رواية ليل الفصل السادس والثلاثون 36 بقلم ياسمين خالد
 |
| رواية ليل الفصل السادس والثلاثون 36 بقلم ياسمين خالد |
رواية ليل الفصل السادس والثلاثون 36 بقلم ياسمين خالد
رودينا بتقاطع كلام سليم ورحيم بتساؤل: وإنت مهتم أوي كده ليه ياسليم تعرف إني مُرتبطه ولا لأ!
=سليم بفزع وإرتباك ..ها ، لأ ، لأ مفيش أنا كنت بس بسأل عن العيله كلها مش إنتي بالتحديد .
=بتضيق عينيها بمكّر : لأ والله !
_إبتلع ريقهُ: أه ..أنا ..أنا
رودينا ف الوقت ده إتأكدت إن حازم لما كان واقف ف البلكونه كان بيدعي ليها هي
____
“بيقاطع صوت سليم وكلامه اللي مش مترتب صوت الباب وحازم بيفتحهُ ، بيقفل الباب وبيلف وشهُ بيلاقي رودينا ، وسليم واقف وشه شاحب ومتوتر ..
_حازم ل سليم : ف حاجه ياسليم !
“حازم ف بالهُ ، الله يخربيتك شكلك بهدلت الدُنيا “
= رودينا بمكّر : لأ مفيش ، أصل سليم كان بيسأل رحيم انا مرتبطه ولا لأ ولما نزلت وسمعته وسألته بتسأل ليه ياسليم ! من ساعتها وهو واقف متوتر كده.
“حازم بص ل سليم نظرات حاده ، حازم اتوتر وحَس إن رودينا حَست ب إن سليم بيجِس نبض رحيم وعاوز يستفسر علشان عرفت انه معجب بيها “.
ابتلع ريقهُ وإتكلم ب إبتسامه بيداري بيها إحراجهُ والتوتر اللي كان فيه قرب علي سليم ولمس شعروا ب مشاكسه : هو كده دايما كاسفني ب فضولهُ ده ، اكيد مش قصدوا حاجه “بيخبط كتف سليم ” مش كده بردو ياسليم !
_بيضحك ضحكه بلهاء : ااه فعلا ، والله نفسي ياطنط رودينا ابطل الفضول ده
=قالت ب ابتسامه : طنط ! طنط ايه ياسليم كبرتني مره واحده عندك رحيم اهو قدك وبيهزقني ف الرايحه والجايه قولي يارودينا عادي ، وعمتًا هريحك وأرد على سؤالك انا ياسيدي مش مرتبطه ولا مخطوبه ولا بحب حد ، ها بقي عندك ليا عريس .
_قال ب ابتسامه وهو بيغمز ل حازم : اه عندي عريس قمر والله .
=ضيقت عينيها :ده الموضوع بجد بقى !
_ اه بجد
= حازم بَص ل سليم نظرات حاده بمعني انه مينطقش
_رودينا بغموض: ف حاجه يااستاذ حازم بتبصله ليه !
= بصلها ب ارتباك وقال: لأ مفيش حاجه ، بس هو ميعرفش عرسان ولا أي حاجه بس هو بيحب يهزر وممكن حضرتك تزعلي .
_ ممم ماشي ، عن إذنك أنا هنزل .
=رحيم : رايحه فين !
_رودينا : بتسأل ليه !
= ردي علي السؤال من غير نقاش
_ما تيجي تاخُدلك قلمين !
=بيغمزلها بمُشاكسه : لما نتجوز
_رودينا ب إبتسامه : طموحاتك عاليه أوي يارحيم
=رايحه فين بجد !
_ نازله هقابل ماما
=وواخده شنطة هدومك ليه !
_هنتعشى سوا برا الاول وبعدين هبات معاها يومين .
= متتأخريش ؟
_حاضر ، خلي بالك من نفسك.
= طب صحيح متعرفيش مازن عمل إيه !
_ قالت بضيق : بابا إتصل ب مروان علشان من الصبح مع عمو لؤي وحور ، وقالهُ انه لسه ف العنايه بس اتحسن عن اول ما دخل العنايه .
=حازم ل رودينا: هو فِ مستشفي إيه !
_الحياه .
= خلاص هروح أشوفه
_رودينا ب إستغراب : هو إنت ينفع تروح أي مستشفي عادي !
=ضحك ب فخر : أه ينفع ، انا الحمدلله متخرج من كليه الطب بقيت مُشرف علي عيادات ومستشفيات محافظه القاهره والإسكندريه إستشاري متخصص لعلاج الحساسيه ، ف الوقت إللي جيه رحيم فِ الطوارئ كنت انا بشرف لإني عارف إن ف الوقت ده الدكاتره بتهمل علشان الأعياد وكده ، ممكن يكسلوا يرفضوا حاله مثلا ميردوش يستقبلوها ، بركز أكتر علي المستشفيات اللي عارف انها هتعمل كده ، وانا اللي أشرفت علي حاله رحيم بنفسي .
_رودينا : طب هو أنا أسفه علي السؤال إللى هسألوا ، يعني إنت ما شاء الله تقدر تجيب شقه تمليك ليه تبهدل نفسك ف إيجار وكده !
