رواية قهر الفصل الأول 1 بقلم رويدا القاضي

رواية قهر البارت الأول

رواية قهر الجزء الأول

رواية قهر الحلقة الأولى

خديجة: منال يامنال تعالي بسرعة سلم بنتي بوك شكله تعبان عدي ضبحي ع حد من اعمامك بسرعة.
صوت تعبان ومرهق من الدار يرد عليها مانبي حد تعالوا حدي وبس واما خوتي نا نعرفهم ماواجعهم حالي .
منال: قربت منه وحضنته وبست جابينه ماتخافش يابابا هاذي بردة وتعدي في حالها كيف للي قبلها لكن وغلاتي عندك تخلينا نشيلوك باش نتريحوا.
مفتاح: الموت وقت تحضر مايمنعها حد لاطب ولا غيره تربحي يامنال سلم بنتي بصوت متقطع من التعب والدهشة الله الله في خواتك راهم ماعندكم كان بعضكم …. سامحوني ماقدرت نعقبلكم قرشين تولو عليهم بعد نفارق الدنيا لكن عقبت مراة بألف راجل انت سند لامك وخواتك من بعدي راهم امانة في رقبتك.
منال: بدون ماتوصي يابابا وبعدين ربي يطول في عمرك خلي نعدي نشوف من ايشيلك للمستشفى….
خديجة: طلعت نجري في جرت منال ماتعطليش سلم بنتي بوك المرة هاذي غير كل مرة وبلغي جدك وجداك عاش وحيد حرام يموت وحيد…
منال: بعيون مليانة دموع صوت حانقاته العبرة تربحي معاش تقولي هكي الساعه يتحسن ويرجع كيف قبل.
خديجة: خلاص عدي نمشي لبوك خشيت جنبه لكن عقله من معاي وكانه حاس بلي بيصير بعده … نجيبلك حاجة تاكلها يامفتاح…
مفتاح : هالة ومرام مازال في المدرسة نبي نحقهم
خديجة: علاش تفجع فيا مافيك الا الخير ساعه اخرى ويكونوا هنا.
مفتاح: خايف نا مانعيشيش ساعه اخرى اعطيني اميه ريقي جاف وغطيني صقعان …
،،،،،،،في الحاضر”'””””2023
منال: شكله ياهالة ماعرفتش نصون الامانة للي سملهالي بوي ياريتني متت ولا عشت يوم كيف هاليوم.
هالة: عيب عليك تميتي تتهمي في نفسك ع الطالعة والنازلة عمرك ماقصرتي معانا وعيشتنا احسن من حياة بوي علمتينا خليها في بالك لا يكلف الله نفسا الا وسعها خودي الهون في روحك سلم اختي راك كبرتي ايجيك بعض الامراض ماينفعك حد وقتها … كل ساعة وفرجها وكان ع امك مصيرها بتفيق وبتفهم..
نرجعوا للماضي
منال:مازال نتفكر في الكلام للي قاله عمي محمد لما خبرته …
رجعة: خليه يموت من يوم خديت باته وهو واقفلي كيف الشوكة في الحلق وامه عدت خديت غيره وطلعت برا البلاد يلا عدي لحوشكم وكان مات توا نسمعوا صوت العياط …
منال: انا من الصدمة نبكي حودي من طريقي جدي وين وين .
رجعة: مش قاعد ماعندك علاش واقفة…
منال: وانا راجعة للحوش تميت نسمع في عياط الصوت صوت امي نكذب في نفسي ونقول مستحيل …
خديجة: رد عليا الله يربحك راك تموت وتخليني بناتك من بيهم لمن مخلينا….
هالة: ماما شن تقولي مخلينا لرب كريم …
منال: فاتت ايام العزاء وبعد اسبوع جت جداي ومازال كلامها في وذني لعند توا…
رجعة: هما كلمتين ومافيش ليهم ثالث بعد يومين فضوا الحوش … وعدي شوفي ليك ولي خلفتك للي كلها صبايا…
خديجة: حرام عليك خافي الله فينا عمي مستحيل يقبل بالكلام هذا.
