رواية شقيقتي للبيع الفصل السادس 6 بقلم محمد مالك
 |
| رواية شقيقتي للبيع الفصل السادس 6 بقلم محمد مالك |
رواية شقيقتي للبيع الفصل السادس 6 بقلم محمد مالك
ويفتح رؤوف باب غرفة النوم داخل شقة ناهد فيجدها تجلس ع السرير وتمثل انها تتحدث في التليفون وتضحك بصوت عالي
ناهد .. الله يخرب بيت سنينك يا سوزي !! فصلتيني من الضحك يا بنت الايه !! بقولك ايه اقفلي دلوقتي وهاكلمك بعدين .. سلام .. رؤوف !! .. انت جيت امتي ؟!
رؤوف .. لسه واصل من شوية .. انتي كنتي بتكلمي مين في التليفون ؟!
ناهد .. دي سوزي صحبتي
رؤوف .. اصل كنت سامع اصوات غريبة كده !!
ناهد .. اه ما هي كانت بتحكيلي ع مواقف بينها وبين جوزها كده بس ايه حاجات تفطس من الضحك
رؤوف .. اها .. مبسوطة انتي وانا شايل الطين بعد اللي حصل ؟!
ناهد .. وانت عاوزني اعملك ايه يعني ؟! البس اسود واقعد اعيط جمبك !!
رؤوف .. لا يا ستي بس ع الاقل حسيسيني انك زعلانه عشاني !!.. هو انا بعمل ده كله ليه مش عشانك ؟!
ناهد .. يا حبيبي ما انا فعلا زعلانه عشانك .. وقلبي بيتقطع بعد اللي حصل لأختك صدقني .. بس هانعمل ايه .. هانقعد نندب حظنا ولا نفكر احسن ازاي ننتقم من اللي كانت السبب ؟!
رؤوف .. عندك حق .. طيب كلمتي الجدع ده اللي اسمه نجم ؟
ناهد .. اه كلمته
رؤوف .. ووافق ؟
ناهد .. طبعا
رؤوف .. انا مش فاهم ازاي بتقنعيهم بالسرعة دي ؟!
ناهد .. بطريقتي انا بقي يا حبيبي
رؤوف .. ايه الحو الحر ده !! انتي مش مشغلة التكييف ولا ايه ؟!
ناهد .. لا التكييف عطلان للأسف يا حبيبي
رؤوف .. طيب التكييف عطلان .. قافلة الشباك ليه ؟! لما اقوم افتحه يجيب شوية هوا
ثم يتوجه نحو الشباك حيث يختبئ نجم خلف السيتاره
ناهد ترتبك .. لا ..استني .. بلاش تفتح الشباك معلش
رؤوف .. ليه ؟!
ناهد .. عشان اناااا .. اه.. عشان عيال الجيران اللي وشنا متخانقة معاهم امبارح ونفيسة امهم عمالة تنادي عليا طول الليل عشان تصالحني وانا مطنشاها .. بصراحة ما صدقت انتي اتخانقت معاهم .. اشكال وسخة بصراحة واختصارهم عبادة
رؤوف .. امتي بقي تسيبي المنطقة العرة دي وتيجي تقعدي في القصر بتاعي وتبقي سيدة القصر ؟
ناهد .. مش لما تخلص من اللي قاعدة فيه الاول !!
رؤوف .. ماشي وانا تحت امرك .. طيب مس ناوية تجيبي حاجة تحت الحساب تشجيع منك ليا .. واسيني حتي في الظروف المنيلة اللي انا فيها دي
ناهد .. ابدا .. قولتك اتجوزني وانا مش هواسيك وبس .. دا انا هانسيك اسمك
رؤوف .. اااااخ .. امتي بقي ؟!
ناهد .. هانت خلاص .. بقولك ايه الجو هنا تعالي نقعد في الصالة احسن ولا اقولك خش خد شاور وانا هاعملك اكلة عمرك ما دوقتها في حياتك
رؤوف .. تمام ماشي .. انا فعلا محتاج دش سخن
ناهد .. خش يا حبيبي دي الميه ناااار في السخان .. تعالي
رؤوف يتحرك امامها ثم تشاور لنجم حتي يهرب بسرعة من الشقة
ونذهب الي حنان حيث تجلس في غرفتها تشاهد التلفاز ويدخل رؤوف
رؤوف .. مساء الخير
حنان غاضبة .. مساء النور
رؤوف .. الولاد ناموا ولا ايه ؟
حنان .. من بدري
رؤوف .. تمام .. انتي اخبارك ايه ؟
حنان .. اخباري !! يهمك تعرف اخباري يا رؤوف ؟!
رؤوف .. انا غلطان اني سألتك
حنان .. ممكن اسالك سؤال وتجاوب بصراحة
رؤوف .. اسألي
حنان .. انت بتروح لناهد اختي سقتها ؟!
رؤوف مرتبك .. لا .. قصدي ايوه .. ايوة روحتلها مرتين تلاته كده
حنان .. ليه ؟!
رؤوف .. كانت طالبة مني خدمه وعملتهالها
حنان .. خدمة ايه دي اللي كانت طالباها منك ؟!
