اسكريبت أحببت حلوفاً لا يبالي الحلقة الثانية 2 بقلم فرح وائل

اسكريبت أحببت حلوفاً لا يبالي الحلقة الثانية 2 بقلم فرح وائل 

اسكريبت أحببت حلوفاً لا يبالي الحلقة الثانية 2 بقلم فرح وائل

اسكريبت أحببت حلوفاً لا يبالي الحلقة الثانية 2 بقلم فرح وائل 

~ انتي كويسه!! 

» فتحت عيني وببص اشوف مين اللي ماسكني لقيت احمد هو اللي ماسكني.. قومت بسرعه ووقفت عادي وتلقائيا بصيت ناحيه ادهم لقيته باصصلي وشه بيطلع نار كالعاده بس مشغلتش بالي ورجعت بصيت ل احمد تاني « 

~ انتي كويسه يبنتي

= اه اه كويسه يا احمد شكرا جداا

~ لا شكرا علي ايه بس دا واجبي.. المهم تعالي جوه عشان الجو بدأ يبقي برد هنا

= اه معاك حق.. يلا بينا

_ انتو رايحين فين!! 

~ داخلين جوه

_ ايوا وداخلين مع بعض ليه.. اظن يعني يا رنا انك جايه معايا انا وان من الذوق انك تدخلي معايا برضه ولا ايه

= لا انا اظن برضه انك جاي مع صاحبتك اللي هتبقي خطيبتك ومن الذوق برضه اني اسيبكم لوحدكم مع بعض.. وعلي فكره انا مش صغيره عشان تبقي شايل مسؤليتي كده انا كبيره وفاهمه انا بعمل ايه كويس

_ طيب يا كبيرره اتفضلي قدامي عشان هنروح

= وانا مش عايزه اروح دلوقتي.. عايز تروح انت اتفضل 

_ وهتروحي ب ايه حضرتك لو انا مشيت

= عادي هبقي اخد اوبر 

~ انا ممكن اوصلك يا رنا عادي

_ والله!! رناااا خلال دقيقتين تكوني في العربيه يلا ومش عايز نقااش

»  الاه الاه!! يارب ربع ثقته في نفسه وهو بيتكلم كده.. هو فاكرني الشغاله اللي ماما جابتهاله.. انت شكلك كده شارب حاجه اصفره وجاي ترفعلي ضغطي.. المهم انه كان بيتكلم بعصبيه.. روحت انا بكل برود سيبته ومشيت دخلت جوه الڤيلا من غير ما ارد عليه «

_ الو.. ايه ساعه عشان الهانم تتكرم وترد علي اهلي

= احمد ربنا اني رديت اصلا… عايز ايه

_ انزلي 

= انزل!! انزل فين 

_ انا تحت بيتك انزلي

= دا انت شكلك اتهبلت.. انت عارف الساعه كام.. الساعه اتناشر حضرتك

_ بقولك ايه انا مجنون وممكن تلاقيني بخبط علي باب بيتكو دلوقتي اخلصي انزلي

= انت بتهددني.. انت عبيط يا ادهم ما اعلي ما في خيلك اركبوا عادي يعني

» قولتله كده وقفلت في وشه السكه.. اكيد دمه محروق بعد ما سيبته ودخلت جوه الحفله وهو راح وصل الزفته بتاعته دي وبعدها رجع وفضل مستنيني لحد ما وافقت اروح معاه.. بس ايه اللي جابه دا مش فاهمه هي سيره رايح جاي ع البيت…هوب لقيت الباب بيخبط..استر يارب اكيد مش هو «

= يخربييتك انت طلعت بجد

_ انا قولتلك هطلعلك مصدقتيش 

= عايز ايه يا ادهم في ليلتك السودا دي

_ تاني مره تنشفي دماغك دي عليا انا هكسرهالك انتي فاهمه

= انت جاي عشان تقول كده

_ لا طبعا.. خدي دي

= ايه دي ؟!

_ هيكون ايه يعني كيسه فيها شكولاتات وشيبسي عشان الهانم مقموصه ومش بترد عليا 

= وانت فاكرني هتصالح بشويه الشكولاته دي

_ طول عمرك بتتصالحي ب كده

= المرادي غير يا ادهم..المرادي غير كل مره

_ ايه المشكله مش فاهم 

= ولا حاجه..تصبح علي خير يا ادهم

_ وانتي من اهل الخير

» دخلت رميت الشكولاته ع السرير وانا متعصبه لييه..ليه كل ما احاول ابعد عنه يقرب هو..هو مش بيحبها بيقرب مني ليه..حتي لو بيحبني زي اخته بس انا لا..وهو حلوف مش فاهم ومش حاسس بيتغذي علي علف البهايم كل يوم مش معقول كده بحب فيه ايه ياربي بحب ايه في حيوان زي ده انا مش فاهمه «

