رواية قلاع الضر الفصل الحادي والعشرون 21 بقلم زينب ماجد

رواية قلاع الضر الفصل الحادي والعشرون 21 بقلم زينب ماجد

رواية قلاع الضر الجزء الحادي والعشرون

رواية قلاع الضر البارت الحادي والعشرون

رواية قلاع الضر الحلقة الحادية والعشرون

( الشيء بالشيء يضرب )
سوینـه الچفافـي اغيـوم
وعصرناهـه ابسـمه الكالـو يبسـنه
(كاظم أسماعيل الكاطـع)
ركضت وسام من البيت وهي تصيح : عمي جدووووع عمي جدوووووع ..
وتلهث بنص الشارع ليما وكفت على بابا وهو يكلها : ايش يولي هالصكعة .. شكو
– عدي شي تعال
– شنهو هاذ الشي
– فد تعال لليغاد
راح وياها لمكان الجحش .. دخل وهو يكللها : وهاي اجيت شنهو العدج يلا احجي
طلعت الفلوس من جوا هدومها .. دحج بيهن مستغرب : منين جبتيهن يولي
همست : من بيت نويرا بت نويصر الخياط امها تخلي الفلوس تحت البساط العليه الوسادة الحمرة
ضحك هو : ههههههه مو اكول تربيتي ما تروح بيج عفيه عفية هيج اريدج سباعية .. بعد لا تروحيلهم منا لجم يوم خاطر لا يشكون بيج .. تمام
– تمام عمي
– انطري هين خاطر ازتلج العشا مالج
– يلا
راحت للمراح وهي فرحانة لان جابت لجدوع فلوس ورضا عليها .. شوي وابنه جابلها الزاد فرحت حيل وكعدت تاكل وهي تخطط شلون تبوك بعد خاطر عمر جدوع يضل راضي عليها
ردت تفكر بثائر اخوها ما شافتو
– عمي جدوع يكول هو ازغر مني بشوية يعني هم جبير عجل عليش ما سعل عني لا جا شافني .. وانا جريبة منه.. يمكنه ما يعرفني .. لابد اروح واعرفو فد هو اخوي بهاي الدنيا .. باجر هم اروح لبيت جدة ام راشد وادحج اذا شفتوا اندهلو .
كلت اكلي ورحت بفراشي اتغطيت ونمت
لثاني يوم الفجر ندهني عمي جدوع رحت ويا للسوك اشتغل
جنت افكر شلون اشوف ثاىر واحجي وياه واشوف يعرفني لو لا
ردينا عكب اوذان المغرب
فات عمي جدوع لبيتا وانا والحيوان للمراح .. شوي وابنا جاب صحن لبن وخبزة .. اكلتم ورحت وديت صحني خليته تحت باب البيت ورديت انطر العصر يمتى ينزل خاطر اطلع اشوف ثاير
على كثر ما متحمسة اول ما دحجت الشمس مالت رحت اركض بالشارع على بيت جدتي ام ابوي .. وصلت غاد بس ما شفت احد .. كلت اليوم ما افرج منا لي ما اشوف اخوي ثاير واعرفه .
