رواية الوقوع في الحب الحلقة الخامسة 5 بقلم هبوش
 |
| رواية الوقوع في الحب الحلقة الخامسة 5 بقلم هبوش |
رواية الوقوع في الحب الحلقة الخامسة 5 بقلم هبوش
جهاد/يشبحله بترقب… من امتى تاخذ في السم هذا …
عبود حط بودرة ع كف يده واستنشقه ورجع للخلف بسترخاء
عبود/ نبي نرتاح انا تعبت … ونزلوا دموعه
جهاد/ اووو عليناااا انساها الزح معش اتفكر فاها
عبود/ حط يده ع وجه… ماقدرتش لعند توا قاعدة قدام عيوني ياريت ماشيت معكم
جهاد/ خلاص شي و صار هذا يومها
عبود/ عيونه حمر… لا نحن السبب لو ساعدنها ماكنش صار اللي صار
جهاد/ بغضب… اسمع الموضوع هذا صكر عليه ماتقعدش اتحاسبنا على شي مادرناش… قاطعه بعياط
عبود/ بس نحن السبب في موووتهااا…
???? حي شن دايرين ومن اللي ماتت اوبااا هيا تعالوا نرجعوا لاسبوعين فاتوا وشن اللي صاير في تونس…
هذا في يوم طلعوا الشباب يسهروا في ملهى ليلي بعد سهرة طويلة رقص وشرب ????وتقريبا ساعة 2 بالليل طلعوا مع زوز بنات دفعولهن بيش يمشوا معهن لغرض????
وحدة من البنات كان صاحبها جاي للملهى وشافها طالعة مع ثلاث شباب
قبل ماينزل من السيارة ويمشيلها اتصل عليها وهي شافت للتلفون ورجعت حطاته في الشنطة وصاحبها ايراقب فاها من بعيد عصب وقرر ينزل ايشدها من شعرها بس وقفه صوت مسج فتح عليه وكانت بعثتله..
????حبيبي انا عند روزا غدوة انشوفك…
لما قراها تراجع وقعد في السيارة ولحقها
وين مامشيت مع الشباب لشقة رفيقتها وقت كانوا داخل و عبود واخذها للدار جاء لعندهم ايخبط ع الباب بالقوة
فتحله جهاد و على طول ضربه بوكس ????وقعد اينادي عليها تطلع تعاركوا معه الشباب
عبود/ يلبس في حوايجه…هذا منوو اللي ايعيطلك
البنت/ ترعش وتلبس… هذا حبيبي شكون اندير…
ونزلت من السرير بسرعة على خشت صاحبها و معاذ وجهاد ايشدوا فيه
الشاب/بعصبية… ياااا**** اااتخوني فياااا …
ويشدها من شعرها وهي تعيط تتجدا فيه قعد يضرب فاها وصاحبتها تعيط وتطلب من معاذ وجهاد ايحزوا عليها قبل مايقتلها
حاولوا يمنعوه بس الشاب تحمق من معاذ اللي عصب عليه وصارت بينهم مناوشة???? بعدوه جهاد وعبود منه وطلعوا بيه برا الدار
جهاد/ بحمقة…هياااا نمشوا فكنا من المشاكل
معاذ/ يمسح ع خشمه… ابن ال**** اشبح كيف يضرب فاهااا????
جهاد/ بغضب… مااالناش دخل ينحرقوااا
وعبود واقف يشبحله كيف معصب ويضرب فاها ضرب قتل
صاحبتها/ شدت فيهم… ايعيشك خويا سعدوهااا قبل مايقتلها هذا مجنووون
جهاد/ نحى ايدها وبغضب … عارفاته مجنون ليش جت معانا نحن مااادخلناش بمشكلكم جينا هنا انفرهدوا ونغيروا النفسية… وشبح لعبود ومعاذ… هياااا
عبود/ بخوف… تي يبي يقتلهاااا الزززح كلموا الشرطة ولا ديروا حاجة
جهاد/ دفه للباب… ااامشي مادخلناش بيهم… وعيط ع معاذ… هيااا يامعاذ
و معاذ لحقهم للباب
والتفتوا كلهم على صوت صحبتها عيطت بعد ما شبحت الشاب دفها من بلكوني الشقة
خافوا الشباب وهربوا نزلوا من العمارة لسيارتهم و شافوا البنت كيف املوحة ع الارض بدمها. ???? وقفوا لحظات من هول المشهد و الناس بدت تتجمع عليها طاروا الشباب بسيارة وعلى طول نزلوا خذوا حوايجهم من شقتهم بسرعة البرق وروحوا ليبيا بنفس الساعة في الطريق قعد جهاد ايلوم في معاذ اللي عرفهم عليهن وتعاركوا بالكلام و عبود سارح و ضميره مش مرتاح لان كان بي امكانهم ينقذوها منه قبل مايقتلها ويلوحها من فوق
وصلوا ليبيا ساعة سبعة الصبح ونزلوا في استراحة جهاد لعند ماتهداء اعصابهم ويشوفوا لو في بلاغ عليهم او اساميهم مذكورة في الجريمة صارلهم توتر وخوف و خاصا عبود اللي كملها حشيش وصار عصبي هلبا…
بعد خمس ايام روح كل حد لحوشه لما عرفوا مافيش اخبار ع القصة اللي صارت
نرجعوا للواقع ????
جهاد/عصب عليه… ماتفهمش نحن مادخلناش هو اللي قتلها وهي اللي سببت بموتهااا ماحد غصبها تمشي معانا
عبود/ يضرب ع راسه… مش عارف شن اندير بيش ننسى قاعدة قدامي نشبح فاهااا خلااص بنفقد اعصابي
جهاد/بتنهيدة… لو بتقعد هكي اتضيع روووحك
عبود/ بوجع… خلاص انا ضعت????…
……………….. ????????????????????????????
نزل معاذ من فوق
و ادم و يامن كل حد شاد تلفونه وفيتين الجو وصفية خايفة من الحاج ايعصب على معاذ ويرتفع ضغطه
معاذ/ مساء الخير…
ح سليمان/ يشبحله بغضب… انست يا استاذ ها ان شاءالله فرهدت في هالدنيا وعشت حياتك
معاذ/ بملل… جت رحلة مستعجلة مالحقتش انقول نبي انسافر
ح سليمان/ مممم معك حق مش لقي وقت لبوك تستاذن منه ماهو مش دايرلي احساب كيفي كيف هالحيط في الحوش
صفية/ بتوتر… حشااااك ياااا حاج معاذ م… قاطعها
ح سليمان/ بغضب… اااسكتي يا صفية
صفية/اهووو سكتت????
