوله شكله لوحده يرعب…
ليل…ازيك يازهره..
زهره…بارتباك…انا انا تمام الحمد لله
ليل… ايه ندخل
زهره…وهي مرتبكه ..ااه اه طبعا اتفضلوا
دخل ليل… وادم..
ادم…ازيك يازهره…
زهره…..الحمد لله اتفضل…
دخل جاسر…ووراه المأذون ووالدة جاسر ووالده… وكلهم بيسلمو على زهره…وهي واقفه متنحه مش متخيله ان كلهم جم واشفقت على نور…
ودخل اخر واحد. نوح اللي شكله كان يحزن…
نوح…ازيك يازهره.
زهره….ازيك انت يانوح اتفضل..
دخلو كلهم وكان في استقبالهم عشق..وتمارا…
سلمو عليهم كلهم… وعرفهم جاسر بوالدته اللي كانو كلهم اول مره يشوفوها…
عشق…اهلا بحضرتك نورتو..
اعدو كلهم….كان الجو العام ملئ بالتوترعلى الجميع…
ثواني وجت تمارا وزهره بالعصير والميه. وحطوها على التربيزه.
حاول سراج… يفك التوتر اللي البنات فيه…
سراج…ازيكم يابنات عامليين ايه
عشق…بخير حضرتك.
سراج…مشوفتكمش من مده
عشق…احنا موجودين بس عشان الشغل بقى
سراج…ربنا معاكم… الشباب بيقولوا انكم شاطرين في شغلكم جدا.
عشق…شكرا لذوق حضرتك هما مش مقصرين بصراحه ده بفضلهم…وبصت على ليل اللي كان عينه عليها بابتسامه بسيطه… لغبطتها وهي بتتكلم وافتكرت بوسته ليها في المكتب حست بالاحراج اول ما عينها جت في عينه وحس ليل هي فكرت في ايه…فبعد عينه عنها عشان متتلغبطش اكتر من كده…
تمارا… اتفضلو العصير…
سراج…هو يعني لو مفيهاش تعب… ممكن قهوه. انا مليش فالعصير.
تمارا…طبعا قهوه حضرتك ايه.
سراج…مظبوط…
تمارا… طيب في حد عايز قهوه
جاسر… انا كمان قهوه ياتمارا..
تمارا…حاضر.. ومبصتش في عينه عشان ميبنش عليها الارتباك…هي كمان من اللي حصل بينهم الصبح…
وطلب الشباب قهوه ماعادا نوح..اللي كان اعد ساكت وكأنه في دنيا تانيه
تمارا…لسهام.. طيب وحضرتك ياطنط..
سهام…لا ياحبيبتي انا مش عايزه هشرب العصير.
تمارا…وحضرتك ياطنط.
منى…شكرا ياحبيبتي انا كمان هشرب العصير.
تمارا… ماشي ثواني والقهوه تكون جاهزه…
وراحت تعملهم القهوه…
المأذون…ايه ابتدي الاجراءات.
ليل… ابتدي ياشيخنا يلا…
المأذون… عايز بطاقة العريس والعروسه..
قام نوح من غير ولا كلمه طلع محفظته من جيبه. وطلع البطاقه ومد ايده للشيخ في سكوت مميت…
ليل… عشق.. هاتي بطاقة نور… وخليها تيجي.
عشق… بتوتر وهي بتبصلها وترفع كتفها بقلة حيله…
حاضر…
زهره.. راحت ورا عشق…
عشق…خليكي يازهره مع الناس
زهره…حاضر رجعت زهره اعدت
وحس..ليل ان في مشكله بس التزم السكوت..
دخلت عشق… عند نور لقتها اعده على السرير.. لابسه بنطلون چينز اسود وتيشرت اسود بكم ومش لابسه طرحه اعده ضامه رجلها لصدرها ومنهاره من العياط.. وبتهز جسمها بتوتر جامد…
عشق…نور… انتي لسه ملبستيش الطرحه يلا حبيبتي الناس بره المأذون عايز بطاقتك وعايزك عشان يتمم الاجراءات.
نور… مش هخرج مش هتجوزه ياعشق.
عشق…نور. عشان خاطري قومي استعيذي بالله من الشيطان حبيبتي ويلا مش ناقصين حاجه تحصل تاني…خلينا نعديها على خير…
نور…لو هموت مش هتجوزه ياعشق… اخرجي قوليلهم اني مش هتجوز اخرجي وسيبوني في حالي بقى كفايه اللي حصل..
عشق… عشان خاطري يانور.