رؤوف .. خدمة لوجه الله يا حنان مش لازم اقول يعني عشان مااضيعش ثوابي
حنان .. لا والله !! طيب فيك الخير بجد .. بس انت ماقولتليش ع حاجة زي دي قبل كده ؟!
رؤوف .. نسيت ..
حنان .. طيب ماشي يا رؤوف .. ربنا يجعلك في الخير دايما
رؤوف يتوجه نحوها مبتسما ثم يجلس بجوارها ويمسك يدها ويقبلها وحنان تندهش من ذلك
رؤوف .. انتي بتغيري عليا من اختك ولا ايه ؟!
حنان .. لا ابدا .. انت حر
رؤوف .. يا حبيبتي انا لو لفيت الدنيا كلها مش هلاقي زيك .. دا انتي مراتي حبيبتي وام عيالي كمان .. انا بعشقك يا حنان
حنان .. يا سلام !! من امتي بقي الكلام ده ؟!
رؤوف .. من اول يوم شفتك فيه وانا هاتجنن عليكي عشان كده اتجوزتك يا حنان.. يا مراتي يا حبيبتي يا ام ولادي يا كل حاجة في حياتي
ثم يقبل يدها مرة اخري
حنان مندهشة بشدة .. انت غريب اوي انهارده !! انت شارب حاجة ولا ايه ؟!
رؤوف .. اه .. شارب .. شارب من كاس حبك يا جميل
ثم يُخرج من الجاكت علبه بها خاتم الماظ ويفتح العلبة امامها
حنان .. ايه ده ؟!
رؤوف .. كل سنه وانتي طيبة يا قلبي .. انهارده عيد ميلادك .. ع فكره ده الماظ حر .. مش خسارة في عمري كله
حنان .. لا انت بجد مش طبيعي انهارده !! انت اتغيرت ليه كده ؟! انت امبارح بس مكنتش طايقني خاالص
رؤوف .. معلش بقي ظروف الشغل والمصيبة الاخيرة اللي حصلت دي .. سامحيني يا قلبي .. اوعدك اني هبدأ معاكي صفحة جديدة .. كلها حب وحنان وامان وكل اللي بتحلمي بيه يا نور عيوني
ثم يقبل يدها للمرة الثالثة
رد فعل ع وجه حنان
ونذهب الي رؤوف حيث يجلس في غرفة المكتب ويحادث نجم تليفونيا
رؤوف .. انت بقي اللي اسمك نجم ؟
نجم .. خدامك يا باشا
رؤوف .. عرفت هتعمل ايه بالظبط ؟
نجم .. عرفت يا كبير والتفيذ هيكون في خلال يومين بالكتير
رؤوف .. طيب انا عاوز الموضوع يبان ع انه حرامي كان داخل القصر عشان يسرقني وقام شايف المدام فقام قاتلها
نجم .. متعولش هم يا كبير انا مخطط لكل حاجة
رؤوف .. بقولك ايه اوعي تيجي ناحية الولاد .. تقتلها هي بس
نجم يتذكر ان ناهد اوصته ان يقتل حنان واولادها دون ان يخبر رؤوف بذلك
نجم .. اه .. لا لا يا كبير انا فاهم ان المدام هي المقصودة مش الولاد طبعا
رؤوف .. تمام .. عاوزك تدخل من باب المطبخ مش الباب العمومي .. فاهم ؟..
نجم .. تؤمرني سعتك
رؤوف .. ماشي .. شد حيلك .. وبعد ما تخلص هتلاقي عربية مستنياك قدام باب القصر هتوديك المكان اللي اتفقنا عليه لحد ما اسفرك بره البلد خالص
نجم .. تمام يا كبير
ونذهب الي ناهد حيث تذهب الي سيدة مشعوذة تقوم بعمل اعمال سفلية
ام لطفي .. ازيك يا ناهد ؟
ناهد .. تمام الحمد لله .. عملتيلي ايه في اللي طلبته منك يا ام لطفي ؟!
ام لطفي .. مينفعش
ناهد .. ايه هو اللي مينفعش ده ؟!
ام لطفي .. مينفعش اعمل عملين لأختك وجوزهافي اسبوع واحد
ناهد .. اشمعني يعني ؟!
ام لطفي .. الخدام يتعبوا .. ارهاق زيادة .. حرام هما عشان جن نقوم نمرمطهم معانا ؟!
