Uncategorized

رواية زين الجزء الثانى الفصل الثانى 2 بقلم سحر فرج

 رواية زين الجزء الثانى الفصل الثانى 2 بقلم سحر فرج
رواية زين الجزء الثانى الفصل الثانى 2 بقلم سحر فرج

رواية زين الجزء الثانى الفصل الثانى 2 بقلم سحر فرج

الكل ضحك وخرجوا على بره عقبال ما عمر يغير لبسوا ويرجعوا على الفيلا كلهم وكمان معاهم حسام اللى قطع اجازته ورجع المستشفى بسبب عمر واللى حصله .
زين حب انه يفضل مع اخوه علشان يكمل كلامه معاه ويساعده كمان فى تغير لبسه وعمر من جواه حس بالخوف بس محبش يظهر خوفه ده علشان خاطر والدته .
_______________
وفى مكان تانى خالص عند يوسف فى الفيلا كان الهدوء سيد المكان .
يوسف صحى من نومه وطلب فنجان قهوته وفتح موبيله، وكانت معظم البوستات عن الفرح الاسطورى اللى أتعمل لزين الجبالى وعمر اخوه ودكتور حسام صديقهم .
وفضل يقلب شويه على بعض الصور اللى نزلت على السوشيال ميديا، وبظروفها لمح فى وسط الصور الكتير اللى قابلته، صورة للبنت الجميله اللى لفتت نظره أول لما عيونه جت عليها، واللى منزلتش عيونها من عليه طول الفرح، واللى بظروفها إكتشف أنها أخت أيه عروسه دكتور حسام .
أبتسم أول لما أفتكر نظراتها ليه وقرب الموبيل منه أكتر وداس على الصورة وكبرها على وشها أكتر وأكتر وبينه وبين نفسه
قال: شكلك شقيه وعيونك بتقول حاجات كتير جدا يا قطة، بس???? مسيرى افك شفرة النظرات دى .
موبيله رن فجأه وكان عاصى أخوه فرد وقال: اهلا يا عاصى .
عاصى : صباح الخير يا يوسف .. اخبارك ايه يا حبيبى وحشنى يا ابنى انت فينك؟
يوسف: صباح النور يا حبيبى ومتقلقش اخوك موجود اهو وتمام الحمد لله، المهم أنت عامل ايه طمنى عليك وعلى شوشو؟
عاصى: الصراحه تعبت يا يوسف، تعبت من كتر الشغل والمشاغل اللى انا بقالى زمن كبير فيها لحد ما خلاص زهقت وجبت اخرى .. والاهم ان نفسى اهتم ببنتى الوحيدة اللى مليش غيرها وكانت هاتضيع منى لولاك أنت يا يوسف .
يوسف حس إن اخوه متغير وحزين ونبره صوته دليل على كده.
فقال: مالك يا عاصى انا اول مرة اسمعك تقول كده فى حاجه ولا ايه قولى يا عاصى؟!
عاصى اتنهد وقال: مش وقته يا يوسف المهم انا بكلمك علشان تيجى وتقضى اليوم كله معانا ونتغدى مع بعض .. محتاجك جنبى اوى يا يوسف الفترة دى.. محتاجك تصلح اللى بينى وبين شاهى لانك اقرب واحد ليها وممكن تقنعها انها تسامحنى وتقدر اللى أنا كنت فيه هى بتحبك وهاتسمعلك .
يوسف بحزن رد وقال : ماشى يا عاصى.. شويه كده وهاجى واقعد مع شاهى وأتكلم معاها متقلقش، المهم أنت متزعلش نفسك وكل شىء هايرجع زى الاول واحسن إن شاء الله.
وقفل يوسف الموبيل وحس بحاجه غريبه فى صوت اخوه، زى ندم او حزن لاول مرة يحس بيهم طول السنيين الطويله دى.
وقام وقف وراح علشان يجهز نفسه ويستعد انه يقضى اليوم كله مع أخوه وشاهى .
__________________
واودام باب المستشفى زين ومامته وعمر وكمان خالتهم سماح ركبوا عربيتهم وراحوا على الفيلا كلهم ، وكان وراهم حسام بعربيته علشان يروح هو كمان معاهم، ويروح لأيه عروسته اللى بعد عنها فى أهم ليله من ليالى العمر كله بسبب عمر واللى عمله فى نفسه وفيهم .
