رواية البر التاني الفصل الثالث عشر 13 بقلم لولو محمد
رواية البر التاني الجزء الثالث عشر
رواية البر التاني البارت الثالث عشر
رواية البر التاني الحلقة الثالثة عشر
على القهوه
ماجد / ايه يا عم التفاهه دى مش حوار تقفل عليه وشك يعني كلمه اتقالت بهزار
هشام / بالعكس حتى لو هزار ترعب كلنا بنقول لان الحلال اجمل سانتظر طب لو مش احلى هنعمل ايه هنروح للحرام يعني
ماجد / لا يا عم دا مجرد اكسبرشن يعني
مختار / الحلال عمره ما هيكون احلى
ماجد و هشام يبصوله
مختار / الشيطان بيزين المعاصى و يسهلها و بيظهر نواقص الطاعات و يصعبها عمرنا ما هنشوف الحلال اجمل و دا اسمه جهاد النفس
ماجد / كلام كبير
هشام / دا مش معناه انك تعتمد على جهاد النفس بس ربنا خلى لكل حاجه بنعملها ثواب حتى تقربك من زوجتك و علاقتك بيها بتؤجر عليها و هى كمان بتؤجر عليها لان كل واحد بيعف التانى لازم زى ما هى بتعف نفسها عن الحرام انت كمان تعفها
مختار / ازاى و احنا مخطوبين يعني ما دى نقطه الخلاف من الاول انا ما كنتش عاوز خطوبه كنت عاوز كتب كتاب علا طول ما فيش فى الاسلام حاجه اسمها خطوبه حتى كلامى معاها فى التليفون ما ينفعش
ماجد / انا وقعت بين اكتر اتنين اوفر فى الدنيا ما تبقاش متزمت يا ابني عادى امال الخطوبه دى لزمتها ايه
هشام / ما تخرجوناش عن الموضوع انت مش عاوز تغوط معاها فى الكلام ابعتلها رساله
مختار / اقول ايه يعني ما انا مشكلتى اصلا انى مش عارف اقول ايه اساسا
ماجد / اتغزل فى عنيها و جسمها
مختار / يا عم انت عاوزني اتغابي عليك
هشام / سيبك منه و ركز معايا انا
مختار / ياريت قول
هشام / دلوقت النت ما خلاش افتح و دور و شوف رسايل حلوه تناسبك انت و تناسبها
ماجد / من الاخر كدا البت دى رفضت يوسف بكل اللى عمله لها و وافقت عليك هى مش هتفرق معاها رسايل النت الكالحه دى هى عاوزه مشاعر صادقه فخليك على طبيعتك يا ابني
هشام / انت سخن و لا جعان يا ماجد ايه الكلام الكبير ده
ماجد يحط رجل على رجل
ماجد / اقل حاجه عندى
…………………..
فى شقه يوسف
يوسف تليفونه يرن
يوسف / لو هتقول اى حاجه تحرق دمى
يس / احنا لقينا الصاروخ و جارى توجيهه على الهدف
يوسف / قسما بالله ان فلحت لحليلكوا بقكوا
يس / عيب يا جو انت وراك رجاله
يوسف / يعنى ماليين ايديكوا من البت دى
يس / بقولك صارووووخ
يوسف / انا مش فارق معايا حلوه و لا محروقه بجاز انا اقصد هتعرف تظبط الكادرات عاوز الصور تبقي سخنه يا يس عاوز هند لما تشوفها تولع فيه و تنساه خالص
يس / ما تخافش انا كمان اتفقتلك مع مصوراتى خبره فى الفوتوشوب و هيولعها
يوسف / امتى
يس / اهله لسه عنده لما يمشوا بالسلامه و يخلالنا الجو
يوسف / طب عملتوا حاجه فى الحوار التانى
يس / هو احنا لحقنا
يوسف / يوووووه بقي
يس / يا عم نخلص بس من الحوار ده و ليك عليا انزل البلد مخصوص اجبلك قراره
يوسف / اما نشوف اخرتها
يس / عيب انا عمرى قصرت رقبتك
يوسف / ماشي
…………………..
تانى يوم الصبح فى شقه مختار
مختار بيلبس الجزمه جرس الباب يضرب يروح يفتح يلاقى هند حاضنه الكتب و مبتسمه بخجل
مختار / انا جاهز ثانيه واحده اجيب الكتب و اجيلك
مختار يدخل خطوتين و يرجع جرى
مختار / صباح الخير الاول حلو الطقم ده عليكي
مختار يدخل جوه يجيب حاجته و هند مبتسمه و وشها احمر مختار يطلع و يقفل الباب
مختار / يلا
هند / فطرت
مختار / اه من بدرى فطرتى
هند تهز راسها و يمشوا ينزلوا الشارع مختار يفتح باب العربيه و هند تروح ناحيه بابها مختار يقفل الباب و يجرى يسبقها و يروح يفتحلها
مختار / اسف اسف اسف اتفضلي
هند تبصله بطرف عينها
هند / في ايه بقي
مختار / ايه ! ما انا بعمل كل الحاجات اهو
هند / و انت مش مستغرب الموضوع يعني
مختار / هاه … ايه
هند / هههههههههههههههه شكرا
هند تركب مختار يقفل الباب و يجرى يركب الناحيه التانيه و يسوق
مختار / انا عاوز اعترفلك بحاجه
هند / كنت متاكده و الله العظيم كنت عارفه
مختار / هو ايه اللى متاكده و عارفه
هند / دخلتك عليا النهرده غريبه مليانه محلسه و حسوكه مش طبعك كدا
مختار / ههههههههههههههههههههه لا اله الا الله صحيح الرجاله من المريخ و الحريم من الزهره
هند / يعني ايه
مختار / انا سهرت طول الليل بقرا على النت يعني فى الحاجات اللى بتحبوها دى رسايل حب و كلام ممحون و حاجه تفقع بصراحه
هند / ايوه اثبت هو ده مختار اللى اعرفه كمل بقي
مختار / على فكره بحاول اتكلم جد
هند / اتفضل سمعاك
مختار / بصي انا قعدت كتير اوى امبارح بحاول انقيلك رساله حلوه ابعتها و جمعت فى الورقه دى كام واحده كدا انقى منهم
مختار يطلع من جيبه ورقه و هند تسند الدريكسيون
مختار / انا ما عرفتش ابعت انهى واحده فى الاخر فخدى انتى بقي الورقه دى كلها كدا و نقى انتى براحتك و اعتبريني بعتها ماشي
هند / ههههههههههههههههههههههههههه
مختار / ايه !