معاذ/ اسف لو غلطت
ح سليمان/ لو غلطت! سبحان الله مش معترف حتى بغلطتك لا مالا هك انا اللي غلطان
معاذ/ تافف… انا مش اصغير كل مانطلع انقوللكم بعدين موضوع مايستهلش اتوجع راسك و راسي بيه
يامن و ادم/????????
ح سليمان/ بحزم… هات مفتاح السيارة وقرش معش نعطيك بيش اتادب وتعرف تحكي كويس
معاذ/ بزعلة… مالا نطلع من الحوش و معش اتشوفوني هك احسن
صفية/ بالله عليك ياحاج هو شن دار لعند تعقبه هكي
ح سليمان/ فنص فاها… هذه تربيتك ودلالك ليهم زيدي كبري روؤسهم ماهو انا معنديش كلمة في هالحوش الكلمة كلمتك انتي وعيالك كلا نا ديريني ميت …
وصبى معصب ايعارك…
الشباب/????????
صفية/ غير وسع بالك لا اله إلا الله نا ماقلت شي يستاهل اتعصب منه باهي ولدك صغير كان غلط انصحه مش تضغط عليه وتهججه من الحوش
ح سليمان/ بعتب… خلاااص انا اللي غلطان لا ننصح حد ولا نعاتب حد هذول عيالك اسطفلوا منك ليهم…
جاء بيمشي
صفية/ لا حول ولاقوة الابالله كان تكلمت تاخذ بخاطرك نسكت خير ????…
والحاج سليمان شبحلها بعتب وبيمشي يطلع
صفية/ بستغراب… وين ماشي بهاليل
ح سليمان/ وهو ماشي للباب… نبي نوسع خاطري ولا حرام نطلع…
وفتح الباب ومشى
صفية/ التفتت لمعاذ… اهو ارتحت توا زعلته من تحت راسك
يامن وادم/????????
معاذ/ وانت ليش اتكلمي نا ماقلتلكش دافعي عليا
صفية/ والله نستهلها ياريتني ماتكلمت وخذا منك السيارة
معاذ/ لوح بيده… مغير كلام مايقدرش ياخذها ولا يدير حاجة
يامن/ لا هداك زمان توا بوك متغير مش بوك الاول
ادم/ هههههههه شوقتني نمشي المزرعة انشوفها
صفية/ قلبت وجهها… هدا علاش ماشي لمحمود مالا ????
يامن/ شبحلها بجنب… باهي تحركت الحاسة السادسة
معاذ/ بستغراب… مش فاهم حاجه شن صاير
ادم/ ضحك… شكله الحاج وقع في الحب????…
صفية/ بندفاع… عيب عليك يا اادم شن الكلام اللي تقول فيه
يامن/ والله ياصفصف هذا الواقع الحاج بيجدد شبابه وانتي خليك ادافعي عليه لين ايتعرس و ايدخلها عليك
صفية/ بانزعاج… فال الله ولا فالك ????
معاذ/ بتعجب… قصدك يبي يتزوج على امي ????
يامن/ نحن لو سكتنا وخلينه على مزاجه ايديرها ونص
صفية/ دمعتها نزلت… انهون عليه بعد هالعمر ????????
يامن/ بنرفزة… رااهو انتي مشاركة قاعدة هاملة روحك كانك عجوز امكملة عمرها
صفية/????
ادم/ قرب منها … صكر فمك عجوز في عينك امي مافيش احلى منها…
وقعد يمسح فدموعها ويبوس خدها????
صفية/ ببكاء… توا اني عجوززز
ادم/ فوتيه الحيوان قاعد ايخرف
معاذ/ بغضب… والله مايحلم يتنزوج هذا اللي ناقص اتجي وحدة عقاب عمره تشارك في رزقنا
يامن/ ايوووه باهي لقيت واحد ايحس ويفهم تعال اعطيني بوسة…
وشده من رقبته باس جبينه… ????
يامن/ طلعت تفهم خير من الحمار اللي يهز في راسه وخلاص
ادم/ بغضب… قصدك على من؟ياتيس
يامن/ مافيش تيس و حمار الا انت…
وعاد شدوها عركة
صفية/ وااااك خلاااص انت ويااه بطلوا مش اصغار عاااد ????
ادم/ سمعتيه كيف يعزق في دوة ????
يامن/????
صفية/ شبحت في يامن… انت الغلطان اتنابش فيه
يامن/ بملل… بااهي باااهي توا خلونا في المهم شن انديروا مع الحاج…
صفية/ مش مقتنعة مستحيل الحاج ايفكر كيف ماتفكر انت
ادم/ حتى اني مع صفصف
معاذ/ انا مع يامن مافيش دخان بدون نار.
اما عند الحاج اتصل بخالي ومشاله في الحوش يشرب عنده الشاي وقعدوا ايهدرزوا ع الدنيا
ح سليمان/ تبي الحق في موضوع نبي ناخذ رأيك فيه وتشاور عليا
خ محمود/ خير ان شاءالله
ح سليمان/ انت تعرف نا معنديش غير ثلاث شباب وكل حد فيهم لاهي في هالدنيا ومن زمان نجري بروحي مالقيت من ايساعدني ويوقف معاي في شغلي مش هامهم الشغل لا في المزرعة ولا في المصنع وانا كبرت و الصحة مش كيف قبل
خ محمود/ ان شاءالله ربي يعطيك الصحة وطولت العمر… قاطعه
ح سليمان/ تسلم انا نبي نطلب منك طلب وان شاءالله ماتردني…
خ محمود/ ان شاءالله خير…
ح سليمان/ انا قررت…
……….????????????????????????????????????????
عندي مقعمزين كلنا في دار المعيشة نتفرجوا ع tv عزيز ايتابع في الكورة ونجوى اتابع في سيدرا و مويد يكتبوا واجباتهم
و انا شادة تلفوني ونراسل في حنين شات
عزيز/شبحلي… مع من تهدرزي
انا/ شبحتله ورجعت للتلفون… مع حنيييين????
عزيز/ ممم باهي صبي دير شاي وحطي معه كعك
انا/ اوووف تشبح فيا مشغولة اهي مرتك فاضية اديرهالك…
ورجعت نشبح للتلفون????