وأول لما وصلوا ودخلوا الفيلا دادة زينب استقبلتهم بفرحه كبيرة وميرفت زغرطت اول لما شافت عمر رجع معاهم .
البنات كانت قاعده فوق واول لما سمعوا صوت الزغروطه بسرعه نزلوا على تحت كلهم وفرحوا جدا أول لما شافوا عمر رجع معاهم .
وشاهندا جريت علبه بكل فرحه واترمت فى حضنه اودام الكل.
حسام ابتسم وقرب من أيه وسلم عليها بكل حب وغمز لها بعيونه وده اللى خلاها تتكسف جدا ووشها يحمر .
زين كمان كان واقف وعيونه على ليل اللى قربت منه على طول وابتسمت وقالت: حمد الله على السلامه طمنى انت عامل ايه يا حبيبى؟
زين ابتسم ورد وقال : الحمد لله انا كويس المهم انى اطمنت على عمر ورجع بالسلامه معانا.
سميحه قعدت على اقرب كرسى تستريح هى وسماح .. ودادة زينب قربت منها وقالت: الف سلامه على أستاذ عمر يا سميحه هانم ، دى عين وصابته اكيد .. انا هاروح اجيب بخور وابخرهم كلهم من عين الحاسدين .
عمر بهزار بصلها وقال: ايوا والنبى يا دادة بخرينا كلنا وانا بالذات حد باصصلى فى أم الجوازة دى شكلى كده .
شاهندا ضربته فى كتفه وقالت: يا أبنى لسانك ده اللى جايبك الارض ارحم نفسك شويه وبعدين انا مخصماك اصلا وحسابى معاك بعدين يا عمر بيه، وبعدت عنه وراحت قعدت جنب مامتها.
عمر باستغراب: ليه بس يا شوشو هو انا اقدر ازعلك يا روح قلبى!! وجرى وقعد جنبها وحط أيده على كتفها.
شاهندا: أوعى أبعد عنى مخصماك وملكش كلام معايا من هنا ورايح .
عمر قام وقف وبدون اى تفكير ولا خجل من كل اللى كانوا موجودين مد ايده وشال شاهندا فى لحظه وقال: الموضوع شكله كبير ولازم نطلع على اوضتى ونحل الحكايه دى عن اذنكم يا جماعه لما اشوف المدام بتاعتى زعلانه منى اوى كده ليه سلام.
.
شاهندا بصوت عالى ردت وقالت : نزلنى نزلنى يا مجنووووون .
الكل بيضحك على منظرهم وشاهندا بتصرخ وبتقول : نزلنى نزلنى الحقينى يا ماما.
الحقينى يا ليييييل.
عمر بضحك رد عليها وقال : ماما مين ؟ وليل مييييين يا شوشووووو انتى مراتى وطلع على فوق على طول .
سميحه وسماح والبنات بيضحكوا على عمر وعلى اللى بيعمله، لكن زين واقف حزين وسرحان وليل خدت بالها وعيونها جت فى عيونه وحست بالجواه وبخوفه وقلقه على اخوه الوحيد.
تليفون حسام رن فجأه فامد أيده فى جيب الجاكيت وطلعه وابتسم اول لما شاف اسم عم حسن .
حسام : اهلا يا راجل يا طيب .
عم حسن : اهلا بيك يا حسام يا ابنى .. وصباحيه مباركه يا حبيبى .. طمنى عاملين ايه وازى أيه .. أصل برن على تليفونها مش بترد فقولت اتصل عليك انت بقى واطمن عليكم .
حسام : أيه قاعده جنبى اهى خد اطمن بنفسك عليها .
وفعلا حسام ناول أيه الموبيل وأيه قامت وقفت واستأذنت انها هاتخرج تتكلم فى الجنينه بره براحتها وخرجت على برة على طول .
أيه : بابا حبيبى وحشتنى يا روح قلبى، ازيك وازى ماما وازى عبير .
عم حسن أول لما سمع صوت أيه قال: أيه حبيبتى وحشتينى يا نور عين ابوكى، طمنينى عليكى يا قلبى، عامله ايه؟
وصباحيه مباركه يا عروسه.. خدى أمك الاول عاوزة تطمن عليكى ومش صابرة لما انا أطمن واسمع صوتك .