=الحقيقه أنا عندي شقتين واحده ليا وواحده لِ سليم بأمر الله لما يتجوز أكون قدرت إني أبنيله مستقبلهُ ، بس انا حابب شقتي التمليك دي أقعد فيها مع شريكه عمري ، مش عارف تفكيري غلط ولا صح بس حابب نبتدى حياتنا سوا فيها ، وكذلك سليم والحقيقه دورت علي كذا شقه مرتاحتش انا وسليم زي ما إرتاحنا هنا وإطمنت علي سليم اكتر علشان فِ وسط عيله وان يوم ما يحصل حاجه وانا مش موجود هيلاقي حد يلحقهُ ، ولما قعدت مع الحاج جدك رفض اني اشتري الشقه ولما عرف ظروفي وكده وافق .
_ظروف إيه !
=سكت شويه _ إن ..
“بتقاطعهم صوت ليل وهي بتفتح الباب وبتبص ب استغراب “
_ سلام عليكم ، إيه ياولاد واقفين علي السلم كده ليه !
=حازم بتوتر _لأ مُتشكر انا نازل الشغل.
_بصت لرودينا بحيره وهي بترد علي دكتور حازم: أه طب ربنا معاك ، وإنتي يارودينا واخده شنطتك ورايحه فين !
= رايحه عند ماما
_ طب مفيش بوسه ل ليل قبل ما تمشي !
“رودينا قربت عليها وحضنتها _ مقدرش امشي من غير ما اخد الحضن ده ، ولا اديكي السُكر ده
_أه يابكاشه انتي بتعرفي تغلبيني ..طب مستنتيش أنس يجي ليه يوصلك !
= انا عرفت إنه مع عائشه ومرضيتش إني أزعجهم وكده كده ماما هتستناني عند موقف الاتوبيسات ده علشان هنتعشى سوا الأول وبعدين هنروح البيت .
_ خايفه انس يزعل
= لا متقلقيش هبعتله مسدج وهقوله محبتش ازعجكك علشان تفضل جمب عائشه هي محتاجاك ..وأكيد هيقدر إني كنت عاوزاه يفضل جمبها.
_طب روح يارحيم وصلها لحد الموقف.
= حاضر ياماما .
_سلميلي على سهيله يا رودينا.
=حاضر ، يوصل يالوله
_حضرلك الخير يارب ، متتأخرش يارحيم علشان تاكل..وانت كمان ياسليم روح معاه وتعالى بسرعه علشان تاكلوا سوا.
=حاضر ياماما
_حاضر ياطنط .
=دكتور حازم بشُكر _ مُتشكر جِدًا لحضرتك علي إللي بتعمليه كل يوم مع سليم هو بيحكيلي
_ سليم إبني ياحازم
=ربنا يباركلك يارب .
_ يارب ، توكل علي الله ومتقلقش عليه .
_ حاضر سلام عليكم .
نزلوا هما الأربعه سوا لكن حازم كان ماشي وراهم فاضل متابع سليم ورحيم ورودينا ، لحد ما رودينا قابلت مامتها وحضنتها
وهو مبتسم وشايف إبتسامتها افتكر مامتهُ اللي كان بيترمي ف حضنها كل يوم ..
_سليم بيقرب علي حازم : عاوز حاجه ياأبيه !
=خلي بالك من نفسك ومتغلبش طنط ليل ، إتفقنا!
_أه إتفقنا ، هتتأخر؟
=لأ مش هتأخر.
_ماشي ، سلام.
=سلام.
_________
فضل واقف قدام عربيتهُ لحد ما رودينا ومامتها عدوا قدامه ب عربيه أوبر ، رودينا نزلت إزاز العربيه وإبتسمتلهُ
بادلها نفس الإبتسامه بنظره كلها حب وهو بيقولها: مع السلامه .
_______
_سهيله بمشاكسه : إيه الجميل سرحان ف ايه ! ومين ده إللي شاورلك !
_هه!
= هه ، لا قدام هه وسرحان بقي يبقي الموضوع اكبر من مع السلامه اللي قالهالك .
_قالت بخجل :إيه ياماما ده ، لا أكيد مفيش حاجه من إللي فِ بالك خالص .
=بتضيق عينيها ب مشاكسه : يابت ! علي ماما بردو !
_لأ عادي يعني هو ساكن جديد مش أكتر ولا أقل
=ساكن بس يعني !
=سهيله قصدك إيه يعني !
_يعني الولد بصاتهُ غريبه شويه !
=رودينا ب فضول :إزاي !
_سهيله بغموض: يعني بيبص ب لهفه كده ونظرات كده واحد بيحب واحده.
=رودينا بحِده : ايه ياماما ده اكيد لا طبعا هيحبني ازاي! مشافنيش غير مرتين تقريبا.
_ حب من اول نظره بقي وكده.
=بس ياسهيله يابكاشه اسكتي بقى .
_قالت ب ابتسامه : حاضر انا هسكت أهو .
=”رودينا سرحت ف الطريق ، وف بالها سؤال هو إيه الظروف إللى بسببها جدو وافق إن حازم يعيش معانا ف العماره رغم إنه رفض ناس كتير جدًا غريبه تسكُن فِ البيت
وهو كان لسه هيقولى بس لولا طنط ليل ..وليه نظراته ليا غريبه على رأي ماما مع إنه مشافنيش كتير !
قطع شرودها سهيله _ الجميل سرحان فِ إيه !
=مفيش عادي ، ها هناكل فين !
_إنتي حابه فين !
=عند ماما دهب .
_خلاص حاضر هأكلك من عندها .
=طب وتيتا هتتعشى لوحدها !
_تيتا ياستى حضرتلها العشا والمفروض انها هتاكل وتصلي وتنام لكن لما عرفت إنك جايه صممت إنها تستناكي
=ردت بفرحه : بجد ياماما !انا بحب تيتا أوي وبحب حضنها الدافى والونس إللي فِ كلامها .
