رواية ميراث نور الفصل العاشر 10 بقلم لينا بسيوني

رواية ميراث نور الفصل العاشر 10 بقلم لينا بسيوني

رواية ميراث نور الجزء العاشر

رواية ميراث نور البارت العاشر

رواية ميراث نور الحلقة العاشرة

ولعت الفحم ورميت الثمره كلها فى الفحم !!

الثمره بدأت تولع وخرج منها دخان كثيف .

قولتلهم :

Lina Basyouni

قفلوا الشبابيك بسرعه !!

جريوا قفلوا الشبابيك وياريتهم ماقفلوها …

أستنشقت الدخان وحسيت الدنيا بتلف بيا , فضلت تلف تلف لحد ما وقفت بالمشقلب.

شوفت سقف الفيلا أرضيه , والارضيه سقف !!

شوفت تحتى محسن والشباب بيضحكوا بشكل هستيرى وبيقولولى :

أيه ياسطى اللى طلعك السقف , وأزاى واقف على السقف من غير ماتقع؟ !!!

فجأة لقيت تعابين ضخمه جايه وراهم!!!

 قولتلهم وانا بصرخ:

حاسبوا !!!

بس الثعابين لفت عليهم وبلعتهم وهما بيصرخوا !!!!

Lina Basyouni

فجأه لقيتنى بقع من السقف على الارض ،وببص ورايا لقيت ثعبان أسود كبير , بصلى وطلع لسانه الطويل وهجم عليا فغمضت عينى علشان ماشوفوهوش وهو بياكلنى !!!

وفضلت مغمض , بس مأكلنيش!!!!

فتحت عينى براحه , لقيتنى واقف قدام الدخان اللى طالع من الحله ومحسن والشباب قدامى بيتمطوحوا يمين وشمال !!

Lina Basyouni

فجأه جدران الفيلا أختفت , والمكان أتغير , بقينا واقفين فى الرسيبشن بتاع الفيلا بس فى وسط الصحرا!!

شوفت غبار كثيف لحاجه جايه من بعيد و بتجرى علينا !!

ركزت فى اللى بيجرى ناحيتنا وبيقرب بسرعه كبيره جدا!!!

لحد ما فوجئت بقطيع من الذئاب قرب علينا وبيعوى !!!

حاولت أحذر الشباب بس كانوا سكرانين ومش راضين يتحركوا من مكانهم !!!

سيبتهم وطلعت أجرى، لقيت الذئاب هجموا عليهم ونهشوهم وبيجروا ورايا

 فضلت أجرى لحد ماوقعت على الرمل والذئاب حاوطتنى من كل حته !!!

  زاموا عليا فبانت فأسنانهم وانيابهم الطويله !!!

وكانوا لسه هيهجموا عليا ، بس شافوا نور أبيض قوى جاى من ورايا , فخافوا وطلعوا يجروا!!!

Lina Basyouni

بصيت ورايا لقيت جدى ناير واقف ورايا وفى أيده زى شعله و بتطلع نور أبيض !!

قولتله :

جدى ؟!!!

لف ضهره وسابنى ومشى !! فقومت من على الرمل ونفضت هدومى،لاقيتنى رجعت طفل يدوبك بعرف أمشى، حاولت أجري ورا جدى ,بس خطوته كانت سريعه جدا, كنت بجرى علشان أحصله وهو ماشى !!!

Lina Basyouni

سمعت صوته بيقولى وهو ماشى :

أنا زعلان منك جدا يانور , انت خالفت وصيتى وأستخدمت السحر فى أذية الغير !!

قولتله وطلع صوتى زى صوت الطفل :

جدى , أنا…

قطع كلامى وقال :

أنا أنتقمت بالسحر قبل كده , بس ندمت وبتحاسب دلوقتى على غلطتى دى حساب عسير , أنت كمان لما تموت هتتحاسب حساب عسير…..

بعدها سكت جدى!!!

فضلت أجرى علشان أحصله فى مشيته وأشوف ملامحه لحد ماحصلته بالعافيه ،وبصيت على ملامحه لقيتها ملامح غراب , هجم عليا وهو فاتح منقاره ….

Lina Basyouni

فتحت عينى لقيتنى قدام الحله اللى لسه بتطلع دخان , كتمت نفسى بسرعه المره دى ومشيت وانا بتموطح و جبت أزازه ميه ورميتها على الثمره اللى بتولع …

 فطلع دخان كثيف و بعدها أنطفت ,بصيت على اللى متبقى من الثمره لقيت ماتحرقش منها ألا ربعها بس!!!

