رواية بائعة الورد الفصل الثاني عشر 12 بقلم أسماء ابراهيم

دخل فادي الكافيه وتفاجأ بالشخص الذي اتصل به فكان تامر 

تامر: اهلا بحضرتك يادكتور انا اسف علي الطريقه اللي خليتك تيجي بيها بس ماكنش عندي اي مبرر اني اقابلك غير كده.

فادي: انت عايز ايه ياتامر وياريت من غير لف ولا دوران .

تامر: تمام يبقي اتفضل حضرتك تقعد ونشرب القهوه وبعدين اقولك اللي عندي.

فادي: من غير شرب حاجه ادخل في الموضوع علي طول مع اني بحاول استشف انت عايز ايه مني .

تامر: من الاخر كده عايز مساعدتك ليه في نتيجه الامتحان يعني عايز انجح لاني زهقت من الاعاده كل شويه وماتقلقش يادكتور كله بحسابه.

فادي بعصبية وصوت عالي وقف وقال: يبقي انت اكيد اتجننت انا مستحيل أخالف مبادئ وبجد انا ندمان اني ضيعت وقتي مع واحد مستهتر زيك وصدقني هاتندم علي اللي قولته ده.

تامر: متأكد يادكتور اني هاندم بس لو انت عرفت اللي عندي هتوافق وبتحداك .

فادي: اللي عندك اعمله وخليك فاكر انك هاتندم علي كل كلمه بتقولها.

خرج فادي من الكافيه وركب سيارته وأمسك الهاتف وقام بالاتصال علي صديقه دكتور سراج وطلب مقابلته علي الفور وبعد دقائق وصل فادي الي فيلا دكتور سراج ورحب به ولكن استعجب من شكل فادي فهو لاول مره يري فادي بتلك الحاله .

سراج: خير يافادي فيه ايه وشكلك متعصب كده ليه طمني عليك.

فادي: انا اسف ياسراج اني جيتلك من غير ميعاد وفي وقت زي ده لكن حصل موقف ومافيش غيرك احكيله 

سراج: طيب ارتاح الاول واشرب عصير ليمون يهدي اعصابك واحكيلي.

جلس فادي وأمر سراج بتحضير كوب من عصير الليمون وقص عليه فادي ما دار بينه وبين تامر 

سراج: تمام وما تقلقش من اي حاجه تامر ده واد صايع معتمد علي فلوس أبوه وشهرته ومفكر أن ممكن يشتري اي حاجه بسلطه أبوه ولا فلوسه .

فادي: انا مش فاهم اي ده ويطلع مين أبوه اللي له سلطه ولا نفوذ .

سراج: تامر يبقي ابن منير فخري الاسيوطي صاحب اكبر توكيل سيارات في الشرق الأوسط ومن اغني أغنياء البلد.

فادي: اهاااا قولتلي عشان كده مفكر أنه يقدر بالفلوس والنفوذ يشتري اي حد.

سراج: لكن ايه اللي ممكن يكون عنده بيهدد بيه وبعدين ليه انت بذات اللي اختاره عشان يطلب منه الطلب ده.

فادي: مش عارف ياسراج انا اسف مره تانيه اني ازعجتك هامشي دلوقتي واشوفك بكره في الجامعه سلام.

°°°°°°°°°°°°°°°°°°°°°°°°°°°°°°°°°°°°°°°°°°°°

بشركه قاسم الشناوي كان يجلس معتصم بمكتبه يراجع بعض الملفات الخاصه بتسليم المعدات الزراعيه وتفاجأ بعقد اتفاق بين عمه محمود والحج عامر وتم دفع المبلغ كامل وتم تحويله الي حساب عمه محمود فقام معتصم بأخذ ذلك الملف لكي يحتفظ به لحين وصول يوسف ويعرض الأمر عليه وعلي والده.

وخرج معتصم من مكتبه بل من الشركه بأكملها وتوجه الي البيت.

في بيت قاسم الشناوي وخاصه بغرفه البنات كانت ياسمين تتابع مواقع التواصل الاجتماعي فأتها رساله علي الماسينجر من صديقتها شدوي.

شدوي: هاااي ياسو وحشاني جدا هاترجعي امتي.

ياسمين: مش عارفه ياشوشو الدنيا هنا ملخبطه جدو تعب ودخل المستشفى ويوسف كمان علي وصول ومش عارفه اعمل ايه.

شدوي: الف سلامه عليه ياقلبي ربنا يقومه بالسلامه 

ياسمين: يااارب ياشدوي لان بجد لو جدو جراله حاجه البيت هنا هايتفرق عن بعضه.

شدوي: اديعله ياسو وربنا كريم اوي وماتقلقيش علي محل الورد انا وروضه بنروح وبنتابع الشغل وكمان روضه بتهتم بالورد.