=ربنا يباركلنا فيها يارب
_يارب ، وخالو حسام وطنط ندى وعُدى مش هيجوا ! وحشوني أوي .
=لأ قولتلهم إنك جايه وحسام هياخد اجازه بكره وهيجي يقضى اليوم من أولهُ معانا بكره بإذن الله هو وندى وعُدي كمان وفرحوا أوي إنك جايه وكان نفسهم أنس كمان يجي بس انا مش عارفه ظروف شغله بس لو مقدرش يجي من أول اليوم ، هخليه يجي يتغدى معانا بعد شغلهُ
=خلاص إن شاء الله.
_ان شاء الله
_________
حازم بيركب عربيته ، بيسوق ف طريقهُ للمستشفي
________
ييفتكر مامتهُ وهو سايق
“فلاش باك”
__________
_صباح الخير ياماما.
=”بتتكلم من المطبخ ” _صباح النور ياعيون ماما ، سليم صحي ولا لأ !
_بصوت غالبه النعاس _تقريبا نايم.
=بتضحك _ يامسطول يعني اخوك معاك ف الاوضه ومتعرفش نايم ولا صاحي.
_انا اصلا مش محدد إذا كنت نايم ولا صاحي.
=بتضحك _ انت مش شايفني أصلًا ياحازم ، يلا ياحبيبي علشان شغلك متتأخرش أدخل الحمام وخد دش سريع كده علشان تفوق، لازم تثبت نفسك إنك قدها وإنك شاطر وإنك تقدر توفق ما بين كليتك وشغلك .، وبإذن الله تتخرج علي خير وتبقي أشطر دكتور ف الدنيا
_حاضر ياأمي.
=هحضرلك الفطار عُقبال ما تخلص
_خلاص ماشي
“بيدخل ياخد دش وبيخرج ، بيلاقي مامته قاعده سرحانه لدرجه محستش ب حازم وهو بيقرب منها ..الاكل مرصوص علي السُفره بطريقه حلوه قرب منها وقطع شرودها وهو بيدق علي السفره : إيه ياست الكل .
_اتفزعت ودارت حُزنها بسرعه ب إبتسامه : خلصت ياحبيبي .
= أه خلصت .. إيه ده !
_بصتلهُ بِ حِده والرعب بان علي ملامحها: إيه ياحازم !
=وشك أزرق كده ليه !
_إبتلعت ريقها بقلق : لا ده انا بس كنت بفتح المطبخ وف حله وقعت عليا ف إزرقت .
=رد بعصبيه : لا دي مش حله ، ده هو إللي ضربك مش صح !
_قربت عليه بخوف وحطت إيديها على بؤه وقالت بصوت خافت: شش علشان خاطري ياحازم ده نايم جوا مش عاوزاك تعلي صوتك بالله عليك.
=بِعد عنها خطوتين : لأ هعلي صوتي ، حرام إللي بيتعمل فيكي ده ، ده لو كافر مش هيعذبك كده .
_الأم بقلق : طب علشان خاطري خلاص
“الاب بيفتح الباب وعيونه مقفوله ، قال بعصبيه وعجرفه : بتعلي صوتك علي الصبح ليه يالا !
= فِ إنك لولا إنك بالإسم بس أبويا كنت زماني حبستك من زمان .
_الاب ضحك بسُخريه : تحبس مين ياعبيط ، تحبسني أنا !
“قعد يتكلم وهو بياكُل ببرود ” طب إحبسني يلا بسرعه علشان مستعجل “ضحك بتريقه “
=حازم بعصبيه لمامته : قولتلك انتي اللي مصبراني عليه ، انتي اللي معجزاني ومخلياني مش عارف أعمل حاجه معاه ، انتي حابه الذُل اللي بيذلهولك ده ! ده مش أب ولا ينفع يكون زوج ولا يصلُح يكون أي حاجه فِ الدُنيا ، ضرب وإهانه ليكي ولينا ، مفيش إحترام دايمًا بيهينك قدام الناس وقدامنا ، ودايما بيعاملنا على إننا مش أولادهُ ، عمروا ما خدنا ف حضنه ، عمروا ما خدنا فسحنا ولا سمعنا دايما كان مصدر خوف ورعب لينا ، كنت طفل وبخاف ، بخاف أول ما أسمع صوت مفتاحهُ وإنه هيفتح الباب ، كنت ببقى سهران وأول ما أسمع صوت الباب بيتفتح بعمل نفسي نايم ، انا بلومك ياأمي علي إختيارك ، معرفتيش تختاري أب صح ، أب نتحامى فيه من الدنيا
“دموع الأم مغرقه وشها ” قالت بصوت مُتقطع _ خلاص ياحبيبي كفايه ، كفايه علشان خاطري .
_الاب ببرود وهو بياكل: ها كمل سامعك
_حازم ب إستحقار : ياويلك من عذاب ربنا ، والله فانيه ، وكل أذى شوفناه بسببك مش مسامحينك فيه .
_الأب قام بهدوء وقرب علي حازم وهو بيضحك بخُبث : خلصت !
= الكلام اللي جوايا لو قعدت سنين عمري كله أتكلمهُ ، مش هيخلص.
_ أممم “بيصعقهُ بالقلم “.