Lina Basyouni

مشيت وانا بتموطح يمين وشمال و حاولت أفتح الشباك علشان الفيلا كانت معبيه دخان , ومكنتش شايف حاجه , وصلت للشباك و فتحته , وخدت نفس عميق من الهوا النضيف اللى بره الفيلا , استنيت لحد شبورة الدخان ما أختفت …

ودخلت دورت على الشباب , فوجئت بتلاته ماسكين أيد

 بعض وبيتنططوا وهما بيقولوا :

أحنا فشار … أحنا فشار !!!

حاولت أفوقهم , بس كانوا بينطوا مع بعض وهما متحمسين جدا وبيقولوا :

أحنا فشار … أحنا فشار !!!

دورت على محسن مالقتوش خالص , أختفى تماما !!!

فضلت أدور على محسن فى الفيلا ،لفيت على الاوض كلها مالقتوش….

بصيت ناحية التلاجه لاقيت حواليها كل الاطباق والادراج اللى كانت جواها !!!

فتحت باب التلاجه لاقيت محسن مفضى التلاجه وقاعد فيها !!!

حاولت أشده وأطلعه من التلاجه بس كان بيترجانى أسيبه وقالى :

سيبنى ياسطى أبوس أيدك .. أنا أيس كريم ولو طلعت من التلاجه هسيح !!!

راسى كان فيها صداع قوى جدا….

فجأه سمعت جرس الباب بيرن , روحت ناحية الباب وبصيت من العين السحريه….

وفوجئت باللى واقف على باب الفيلا …

سندس !!!

Linabasyouni

أيه اللى جابها هنا وعرفت مكانى أزاى!!؟

فتحت الباب، وقولتلها وانا مغيبب وبفتح عينى بالعافيه :

سندس !!!

قالتلى :

أزيك ياسيدى؟ !!

قولتلها :

أيه اللى جاب….

حسيت فجأه جسمى بيهبط وأغمى عليا !!!

فتحت عينى لاقيتنى على السرير وسندس جمبى وبتبحلق فيا!!!

Linabasyouni

فكرت نفسي لسه بهلوس , فركت عينى وقولت لسندس :

أنتى هنا ياسندس فعلا ولا ده تهييس؟ !!

قالتلى :

لا ياسيدى مش تهييس , انا هنا!!

عدلت نفسى على السرير وقولتلها :

أصحابى اللى كانوا معايا فين !؟

قالتلى :

أصحابك طلعوا عينى على مافوقتهم علشان يشيلوك ويطلعوك على أوضتك ,كبيت عليهم ميه لحد مافاقوا , بس فى واحد دوخنا اوى على ما فاق ,اللى كان فى التلاجه !!

قولتها :

وانتى أزاى جيتى هنا أصلا !؟

قالتلى :

ده علشان أنا بنت حلال وزنانه !! فضلت أزن على معتز باشا واروحله الفيلا كل يوم , لحد مازهق وأدانى عنوانك وأدانى فلوس كمان علشان أجرة السكة بس الفلوس أتسرقت منى فى القطر و طلع عينى على ماوصلتلك !!!

Linabasyouni

قولتلها :

بس أنا مادتش عنوانى لحد و..

قطعت كلامى لما أفتكرت ان معتز باشا فى جهه سياديه عليا وسهل أوى يعرف عنوانى…

قولتلها :

يابنتى وايه اللى جابك !!؟

قالتى :

أنت ياسيدى !!! أنت اللى قولتلى أجيلك !!

قولتلها بأستغراب :

نعم !!!؟

قالتلى :

لما سيبتنى ومشيت أنا مزعلتش منك , ماينفعش أزعل من سيدى , فضلت أيام انادى عليك من بره الكهف وانا مفكراك جوه , بس ماكنتش بترد …

جوعت فنزلت البلد أشحت أكل وقولت أبقى أرجع أستناك تانى على التبه.

وفوجئت بأهل البلد بيقولوا أنهم شافوك خدت عربيه من الموقف ومشيت من البلد !!

روحت عند التبه وانا بعيط علشان ضيعت منى , ونمت وانا دمعتى على خدى .

 جيتلى فى المنام وطبطبت عليا وقولتلى :

أنا محتاجلك ياسندس ..

