رواية قربان الجن الفصل السادس 6 بقلم هنا عادل

كلم المارد نغم وقالها الغريب هتعرفي حكايته

القريب لو عرفتى حكايته هتفقديه

علشان كده سهل عليكى تعرفى حكاوى الناس اللى هتقابليها وهى غريبة عنك 

لكن هتندمى ندم عمرك لو قررتى تعرفي حكايات المقربين

نغم فى سرها والفضول جواها ..لاء خلاص مش لازم اعرف حكاية مرات عمى 

انا مبسوطة انى قدرت اساعد الناس وفرحانة انى شايفة اللى بيحصل مع عمو اللى انا روحتله 

وهحاول مسألش فى اللى ميخصنيش هو مش وعد لكن هحاول

كانت مبسوطة ورجعت بيتها وهى مبسوطة وكانت فى كل طرفة مستمرة تشوف قدامها حياة الراجل اللى راحتله لحد بيته 

حسيت انها مميزة وحسيت انها عملت حاجة مفيدة وفرحتها بنفسها كانت مخلياها عايزة تحكى لاخواتها ولمامتها وباباها لكن كانت الجنية كل شواية تفكرها حافظى على السر يانغم

فات يوم نغم زى كل يوم بنفس الروتين 

ترجع البيت تدخل الحمام وتغير هدوم المدرسة ولو لحقت تنام شوية قبل باباهم ما يرجع بتعمل كده ملحقتش بيتغدوا سوا ويتكلموا مع بعض شوية

ويدخلو على اوضهم يخلصوا واجباتهم ومذاكرتهم ولو لسه بدرى ممكن يكملو قعدة وكلام مع بعض ولو الوقت اتأخر بيناموا 

وتقريبا نغم بقيت بتحب جدا الوقت اللى بتنام فيه وبتستناه 

بقيت برغم طفولتها حاسة انها لها اهمية وانها بتقدم للناس حاجة مفيدة بتساعدهم 

وبرغم انها محاطة ب 7 من الجن والمردة الا انهم فعلا كانوا مش بيأذوها وفى نفس الوقت هما بيستخدموها لكن هى كانت مالهاش اى استفادة فى اللى بيحصل 

اتعودت على كده كل ليلة بتقابل المارد فى نفس المكان فى البحر بنفس الشكل وكل يوم بتشوف صورة لشخص وبتعرف اسمه وعنوانه وتروح فى لمح البصر بروحها للمكان اللى اطلب منها تروح فيه وتقدم رسالتها للشخص اللى كان بيختلف فى حياة نغم مع كل يوم وكل حالة بتروحلها برسالة 

انها كل ما بتغمض عنيها بتشوف الاشخاص دى وحياتهم ايه اللى بيحصل فيها وكل العدد ما بيزيد كل ما بتشوف قصص لناس اكتر وبتشوف نتيجة مساعدتها للاشخاص دى ايه 

فى البداية كانت مبسوطة جدا باللى بتشوفه لكن مع زيادة الاشخاص وزيادة الحاجات اللى بتشوفها كانت ابتديت تفقد تركيزها وطول الوقت بتكون مشتتة بتشوف حاجات فى علاقات الناس اللى بتقدملهم رسايل الجن اكبر منها ومن سنها شافت علاقات صعب على طفلة فى سنها تشوفها وكل شخص من ال18 الباقيين كان له قصة مختلفة 

كانت رسالة من الرسايل ومن اصعب الرسايل اللى وصلتها نغم

واللى خليتها برغم سنها الصغير تعترض على انها تروح تبلغ اى حد تانى ب اللى الجن بيطلبه منها 

الرسالة المرة دى كانت لواحدة ست عمرها فوق ال40 سنة 

معندهاش اطفال ونغم لما راحتلها فكرت ان حكايتها زى حكاية الراجل اللى كان نفسه يخلف وزى كل مرة نغم بتروح وهى مش عارفة بتروح بجسمها ولا بروحها بس خدها ماردها الطيار لبيت الست حسنا وشافت نغم قدامها وهى بتقولها ياخالة حسنا

حاجتك انقضت 

يا خالة حسنا 

حاجتك انقضت 

ياخالة حسنا 

حاجتك انقضت 

وسابتها نغم واختفيت من قدامها وكالعادة كل ما بتغمض عنيها بتشوف حياة شخص من الاشخاص اللى راحت وهى فاكرة انها بتساعده 