هند تقرا الورقه و مبتسمه
هند / انا هحتفظ بالورقه دى على فكره
مختار/ و ليه الاذيه دى بس يا بنت الناس
هند / عشان ابص فيها و افتكر احساسي دلوقت فى كل مره ابقي زعلانه منك … انا فرحانه جدا بالورقه العبيطه دى يمكن اكتر من انك كنت تبعتلى الرسايل العبيطه اللى جواها
مختار / قولى والله
هند / والله مختار انت عارف انا ليه بحبك
مختار / عاوز اعرف
هند / عشان انت صريح معايا لا بتكذب و لا بتتجمل و انا حباك كدا زى ما انت حتى لو مش عارف تقول كلام حب و لا عارف تبعت رسايل حب انت من غير ما تقصد بتقولى احلى كلام حب ممكن اسمعه كلام مش هلاقيه لا فى الافلام و لا الروايات
صمت و عين مختار محتاره بين الطريق و بين عنين هند يركن العربيه
هند / فى ايه وقفت ليه
مختار / مش عارف اسوق ايه اللى قولتيه ده
هند تبتسم و تبص فى الارض
هند / قولت اللى جوايا و اللى يحصل يحصل
مختار / و ما صعبش عليكي قلبي الغلبان اللى هيشق ضلوعى جوه ده
هند تبصله و عنيهم فى عنين بعض و مختار حاطت ايده على قلبه هند تبتسم و تبص الناحيه التانيه و مختار عينه عليها هند تتكلم و هى باصه الناحيه التانيه و مبتسمه
هند / هتفضل باصصلى كدا كتير كدا هنتاخر على المحاضره
مختار يبص قدامه و يسوق و كل شويه يبص على هند و عنيهم تيجي فى عنين بعض و يبتسموا
…………………..
فى شقه محمد
شيري بتخبط على باب الحمام
شيري / يلا يا عبد الله هتتاخر على الدرس
عبد الله يفتح باب الحمام
عبد الله / حتى الحمام الواحد مش عارف ياخد راحته فيه
شيري / خد راحتك انا هاخد ياسو و هنروح المحل معاك فلوس
عبد الله / معايا
شيري/ على العموم فى متين جنيه فى درج البوفيه لو عاوزهم خدهم و انت نازل هتلك ساندوتش و لا حاجه و انت راجع عشان الغدى النهرده سمك
عبد الله يبتسم
شيري / يلا يا ياسو
ياسمينا شايله شنطه حضانه على ضهرها
عبد الله / هههههههههههههه و دا من ايه ان شاء الله
ياسمينا / خليك فى حالك
شيري / يلا يا لمضه يلا
شيري تاخد ياسمينا و يمشوا و عبد الله يدخل اوضته
………………….
فى الكليه
مختار يركن العربيه و ينزل يجرى هند تكون فتحت الباب و نزلت يقفلها الباب و يبصوا لبعض و هما مبتسمين
هند / خليها بينا احسن
مختار / تمام
مختار و هند يدخلوا المدرج الطلبه تصفر هند تتخض ماجد يطلع يقف على البنج و يسقف
ماجد / و بسم الله الرحمن الرحيم و هنبتدى الليله
اتنين شباب / اااااه ااااه
ماجد / دا عريسنا الزين كحيله العين و عروسته حلوه و جميله
اتنين شباب / ااااه ااااه
مختار / بس يا بابا بس يا حبيبي
هند / ههههههههههههههههههههه
ماجد يمشي على البنجات لحد ما ينزل قدام مختار
ماجد / ايه يا عم خلينا نفرح
هند / عن اذنكوا هصبح على البنات
ماجد / حجزنالكوا جنبنا مش هتقدروه تاخدوه مننا ابدا
هند تبصله و تدحك و تروح تسلم على يمنى
مختار / يا عم اشوفك عاقل مره قبل ما اموت
ماجد / يديك طوله العمر يا صاحبي ايه الاخبار
ماجد يغمز لمختار كتير
مختار / مالك يا حبيبي عينك مطروفه و لا ايه
هشام يدخل
هشام / انفخله فيها
مختار / خليها مطروفه احسن … بس تصدق انا عندى العلاج انا اهلى سايبينلى زواده عنب
ماجد / يبقي الغدى عندك النهرده
مختار / عندى عشان نتلم و نزاكر
ماجد / و انت هتزاكر معانا برده مش خلاص بقي و لا ايه
هشام يلف دراعه حوالين كتف ماجد
هشام / مفيش مزاكره مفيش اكل
ماجد / دا احنا هناكل الكتب النهرده
مختار / هههههههههههههههههههههه
يوسف يعدى يخبط مختار فى كتفه من ورا مختار يبص و يبتسم
ماجد / فتح يا اعمى
مختار / عيب يا ماجد
يوسف / بتقول ايه يا شاطر
ماجد / من قال ايه سمع
مختار / خلاص يا ماجد ما تسمحلوش
يوسف / ايه خايف و لا ايه
مختار / جدا … خايف عليك جدا … حاجزين لنا فين
ماجد / فى التالت فى النص
مختار يروح ناحيه هند يوشوشها تروح معاه و تقعد على الحرف جنب مختار و ماجد و هشام ينطوا جنب مختار من فوق البنج اللى ورا هشام جنب مختار و ماجد جنب هشام
هشام / مش هتخلص منه انت عارف
مختار / ما دايم الا وجه الله
مختار يوشوش هند
مختار/ سيحتيلى وسطيهم و لا ملقتيش فرصه
هند تبص الناحيه التانيه بخجل و تبصله
هند / اطمن ما سيحتش خوفت تتحسد
مختار / عندك حق العين فلقت الحجر
هند / ههههههههههههههههههههه
مختار / هند
هند تكتمها و يوسف يبصلها ماجد يشد كم مختار مختار يبصله
ماجد / كنت بتقولها ايه
مختار يسحب دراعه
مختار / يا عم خليك فى حالك انا ناقصك
هشام / هههههههههههههههههههه
……………………..
فى الشغل عند محمد
حامد يخبط على الباب و يدخل محمد يبصله و يتنهد و يرجع يكمل شغل
حامد / مفيش اتفضل و لا حتى صباح الخير
محمد / لو كنت جاى فى خير اتفضل لو كان محمود باعتك تحرق دمى
حامد / احنا فى الاول و الاخر اخوات يا محمد
محمد / الاخ بيحب اخوه و يقف جنبه و يفرحله انما انتوا كل اللى يهمكوا رضا محمود و ابنه حتى لو على حساب بنتي و عيالي
حامد / ربنا يسامحك
محمد / انا بقيت بخاف منكوا بدعى ربنا يطول فى عمرى لحد ما اوصل هند لبيت جوزها عشان مش ضامن هتعملوا فيها ايه
حامد / مطمن للغريب و مش مطمن لاخواتك
محمد / انت جاى ليه يا حامد
حامد / كنت جاى اباركلك
محمد / قال تباركلى قال و ما جتش ليه امبارح تباركلى زة الناس شوفت بقي ان الغرب فيهم خير عنكوا
حامد / انت اخويا و محمود كمان اخويا ما ينفعش اقف بينكوا
محمد / انت وقفت معاه كنت على الاقل اقف مع الحق
حامد / مختار كان خاطف يوسف و مهدد اخوك
محمد / عرفت خلاص و يوسف كان باعتله بلطجيه يقتلوه خالصين
حامد / كنا فى البيت عند اخوك عشان نطمن ان يوسف ما يعملش مصيبه جديده شوفت بقي ان احنا يهمنا مصلحتك انت
محمد / قول الكلام ده لحد تانى
حامد / و الله العظيم هى دى الحقيقه بدليل انى جايلك دلوقت اهو اباركلك
محمد / الله يبارك فيك
حامد / اهدى يا محمد اهدى انت لسه خارج من العمليات
محمد / و انا كان ايه دخلنى العمليات اصلا مش انتوا
حامد / لا اله الا الله ما تهدى يا محمد عيب كدا انت مين اللى شحنك ضدنا كدا ليكون صحيح نسبك الجديد قواك على اخواتك
محمد / بنتى اللى قوتنى خوفى عليها قوانى نظره الخوف اللى فى عنيها و رعبها من يوسف و منكوا تهديدكوا ليا بعيالى
حامد / انا هددتك بعيالك يا محمد
محمد / اعمل مش عارف اعمل مش محمود قال قداموا و انتوا سبتونى لوحدى و وقفتوا معاه
حامد / كنت بهديه عشان ما يعملش اللى فى دماغه انا مش عدوك يا محمد انت اللى مصمم تبص تحت رجليك
محمد / لا والله
حامد / لا اله الا الله دا انت اخونا الصغير يا محمد هو فى حد بيحبك قدى
محمد / اؤمر يا حامد خير
حامد / قولتلك جاى اباركلك بس شكلك مش فى يومك النهرده هبقي افوت عليك وقت تانى تكون اهدى و نتكلم براحتنا سلام يا اخويا
حامد يمشي و محمد يحط ايده على قلبه بوجع يطلع علبه من جيبه و يفتحها و يحط حبايه فى بقه و يسند ضهره على الكرسي
…………………..