ضليت ارواح منا ومنا ليما شفت واحد طلع من البيت ركضت اله ( اكلك اكلك )
– ها شني
– تعرف ثاىر
– شتريدين من ثاير ؟
– رايدة احجي وياه
– والله وصاير الثاير ناس تسعل عنه وتريد تحجي وياه خوش والله .. ثاىر ثاىرررر وينك
هو صاح وانا عيوني دمعت وانطر يمتى يطلع واشوف
لما طلع وصاح : ها شني
دحجت شايفته كبل بس ما اعرفو
جا : ها ؟
– دحج هاي شتريد منك
حجاها ومشى الزلمة، اندار علي ثاىر : مني انت ؟
– ثاىر انا اختك
– اختي ؟
– اي انا اختك
– وشتردين ؟
– هيج ما ردت شي فد ودت اعرفك
– خوش وهسه عرفتيني
– تجي نلعب انا وياك
-لا عمي يريدني اطلع وياه
– وين ؟
– للشغل
– شتشتغل ؟
– العصر نغسل هدوم والصبح نشتغل بالكاع
حجاها ومشى : هي هاي الكاع مالكم ؟
– لا مالت كرايبنا نشتغل بيها خاطر يطينا اكل وشرب
– والهدوم ؟
– اغسل ويا عمامي
-ويطونك فلوس
– لا ما يطون يكلون ما جاي تاكل وتشرب ويانا ونجيبلك ملابس بعد شتعمل بالفلوس
– دحج ملابسك مالت سنين شجايبين
-اكلج لا تضلين تعيبين وراي شغل اذا ااخرت عمي يجتلني روحي هسه
– اجي اشتغل وياك
دحج عليها : بهد احسن خاطر نخلص ابشغل بساع .. يلا
تحمست هي وكالتله : يلا
راحت تركض هي وياه وراه علي وضياء اخوة راشد
وصلو غاد انبوبة مالت ماي ومجان مفتوح حاطين الهدوم بيها ويدكوهن بالكاع ويغسلون بالماي الجاري .. ما بس هم جثير
كلمن ماخذله سطلين يمه وكاعد يدك بالهدوم .
وكفت وسام ويا اخوها وكامت تغسل وياه
كالتلو : هاي كل الهدوم عليك تغوسلم
– لا فد اليوم اطوني جثير
اندارت وكالتله : عليش اطيته جثير هو ما يكدر يغوسل ذني كلهن
– انتم اثنين اشتغلوا يلا اشتغلوا خل نكضي بساع
– شني اشتغل ابلاش اني ما اشتغل عدكم
– عجل ولي خولي يغسلهن .. يلا
وحدتهن بالبيضة ما تنكدر بس عليمن اطلعين
حجه ثاىر: اذا ما تكدرين تعسلين روحي لا تخلينم يعصبون علي ويجتلوني
– انت هم يجتلونك ؟
حجت وهي تكمل غسل وياه
– اي عمامي وجديتي
– عليش
– اذا ما اشتغلت لو عملت بلاوي .. انت وين عايشة
– انا عايشة ويا المطي
– ويا المطي ؟
– اي كصدي الجحش مالت جدوع
– هااا اي اعرفا .. ويطيج فلوس
– اي يطيني ويجيبلي تفاح وبرتغال
– صدك
– اي والله بس هم يطكني اذا غلطت
– عجل عليش ما يعيشج ابيته عليش ويا المطي
– يكول ما عدي مجان
– وما تخافين من الجحش
– بالاول جنت اخاف بس الحين تعودت هو ما ياذي خوش مطي
– يا زين بختج لو اعيش ويا الجحش بس عمامي ما راح يرضون
– عادي انا اكل لعمي جدوع يخليك تجي وياي
– لا لا ما اريد
-تريد اجيبلك تفاحة ؟
– اي عليج الله جيبيلي
– من يطيني عمي اجيبلك تمام
– تمام تمام
غسلوا الهدوم سويا ومن كملت ردت عكب المغرب
لكت جدوع واكف الها بالباب : انت وين جنتي ولج
– عمي رحت العب ويا اخوي ثاىر .. جان يغس…
بعدها ما مخلصه احجايتها دمغها على راسها : ومن شفتي الليل چلچل ما تعرفين تردين دماغ سززز
رد دمغها نوبة اللخ
وكعت بالكاع وكامت .. تحك براسها ودخلت للمراح لفراشها
دخل هويصيح عليها : اليوم تنامين بلا عشا خاطر اعلمج اشلون اطلعين واديحين بلايا علمي
بقت تحك براسها وما ردت عليه ..
سد الباب عليها .. تمددت بفراشها تفكر اباجر شلون تحصللها بوكة زينة خاطر تخلي جدوع يرضى وما معصب عليها
وهي تفكر بطنها كامت تلويها من الجوع
: لازم باجر الكالي لكوة تا ينطيني اكل الصبح اذا ما جبت يمكن حتى ريوك ما يخليني اكل .