ياسمين: ربنا يخليكوا ليا وعلي فكره البوكيه اللي انتي عايزاه جهزته قبل ما اسافر وموجود علي مكتبي .

شدوي: حبيبتي تسلميلي يالا مش هطول عليكي والصبح هكلمك عشان اطمن علي جدك بااااي.

اغلق ياسمين الشات مع شدوي ووجدت نغم ابنه عمها قامت من نومها.

ياسمين: حبيبتي يانغم انتي مالحقتيش تنامي كويس .

نغم: مش عارفه انام ياياسو كل ما اغمض عيني بحس اني حد بيخنقني وزي ما اكون في صحرا وحد بيشدني لبير وبشوف بابا واقف مكتف أيده ومش عايز ينقذني .

ياسمين وهي تأخذ نغم بأحضانها: نغم حبيبتي احنا كلنا جنبك ومعاكي وبعدين مش كفايه حبيب القلب هنا ولا ايه.

نغم: تعرفي اني لحد دلوقتي ما عرفتوش حاجه انا حاسه بحبه ليه وبشوفها في عينيه بس مش قادره اقوله .

ياسمين: معتصم بيحبك وعلي فكره هو كلم يوسف وكان مستني لما يرجع عشان يكلموا عمي طاهر وياخدوا رأي جدو.

نغم: انتي بتتكلمي بجد ياسمين يعني معتصم عايز يتجوزني.

ياسمين: اه طبعا انتي عارف ان جو مش بيخبي عليه حاجه وانتي بقي خليكي حلوه وانزلي تحت واستنيه معتصم قرب يجي حاسسيه انك مهتمه بيه وبحبك ليه.

نغم: ماشي بس هطلب منك طلب تنزلي معايا نجهزله العشا وبعدين اطلعي 

ياسمين: امممم اوكي بس مش عشانك ده عشان جو كلها نص ساعه ويجي .

قامت نغم وبدلت ملابس النوم بفستان رقيق من اللون الازرق الغامق ومشطت شعرها الذهبي ونزلت مع ياسمين الي المطبخ يجهزون العشاء وبعدها جلست نغم تقرأ روايه لحين وصول معتصم أما ياسيمن خرجت الي جنينه البيت وتوجهت الي الجزء المخصص بزراعه الورد التي كانت تهتم به.

وصل معتصم البيت ركن سيارته ودخل الجنينه ورأي ياسمين جالسه أمام احدي أحواض الورد اقترب منها وألقي عليها السلام.

معتصم: السلام عليكم ياسو ايه يابنتي قاعده ليه لوحدك وفين نغم وأهل البيت.

ياسمين: وعليكم السلام ورحمه الله وبركاته ابدا ماجاليش نوم وقولت انزل الجنينه شويه وكمان مستنيه يوسف قريب يوصل .

معتصم: ياسمين نغم عامله ايه قلقان عليها اوي ونفسي اعمل اي حاجه تسعدها.

ياسمين: نغم قاعده جوه ومستنياك علي فكره وجهزتلك العشا ياريت بقي تنجز وتقولها عشان انا زهقت من الصمت اللي انتوا فيه .

معتصم: هقولها بس في الوقت المناسب.

ياسمين: صدقني يامعتصم نغم بتحبك وده اكتر وقت مناسب انك تعترفلها بحبك نغم محتاجه حضن يحسسها بالأمان والاستقرار وبعدين ياعم انت دي كل كلمه بتكتبها في مذكراتها عشانك وعلي فكره بقي تعمل حسابك أن خطوبتكم معانا.

معتصم: ربنا يسهل هدخل بقي اشوف حبيبتي وخليكي مستنيه سي السيد بتاعك.

ياسمين: ماشي ياروميو بس خلي بالك ماتعرفش نغم اني كلمتك دلوقتي.

معتصم: ولا شوفتك ولا اعرفك باااي يا بائعه الورد.