فى الكافتريا
مختار و هند قاعدين فى جنب
هند / انت بتتكلم جد
مختار / جدا النهرده باذن الله هتكلم مع ابوكى فى الموضوع
هند / دا احنا لسه مخطوبين اول امبارح كتب كتاب ايه اللى تكتبه دلوقت
مختار / ما انا قولتلك من الاول
هند / على العموم هيقولك بعد الامتحانات
مختار / ليه بقي ان شاء الله
هند / ماشي كلمه انا شخصيا موافقه
مختار / و هو موافق على فكره المشكله فى خالتى ام عبد الله
هند / يا سلام
مختار / تنكرى
هند / انكر طبعا على فكره ماما مشكلتها بس انها بتحبني اوى و مش قادره تتخيل انى هبقي بعيد اوى كدا عنها
مختار / لا ما تخافيش انا برده صله الرحم مهمه جدا عندى و اديني يا ستى اشتريت الشقه نبقي نقعد فيها كل ما توحشك
هند / يبقي مش هنمشي منها لانها هتوحشني من اول يوم و خصوصا بقي لما يحصل حمل و كدا اكيد يعني هحتاج حد ياخد باله منى
مختار / احملى انتى بس و انتى تلاقي امه محمد بتاخد بالها منك دا انتى هتبقي شايله الغالى
هند / هههههههههههههههههههه طب و لو كانت غاليه
مختار / يبقي الخير على قدوم الواردين بس تعملى حسابك انها هتبقي رحمه على اسم امى الله يرحمها
هند / اسم حلو اوى بس ليه ما حدش من اخواتك سما رحمه مع ان فى بنات كتير فى عيلتكوا مع انى اعرف انكوا بتحبوا تسموا على اسامى الابهات و الامهات
مختار / بصي هحكيلك حاجه بس ما تتشائميش ماشي
هند / احكى
مختار / انتى عارفه ان الطب زمان ما كانش كويس اوى يعني و خصوصا فى الصعيد و الارياف و كدا المهم انتصار اول ما اتجوزت كانت صغيره يعني المهم حملت فى بت و نزلت ميته و هما كانوا بيقولوا انهم هيسموا رحمه و بعدين حملت تانى و جت بنت سليمه و سموها رحمه بس ماتت و هى عندها شهرين فالستات اتشائموا و قالوا نغير الاسم و سموا فاتن عاشت فما حدش عندنا بقي يسمى اسم اى حد متوفى و كدا
هند / و انت عاوز تكسر القاعده
مختار / انا و الله ما فارق معايا القاعده من غيره حتى اسم العيال والله ما يفرق ابقي سمى انتى انا لما اتكلمت كنت بنكشك بس و الكلام جاب بعضه
هند / واخده بالى انك بتحب تنكشنى كتير
مختار / و بسم الله ما شاء الله ما بتتنكشيش تكونيش قرعه
هند / هههههههههههههههههههه لا اطمن لسه فى شويه شعر
مختار / طب الحمد لله
هند / بطل بقي
مختار / هو انا قولت حاجه
هند تبصله و ابتسامتها ماليه وشها يبتسم
هند / الا صحيح انت بتحب السمك المقلي
مختار / جدا
هند / خلاص اعمل حسابك تتغدى معانا فى محل بيعمل سمك مقلى
مختار / هوب هوب هوب ما تكمليش
هند / ههههههههههههههه يا ابني اسمع
مختار / انا اصلا عندى اكل دا انا حتى اتفقت مع ماجد و هشام ياكلوا معايا
هند / يا ابني دا محل نضيف خالص ماما بتجيب منه من زمان
مختار / انا ما بكلش غير بيتي
هند / يعني ايه يعني ما فيش يوم حتى فى الاسبوع اريح فيه من المطبخ و ائنتخ
مختار / اعملى اكل كتير اليوم اللى قبلها و سخنيهولى انا باكل بايت عادى
هند / طب يعني ما فيش يوم ناكل فيه بره
مختار / ناكل بره انتى تاكلى و انا اشرب شاي
هند / و دى تبقي فسحه دى
مختار / طب بصي هتفق معاكى اتفاق
هند / اتفضل
مختار / احنا نلبس و نتانتك و نشترى من المقله نص لب و نص سدانى و نطلع على السيما نتفرج على الفيلم و نشرب حاجه ساقعه و نروح تعمليلى عشوه حلوه و اديكي فلوس تنزلى تانى يوم تعملى شوبينج انتوا البنات بتحبوا الشوبينج اعمليه
هند / و انت مش هتيجي معايا و انا بعمله
مختار / اجى معاكى حاضر مرضيه كدا
هند / طب و الحواوشي و الكبده انا بحبهم من الشارع
مختار / دوقتى بتوع انتصار اما عليها شويه كبده انما ايه حكايه دا حتى كبده شمبرى مش المجمده الدم بتاعه المحلات
هند / انا بحبها ملوثه بحب الجراثيم
مختار / طب استنى شوفي الدخله دى و قوليلى هتاكل معاكى و لا لا
هند تبتسم
مختار / خايف عليكي يا حياتى حلو كدا
هند / ههههههههههههههههه لا ما كلتش
مختار / معقول طب استني كدا اشوفلك دخله تانيه
هند / ما تحاولش انا بحب الاكل ده
مختار / طب ادينى فرصه اجرب يمكن تجيب و تتنازلى
هند / انا ممكن اتنازل فى حاله واحده
مختار / موافق
هند / تطبخلى انت
مختار / كدا و لا مصانع الانتينال و الانتوسيد هتجيب نتيجه معاكى
هند / انا راضيه هاكل من ايدك يا تجبلى دليفرى
مختار / ما تهونيش عليا والله انتى ليه ما طلعتيش ماديه و خلصنا بقرشين
هند / انا مش عاوزه فلوس هو انا هتجوز محفظه
مختار / ما انا مش طباخ انا مهندس زراعى بزرع فى الارض و باكل اللى بيطلع منها
هند / اكل معاك
مختار / حلو جدا عمرك شوفتي الارض طلعت حواوشي
هند / هههههههههههههههههههه لا
مختار / يبقي خلاص و سكى على الموضوع ده بقي و هقوم اجيب شاي و بطلى زن الحريم ده مش هخلص معاكى صحيح ما يقدر على الحريم الا ربنا
هند / الله
مختار يقوم و يمشي بسرعه و هند متبعاه و مبتسمه و سانده خدها على ايدها
…………………….