ضلت تفكر بثائر وشلون عمه يصيحون عليه
انقهرت : عليش انا واخوي من دون الجهال ما عدنا ام ولا اب ؟ حتى سكينة ابوها ميت بس ما اثنينهم امها ابوها .. امها موجودة وتوكلها وتعتني بيها احنا عليش اثنينم ماتوا وعافونا .. حتى جدتي عافتنا محد يريدنا .
لثاني يوم راحت ويا جدوع بس ما حصلت واكل الاكل كله وما خلالها .. ضلت تفتر بالسوك على شي تاكله لحد ما باكت تفاحة من بكالة واحد وختلت على صفحة رادت تاكلها بس ضل ابالها اخوها ثاىر راد يضوك التفاحة .. اتكربت وخلتها تحت البكالة مال جدوع ولفتها .. ولما راد يعزل خلتها اخر شي وراحت دحستها بلا ما يدري ويا الغراض النكلهن للعربانة .. وصعدوا ع المطي وردوا للديرة من وصل غاد خذتها وذبتها بالكاع وكامت تعاونه ينزل الغراض خاطر يرد الجحش لمجانه .. عد ما كمل ردت خذت التفاحة ودخلتها جوا بس احتارت وين اتضمها خاف يشوفها جدوع ويعرف بايكة من وراه .
خلتها تحت الوسادة بينت
خلتها تحت الفراش ونامت ما ارتاحت وخافت لا تنجعص لو تخرب كامت شالت الفراش ولمت الغطوة مالتها وخلتها بالغطوة بس باردة تنام بلا غطوة .. جابتها وعتخليها بحضنها دخل ابن جدوع بسرعة فزت وخلتها وراها : ها
– وشبج ؟
– ما بيه شتريد
– هاذ الاكل مالج اكلي
خذت صحن اللبن والخبز وكعدت تاكل ليما خلصت ردته وكعدت تفكر شلون راح تشوف ردة فعل ثايىر من يشوف جايبتلو تفاحة .
للعصر ركضت اتاني ثاىر بس ما طلع عرفت هي تاخرت طالع كبل جيتها راحت للمجان اليغسلون بيه .. لكته جاي يغسل بالهدوم صاح : ثاىررررررر ثاىررررررر
اندار العا وهي تلوحله بالتفاحة هد الهدوم وراح يركض الها : اااااااااالله تفااااااحة
كربت منه انطتها اله : منيلج هاي التفاحة
– انا جبتها الك من السوك
– اااااالله
عظها وهو يفتح عيونا حيل ويصيح : ممممممممم
ابتسمت وكالتله :
-اكلها وانا راح اغسل عنك
ووكفت تغسل عنه الهدوم وهو ياكل شوية شوية بالتفاحة خاطر لا تكضي بساع .
وهي فرحانة عبن تشوفه فرحان .
مرت الايام وهي اعلى هالحال ..
تبوك من البسطات وتخشهن وما تاكلهن تجيبهن لثاىر وثاير يفرح بيهن .. ومستمرة تبوك من هذا وذاك وتطي لجدوع
ومرة من المرات .. باكت محفظة بيها فلوس حيل هواي
فرح جدوع طار من الفرح … بس الاطاها شي كلش قليل من اللي جابته اله .. وكاللها عود اجيبلج برتغالة .
البرتغالة والتفاحة بعد ما يفرحنها عبن كل مرة تبوك من البكالين وتضم وتروح هي وثاير تاكلها .. ضاجت عبن اطاها شي كلش قليل من الجابته.
دحجت وين حط الفلوس وضلت تطمش عليه
لحد ما سهى شيلي نص الفلوس وفلتت خلتهن بمكان ليغاد امين
عد ما راد يلم خاطر يرد فتش فلوسه كال : شو ذني ناكصات
– يا عمي بس لا ضيعتهن صدك
– لا لا خاف هنا هيج يلا خير ونعمة خير ونعمة حب الفلوس وخلاهن على بمخبايتو .. لما راد يصعد هي افترت حطت الفلوس بملابسها ومشت وضلت الدرب كله بخوف لا يكعن الفلوس من بطنها ويشوفهن جدوع .