حازم بيبص فِ عيونه وهو بيجز علي سنانه وبيضغط علي إيدو بقوه والدموع متجمعه فِ عينهُ
دخل أوضتهُ من غير ما ينطق حرف
مامتهُ دخلت وراه وقفلت باب الأوضه بقوه ..وسمعت باب الشقه اتقفل عِرفت إنه خرج
قربت علي حازم ودموعها ماليه وشها ، لمست ايدو بحنيه وقالت بعياط :حقك عليا ياحبيبي ، انا غلطانه ،انا مكنش بإيدي إني أختار جدك غصب عليا إني أتجوزوا علشان من عيله ومعاه وِرث وشقه بص للفلوس مبصش لراحه قلبي وبالي ، معرفتش أخد إللى قلبي رايدوا علشان كان علي قد حالهُ ، أهلي ربطوا السعاده بالفلوس ، قالولي إللي بيحبك ده هيجوعك وهيسففك التُراب ، لكن ميعرفوش إني كنت هرتاح معاه وكان هيبقي أب حنين أوي ليكم بابا حرمني من إني أشيل أسمه ، وأبات كل ليله ف حضنه ، حرمني من حنيته وخوفهُ ، حرمني من لهفته عليا وقت تعبي ، حرمني من طلتهُ عليا إتجوز وعاش حياته وخلف ولسه لحد الأن بعرف اخبارهُ من اخته ، غصب عني بلاقي نفسي بسأل عليه ، انا اللي مفروض كنت أبقى مكانها هو كان حقي أنا مش هى ياحازم انا تعبانه أوي ياإبني وإستحملت أبوك ، إستحملته عشانكم إنتو بس ، إنتو كل حاجه بالنسبالي ، إنتو عوض ربنا ليا .
“إترمى ف حضنها وعيطوا بحُرقه ، سليم وقتها كان صغير صحى علي صوت العياط وإستخبى ف حضنهم هما الإتنين وهو مش فاهم حاجه ..الأم خدتهم ف حضنها وطبطبت عليهم برفق ..
_________
“Back “
_________
فاق من شرودهُ على صوت واحده بتزعق، بنت شعرها كيرلي ، لابسه توب ، حاطه فول ميكاب ومعاها صُحابها البنات ومشغلين ميوزك عاليه جدًا
_ إتكلمت بقله زوق :مش تفتح يا كابتن إنت ، عمالين نيجي يمين تيجي يمين شمال تيجي شمال نديلك كلاكسات ومفيش فايده ف ايه !
=مسح دموعهُ وركن علي جمب ونزل من عربيته وهي كمان نزلت وربعت إيديها وبصتلهُ بتحدي
بصلها بنفاذ صبر وقال :اكيد ياانسه لو إتكلمتي بزوق وبصوت واطي مش هيقلل من برستيجك قدام صحابك فِ حاجه أكيد انا مش قاصد أضايقكم .
_ وكمان هتعلمني أتكلم إزاي !
= استغفر الله العظيم يارب ، انا معنديش ذره طاقه اتكلم معاكي فيها ، اتفضلي إمشي
_ بَصِت بِ إستحقار وقالت كلام فِ سرها وركبت عربيتها ومشيت .
حازم ركب عربيته بتأفُف : كانت نقصاكي إنتي كمان ، ساق وف اتجاهه للمستشفي إللي فيها حازم
_______
علي الجانب الآخر عند عائشه و أنس.
________
_ ما تيجي تاكليني ياعائشه !
كلت أخر معلقه تشيز كيك كانت ف الطبق .
مسحت برِقه بالمنديل .
_بتمسحي برقه كده ليه انتي ناقص تبلعيني !
=بتبصلي ف الأكل إكمنك عازمني النهارده !، وبعدين كنت صايمه.
_ لا كلي ياحبيبتي ، كلي ، أطلبلك تاني !
= لأ كفايه كده.
_ طب الحمدلله.
= وإحنا مروحين بقى .
_ أنس بدهشه : هه !
= هه إيه ! مش قد العزومه متعزمنيش أمال لما نتجوز هتعمل إيه !
_ هخليكي تعملي دايت علشان كده هنخلص علي محصول الدوله كلها .
= شكرًا يامحترم ، يلا حاسب بقى علشان هلكانه عاوزه أنام وكمان مصليتش المغرب ولا العِشا .
_ خلاص هحاسب أهو .
“بينادى علي الويتر ، كانت بنت وزوق جدًا وملامحها هاديه ورقيقه ”
_ نعم يافندم .
= عاوز احاسب من فضلك .
_ أه تمام إتفضل يافندم ، ونورتونا .
= عائشه بتبص بتهديد ل أنس وهو بيرد علي البنت : بنورك مُتشكر جِدًا .
_ بس حضرتك ده كتير جدا .
= ولا كتير ولا حاجه ، ربنا يوسع رزقك ورزقنا.
_ متشكره جدا لحضرتك ، ربنا يباركلك يارب
“بتوجهه كلامها ل عائشه ” .نورتينا يافندم أتمنى متكُنش أخر مره نشوفكم فيها .
_عائشه إتكلمت بلُطف : اكيد مش اخر مره ياجميله ، ربنا يوفقك يارب
= أمين يارب .
_______
خرجوا من المطعم ..
عائشه بغموض : البنت جميله مش كده !
= مش عارف مركزتش .
_ ياسلام !، ما إنت عينك منزلتش من عليها .
= يابنتي كنت بحاسب وهي بتتكلم بزوق وإحترام وبعدين هو أنا أقدر ابص علي حد وانتي معايا ده كفايه نظره النمر إللي بصتيهالي
_ قصدك إيه يعني !
= قصدي إني مبشوفش واحده حلوه غيرك خلاص!
_ نجحت فِ الإمتحان ياولا .
= هو كان إمتحان !