صحيت من النوم , وجريت فى البلد على بيت معتز باشا وفضلت قدام بيته شهر لحد مازهق منى وأدانى العنوان والفلوس اللى أتسرقت ….

مبقتش عارف أقولها أيه !!! يخربيت الهبل !!!

فقولتلها :

ماشى ياسندس , بس أنتى هتعيشى فين هنا ؟!!

ماينفعش تعيشى معايا فى بيت واحد , عيب أكيد أنتى فاهمه الكلام ده !!؟

Linabasyouni

قالتى :

لو على نومتى انا هنام فى الشارع قدام الفيلا !!!

قولتلها :

يابنتى أنتى مش فى البلد عشان تنامى فى الشارع , الشارع هنا خطر عليكى !!

قالتلى :

ولو برده , والله لو هيقطعونى شرايح مش هتعتع من قدام الفيلا !!.

طيب دى أقولها أيه دى ؟!!

بصيت عليها لقيت شكلها متبهدل وهدومها متقطعه , شكلها أتمرمطت لحد ماوصلتلى,صعبت عليا أوى …

قولتلها :

أنتى جعانه يابت ياسندس !!؟

قالتلى :

كنت جعانه ولما شوفتك شبعت …

أبتسمت لما أفتكرت شنطة الاكل اللى خلصناها مع بعض …

قولتلها :

أيه رأيك نضرب بيتزا مع بعض ؟

قالتلى :

معرفهاش ياسيدى !! بس أى حاجه تجود بيها بركه !!

قولتلها :

والله ليكى واحشه ياسندس .

طلعت الموبايل من جيبى وكلمت محل بيتزا مشهور وطلبت أربع بيتزات حجم عائلى .

Linabasyouni

البيتزا وصلت .

وسندس عجبتها البيتزا جدا، وكانت بتاكل بشراهه, شكلها ما أكلتش من أيام !!

فتحتلها التليفزيون تتفرج عليه وهى بتاكل، وسيبتها فى الفيلا وخدت عربيتى وطلعت على مول نضيف أشتريت فساتين حلوه على مقاسها على كام طقم بيتى تنام بيهم , ورجعت تانى على الفيلا.

Linabasyouni

فتحت الباب وبصيت على سندس اللى نايمه على الكنبه قدام التلفزيون وفى أيديها قطعة بيتزا!!

دخلت بشنط الهدوم والفساتين وحطيتها على الترابيزه وناديت عليها بهدوء علشان ماتتفزعش :

سندس!!

لقيتها فطت برده من مكانها !! ورمت حتة البيتزا اللى فى أيديها ومسحت أيديها فى هدومها وهى بتقول :

أؤمرنى ياسيدى !!

قولتلها :

الامر لله ياسندس , أنا جيبتلك حبة هدوم علشان تغيرى فيهم .

وفتحت شنطه من الشنط وطلعت فستان وقولتها :

أيه رأيك فى ده ؟

لاقيت عينيها غرغرت ونزلت على الارض علشان تبوس رجلى !! فزيحت رجلى بسرعه بعيد عنها

 فقالت وهى على الارض:

أنا عمر ماحد أشترالى هدمه , أنت جايبلى ده كله ليا أنا ياسيدى؟ !!

 أنا حاسه انى موت ودخلت الجنه .. ربنا مايحرمنى منك ياروحى اللى بتنفس بيها !!

وحاولت تبوس رجلى تانى ,فشيلت رجلى ونزلت أناكمان على الارض

 كانت موطيه رأسها , مديت ايدى ورفعت راسها وبصيت على وشها فلاقيت عينيها مش باينه من الدموع …

قولتلها بحزم :

أياكى تحاولى تبوسى رجلى تانى ياسندس عشان فعلا هزعل منك !!

ومسحت دموعها من على خدها، وقولتلها وانا مبتسم :

يلا أطلعى فوق فى الاوضه اللى فى اول الطرقه , دى هتبقى أوضتك،هتلاقى فيها سرير ودولاب وحمام صغير كمان , خدى شاور وغيرى هدومك وريحى كده ونامى..

علشان بكره الصبح هاخلى أحلى ميك أب أرتست فى مصر , كوافيره يعنى , تيجيلك الفيلا علشان تضبطلك شعرك وتروق عليكى .

Linabasyouni

لاقيتها هتعيط تانى فقولتلها بنفاذ صبر :

أخلصى ياسندس والا والله أالعنك !!