ياسمين: واطي يا ابن عمي .

~~~~~~~~~~~~~~~~~~~~~~~~

ناني: ماهو لازم يرفض في حد يروح يقول كده لا وكمان تهدده مستني يعمل ايه يقولك موافق اكيد شخصيه زي فادي هايرفض.

تامر: ماهو مافيش وقت ودي اخر فرصه كنتي عايزه اعمل ايه.

ناني: ماتعملش حاجه واختفي اليومين دول لما نشوف حل وانا بكره في الجامعه هاشوف اي حجه اكلم بيها شدوي.

تامر: ماشي ياناني بس خلي بالك هما يومين وبعدها هالعب بالكارت اللي معايا.

ناني: أوكي باااي دلوقتي عشان روضه جايه عليه.

روضه: مساء الخير ياناني مالك صوتك عالي ومتعصبه ليه كده.

ناني: لا ياقلبي مافيش حاجه بس مامي بتقولي ابن عمتي عايز يخطبني وانا مش باطيقه.

روضه: اهاااا ماشي انا داخله انام عايزه حاجه .

ناني: نوم ايه دلوقتي خليكي سهرانه معايا شويه اهوو ندردش مع بعض الا قوليلي هي شدوي تبقي صاحبتك انتي وياسمين.

روضه: اه صاحبتنا جدا ليه في حاجه .

ناني: ابدا بس انتي عارفه ماليش أصحاب كتير هنا ونفسي ابقي قريبه منكم .

روضه: ناني انتي عارفه كويس اوي اننا مالناش في موضوع الشله عايزه تبقي قريبه مننا حاولي تغيري من نفسك واحنا جنبك ومعاكي.

ناني: اوكي ياروضه اوعدك اني هاتغير بس عليكوا جنبي عايزه منكم تكونوا مرايتي اللي بتوجهني للصح وتنصحني.

روضه؛ لازم يبقي عند اقتناع من جواكي علي التغير قبل الظاهر يالا بقي تصبحي علي خير.

ناني: وانتي من أهله وبعدها ذهبت ناني الي غرفتها وعلي وجهها ابتسامه انتصار فهي ربحت اول جوله وهي التقرب من شدوي عن طريق روضه .

__________________________________

 في المزرعه الخاصه بقاسم الشناوي كان محمود ابنه يقيم في الاستراحه فهو لا يعلم ما حدث لوالده فأمسك هاتفه واتصل علي أحد الأشخاص.

محمود: كيفيك وكيف الأحوال عندك اني بعتلك المصاريف اللي طلبتيها وزياده .

الشخص:…………..

محمود: اني عند كلمتي وزي ما عبدالله وصاني عليكي وعلي بتك عمري ما هقصر وياكوا بس اهم حاجه مافيش مخلوق يعرف مكانك .

الشخص:………..

محمود: يعني هي هاتشتغل مع جامعتها وفين الشغل ده عاد.

الشخص:………..

محمود: شركه المرشدي زين والله ربنا يبارك ويكرمك فيها 

الشخص:………..

محمود: بالسلامه وقريب هاكون عندكم اطمن عليكوا وكمان اجيبلك العقد البيت..

اغلق الهاتف وسرح في الماضي

فلاش باك……

عبدلله: محمود انت زي اخويا وانا ماليش حد بوصيك علي مراتي وولادي تخلي بالك منهم وانت عارف اختي وجوزها بعيد ومش هايهتموا بيهم.

محمود: ارتاح ياعبدلله وبإذن الله هاتقوم بالسلامه ومتخافش بيتك وولادك في رقبتي ليوم الدين.

عبدلله: ربنا يخليك يامحمود بس اهم حاجه امشي دلوقتي قبل ما المباحث تيجي عشان وضعك ووضع اخوك سالم .

محمود: ماتقلقش انا اتصلت علي سالم اخوي وفهمته كل حاجه وهايجيبلك حقك من ابن الالفي .

عبدلله: تسلملي يامحمود وربنا يبارك فيك وفي اخوك

باك….

محمود: الله يرحمك يا عبدالله ويرحم سالم اخوي يارب سامحني اني ماقدرتش اتكلم خوفت علي ولدي يتيتم وقتها.

سالم: بابا انت هنا وانا قالب عليك الدنيا .

محمود: خير ياسالم ياولدي اني هنا من الصبح وقالب الدنيا عليه ليه عاد.

سالم: جدي في المستشفي ودخل العنايه المركزه وانت السبب .

محمود: انت بتقول ايه ياولد ابوي في المستشفي كيف حصل ده ومااتصلتش عليه ليه ياولدي.

سالم: ماكنش معايا تليفون من خوفنا علي جدي نسينا كل حاجه في البيت.

محمود: هم بينا ياولدي نروحوا نطمنوا علي ابوي .

سالم: الدكتور مانع الزياره عشان جدي في العنايه وعمي طاهر روح البيت يطمن جدتي واللي في البيت وكلمت معتصم اسأله عليك قالي انك مش في الشركه.

محمود: اني هنا من وقت ما هملت البيت الصبح وماخابرش اي حاجه من اللي حصلت.

دخل يوسف عليهم وقال…..

يوسف: وانا عايز اعرف منك ياعمي اللي حصل بالظبط 

سالم: يوسف انت رجعت امتي حمدالله على سلامتك ياابن عمي.

يوسف: لسه واصل حالا وانا داخل بالعربيه لمحت نور الاستراحه منور وعربيتك موجوده قولت انزل اشوفك بس لاحسن حظي عمي كمان موجود.

محمود: كيفك ياولدي حمدالله علي السلامه الحمدلله رجعت في وقتك عشان جدك.

يوسف: الحمدلله ياعمي يالا بينا والصباح رباح علي رأي جدتي….