= أوماااال ، وبعدين مش هتبقى جوزي ولازم أختبرك !
_ أه منك إنتي يا خلبوصه .
“سرحت ف الطريق وسكتت وهما بيتمشوا ، أنس فاهم عائشه وعارف إنها بتحاول تتخطى إللي حصلها وتنسى ، “
_ متسكتيش وإنتي معايا ، إللي بتفكري فيه قوليه بصوت عالي .
= ابتسمت _ مفيش أنا كويسه .
_ علي انس بردو !
= متقلقش أنا كويسه .
_ طب سكتي ليه !
= عادي .
_ لأ مش عادي .، قولي إللي بتفكري فيه بصوت عالي .
= أتكلم من غير ما تتعصب عليا !
_ إتكلمي .
=تفتكر لو مازن جراله حاجه وحشه انا هسامح نفسي ! ، ولا هفضل شايله الذنب إنه مات مثلا بسببي ! وبسبب الضرب إللي أتعرضلهُ منك إنت وبابا !مش عارفه لو فاق وجيه ندمان هسامحهُ وأعدي ولا لأ !تفتكر !
= بص بجمب عينه وسِكت .
_ سِكت ليه ياأنس !
= تعرفي يعني إيه أنا كل ما بفتكر بس إنه لمسك أو قرب منك انا بيحصلي إيه ! أنا جوايا نار يا عائشه ، شايفه إيدي دي
“إيدوا كانت زرقا آثر ضربات قويه ” .
مش طايق حد يلمسها ، كل ما بفتكر بطلع كل الغِل إللي جوايا ب إني أضرب ف أي حاجه قدامي لحد ما أهدى تقوليلي هتسامحيه !
= قولتلك لو نِدم
=ممكن تقفلي علي السيره دي !
_ حاضر ، ممكن لما تكون متعصب تكلمني بدل ما تطلع عصبيتك ف أذية نفسك !
=ان شاء الله .
_ طب ما تفُك التكشيره دِ!
= عادي مش مكشر .
_ كده ومش مكشر !
= اه عادي ، يلا علشان هوقف تاكسي .
_ماشي .
“بيركبوا وأنس ساكت ، لإنه بيحاول ينسى زي عائشه بالظبط لكن أول ما بتيجي السيره مودوا بيتغير 180 درجة .
“مكالمه بتجيلهُ من رودينا “.
= ألو يارودينا.
= إيه ياحبيبي عامل ايه !
_ كويس الحمدلله ، أمال إنتي فين واقفه ف البلكونه ولا ف الشارع علشان صوت العربيات دي !
= لأ انا هبات يومين كده مع ماما ، وأنا معاه ولسه مخلصين أكل من عند ماما دهب .
_ طب ليه مقولتليش !
= كنت عارفه إنك مع عائشه ، وأنا عارفه إنها محتاجالك محبتش أزعجكك .
_ ولا إزعاج ولا حاجه ياهبلة
= المهم ماما عاوزه تكلمك
_ ماشي هاتيها .
“رودينا بتدي ل سهيله الموبايل “
= ألو ياحبيبي إذيك.
_ الحمدلله ياماما إنتي عامله ايه !
= كويسه طول ما حِسك ف الدنيا يانور عيني ، بُص بقى ياسيدي خالك حسام وندى وعُدي جايين بكره وهما نفسهم يشوفوك وتيتا كمان
_ ورايا شغل والله ياأُمي .
= أنا قولت كده بردو ، بُص تعالى بعد الشغل نتغدا مع بعض إيه رأيك !
_ خلاص حاضر ، بس إعمليلي محشي ها
= حاضر عيني ، بس هات عائشه معاك .
“بيردد كلمه سهيله علشان يخلى عائشه تسمع، اجيب عائشه معايا !لا لا دي بت بارده .
_ عائشه ضحكت علي طريقتهُ ، مش هروح معاك أصلا ..
=سهيله بتسمعها ، لا هتيجي اديهاني ياأنس
_خدي اهي .
=ألو إذيك ياطنط.
_إذيك ياحبيبة طنط ، عامله إيه !
= الحمدلله كويسه طول ما حضرتك كويسه .
_ دايما ياغاليه ، بصي هستناكي بكره مع انس
= مالهوش لزوم ياطنط والله.
_ لأ هستناكي
= حاضر
_ حضرلك الخير يارب ، يلا خلي بالكم من نفسكم .
=حاضر .
= مع السلامه ياحبيبتي .
_ الله يسلمك ياطنط ، باي .
= باي.
_ انس بمشاكسه : مش هاخدك معايا .
= وانت مالك اصلا انت بارد اوي .
_مش هاخدك بردو .
= مش هروح عادي .، وبعدين انت مش مقموص متتكلمش معايا بقى .
_ لا مش مقموص عادي .
= طيب .
_هتقلبي وشك!
= انت اللي قالب وشك ياأنس .
_ غصب عني ياعائشه
= خلاص مش هفتح الموضوع ده تاني .
_ هو ٥ +٥ كام !
= إيه ده ! انت عبيط يعني مش عارف !
_ بطلي كلامك اللي بيطلع زي الصاروخ ف الوش ده ، وجاوبي .
= 10 ياا فيلسوف جيلك.
_بعد ال 10 دول ف واحده قمر كده بحبها جدًا هتكبر سنه وأتمني السنه الجايه تكون ف بيتي .
= ردت بفرحه : إيه ده ! هو انت بتحسب لعيد ميلادي !
