رواية بائعة الورد الفصل الرابع عشر 14 بقلم أسماء ابراهيم

بمكتب دكتور فادي بالجامعه دخل كلا من ناني وتامر ووضع ظرف به عده صور خاصه بالحفل الذي أقيم بفيلا مراد المرشدي وورقه مكتوب عليها (ماهو سر انك تخفي عن الجميع علاقتك بشدوي) وخرجوا سريعا قبل أن يراهم أحد.

بعد وقت ليس بكثير دخل دكتور فادي مكتبه وجلس وطلب من الساعي فنجان قهوه قبل أن يلحق بالمدرج وإلقاء المحاضره نظر علي مكتبه وجد الظرف ومعه ورقه قرأ محتواها وافرغ الظرف وتفاجأ بالصور وضعها علي مكتبه ووقف بعصبية ونادي علي ساعي مكتبه وسأله 

فادي: ياراضي في حد دخل مكتبي النهارده الصبح 

الساعي: لا يادكتور مافيش حد دخل في حاجه حصلت أو ضاعت من المكتب.

فادي: تمام روح انت استعجل القهوه .

دخل فادي مكتبه واتصل بدكتور سراج وطلب مقابلته بعد انتهاء اليوم في الجامعه .

بكافيه الجامعه كانت تجلس شدوي وروضه يتناولون الفطار جاءت عليهم ناني وألقت السلام

ناني: هاااي يابنات ازيك ياروضه اكيد دي شدوي مش كده.

روضه: اهلا ناني انا كويسه مش لسه شايفني الصبح في السكن واه هي شدوي اعرفك ياشوشو دي تبقي……

ناني الحلواني صاحبه روضه وساكنه معاها في السكن ومع ياسمين وكنت حابه اتعرف عليكم ممكن تقبلوني صاحبه ليكم.

شدوي نظرت لروضه وبعدها قالت اه طبعا اهلا بيكي اتفضلي افطري معانا.

ناني: ميرسي ياقلبي مش هقدر عندي محاضره كمان عشر دقايق فرصه تانيه أن شاء الله..بااااي.

روضه: بااااي ..

شدوي: مين دي يارورو معقول دي صاحبتك وشكلها طالع فيها ليه اوي كده.

روضه: دي بقي ناني الحلواني من اسكندريه وأبوها رجل مبسوط وعنده مشاريع كده بس هي عامله نفسها بنت بارم ديله ومغروره زي ما انتي شايفه ولاقيتها بتقولي عايزه تبقي قريبه مننا ويبقي لها أصحاب.

شدوي: اممممم بس شكلها مش مريح وكمان اول مره اشوفها هي معانا هنا.

روضه: اه لكن هي قسم عماره مش معانا في ديكور بس من النوع اللي بيحب ياخد كورس في اي قسم عشان يبقي عندها خبره.

شدوي: اوك يالا بقي نروح المدرج زمان اخي المبجل دقايق ويوصل مش ناقصه حرج علي الصبح.

روضه بضحك يالا يابنتي الا قوليلي صحيح اخبار بوكيه الورد ايه ماتعرفيش حاجه.

شدوي: اوبس تصدقي نسيت بس احب اطمنك أنه اكيد عمل عمايل ويالا بقي بطلي رغي….

__________________________&_____&

 يوسف: احنا بقينا لوحدنا اهو ياعمي ممكن اعرف ايه اللي حصل عشان يوصل جدي أن يدخل العنايه المركزه.

محمود: انت بتحقق معايا ياولد والله عال ولدك كبر ياطاهر وبيحقق مع عمه.

يوسف: تحقيق ايه ياعمي انا بتكلم معاك وبعدين ليه اخدت كلامي كده انت في الاول والاخر عمي وانا زي سالم ابنك وكمان اخويا بقي خطيب بنتك.

محمود: هيكون حصل ايه عاد اتشاكلت ويا إلهام مرتي وجدتك اتدخلت وأني هملت البيت وماخابرش ايه اللي حصل لأبوي غير من سالم بالليل واني في استراحه المزرعه.

يوسف: امممم يعني اللي تعب جدي مش الملف ده …وقدم يوسف ملف الحج عامر أمامه.

محمود: ملف ايه ده ياولدي….وبدأ بفتح الملف وظهر علي وجهه التوتر وبعدها وقف بعصبيه وقال…مين اللي جاب الملف ده وأني ماخابرش عنيه حاجه.

يوسف: اقعد كده واهدي ياعمي انت عارف الملف ده كويس وكمان وصل البنك اللي فيه دخل حسابك الخاص تمن الآلات الزراعية اللي راجل اخدها وجدي فاهم أنه لسه مادفعش وبعدين يعني مش مهم اوي الفلوس المهم ايه اللي بيحصل تاني وعلي العموم ياعمي انا مش هتكلم ولا هقول لحد حاجه عشان ظروف جدي وكمان مش عايز اكسر فرحه نغم بس حاول تراجع نفسك لان المستخبي عمره ما هيفضل وفي يوم هايظهر ويبان واحب اطمنك هايظهر علي ايدي .