الناحيه التانيه
وسام قاعده مع يوسف و يوسف عينه على هند
وسام / بيقولوا جايبلها شبكه بنص مليون جنيه و عملها خطوبه جامده اوى شكله طلع نايم على خميره حلوه
يوسف عينه على هند مختار بيقعد جنبها بكبايتين شاي و هى مبسوطه اوى
وسام / ليها حق ما تتغاظش من اللى انت بتعمله معايا ما هى فى الاخر اخدت حاجه اتقل
يوسف / اتكلمى عدل احسنلك
وسام / انا عدله الدور و الباقي على رقبتك اللى اتلوحت من البص عليهم
يوسف / اللهم طولك يا روح
وسام / النهرده هنروح السينما زى ما اتفقنا
يوسف / النهرده مش فاضي
وسام / انت بقالك كام يوم كل ما اكلمك تقولى مش فاضي مش فاضي فى ايه يا يوسف
يوسف / احنا مخطوبين ليه يا وسام
وسام تبصله و تسكت
يوسف / انتى اتفقتى معايا انك تبقي سكه عشان اوصل لهند و لحد دلوقت السكه دى كلفتني كتير و اخرها باينه سد
وسام / انا ما ضربتكش على ايدك انا بضحى بكل حاجه عشانك و انت لسه بتفكر فى ست هند فوق بقي يا يوسف راحت عليك خلاص مختار اغنى منك و اقوى منك و اشطر منك انا مش كفايا عشان اغيظها
يوسف / انتى بتقولى ايه
وسام / الحقيقه بتوجع معلش هند رفضتك عشان عينها على حاجه اكبر و استغلتك عشان توصلها هى استغلتك زى ما انت بتستغلنى بالظبط
يوسف / انا ما استغلتكيش دى كانت فكرتك انتى من الاول
وسام / تمام كفايا بقي انا مش هقدر اسكت اكتر من كدا انت انسان غبي
يوسف / وسام
وسام / مش قادر تشوف اللى بايعه الدنيا و شرياك و عمال تجرى ورا اللى بيعاك انا مش مجبره انى استحملك اكتر من كدا لما تعرف قيمتي ابقي تعال كلمنى انا ماشيه
وسام تسيب المكان و تمشي و يوسف عمال يبص على الناس و مضايق
………………………
فى المحافظه
المحافظ / بس دى معلومات خطيره جدا يا ناصر بيه
ناصر / هى مش مؤكده معاليك بس لازم حضرتك يكون عندك علم بكل صغيره و كبيره بتحصل فى البلد
المحافظ / و لحد ما نتاكد ما ينفعش حد ياخد خبر انى عرفت بيها
ناصر / عداك العيب سعادتك
المحافظ / انا هكلم القيادات تفتح عينها على الحدود الفتره الجايه و يكثفوا الدوريات و يضاعفوا عدد الاكمنه
ناصر / تمام معاليك
المحافظ / المخدر ده لو نزل السوق ربنا وحده اللى يعلم ايه اللى ممكن يحصل
ناصر / مش هوصي سعاتك اى حد هيعرف بالمعلومات دى رجالتى هيكونوا فى خطر دا ممكن يكون فخ ليهم جنابك
المحافظ / اسمع يا حج ناصر انا محتاج مساعدتك
ناصر / لو اقدر ما اتاخرش اؤمرنى
المحافظ / انا عاوزك تساعدنى اقبض على اللى اسمها فيرا دى
ناصر يبص للمحافظ و يبص فى الارض و يبص للمحافظ تانى
ناصر / احنا فدا مصر جنابك قولى اساعدك ازاى
المحافظ يبتسم
…………………….
فى شقه وسام
جرس الباب يضرب وسام تروح تفتح تلاقي يوسف شايل ورد و بوكس هدايا
وسام / ايه ده
يوسف / انا اسف
وسام / اتفضل
يوسف يدخل يقعد فى اقرب كرسي الباب وسام تروح تقعد معاه
وسام / خير
يوسف / انا ما كانش المفروض اتعصب عليكى فى الكليه انا عارف انى جاى عليكي بس والله انا ما كنتش عاوز من الاول
وسام / و انا اللى غصبتك صح سقيتك حاجه اصفره مش كدا
يوسف / انا بتكلم جد
وسام / و انا كمان بتكلم جد يا يوسف انا واقفه حالى عشانك مش كان ممكن فى الوقت اللى بضحى بيه عشانك ده يجيلى عريس
يوسف / ممكن و عشان كدا انا
وسام / انا بحبك يا يوسف
يوسف يتصدم
وسام / من اول يوم شوفتك فيه و انا بحبك صاحبت هند مخصوص عشان اقرب منك
يوسف يقوم يقف وسام تقوم تقف قدامه
يوسف / انا لازم امشي
وسام تحط ايديها الاتنين على صدره و تمنعه
وسام / انا صرحتلك بمشاعرى لان انا كمان الغيره بتاكلنى مش قادره استحمل اشوفك متعلق بيها هى ما تستاهلكش اديني فرصه اخليك تنساها حاول تفتحلى قلبك صدقني مش هتندم
وسام تحضن يوسف و تحط راسها على صدره
وسام / حس بيا يا يوسف انا بحبك
باب الشقه يتفتح و مامه وسام تدخل وسام تلم نفسها و يوسف واقف محروج و مش عارف يعمل ايه
…………………
فى شقه هند
محمد و هند و شيري بياكلوا و شيري بتفصص لياسمينا و تاكلها
محمد / حد بعت لمختار اكل
هند / عنده اكل و كمان صحابه عنده عازمهم على الاكل
محمد / برده يا جماعه ما يصحش
شيري / ما تقلقش يا محمد انتصار سيباله اكل كتير و بعدين هو قال لهند انه ما بيحبش السمك
محمد / و ادى عبد الله تانى
هند / لا يا بابا بيحب السمك بس البيتي ما حضرتك عارف ان مختار مش بيحب اكل الشارع
شيري / اتعلمى اللى يلاقي دلع و ما يدلعش
محمد / يا وليه حرام عليكي بلاش شغل الحموات ده
شيري / انا بتكلم عن الست هانم اللى ناويه تتنازل من اولها عن كل حاجه و تايدلهم صوابعها العشره شمع
محمد / بنتك صح تقدم الخير و دول ولاد اصول هيقدروا العشره و المعروف
شيري / هياخدوا على كدا هيبقي من المسلمات لما تتعب و لا تزهق مش هتعرف تسحب نفسها
محمد / صوابعك مش زى بعض
هند / انتى ليه خايفه منهم اوى كدا احنا ما شوفناش منهم حاجه و عمالين يقدموا السبت و الحد و كل اللى يقدروا عليه
شيري / انا عوزاكى مبسوطه و مرتاحه
هند / و انا ما اشتكتش
محمد / لسه اصلا ما حصلش حاجه تشتكى منها
شيري / انا عليا النصيحه و انتى حره بس انا شوفت كتير و مش عوزاكى تشوفى اللى شوفته و لا ايه يا محمد