نور…عشان خاطري انا سيبيني…
خرجت عشق.. بره اوضت نور… وقفت بقلة حيله مش عارفه تعمل ايه… بتحاول تمسح دموعها اللي بتنزل بحزن على نور…مسكت موبايلها واتصلت بليل اللي ملاقتش غيره ادامها في الموقف ده…
رن… موبايل ليل… طلعه من جيبه وشاف رقم عشق. وعرف ساعتها. ان احساسه صح…
ليل… بعد اذنكم. ثواني وقام بعيد عنهم شويه.
ليل… ايوه ياعشق.
عشق…. ليل نور مش راضيه تخرج ابدا مش عارفه اتصرف وهي منهاره.
ليل.. طيب اقفلي انا جايلها بس اقفيلي بره عشان معرفش اوضتها.
عشق… انا بكلمك من بره اوضتها
ليل..طيب تمام اقفلي…
قفل ليل مع عشق… وبكل ثقه مشي. بخطواته الثابته على المكان اللي بيودي للاوض. وكان بديهي ان الكل يعرف اللي حصل….
ليل…وصل لعشق… هي لابسه
عشق… مش لابسه الطرحه.
ليل…طيب ادخلي لبسيهالها بسرعه وعرفيني.
عشق… حاضر ثواني…
دخلت عشق… على نور مسكت طرحتها ادتهالها…نور. البسي طرحتك ليل واقف بره الاوضه عايز يدخلك…
نور اعده مش بتدي اي ريإكشن غير انها بتعيط وبس ماسكه رجلها واعده تهز نفسها.. قربت منها عشق. وحط على راسها الطرحه… ومعرفتش تربطهالها اكتفت بس انها تحطها على شعرها….
راحت. عشق فتحت الباب. اتفضل..
دخل… ليل مع عشق اللي فضلت واقفه بعيد…مشي ليل ناحيه نور… اللي حالها يوجع القلب…قرب منها ليل واعد جمبها على كرسي..
ليل… نور… انا عارف ان مفيش اي حاجه اقدر اقولهالك وعارف ان الموقف اللي انتي فيه واجعك اوي. بس عشان تطلعي من الموقف ده لازم الخطوه دي تتم وانا قولتلك الصبح لو بعد كده عايزه تسبيه انا اول واحد هكون جمبك…
نور…اخيرا اتكلمت…بانهيار وعياط… عشان خاطري ياليل. بلاش تخليني اتجوزه انا خلاص مش عايزه منه اي حاجه ولو عاللي حصلي انا راضيه باللي ربنا كاتبهولي ولو عالفضيحه اللي اتفضحتها. انا رضيت بيها هي كمان وخلاص انا انفصلت من الجامعه يعني مش محتاجه اخرج..وهفضل طول الوقت محبوسه لا هخرج ولا اشوف حد ولا حد يشوفني..
ليل… وليه ده كله يا نور… ليه منصلحش اللي حصل ليه متروحيش جامعتك وترفعي راسك انا طول عمري اعرف عنك من عم محمد انك مش ضعيفه ومش بتستسلمي بسهوله…ايه الاستسلام اللي انتي فيه ده..
نور….انا انتهيت ياليل خلاص الاول كان عندي اللي يخليني مش ضعيفه بس الوقت خلاص كل حاجه راحت واتهديت…
ليل… لا يانور. مفيش حاجه راحت يلا قومي اغسلي وشك وقومي معايا. وصدقيني هعمل كل حاجه ترجع عالاقل جزء من حقك. ومن بكره هتلاقي الجامعه كلها بتقدملك اعتذار..ودي هتبقى اول حاجه عملتهالك…
نور…..والنبي ياليل بلاش مش عايزه اتجوز نوح. ورحمة بابا لو كان غالي عندك..
ليل… بشفقه على حالها…صدقيني هو لو كان عايش مكنش هيعمل غير كده. وقام وقف ليل. ومسك ايدها يشدها من على السرير… قامت نور باستسلام وهي منهاره…عشق واقفه من بعيد بتمسح دموعها في صمت..
نور… عشق.. قوليلو حاجه مش عايزه اتجوز نوح…
… قربها ليل. من حضنه… وانهارت نور… في اللحظه دي وخرجت كل شحنتها من الوجع…
طبطب. ليل على ضهرها… نور انتي يمكن تكوني مبقتيش تثقي في حد بس طالب منك انك تثقي فيا حتى لو مره واحده. انا اخوكي الكبير زي ما اتفقنا يعني لازم تسمعي كلامي… وعايز اقولك اني معاكي انتي مش مع نوح.. بس كمان عايز اقولك اني عارف ان نوح ميعملهاش. ابدا. مش بدافع عنه بس عندي دليل خلينا بس في الوقت وهفهمك كل حاجه…
عشق… قربت منها… وهي بتعيط طبطبت على ضهرها.. يلا يانور اسمعي كلام ليل..