_ أه ياعائشه ، طبعًا بحسب وعارف إنك بتحبي ف اليوم ده بالذات تحصل حاجه مُختلفه ميبقاش يوم روتيني زي أي يوم
= وعلشان كده كنت كل سنه تعملي مُفاجأه شكل مش كده !
_ نبيهه أوي ياعائشه ، المهم جاهزه لمُفاجأه السنادي !
= متغلبش نفسك ، انا مش عاوزه حاجه وتقريبا انت عملت كل المُفاجآت إللى ف الدنيا .
_بيعدل قميصهُ ب غرور _ أنس مُفاجآته مش بتخلص يابنتي .
= ياواثق إنت
” بيضحكوا ” ..
عائشه بتفرح جدًا إن أنس حُبه ليها مقلش ودايمًا بيزيد ، مفيش يوم بينلها إن ممكن الحب ده يكون قل ، دايمًا بيثبتلها وبيعافر إنها أول إهتمامتهُ ، وبيعاملها كإنها بنته ، كبرت علي إيدو ، حاسس إنه روحهُ متعلقه فيها ، حُبهم لبعض أقوي من أي حاجه ف الدنيا وعلاقتهم ببعض زي العُقده فِ حبل مُستحيل حد يقدر يفُكها مهما كان مدى قوته ..علاقتهم بتشبه ل علاقه ليل ومؤمن ، مهما مروا بظروف عصيبه ف حبهم دايمًا كان بيحل أي حاجه بيمروا بيها .
______
بيوصلوا البيت ..
_ انس : أنا طالع أنام .
= هتنام بدري كده !
_ انتي مش قولتي هتنامي انتي كمان !
= اه .
_ خلاص انا كمان هنام .
= ماشي بس تصلي ها
_ حاضر ، تصبحي علي خير
= وانت من اهل الخير
_____
بتخبط وتدخل شقتهم
______
_بتلاقي اوضه رحيم مفتوحه وليل قاعده فيها .
_ عائشه بتدخل بهدوء وبتتكلم بصوت خافت علشان سليم ورحيم نايمين : إيه ياماما قاعده سرحانه ليه !
_ليل والدموع متجمعه فِ عيونها : الولد صعبان عليا اوي
= ليه ياماما !
______
فلاش باك .
________
رحيم بيطبل علي الباب ، وسليم بيسقف ..
ليل بتفتح الباب : جوز مجانين ياربي !
_ماما انا جعان اوي
=حاضر ياحبيبي ، ادخلوا جوا ف البلكونه وهجيب الاكل وأجي
_حاضر
“بيدخلوا البلكونه “
“مؤمن ف المطبخ .”
_ مؤمن السلطه دي بتاعت الأولاد متاكلش منها .
= يرضيكي حبيبك مؤمن جعان وتحرميه من السلطه الجميله دي !
_ لأ ياحبيبي ، انا عاملالك طبق كبير أهو هناكل منهُ ف أوضتنا سوا .
= بسرعه جعان جدا .
_ حاضر .
= بقولك إيه ” بيغمزلها ” ما تجيبي قَطَه .
_ مؤمن انت من ساعه ما إتفرجت علي المسلسل وإنت إتجننت من إمتى وانت بتقول الكلام ده ها !
=طب خلاص ما تجيبي قُبله أختي ف الإسلام .
_ لأ مفيش قبلات وإتلم .
= هو إنتي مش مراتي !
_ لا مش مراتك ، اخرج برا بقي علشان احضر الأكل .
= طب حضن صغير
_ لأ .
= ما تحِن يا جِن فِ إيه مالك !
_ ياجن ! اخلاقك إنحدرت يامؤمن .
=”بيضحك ” جمالك دوبني ياغزال ياقمر إنتي .
_ بتتريق عليا صح !
= بتريق !
_ اه علشان شكلي مُجهد وتعبانه من ساعه موضوع عائشه
= إنتي كده مجهده وتعبانه ! ياخبر أبيض ياجدعان !! انتي لو العالم كله شايفك مُجهده وتعبانه هفضل أشوفك أجمل واحده فِ العالم .
= بحبك أوي يامؤمن
_ طب ما تجيبي بوسه بقى
_ بتضربه علي كتفه ضربات خفيفه : طب اخرج برا لحد ما اخلص
= حاضر خارج اهو .
“ليل كانت مبسوطه من كلام مؤمن وإنه شايفها حلوه حتي وهي حاسه نفسها تعبانه ومُرهقه ، كلامه بيسعدها اكتر ف الوقت اللي بتحس نفسها هلكانه ، اكتر من الوقت اللي مش بيكون ف مشاكل وملامحها صافيه وجميله لإن كده كده هي ف الوقت ده شايفه انها حلوه ، رغم كل السنين دي هو لسه بيحبها زي أول يوم إتقابلوا فيه ، فاقت من شرودها علي مؤمن وهو بيضحك وبيقول : خطفت بوسه بردو ، من الخدود المقلبظه دي .
_ “بتضحك ” مش ناوي تبطل حركاتك دي طيب !
= “بيغمزلها ” والله قمر ، ومسكر
_ بتتكلم وهي مُبتسمه وفرحانه : طب خلاص طيب الأولاد موجوده .
= خلاص هسكت اهو ، هستناكي جوا
_ حاضر مش هتأخر جايه .
= ماشي يا حبيبتي ، تيتا فاطمه كلت !
_ اه ، وإديتلها الدوا وعلي فكره بيلا حكيتلها علي كل حاجه .
= بجد ! طب وعملت ايه !