محمود: ايوه الحج عامر دفع حسابه واني أحق واحد بيها أني اللي بتعب وبشقي وكل واحد فيكوا قاعد بيه وإذا كان في مستخبي ياولد اخوي أني وياك ومستني تظهره دي لو فيه حاجه .

يوسف بابتسامه هاديه: لا أطمئن فيه وانا متأكد وقد كلمتي استأذنك بقي ياعمي عشان المفروض هاروح مع معتصم وسالم والبنات نشتري شبكه نغم وياسمين سلام عليكم.

ذهب يوسف الي البيت وترك عمه في حيره ويفكر في كلامه وظل محمود يحدث نفسه هل يوسف عرف شئ من الماضي ام كلامه يقصد علاقته بالحج عامر وحسابه الشخصي فقط .

وصل يوسف أمام البيت واتصل علي أخيه لينزل له معه البنات وسالم وفي خلال دقائق كان الجميع أمامه.

ركبت ياسمين مع يوسف السياره وركبت نغم وسالم مع معتصم وتحرك كلا منهم الي محل الذهب لشراء شبكه كلا منهم.

بعد فتره من الوقت وصل الجميع لمحل الذهب وبدأت كل فتاه في اختيار شبكتها ….

ياسمين: نغم ايه رايك في الطقم ده .

نغم: روعه ياسو هايبقي تحفه عليكي وكمان معاه السلسله دي شكلها روعه وهاتليق علي الطقم.

ياسمين: طيب انا اخترت نفس الطقم ليكي ايه رأيك.

نغم: حبيبتي ياسو ربنا يخليكي ليا خلاص هاخد الطقم زيك ومش لازم السلسله.

يوسف: لا هاتي كمان السلسله يانغم ومعاها طقم الغوايش دي.

ياسمين: بس كده كتير ياجو انا بحب الحاجه بسيطه.

معتصم: علي فكره الغوايش دي هديه جدتي ليكم يعني بعيد عن الشبكه.

نغم وياسمين مش معقول .

سالم: انتوا هاتتصدموا كتير كده اخلصوا وخلصونا عايزين نلحق اليوم من أوله.

معتصم: تصدق انك عيل رخم وانا حمار اني جيبتك معانا.

يوسف: سالم شكلك كده عايز تتروق زي زمان .

سالم: خلاص ياعم الشبح براحتكوا وبعدين بقي عايز ياسمين في حاجه مهمه.

امسكه يوسف من تلابيب قميصه وقال وانت عايز ياسمين في ايه يالا انطق.

معتصم: علي فكره احنا تقريبا المحل بيتفرج علينا .

يوسف: احنا اسفين لحضرتك جدا بس بنحب نهزر شويه.

صاحب المحل: ولا يهمك يوسف بيه والف مبروك للهوانم وبلغ الحج قاسم سلامي.

شكره يوسف وأخذ علب الذهب وخرجوا جميعا وصعد الكل الي السيارات وذهبوا الي مطعم علي النيل لتناول الغذاء.

ياسمين: قولي بقي ياأخ سالم عايز ايه وهي ايه الحاجه المهمه دي ولو اني شاكه.

سالم: امممم بصي ياسو كنت عايز اعرف اكتر عن روضه صاحبتك هي اينعم لسانها طويل لكن دخلت دماغي الصراحه.

ياسمين: هههههه روضه دي صاحبتي جدا وبجد يابختك بيها بنت مؤدبه وجدعه تعرفوا أنها قدمت في شركه بابا شدوي عشان تساعد والدتها واخواتها.

نغم: ماشاءالله عليها شوقتيني أشوفها ياسو بس انت عرفت أن لسانها طويل ازي ياسالم.

سالم لعب في شعره وقال مش فاكر وقام يجيب حاجه ساقعه.

يوسف: اهووو هرب تلاقيه شافها لنا راح السكن لياسمين.

ياسمين: ايوه فعلا وحصل موقف وروضه الله اكبر عليها قطر وداس علي سالم.

نغم: احسن ويارب تبقي من نصيبه عشان تعلمه الادب وتطلع عليه الجديد والقديم.

معتصم: ياعيني عليكي يابنتي ده انتي شايله في قلبك كتير.

قضي الجميع يوم رائع واتفق يوسف مع ياسمين علي السفر مبكرا الي القاهره وعادوا الي البيت وفرح الجميع بهم وتعالت الزغاريد وعم الفرح في البيت وخبرهم يوسف بسفره مع ياسمين باكرا لاستكمال دراستها

الحج قاسم: انت جيت في ايه ومعاود في ايه ياولدي وإذا كان علي ياسمين تسافر مع معتصم ولا سالم.

يقف سالم ويقبل جبين جده ويقول الله عليك يا قاسم ياعسل هو ده الكلام.

تضحك نغم وياسمين عليه وينظر له يوسف نظره غاضبه.