مسحت نور.. دموعها. وظبطت عشق من شكلها.. ولفتلها الطرحه تداري شعرها..
ليل… يلا يانور..ومدلها ايده.
هزت..نور.. راسها بقلة حيله…ومسكت ايده..وجابت عشق. بطاقه نور من شنطتها وخرجو من الاوضه…
نور…ماشيه في ايد ليل ايدها متلجه ضربات قلبها سريعه جدا..ماشيه معاه كأنه واخدها لقبرها…..اليوم اللي حلمت بيه بالنسبالها كان اصعب يوم في حياتها….
خرج بيها ليل. ادام الجميع… اول ما نوح شافها. اتصدم من شكلها اللي يشبه الاموات واقفه في ايد ليل كأنها ميته موطيه راسها….منظرها قتله. بعد ما شافها موطيه..
وقف الكل اول ما شافوها…
ليل… قرب بيها مكان ما هما اعدين…قربت منها سهام…ومن غير كلام خدتها في حضنها.ازيك يانور.
نور…بألم الحمد لله
منى… ازيك يانور.. انا مامت جاسر..
نور…اهلا بحضرتك…
منى..اهلا بيكي ياحبيتي.
سراج…ازيك يانور..مبروك يا احلى عروسه.
نور…شكرا..
سلم عليها الكل…وكل ده نور موطيه راسها…
ليل.. مسكها من ايدها.. تعالي يانور. اعدي.. واعدها جمب المأذون ادام نوح…
اعد الجميع….واخر واحد اعد نوح..وعينه مفارقتهاش لحظه…فضلت نور.. تلعب في صوابعها بتوتر بتهز رجليها عنيها فالارض..
عشق..ادت المأذون بطاقة نور…
قرب. المأذون من نوح الدفتر عشان يمضي مكان ما بيقوله المأذون. وثواني وخلص…قرب المأذون من نور الدفتر.. وسألها… موافقه يا انسه نور على الزواج…سكتت بوجع.. الكل اتوتر وفضلو يبصو لبعض… اخيرا ردت… ايوه ومسكت نور القلم من ايد ليل. بأيد بتترعش. الكل عينه عليها…غمضت نور عينها بوجع واخيرا ابتدت تمضي. خد منها ليل الدفتر اداه للمأذون
المأذون… مين وكيل العروسه…
بص الكل لبعض….بحزن… نزلت دمعه. الم. من نور.. وهي بتغمض عنيها بوجع. اشفق عليها الجميع.. واتعصر قلب نوح عليها…
ليل….انا وكيلها وبص لنور.. موافقه يانور..
هزت نور دماغها بالم..
المأذون… على خيره الله…وابتدا المأذون يقول كلامه…وحط نوح ايده في ايد ليل…وابتدت اجراءات الزواج…
(المأذون بارك الله لكما وبارك عليكما وجمع بينكم في خير) مبروك
الكل مبروك..
ليل… متنساش ياشيخنا. تحط التاريخ اللي قولتلك عليه.
المأذون … متقلقش. زي ما طلبت هعمل.
ليل… اقدر اخد القسيمة امته
المأذون.. ممكن بكره تاخد قسيمة مؤقته لحد ما القسيمة تطلع.
ليل… لا معلش هتعبك معايا يا شيخنا وطبعا اللي هتقول عليه وتطلبه هديهولك وزياده حاول بالكتير بعد بكره تكون معايا القسيمة…
المأذون… حاضر هحاول.
ليل… تراضي اي حد يقف فيها المهم تكون معايا وانا معاك في كل اللي هتدفعه..
المأذون. بأمر الله. استأذن انا.