فخدت الشنط وجريت على فوق وهى طايره من الفرحه !!

تانى يوم الصبح ظبطت مع الميكب أرتست وسيبتها مع سندس وخدت نفسى وطلعت على الكليه …

دورت على نيللى مالقتهاش , سألت واحده صاحبتها عنها ففاجئتنى وقالتلى أنها كانت هتنتحر أمبارح ,و مكتئبه جدا ومش بتخرج من أوضتها!!

أستدعيت نصير فحضر ,و قالى :

أيه يانينو !! عجبتك تفاحة الجن ؟!دماغ جرباج صح ؟!!

قولتله :

كرباج ايه بس ..منك لله يا شيخ سحولتنا .. المهم قولى هو أنت لسه مخلى نيللى معفنه !؟

قالى :

 هو أنت قولتلى فركش؟ أنا مينفعش أفركش من

 نفسى !! …ايه خلاص أفركش ؟!

قولتله :

أنت بتهزر يانصير , طبعا فركش , البنت هتنتحر !! … ولا أقولك أستنا!!

Linabasyouni

قالى :

حيرتنى معاك !!؟

قولته :

أصبر ياسيدى ساعتين بالضبط وفركش …

قالى :

ماشى يانينو , هتشغلنا أمتى بقى ؟!

قولتله :

أشغلكم أيه !!؟

قالى :

مانا قولتلك يانينو لو مشغلتناش ,هنشتغل عليك ومفيهاش زعل !! .. ماينفعش تسيبنا كده عواطليه , عايزين شغل زى بتاع البنت المجنونه اللى روحنالها قبل كده …

قولتله :

أجيبلكم شغل منين زى ده؟ !! , دى مصلحه وخلصت وبعدين أنا مش بتاع جلب الحبيب وشرب الحليب واكل الزبيب ..

 فكك منى يانصه دلوقتى , بليل نبقى نقعد ونتكلم فى الحوار ده , أروق بس واشوف أنتوا عايزين أيه !!

قالى :

بشوقك يانينو , ساعتين والبنت بتاعتك هترجع ريحتها طبيعيه .

قولتله :

تشكر يانصه , أخلع أنت بقى .

 أنصرف، فخدت عربيتى ورحت الفيلا بتاعة نيللى .

وصلت الفيلا , وفوجئت بكل الامن اللى بره على الفيلا لابسين كمامات علشان الريحه اللى كانت فايحه جدا , كنت شاممها قبل ما أوصل الفيلا !!

طلبت أقابل نيللى , بس بتاع الامن قالى :

نيللى هانم مش بتقابل حد…

قولتله :

قولها بس نور زميلها وهى هتدخلنى !!

بتاع الامن كان رافض يكلمها , بس انا اصريت , كلم نيللى من على البوابه وقالها أنى واقف على باب الفيلا , ردت عليه وهى بتزعق و رفضت تقابلنى , فعليت صوتى علشان تسمعنى من على البوابه وقلتلها :

أنا معايا علاج ليكى يانيللى !!

فقالتله يدخلنى بسرعه…

فتحولى البوابه ودخلت فيلا نيللى الفخمه , كل الخدم الى كانوا فيها كانوا لابسين كمامات.

الريحه كانت صعبه جدا !!

واحده من الخدامات قابلتنى عند باب الفيلا ومشيت بيا ناحية أوضة نيللى , سألتها عن بابا نيللى ومامتها قالتلى وهى قرفانه :

ماطقوش الريحه وقعدوا فى الفيلا التانيه اللى فى اخر الشارع , ووصلتنى أوضتها .

خبطت على الباب ففتحتلى نيللى ودخلت الاوضه

أتفاجأت بنيللى فى حاله يرثى لها , شعرها متنعكش ووشها أصفر وعينيها حمرا من كتر العياط , قالتى وهى بتصرخ فيا :

أيه اللى جابك !!؟ أنت مش شامم ريحتى !!!

قولتلها :

لا شامم … شامم ريحة برفان نيللى اللى بيدوخنى اول ماتعدى من جمبى , مش شامم اللى الناس شامينه , علشان انا مش زى كل الناس ولا عمرى شوفتك زى كل الناس .

قالتلى :

 حتى بعد ما كل الناس بعدت عنى ..دا حتى أهلى سابونى ومشيوا لما ماطقوش ريحتى !!

