رواية أمجد وزهرة البارت الثالث 3 بقلم نور

– جميلة …. انتي عايشة 

– وحشتيني يا زهرة 

مكنتش مصدقة نفسي ، كنت حاسة اني في حلم ، حلم جميل مش عايزة اصحى منه ، كانت جميلة بشحمها و لحمها واقفة قدامي ، قصدي قاعدة قدامي ، كانت قاعدة على كرسي متحرك و راجل ماعرفهوش بيزق فيها ، اخذتها في حضني عشان اتأكد انه حقيقة ، و اتفتحنا احنا الاتنين في العياط 

– مامي ، انا خايفة 

– ما تخافيش يا حبيبتي ، تعالي 

– دي جميلة بنتكم صح 

– ايوه 

– تعالي يا جميلة ، تعالي يا روح عمتو 

– امجد….امجد مفقود يا جميلة لازم اروح ادور عليه ، خليكي هنا و بعد كده هرجعلك و هتفهميني كل حاجة تمام 

– إستني يا زهرة ، انا الوحيدة اللي بتعرف مكان امجد ، بس للأسف مش هقدر اخذك هناك دلوقتي 

– ليه ، ليه ، امجد بيضيع مننا ، انتي متعرفيش حصله ايه في الف……

– أنا عارفة ، عارفة كل حاجة

قعدنا في الشقة يومين مع بعض ، انا و جميلة و جميلة الصغيرة ، كلنا كنا محتاجين نسند بعض عشان نقدر نعيش ، عرفت ان امجد في غيبوبة ، جميلة قالت لي انه في مكان ميعرفوش حد و كل الدكاترة و الممرضات بيهتموا بيه ، كنت هتجنن عشان اروحله و املي عينيا منه ، وحشني جدا ، كل حاجة فيه وحشتني ، كنت عارفة ان في حاجة بتخليه يعمل كده ، و حاجة كبيرة كمان 

– مش عايزة تحكيلي ايه اللي حصل يا جميلة 

– مش دلوقتي يا زهرة ، مش هقدر اقولك غير أن ربنا كان رحيم بيا ، لما امجد يبقى كويس ان شاء الله هنحكيلك مع بعض

– طيب ليه مروحتيش لوالدك و والدتك ، على الأقل تطمنيهم عليكي ، و مين الراجل اللي رايح جاي علينا كده 

– ماما و بابا مش هقدر اروحلهم دلوقتي ، لازم نمهدلهم الأول ، أما بالنسبة للراجل اللي رايح جاي علينا ، ده جاسر ، صاحب امجد و الراجل اللي انقذ حياتي 

– و كنتي فين الفترة دي كلها ، دول اربع سنين 

– أنا كمان كنت في غيبوبة يا زهرة ، غيبوبة طويلة ، و صحيت منها انسانة تانية مش حاسة بأي حاجة ، صحيت منها بس خسرت رجليا و صوتي و حاجات تانية كتير 

رجعت بيت اهلي عشان مقدرتش اخبي عليهم اكتر من كده ، و في نفس الوقت مكنتش عايزة اسيب جميلة لوحدها ، بس اتطمنت لما جات الدادة اللي كانت بتهتم بيها طول الفترة الفايتة و بقيت كل يوم اروح ازورهم هناك في شقتي القديمة مع امجد و اخذ جميلة الصغيرة معايا ، اصلهم اتعلقوا ببعض اوي ، والد امجد كل يوم يتصل بيا عشان يسألني عليه ، كان قلبه محروق على عياله ، كان نفسي اطمنه بس ما قدرتش ، جميلة قالت انهم في خطر و مش لازم حد يعرف حاجة دلوقتي عشان كلنا متراقبين

– زهرة ، عريسك بقاله اسبوعين بيتصل بيكي و مبترديش ، الراجل كسفني و الله لما كلمني النهاردة 

– بابا ، ارجوك متضغطش عليا ، انا خايفة على جميلة ، انا مش عارفة أفكر في حاجة دلوقتي 

– خايفة على جميلة بردو ، و لا عايزة ترجعي لحبيب القلب بعد ما رماكي انتي و بنتك و مسألش فيكم ، و تفكري ليه ، خلاص ارجعيله ، سيبي كرامتك على جنب كده و ارجعيله 

– ما تخافش يا بابا ، مش هرجع ، مش هنرجع 

قعدت طول الليل بفكر ، هو لو طلب مني ارجعله يا ترى هقدر ارجعله ، هقدر اسامحه و انسى كل اللي حصل من اربع سنين ، لو بس اشوفه مرة واحدة و اطمن قلبي عليه ، مهما حصل ما قدرتش ازعل منه و لا قدر قلبي ينساه ، كنت بحلم بيه كل ليلة ، حتى جميلة كان واحشها ، مبطلتش تسأل عنه رغم أنه عمره ما قرب منها او حضنها ، بس انا عارفة انه مكانش بمزاجه 