بس وصلت المراح امان .. ركضت حطتهن تحت الوسادة وراحت تساعده فرغوا العربانة .. ودخلوا الجحش وهي كلبها طاير من الخوف لا يكتشفها ويشوف الفلوس بس من التعب هو ربط الجحش وطلع ما دحج وراه .
سدت الباب واحتارت وين تحط هاي الفلوس
اتغدت وهي تفكر وين تحطن .. كضت ظهريتها كلها تفكر ليما فكرت تحطن بجنفاص تافهن وتدفنهن بالتراب بمجان تندله جريب .. صدك ودفنتهن وكل شوي تجي تساوي التراب خاف احد ينتبه هاي التراب مايلة لو شلون صايرة .. رغم هي تراب عادي بس من خوفتها هاف لا احد يكتشفها .
مرة على مرة ..
كامت يومية من ما تحصل بوكة زينة تخمطلها شي كلش قليل من مخباية جدوع وتضمها وترد تدفنها .. وتكضي ايامها تفكر شلون تصير زنكينة وتبني قصر تعيش بيه هي وثاير وتفتك من عمامها اليجتلونا وجدوع اليدمغ فوك راسها .
بهاي الايام وبعز تفكيرها انو هي راح تصير زنكينة ويصير عدها كصر .. ردت فد يوم للبيت كالو لجدوع اليوم عدنا خطار هي كالعادة دخلت للمراح .. شوية وندهولها تجي للبيت
راحت تركض
شافت جدتها يازي موجودة
يازي بسرعة كامتلها حضنتها بس وسام ما رادتها
كالتلها : بعد ما تضلين هين جدا انا بنيت البيت وكضيته وهساه تجين تعيشين وياي
كالتلها : لا جدة انا ما اريد اروح وياج
استغربت يازي : عليش جدة شعاجبنج بهالعيشة يولي
– انا تعودت على عمي جدوع ما اريد اروح وياج وبعدين هم تهديني
– انا نا هديتج يجدة بس الايام هي الغصبتني .. ياله بنيتي حضري هديناتج وينهن
– انا رايدة عمي جدوع اريد اضل يمو
– عجل ما تحبيني
– لا احبج بس انا رايدة اضل هين ما اريد امشي وياج
– عليش يولي يجده
– احسن
حارلت تقنعها رادت ما رضت .. ضلت مصرة تضل يم جدوع جدوع فرح من شافها هيج متمسكة بيه وحابة الشغل وياه .
وصته عليها وكالتله : انا كل اسبوع امرها واشوف حالها
راحت يازي ووسام ضلت على عيشتها تفكر وتطمح تصير زنكينة هي واخوها .
ومرت الايام ولشهور .. وحتى السنوات ..
وجدوع وكل العربانة الها تاخذ ابنه الزغير .. وهو اشتراله كاع هو وولده الكبار كاموا يشتغلون بيها .. كامت من تشوف مرة او زلمة مريش تزيد بالسعر ضعف اذا ناقشها بالسعر تنزل واذا ما ناقشها تشيل السعر الزيدة تخلي بجيبتها ومن كل دخل يومية تاخذ شوية وتضم .
وتشتغل وتضم وتشتغل وتضم ليما فرد يوم ..
المطي مالت جدوع مات .. وهو مطلوب ع الكاع .. كعدت هي بلا شغل تشتغل وياهم بالكاع بس ما بيه خبزة يطيها بس اكل وشرب جزاة شغلها ما يطيها فلوس .. وفلوسها هي دافنتهن
راحت حسبت فلوسها جثيرة .. قررت تشتري مطي وهي التاخذ المحصول من جدوع وتروح تبيعه احسن ما ضاله بالكاع ينهد حيلها من الشغل ..
فكرت شلون تفاتح جدوع وتكله اشتري مطي هسه يكللها منيلج ؟ واذا عرف هي بايكتهن منه راح ياخذهن منها كلهن ..
فكرت بثاىر .. كالت ماكو غير ثاىر احجي وياه واكله عودين الفلوس مالته وهو يتفك ويا جدوع ياخذ المحصول منه وانا وياه نروح نبيع وبالنص .