_ زعلت جدا جدا ، وعاوزه تتكلم مع عائشه وانا قولتلها بلاش احنا بنحاول نخرجها برا المود ومنفتحش الموضوع قدامها ، ف سكتت بس كانت متضايقه.
= الحمدلله انها جت علي قد كده.
_ الحمدلله .
“مؤمن دخل اوضته ، وليل دخلت بالأكل البلكونه “
_ الأكل جيه ياولاد .
_سليم بحزن : شكرا ياطنط.
= مالك ياحبيبي !
_ ب ابتسامه بيداري فيها حُزنهُ :انا كويس مفيش .
= لا فِ، احكيلي انا مش زي ماما !
_زاد عياطه وحكالها كُل حاجه ، ليل قربت منه وهي منهاره وعيطت علي عياطه : طيب ممكن تهدى ! انا عاوزاك تقولي ياماما اتفقنا ! ، انا امك ياحبيبي
= عارفه ! انا فعلا حسيتك ماما اوي من يوم ما شوفتك وانتي حنينه عليا وعمرك ما حسستيني ب اني تقيل عليكي ، من يوم ما ماما ماتت محدش من قرايبنا سال عليا انا وابيه حازم ، ماما وحشتني اوي وبتوحشني بس من يوم ما شوفتك وانا مطمن حاسس انك ماما.
_ زاد عياط ليل : طب خلاص علشان خاطري كفايه عياط ، يرضيك كده العياط اللي بنعيطوا سوا والاكل برد ! بتمسحها دموعها وبتحاول إنها تضحكهُ ، يلا كل بقى وانا لازم ادخل جوا علشان لو مدخلتش مؤمن هيطلعلنا بالفنله اللي لابسها وهيفتحلنا سارينه وهيفضل يقول انا جعان وهياخد صينيه الاكل بتاعتكم وهيدخل جوا يرضيك !
_مسح دموعه وضحك _ هو لابس فنله !
= ضحكت _ اه ! وما ادراك وما فنله مؤمن لما بيلبسها
_ بيضحك _خلاص هاكل
= ايوه كده شاطر .، خليه ياكل يارحيم
_ حاضر ياماما .
________
باك.
_________
_ عائشه بتمسح دموعها _ بجد ياماما معقوله فِ اب يقتل مراته ! وقدام ابنه !
= ولحد الان حازم بيدور عليه ومش لاقيه
_ الولد صعب عليا اوي .
= وانا كمان ، هو حس معايا اني مامته ، وده فرحني يمكن ربنا عوضوا بينا .
_ ربنا كريم ف حكمتهُ ، يلا سيبيهم واطلعي ارتاحي .
= حاضر ، ادخلي ل تيتا فاطمه مستنياكي .
_ هي عرفت !
= اه ، وبعدها كلمي عمتك لميس قلقانه عليكي جدا .
_ الناس كلها عرفت ياماما !
= ابوكي كان مخنوق وهي اتصلت ف الوقت ده بالصدفه وعرفها لما فضلت تساله ، ابقي كلميها .
= حاضر ، تصبحي علي خير .
_ وإنتي من اهل الخير يارب .
_______
” بتدخل اوضه تيتا فاطمه ، بتلاقيها رايحه فِ النوم ، بتخرج ب هدوء وتقفل الباب ، بتدخل اوضتها وبتقلع الخمار ، وبتتصل ب لميس “.
_ الو ياعمتو.
= ايه ياحبيبه عمتو ، عامله ايه دلوقتي !
_ الحمدلله احسن
= متخافيش يفوق بس ، اما مضربتهوش ١٠٠ قلم علي وشه مبقاش لميس
_عائشه بتضحك : هدى نفسك ياوحش الكون.
= اهدى ايه ، ده انا مستنيه يطلع مم المستشفي بس .
_ خلاص ياعمتو ، بابا وانس قاموا بالواجب .
= الواجب انا هعملوا ف وشه ، ولا تزعلي نفسك ياضنايا .
_ تعالي بكره انتي وياسمين ومحمد وعمو معتز وانا مش هزعل ، بس تيجوا باليل وتباتوا علشان طنط سهيله صممت اني اروحلها بكره.
= خلاص هجيلك بليل ياحبيبتي .
_ هستناكي ياعمتو.
_ حاضر ياقلب عمتو .
= تصبحي علي خير وسلميلي علي عمو معتز لحد ما اشوفه بكره .
_ حاضر ياحبيبتي وانتي من اهل الخير مع السلامه .
= سلام.
______
غيرت هدومها وقرآت قرآن ونامت.
________
ف شقه لميس ومعتز .
________
معتز قاعد وماسك طبق مليان بطيخ ومقطعوا شرايح
_لميس: يابني حرام عليك ، يامعتز انا تعبت ١٠٠ مره اقولك لو هتقشر البطيخ بالطريقه دي متعملش صوت بتوتر ، بتوتر ياأخي
= المايه بتاعت البطيخ لما اجي اكل القطمه قبل ما تقع علي الفنله بشفطها
_ يارب مش قادره ، انت عارف انا صبرت عليه قد ايه
= تاخدي حته !
= هات ، اهو حاجه ابلع بيها الكلام اللي يقلب البطن ده .
_ ياسمين : ماما غسلت المواعين ، هاتي التليفون بقى .
= مش هديهولك غير لما تذاكري.
_ ماما انا تعبت والله انا هشتغل وهشتري تليفون ولا الذل ده ، ده انا لو اتنفست ياسمين هاتي التليفون اشمعني محمد !
