رواية العشق لا يعرف وطن الفصل العاشر 10 بقلم أية إنسان
 |
| رواية العشق لا يعرف وطن الفصل العاشر 10 بقلم أية إنسان |
رواية العشق لا يعرف وطن الفصل العاشر 10 بقلم أية إنسان
_هاجر : مش معقول السلسله بتاعتي وصلت ليك ازاي انا قلبت عليها الدنيا .
_ آسر : وقعت منك يوم ما كنا على الكورنيش وانا قولت لما اقابلك هدهالك بس نسيت .
_ متشكره اوي انت متعرفش السلسله دي غاليه عندي قد اي أنا دورت عليها كتير .
_ اي خدمه انا قولت بما أن احتمال ما شوفكيش تاني فألحقك واديكي السلسله .
_ معلش تعبتك المشوار طويل .
_ ولا يهمك همشي انا بقى .
_ على فكره ممكن تستريح وتمشي الصبح الجو ضلم والدنيا برد .
_ فكر أسر شويه وقال: بس انا مش معايا خيمه ولا اكل .
_ يا راجل عيب عليك انا معايا اكل زياده لكن الخيمه لحظه واحده .
_ بعد دقيقتين رجعت هاجر معاها خيمه وقالت : اتفضل .
_ عملتي اي .
_ طلبت منهم خيمه وهما ادوني تعالي ناكل ونشرب حاجه .
_ يلا .
_ اتفضل تحب قهوه ولا شاي.
_ لو مش هتعبك قهوه مظبوط .
_ لا مفيش تعب ولا حاجه .
_ قوليلي يا هاجر هترجعي مصر امتي .
_ يعني هقضي هنا يومين وهرجع الفندق وهمشي في اليوم التالت .
_ هو انتي هنا لوحدك .
_ اتفضل القهوه .
_ شكرا .
_ انا هنا لوحدي اه .
_ غريبه بس انا اعرف ان عندنا الأهل مش بتسمح لبنتها تسافر لوحدها .
_ لا عادي في أهل بتوافق وخصوصا لما يكون في ثقه .
_ الموضوع ملوش علاقه بالثقه علي قد الخوف هما بيخافوا علينا .
_ هههههه لا في الحته دي اطمن متقلقش انا عارفه انا بعمل اي ومش بطول في البلد اللي بسافر ليها يعني اسبوع او ١٠ ايام وبرجع .
_ على كده سافرتي روحتي فين .
_ لا كتير روحت فرنسا ألمانيا سويسرا اليونان تركيا إيطاليا الصين النمسا .
_ كل دة حرام عليكي .
_ ههههه اكل العيش مر يا دكتور .
_ معاكي حق بس انتي بتتفسحي اهو .
_ بحب اعمل حاجات جديده واقابل ناس جديده واعرف حاجات جديده يعني بتعلم وبستفاد وبعيش حياتي زي ما احب .
_ يا بختك .
_ انت هتحسد ولا اي .
_ هههههه لا ابدا بس مستغرب أن لسه في ناس كده لسه بتجري ورا أحلامها وتعمل اللي نفسها فيه .
_ وانت مش بتعمل كده ليه .
_ لا خلاص مبقاش في أحلام عاوز احققها .
_ تؤ مش حقيقي مفيش انسان معندوش احلام اصل الاحلام دي زي الشمس لازم تشرق كل يوم عارف حتي الناس اللي بتتمني الموت دة كمان حلم بيحلموا بيه بس الانسان القوي هو بس اللي يقدر يحقق أحلامه لان الإنسان اللي مش بيحلم دة إنسان ميت .
_ بس مش كل الاحلام ورديه والقوي اللي بتتكلمي عنها دي مش موجوده عند الكل .
_ لا موجوده عند الكل احنا بس اللي بنعلق مشاكلنا على الدنيا والظروف والناس محدش جرب يعلق مشكلته على شماعته هو كل واحد فينا ربنا خلقه عنده قوى كامنه جواه يقدر يستغلها صح بس احنا اللي بنحب الاستسلام .
_ بس في حاجات بتهد الواحد من جواه وبتستنزف قوته .
_ من الطبيعي دة يحصل وتستنزف قوتك فتقع ولكن لما تقع اتعلم تستريح مش تتهزم فترجع تقف على رجلك وتبدأ من جديد وعلى فكره من حقك تزعل وتحزن تتكسر لكن مش من حقك ابدا انك تكرر تنهي حياتك لاي سبب لانها ببساطه مش ملكك .
_ الكلام سهل بس انك تتحطي في الوجع صعب .