وصدك راحت حجت ويا ثاىر وكالتله اخذك ونروح لجدوع عود انت عدك فلوس وتريد تشتري مطي تشتغل بيه .. وانا اخليه يرضى يشغل المطي وناخذ محصول ونبيع
فرح ثاىر بكلامها لان راح تجي فلوس احين ما يشتغل ويا عمامه وما محصل منهم غير الجتل والطك .. خذت ثاىر ومشت لجدوع كالتله : عمي ثاىر عيريد يحجي وياك
كاللها : هلا خلي يكرب
جا ثاىر وكاله انا عدي جم فلس جامعهن ورايد اشتري عربانة جحش اشتغل بيها ووسام كالتلي اشتغل بكاعك احسن ما اشتغل عد الغريب
كاله : الله وايدك ياله
وسام كالتله : بس بالنص
كاللها المحصول مالتي وبنص جثير
كالتله : انا معلي عمي هو اذا يريد جثير ناس تتمنى عربانته بس انا كلت عليش يفيد غيرك انت اولى احسن ما يخيس محصولك وينباع هين برخص الماي .
رضى جدوع وراحت هي وثاىر واشترت المطي وكامت تاخذ المحصول هي وياه ويروحون يبعون .. نص سعر المحصول بجيوبهم هي وثاىر ..
ثاىر من عرفوا عمامه جاي يشتغل ويجيب فلوس كاموا يجتلون بيه خاطر يطيهم نص اليحصله .. تكاون وياهم وطلع منهم كام ينام بالعربانة مال المطي .
انقرت من حاله .. ينام بالشارع لا هي بمجان ولا هو بمجان ضالين مشردين .. لمت العدها وحسبتهن .. وراحت لثاىر كالتله : هاي فلوس وخلي نشتري انا وياك حتى لو فد غرفة ننام بيها وتحمينا من المطر والحر .. احسن ما ظالين هذا حالنا وانا كبرت مو مثل اول .
صدك اخذ الفلوس وراح ياخذ راي جدوع وين يشتري خاطر يبني جدوع شاف بيها فلوس كالو .. تبني بكاعي اخذولكم وصلة زغيرة من الكاع وابني بيها انت واختك وانا وولدي اعاونكم هم تضلون جريبين من عدنا خاطر شغلنا وهم عينكم ع الكاع .
صدك واطاهم وصلة من الكاع بنوا بيها البيت بلوك وطين .. وسولهم غرفة ومطبخ ومنور زغير على كدهم.. وسام وياهم تنكل بلوك وطين وفرحاااانة راح يصير عندم بيت هي واخوها وما عادوا مشردين بالشوارع لو تحت رحمة احد يدمغ بيهم ويجتلهم .
طارت من الفرح واهي تدحج صارلها ولاخوها بيت يسكنون بيه .. نظرات الفخر واضحات بلمعة عيونها وهي تدحج .
بعدهم ما كاضين البيت
مر عمي علي اخوي ابوي راشد صاح : يول ثاير الحافي منيلك وتبينلك بيت ها
كالو : من فضل الله عمي ما يهد احد
صاح : من فضل الله لو من **** اختك **** لحد ما ملت ليما بنتلك بيت
هو سمع عمه يفشر عليه وهو ذاك انتفض : عليش تفشر يمك كرباك نحنا ليش تفشررررر
-هاي ماهي فشاير هذا الحك والا منيلكم فلوس تبنون بيها بيت يالحافي ذاك اليوم اجدادك ذبوك اعلينا محد يريدك واليوم عده بيت ابو الوصخ نسى عمامه وفضلهم عليه وراح التف باخته تك… وتجيبلا
راد ثاىر يهد وما يحس الا وسام راكضة عليه ببلوكة وحاطتها براسه .. وكع للكاع وهو يكض براسه ويصيح : يا يابه طكووووني طكووووني يابه
ويمد ايده من راسه ويدحج الدم ويكوم يصرخ حيل
ووسام تكلا : حتى اتوب مرت الاخرى ما تتكرب لا مني ولا من اخوي يمك كرباك احنا ابن الجلب انعل ابوك لابو الجابك
راد ينهد عليها بدمه كضبتله عوده
عافها وراح يركض ويصيح ووكع بالكاع تخربط من الدم ركضله ثاىر شاله ووصله لبيت جده ورد يركض ..