نجوى/ شغل الحوش كله قعد على راسي حرام كان صبيتي جبتي شاي لخوك
عزيز/ شدي اللسانك و صبي خير مانحذف فيك الريموت
انا/ لويت وجهي… تي باااهي اااوف…
وصبيت انتمتم خشيت درتله شاي وجيت حطيتها قدامه ومشيت داري كملت هدرزة مع حنين…
عزيز/يشبح لنجوى… تعالي صبي الشاي
جت نجوى قعمزت جنبه وقعدت اتصبله رن تلفونها مدتله الطاسة وشدت تلفون اترد
نجوى/ الوو اهلين يا مريم
مريم/ كيف حالك وحال عزيز والصغار
نجوى/ الحمدلله
مريم/ قلتلك يا نجوى اسألي عزيز لو فاضي نبعثله كشوفات احساب ايشوفهملي
لقيت افلوسي ناقصات معرفتش من شنو
نجوى/ تشبح لعزيز… باهي توا نشوفه… وحطت يدها ع تلفون … مريم تبي تشوفلها كشوفات شن انقوللها
عزيز/ بتمتمة… عليك هم وخلاص
نجوى/ عضت ع شفتها… اووص تسمعك
عزيز/ لوح بيده… تي خليها تسمع بالكي اتحل عنا الزززح
نجوى/ عزززيز عيييب المراء ع الخط حشمت بياااا هيااا شن اانقوللهااا
عزيز/ اوووكي خليها تبعثهملك توا بعدين نشوفهم…
نجوى/ رجعت تلفون ع وذنها… ايووه يا مريم هيا ابعثيهم ليا بعدين ايشوفهم امغير توا مش فاضي
مريم/ ااا بااهي شوي ونبعثهملك…
صكرت منها
مريم/ سعدودك يا نجوى كلمتك ماتنزل للوطا… وصورت الاوراق قدامها وبعثتهم واتس
نجوى/ استلمت المسج… هك اشبحهم… ومدتله تلفون
عزيز/ نزل تلفون… مش وقته توا تشبحي فيا انتفرج ع الكورة…وتافف… مانقص عليا الا صاحبتك
نجوى/ بزعلة… حرام عليك المرأة ماعندهش حد يوقف معها
سيدرا/????✍️????
عزيز/ اتجي على راسي ني
نجوى/ بتمتمة… توا انت تبي تساعدها ولالا
عزيز/ بعد المبارة وانتي امغير تنقي وخلاص… وزاد الصوت
نجوى/ شبحت لبنتها… كملتي واجباتك
سيدرا/ اخر سطرين…
ونزلت وجهة في الكراس
نجوى/ باهي هيا اكتبي ومعش تكسري وذنك????
.
.
روح ح سليمان للحوش ساعة 11 و على طول خش لداره بدل حوايجه وخش لسرير وصفية تشبحله كيف متجاهلها حتى بعد حكيت معه ماردش وغطى وجهه بالورغان ورقد
اما معاذ طلع ايشوف في جهاد بعد ماتصل عليه و خبره بحالة عبود و انفتحت قصة البنت اللي قتلها حبيبها وعلى قد مايقنعوا فيه الشباب ان هم ابرياء من الجريمة بس عبود حاط الشك وخايف التهمة تشملهم ويقبضوا عليهم بجريمة قتل وينحكموا بالاعدام
و ادم راقد في سريره وفاتح تلفونه على صور جوري و اول ماشبحها متصلة بالنت بعثلها سلام وقعد معلق السلام مافتحتش عليه ساعة وبعد عاود مسج ثاني ردت السلام بعثلها شنجو ردت بسمايل???? وعلى طول اتصل مكالمة
ادم/ اهلين جوري كيف حالك
جوري/ بحزن… الحمدلله
ادم/ لا بأس خيرك
جوري/ مافي شي
ادم/ بلا جو وقولي خيرك زعلانة
جوري/ تنهدت بضيق… ساجدة ضربها عبود قريب قتلها ????
ادم/ بتعجب… عبووود وعلاش يضرب فاها
جوري/ مش عارفه هو كان معصب و متعارك مع امي يبي افلوس ردت عليه جاء ضربها ???????? والله اني وامي ماقدرنا انبعدوه لين هي داخت بيش خلاها ????
ادم/ تؤتؤتؤ معقولة و سامي وين
جوري/ كان في العيادة اتصلت بيه جاء يجري رفعناها للعيادة
ادم/ وتوا ساجدة كيف حالها
جوري/ التفتت تشبحلها… ان شاءالله احسن. من شوية رقدت بعد مابكت وبكتني معها
ادم/ ماتزعلش روحك ارقدي وارتاحي حتى انتي
جوري/ ايه والله بكل مصدعة
ادم/ بحنية… سلامتك ان شاءالله
جوري/ الله ايسلمك هيا تصبح على خير
ادم/ وانتي من اهله…
وصكر منها بابتسامة وفرحة كبيرة اللي حكت معه وشكيتله خذا نفس طويل بسعادة وكانه ملك الكون ونزل راسه ع اللمخدة ونقلب ع جنبه وحضن المخدة الثانية
اما يامن مشى للشلة اللي يسهر معها وكالعادة شرب???? وبنات وقعد ساهر لساعة ثلاث لين معش يقدر ايصبي من كثر ما شرب عزق روحه ع كنبة في صالة ورقد
ساعة ثمانية الصبح كنت في المزرعة قايمة شغلي و كان يوم متعب هلبا وكل اللي بالمزرعة يجري ومش لاحق
ساعة ال11 لزمنا معدات وحاجات طبية نعطوا فيهم للابقار فبعثت عامل معاي يمشي ايجيبهم من المخزن بعد لحظات رجع العامل معه الحاج سليمان
ح سليمان/ شنو ياوردة المفتاح مش عندك
انا/ لا ماعنديش عند استاذ يامن
ح سليمان/ بستغراب… مش اعطيته لك علاش تعطي فيه ليامن !؟
انا/ هو اللي خذاه مني
ح سليمان/ استغفر اللة العظيم اهو لعند توا مجاش…
وطلع تلفونه اتصل عليه مرة وثلاث وعشر مكالمات لين عصب وقعد ايعارك وعاتبني ان ماقلتلاش وقتها ان يامن شاد علينا مفاتيح المزرعة
فات الوقت قريب ساعة ونص
ويامن كان دوبه واعي لاقي روحه راقد ع كنبة ونص رجليه برا قعمز يتكاسل وشاف لساعة التلفون وينصدم بعدد المكلمات نقز امصبي عرف ان في حاجة صايرة
طار للحمام غسل وجه وطلع بسرعة ماشي للمزرعة
و ح سليمان كان جايب اسطاوي فتح المخزن وكملنا شغلنا
لما وصل يامن شبحنا نزل من السيارة وجاء لعندنا
يامن/ بترقب… السلام عليكم
خالي واني/ وعليكم السلام
ح سليمان/ بغضب… من سمحلك تاخذ مفتاح الخزين من وردة
يامن/ شبحلي بحقد… مانبيش حد يسمحلي انا اندير بالي على مزرعتنا اكثر من الغريب
ح سليمان / اانت شن دخلك بيها المزررراعة من امتى تهمك ويهمك الشغل فاااها و اهو اليوم عطلت الشغل ساعتين بيش فتحنا المخزن وحضرتك في سابع نومة…
خ محمود/ بيهدي الوضع… صار خير ياحاج
يامن/ بملل… اسف معش نتاخر بعد اليوم
ح سليمان/ مد يده… هات المفاتيح و ان شاءالله عنك ماجيت مانيش بحاجتك ????