= علشان انتي مش بتتعدلي ولا بتسمعي الكلام غير لما بعاقبك بيه ، خلصي مذاكره ولو سمعتلك وسمعتي حلو هديهولك ،ذاكري حاجه تنفعك بدل بابجي اللي بتنامي بتحلمي بيها دي ، ده انا مره دخلت عليكي لاقيتك مشعلقه ايدك علي الهوا وبتقولي ياسطى متقتلنيش ونبي حد يلحقنااااااي .، ولا أكنك كنتي محشوره ما بين كرسين .
_ بتضحك : بجد ياماما !
= اه والله
_ طب هذاكر بس اوعديني تديهوني ومتضحكيش عليا تاني .
= اوعدك .
“بتدخل اوضتها وبتذاكر ”
_ معتز : بس حلو الفيلم ده يالولو صح !
= تعرف تسكت علشان مش طايقاك ! هات بطيخه تاني
_ خدي .
_________
علي الجانب الأخر ف غرفه مي وعمر.
_ مي بتطبع قبله علي عين عمر اللي راحت بسبب الجلطه آثار زعله علي والده “فرغلي سعيد “
_ عمر ب ابتسامه : لسه بتحبيني ومش شايفه فيا عيوب !
= مي ب لُطف : هتفضل ف عيني أجمل راجل ف الدنيا ، انا مش عاوزه غيرك ف حياتي ولو كان ف غيرك ف حياتي او كان حد غيرك جوزي عمري ما كنت هبقى سعيده السعاده اللي عايشاها معاك يكفي اني جايبه منك حسن ، حته منك ونسخه منك شبهك جدا سبحان الله ، كنت دايما بدعي انه يطلع شبهك علشان لما تكون ف الشغل افضل ابصله واحس انك معايا .
_ انا بحبك اوي يامي .
= وانا كمان بحبك اوي ياعمر .
” ابتسموا لبعض بحُب ، وكملوا تقليب ف البوم صور فرحهم “
__________
ف غرفه سميه وسعد .
_ حاساك زعلان ياسعد
= ليه ياحبيبتي بتقولي كده !
_ يمكن علشان كنت حامل وربنا ما أرادش إنه يجي للدنيا ، وانت كان نفسك ان ملك يكون ليها أخ.
_ لأ ياحبيبتي ، ده قضاء ربنا ولسه العمر قدامنا هنملى البيت عيال .
=ان شاء الله ياحبيبي
_ يلا حضرلنا نتعشى سوا علشان جعان .
= حاضر ياحبيبي .
” بتخرج من الاوضه “.
سعد كان زعلان فعلا بسبب الموضوع ده لكن كان راضي بقضاء ربنا ، ومحبش يضايق سميه لان فعلا هو راضي ب اي حاجه ربنا كتبها ، وواثق ان ربنا هيراضيه بالولد.
_ الحمدلله يارب علي قضائك .
__________
علي الجانب الاخر ف شقه سهيله ..رودينا بتدخل من علي باب الشقه ..الله ياتيتا البيت ريحته كيكه بالبرتقال اللي بحبها ..
وقتها ام سهيله كانت ف المطبخ طلعت علي صوت رودينا ، رودينا جريت حضنتها ..
_ وحشتيني ياعيون تيتا .
_ وانتي كمان جدا ياتيتا ..طبعا انتي عامله الكيكه ليا صح !
= صح ياعيون تيتا انا عارفه انك بتحبيها
_ تيتا انا بحبك اوي ، بصي هدخل أغير هدومي ، واحط هدومي ف الدولاب وأجي اكل الكيكه ف حضنك ..
= خلاص وانا هعملك كوبايه شاي بلبن وهقطع الكيكه وهستناكي .
“رودينا بتديلها بوسه علي خدها ، خلاص اتفقنا “.
_______
رودينا بتدخل اوضتها ..
الجده ل سهيله : روحي اتردت فيا اول ما شوفتها .
_ سهيله بتطبع قبله علي كف ايديها : ولسه بكره روحك هتترد لما احفادك التلاته يتجمعوا .
= بفرحه : عُدي وأنس هيجوا هما كمان بكره !
_ اه يا حبيبتي .
= بلهفه : من النجمه ياسهيله تنزلي تشتري لحمه وفراخ وجميع انواع المحاشي ورُقاق علشان انس بيحبه.
_ حاضر من عيني ، هدخل اغير علشان ألحق أكل معاكم ولا هتاكلوا لوحدكم .
= لا يلا غيري ، وانا هعمل الشاي بلبن .
_ ماشي ياست الكل
_________
علي الجانب الاخر حازم بيزور مازن ف المستشفي ..
بيدخل يطمن عليه بنفسه وبيخرج
_لؤي بخوف : طمني يادكتور !
= متقلقش زي ما الدكاتره قالولك هو ف تحسن الحمدلله وبالكتير بكره ولا بعدهُ هيخرج من العنايه ويتنقل غرفه عاديه متقلقوش.
=حور : ربنا يطمنك يادكتور حازم مش عارفه اشكرك ازاي.
_ ولا شكر ولا حاجه ، انا هاجي كل يوم اشرف عليه بنفسي ده زي اخويا .
= مروان : شكرا علي وقفتك معانا .
_ ولا شكر ولا اي حاجه ربنا يشفيه ان شاء الله .
” بيقاطع كلامهم صوت حد بيعيط “، حازم بيبص اتجاهه الصوت بصدمه
يتبع..
لقراءة الفصل السابع والثلاثون : اضغط هنا
لقراءة باقي فصول الرواية : اضغط هنا
نرشح لك أيضاً رواية وقعت أسيرة في حبك للكاتبة غفران