قولتلها :

ولا يفرق معايا يا نيللى , انتى بس اللى تفرقى معايا ..

قالتلى :

أمال بعدت عنى ليه !!؟

قولتلها :

علشان جرحتينى يانيللى , أنا كنت واقف وراكى اليوم اللى أتققنا نتقابل فيه فى الكليه وانتى ماشوفتنيش .

سمعتك وأنتى بتتكلمى مع طارق عليا ..

سمعت كل اللى قولتيه وعرفت انك كنت بتسغلينى , وأتصدمت أنك مكنتيش بتحبينى !!

Linabasyouni

الكلمات تاهت منها ومبقتش عارفه تقول أيه فقالت :

نور … أنا .. والله .. ماكنش قصدى .. انت فهمت غلط ..

قولتلها :

أنا سامحتك يانيللى خلاص علشان اللى بيحب بجد بيسامح ..

وطلعت من جيبى أزازه كنت معبيها حبة ميه بسكر ومكسبات طعم ,وأديتهالها وانا بقول :

خدى دى يانيللى أشربيها وهتبقى كويسه , دى خلطة من عند عطار شاطر أوى وصديقى قولتله على حالتك , وقالى أن اللى عندك ممكن يكون مرض أسمه متلازمة السمك !!

بصتلى بأستغراب وقالتلى :

متلازمة السمك !!؟

قولتلها :

هو مرض نادر شويه , أبقى أبحثى عنه على النت , بيخلى الجسم مايعرفش يكسر حاجه أسمها مركب ثلاثي ميثيل الامين , المركب ده لما الجسم بيعجز أنه يكسره بيخلى ريحة الجسم عامله زى البيض الفاسد أو السمك , فتقريبا أنتى عندك نفس المرض , وعلاجه بسيط أنك متاكليش بيض ولا تشربى لبن كتير وأبعدى عن السمك برده .

Linabasyouni

وخدى الدوا اللى أدتهولك ده على بوق واحد , هينضف المعده ويطهر الجسم ,وبعد كده التزمى بقائمة الاكل اللى هبعتهالك على الواتس ,ان شاء الله هتبقى زى الفل.

واعتبريها ياستى زى أختبار ,بين ليكى الناس اللى بتحبك بجد والناس اللى بعدوا عنك .. فى الكليه فاكره .. طارق ها.

عينها غرغرت وقالتلى :

أنا أسفه يانور .. انا مش عارفه أقولك أيه .. انا فعلا ماقدرتش حبك ليا وجرحتك وأوعدك لما نرجع لبعض تانى هبقى نيللى تانيه خالص ..هترجعلى تانى صح يانور ؟!

حضرت نفسى علشان أقوم وقولتلها :

لما تقومى بالسلامه يانيللى وتطمنينى عليكى نبقى نقعد ونتكلم تانى , هسيبك انا ومش هوصيكى أشربى الدوا على بوق واحد.

سيبتها ومشيت من الفيلا وركبت عربيتى ورجعت على طريق الفيلا بتاعتى .

وانا فى الطريق تليفونى رن وشوفت أسم نيللى فرديت وأنا مبتسم , أتفاجات بيها بتقولى فى التليفون :

أها ياكلب يامخادع !!!

وقفلت السكه فى وشى !!!

وفوجئت بعربيتين ماشيين ورايا , كل ما أدخل شارع يدخلوا ورايا , فدوست بنزين وجريت بالعربيه علشان أهرب منهم , جريوا ورايا , وفؤجئت بواحده من العربيات خبطت عربيتى من ورا جامد !!

Linabasyouni

عربيتى لفت على الطريق ,و خبطونى تانى فعربيتى أتقلبت على جنبها .

العربيتين وقفوا جمب عربيتى المقلوبه، وجه واحد بعضلات شدنى من العربيه وطلعنى منها وانا متخرشم ,فجأه سمعت صوت طارق أبن عم نيللى بيضحك وبيقولى :

متلازمة السمك … هو انت مفكرنا عبط !!

 أحنا جبنا قرارك وعرفنا انك ساحر وجدك ساحر وعرفنا كمان أنك علشان تقتل ساحر لازم تقطع رقبته , وشاور على اللى معاه فمسكونى وثبتونى على الارض.

ولقيت طارق ماسك سيف وبيقرب عليا …

يتبع….

لقراءة الفصل التالي : اضغط هنا

لقراءة الرواية كاملة اضغط على : (رواية ميراث نور )