أم أيه : صباح الفل يا عروسه .. اخبارك ايه يا حبيبتى وحشتينى اوى والبيت فاضى من غيرك.. طمنينى حسام عامل معاكى ايه؟
وفضلوا يتكلموا شويه وأيه طمنتهم عليها وعلى ليل وزين وحكت لهم على اللى حصل لعمر وبعدها قفلت مع والدتها ودخلت على جوا.
____________________
يوسف كان خلص لبسه ونزل على تحت وخد مفاتيحه وركب عربيته وراح على فيلا عاصى اخوه .
وهو فى الطريق موبيله رن وشاف اسم شاهندا فابتسم ورد وقال: انا فى الطريق اهو معلش اتاخرت عليكم شويه اطمنى .
شاهى بعياط وانهيار تام : الحقنى يا عمو يوسف الحق بابا بسرعه بابا
بيموووووت .
يوسف اتصدم اول لما سمع صوت شاهى بالمنظر ده واللى قالته وفرمل العربيه فجأه ووقف بذهول
وقال: بابا ماله يا شاهى انطقى؟
شاهى بعياط: مش عارفه مش عارفه فجأه دخلت اوضته لقيته واقع على الارض وفاقد الوعى خالص ومش بيرد عليا واتصلت على الدكتور بتاعه وكلمتك على طول، تعال بسرعه يا عمو تعال ارجووووك .
يوسف قفل من غير ولا كلمه الموبيل وشغل العربيه بسرعه تانى وطلع بيها بسرعه رهيبه وراح على الفيلا .
واول لما وصل بعد نصف ساعه لان الطريق كان زحمه جدا وهو فى اكتوبر وهما فى التجمع الخامس، شاف عربيه إسعاف اودام باب الفيلا وخارجين من جوا وهما شايلين عاصى أخوه على النقاله ودخلوه عربيه الاسعاف .. وشاهى منهارة تماما وأول لما شافت عمها يوسف جريت عليه بسرعه واترمت فى حضنه .
شاهى : بابا يا عمو بابا هايضيع منى بابا يا عمووووووو.
يوسف بيحاول يهديها ويطمنها رغم الخوف اللى جواه وبيخاول يتمالك نفسه اودام شاهى وبسرعه ركبها معاه فى عربيته، وطلعوا ورا عربيه الاسعاف على طول ، وراحوا على مستشفى الدكتور حسام .
وطول الطريق شاهى مبطلتش عياط من كتر خوفها وقلقها على باباها .
ويوسف كان بيطمنها ويهديها ورغم خوفه.
________________
الكل كان متجمع عند زين فى الفيلا،
ودادة زينب بدأت تجهز السفره علشان الغداء .
وليل وأيه طلبوا انهم يروحوا ويساعدوها هى وميرفت فى تجهزيها .
وسميحه وسماح كانوا قاعدين بيتكلموا مع بعض عن اللى حصل وأن سميحه مش مطمنه وحاسه ان فى حاجه هما مخبينها عليها
بس مش عارفه هى ايه!؟
وحسام وزين دخلوا اوضه المكتب، وزين بلغه بالحوار اللى دار بينه وبين عمر .. وأن عمر قرر بعد شهر العسل على طول وبعد ما يرجعوا من السفر هايعمل العمليه البسيطه دى ومش وقتها خالص انه يعملها فى الوقت ده علشان محدش يحس بحاجه وخصوصا والدته .. بس أهم حاجه أنه ميعرفش أى حد منهم خالص وكمان شاهندا.
زين بصله بحزن وقال : انا بحمد ربنا ان عمر واخد الموضوع عادى خالص عكس ما كنت متوقع نهائى.
حسام : ان شاء الله الموضوع هايبقى بسيط ومش هايبقى فى شىء خطير، بس لازم نتأكد من كده.. وبعدين ده عمر يا زين.. من أمتى عمر بياخد أى حاجه بجديه المهم أطمن أنت كمان وأفرد وشك ده علشان خاطر والدتك متخدش بالها من أى شىء وكمان علشان عمر .
وفجأه موبيل حسام رن فاستغرب انه من المستشفى، فتوقع ان فى حاجه كبيرة أو عاوزين يسألوه عن حاجه مهمه
فرد وقال : السلام عليكم
دكتور معتز رد السلام وبلغه بوصول عاصى اخو يوسف الشريف فى حاله حرجه جدا ولازم يروح المستشفى فورا .