محمد / دول غير دول
شيري / اتمنى
ياسمينا / انا خلصت السمك يا ماما هاكل الرز حاف يعني
شيري / تعالى كليني ما انا بفصص بايديا الاتنين اهو اصبرى
ياسمينا / صبرت
شيري / الهانم طول النهار تاكل فى حلويات من الدكان خراب بيتنا على ايديها
ياسمينا / ما انتى اكلتى معايا
شيري تتصدم و الكل يضحك
…………………
فى السرايا
عباده / و انت ازاى يا كبير توافق انت كدا بتعرض حياه مختار للخطر
ناصر / مختار لو سالته هيوافق
عباده / مختار زمان غير مختار دلوقت الاول كان شايل روحه على كفه و ما عندوش اللى يبكى عليه انما دلوقت مختار خاطب و فى رقبته حرمه
ناصر / انا فاهمك يا عباده بس ما ينفعش نشوف كارثه هتحصل قدامنا و نسكت
عباده / دى شغله الحكومه مش شغلتنا
ناصر / لا شغلتنا من راى منكم منكرا فليغيره يا عباده
عباده / تمام يا كبير
ناصر / انا هكلم مختار و هفهمه الوضع و انا متاكد انه هيعرف يظبط اموره بس انت وقف اى شغل الفتره دى
عباده / من غير ما تقول احنا مش غاويين خساره رجاله
ناصر / و كتر الرجاله فى البلد و خليهم يفتحوا عنيهم على اى غريب يدخلها
عباده / طب و مصر ازود الرجاله و لا ايه
ناصر / انا كلمت عبد الرحمن و هو اتكلم مع جوز امه و قال هيتكفل بحمايته
عباده / و انت وافقت يا كبير
ناصر / عبد الرحمن مش صغير
عباده / عبد الرحمن تربيه حرمه و محسوب علينا زيني و خلاص
شاكر يدخل
شاكر / عبد الرحمن زيني غصب عن عين الطخين عبد الرحمن زكريا الزيني زيني غصب عن عين اى حد و اللى يرشه بالميه نرشه بالدم انت فاهم و لا لا
ناصر / اهدى يا عمى من غير ما تقول عباده بس خايف عليه
شاكر / عبد الرحمن فى حما ربنا و الحكومه ما تخافوش عليه الدور و الباقي على مختار و جماعته بقولك يا ناصر هو مختار كلم نسايبه عننا
ناصر / ما اعرفش
شاكر / كلمه يا ناصر ما تخليهوش يكرر غلطه عمه الله يرحمه
ناصر يهز راسه و يبص فى الارض
………………….
فى شقه وسام
الست / ايه اللى انا شوفته ده
يوسف / الموضوع مش زى ما حضرتك فاهمه
الست / انا ما بكلمكش انت انا بكلم بنتى اللى ما عرفتش اربيها
وسام تبص ليوسف
يوسف / احنا قفشنا على بعض فى الكليه فا انا جبتلها ورد و شيكولاته و جيت يعنى
الست / اطلع بره و انا ليا كلام تانى مع اهلك
يوسف / حضرتك الموضوع
الست / كلامى مع اهلك يا يوسف اتفضل امشى عاوزه اتكلم مع بنتى لوحدنا
يوسف / وسام ما عملتش حاجه غلط حضرتك تعاقبيها عليها لو حضرتك عاوزه توجهى اى كلام انا الغلطان حضرتك تقدرى تكلمينى انا و تقوليلى كل اللى حضرتك عوزاه بس لو سمحتى وسام ما لهاش دعوه
الست / زى ما قولت انا كلامى مع اهلك نورت يا يوسف
وسام / ماما
الست تلطش وسام بالقلم وسام تعيط و تدخل اوضتها
يوسف / ما كانلوش داعى ابدا اللى حضرتك عملتيه ده ما عملناش حاجه لكل ده
الست / لما تبقى فى بيتك تبقى تحكم براحتك بس طول ما هى فى بيتي انا عارفه اربيها ازاى
يوسف يبص للست بغضب و يمشى يرزع الباب وراه
…………………..
فى شقه مختار
مختار يطلع من المطبخ شايل صينيه عليها ٣ كبايات شاى
مختار / كلنا و شبعنا نشرب الشاى بقي عشان نزاكرلنا كلمتين
ماجد / دا بدل ما تقول كلنا و شبعنا ندخل نقيلنا ساعتين
مختار / انت جاى ليه يا بتاع انت ايه اللى جابك
ماجد / ايه يا عم الاسلوب ده انت الخطوبه غيرتك
مختار / يا الله يا ولى الصابرين يا ابني الوقت بيضيع مننا
هشام / يا عم انت مستعجل على المزاكره ليه هى هتطير
مختار / انت كمان
هشام / بصراحه الاكل كتم على نفسي انا كمان و مش شايف قدامى
مختار تجيله رساله يروح يجيب الموبايل و هو بيتكلم
مختار / يا جدعان مش عاوزين نيجي فى الاخر و نخيب لازم نشد على
مختار يبص فى الرساله
///////////
هند / هو انا لو قولت وحشتني ابقي واقعه
//////////
مختار يبتسم و بعدين يبص لصحابه مانتخين بيشربوا الشاى
مختار / بس واضح ان الجو ده مش جو مزاكره انا بقول كل واحد يروح ينام فى بيته و نبقي نزاكر بعدين
ماجد / عداك العيب و ازح خش هات اللاب بقي اما نلعب جيمين
مختار / جيمين ايه يا بتاع انت انت مش قولت عاوز تنام ما تقوم تنام فى بيتكوا
ماجد / فوقت تصدق و عاوز ازاكر خش هات الكتب من جوه
مختار / هى بقت كدا يعني
هشام يقوم و يشد ماجد
هشام / اتوزعنا يا عم ربنا يسهلوا
ماجد / افتكر الجمايل يا عم
مختار / نبقي نظبط بقي
هشام / يا عم بقي
هشام و ماجد يمشوا مختار يقفل الباب و يجرى على اوضته يمسك التليفون و يتصل بهند و هو مبتسم
مختار / السلام عليكم
هند / عليكم السلام معطلاك
مختار / وزعتهم
هند / كنت فكراكوا هتزاكروا
مختار / تقلوا فى الاكل روحوا او وزعتهم لما جتلى رسالتك عشان اكون محدد و صادق معاكى يعني
هند / هههههههههههههههه طب ما دام شوفت الرساله ما جاوبتش على سؤالي ليه
مختار / سؤال ايه
هند / هو انا لو قولت وحشتني هبقي واقعه
مختار / و ماله حد يكره اقعى انتى بس و ما لكيش دعوه
هند / ههههههههههههههههههه طب و انت ايه وضعك
مختار / ما انا هلقفك
هند / هتلقفنى
مختار / هشقطك تنفع لا بلاش دى بقي معناها وحش بصي هستلقاكى
هند / يا عم الحج ركز هو انا هقع من على شجره