إلهام: اتحشم ياسالم بتقول لجدتك باسمه صحيح قليل ربايه 

نغم: ماتخافيش ياماما بكره تيجي اللي تربيه وتعلمه الادب.

سالم: خفيفه اوي مش كده

معتصم: مالك بيها ياعم سالم خلي بالك نغم تخصني ماشي ولا تحب جو يروقك.

ركض مسرعا الي أعلي وضحك الجميع عليه ثم شكرت ياسمين ونغم جدتهم علي الهديه 

الحجه حسيبه: مبارك عليكوا يا حبايبي ويارب تتهنوا دايما واشوف عيالكم يرمحوا في البيت رمح.

لبني: في حياتك ياعمه وحياه ابويا الحج وأني من بكره هاشيع للبت ورده تعرف تاجر بيجيب قماش حرير من بلاد بره هاقولها تجيب احلي فرش للعرايس.

مني وإلهام في نفس واحد ربنا يباركلك يالبني ويفرحك دايما. 

________________&&&&_______&&&&&

في القاهره كان يجلس سراج وفادي في كافيه علي النيل وبدأ فادي يقص عليه ماحدث في مكتبه وأعطاه الظرف، قام سراج بفتح الظرف وأمسك الصور بصدمه…

سراج: ايه ده يافادي انت علي علاقه بشدوي 

فادي: سراج اللي انت ماتعرفوش وكل اللي في الجامعه أن شدوي تبقي اختي وانا خبيت ده عشان ماحدش يقول اني منحاز لها.

سراج: يااااااه طمنتني ربنا يطمن قلبك وبعدين ليه خبيت عادي يعني فادي ايه المشكله انك تقول وكلام ايه ده منحاز لها ولا لأ.

فادي: اللي حصل بقي بس هاتجنن مين اللي كان في الحفله وصورنا كده.

سراج: دي سهله اوي لو عندكم كاميرات مراقبه تقدر تعرف مين كان موجود وصور

فادي: تصدق كلامك صح انا ازاي ما فكرتش كده تمام هاروح حالا علي الفيلا واشوف الامن المسئول عن ده.

سراج: انت ياعم رايح فين مش تقولي عملت ايه في موضوعي مع اختك.

فادي: اطمن انا فتحتها في الموضوع بس مش بطريقه مباشره بس اوعدك هاقولها .

سراج: يبقي تحدد ميعاد اقابل مراد باشا ونتقدم رسمي.

فادي:واقع واقع يادكتور يالا سلام يا صاحبي.

بمكان اخر ناني وتامر يجلسون سويا يضحكون علي فعلتهم فهما يعتقدون بذلك وقع فادي تحت رغبتهم.

ناني: بس فكره مجنونه ياتيمو انك تحطله الصور علي مكتبه بس تفتكر هيعمل حاجه .

تامر: طبعا هو مخبي عن الكل أن شدوي تبقي أخته والصور هاتخليه متلخبط ومش معقول يطلع بعد السنين دي قدام الكل كداب.

ناني: بس احساسي بيقول غير كده ممكن يعلن انها أخته ووقتها هاتبقي خسران.

تامر: وقتها هارتب حاجه تانيه وأدخله من ناحيه بابا وعلاقته بمراد باشا المرشدي.

ناني: حلو ده وانا النهارده اتعرفت علي شدوي عن طريق روضه وبحاول ادخل وسطهم يالا باااي اتأخرت علي السكن والحجه وداد مش بتسكت.

تامر: طيب اوصلك واهو اكسب فيكي ثواب ياقمر.

ناني: لا خليك مش عايزه حد من البنات يشوفني وانا نازله من عربيتك بااااي.

~~~~~~~~~~~~~~~~~~~~~~~

بمرسي مطروح اجتمع فؤاد الالفي مع المهندسين الذين يقومون بإنشاء المنتجع السياحي

فؤاد: طبعا عارفين اهميه المشروع ده بالنسبالي والأهم اننا بقينا شركاء لمجموعه المرشدي جروب ودي اكبر مجموعه في الشرق الأوسط فمحتاج تصاميم علي اعلي مستوي وطبعا الوقت مهم جدا.

مهندس1: ده معمول حسابه يافؤاد ماتقلقش واحنا معانا مهندسين علي اعلي مستوي في المعمار وطبعا الوقت المحدد كافي جدا 

مهندس2: لكن طبعا مهندسين الديكور هيكونوا من شركه المرشدي لأنهم محترفين في تصميم ديكورات عالميه .

فؤاد: كده تمام وانا متفق مع مراد بيه علي كل حاجه خاصه بالديكور ودلوقتي تقدروا تتفضلوا علي الموقع .

بعد انتهاء الاجتماع اتصل فؤاد الالفي بالسيد مراد المرشدي ليبلغه بموعد انتهاء البناء والاستعداد باستقبال مهندسين الديكور واتفق معه مراد المرشدي بأنه سوف يأتي مرسي مطروح خلال أيام .