حسام اتفاجأه وقفل مع دكتور معتز وبلغه انه مسافه السكه وهايكون عنده، وأنهم يجهزوا أوضه العمليات فورا عقبال لما هو يوصل .
وأول لما قفل زين باستغراب قال: معقول أنت هاترجع المستشفى تانى؟ حصل حاجه
ولا ايه؟
وبعدين يا ابنى مش أنت المفروض فى اجازة، ما فى 100 دكتور غيرك هناك .
حسام قام وقف وقال: الحاله حرجه جدا للأسف يا زين، وبعدين ده عاصى أخو يوسف الشريف ولازم أكون هناك فى أسرع وقت .
زين بصدمه: معقول عاصى اخو يوسف
أنا لازم اجى معاك علشان نقف مع يوسف فى حاجه زى كده يالا بينا .
وخرجوا من اوضة المكتب بمنتهى السرعه وسميحه شافتهم واستغربت خروجهم والحاله اللى هما فيها فقربت من زين وقالت: خير يا حبيبى فى حاجه حصلت ولا ايه؟ ورايحين على فين كده بالسرعه دى، ده البنات بتجهز السفرة؟!
زين باستعجال قال: رايحين المستشفى عند حسام يا ماما .. عاصى ابوا شاهى حالته حرجه جدا ولازم نكون معاهم ونكون جنب يوسف كمان .
سميحه بصدمه وحزن ردت وقالت : لا حول ولا قوة الا بالله العلي العظيم ربنا معاه ويقومه بالسلامه ان شاء الله.
بس يا زين يا حبيبى كنتم قعدتوا واتغديتم الاول وبعدين تروحوا، البنات زمانهم جهزوا السفره والأطباق .
زين بأستغراب بصلها وقال : بقول لحضرتك حالته حرجه تقوليلى اكل وسفره برضه يا ماما.
حسام : خليك انت طيب يا زين واتغدى معاهم، لكن انا لازم أروح فورا، وبعدين ابقى تعال على هناك .
زين : لا يا حسام ده واجب ولازم اكون جنب يوسف فى ظروف زى كده.. هاجى معاك يالا بينا ولو سمحتى يا أمى اعتذرى للكل بالنيابة عنى انا وحسام.
وفعلا خرج زين هو وحسام بمنتهى السرعه وكل واحد فيهم ركب عربيته وطلعوا بيها وراحوا على المستشفى .
_________________________
يوسف وشاهى بنت أخوه كانوا واقفين اودام أوضه الطوارىء وحالتهم سيئه جدا وخايفين وقلقانين على عاصى .
يوسف بيحاول يطمن شاهى اللى كانت مش مبطله عياط وحزينه على باباها، وحست انها السبب فى حالته دى، بعد ما حاول انه يقرب منها ويعوضها كل السنين اللى فاتت من عمرها وكان هو بعيد عنها ومش مهتم بيها نهائى وكان كل همه فى الدنيا دى شغله وشركاته ومصلحته وبس .
ومع محاولاته الاخيرة ان شاهى تسامحه وتحاول تنسى اللى حصل منه، لكن للأسف شاهى رفضت انها تقعد معاه وتتكلم معاه كأب وبنته.. ومقدرتش تنسى انه كان السبب الرئيسي هو ومامتها وقله اهتمامهم بيها فى اللى هى وصلت ليه وكان هايحصل لها لولا ليل ووقفتها جنبها.
وكمان وصلوها للبنت المغرورة المتكبرة المستهترة فى كل شىء.
البنت اللى تصورت أن أى شىء ممكن تشتريه بفلوس باباها، وبنفوذه وقوته .
البنت اللى خلوها فى وقت من الاوقات انها تتفق مع مجرم زى”حسان”
انه يخطف ليل ويغتصبها علشان توصل هى”لزين الجبالى”
البنت اللى عمرها ما حست بلمه العيله وحبهم لبعض ودفئهم وحنانهم وخوفهم على بعضهم .
وكان عمها يوسف الوحيد اللى تقدر تقعد معاه وتتكلم معاه وهو دايما اللى كان بيحاول يصلح منها ويوجها للصح، بس للاسف مقدرش غير بعد فوات الاوان وجعل منها انسانه مختلفه عكس شاهى اللى كل الناس عرفاها .