صارت هوسه واطلابه ويطالبون بوسام يجتلوها كالتلهم : يولو جبيركم ما يهز شعرة من شعر رجلية ولد الجلاب انا جايتك ماستكم هو اجا يفشر علينا ويغلط .
وتحلفولها يجتلوها .. بس ما كدرولها
اذا هي طويلة وضعيفة وجنها زلمة ما جنها مرة تعلمت تعيش عيشة زلمة مو مرة .. بس ملامحها جميلة وجها حنطي بين سمار امها وبياض جدتها .. وعيونها صفر وحواجبها ثخان وعضام وجهها بارزة وتلبس شيلة وملامحة حادة جنها زلمة رغم جمالها بس ضايع كونها ما مهتمة بروحها خلصت عمرها شلون تعيش .
يحير اليدحج بيها العيون صفر حلوة
الخشم جاي عدل ضعيف حلو
حلكها صغير حلو
بس من تلم معانيها النتيجة مو حلوة ولا احد يدحح عليها .
عد ما كضوا بيتم وخلصوا ورادوا يكعدون بيها
بدوها بحصيرة وفراش واحد وغطوة وحدة اثنينم ينامون بيه واحد عكس الاخر .. كالتله من نشتغل شري شوي نجيب غراض عود .
– يولي احسن من نومة العربانة التكسر يا فراش يا بطيخ بس خلي انام وادفى ابيت وانعل ابو الدنيا .
هذا الحجي جدتهم يازي ما جازت منهم تروح ترد عليهم واكثر من مرة طلبت ثاىر يجي عدها يعيش واجوه خواله ورادوا يجيبوا يمهم بس ما راد .. ولا وسام رادت منهم اي مستعدة .. بس كل عالسنين ما كطعت ويا جدتها تروح وترد عليها وتحجيلها وتشاركها افكارها بس ما تكللها على بوكاتها وشغلها .. وكل ما يازي تعرض عليها تجي تعيش عدها وسام ما ترضى .. عبن خوالها مجبل ومسعد هم معقدين كلش ما عدهم مرا تطرى من باب الحوش .. وهي من الاساس من روحتها لبغداد وسام اعتمدت على نفسها ما رادت تعيش عد احد بعد .. تعودت على عيشة الشارع بيها شغل واكل وفلوس وفرارة .
عد ما كعدوا واستقروا وكاموا يشتغلون ويا جدوع بالمحصول ويبيعون .. عمامهم جانو ضاميلهم ضميمة .. شلون هيج فشخوا عمهم وكعدوا واستقروا ويشتغلون وعايشين حياتهم يتصيدولهم يريدولهم بس لزمة .
من ما كدروا يعملولهم شي
حطوا للجحش سم بالليل واجتلوه ..كعدوا الصبح لكوا الجحش ممطول ميت .. بجت وسام كامت ادك على راسها .. تبجي تنوح منين بعد يشتغلون منين ياكلون منين يشربون وهي كل العدها والما عدها ذبته ع البيت ومطلوبة هم ..
ثاىر كام يتهم عمامه ويتوعدلهم .. وهي مجابله الجحش وتنوح وتبجي وتتحسب على الجتلا …
ضلوا يومين بلا شغل جتلهم الجوع .. منين يجيبون ؟
الموسم ماهو موسم حصاد خاطر يشتغلون بكاع جدوع .. وجدوع اصلا من العوز باعلم وصلة من الكاع .
ثاىر كام يبجي اتعود على شغلة بالعربانة مالت الجحش هسه وين يطي وجهه وشيشتغل وهي الناس طاكها العور .