يامن/بنضرة شر????… اوكي يا حاج… و حط المفاتيح ع كرسي جنب الحاج
يامن/ بزعلة… تبي شي اخرى
و الحاج سليمان قعد ساكت ماردش عليه لين حس يامن بالاحراج قدامنا
خ محمود/ بينقذ الموقف… اكيد بنحتاجوك كان ماعندك شي اديره…
وانا استاذنت ومشيت حسيتها بايخة
يامن/ توا عندي شغل ضروري و ان شاءالله غدوة انفوت عليكم…
خ محمود/ ان شاءالله…
استاذن منهم ومشى شبحني واقفة جنب سياج نتكلم مع طبيب داخل مع الابقار
يامن/ واقف خلفي… ماتفرحش هلبا ح ايجي يوم وترجعي لحجمك الطبيعي
انا/ التفتت شبحتله… لو سمحت مشاكلك مع بوك خليهم بعيد عليا اني مالياش علاقة
يامن/ زاد قرب وشبحلي من تحت لفوق… نوعيتك هذه حافظها كويس ونعرف شن اتفكري بس خليها حلقة في وذانك توصلي للمريخ وماتحلمي توصلي اللي بدماغك
انا/ بستهزاء… اوف اوف وانت اللي بتمنعني ولا شنو ????
يامن/ بغضب… ومستعد نرتكب فيك جريمة لو حكم الامر
انا/تؤ تؤ تؤ خوفتني…????
و رجعت التفتت للسياج
يامن/ بعصبية… اووكي يا شوكة مزال بينا احساب مانتهاش
و اني فتته وقعدت انوصي في العامل و نحكي مع الطبيب في الشغل
و يامن مشى قلبه حاقد عليا ويتوعدلي
خ محمود/ ليش هك ياحاج تحرج فيه
ح سليمان/ يستاهل بيش يحس بغلطته ويقعد قد المسؤولية
خ محمود/ ان شاءالله لما يتعود ع الشغل ايشد روحه انت بس اعطيه الثقة وهندب عليه
ح سليمان/ ان شاءالله خير المهم شن ح يصير في الموضوع اللي قلتلك عليه
خ محمود/ خليني نفتح الموضوع مع وردة ونشوفها اتوافق ولالا و بعدين ساهل عزيز مش ح يرفض
ح سليمان/ باطمنان… ان شاءالله والله مانلقى احسن منها وانا من شفتها خشت خاطري و..
قعد يحكيله وهدرزوا في الموضوع
………????????????????????????????????????????
ناضت جوري ساعة عشرة ساعدت امها ع الحوش ودارت فطور لساجدة وخشت عليها تنوض فاها
جوري/ سجو سجوو
ساجدة/ بصوت ضعيف…قااعدة وااعية
جوري/ باهي نوضي افطري
ساجدة/ مالياش نفس نفطر توا
جوري/ قعمزت جنبها تمسح ع شعرها… تحسي في حاجة
ساجدة/ هزت راسها بالا … هممم
جوري/ عشان خاطري كولي حتى شوية
ساجدة/ بتعب… خليني ياجوري بالله عليك وقت نبي توا نفطر…
صبت جوري تشبحلها بوجع ???? وخذت نفس طويل ومشت فتحت دولابها طلعت حوايجها لبستهم وخذت شنطتها وسفرة الفطور وطفت الضي وطلعت صكرت وراها الباب
خشت ع المطبخ نزلت السفرة ع رخامة
غالية/ تشبحلها… مزالت راقدة!؟
جوري/ قالت ماتبيش توا
غالية/ بتنهيدة… الله ايسامحك ياعبود ويهديك مش عارفه شن صارله هك فجأة انقلب حاله كيف المجنون والله اعلم وين قاعد اللي ماروحش لتوا ????????
جوري/ ماروحش لانه عارف روحه شن داير….
جوري/ هيا تبي حاجة قبل مانمشي
غالية/ سلامتك حبيبتي… ????
و ساجدة بعد طلعت جوري طلعت غصتها و قعدت تبكي وجعها ضرب عبود و وجعها خطيبها اسامة ماتصلش يسال عليها مع ان سامي تلاقى مع عمه بوه لاسامة وحكاله شن دار عبود عاد عمهم هذا الكبير و سامي حكاله اللي صار…
بعد نص ساعه دق باب الحوش
طلعت غالية من المطبخ وفتحت الباب…
اسامة/ السلام عليكم
غالية/ وعليكم السلام اهلين اسامة اتفضل
اسامة/ خش… كيف حالك ياعمتي وكيف حال البنات
غالية/صكرت الباب… الحمدلله خش قعمز داخل …
ومشت فتحتله الباب ولعت الضي
و خشوا لدار الضيوف قعمز اسامة في بداية الدار وغالية قعدت واقفة
غالية/ بوجع… حكالك سامي
اسامة/ ايه الحمدلله ع سلامتها شن دايرة توا
غالية/ بتنهيدة… الحمدلله توا نمشي نوعيها مزالت راقدة…
وخشت على ساجدة لقتها مستندة ع سرير وعيونها حمر من البكاء ????
