سكريبت مش هتجوز الفصل الثاني 2 بقلم يوسف طه

بعد ما قررت أمل إنها ترفض العريس، فضلت قدامها مشكلة واحدة وهي والدتها، ولأن الولد صعب يترفض، فقررت تطلب من امها طلب رخم وإنهم يقعدو مع بعض تاني. 

جه فعلًا وقعدوا مع بعض، ولاحظت إنه مغيرش غير لون القميص عن المرة اللي فاتت، ونفس قعدة البلكونة تاني، بس المرة دي مكانتش عارفة تبدأ إزاي في اللي خطتت ليه ، لحد ما خد هو المبادرة وقالها

=تعرفي أنا تقريبًا بقالي كتير ما ارتحتش لحد كدة 

فبصتله بصدمة وردت وكأنها مسمعتش حاجة 

-الصراحة أنا كنت حاسة إننا مخدناش وقت كافي نتكلم المرة اللي فاتت 

= عشان كدة عملوا فترة الخطوبة الناس تتعرف فيها علي بعض أكتر 

-إنت إيه اللي نفسك توصله بعد خمس سنين 

بصلها بهدوء شديد وبدأ يفهم إنها بتخطط لرفضه بس بطريقة شيك، فقرر إنه يجاوب الإجابة العادية لأن كل محاولاته هتبوء بالفشل

= أنا مركز في المكتب اللي شغال فيه وبحب شغلي جدًا وشاطر فيه وبس 

-يعني معندكش طموح كافي 

= ده لو إنتي عاوزه تشوفي كدة 

-أنا أصلًا لحد دلوقتي معرفش إسمك 

=إسمي وائل .. وتقدري تتكلمي معايا بصراحة شديدة 

-الصراحة أنا مش جاهزة نفسيًا للإرتباط.. وبخاف من الناس اللي معرفهمش.. وخدت صدمات كتير بما فيه الكفاية 

=بس أنا عن نفسي مش بحب المشاكل والخناق وهيكون في فترة كافية نعرف بعض

-أرجوك متصعبش الأمور عليا.. أنا مش قادرة أعمل خطوة الإرتباط  دلوقتي .. إنت إنسان كويس وكل بنت تتمناك

=مفيش مشكلة طبيعي إن الإنسان مبياخدش كل حاجة بيتمناها 

-عشان خاطري الكلام ده مش هيفيد بحاجة.. غير إننا مقعدناش غير مرة واحدة بس ودي التانية.. يعني احنا لسه حتى مبدأناش عشان تتعلق بيا

= مفيش مشكلة أنا هقولهم إن مفيش نصيب. 

خرج وائل من عندهم وهو محطم، وفي نفس الوقت حست أمل إنها ظلمته وكان لازم تديله فرصه كافية، بس العمر مافيهوش كتير عشان نفضل نجرب في علاقات. 

كانت دايمًا بتقول لوالدتها إنه معندوش طموح ، وأخطر حاجة إن الإنسان ميكونش طَموح، الوقت بيعدي والقصة بتتنسي ، أيام بتعدي ورا أيام مافيهاش أي جديد لأمل، بس وائل كان بيجي في بالها كتير، وفي نفس الوقت كان بيجي عرسان كتير وبترفض حتى القعدة معاهم ، كل تركيزها كان في الشغل وبس، لحد ما المكتب اللي كانت بتشتغل فيه إتقفل، وبقت بتدور علي شغل كتير ومفيش فايدة. 

في يوم كانت قاعدة في البيت وأمها قالتلها إن في عريس جاي النهاردة وهو إبن صديقة ليها في الشغل برضه، ومش هينفع متقابلهوش، امل مخدتش وقت كتير عشان تفكر وقررت إنه لو مناسب هتقبل بيه علي طول، وفعلًا بدأت تجهز نفسها عشان العريس الجديد…… 

يتبع…..