مختار / امال اقول ايه هقع معاكى هبقي واقع معاكى هبقي واقع انا كمان
هند / مفيش فايده
مختار / طب واحده واحده و علميني
هند / قولى و انتى كمان وحشتيني
مختار / بس كدا
هند / شوفت سهله ازاى هعلمك و اكل من بيتنا يلا اللى عند ربنا ما بيروحش
مختار / و لا اللى عندى ان شاء الله قولى بقي نفسك فى ايه اعملهولك لو اقدر طبعا
هند / مفيش حاجه فى دماغى دلوقت كفايا تخليك جنبي و خلاص
مختار / لو كنت قادر ابعد ما كنتش قربت اصلا
هند / و دا المفروض غزل و لا رثاء يعني انت ليه بتقولها زى المضروب على قلبه كدا انت حد غاصبك على الجوازه دى
مختار / قلبي
هند / اوعى
مختار / ههههههههههههههههههه تعرفى ان القلب وظيفته الوحيده هى انه يضخ الدم و ما لوش اى علاقه بالحب
هند / امال مين اللى له علاقه بالحب
مختار / المخ بالتحديد منطقه الهيبوثيلاموس بتفرز هرمون الأوكسيتوسين و الدوبامين
هند / عربي لو سمحت
مختار / هرمون الاوكسيتوسين ده الهرمون بيتفرز في حالات الحب و الثقة و الهدوء و إرتفاع نسبتة في الدم يزيد من قدرتهم على الثقة بالأخرين كمان بيزود فرص الحوار والتفاهم بين الزوجين دا غير ان الهرمون ده بيزود الرغبة سواء عند الرجل او الست و كمان كمية الهرمون ده لما بتزيد بتخلى الجسم في حالة من الاسترخاء والنعاس و كمان بيتفرز أثناء الرضاعه بيزود اللبن و بياثر على الحالة النفسية للأم يعني بيعمل شعور جميل و قوي بالرغبة في الإرضاع يعني بيحسن العلاقات يعني
هند / حلو الهرمون ده
مختار / الدوبامين بقي
احلى منه الدوبامين ده هرمون السعاده و عقل الانسان بيعرف ايه الحاجات او التصرفات اللى بتزود افراز الدوبامين و يكررها و دا بيخلى الناس تدمن حاجات معينه او اكلات معينه او تصرفات معينه و فى مخدرات كتير بتعتمد فى تصنيعها على الدوبامين فالناس تدمنها فلما منطقه الهيبوثيلاموس تفرز هرمون الاوكسيتوسين بتاع الحب الانسان بيبقي سعيد فيتفرز هرمون الدوبامين فتدمنى حبيبك و يوحشك عرفتى ليه بقي وحشتك
هند / دى احلى حصه احياء اخدتها فى حياتى انت عرفت الحاجات دى منين
مختار / من الكتب و النت الموضوع ده كان واخد مكان كبير من تفكيرى لوقت طويل بحاول افهمه
هند / طب ما دام فاهم بقي ليه قالوا ان الحب من القلب
مختار / تعرفى زمان كانوا بيحددوا الميت من العايش ازاى
هند / انت بتسال من بره المنهج على فكره
مختار / ههههههههههههههههه كانوا بينادوا على اسمه تلت مرات
هند / ما يمكن نايم مثلا
مختار / يطشوه قلمين
هند / او مغمى عليه
مختار / يحطوا مرايه قدام منخيره و يشوفوا فى بخار و لا لا
هند / امممممم
مختار / لحد ما وصلوا ان القلب لما بيبطل نبض يبقي الانسان مات الواحد من غير حب يبقي ميت يا هند من غير مشاعر يبقي حجر مش روح يبقي ميت
هند / عشان كدا قالوا ان الحب مكانه القلب
مختار / برافو عليكي ما انتى شاطره اهو
هند / طلعت زى ما عبد الله بيقول دوده كتب
مختار / ههههههههههههههههه العلام حلو بيفتح المخ و يختصر العمر اللى الدنيا هتعلمهولى فى سنين هتعلمه فى شهور هاخد الزاتونه اللى قبلى قضوا عمرهم كله يدوروا عليه
هند / بس الانسان ما يقدرش يعرف كل حاجه
مختار / اعرف كل شئ عن شئ و اعرف شئ عن كل شئ
هند / طب و اللى ما لوش خلق يقرا يعمل ايه
مختار / يسمع او يتفرج النت مليان فيديوهات فيها معلومات بالهبل
هند / ما فى معلومات كتير غلط
مختار / جدعه يبقي ما نصدقش كل اللى بنقراه او نسمعه و ندور على المعلومه فى اكتر من مصدر لحد ما نتاكد من صحتها و لا ايه
هند / انت عندك كام سنه للكلام ده
مختار / هههههههههههههههههههههه
هند / طب لو فى حاجه تنصحني ابدء بيها ايه… اتعلمها يعني
مختار / لا خلينا مؤقتا فى منهجنا مش عاوز حد يسمعنى كلمه و يقول انى عطلتك
هند / طب ما تزاكرلى
مختار / يبقي مش هنفلح فى سنتنا
هند / ليه يا عم هو حد قالك انى غبيه على فكره انا مش محتاجاك تزاكرلى انا بعرف ازاكر لوحدى خلى انت ماجد و هشام ينفعوك
مختار / ان كانوا هما مش هينفعونى فا انتى اكيد هتعطليني مهو ما تقنعنيش اننا هنبقي قاعدين سوا وش لوش كدا و نبص فى الكتاب اذا كنت انتى يادوب من رساله وزعت صحابي اللى كنت جايبهم نزاكر سوا امال لما تبقي قدامى بقي هعمل ايه
هند / ما انت بتعرف تقول كلام حلو اهو امال مطلع على نفسك سمعه وحشه ليه
مختار / يا اختى قولى ما شاء الله ما يحسد المال الا صحابه
هند / بقولك يا مختار هو انا ممكن اطلب منك طلب
مختار / عينى اؤمرى
هند / عاوزه اتعلم ادافع عن نفسي
مختار / ماشي نشوف لك واحده شاطره تعلمك
هند / و عبد الله كمان
مختار / اعلمه انا مش عاوزه حد يمرن ياسمينا بالمره
هند / خفه بس اشمعن هتمرن عبد الله و انا تشوفلى واحده
مختار / عشان ما ينفعش اللمسك شوفتي بقي لو كنا كاتبين الكتاب الدنيا كانت هتبقي حلاوه ازاى
مختار يبص فى الموبايل
مختار / هند هستاذنك ناصر اخويا بيكلمنى
هند / تمام سلام
مختار / سلام
مختار يرد
مختار / السلام عليكم
ناصر / انا كلمت معالى المحافظ
مختار / خير
ناصر / هينفذ اللى طلبناه بس عاوزنا نساعده نقبض على فيرا
……………………..