ليل.. اتفضل وصله للاسنسير يا ادم…
خرج المأذون….ورجع ادم بعد ما وصله…
الكل ساكت. مفيش كلام…
قطع السكوت ده. سراج
سراج…اسمحولي بس اقول كلمه…انا عارف يانور الموقف اللي انتي فيه ده صعب ومقدر شعورك… بس كمان عايز اقولك ان نوح ميعملش كده…الفتره دي الكل بيحاول يضرب فينا عشان نقع وكيان السيوفي يتهد وللاسف اللي بيضرب ده طايح في اي حد يخصنا.. يمكن انتي تقولي بينك وبين نفسك انا مالي ومالكم وماللي باعدائكم عندك حق بس ده تفكيري وتفكيرك وتفكيرنا كلنا لكن اللي عايز يوقعنا ميقصدش يوقعنا بس كا ممجموعه وكيان السيوفي ده عايز يضربنا كا عيله في بعض عايز يضربنا في اي حد قريب باختصار عايز يدمرنا في شغلنا وفي حياتنا وانتي من ضمن الناس اللي موجوديين في حياتنا …انا عارف ان كلامي لا هيقدم ولا هيأخر بس الخطوه دي كانت لازم تحصل بأي شكل من الاشكال مش عشان شكل عيلة السيوفي لا عشانك وعشان سمعتك.وعشان انتي بنت راجل غالي علينا…فهماني يانور..
هزت..نور دماغها من غير ما تبص كانت باصه بعنيها لبعيد بشرود…
سهام…بحنان نور… من انهرده انتي بنتي وعلى فكره بقى انا مبسوطه اوي ان القمر ده كله هتبقى مرات ابني
نور….شكرا…
ليل….ياريت الكل يسمعني كويس خلينا بقى في الكلام الجد…
بص الكل لليل…
ليل… الكلام اللي هقوله الوقت… مهم لعيلتنا..ومهم ليكم انتو كمان. ومن انهرده عيلتي زادت اربع بنات. وبص للبنات.. عشق تمارا نور زهره… دي عيلتي اللي معنديش غيرها الشباب انتو طبعا عارفنهم وامي وعمي سبق واتعرفتو عليهم قبل كده…مرات عمي ومامت جاسر..دي اول مره تشوفوها وبكده انتو اتعرفتو على عيلتي كامله…
الكلام اللي هقوله. الوقت هيتنفذ… مفهوم يانور..
هزت نور دماغها..
ليل…مفهوم يانوح…
نوح…مفهوم…
ليل… بكره او بعد بكره بالكتير هتكون قسيمة الجواز معايا
بعد بكره الصبح…هطلع انا ونوح وجاسر وادم..على جامعه القاهره… وهتكون نور معانا…
هندخل على عميد الجامعه… واللي حصل في الجامعه هيتصلح وقتي وانا واقف…ودي هتبقى اول خطوه حقك يرجع بيها يانور…ومفيش حد من بعدها هيرفع عينه فيكي …ولو حصل. ساعتها انا اللي هقتله بايدي ادامك…
انا طلبت من المأذون يكتب القسيمة بتاريخ قديم..التاريخ ده من بعد وفاة عم محمد بعشر ايام…
ركزو بقى في الكلام اللي هقوله ده عشان الكل يكون عارفه عشان بعد الاعده دي مش هيتعاد تاني…
نوح…متقدم لنور. قبل وفاة عم محمد… وكان هيتقدملها رسمي بس اللي حصل لعم محمد خلانا اجلنا… وبعد وفاته مكنش ينفع نور تكون لوحدها ومكنش في اي طريقه نور تيجي بيها الڤيلا غير لو حصل جواز فا عملنا كتب كتاب.. لحد ما تعدي فتره ونعمل اشهار وفرح… واللي حصل معاكم امبارح.. هيتقال. نوح جاي يجيب نور… من جامعتها.. نور. هتحكي اللي حصلها ونوح هيحكي اللي حصله… واللي عمل كده لسه بالنسبالنا شخص مجهول حب يوقعهم في بعض… لسببين ملهمش تالت… اما حد معجب بنور وعرف حقيقة ارتباط نور بنوح فحب يوقعهم في بعض عشان نور تسيب نوح. وهو يقربلها او حد بيحاول يدمر سمعت عيلتنا…الكلام ده بالحرف مش عايز حد فيكم ينسى منه اي كلمه مفهوووم.
الكل ..تمام..
ليل… وعشان نتمم الخطوه دي في خطوه قبلها لازم تتم..
بص الكل بترقب لليل…
ليل…. نور…..
بصتله نور. بترقب من اللي هيقوله..
ليل…تقومي تحضري هدومك عشان هتيجي معانا عالڤيلا الوقت..
نور….وقفت بصدمه..وهي باصه لليل… وثواني من الصمت وكأنه الهدوء الذي يسبق العاصفه????????????????
يتبع…
لقراءة الفصل الثامن والعشرون : اضغط هنا
لقراءة جميع فصول الرواية : اضغط هنا
نرشح لك أيضاً رواية بريئة حطمت غروره للكاتبة ميرا أبو الخير
جميله
عاوزه الحلقه 27
استمرى