ظهرت الست حسنا فى عيون نغم وهى بتخبط على باب بيت فتحته طفلة صغيرة واول ما دخلت حسنا مع البنت لجوة البيت وقبل ام الطفلة ما تيجى تقابل حسنا كانت مديت ايديها بدبوس لضهر الطفلة وشكتها فى ضهرها شكة واحدة البنت اتوجعت ولفيت وراها واتفاجأت حسنا ب ان البنت بتتوجع بتمثيل 

حسنا..مالك يا رنا

رنا..ماليش ياخالتو حسيت بحاجة وجعتنى فى ضهرى 

حسنا ..معلش ياحبيبتى يمكن بيتهيألك

دخلت رنا ندهت امها وقابلت حسنا احلى مقابلة 

وفجأءة عند نغم 

الاستاذ..يا نغم انتى نايمة ولا ايه ؟

نغم..لاء يا استاذ انا بس عنيا وجعانى مش عارف
ة افتحها

كان الفضول قاتل نغم فى انها تعرف ليه حسنا عملت كده فى البنت الصغيرة اللى سنها ميكملش ال9 سنين 

الاستاذ..طيب يا نغم انزلى للحكيمة تحت قوليلها تشوف عنيكى فيها ايه يمكن تحطلك قطرة تريحك

نغم..حاضر يا استاذ

خرجت نغم بتجرى على الحمام بتاع المدرسة قفلت الباب عليها وغمضت عنيها 

علشان تشوف جزء من حياة ناس تانية غير حسنا 

وتفتح عنيها وتغمضها وكأمها كانت بتشوفهم بالترتيب 

يمكن الوحيدة اللى كانت مش بتظهرلها هى مرات عمها وكانت نغم ابتديت تنسى حكايتها بسبب الحكايات التانية 

لحد ما فتحت عنيها وغمضتها وشافت حسنا قاعدة مع ام رنا وبيتكلموا بمنتهى الالفة والحب 

وفجاءة رنا بتصرخ وخارجة من الحمام بتجرى 

الام ..ايه يارنا مالك يا امى فى ايه

حسنا ..خير ياحبيبتى فى ايه 

رنا بخوف ورعب..يا امى شوفت حد شكله وحش فى الحمام وكلمنى بصوت يخوف وقالى مقولش ليكى انى شوفته 

الام بتبص لبنتها بخوف

حسنا .. ياخبر على العيال وتأليفهم العيال خيالهم بقى اوسع من الدنيا اللى عايشين فيها 

ام رنا ..اهدى يا رنا ياحبيبتى انتى بيتهيألك 

وهنا قامت ام رنا تجيبلها مياه تشربها علشان تهدا وتفوق من الخضة بتاعت التهيؤات اللى جاتلها 

علشان تشوف رنا شكل حسنا بيتغير لشيطان وهى بتقولها مش قولتلك ماتقوليش لحد انك شوفتينى انتى مع الاموات 

الطفلة اللى مش فاهمة ايه اللى بيحصل كانت عمالة تصرخ وتعيط من الرعب وهى عمالة تحلف لأمها باللى حصل وكانت امها مش مصدقة متعرفش ان حسنا عاملة عمل لرنا بالجنان والموت 

اتعصبت ام رنا على بنتها وزعقت معاها وحسنا قاعدة تطبطب على البنت وكل ما بتطبطب عليها البنت بتصرخ زيادة وكأن ايد حسنا كانت عمالة تشوك رنا بجسمها الضعيف 

وفجاءة جريت رنا على البلكونة وحدفت نفسها من الدور الخامس قدام امها وقدام حسنا وقدام نغم اللى مستحملتش المنظر اللى بتشوفه 

فتحت عنيها نغم وهى بتعيط ومنهارة وكانت لسه فى الحمام 

ظهرتلها الجنية 

نغم بعياط..ابعدى عني ..سيبونى انتم كلكم وحشين انتم حاجات شريرة

ليه كده انتم هتموتونى كده ؟

ليه هى عملت ايه البنت الصغيرة علشان ترمى نفسها من البلكونة كده لاء انا مش هروح لحد تانى انا ماليش دعوة باللى انتم خليتونى اعمله ده 

انا فكرت انى هساعد الناس بس لكن ازاى اعمل كده اموت الناس لا لا مش هعمل كده تانى وبتعيط 

الجنية ..انتى مش من حقك تقولى بتعملى ايه ومش هتعملى ايه 

الاعمال اللى كانت فى بطن الساحر مش كلها خير كان فيها شر واذى واحنا مطلوب مننا تنفيذها 