فاقت شاهى من شرودها على صوت عمها يوسف وهو بيقول بأستغراب: دكتور حسام!!
حسام وزين راحوا ناحيته وقربوا منه وسلموا عليه هو وشاهى .
يوسف باستغراب بصلهم وقال : انتم بتعملوا ايه هنا؟ وازاى جيتم وانتم فى اول يوم من شهر العسل؟
زين : بعدين هانقولك على كل شىء، المهم الف سلامه على اخوك وبإذن الله هايبقى كويس ويقوم بالسلامه..أنا أول لما عرفت من حسام اللى حصل جيت علشان اطمن عليه بنفسى، واكون معاك فى وقت زى ده.
حسام : الف سلامه عليه يا يوسف وانا مطر اسيبكم وادخل اشوف الحاله بنفسى وهاخرج واطمنكم متقلقوش .
يوسف : ياريت يا حسام لو سمحت ياريت تطمن وتطمنا.
حسام : ان شاء الله خير متقلقوش بعد اذنكم، ودخل وسابهم واقفين بره اودام باب الطوارىء.
شاهى غصب عنها عيطت بحرقه اكتر ويوسف قرب منها وضمها لحضنه وحاول يهديها ويطمنها.
موبيل زين رن وعرف ان ليل هى اللى بتتصل فابعد شويه عنهم وراح وقف جنب شباك كبير فى الممر اللى كانوا واقفين فيه ورد
وقال : حبيبه قلبى.
ليل برقه : يا سلام لو كنت فعلا حبيبه قلبك مكنتش خرجت من غير ما تقولى، انا زعلانه منك، وبعدين انا بتصل بس علشان اطمن على استاذ عاصى مش اكتر .
زين فهم ان ليل زعلانه فقال : روح قلبى غصب عنى والله التليفون جه فجأه لحسام من المستشفى واول لما عرفت اللى حصل خرجت انا وهو على طول علشان نقف جنب يوسف فى الظروف دى سامحينى.
ليل حاولت تغيظه فقالت : افكر فى الموضوع ده بعدين .. المهم هو عامل ايه دلوقتى؟
زين اتغاظ فعلا وقال : نعم يا اختى تفكرى!؟
ليل بتضحك بينها وبين نفسها عليه وعلى كلامه وقالت : اه افكر عندك مانع؟ المهم طمنى على الاستاذ عاصى عامل ايه؟
زين اتنهد وقال : ماشى يا ليل زى ما تحبى .
المهم حسام دخل عنده ولسه مخرجش واول لما يخرج هابقى اقولك سلام وقفل
الموبيل .
ليل اتصدمت اول لما زين قفل الخط فى وشها ومكنتش تتوقع أنه ياخد كلامها فى محمل الجد كده..هى كانت بتحاول تهزر بأسلوبها معاه بس الظاهر زين معرفش كده واتسرع وقفل فى وشها.
ليل كانت بتتكلم وهى فى جنينه الفيلا وبعدها دخلت على جوا علشان تبلغ خالتها سميحه وأيه صحبتها .
واول لما دخلت شافت عمر هو وشاهندا وهما نازلين من فوق وبيهزروا وباين على وشهم فعلا انهم عرسان فى شهر العسل .
عمر اول لما شافها بصلها وقال : لولوووو حبيبتى، ابن خالتك ميت من الجوع يا ترى عندكم أكل أيه النهارده وفين زين وحسام مش شايفهم يعنى؟؟
ليل بصتله بكل غيظ ومردتش عليه وراحت قعدت جنب خالتها سميحه من غير ما تنطق ولا كلمه.
عمر باستغراب كمل نزول السلم هو وشاهندا وقال : مالها دى هى مش بترد ليه؟؟
وبعدين أيه المعامله دى بس يا جدعان ده انا عريس ولا انتم مش واخدين بالكم.
سميحه بتضحك على كلامه وقالت : على اساس أنها مش عروسه هى كمان وفى أول يوم فى شهر العسل بتاعها ومش عارفه تتلم على عريسها زى ناس .
عمر بصدمه رد وقال : انا شامم ريحه تريقه وحسد فى الموضوع ولا إيه؟ وبعدين زين فين هو وحسام مش شايفهم ليه؟
يتبع ……
لقراءة الفصل الثالث : اضغط هنا
لقراءة باقى فصول الرواية : اضغط هنا

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى