Uncategorized

رواية زين الجزء الثانى الفصل التاسع 9 بقلم سحر فرج

 رواية زين الجزء الثانى الفصل التاسع 9 بقلم سحر فرج
رواية زين الجزء الثانى الفصل التاسع 9 بقلم سحر فرج

رواية زين الجزء الثانى الفصل التاسع 9 بقلم سحر فرج

عمر رد وقال : خلاص يا عم ويالا بينا بقى انا ميت من الجووووع وبطنى بتصوص .
زين ضربه فى كتفه وقال : ماشى يا مفجوع هاعديها المرة دى علشان خاطر شوشو بس لما اشوف اخرتها معاك ايه يا عمر يا جبالى. 
ومسك ايد ليل وقال : اسيبكم تجهزوا نفسكم وهاروح اعدى على حسام واخده هو وأيه وننزل على تحت نستناكم فى المطعم متتاخروش واعقل .. اعقققل أنت 
فاااااااهم يا حمار . 
عمر لسه هاينطق……………
زين مش عاوز اسمع ولا كلمه واسمعنى للاخر
يا عمر وبطل حركات العيال دى احسنلك .. الله يكون فى عونك يا شاهندا يا بنت خالتى . مش عارف بس هاتعيشى مع واحد زى ده ازاى ؟!
ليل شدته من دراعه وهى بتضحك وقالت : يالا يا استاذ انت كمان هاتضيعوا مننا انت واخوك شهر العسل حرام عليكم .
الكل فضل يضحك وزين خد ليل وخرجوا واول لما الباب اتقفل على عمر وشاهندا عمر قرب منها وقال : انا اسف على اللى حصل بس والله ما كنت اقصد سامحينى يا شوشو بغبائى كنت هاضيعك منى يا حبيبتى.
شاهندا بغيظ : ارجوك يا عمر تبطل شغل الاطفال ده وتعقل بجد والحمد لله ان ربنا سترها وعدت على خير .. وتخيل كده لو زين وحسام محدش فيهم كان سأل علينا او كنا لوحدنا فى الفندق ده كان حصل ايه كنا موتنا فى الحمام إحنا الاتنين ولا ايه ؟
عمر ضمها فى حضنه وباس ايديها 
وقال : اوعدك انى هاعقل وابطل الحركات دى من هنا ورايح خالص لانى مقدرش اعيش بعيد عنك لحظه واحده بعد كده .
شاهندا ابتسمت وقامت وقفت وقالت : تسمح تقوم بقى تجهز نفسك وتخلينى اجهز نفسى انا كمان وننزل للناس اللى مستنيانا تحت دى ومعطلنهم معانا دايما.
عمر خد نفس وقال : دقيقتين بالضبط واكون تحت امرك يا باشا .
شاهندا بضحكه عاليه كلها دلع قالت : بتبقى كيوت اوى وانت بتسمع الكلام يا بيبى .
عمر بفرحه شدها لصدره وقال : حبيب البيبى وقلب البيبى وعقل وكيان البيبى، وغمز لها بعيونه وقال : ما تيجى نسيبهم مالطوعين تحت شويه ونشوف ايه حكايه البيبى دى . 
شاهندا زقته بعيد عنها ورفعت حاجب ونزلت حاجب وقالت : اخلص يا عمر احسنلك بدل ما والله انزل واسيبك لوحدك.
عمر اتصدم لما شافها اتحولت فجأه كده وقال : دقيقتين واكون جاهز يا روحى .
شاهندا ضحكت وقالت مجنون وراحت على الدولاب علشان تنقى طقم تلبسه يكون جميل ورقيق .
           ___________________
وفى الفيلا عند سميحه الكل كان صحى من بدرى ودادة زينب كانت بتجهز الفطار هى وميرفت فى المطبخ.
وسميحه وسماح كانوا قاعدين فى الريسبشن بيتكلموا مع بعض عن الشباب واللى زمانهم بيعملوه فى روما .
عبير كانت صحيت من النوم واول لما فتحت عيونها فضلت تتأمل فى الاوضه اللى هى كانت نايمه فيها واتمنت انها تكون جزء من العيله دى .. وبينها وبين نفسها قالت : يا بنت الأيه يا ليل .. وقعتى واقفه يا أروبه .