غالية/ كيف حالك اليوم
ساجدة/ بصوت ضعيف… الحمدلله من اللي جاء
غالية/ اسامة جاي يسال عليك تعالي اطلعيله
ساجدة/ باهي نغسل وجهي… ولفت شعرها… معليش يام دريلنا قهوة …
غالية/ باهي هيا اطلعي قاعد بروحه…
مشيت للمطبخ وساجدة ناضت من السرير شافت روحها ع المرايا حطت وشاح وطلعت
ساجدة/ السلام عليكم…
اسامة/ شبحلها… وعليكم السلام لابأس عليك
ساجدة/ ماتشوف بأس… وقعمزت ع جهة الثانية
اسامة/ شن دايرة اليوم
ساجدة/ بوجع… الحمدلله
قعدوا سكتين لحظات
اسامة/ زعلانة
ساجدة/ بحزن… وانت ايهمك كنت زعلانة ولالا
اسامة/ بتنهيدة… انتي تعرفي طبعي وقايلك اكثر من مرة حاجة تخصك اتقولي عليها و عيال خالتك حذرتك ماتمشيش معهم ولا تشوفيهم. قايلك ولالا؟
ساجدة/ بزعلة… انت جاي اتعاتب مش جاي تسأل على صحتي مش هامك ان عبود ضربني قريب قتلني ????
اسامة/ اوووف شن التفكير هذا …
قاطعه خشت غالية بالقهوة وقعمزت شوية تهدرز مع اسامة وشكت من عبود عاللي داره في ساجدة
شخصية اسامة انسان جدي ومايتنزلش ويبي كل شي على مزاجه وتفكيره هو. اسامة غيور هلبا وحماق ولان يعرف بتهور وصياعة اولاد خالتها فاميبش تحتك بيهم حتى من بعيد
علاقته بساجدة فاها فتور هو مايعبرش عن مشاعره وساجدة تبي من يهتم بيها ويحسسها بالحب.
بعد ماهدرزت غالية استاذنت منه ومشيت تكمل في الغداء
شبحلها بتنهيدة
اسامة/ اليوم بوي طلب انطلع العرس انتي شن رأيك
ساجدة/ شوف روحك كان ايناسبك
اسامة/ يفرك فيديه… انتي تعرفي الشقة تبي ادهان و تفريش اقل شي شهرين ثلاث بيش انتمها
ساجدة/ دير اللي ايريحك اني مش مستعجلة ????????
اسامة/ تمام وحتى انا مش مستعجل مافيش داعي نضغطوا اروحنا
ساجدة/ بزعلة… اهااا
اسامة/ اما عبود توا انتفاهم معه مش ح نسمحله ايمد يده عليك
ساجد / ماكنش واعي بكل
اسامة/ الحيوان ماشي وراء شلة صياع مش بعيد ايكون يتعاطى
ساجدة/ بقلق… يستر الله حتى اني لحضت عليه
اسامة/ الحق على بلال وسامي مخلينه لا رقيب ولا حسيب
ساجدة/ عبود معش يسمع ولا ايخاف
اللي في راسه ايديرها
اسامة/ بس يوصل ايمد ايده عليك هذه مانفوتهش وربي الا نادبه عليها
… خذا تلفونه وصبى
ساجدة/ بزعلة… بتمشي????
اسامة/ مزال بنرجع لشغل وبعدين بنرفع عمال للشقة
ساجدة/ اوكي
اسامة/ توا نهدرزوا بعدين واتشوفي الالوان اللي بتختاريهم
ساجدة/ ان شاءالله…
طلع اسامة وساجدة مشيت معه
غالية/ شبحاته طالع… خليك تغداء معانا
اسامة/ ان شاءالله مرة ثانية غير مستعجل عندي شغل
غالية/ باهي ربي يوفقك بيش اتسلم على هلك
اسامة/ الله ايسلمك…
مشى فتح الباب وساجدة وراه بعد طلع صكرت الباب
غالية/ نسمع فيه يحكي ع العرس
ساجدة/ عمي يبيه ايطلع العرس توا
غالية/ باهي وهو شن قالك
ساجدة/ قال مانبيش نضغط ع روحي لين انكمل الشقة
غالية/ بعتب… ليه سنة وهو اياجل كان ضغط ع روحه وكمل هالشقة حتى في شهر بتجهز وطلعوا العرس
ساجدة/ شن بنديرله بعد مايبش توا مش بالقوة… ????????
………….????????????????????????????????????????
كنت نفحص في بقرة وكل مانتم الفحص نضربلها ايبرة و عامل معاي ايحطلها ختم علامة انها واخذا تطعيمة
فات وقت وانا تحت الشمس لما كملت مشيت قعمزت في الضل والجو نو هلبا
شافني خالي جاء لعندي
خ محمود/ ربي يعطيك الصحة
انا/ بتعب… تسلم ياخالي
خ محمود/ شغل متعب ولالا
انا/ ايه هلباااا مع ان في معاي كذا طبيب بس متعب ماتخيلتاش هكي
خ محمود/ اها المزرعة كبيرة تبي مجهود وناس تخدم
انا/ فعلا هو هذا
خ محمود/ شاف لساعته… ساعة ونروحوا كان عندك شغل تميه
انا/ هيا حاجة بسيطة ونكمل…
????
تميت شغلي وساعة اربعة ونص طلعنا
و في الطريق
خ محمود/ الحاج حكالي في موضوع ويبي موافقتك
انا/ بستغراب… موضوع شنووو؟
خ محمود/ قبل مانقولك عليه لازم تعرفي الشي هذا يبي منك صبر و قوة بيش تتحملي صعوبات ح تواجهك
انا/ بقلق… حسك خوفتني يا خالي شكله موضوع خطير احكي شن هو ????
خ محمود/ والله ماني عارف كيف نشرحلك بس ليه ابعاد لقدام هو بالاول صعب ومشاكل بس بعدين ح يكون لصالحك واا… قاطعته
انا/ بخوف… وااااك يااااخااالي وقفت قلبي راااهوووو
خ محمود/ تنهد…الحاج سليمان طلب اي….
انا/شنووو ????
بعد حكالي قعدت مسبوها مش متوقعة الشي هذا
و قالي خالي مانستعجلش ونرفض وناخذ وقت انفكر والحاج حاط اماله انوافق ونكون جنبه ويد العون له في المزرعة والمصنع
الحق انصدمت وتفاجات ماعرفتش شن القرار اللي بناخذه وهل قراري ح يكون صح ولا قرار غلط
دخلت الحوش تاعبة جسديا وفكريا
معقولة اني نوقف في تحدي و نحط مستقبلي وحياتي رهينة للمجهول
نمشى بسرحان وعزيز ونجوى قعدين في صالة يشربوا في قهوة العصر
انا/ بهدؤ… مساء الخير…
نجوى/ مساء الخير تعالي اشربي قهوة
واني سارحة مانسمعش خشيت داري صكرتها
نجوى/ بخبث… هااا شفت حتى بعد انديرلها قدر مش معبرتني
عزيز/ يشرب في القهوة… فوتيها ماعنديش ليكم راس
نجوى/ باهي اعطيني افلوس بنمشي للسوق
عزيز/ علاش شن المناسبة
نجوى/ ضروري ايكون في مناسبة
عزيز/ مالا شن تبي تشري
نجوى/ مش عارفه لو لقيت حاجة تعجبني نشريها
عزيز/بعقدت حاجب… شن خسارة افلوس وخلاص راهو مش زيدات عليا بيش نعطيك
نجوى/ واااااك ياعزيز تمنيت ايجي يوم وتعطيني من غير مانطلب منك وبالتجداي اخرى
نجوى/???? مدت يدها… هاات هااات مش حلوة نمشي ايديا فاضيات و مانشري شي قدام مريم
عزيز/ اهااااا هو فاها مريم هذا ليش تبي السوق!