نغم..لا نفذوها لواحدكم انا ماليش دعوة انا مش هعمل كده تانى انا كنت فاكرة ان الست حسنا هتخلف وتجيب اطفال لكن معرفش انها هتكون سبب فى ان البنت ترمى نفسها 

دى خوفتها وكانت عمال تشوكها فى ضهرها ليه كده ليه تموت البنت بدل ما تتمنى انها يكون عندها اولاد

الجنيه…بليل هتعرفى ليه وخليكي فاكرة مش من حقك ترفضى انك توصلي الرسالة 

رجعت نغم الفصل وهى منهارة من العياط

الاستاذ..روحتى يانغم للحكيمة 

نغم..ملقيتهاش فى الاوضة يا استاذ 

الاستاذ..طيب انتى معيطة ليه 

نغم..عنيا بتوجعنى ومش عايزة اغمضها تانى 

الاستاذ..ليه كده طيب من ايه انتى كنتى كويسة 

نغم..كل ما بغمض عنيا بتوجعنى وبتتكلم نغم وهى خايفة تشوف منظر رنا قدامها وكانت بتتمنى فعلا ان عنيها متتقفلش

الاستاذ..طيب اقعدى يانغم اهدى كده وخلاص الحصة قربت تخلص وهتروحى البيت ترتاحى 

نغم.. قعدت مكانها مستنية ترجع البيت ومستنية الليل ييجى فى نفس اللحظة علشان تعرف ليه حسنا عملت كده 

خلصت الحصة وكانت نغم بتحاول متطرفش عنيها لكن للاسف ده طبيعى وغير ارادى وكل مابتطرف عنيها بتشوف اللى بتشوفه كل مرة  وكل ما بتوصل لحسنا بتشوف اد ايه هى فرحانة بموت الطفلة وازاى هى شمتانة فى امها وابوها اللى هيموتوا ورا بنتهم 

وكل مرة بتشوف فيها حاجة تخص حسنا كانت بتفتح عنيها مخضوضة وقلبها واجعها 

نزلت من فصلها وقابلت اخواتها ومشيت معاهم لكن مش سمعاهم 

دخلت البيت وامهم زى كل يوم بتفرح برجوعهم للبيت 

سلموا الاولاد على امهم ودخلو اوضتهم يغيروا هدومهم وفضلت نغم واقفة قدام مامتها 

الام..مالك يانغم 

نغم..ماما انا مش عايزة اروح المدرسة بكرة 

الام..ليه ياحبيب
تى مالك فى حد مزعلك

نغم بتفكر تحكي لأمها وفجاءة جالها صوت الجنية وهى بتقولها متحكيش علشان متتأذيش 

افتكرت رنا وغيرت تفكيرها ..لا يا ماما عنيا كانت وجعانى اوى النهاردة معلش خلينى بكرة ارتاح واوعدك انى هذاكر اليوم كله بس خلينى بكرة فى البيت 

الام..بعد الشر عنك ياحبيبتى ..خلاص ارتاحى دلوقتى ولو الصبح لقيتى عينك لسة وجعاكى خليكي اجازة ونروح للدكتور نشوف عينك مالها 

نغم..شكرا يا ماما انا هدخل انام علشان تعبانة اوى لو مصحيتش على الغدا هاكل لما اصحى 

الام..ادخلى ياحبيبتى ارتاحى 

دخلت نغم اوضتها وهى خايفه تغمض عنيها تانى وابتديت تتكلم بصوت واطى 

لا انا عايزة اعرف ايه اللى حصل انا مش هعرف استنى لحد بليل 

انا مش قادرة اشوف حسنا دى مش قادرة اغمض عينى بسببها 

جالها صوت جنيتها ..يانغم مش ده الوقت اللى المفروض تعرفى فيه 

ميعادك بليل خليكى زى كل يوم يانغم متحسسيش حد بحاجة 

نغم..مش قادرة المنظر من بيروح من دماغى انا خايفة عمالة اشوف شكل البنت وهى بتقع من البلكونة وهى واقعة مرمية على الارض ميتة 

الجنية ..ماهو انتى لو حسستى حد او حكيتى لحد اللى بيحصل معاكى 

هتبقى زيها كده 

نغم بدموع ..انا عملت ايه بس علشان يحصل فيا كل ده انا مالى ب الناس ومالى بالحاجات الوحشة دى كلها 

غيرت نغم هدومها ونامت على سريرها خايفة تغمض عنيها 

لكن غصب عنها نامت 

علشان تشوف حاجة تخليها صاحية هادية شواية 

شافت الراجل اللى راحتله علشان يتنقل من بيته وهو فرحان وطاير من الفرحة لما عرف ان مراته حامل 