طول عمرى مش بطيقك ولا بحبك ودلوقتى بحسدك على اللى انتى بقيتى فيه .. عيله وحسب ونسب وعز وفلوس بالملايين وواحد مشهور زى زين الجبالى، بس اوعدك يا ليل انى قريب اوى هاكون زيك واحسن منك كمان لما اخلى “يوسف الشريف” زى الخاتم فى صباعى ويخلينى ملكه على عرشه ويخلينى نجمه فى السينما كمان .
وقامت ونزلت من السرير ودخلت على الحمام وخدت شور ولبست الطقم اللى سميحه ادتهولها باليل من بتوع ليل علشان تلبسه عقبال لما تنزل مع سميحه زى ما وعدتها يجيبوا شويه لبس جداد ليها .
وخلصت لبسها وسرحت شعرها وحطت مكياج وبرفان كمان من اللى كانوا موجودين على التسريحه .
ونزلت على تحت وراحت ناحيه سميحه وسماح وسلمت عليهم .
عبير : صباح الخير . 
سميحه : صباح الفل يا حبيبتى يارب تكونى قدرتى تنامى كويس باليل ؟
عبير : نمت كويس الحمد لله اطمنى يا طنط سميحه . 
سماح : طب الحمد حبيبتى، قوموا يالا بقى علشان نفطر لان اليوم طويل اوى عندنا النهاردة وهانروح اماكن كتير جدا .
سميحه : فعلا يا عبير مجهزين ليكى برنامج حلو اوى النهارده هايعجبك ان شاء الله.
عبير بفرحه : الله انا فرحانه اوى ياريت شاهى هى كمان تكون معانا . 
سميحه فكرت كده وقالت : طيب ايه رايكم نروح الاول على المستشفى علشان نعدى على عاصى والد شاهى ونطمن عليه ونحاول نقنع شاهى انها تخرج معانا وبالمرة نخرجها من المود اللى هى فيه بقالها كام يوم؟
سماح : برافو عليكى يا سميحه والله انا لما شوفتها امبارح صعبت عليا جدا والحاله اللى هى كانت فيها وبالمرة تنقى مع عبير لبسها الجديد .
عبير : ياريت والله يا طنط انا حبتها اوى وكأنى اعرفها بقالى كتير وطيبه ورقيقه جدا بس تحسى انها مكسورة او حزينه دايما.
سميحه : فعلا عندك حق يا عبير هى مرت بظروف صعبه كتير أثرت عليها وعلى نفسيتها المهم .. تعالوا نفطر الاول ونجهز نفسنا وبعدها نشوف هانعمل ايه بالضبط .
وفعلا قام الكل وراحوا على تربيزة السفره ودادة زينب كانت مجهزة فطار حلو اوى وقعدوا وبدؤا يفطروا مع بعض .
سميحه بصت لدادة زينب وقالت : لو سمحتى يا زينب بلغى السواق يجهز العربيه عقبال لما نفطر .
زينب : حاضر يا ست سميحه تحت امرك .
وراحت زينب وبلغت السواق وخلال نصف ساعه كانوا جهزوا نفسهم كلهم بعد ما فطروا وشربوا القهوة كمان وركبوا العربيه مع السواق وراحوا على المستشفى .
            __________________
وعند الاسطى حسن فى البيت أم ايه كانت يا دوبك لسه خارجه من المطبخ بعد ما خلصت تجهيز الأكل بتاع الغداء، والاسطى حسن كان راح على ورشته .. فعملت كوبايه شاى لنفسها وراحت تستريح شويه من التعب والوقفه من بدرى فى المطبخ وقعدت اودام التلفزيون . 
ومسكت الريموت ووطت الصوت شويه وبعدها خدت الموبيل بتاعها من على التربيزه واتصلت على عبير علشان تطمن عليها وعلى اخبارها .  
واول لما عبير ردت أمها قالت : صباح الخير يا حبيبتى اخبارك ايه يا بنتى طمنينى . 