نجوى/ شن بندير عزمت عليا انسايرها انقوللها لا مانقدرش راجلي مايخليش فيا نطلع ولاااا… قاطعها
عزيز/خلااااص وانتي عششتي فوق راسي… وطلع افلوس مدهم… هذا اللي عندي مشي بيهم
نجوى/ تحسب الفلوس… شن بيسدوا المية اجنيه
عزيز/ والله هذا هو تبيهم باااهي ماتبيهم هااتي…
نجوى/ باهي يمشي حالهم ????…
طلعت واخذا حوايجي وخشيت للحمام اندوش ومزال عقلي مشوش من التفكير قعد كيف الطبلة
بعد طلعت مالقيتش لا عزيز ولا نجوى
خشيت للمطبخ اندير قهوة طيبتها ورجعت لداري حطيت الفنجان جنبي واتصلت ب حنين
انا/ الووو حبي كيف حالك
حنين/ الحمدلله بخير شن جو اليوم
انا/ اهووو كويس
حنين/ مممم خيره صوتك حزين وكئيب ههههه
انا/ باهي تعالي ياكلبة استحشتك وفي موضوع بنهدرز عليه مايبيش تلفون
حنين/ وليش ما انتي اتجي
انا/ من اللي بيرفعني بوي ولا راجلي ????
حنين/ امري لله توا انشوف بوي لو فاضي يرفعني
انا/ سلمها ياربي الحنينة هيا قاعدة نستنى فيك
حنين/ شن انجيبلك معاي
انا/ ههههه اللي يطلع منك المهم حاجة حلوة
حنين/ هيا تم…
طلعت شفت الشارع بالكي نحصل حد من اصغار الجيران اندزه للمحل ايجيب عصير وشكولاتة شبحت ولد يلعب قدام حوشهم عيطت عليه جاني يجري
الولد/ نعمممم
انا/ اندزك تمشي للمحل
الولد/ باهي هاتي فلوسك
انا/ شد جيبلي باكو عصير وشوكولاتة نوع كويس مش تاخذ شكولاتة خمسين قرش
الولد/ ايه باه
انا/ هذين تشري بيهم حاجة لك تمام
هيا اسرع ماتعطلش نستناك هن لعند اتجي
الولد/ طياااري… وطار يجري خمس دقائق وكان جاي ومعه طلباتي
الولد/ اشبحي هذول اللي تبيهم
انا/ فتحت الكيس… اوووكي تمام
الولد/ طلع فلوس… زادو هذول
انا/ خليهم عندك …
صكرت الباب وخشيت حطيت العصير في الثلاجة وجهزت القهوة والشاي درت كل حاجة قبل ماتوصل حنين
……… ????????????????????????????????????????
عبود/ بصوت مرخي… الوووو
اسامة/ وين قاعد
عبود/شن تبييي
اسامة/ تعال للمحل نبيك ضروري
عبود/ مش فاااضي قوووول شن تبي ع تلفون ولا اااامشي ****
اسامة/بغضب… ضم فمك يااوسخ وتعال للمحل خير مانجيك ونسود يوومك
عبود/ بعدم مبلاة… تييي فووت ااام ال**** ماتنفخش رااسي الزززح… وصكر عليه الخط
اسامة/ عصب????… مااشي يااكلب…
اتصل على بلال خو ساجدة الكبير
بلال/ الووو اهلين اسامة كيف حالك
اسامة/ بخير الحمدلله شنجو العمل
بلال/ الحمدلله
اسامة/ حكالك سامي على عبود شن داير
بلال/ ايه حكالي بس انروح من المستشفى ايشوف عليها
اسامة/ مش بس قصة ضربه لساجدة راهو عبود وضعه مش تمام توا كنت انكلم فيه واضح انه متعاطي
بلال/ شنووو! متعاااطي؟
اسامة/ قبل كنت شاك فيه بس توا متاكد مية في المية
بلال/ والله لو يطلع ايتعاطى يقعد فاها كلام اخرى ماينسكتش عليه
اسامة/ اللي صار مع ساجدة مانبيش ايتكرر فهمه الشي هذا ولا احسابه ايكون معاي اني
بلال/ انا ابروحي عابيله عليها امغير احصلت في المستشفى عندنا هلبا عمليات
…… ????????????????????????????????????????
دق الباب طرت نجري فتحتلها
حنين/هلوووو????…
انا/ بفرحة…حنووونة امووووه????
حنين/ ????امووه خوذي شدي
انا/ علاش امتعبة روحك????
حنين/ ???? شدي وانتي ساكتة
انا/ زدت حضنتها… لك ووحشة يا حيوانة
حنين/ خزي والله العيادة شينة بدونك
… وشبحت لصالة… مزال ماروحوا
انا/ اي ااحسن ارتحت منهم بيش ناخذوا راحتنا ونحكيلك… وشديت يدها… تعالي خشي تعالي
حنين/ الباين موضوع كبير هيا شوقتيني
انا/ انجيب القهوة ونرجعلك ولا انقولك تعالي معاي المطبخ… ????
شديتها من يدها
و مشينا للمطبخ ولعت ع القهوة وحنين تحط في الكنافة في المفرد
حنين/ ماديرهاش حلوة
انا/ اوكي مزلت مذكرة راهو ????
حنين/هههههه نحسابك نسيتي اسمعي ضروري اتجي تقعدي عندي اسبوع العرس اقنعي خوك من توا مادخلنيش بيك
انا/ صبيت القهوة… ان شاءالله لو نهرب اهروب????