فى شقه عبد الرحمن
راجل واقف و عبد الرحمن واقف قدامه باصص فى الارض
الراجل / كام مره حزرتك من التعامل مع الناس دول
عبد الرحمن / دول اهلى
الراجل/ الناس دى مجرمه الناس دى بيمشوا و الموت بيمشى فى رجليهم
عبد الرحمن / انا مش صغير
الراجل / انت مالك و مالهم ناقصك ايه طلبت منى حاجه و انا منعتها عنك
عبد الرحمن / دول اهلى
ست تدخل
ست / عاوز تموت زى ابوك عاوز تقهرنى عليك يا ابنى
عبد الرحمن / دى صله رحم يا امى
الست / و اخرتها اديك شوفت اللى حصل
عبد الرحمن / ما فيش حاجه حصلت هما اصلا مش هيسمحوا لحاجه تحصلى
الراجل / حوار المعمل ده تنساه فتره مش هتخترع الذره بكره الصبح
عبد الرحمن يبصله
الراجل / ركز فى مزاكرتك و منهجك الامتحانات قربت انا عارف انك بتحب تجرب و تطبق اللى بتدرسه عملى و ان الكليه مش بتديك الفرصه الكافيه و انا مش معترض بس انت سلامتك تهمنى
عبد الرحمن يبص فى الارض
الراجل / انا خصصتلك عربيه توديك و تجيبك
عبد الرحمن / هروح الكليه بالبوكس
الراجل / فتره لحد ما شركه الحراسات تبعت حد كويس
عبد الرحمن / انا مش محتاج حد يحمينى انا بعرف احمى نفسى كويس
الست / اسمع الكلام يا عبد الرحمن ارجوك يا ابنى ما تحرقش قلبى عليك
عبد الرحمن / انا لحد النهرده ما سمعتش غير كلامك مره واحده انتوا اسمعوا كلامى انا لا صغير و لا ضعيف و مهما حاولتوا تغيروا ده انا عبد الرحمن زكريا الزينى
عبد الرحمن يسيب البيت و ينزل و يرزع الباب وراه
……………………………
فى مكان تمرين النشان
عبد الرحمن واقف بيتمرن و هو مضايق مختار يدخل يحط السماعات و يقف فلا اللاين اللى جنبه و ينشن عبد الرحمن يبصله و يبتسم مختار يبتسم و الاتنين يضربوا نار عبد الرحمن يقلع السماعات و النضاره و يحطهم على الترابيزه مختار يعمل زيه
عبد الرحمن / اخبارك
مختار / والدتك كلمتنى
عبد الرحمن يبص الناحيه التانيه بضيق
مختار / الحجه معاها حق الفتره دى مش امان
عبد الرحمن / اولى انك تفكر فى عروستك و اهلها مش فيا انا مش محتاج حد يحميني
مختار / عارف بس الاحتياط واجب انا نفسى يا ابن عمى ماشى بحراسه و نايم بحراسه هما اه مش باينين بس انا مش لوحدى و عمرى ما كنت لوحدى و عمرى ما هكون
شاب جته يدخل يقف فى لاين بعيد و يضرب نار عبد الرحمن و مختار عينهم عليه ما بيغلطش يبصلهم و يبتسموا لبعض
مختار / اتاكدت و لا لسه يا ابن عمى
عبد الرحمن / انت عاوز ايه يا مختار
مختار / ما تقلقش الست الوالده عليك الست شافت كتير و ما حيلتهاش فى الدنيا غيرك روح بوس ايدها و طمنها
عبد الرحمن / دول لسه بيعاملونى على انى عيل صغير
مختار / مهما كبرت يا ابن عمى هى برده كبرت معاك و فى عنيها هتفضل حته العيل ابو كفوله مبلوله اللى كانت بتحميه تحت الحنفيه
عبد الرحمن يبتسم و يبص الناحيه التانيه
مختار / انت اذكى و اعقل من كدا افهم اللى بيدور حواليك الدنيا ما عادتش زى زمان الفتره الجايه خطر
عبد الرحمن / انا اقدر اساعدكوا
مختار / انت بتساعدنا باكتر بكتير من ما انت متخيل و بتعمل اللى ما فيش زيني تانى يقدر يعمله و عشان كدا لازم تفضل عايش و سليم عشان مش هنلاقى اللى يملا مكانك
عبد الرحمن يبص فى الارض و يبص لمختار
مختار / انا ماشى عشان وعدت صحابى هزاكر معاهم تحب اوصلك
عبد الرحمن / لا انا هقعد شويه
مختار / ما تتاخرش و لما تروح ابقى طمنى عليك
عبد الرحمن يهز راسه مختار يبتسم و يشاورله و يمشى يطلع بره يركب العربيه و يسوق على طريق فاضى يلاقى عربيه راكنه و الكبوت مفتوح و فى بنت لابسه بنطلون ابيض و بدى كت اسود بتشاورله يقف مختار يركن العربيه و ينزل
البنت / ارجوك تساعدنى العربيه عطلت بيا و انا لوحدى و مش عارفه اعمل ايه
مختار يروح يبص على العربيه و البنت تروح تقف جنبه تبص معاه
البنت / انا واقفه بقالى ساعه ما حدش رضي يقفلة
مختار / دورى
البنت تلف و تديله ضهرها
البنت / كدا ههههههههههههههههههه
مختار يبصلها باستغراب
مختار / دورى العربيه مفيش حاجه قدامى
البنت تقرب اوى و تعلق ايديها حوالين رقبته
البنت / طب ما تدورها انت
مختار يفك ايديها و يروح يركب عربيته
مختار / ليهم حق ما حدش يعبرك
البنت تجرى تركب عربيه مختار مختار ينزل يروح يفتحلها الباب و يشدها ترمى نفسها فى حضنه
مختار / ما تتعدلى يا حرمه ما تخلينيش اتغابى عليكي
البنت / و ماله كل اللى يجي منك حلو حتى بيقولوا ضرب الحبيب زى اكل الزبيب
البنت تعدى ايدها على خد مختار مختار يمسكها من دراعها و يشدها بعيد عن العربيه و يقفل الباب و يروح يركب تروح تقعد على الكابوت قدامه
مختار / دا انتى مصره بقي
البنت / حبيتك من اول نظره هههههههههههههههه
مختار يشدها يركبها عربيتها و هى عماله تضحك
البنت / ههههههه طب بالراحه بس انت عصبى كدا ليه
مختار يجى يرجع عربيته البنت تنزل وراه عربيه فيها اتنين تقف قريب و ينزل منها راجل
راجل / فى حاجه يا اخوانا
مختار / الهانم عربيتها عطلانه
البنت / كداب كان بيعاكسني
الرجاله تبص لبعض و يبتسموا مختار يركب عربيته و يمشي
البنت / انتوا هتسيبوه يمشي
الراجل / ربنا يصبرك على ما بالاكى
الرجاله يمشوا و البنت تقف تتابعهم و هى حاطه ايدها فى وسطها و مبتسمه تروح تقفل الكابوت و تركب يطلع شاب يركب جنبها و يمشوا
…………………….
فى شقه يوسف
يوسف بيقلب فى صور على موبايله و هو مبتسم تليفونه يرن
يوسف / ايه الحلاوه دى يا ابني
يس / عيب عليك على بيقول ما تبعتش الصور الا لما نكررها بطريقه تانيه عشان نسخن الدنيا
يوسف / لازم اللحقه قبل ما يقولها اى حاجه و يمهدلها الدنيا
يس / يا عم هى الحاجات دى بتتحكى
يوسف / لو ما جابتش نتيجه نبقي نكررها بس انجزنى انت فى حوار البلد ده
يس / يوم الجمعه يا عم هسافر قولتلك
يوسف / انت غبى يا يس هتستني لما مختار يرجع البلد عشان يعرفك لازم تروح و هو هنا
يس / يا عم اسافر بكره لو عاوز بس اصل الفلوس يعني
يوسف / عدى عليا خد اللى انت عاوزه المهم تجبلى قراره انا والله كنت مستعد اسافر بنفسي بس هما شافونى و عارفيني
يس / تمام انا جايلك فى الطريق
يوسف / انا مستنيك
يوسف يقفل السكه تليفونه يرن يرد بسرعه
يوسف / عامله ايه مامتك عملت معاكى حاجه حاولت اكلمك كتير تليفونك مقفول
وسام / انا كويسه ماما كلمت مامتك و حددوا معاد الخطوبه و كانوا عاوزين يخلوها كتب كتاب
يوسف / ايه !!!