عبير كانت لسه راكبه فى العربيه مع سميحه وسماح وردت وقالت : صباح الفل يا ست الكل انا بخير الحمد لله اطمنى، اخباركم انتم ايه طمنينى ؟
أم أيه : طيب الحمد لله طمنتينى واحنا بخير اطمنى يا بنتى .. المهم يا عبير تخلى بالك من نفسك ومتعمليش اى حاجه تحرجنا مع سميحه هانم يا بنتى .. الناس محترمه جدا ومش عاوزين اى حد يزعل مننا بسببك .
عبير : متقلقيش يا ماما انا فى العربيه دلوقتى مع طنط سميحه وسماح أهو وهايخرجونى ويلفيفونى شويه فى البلد
كلها . 
أم ايه : ماشى يا حبيبتى خلى بالك من نفسك وسلمى عليهم كتير .. اختك مكلمتكيش او حد من العرسان كلمكم نطمن عليهم .
عبير : لا يا ماما انتى ناسيه انهم فى شهر العسل ومش فاضين يتكلموا فى التليفون .
أم أيه : ماشى يا بنتى عندك حق وربنا يسعدهم كلهم وعقبالك يا حبيبتى ان شاء الله فى بيت العدل .
عبير : ان شاء الله يا حبيبتى يالا سلام .
أم ايه : سلام يا بنتى . 
وقفلت معاها وفضلت تقلب فى التلفزيون شويه وتشرب كوبايه الشاى .
اما الاسطى حسن كان خد بعضه وراح يزور صاحب عمره اللى كان بيعتبره أخوه 
“عبد الرحمن ابو ليل”
لما حس أنه محتاج يقعد يتكلم معاه شويه ويزوره ويربح اعصابه.
وفعلا راح المقابر ووصل لحد قبر عبد الرحمن وفتح الشنطه اللى كان واخدها معاه وطلع منها ازازة كبيره فيها مايه علشان يسقى الزرع اللى كان جابه اودام القبر .
وبعد ما خلص كل الزرع الموجود هناك وقف اودام القبر وبدأ يقرا الفاتحه لصاحبه وصديق عمره ويدعيله بالرحمه والمغفرة .
وبدا يتكلم معاه وكأنه اودامه وبيسمعه
وقال : وحشتنى يا اخويا .. وحشتنى اوى يا عبد الرحمن وليك وحشه كبيرة والله .
وحشنى وشك وصوتك وضحكتك اللى مكنتش بتفارقك ابدا .. عاوزك تطمن على بنتك ليل هى بخير ولقت اهلها بعد العمر ده كله واتجوزت من ابن خالتها سميحه .. راجل ابن حلال وبيحبها يا عبد الرحمن متقلقش وهى كمان بتحبه وهايعوضها كل سنين الحرمان والشقى اللى هى شافتهم فى حياتها من بعد موت امها الله يرحمها .
اطمن يا صاحبى امانتك اللى أمنتنى عليها فى عيونى والله وبحبها وبعزها زى بناتى بالضبط .
ليل بنت جدعه وحنينه وطيبه وغلبانه زيك بالضبط .
واوعدك انى هاطمن عليها أول بأول كل فترة وأجى لحد هنا وأطمنك عليها . 
الله يرحمك يا حبيبى ويحسن اليك، هامشى انا بقى دلوقتى علشان سايب الورشه لوحدها واوعدك انى مش هاتاخر عليك من هنا ورايح .. سلام يا صاحبى .
ومشى الاسطى حسن ورجع على ورشته بعد ما راح زار صاحبه واستريح نفسيا .
         ______________________
حسان وصابر اول لما نزلوا موقف رمسيس فى القاهرة فضلوا ماشين كتير بيدوروا على أى أوضه أو شقه صغيرة يقعدوا فيها ويختفوا شويه عن عيون الناس .
وبظروفها وهما ماشين لمحوا لوحه صغيرة مكتوب عليها شقق للايجار .
حسان : الحق ياض يا صابر بص شوف اللوحه اللى هناك دى .. بيقولوا فى شقق للايجار .
صابر بفرحه : ايه ده صحيح، طيب تعال نشوف كده اصلى هلكت من كتر المشى ومش قادر احرك رجلى خلاص.
حسان : تعال نروح ونشوف الموضوع ده ويارب نلاقى شقه محندقه كده تلمنا بدل اللف اللى فى الشوراع ده .
وراحوا فعلا ناحيه المحل اللى معلق اللوحه دى ودخلوا على جوا .