فى الحلم كانت نغم حاسة انها واقفة جوة بيتهم

وعايشة الفرحة معاه ومع مراته وهو بيقول معقول حامل بعد السنين دى

حامل وهنا فى البيت اللى كنت سايبه و هاجره 

حامل واحنا لسه مبقاش لينا اسبوع واصلين هنا 

بقى معقول كان العيب فى عتبة بيتى اللى بنيته بشقايا وفلوس شغلى السنين اللى فاتت دى كلها 

مش مهم المهم دلوقتى انى هخلف ويكون عندى عيال 

وكانت الفرحة فى بيت الراجل ده محسسة نغم انها هى اللى هيجيلها اخ او اخت او هى السبب فى ان مرات الراجل ده تكون حامل وده خلاها تصحى من النوم مبسوطة وناسية موضوع رنا 

قامت من سريرها وخرجت لقيت اخواتها اتغدوا وكمان خلصوا اللى وراهم ونامو وكانت مامتها قاعدة مع باباها بيتكلمو 

الاب..ايه يانغم عاملة ايه دلوقتى ياحبيبتى ماما قالتلى ان عينك وجعاكي

نغم افتكرت رنا..لاء يابابا انا بقيت احسن دلوقتى 

ماما قالتلى لو بكرة فضلت تعبانة هتودينى للدكتور 

الام..طيب ياحبيبة ماما انتى لسه حاسة بوجع فى عنيكي

نغم ..شوية ياماما..انا بس جوعت صحيت اكل واكمل نوم 

الاب..طيب يا ام نغم حضريلها تاكل وبكرة نروح للدكتور احسن تكونى محتاجة نضارة 

نغم..حاضر يابابا

حضرت الام لنغم الغدا بتاعها وفعلا اكلت وغسلت ايديها واسنانها ودخلت سريرها تانى بتتمنى تعرف ايه حكاية رنا وحسنا من قبل ما تغمض عنيها حتى 

طفيت نغم كل الانوار اللى فى اوضتها هى اتعودت على الضلمة وبقيت بتحبها برغم انها لسه بتخاف لكن مش زى البداية 

غمضت عنيها 

وشافت المارد بتاع البحر فى نفس المكان اللى كل يوم تقابله فيه 

المارد..عايزة تعرفى الرسالة الجديدة ولا عايزة تعرفى حكاية رنا 

نغم..رنا مش قريبتى يعنى محدش هيموت من اهلى وقرايبى انا عايزة اعرف ليه حصل كده مع رنا وليه حسنا موتتها 

المارد..كانت حسنا بتحب ابو رنا قبل ما يتجوز لكن لما راح يتقدملها مكانش ابو رنا اللى بيتقدم كان اخوه واهلها وافقو عليه وهى مكانش لها حق تقبل او ترفض 

اتجوزت عم رنا اللى كانت مش بتحبه 

واتجوز ابو رنا وامها وكانوا بيحبو بعض جدا وده كان مزعل حسنا 

حملت ام رنا وخلفت وكانت حسنا بتلف على الشيوخ والحكما علشان تخلف 

لكن هى مكانتش بتخلف ولا كان فى علاج هيخليها تخلف

كل ما كانت بتشوف رنا قدامها وامها وابوها فرحانين بيها كانت بتحس ان مفيش حاجة هتريحها غير لما يحسوا هما بالنار لما يتحرموا من بنتهم الوحيدة 

عملت العمل للطفلة انها تتجنن واخرة الجنان الموت 

لكن علشان البنت مستحملتش انها تشوف شيطان مخيف قدامها مقدرتش تسكت ومقدرتش متحكيش اللى حصل لها برغم ان شيطانها حذرها من انها تحكى لأن كان لسه شوية وقت لما توصل البنت للجنان 

ومع كلام البنت وحكايتها الشيطان غضب عليها اكتر وعجل بتنفيذ حكم العمل ووسوسلها انها ترمى نفسها وكده حسنا اتحرمت من العيال وحرمت ام رنا وابوها من بنتهم اللى هيعيشوا حزنا عليها عمرهم كله لأنها البنت الوحيدة ليهم ومخلفوش بعدها تانى 

كانت حسنا عايزاهم يعيشوا محرومين 

مفكرتش تعمل عمل لنفسها بالخلفة وفكرت فى انها تحرم غيرها منها 

وده اللى كان مطلوب مننا واحنا نفذناه 

ده اللى استدعيتنا علشانه وبوجودك عرفنا نوصله 

مستعدة بقى للرسالة الجديدة؟؟