_ ههههه ليه شايف أن مشكلتك هي اكبر مشاكل الكون لو بصيت كويس كل واحد فينا عنده معركه بيحارب فيها ومحدش يعرف عنها حاجه أنا مش مستقله بمشكلتك ولكن في حاجات اكبر وأخطر بكتير .
_ اتنهد أسر وقال : معاكي حق .
_ ههههه طبعا يا دكتور .
_ ربع ثقتك يا شيخه ……….
_ وفضلوا يتكلموا وقت كبير .
_ هاجر : يااااا الوقت اتأخر اوي الساعه ٢ بالليل .
_ فعلا يا هاجر الوقت جري بسرعه .
_ طيب انا هقوم انام بقى تصبح على خير .
_ هاجر .
_ نعم .
_ شكراً على القهوة جميله جدا ً .
_ العفو تصبح على خير .
_ وانتي من أهله .
_ دخل أسر الخيمه وكلم نفسه : يا تري انت جيت وراها ليه يا أسر معقول علشان ترجع السلسلة ولا حكايتك اي يا ابن السمري .
☆ ————– بقلم الكاتبة/ آية إنسان ————– ☆.
عند عمرو في الشركه :
_ عمرو بيكلم نفسه : الوقت اتأخر اوي الساعه 2 بس الحمد لله خلصت العرض خلينا نتسلي بكره ونشوف اي اللي هيحصل .
_ ونزل ركب العربيه وروح الفيلا .
☆ ————– بقلم الكاتبة/ آية إنسان —————-☆
في بيت اسماء :
_ اسماء : وبعدين بقى في هرمونات الليل واخره دة يا سلام لو كان عندي دلوقتي حد اتصل عليه واقوله جعانه يقولي الأكل هيكون عندك في خلال نص ساعه يا ست البنات ولا أقوله زهقانه يقولي افضي نفسي واسمعلك هي الحاجات دي فين داهيه لتكون إنقرضت وانا عايشه بلا هدف يعني يا رب كل اللي سهرانين زيي كده اللي بتكلم خطيبها واللي بترغي مع حبيبها وانا بكلم نفسي دة اي الليل دة صحيح حاجه تكسف يا رب نتخمد بقى علشان لما اترفد بكره اكون مصحصحه .
☆ ————– بقلم الكاتبة/ آية إنسان —————-☆
في غرفه ميرا :
_ميرا او بالاصح اميرة : الو ايوه يا فادي عاوز اي .
_ فادى : في حته رحله طالعين السخنه يومين وراجعين تيجي معانا .
_ مش عارفه حاسه مليش مزاج .
_ تعالي واحنا هنظبط المزاج علي الاخر بس خلي بالك الرحله دي متكلفه .
_ انت عبيط يا ابني انا مفيش حاجه كتير عليا انا ميرا عاصم العامري .
_ يا عم الجامد انت براحه ثم هو حد قال حاجه هتيجي ولا لأ .
_ امتي الرحله ؟
_بكرة هنمشي الصبح وهنرجع بعد بكره اخر النهار قولتي اي اعمل حسابك معانا ولا اي .
_ اشطا هقابلكم في الطريق سلام .
_ سلام يا حبيبتي .
☆ ————– بقلم الكاتبة/ آية إنسان —————-☆
في الخيمه عند هاجر :
_ المنبه رن الساعه ٤ الفجر ففتحت عيونها ولبست الجاكيت واخدت الكاميرا وخرجت بره تتمشي وطلعت تتمشي بأتجاه الجبل وفضلت تتمشي ساعه ونص ونفسها اتقطع من تسلق ذلك الجبل الجليدي فهو ليس مرتفع ولكن منظره رائع وقعدت هاجر تستريح واترمت علي الارض تلعب بالتلج وتعمل شكل فراشه بجسمها وعماله تضحك واستريحت شويه وقامت وهي بتلف خبطت في ذلك الجسد الصلب فكانت هتقع فمسكها ولأن هي مش شايفه حاجه فصرخت : اعاااااا فحط أيده على بوقها وقال : بس بس يا مجنونه هتفضحينا .
_ أن أانت مين .
_ لما انتي جبانه كده طالعه هنا في الوقت دة تهببي اي .
_ فقالت بصوت مرتعش من البرد : طب طب ابعد عنى لو سمحت .
_ اهدي يا هاجر يعني جبانه وقولت ماشي وكمان غبيه مين هنا هيكلمك مصري غيرى … انا أسر .
_ اتنهدت هاجر براحه لما عرفت أنه هو وقالت: حرام عليك يا اخي كنت هتوقف قلبي حد يخض حد كده يا أسر .