حنين/ قرصت خدي… ياحليلي منك
مشينا قعمزنا في داري
حنين/ نزلت الفنجان… ايييي شن الموضوع المهم
انا/ تنهدت… عريس و…عيطت
حنين/بفرحة… لااااا ومن العريس
انا/ تي ااصبري خليني نكملك
حنين/ اووكي كملي
انا/ تنحنحت… تعرفي صاحب المزرعة اللي قاعدة نشتغل فاها
حنين/ بانتباه… ايييي
انا/ طلب ايزوجني ل….وقعدت نحكيلها بتفصيل
حنين/ بدهشة… وااانتي شنو موافقة!؟
انا/ اوووف شن تقترحي عليا????
حنين/ ????♀️ ممممش عااارفة حسيتها مغامرة
انا/ ???? زدتي حيرتيني ااااااخ …
و نزلت راسي ع كومدينو
حنين/ تنهدت… تبي مجازفة الحق
انا/ جبيني ع كميدينو… والحل شنو زعما نرفض ولا انوافق…
ورفعت راسي شبحتلها بنضرة حيرة
حنين/ باهي لنفرض وافقتي هو شنو؟
انا/ بلعت… ماهو هذه المشكلة الاصعب ????♀️
حنين/ضحكت…. ههههههههه تعرفي اول مرة انشوف زواج بالشكل هذا ????????
بس الحق الحاج مش ساهل هذا مجرم ????
انا/ هههههههه ????????????…
وبعدها سكتنا لحظات صمت وتفكير ????????
حنين/ واافقي
انا/ بقلق … خايفة
حنين/ من شنو؟
انا/ بوجع… انخاف ينكسر قلبي ????
حنين/ بتنهيدة… ااااه ياوردة ماتقلبيش عليا المواجع????… وعيونها تعبوا دموع
انا/ شبحتلها بستغراب… خيرك حبيبتي من شنو زعلانة…
حنين/ قعدت تبكي…???? نار في قلبي ومش قادرة انطفيها ????ياريت ما صارحني
كنت راضية بقسمتي ونصيبي…
وزادت تشهق وتبكي بحرقة جيت حضنتها ودموعي نزلوا عليها كيف تبكي????????
انا/ اوووص خلاااص حبيبتي قطعتي قلبي… و شديت وجها بين ايديا ونمسح في دموعها…
انا/ شن صاير معك ومن اللي صارحك احكيلي
حنين/ بتقطيع… االددكتووور س س ساامي قال انه معععجب بياااا???? وطلبني للزواج
انا/???? ياااغبااارته طيح الله سعده شن خطرها يعترف الغبي بعد شنوووو
حنين/ مسحت دمعة نازلة… مااا يعرررفش اااني مخطوووبة اهه اهه
انا/ ياروحي ماتزعلش الله غالب هذا النصيب
حنين/ موقف محرج تمنيت الارض تنشق وتبلعني ماقدرتش نشوف لعيونه خفت نضعف ونقوله حتى اني انحبك ????
انا/ مافيش اوعر من الحب ونار الحب ربي ايصبرك
حنين/ بشهقة… وانتي امتى جربتيه الحب بيش عرفتي ناره… ????
قعدنا نشبحوا لبعض ???? باستفهام وبعدين
انفلقنا بالضحك???????????? لين دموعنا نزلوا
انا/ بالضحكة… سامعة بيه هك ايقولوا ????
حنين/???? لا لا طلعت منك باحساس ولا احساس اليسا ????
انا/???? ياحليلي صار عندي احساس هههه
حنين/ ????????????
انا/ اي اضحكي الدنيا شن فاها وان شاءالله خطيبك يطلع ولد حلال ويسعدك
حنين/ بتنهيدة… ان شاءالله
انا/ تعرفي اني جعت خلينا انسخنوا المالح
حنين/ ماتغديتش في المزرعة
انا/ لا ايجيبوا سندوتشات وعصير ???? بس عارفة صاحبتك لو ماكان الغدي كسكسي ولا مكرونة مانشبعش ????…
بعد ساعة روحت نجوى بصغارها قالبة وجهها خشت اتعارك ودور في المشاكل معاي واني عشان حنين وعشان مالياش خلوق فتتها وخليتها اطلع غلها وسمها لين تعبت وقعدت اني وحنين في داري لين روحت الساعة عشرة
صليت العشى وقريت القران وبعدين صليت صلاة استخارة ودعيت ????
بعدها خشيت سريري رقدت
………. ????????????????????????????????????????
في حوش غالية
كان بلال جاي بيش يشوف ساجدة
بلال/ ماتعرفش وين مزرعته
سامي/ لا مانعرفش بس توا نسال ادم
بلال/ اي شوفه
سامي/ طلع تلفونه واتصل… الووو ادم شنجو
ادم/ الحمدلله كيف حالك وكيف حال خالتي
سامي/ كويسين الحمدلله قلتلك يا ادم مزرعة جهاد اللي يسهروا فاها عبود ومعاذ وين اتجي
ادم/ في ال******
سامي/ اوكي تمام
ادم/خير في حاجة
سامي/ لا بس عبود معش روح للحوش وخالتك تسأل عليه
ادم/ اها لا هو قاعد مع معاذ حتى هو ماروحش
سامي/ ماشي صحيت سلم على خالتي وعمي سليمان
ادم/ يوصل سلام…
سامي/ يشبح لبلال… في ال******
بلال/ اوكي توا نمشيله غادي هذا مايجيش بالطيب
غالية/ تربح خليه لين ايروح للحوش وتفاهم معه فكنا من المشاكل قدام اصحابه
بلال/ يا امي مش دايرله حاجة نبي انروح بيه ونشوف قصته شني انتي شفتيه بعينك كيف معصب وحاله مش باهي
غالية/ اي شفت
سامي/ نمشي معك؟
بلال/ لا خليك نمشي بروحي…
المهم طلع بلال ماشي لمزرعة اللي فاها عبود بعد وصل للمزرعة ضرب الكلاكس لين فتحله جهاد
بلال/ نزل من السيارة… سلام
جهاد/ سلام
بلال/ وين عبود
جهاد/ قاعد داخل خش…
خش مع جهاد وشافه مقعمز يلعب بوبجي ومعاذ جنبه شبحه نغز عبود
عبود/ شبحه… بلال!