كامت وسام لبست شيلتها وراحت لجدتها يازي كالتلها : جدة انا من عمري ٨ سنين ما طلبت منج شي ولا كتلج اطيني .. ضكت الجوع والعطش والجتل والحر والبرد واشكال وارناك العذاب ما كتلج مديت ايدي لاحد وكتله هاذ البيه
– كولي جده رايدة شي
– انا رايدة منج دين
– شنهو الرايدته جدة ؟
– رايدة اشتري مطي نشتغل بيهن انا واخوي ونعيش من شغله ودين بس يحصلن عدي اردهن الج
– سهلة من عيوني جدة
شالت يازي فلوس المطي واطتهن لوسام
راحت وسام ما كالت لثاىر منين اداينت خذته ومشت للسوك اشتروا ومطي وردوا بيه طايرين من الفرح .. رد الشغل وردت الخبزة راح يرجعون يشتغلون بالعربانة .
صدك كامو يفرون ع الكيعان يشترون محصول ويروحون يبيعون بالسوك .. بس هالشغل وحدة ما يوفي دين وهم وراهم بيت فارغ وشتا تجتل برودة .
كامت وسام تطي اجرة ثاىر من المحصول وتروح بفلوسها تشتري بفلوسها غراض مال نسوان حلويات مال جهال وردت بيها للبيت .. ميزتهم وسعرتهم ..
للعصر بسطت بيهن بالدرب المرة التفوت الجاهل التشيه عينه
كامت الصبح تشتغل بالسوك والعصر تفتح البسطية ..
شافت عليها رجل كامت تزود بغراضها وكامت تجيب تتن وجراحف مالت بيت ووجوه .. صارت عليها رجل
وكدرت توفي دين جدوع ..
ضل بس دين جدتها تجمعلها ..
كالتلها جدتها : ما مستعجلة عليهن انا افرشي بيتج واكضي امورج وعودين وفيني
كالتلها : تمام
كامت تشتغل وتكد وتسعى وتكعد من الفجر تطلع ويا اخوها بالعربانة لحد الظهر ترد تفرزن الحابتهن وتعدلهن وتسعرهن لحد نا تنزل شمس الظهر تروح تفرش بالدرب وتحط بسطيتها وتبيع
ذاك اليوم …
وهي كاعدة .. مر زلمة وكف عدها كاللها : الله بالخير
كالتله : هلا الله بالخير والعافية
دحجت بعينه ذيج العين الوسيعة شاهت عينها عليه
كاللها بيش التتن .. ضلت اتدحج عليه شلون هندام شلون طول ..
كاللها : ها يولي وين بالج احاجيج
– اعذرني والله سهيت .. نعلة الله ع الشيطان
هذا التتن .. بخمس فلوس
– عجل اطيني منه لفة
شالته منه واطته .. نطاها الفلوس ومشى دحجت وراه بعد بيهن باكي صاحت وراه : هين يول
اندار عليها : عليه ؟
– اي عجل الباكي ما خذتو
– اخذي الج
حجاها وهو يخزها
حجت :يطيك العافية
جرت الشيلة غطت نص وجحها واندارت ادحج بكفاه .. ضلت عينها ملاحكته .
رادت تعرف هاذ منهو وشنهو صابها الفضول حوله
ثاني يوم على نفس المنوال كضت ظهريتها واجت فتحت بسطيتها والناس تروح تجي واليشترون وهي عينها تدحج بلكي يمر
بس ما مر ..
تسعل روحها : عليش علك ابالي من دون الناس وشلي بيه المر والما مر اعرفه يعرفني خاطر عيوني تفتشه ..
مر الاسبوع ومدري شجاله حالي ليل نهار يفكر بيه ويسرح ويجرخ بغير امور وجنه يجيني ويحاجيني ويلاشيني حت نوبات اضحك وثاير يكلي : ها شني غزيلاتج يضحكنج ؟
واسكت .. واندار واصفن
انا ليمتى اضل هاذ حالي اركض والعشا خباز لا عدي رجل لا عدي جاهل لا الي عايلة عمري ما ادري شكثره ولا يوم حسبته عيشتي بالدنيا شغل وچد ولا فرد يوم حسيت بروحي مرة ورايدة عايلة .. ما ادري اذا جان حكي لو ماهو حكي
وانا عليش كامت تورد ابالي العايلة والزواج من يوم شفت هالزلمة ولليوم شلي بيه بالله انا بحال هالسوالف هاي وحتى لو عرست منيلي وكت اجابل الزلمة شو من فجر الله اطلع ارد ما اعرل اكلي لكمة شنهو الجان خاطر افرزن بسطيتي ارد عكب الغروب وشالة ادور الوسادة دوارة خاطر احط راسي وانام .. انا هم بطرانة .