– ايوه يا جميلة خير انتي كويسة 

– أنا كويسة يا زهرة ، انت لازم تيجي عندي دلوقتي 

– في ايه يا جميلة ، دي الساعة 3 الفجر ، هخرج دلوقتي 

– جاسر في الطريق هيجي يأخذك ، مينفعش نتأخر يلا 

رحنا بالعربية لمكان بعيد ، بعيد اوي ، مكنتش شايفة حاجة في الظلمة غير أننا دخلنا مكان كله صحراء ، الطريق كان طويل اخذ مننا يجي 3 ساعات ، و اخيرا وصلنا 

– انزلي يا زهرة ، انا هستناكي هنا ، امجد صحي من الغيبوبة ، هو مش محتاج حد قدك انتي دلوقتي 

نزلت ، كان بيت صغير و معزول ، اول ما دخلت كان في ممرضة فتحتلي الباب ، و شفته هناك ، كان نايم بهدوء ، جسمه مفيهش حته سليمة ، حتى وشه كان كله كدمات ، مسكت دموعي بالعافية و مسكت ايده اللي كان عليها ضماده و ضميتها لمكان قلبي 

– متعيطيش ، انا ما استاهلش دموعك 

– أمجد…… انت كويس يا أمجد 

– أنا عايز جميلة يا زهرة ، جميلة بنتي ، هاتيها عشان خاطري 

كنت خايفة يجرحها المرة دي كمان ، بس مش بأيدي حاجة اعملها غير اني انفذ اللي بيقولي عليه ، لحد ما اعرف سر الحكاية كلها 

– ازيك يا جميلة 

– بابي ، انت كويس ، فيك ايه 

– أنا بقيت كويس لما شفتك ، هو انا ممكن اطلب منك حاجة 

– ممكن طبعا 

– ممكن نفتح صفحة جديدة و نتعرف من جديد 

– ماسي ، انا اسمي جميلة ، و انت 

كنت بتفرج عليهم من وراء الباب و انا بعيط ، يااه يا أمجد ، أخيرا حسيت بيها ، أخيرا حسيت بقطعة روحك اللي كانت ضايعة منك ، كنت عارفة انه هيبقى احسن و احن اب و انا شايفاه بيضحكها و بيضمها لحضنه رغم جسمه المكسر ، كان مغمض عينيه و بيبتسم لكل كلمة بتحكيها  ، كانت بتحكي له عن عرايسها و اساميهم و صحابها في المدرسة ، و هو كان بيستنشق ريحة شعرها و بيبوس وشها و كأنه أول مرة يشوفها و يحضنها ، كأنها اتولدت دلوقتي 

– أخيرا اتجمعوا ، أخيرا مش هحس بالذنب تاني يا زهرة ، أخيرا 

– ايه حكايتك مع الذنب انتي و اخوكي يا جميلة ، انتي مش ناوية تحكيلي 

– هحكيلك ، هحكيلك كل حاجة 

كانت بتعيط بكل وجع وانا كنت بعيط معاها ، حكتلي ازاي اعتدوا عليها من غير رحمة ، ازاي اذوها و خطفوها ، بس ربنا رحمها و في حد شافها و وداها المستشفى و وقتها شافها جاسر و كان بيشتغل دكتور هناك ، ليلتها هو اللي كلم أمجد و قاله يجي 

– طيب ليه قال انك متي ، ليه يعمل فينا كده 

– عشان الجماعة دول ما اكتفوش باللي عملوه فيا كانوا عايزين يحجزوني عندهم بس الحمد لله في راجل شافني صدفة و انقذني منهم ، امجد سفرني برا مكنتش دارية حاجة ، كنت في غيبوبة ، و دي كانت احسن حاجة عملها ، بابا و ماما ماكانوش هيتحملوا يشوفوني في المنظر ده ، عصابة المافيا كان لازم تعرف كده عشان ينسوني من مخطاتتهم 