وسام / انا عارفه انى غلطت عارفه انى ضعفت بس انا
يوسف / وسام احنا لازم نقولهم الحقيقه
وسام / لو عليا اعمل اللى انت عاوزه بس ماما تعبت جامد يا يوسف مش هتستحمل
يوسف / مالها
وسام / ضغطها على جامد و خدت الحبايه ماما اخدت منى موبايلى و لولا الدوا بينيمها ما كنتش هعرف اسرقه من جنبها يوسف انا عمرى ما اتاخرت عنك فى حاجه ارجوك اقف جنبي المرادى
يوسف / احنا مش هينفع نتجوز يا وسام انتى عارفه انى بحب هند انا مش هقدر اسعدك وجودك فى حياتي بيبعد عنى هند
وسام / هند مخطوبه يا يوسف هند خلاص اختارت مختار عمرها ما هتسيبه و ترجعلك
يوسف / لا هتسيبه انا رتبت كل حاجه و هتسيبه
وسام / طب و انا يا يوسف هتسيبني دلوقت هتتخلى عنى هقول لامى اللى راقده جوه دى ايه
يوسف / بصي احنا نسايس امورنا لحد ما مامتك تتحسن و بعدين نتلكك و نفسخ و لو عاوزه افسخى انتى بس الموضوع ده لازم يحصل بسرعه انا مش هينفع اكمل معاكى اكتر من كدا الموضوع من اوله كان غلط و انا مش عارف طاوعتك ازاى
وسام / بتتكلم كانى سقيتك حاجه انا ما كنتش اعرف انك هتعمل فيا كدا و تسيبني ما كنتش اعرف ان دى هتبقي اخره ثقتي فيك
يوسف / ايه اللى بتقوليه ده اللى يسمعك يقول انى غررت بيكى
وسام / هتفضل تزل فيا و تكسرنى لحد امتى
يوسف / وسام اهدى و نتكلم بعدين الكلام بالطريقه دى مش هينفع
وسام / دى اخرتها يا يوسف
يوسف / نتكلم بعدين يا وسام انا لازم اقفل سلام
يوسف يقفل باب الاوضه يخبط يوسف يتنهد
يوسف / ادخل
اسراء تدخل و تقعد جنبه
اسراء / مامه وسام كلمتنى
يوسف / ما فيش حاجه حصلت لكل ده
اسراء / انا ما كلمتكش الا لما اتكلمت مع ابوك احنا كمان شايفين اننا نجرى فى موضوع الجوازه و نكتب الكتاب
يوسف / ماما انا تعبان ياريت ناجل الكلام فى الموضوع ده دلوقت
اسراء / اللى كنت بتكلمها فى التليفون دى وسام صح
يوسف / ماما لو سمحتى نتكلم بكره
اسراء / يا يوسف انا
يوسف / يعنى اسيبلكوا البيت و اطفش بقول تعبان نتكلم بكره مش قادر ايه
اسراء تبص فى الارض و تهز راسها
اسراء / ماشي يا يوسف اللى يريحك
اسراء تقوم و تمشي و تقفل الباب وراها
يوسف / ما انا اللى جبت القرف ده على دماغى
يوسف يمسك التليفون و يبعت الصور لهند و هو بيكتب
يوسف / اتفضلى البيه المحترم بيعمل ايه
توصله رساله يبص فيها
/////////////
هند / واضح جدا انها فوتوشوب بطل بقي حركاتك دى و عيب كدا
/////////////
يوسف / ايه الغبيه دى
يوسف يكتب و يبعت
يوسف / والله ما فوتوشوب و حصلت فعلا روحى واجهيه بيها و اتحداكى ينكر
توصل رساله
/////////////
هند / يعمل اللى هو عاوزه ما لكش دعوه و لو ادخلت بينا تانى انا هعملك بلوك و اقول لبابا و مختار
/////////////
يوسف يتعصب و يقوم يقف و هو بيكتب
يوسف / انتى بتهدديني
يوسف يجي يبعت يلاقى اتعمله بلوك يتعصب و يحاول يهدى نفسه
يوسف / اهدى يا يوسف اهدى … تمام وريني بقي هتدارى على ده ازاى
يوسف ماسك الموبايل و عمال يكتب
……………………
فى بيت مختار
مختار نايم تليفونه يرن يفتح و يبص يلاقي هند يتعدل بسرعه و يرد
مختار / السلام عليكم
هند / صحيتك
مختار / عادى مش مشكله فى حاجه حصلت و لا ايه
هند / مختار
مختار / نعم
هند / هو انت لما نزلت النهرده روحت فين
مختار / ما انا قولتلك هروح لعبد الرحمن كان فى نادى الرمايه لعبنا نار شويه انا و هو و روحنا اصله كان متخانق مع جوز امه و زعلان شويه
هند / و روحت علاطول بعدها صح
مختار / اه والله ليه
هند / مفيش انا مصدقاك
مختار / اتكلمى يا هند انا سامعك
هند / مفيش
مختار / قالولى عليها كتير حكايه مالك مفيش دى بقولك ايه يا هند احكى و اجبلك شيكولاته قولى يلا فى ايه صوتك متغير
هند / يوسف بعتلى صور ليك مع واحده
مختار / ههههههههههههههههههه خليني اخم الصور دى كانت على طريق او فى شارع و الواحده دى كانت لابسه كت
هند / يعني الصور مش فوتوشوب
مختار / لا مش فوتوشوب بس مش زى ما انتى فاكره و اقدر اثبتلك بالشهود كمان
هند / انت مش محتاج تثبتلى انا بثق فيك
مختار يبتسم
هند / انا عارفه انك قد ثقتى و عارفه انى عمرى ما هندم و لعلمك انا عملت ليوسف بلوك و ما صدقتوش و قولتله مختار يعمل اللى هو عاوزه
مختار / مختار لو كان له فى الحرام كان راح من زمان و بعدين اقسم بالله انا كنت فاكرها محتاجه مساعده كانت واقفه فى طريق ضلمه و لوحدها و فاتحه الكبوت قولت اساعدها بدل ما حد ابن حرام يتعرضلها بس لما لقيت تصرفاتها مايعه و مش مظبوطه سبتها و مشيت و عندى شهور قسما بالله بس كدا وضحت الصوره البيه كان زققها عليا عشان يوقع بينا
هند / مفيش حاجه هتوقع بينا
مختار / ربنا يكملك بعقلك ليكي فى زمتى شيكولاته مش هنسي ما تخافيش
هند / سورى انى صحيتك روح كمل نوم يلا
مختار / ليه هو دخول الحمام زى خروجه و لا ايه ما دام صحيتيني يبقي ترغى معايا
هند / بس انا ما اتفرجتش على حلقه المسلسل النهرده عشان احكيهالك
مختار / و ما تتفرجيش عليه خالص احسن الحاجات دى بتخرب البيوت
هند / ما كنتش اعرف انك بتخاف من المنافسه
مختار / مفيش منافسه اصلا
هند / يخرب بيت الثقه يا شيخ
مختار / يا بنت الحلال هو انا و انتى مخطوبين و لا متجوزين
هند / مخطوبين
مختار / ينفع امسك ايدك و احضنك و اشيلك و شغل المحن و قله الادب ده
هند / لا بس
مختار / بقولك ايه انتى شكلك بتجرى شكلى عشان تدبسيني فى ورد اصالحك بيه صح
يتبع…
لقراءة الفصل التالي : اضغط هنا
لقراءة الرواية كاملة اضغط على : (رواية البر التاني)
2 تعليقات