رجعة:هههه عمك من يامسكينة الحوش كتبه بإسمي والاولى والاخيرة كلمتي وشوري يالا غمة وبتنزاح من ع قلوبنا .
منال: ماتحرقيش دمك ياامي للي خالقنا عمره مايفرط فينا.
خديجة: لمن بنمشوا نا غريبة ع اهل المنطقة وخوالك مستحيل يقبلوني من وقت حياة بوكم وهما مش طايقين وجهي يابال توا.
هالة: يعني خلاص بنتموا في الشارع توا .
خديجة: والله ماني عارفة ماوجعني كان مرام تلعب وماتعرفش شئ ابصر الوقت شن امخبيلنا..
منال: مداما انا اخر سنة في الجامعة من بكرا نعدي ندور المدارس الخاصة ونخدم فترتين….
هالة: ياريتني كبيرة ونقدر نساعدك.
خديجة: لالا ومحضارتك مستحيل نخليك اضيعي قرايتك انا نعدي نظف الحيشان .
منال: نخش ع المية والله مانخليك تخدمي الصبايا ونا حية …
– [ ] والحمدلله ربي سهلي وحصلت فعلا عمل الرسول صلى الله عليه وسلم بعث معاذ بن جبل إلى اليمن وأوصاه وكانت أحد وصاياه صلى الله عليه وسلم :اتق دعوة المظلوم فإنها ليس بينها وبين الله حجاب…
والله من بعد للي صار وموت بوي خلاني مستحيل
نضيع صلاة ولا نفكر نصليها متأخرة وكل ليلة نصلي ركعتين في جوف الليل وندعي بكل للي في خاطري ….
وعدت الأيام تشبه بعضها فات الشهر الاول والثاني والثالث استقر وضعنا المادي شوي لكن ثلاث شهور مافيش حد من اعمامي وقف قدام باب حوشنا وقال شن ناقصكم يعرفوا انه بنات وماعندنا والي…
خديجة: بوكم ليه ثلاث شهور ميت وانا مازال في العدة وعمكم محمد مش قادر يأجل فرح بنته حليمة تقول الدنيا بترحل ….
هالة: من الحمار للي تزرط وخداها…
منال: نخدم من الساعة 7 الى الساعة5 مش باش نروح نسمع خبر يدره الكبد وانت من قلك عليها..
خديجة: جارتنا امباركة اليوم جتني مسكينة بارك الله فيها ماخلت ماجابت معاها…
منال:كيف حالها اها وانت هالة العام هضا شهادة اعدادية ولا فكي روحك من كلام النساوين واشغلي روحك في قرايتك لانه كل يوم خميس وجمعة بنشد نراجعلك في المناهج متعك…
هالة: في الاول ماننكرش انه كنت نكره تذخل منال في كل كبيرة وصغيرة في حياتنا وكانها امي وبوي وخوي وكل شئ لكن مع الوقت عرفت انها كانت ادير في الصح باش قدرت تحافظ علينا …
في حوش عمهم محمد””””” معقولة توا يامريم خلاص بتوقف الدنيا لو وصلت حليمة بيت راجلها من غير هرجة وغناء .
مريم: وعلاش ان شاء الله توا بتعيش عليا الدور واديرلي جو الحزين ع خوك ع ماما يابابا نعرف انك انت وخوتك كنتم تستنوا في موته بالساعة والدقيقة….
رجعه: اسمع والله حليمة ماتطلع الا بالزفة للي تليق بيها راس بنت عندك وتبي فرحها بالساكت.
مريم: اها قوليله ياعمتي يبي يضحك العرب علينا يقولوا مسترخصين بنتهم.
محمد: لكن ياامي الناس كلت وجهي في الشارع ع مرت مفتاح للي طلعت ونزيد توا نتمها بفرح لبنتي .
رجعة: الكلام كلمة وتم .
“”””””توضيح”””””””””
الاحداث هدين كلهن كانت في السنين للي قبل الاحداث وبالتحديد 96 لكن حبيت نوضح الشخصيات الرئيسية وفي واجد غيرهن لكن مع كل حلقة تتعرفوا ع شخصية جديدة…..