_ الو.. صباح الخير 

= صباح الزفت 

_ انا غلطان اصلا اني سايب شغلي ومعبرك

= مصحيني من النوم ليه اخلص

_ عازمك النهارده ع الغدا 

= لا

_ هو ايه اللي لا

= انت عزمتني بكل ذوق وانا رفضت بكل قله ذوق خلصنا

_ جرا ايه يابت انتي ما تتكلمي زي بقيت البنات..دا حوده السمسار فيه انوثه عنك

= بقولك ايه انا لسه صاحيه ومش عايزه اقل ادبي عليك

_ طب ماما عايزاكي

= هاجيلها التلات الجاي بأذن الله بعد صلاه الجمعه عنيا

_ تصدقي بالله..انا المفروض اقطع علاقتي بيكي

= عز الطلب والله..اخدت الكلمه من علي لساني

_ بالله انتي ماتربيتي يبنتي اتمسكي بيا شويه مش كده

= ولا ادهم هو انت مش مصاحب غور لصاحبتك يلا وحل عن نفوخي مش فيقالك

_ ماهي مش هنا في شرم

= شرم!! شرم مين 

_ شرم الشيخ يا رنا ركزي مع امي

= اه طب والمطلوب مني ايه

_ نتقابل..بقالنا كتير متقبلناش 

=  *اتنهدت* ماشي..هلبس وانزل في الكافيه اللي بنتقابل فيه

_ تمام هستناكي هناك 

= دلوقتي!!

_ اه 

= طب وشغلك يبني 

_ يستي فكك هاخد ساعه وارجع تاني..احنا بقلنا كتير متجمعناش

= ماشي

» مش عارفه هجبهالو ازاي…انا عن نفسي مش موافقه ولا راضيه عن اللي هعمله دا وقلبي مش مطاوعني بس اعمل ايه..لازم عشان اعرف اكمل حياتي من غيره..عشان انا كده عامله زي المتعلقه بحبل دايب وانا عارفه انه مش بيحبني ولا عمره هيحبني «

_ ياست روني اخيرااا اتنازلتي ووافقتي تقابليني

= ادهم انا عايزه اقولك حاجه

_ خير قولي 

= انا..يعني.انا بص هو انا..

_ انجزي يا رنا انا جعان هتقعدي تتهتهي كده كتير 

= ادهم انا مسافره بعد بكره سويسرا مع بابا عشان اكمل جامعتي هناك..انا عارفه اني كنت برفض قبل كده بس لقيت انها فرصه كويسه جداا ليا 

_ تسافري!! طب و انا؟!

= انت خلاص انا اتطمنت عليك انك هتخطب وهتستقر بقا 

_ بس انا محتاجك جمبي يا رنا افهميني

= ماهي هتبقي جمبك ومامتك هتبقي جمبك وانا كمان هكون علي اتصال معاك…وبعدين مش يمكن اقع علي واد 

حليوه من اللي بيطلعو في المسلسلات دول واتجوزه

_ تتجوزيه!! ازاي يعني

= هتجوزه زي الناس يعم..اومال انت عايزني اقعد اخلل جمبك هنا ولا ايه..وبعدين ما انت هتبقي متجوز انت كمان

_ انا مش هتجوز طول ما انتي مش موجوده

= والله انت عيل كداب وبكره افكرك والاقيك باعتلي دعوه فرحك ع البريد المستعجل 

_ رنا انا ماشي 

= طيب خليك شويه دا انا مسافره بعد بكره

_ معلش انا عندي شغل..تروحي وترجعي بالسلامه

= هتوحشني!! 

_ خلي بالك من نفسك

» وسابني ومشي وانا عارفه انه زعل واتضايق بس دا احسن ليا وليه روحت البيت عدي يوم واتنين والنهارده يوم سفري..بقالي يومين مش بكلمه ولا بقابله..حقيقي وحشني اووي..رنيت عليه «

_ الو 

= كويس انك لسه مسجل رقمي والله

_ ……………………..

= انا مسافره كمان ساعه مش هتيجي تودعني

_ لا معلش مشغول شويه..تروحي وترجعي بالسلامه

= ادهم انا عايزه اقابلك

_ لسه فاكره!! لا انتي يادوبك تلحقي طيارتك

= ادهم عشان خاطري انا عايزه اقابلك

_ رنا مش فاضي دلوقتي معلش

= ادهم ارجوك!! 