بلال/ اشرله براسه… هياااا الحوش
عبود/ نزل التلفون… لا بنقعد هنا
بلال/ اسمع الكلام وصبي معاي احسن مانطلعك بالقوة
عبود/ عصب… شششن تبوااا فيااااا خلوني في حااالي اانا حرررر
جهاد/ عبود امشي مع خوك
بلال/ تلقاني برا نستنا فيك
عبود/ قلتلك مانيش ماشي مااانيش ماااشي
معاذ/ خلاص يا بلال امشي توا انروح بيه بعدين
بلال/ تقدم منه وعيونه شرارة… هي كلمة وحدة اااامشي قدامي يااااعبود????…
وشده من مرفقه ضاغط عليه
عبود/نتش يده… اوووكي اووكي توااا نلحقك…
شبحله بلال بتفنيصة وطلع للسيارة
معاذ/ اللي صار في تونس صكر عليه ماتحكيش بيه
عبود/ تي انا مش غبي الزززح… ونتش تلفونه وطلع معصب
في طريق درس بلال ع جنب وشبحله بهدؤ…
بلال/ نبي نسالك قبل مانوصلوا الحوش وجاوبني بدون كذب
عبود/ بلع ارياقه… شنووو
بلال/ انت تتعاطى
عبود/بلكلكة… نننتعاطى شششني ماافهمتش
بلال/ نفخ… عبود ماتستغباش معاي وجاوب ع سوال
عبود/ ااااندخن في الحشيش
بلال/ من امتى
عبود/ من زمان متعود عليه وعادي الشباب كلهم يشربوا فيه
بلال/ وغير الحشيش
عبود/ لالا حشيش بس
بلال/ وانت هك راضي بحالتك
عبود/ شن المشكلة كان دخنت حشيش هك جو وخلاص
بلال/ شغل السيارة… انتفاهموا في الحوش…
اول ماوصلوا خش عبود اعتذر من امه و من ساجدة و بعدين خذوه بلال وسامي للمربوعة
عبود/ يشبحلهم باستفهام… شن مزال اخرى مش اعتذرنا وتاسفنا خلاص شن تبوا مني
سامي/ خش قعمز وانت ساكت
عبود/ مصدع نبي نرقد هيا قولوا شن تبوا ع سريع
بلال/ الخاتم اللي بعته شن شريت بحقه؟
عبود/ بلكلة… ماااشريت شي عليا دين وخلصته
سامي/ شن الدين اللي يخليك اتعصب على اختك قريب قتلتها
عبود/ بنرفزة… شنووو هو تحقيق تي دين وخلاص وبعدين ساجدة هي اللي نرفزتني وانا كنت معصب
بلال/ بحزم… الكلام هذا مايخشش راسي
انت واخذ حاجة ومخليتك تعصب وتسرق خاتم اختك بيش تشري بيه السم اللي تتعاطاه
عبود/ بعصبية… ووقسممم بالل… قاطعه
سامي/بعياط… تي مااااتحلفش يااااراجل
مانش اغبياء انت قاعد تتعاااطى
بلال/ شده من اكتافه… من امتى اتسمم فيه
عبود/ تي خيررركم معايااا اااني ااندخن بس الحشيش ووومش ديما ع حسسسب ااالجووو
بلال/ فنص فيه… عبوووود القصة مش قصة حشيش اااعترف ولا والله نقفل عليك المربوعة ملتطلعش منها لبعد اسبوع… عيط عليه… اااحكي تكللللممممم
عبود/ بعياط… اااايه نتعاااطى هيروووين ارررتحتوا توااا
سامي/ يضربه كف… يااااحيوااان يااااوسخ والله انربيك…
ويشده من حوايجه بيضربه شده بلال
بلال/ سيبه ياااسامي مش هك التفاهم
سامي/ ماااايبش تفاااهم الحيوااان يبي ترباااية
عبود/عصب ودف سامي… ماالكش علاااقة بياااا ااانا مش اااصغير اندير اللي نبي ااانديررره…
قعد صوته عالي وعصب عليهم و سامي معش قدر ايشد روحه نزل فيه ضرب
خشت عليهم غالية بيش طلقه سامي
غالية/ تبكي وشادة بيد عبود… علاش ادير في روحك هكي شن نقصنا عليك خوتك في شن قصروا معك امغير اللي تبيه ايجي لعندك حتى خواتك البنات ماندلل فيهم كيف ماندلل فيك شن الغلط اللي درناه بيش تخش ع السم قول في شن غلطنا في شن قصرنا
بلال/ غدوة تمشي معاي لمصحة وتعالج قبل ما تدمن عليه
عبود/ مانبيش انتعالج اخلوني بروحي
سامي/ صكر فمك ح تمشي غصبا عنك
غالية/ تمسح ع راسه… تربح سلم ولدي اسمع كلامهم خوتك يبوا مصلحتك
.
……….????????????????????????????????????
فاتوا ايام خذا فيها عبود علاج من الادمان
وقدر يسيطر ع عصبيته وينسى الحادثة ورجع لجامعته بس مزال يطلع مع معاذ و جهاد يسهر معهم كيف قبل
اما اني خذيت ايام انفكر باللي عرضه عليا الحاج سليمان وبعد تفكير طويل خلاص قررت
وعيت ساعة ستة صليت الفجر وخشيت درت فطور رفعته معاي لداري قعمزت ع سريري نفطر ونتصفح ع الفيس لين جت ساعة سبعة ونص صبيت غسلت صفرة الفطور و رجعت داري لبست حوايج العمل
في المزرعة
وصلت مع يامن في نفس التوقيت بعد نزل من سيارته شبحلي بطرف عينه ومشى خش قدامي لمكتب بوه
يامن/ صباح الخير يا حاج
ح سليمان/ صباح الخير
خش خالي وراه صبح ع حاج و قعمز ع كرسي جنب المكتب
واني حطيت شنطتي في مكتبي و خذيت نفس طويل ومشيت
انا/ بالبسمة… صباح الخيررررر
ح سليمان/ ابتسم… صباح الورد للورد
يامن/????
انا/ ههههه تسلم ياحاج
ح سليمان/ شنو فكرتي كويس
انا/ اهاا اني موافقة
يامن/ عيونه نار… على شنووو… وقعد يشبحلنا بستفهام
ح سليمان/ وقف من ع كرسي… كنت نستنى فاها بفارغ الصبر الف مبروك ماتتخيلش قديش فرحت
انا/ ابتسمت… الله ايبارك فيك
يامن/????
خ محمود/ الف مبروك يابنتي
انا/ الله ايبارك فيك ياخالي
ح سليمان/ شبح ليامن… شنو يا يامن ماتبيش اتبارك لوردة وتباركلي حتى ني
يامن/ قلبه وقف… على شنوووو ااانباركلكم!!!؟
يتبع..
لقراءة الحلقة السادسة : اضغط هنا
لقراءة باقي حلقات الرواية : اضغط هنا
نرشح لك أيضاً رواية رقية للكاتبة هاجر محمود.