واول لما دخلوا شافوا راجل كبير فى السن قاعد على مكتب وبصلهم من فوق لتحت وقال .. نعم بتدوروا على حاجه ؟
حسان : سلام عليكم
الراجل : وعليكم يا سيدى افندم عاوز ايه انطق ؟
حسان : بشويش علينا يا معلم، انت داخل حامى اوى كده ليه .. الكلام أخذ وعطا .
الراجل : اللهم طولك يا روح ، ماشى يا سيدى عاوز ايه ؟
حسان : كنا محتاجين شقه صغيرة عبارة عن اوضه وصاله وحمام ويكون ايجارها معقول شويه ومش غالى .
الراجل فكر شويه كده وقال : طلبكم عندى المهم هاتأجروها قد ايه ؟ 
حسان بعدم فهم قال : مش فاهم تقصد ايه بالضبط !؟
الراجل : استغفر الله العظيم على الصبح : يا استاذ أنت أقصد عاوزها يوم يومين اسبوع شهر سنه كده فهمت .
حسان : خلاص يا عم فهمت انا مش عارف بس حضرتك متعصب علينا اوى كده ليه ومش طايق لنا كلمة ؟! 
إحنا مش جايين نشحت منك على فكرة ، إحنا جايين نأجر شقه والفلوس اللى هاتقول عليها تحت أمرك فيها كلها من جنيه لألف جنيه، 
ومد أيه فى جيبه وطلع المحفظه اللى كان سرقها من سواق العربيه واللى كان فيها فلوس كتير جدا .
الراجل أول لما حسان طلع كميه الفلوس دى اودامه بدأ يتعامل معاهم كويس جدا .
الراجل : اعذرنى يا ابنى اللى ما يعرفك يجهلك اصل الشغلانه بتاعتنا دى بنشوف فيها أشكال والوان مش ولابد، وخريجين سجون كتير.
صابر أول لما سمع كلمه سجون بص لحسان برعب وخوف وملامحه هو كمان اتغيرت على طول وقال : سجون ايه بس يا معلم إحنا وش ذلك برضه . 
حسان : المهم طلبنا عندك ولا نروح نشوف فى مكان تانى ؟
الراجل: مكان تانى ايه بس با استاذ .. عندى ليكم شقه زى ما انتم عاوزين بالضبط ثوانى اقفل المحل واروح معاكم وافرجها ليكم .
وفعلا قفل باب المحل وراح معاهم على بعد كام متر من مكان المحل وطلع مدخل عمارة قديمه وطلعوا السلم لحد الدور التالت وطلع مفاتيح من جيبه وفتح باب الشقه . 
ودخلوا كلهم والشقه عجبت حسان وصابر وبالذات انها فى شارع جانبى بعيد عن العيون والهيصه والدوشه .
حسان بصله وقال : حلوة اوى يا معلم حسابها ايه دى ؟
الراجل : انتم عاوزنها مدة أد ايه الاول؟
حسان : يعنى شهرين تلاته كده عقبال لما نشوف المصلحه اللى نازلين فيها القاهرة ونرجع على بلدنا .
الراجل : ماشى هاحسبلكم الشهر ب 600 جنيه يعنى التلت شهور هاحسبهم علشان خاطركم وعلشان تبقوا زباين عندى على طول ب 1500 ايه رايك يا استاذ ؟ 
صابر لسه هايعترض على المبلغ حسان سكته وبص للراجل وقال : ماشى يا معلم، وطلع فلوس وادهاله تحت الحساب ووصله لحد الباب وقفل وراه الباب ودخل .
وطلع 200 جنيه تانيين من جيبه واداهم لصابر وقاله انزل هاتلنا شويه أكل من تحت وشويه حاجات للتلاجه عقبال ما آخد دش سريع تكون أنت رجعت .
صابر خد الفلوس منه وقال : ماشى يا عم مع ان رجلى وجعانى اوى بس هانزل علشان ميت من الجوع وفتح الباب ولسه هاينزل على تحت .
حسان لحقه وقال بصوت واطى: خلى بالك واوعى الحكومه تقفشك وتودينا فى داهيه يا حمار.
صابر : ماشى ????