اسبوع وعلى هالرنة
ليما مرة جاي تحجي ويا النسوان وتعاملهن ..
شافته مر ضيعت السانها وضيعت روحها وكامت من مجانها من الفزة النسوان استغربت من فعلها : شجالج يولي
انتبهت لنفسها : هاا .. مو هاذ ذاك اليوم خذا مني التتن وما اطاني الفلوس عود كلت الحكه يله هو وربه
اندارت المرة كالتلها : ياهو قاسم
– هو اسمه قاسم
– اي قاسم ما تعرفين ابن بيت هزاع ابوه ملاج وعده خير بعازة التتن مالج يولي
– شمدريني انا ما تهمته باك يمكنه نسى الزلمة يلا ما تسوى بري الذمة .
ردت للبيت
افكارها كلها طايرة
الليل الكل يومية ترد منه ميتة تعب وكل فكرة ما ضالة ابالها بس تريد تنام اليوم النوم طار والافكار حضرت .. ان جان راح من بالها لو فارك خيالها
لثاني يوم على البسطية وهي سارحة بافكارها بيه ما تحس الا بدشداشته وكف جدام البسطة كالتله : هلا
ومن الصدمة ما تريد تكوم لو تكعد كامت اداور بروحها
زكح بيها : انت ما تستحين على روحج يمتى انا ماخذ منج تتن وما منطيج فلوسه
– لا حشى ينكص الساني لو حاجيتها .. خير
– عجل شنهو هاذ الحجي التوصلي بيد النسوان لاهلي اتطلبيتي فلوس تتن
– حرام وروح امي ان جان حاجية لو كايلة وكتاب الله ورسله
– والله معد نعرف ياهو الصادك وياهو الجاذب
-انا اتعذر لو وصلتهن جلمة غلط كتلهن اطاني فلوس وما رد الباكي يمكنهم فهمن غلط امسحها بوجهي لو ضايكتك
عافها ومشى ضلت ادحج وراه
اتضايكت حيل عبن رزلها لا حجة كلمة لينه ولا له ملكى طيب وهي الجانت سارحة بخيالها بعيد ومعتقدة هو راح يحبها ويودعا ويعيش وياها قصة عشك تالي الراقع رزلها ومشى .
عزلت البسطة من وكت وشالت غراضها وراحت تشخط برجليها خيبة وهي ترد للدار ، شافها جدوع صاح ؛ هااا الله بالخير شني ؟
– هلا عمي
– يكولون بايعين البيت صدك عجل انا من امنتكم وبعتلكم وصلة من كاعي تبيعوها للغريب
– ياهو البيع عمي
– شنهو ما تدرين
– لا والله عمي شصاير ؟
– ثاىر بايع البيت يكول داخل بيه استثمار
– استثمار شنهو
– ذبت من اديها وراحت تركض ادور على ثاىر بكل مكان ليما لكته صاحت : ثاىر صدك الكاله عمي جدوع لو جذب
– شنهو
– بايع البيت
– اي وما بس البيت العربانة والجحش هم بعتهن
-اش عتكوووول هذا بيتي انا البينته انا الجمعت كل فلس بيه شنهو انت تبيع بيتييي
– والله انا صاحب البيت وبكيفي عدي مشروع ابالي ورايد اسوي
– شنهو بيتك شنهو مشروع وانا
– انت شنهو .. خلك مرة انا اخذ شور مرة واكلها اسوي لو نا اسوي بكيفي انت مالج حجاية عليه افتهمتي يعجبج يعبج ما يعبج اركعي راسج بالحايط …

يتبع…

لقراءة الفصل التالي : اضغط هنا

لقراءة الرواية كاملة اضغط على : (رواية قلاع الضر)