_ وفي حد طبيعي يطلع هنا في الوقت دة طالعه بتعملي اي هنا دلوقتي .
_ ولكن مفيش رد من هاجر .
_ بكلمك ردي عليا… انتي يا بنتي…. الله ماله دي متنحه كده في اي وبص أسر مكان ما هي باصه ووقف هو كمان متنح من جمال المنظر فوق الخيالي فكان شروق الشمس بالاشعه الذهبيه وكأنها تخرج من وسط الجبال الاتنين في نفس واحد سبحان الخالق .
_ وقفت هاجر تلقط صور كتير لمنظر الشروق والتلج حاجه فوق الخيال .
_ آسر : علشان كده بقى طلعتي هنا .
_هاجر : بصراحه منظر لا يقاوم بس انت هنا بتعمل اي .
_ بصراحه شوفتك وانتي خارجه من الخيمه قولت دي اكيد بتمشي وهي نايمه فمشيت وراكي .
_ بمشي وانا نايمه ليه إن شاء الله .
_ مهو مش طبيعي اللي بتعمليه .
_ سبت العقل ليك انت يا دكتور بس خدها نصيحه الحياه العاقله بتكون ممله لازم شويه جنان كده تدي طعم للحياه .
_ لا ما انا واخد باللي العينه باينه قدامي اهو .
_ ضيقت هاجر عينيها وقالت : تقصد أن انا مجنونه .
_ انا مقولتش حاجه انتي اللي بتقولي .
_ طيب جنان بجنان بقى اهو ورمت عليه كوره تلج .
_ انتي قد الحركه دي .
_ لو مش قدها مش هعملها يا دكتور .
_ طيب انا هعمل بنصيحتك وهتجنن عليكي دلوقتي وكور كوره تلج فهي طلعت تجري وهو يجري وراها وعمالين يحدفوا بعض بالتلج فهاجر قالت : أسر خلاص خلاص بالله عليك مش قادره اجري تاني .
_ آسر : حلو قولي اسفه يا دكتور أسر .
_ نععععم دة من اي أن شاء الله .
_ بدون سبب قولي .
_ دة عندها هناك يا أسر انا مش هعتذر .
_ طيب يبقى استحملي بقى وفضل يحدف عليها التلج لحد ما وقعت وقعدت مكانها بس مخبيه وشها .
_ هاجر هاجر انتي يا حجه قومي خلاص ماتت دي ولا اي وقرب منها فشدته وقعته جنبها على الأرض وفضلت تحدف عليه التلج .
_ آسر : خلاص خلاص يا هاجر خلاص .
_ ايوه كده ناس متجيش غير بالعين الحمرا صحيح .
_ مسكها من قفاها وقال : عين حمرا مين يا بت انتي .
_ احم دكتور انت اخلاقك بقت في الأرض عيب كده .
_ منك لله خليتي الواحد يخرج عن شعوره .
_ انت بتدعي عليا يا أسر وزقته في صدره فاتزحلق نظرا لوجود التلج ولكن علشان هو كان ماسكها فوقعت هي كمان ونزلوا الاتنين شقلبه ورا بعض لحد ما خبط أسر في خشبه كبيره فاتعدل وسند ضهره عليها ولكن علشان هاجر كانت وراه على طول فنزلت في حضنه بالظبط ….. دلوقتي مش مسموع في المكان غير صوت انفاسهم العالي والمضطرب هاجر كانت مغمضه مش شايفه ولكن لما فتحت رفعت عيونها فتقابلت مع غابته الزيتونية سرح أسر في عيونها ورفع أيده يزيح تلك الخصله المتمرده من شعرها على وشها ولكن فاقت هاجر من الغيبوبه اللي هي فيها وقامت بسرعه عدلت نفسها وقالت بغضب : انت مجنون يا جدع انت بتتنيل تقع بتشدني معاك ليه مجنون انت .
_ وقف أسر يشوف عصبيتها ولكن هو متأكد أنها بتقول اي كلام تداري كسوفها فية اكتر وهي عماله راحه جايه وبتدب في الأرض فضل يضحك عليها بصوت عالي وهي لما شافته كده قعدت جنبه تضحك من كل قلبها على اللي حصل .
_ هاجر : لا خلاص تعبت ربنا يسامحك يا أسر مش قادره بطني وجعتني من الضحك .
_ طب خلاص خلاص خدي نفسك براحه احسن تفيصي مني هنا .
_ لا متقلقش انا مش هموت الا في بلدي .
_ وجايبه الثقه دي كلها منين .