– عصابة و مافيا ، ايه اللي جابهم ليكي دول

– مش عشاني انا ، عشان امجد ، عشان يكسروه بيا ، و الدور كان هيجي عليكي بعدي 

– ازاي

– امجد كان ماسك قضية خطيرة ، و فعلا نجح فيها كالعادة ، بس اللي معرفوش انه ورط اخطر رئيس عصابة في القضية دي ، عشان كده قرر ينتقم منه ، و انا كنت الوسيلة ، على فكرة هو حكالي كل اللي حصل و كل حاجة عملها معاكم و انا لمته كتير ، لما عرف  أن هو السبب في اللي حصلي ، قرر انه يسيب حياته و زي ما انا خسرت سعادتي هو كمان ما ينفعش يكون سعيد ، و قرر يبعد عنكم عشان متكونوش في خطر ، اما بالنسبة للست اللي اتجوزها هما اللي باعثينها ، كانوا عايزين يعرفوا اذا كنت انا موجودة ولا لا و يعرفوا علاقتكم بقت عاملة ازاي ، و هو سايرهم في الخط لحد ما وقعه و اتقبض عليه ، بس قبلها بعث جماعته عشان تخرب عربية امجد اللي عمل بيها الحادثة  ، وده اللي حصل ، كنت خايفة اواجه حد فيكم بس لما سمعت اللي حصل قررت ان انا ارجع و اواجه حقيقتي ، حقيقتنا كلنا ، كنت موجوعة انا و هو ، كنا الاتنين حاسين بالذنب تجاه بعض ،   تعرفي يا زهرة اصعب حاجة انك تعيشي كاتمة هموم جواكي و متقدريش تشاركيها مع الحد اللي بتحبيه عشان خايفة عليه ، امجد كان بيتحرق بعيد عنكم و عن بنته ، كان بيجي يحكيلي عنها و فاكر اني مش بسمعه ولا حاسة بيه ، بس كنت بسمع و بحس و بتمنى ارد عليه و اخذه في حضني ، دي كل الحقيقة يا زهرة ، كان نفسي تسمعيها من امجد ، بس انا عارفة انه مش هيحكيلك عشان هيختار يحافظ على عرضي حتى لو خسرك ، حتى لو خسر حياته و روحه و مصدر سعادته

كل الحاجات اللي سمعتها لخبطتني ، مبقيتش عارفة أنظمها في دماغي حتى ، كنت فاكرة اني هرتاح لما اعرف سبب تغيره معايا بس ما ارتحتش 

– جميلة ، يلا هنروح 

– ليه يا مامي ، انا لسه عندي حاجات عايزة احكيها 

– مرة تانية يا حبيبتي ، بابي تعبان و عايز يرتاح و انتي دوشتيه 

– سيبيها ارجوكي ، خليها تنام في حضني 

– طيب ماشي ، انا همشي بقا 

– خليكي انتي كمان ، انتي واحشاني 

– نعم ، و بصفتي ايه ان شاء الله ، انت ناسي اني مخطوبة و جوازي بعد شهر 

– انتي هتتجوزي بجد 

– أمال بهزر ، انا عرفت من الجواب أن انت عارف 

– زهرة ، انا بحبك …..انا والله …..

– انا عرفت كل حاجة يا أمجد ، و اطمن سركم في بير 

– يعني حتى بعد ما عرفتي مصممة تتجوزي واحد غيري 

– و اكتر كمان ، يمكن جا الوقت اللي ارتاح فيه 

– هترتاحي و انتي بعيدة عني ، انا مصدقت لقيتكم يا زهرة ، انا نفسي كان مقطوع لاربع سنين ، و دلوقتي بس رجع ، انتي نفسي في الدنيا ، و جميلة بنتي هي دقة قلبي الأولى و اختي دقته التانية ،  انا من غيركم حياتي تنتهي ، مينفعش اعيش ، ارجوكي يا زهرة انا عايز اعيش ، عايز ارجع اعيش 

– هتحب جميلة بنتك اكتر مني 

– و هو في حد يسيب الاصل و يروح للتقليد 

ها ، نقول بسم الله و بكره نكتب ، ولا خليها بعد شهر لما يرمموني شوية 

– نكتب و بكره كمان 

مش هاقدر اوصفلكم حياتنا بقت عاملة ازاي بعد ما رجعنا لبعض ، جميلة الكبيرة رجعت بيت ابوها اللي كانت الفرحة مش سايعاهم ، و هتعمل العملية عشان ترجع تمشي ، أصل ده شرطها قبل ما توافق على جوازها من جاسر ، جميلة الصغيرة بتكبر وسط حبنا ، بقت متعلقة بأبوها اكتر مني حتى بس انا ما زعلتش اصلا ، و هو ، حبيب الروح ، رجع زي اول مرة اتقابلنا فيها و احسن كمان ، كنت عارفة انه بيحاول بكل جهده يعوضنا عن اللي فات ، بس اللي مش عارفه اني مسامحاه من اول ما قريت الجواب 

– مامي ، انا عايزة اشتري فستان زيك لفرح عمتو 

– ما بابا اشترالك يا حبيبتي ، انتي هتلبسي كم فستان 

– لا ، عايزة زي بتاعك بالظبط 

– لازم تقلديني في كل حاجة يعني ، انتي ضرتي ولا ايه 

– في ايه يا حرمه منك ليها 

– بابي ، ماما مش عايزة تشتريلي فستان زيها 

– ولا يهمك يا روح بابي هشتريلك انا ، و حتى لو ملقيتش ، هنخليها هي تلبس فستان زي بتاعك

– بقا كده يا سي امجد ، خلاص خليك مع مراتك التانية و خليها بالمرة تجهزلك الاكل هااا 

– تعالي هنا بس ، احنا مش قلنا هي التقليد و انتي الاصل ، هو في واحد يسيب الاصل 

– ممم لا واضح 

– ايه رايك تيجي اثبتلك 

– تثبتلي ايه 

– اني بحبك يا زهرتي 

– و زهرتك بتموت فيك يا ابو جميلة

تمت