ناهد .. لا ميصحش عندك حق .. طيب مينفعش نشغلهم اوفر تايم ؟
ثم تُخرج لها حزمة من المال
ام لطفي .. لا ينفع طبعا
ثم تخطف الفلوس من يدها وتقوم بعدها
ام لطفي .. كام دول ؟
ناهد .. كتير .. ام لطفي انا عاوزة اشوف نتيجة
ام لطفي .. اسبوع زمن وهاتشوفي البشاير
ناهد .. تمام .. اتفقنا
رد فعل علي وجه ناهد
ونذهب الي رؤوف حيث يتصل به اخيه عماد من اميريكا حيث يقيم هناك هو وزوجته واولاده من سنوات طويلة
عماد .. ايه يا رؤوف برن عليك من بدري تليفونك مشغول
رؤوف .. معلش يا عماد كنت بكلم صاحب المصنع الصيني عشان يبعتلي شحنه طلبتها .. اخبارك ايه ؟ واحشني جداا
عماد .. وانت كمان واحشني يا رؤوف .. بقولك ايه المدام نازلة مصر هي والولاد بكره اتعب بقي هاتها من المطار
رؤوف .. ليه ؟
عماد .. انت نسيت ولا ايه ؟! عشان فرح بنت اختها بكره وانت عارف البنت يتيمة الاب والام ولازم تكون جمبها
رؤوف .. اه افتكرت .. معلش بقي انت عارف المشاكل اللي انا فيها
عماد .. الله يكون في العون كتر خيرك كفاية موضوع اختنا ده .. والله انا ما مصدق ان نجاة تعمل كده !!
رؤوف .. منها لله خلت سمعتنا في الارض ..
عماد .. كويس ان انا عايش في امريكا وبعيد عن اللي بيحصل ده كله
رؤوف .. يا بختك والله
عماد .. المهم اوعي تنسي
رؤوف .. وهتنزل في انهي اوتيل ؟
عماد .. اوتيل !! اوتيل ايه يا عم وانت موجود ؟ هتقعد عندك في القصر طبعا
رؤوف مرتبك.. ايه ؟! لا مينفعش
عماد .. مينفعش ليه القصر ضيق ولا ايه .؟!
رؤوف .. لا طبعا .. بس انت عارف الظروف اليومين دول
عماد .. يعني اخويا عنده قصر في مصر ومراتي تنزل في اوتيل .. معقول ده يا رؤوف ؟!
رؤوف .. لا طبعا
عماد .. ولا انت مش عايز تستضيفهم عندك ؟!
رؤوف .. لا ازاي .. انت عارف انا بعز سمية مراتك اد ايه وولادك زي ولادي بالظبط
عماد .. عارف يا اخويا .. ربنا يديم المحبة .. دي حتي حنان مراتك هتفرح اوي .. انت عارف هي بتحب سمية اد ايه ونفسها تشوفها من زمان
رؤوف .. عارف يا سيدي .. ع العموم البيت بيتها يا عماد تشرف في اي وقت
عماد .. تسلم يا رؤوف .. يلا اسيبك بقي تشوف شغلك .. سلام
رؤوف .. مع السلامة .. ثم يغلق الخط ويقول.. وبعدين بقي في الورطه دي ؟!
ناهد في منزلها حزينة جدااا وفجأة يُطرق الباب .. ناهد تذهب لتفتح الباب فتجد امرأة ثلاثينية جميلة جداا تدعي اميرة مظهرها وملابسها تدل علي انها بنت ذوات تدخن سيجارة فاخرة .. ناهد تنظر اليها في دهشه لأنها لا تعرفها ثم تنفث المرأة دخان السيجارة في وجه ناهد وتقول ..
اميرة .. انتي ناهد اخت حنان ؟
ناهد .. ايوه انا .. حضرتك مين ؟!
اميرة .. قوليلي اتفضلي الاول وهتعرفي كل حاجة
ناهد .. اتفضلي
وتدخل اميرة وتنظر الي الشقة ثم تقول
اميرة بسخرية .. شقتك معفنه !! وانتي اصلا معفنه !! ما علينا
ناهد .. ايه يا ست انتي .. انتي جاية تشتميني في بيتي ولا ايه ؟! انتي مين وعايزة ايه ؟! انطقي يالا
اميرة .. اهدي .. واقعدي عشان نعرف نتكلم .. اولا ماتزعليش انا صريحة جداا وده مزعل مني ناس كتير .. ثانيا بقي انا اسمي اميرة عبد العظيم .. انا كنت مرات رؤوف في يوم من الايام
ناهد .. رؤوف مين ؟!
اميرة .. رؤوف جوز اختك حنان
ناهد .. اها .. طيب وانا مالي
اميره .. اصبري بس علي رزقك .. انا سمعت انك مش طايقة اختك وعايزة تخلصي منها
ناهد .. وانتي مالك ؟!
اميرة .. لأني انا كمان مش طايقاها وعايزة اخلص منها زيك بالظبط
ناهد .. اه وبعدين ؟!
اميره .. انا عندي حاجة لو عرفتيها اضمنلك انك تخلصي منها في ظرف ٢٤ ساعة
ناهد .. ايه هي دي ؟!!
ونذهب الي قصر رؤوف حيث تصل سمية واولادها وتراهم دادا حسنية
حسنية مندهشة .. بسم الله الرحمن الرحيم.. ست حنان !! هو مش حضرتك مكلماني من دقيقتين وقولتيلي انك عند الكوافير .. لحقتي تخلصي بسرعة كده ؟!
سمية تضحك .. ههههه .. كنت متأكده انك مش هتعرفيني .. انا سمية مرات عماد اخو رؤوف مش حنان يا دادا !!!!!!!!