_ اديك قولت ثقه اهو انا واثقه انا ربنا مش هياخد روحي الا في مصر .
_ ربنا يديكي الصحه والعمر الطويل .
_ شكرا يلا بقى نطلع احسن يمشوا ويسيبونا ونتوه هنا وكمان خلاص تلجت وحاسه ان شعري وقف من التلج .
_ رجع ضحك أسر بشده .
_ لا متقوليش انك تخيلتني وشعري واقف وسكتت ووقفت تضحك تاني : هههههه تصدق شكلي هيكون مضحك اوي .
_ طب يلا يا مصيبه .
_ ميرسي .
_ وبالفعل طلعوا مكانهم وعملت هاجر فطار وقالتله : اتفضل .
_ لا شكرا مش عاوز مش بحب افطر الصبح .
_ لا هتفطر مفيش حاجه اسمها مفيش فطار .
_ لا مش عاوز بس ممكن تعمليلى قهوه .
_ طب اي رأيك تاكل لقمه وهعملك قهوه .
_ ماشي يا هاجر .
_ اتفضل .
_ شكرا يا هاجر .
_ على اي يا دكتور .
_ على كل حاجه بقالي كتير مخرجتش وبقالي كتير مضحكتش من قلبي كده .
_ ليه مقفل الدنيا على نفسك يا دكتور الدنيا مش مستهله كل دة حارب علشان الحاجات اللي بتحبها والناس اللي بتحبها .
_ لا خلاص انا مكتفي بذاتي معنديش حاجه احارب علشانها كل الحاجات أو الناس اللي تتحب ماتت .
_ تؤ مش ماتت دي بعدت بس .
_ ازاي .
_ اتفضل القهوه ، لان بكل بساطه الناس لما بتموت الحياه بتستمر لكن لما الناس بتبعد الحياه بتقف .
_ دا مبدأ غريب جدا .
_ ليه غريب ليه .
_ علشان هنا الموت بيكون ارحم من البعد .
_ يمكن علشان الموت حاسم ، والبعد فيه إحتمالات .
_ ابتسم أسر برضا وقال : هو أنا ينفع أسألك سؤال بس متفهمنيش غلط .
_ ههههه متقلقش وقبل ما تسأل هجاوبك انا .
_ ودة ازاي .
_ مش انت هتسأل وتقولي ساعات بحس انك عاقله وساعات بحس انك مجنونه .
_ هههه هو مش بالظبط بس حاجه زي كده .
_ أسر .
_ طيب طيب هو دة السؤال .
_ اتنهدت هاجر وقالت : مش عارفه يعني انا متناقضه جدا في كل حاجه .
_ بمعني .
_ يعني بحب اصحابي اوي بس بحب اكون لوحدي ، بحب الخروج والفسح بس بحب افضل في اوضتي طول اليوم ، بخاف من الضلمه ولكن بحب افضل في اوضه ضلمه ، بحب الكلام ولكن اوقات كتير بكون ساكته ، اوقات تحس اني عاقله اوي وأوقات تحس اني مجنونه اوي يعني انا ميكس من كل حاجه باختصار انا حاله معقده جدا اوقات كتير انا شخصيا مش بفهم نفسي بس عايشه وبعمل اللي بحبه ودة اهم حاجه .
_ هههههه انتي مش معقده انتي حاله نادره .
_ بمعني .
_ مش هعرف اقولك دلوقتي ممكن في وقت تاني .
_ اوكيه .
_ جاءت فتاه وقالت أنهم هيتحركوا دلوقتي .
_ هاجر : بتقول اي يا أسر البنت دي .
_ بتقول أن
هم هيمشوا خلاص .
هم هيمشوا خلاص .
_ اه تمام .
_ وانا كمان لازم امشي .
_ اه طبعا زي ما انت عاوز .
_ مش عارف هنتقابل تاني ولا لا بس خلي بالك من نفسك مش كل مره هتقعي هكون موجود .
_ هههههه متقلقش وانت كمان مش تسرح بخيالك كتير محدش عارف المره الجايه ممكن يحصل أي .
_ فرصه سعيدة يا هاجر .
_ مبسوطه اني اتعرفت عليك .
_ سلام .
_ أسر .
_ نعم .
_ خد مج القهوه دة معاك المشوار طويل لتحت والجو برد .
_ ابتسم بلطف وقال : شكرا .
_ سلام .
☆ ————– بقلم الكاتبة/ آية إنسان —————-☆
في مصر في فيلا العامري :
_عاصم : جاهزه يا وعد علشان نمشي .
_وعد : جاهزه يا بابا يلا بينا .