_ انا في الكافيه بتاعنا

» خدت شنطه السفر وروحتله لقيته قاعد علي الترابيزا اللي متعودين نقعد فيها علطول «

~فاصل اعلاني~

_ كان نفسي اقول والله انها لقته بقا شعره طويل ومتبهدل ودقنه طولت وفي هالات سوده تحت عينه وبيشرب سجاير وبقي مدمن وبتاع بس للاسف هو عرف خبر السفر من يومين بس ف اكيد مش هيلحق يحصل كل دا في يومين بس..ف هنتعامل علي اساس ان شكله مبهدل وكده..عدي اليوم بقا عزيزي القارئ متبقاش رخم_ 

~عدنا من الفاصل~

= ازيك يا ادهم

_ تمام

= وحشتيني

_ ممكن افهم انتي جيتي ليه..انتي خلاص مش قررتي انك تمشي..جايه ليه تاني بقا 

= ادهم افهمني انت حياتك مش واقفه عليا عندك ماهي مثلا ب…

_ سيبتها 

= هي مين دي اللي سيبتها

_ ماهي 

= لييه!! انت مش قولت انك بتحبها وا…

_  *بزعيق* مبحبهااااش اكتشفت اني مبحبهاااش وبحبك انتي..متخيله!! متخيله كميه التخلف اللي انا فيها بحب واحده انانيه مش بتحب غير نفسها سيباني في الحاله دي وهتسافر ليه مش عارف انا مش فاهم انا بحب فيكي ايه فيكي كل العبر..انانيه وعنيده ومتسلطه ومش بتمشي غير اللي في دماغك والباقيين يضربو دماغهم في الحييط مش كده!.. بصي مع اني بحبك وهموت في بعدك دا بس امشي انا مش عايزك في حياتي امشي يا رنا احسنلك لانك مش هتلاقيني في حياتك وهتشوفي ادهم تاني مش هيعجبك 

»  قال كده وسابني ومشي.. انا!!  انا اللي دلوقتي بقيت انانيه بعد كل اللي عمله فيا بقيت انانيه.. قررت اني همشي فعلا حتي لو بحيه مش هوافق اكون مع واحد شايفني انانيه وغلطانه بعد كل اللي حصل دا.. خدت شنطتي وانا بعيط وطلعت ع المطار لقيت بابا هناك ركبنا الطياره وسافرنا سويسرا «

»  يوم اتنين تلاته اسبوع شهر.. وعرفت ان خلاص بدأت حياه جديده في بلد جديده حياه من غير ادهم  النويري…!  «

 ~بعد سنتين~

= يلا يا كوكي قولي ورايا بابي حلووف

+ جججغغغ

= جغغ ايه بس يا كارما قولي ورايا يلا بابي حلوف

_ انتي بتعملي ايه يارنا..بتعملي البت اللي عندها 6 شهور تشتمني ونعم التربيه الصراحه 

= يا اهلاااا بالبيه اللي جاي متأخر…كنت فين يا ادهم

_ كنت في الشغل يا رنا هكون فين يعني

= دا شغل ايه دا اللي لحد دلوقتي..انت شكلك ناوي تنام ع الكنبه النهارده!!

_ لا وحياه امك..والله يبنتي كنت في الشغل

= المشكله ان مفيش اي ادله ضدك ومفييش اي شعر علي هدومك..مين المحجبه اللي بتخوني معاها

_ يختاااي..يبنتي ارحمي امي شويه

= وانا مين يرحمني.. خد امسك بنتك عقبال ما احضرلك الغدا يكش يطمر

_ هيطمر يختي متخافيش..تعالي يا كارما..قولي ورايا يا كوكي مامي نكديه..مامي ايه.. نكديه

= ادهههم

_ دا انا بقولها مامي بتحب الطعميه يا روحي

= ايوا كده اتعدل

» سكت شويه وبص لكارما وقالها «

_ والله يا كارما انا مش عارف انا بحب ايه في بنت المجنونه امك دي بس احسن حاجه حصلتلي اني حصلتها علي سويسرا واتجوزتها وجبناكي يا كوكي

» ومحدش يصدق يجماعه مقوله ” انا والبيست صحاب واخوات بس ” لانكم في الاخر هتتعاركو علي مين يغير للبيبي البامبرز بعد ماعملها علي حجر طنط ابتسام وانتو في زياره عائليه لطيفه عند بيت اهله اللي بتخرجو منها كل مره بخناقه شكل « ????❤

يتبع..

لقراءة الحلقة الثالثة : اضغط هنا

لقراءة باقي حلقات الرواية : اضغط هنا

نرشح لك أيضاً رواية فتاة حطمها العشق للكاتبة حبيبة حسن.