           ___________________ 
وفى العاصمه روما ، الشباب كانوا خلصوا فطارهم بعد ما عمر وشاهندا نزلوا ليهم على المطعم وخدوا بعضهم وخرجوا من الفندق وبدؤا يتمشوا ويتفرجوا على المحلات الكبيره اللى فى كل مكان فى الشارع .
كل واحد فيهم كان ماسك ايد مراته بكل رومانسيه .
“زين وليل” “عمر وشاهندا” “حسام وأيه”  
وكل ما بنت من البنات يعجبها حاجه فى اى محل تدخل وتشتريها .
وفضلوا على الحال ده لحد ما وصلوا لمكان جميل جدا من أشهر الاماكن السياحيه فى روما وهو .
الكولوسيوم هو مدرج روماني كبير جدا فى وسط مدينة روما وهو مبنى بيضاوي ضخم يبلغ طوله 189 مترًا، ويرجع تاريخ بناءه إلى عهد الإمبراطورية الرومانية في القرن الأول .
ويعتبر الكولوسيوم واحداً من اعظم الأعمال المعمارية والهندسية الرومانية ويعتبر مكان جذب كبير للسياح من كافة انحاء العالم، وطُبعت صورة الكولوسيوم على قطعة الخمس سنتات من النسخة الإيطالية، وسبب تحطم جزء من الكولوسيوم هو هزة أرضية عنيفة في القرون الوسطى .
البنات عجبهم جدا جدا شكل المدرج وفضلوا يتفرجوا عليه ويخدوا بعض الصور التذكارية ليهم كلهم مع بعض وبرضه صور لكل واحد مع مراته.
وفضلوا على الحال ده يتنقلوا من مكان لمكان وراحوا زاروا ساحه نافونا ونصب فيكتور إيمانويل الثانى والسلالم الاسبانيه .
لحد ما البنات تعبت جدا جدا واحتاجوا انهم يستريحوا ويقعدوا فى اى مكان .
زين بص لحسام وقال : لا مفيش راحه عندنا ليكم مفاجأه حلوة .
ليل : واااااو مفاجاه أيه قولى يا حبيبى .
عمر : أيه ده بتكتكوا من ورايا ولا ايه أنت وهو يا أستاذ ؟ 
حسام : يا عم اصبر بس لما نشوق البنات شويه ونحمسهم وبعدين نقولهم على المفاجأة.
شاهندا : قولوا بقى ما تبقوش رخمين . 
زين : رخمين ????
ماشى خلاص مفيش مفاجأه ولا اى حاجه انسوا بقى.
ليل بدلع : وحياتى وحياتى يا زين عندى فضول اوى اعرف ايه هى المفاجأة دى يا حبيبى .
عمر حب يقلد ليل وهى بتتكلم وتدلع على زين فقرب من اخوه وقال : وحياتى وحياتى يا زيزووو انا كمان عاوز اعرف .
????????????
زين بصدمه : تصدق أنت عيل رخم صحيح والكل فضل يضحك أوى من كل قلبه على كسفه عمر ????????????
حسام : خلاص كفايه عليهم كده يا زين ويالا بينا زمان اليخت فى انتظارنا .
الكل فرح جدا لما سمع كلمه “يخت” وخدوا بعضهم كلهم ووصلوا لحد البحر وركبوا اليخت اللى كان منظره تحفه من بره جدا وكان اجمل واجمل لما قعدوا فيه .
البنات كانت خايفه فى الاول بس مع الوقت بدؤا يتعودوا عليه .
وكان فى اشخاص تبع اليخت بيجهزوا سفره كبيرة عليها انواع مختلفه من الاكل اللى بيشهى .
ليل بفضول وهما بيكلوا بصت لزين وقالت : الله حلوة اوى المفاجأة دى .
زين ضحك وبص لحسام وقال : لسه المفاجأه يا حبيبتى مش هى دى .
ليل بصت للبنات وقالت : معقول كل الجمال اللى حوالينا ده فى كل مكان ومش هو المفاجأه .
اومال المفاجاه هاتبقى عامله ايه بقى.
و…………….
يتبع ……
لقراءة الفصل العاشر : اضغط هنا
لقراءة باقى فصول الرواية : اضغط هنا

اترك تعليقاً

لن يتم نشر عنوان بريدك الإلكتروني.

زر الذهاب إلى الأعلى